1. Gin ango ma gudo kitwa loyo?

 KADI bed pud wanongo batija nino mogo manok nyo mwaki mapol angec, wan ducu wamito dongo kit ma Jehovah maro. Me timo man, mitte ni wagwok tamwa. Pingo? Pien gin ma doro kitwa loyo obedo tamwa. Ka kare ducu wabedo ka tam i kom kit me cobo mitiwa keken, ci wabiwaco dok wabitimo jami maraco. (Ep. 4:17-19) Ento ka watamo jami mabeco, ci lokwa ki jami ma watimo biyomo cwiny Wonwa, Jehovah.—Gal. 5:16.

2. Lapeny mene ma wabinyamogi i pwony man?

² Kit ma kitito kwede i pwony ma okato-ni, pe watwero juko tam maraco ducu ki donyo i wiwa. Ento watwero yero pe me lubo tam magi. Ma peya wanongo batija, omyero wajuk loko ki timo jami ma Jehovah dagi. Man aye obedo yo mukwongo dok ma pire tek loyo me bwoto kitwa macon. Ento me yomo cwiny Jehovah maber, omyero bene walub cik man ma waco ni: ‘wuruk kit pa dano manyen.’ (Kol. 3:10) I pwony man, wabigamo lapeny magi: ‘Kit pa dano manyen’ obedo gin ango? Waromo ruko kit pa dano manyen kun bene wagwoko maber nining?

3. ‘Kit pa dano manyen’ obedo ngo, dok ngat moni twero rukone nining? (Jo Galatia 5:22, 23)

³ Ngat ma tye ki ‘kit pa dano manyen’ poro kit pa Jehovah. Ngat moni ruko kit pa dano manyen ki nyuto nyig ma nyak pi cwiny maleng pa Lubanga, kun weko cwiny maleng doro tamme, kit ma en winyo kwede, kacel ki jami ma en  timo. (Kwan Jo Galatia 5:22, 23.) Me labolle, en maro Jehovah kacel ki Jone. (Mat. 22:36-39) Dano ma kit meno medde ki bedo ki yomcwiny kadi bed en tye ka kanyo kwo matek. (Yak. 1:2-4) En obedo ngat ma kelo kuc. (Mat. 5:9) En lakica dok diyo cwinye i kit ma tero kwede jo mukene. (Kol. 3:12, 13) En maro dok bene timo gin maber. (Luka 6:35) En nyuto ki i jami ma en timo ni etye ki niye matek i kom Wonne me polo. (Yak. 2:18) En medde ki bedo mwol kadi jo mukene mito lweny kwede nyo gucwero cwinye dok en nyuto cwiny me jukke ken ka okemme ki atematema.—1 Kor. 9:25, 27; Tito 3:2.

4. Pingo omyero wadong kit ducu ma kiloko i komgi i Jo Galatia 5:22, 23?

⁴ Me ruko kit pa dano manyen, omyero wadong kit ducu ma kiloko i komgi i Jo Galatia 5:22, 23 kacel ki mukene ma kiloko i komgi i tyeng mukene i Baibul. * Kit magi pe gitye calo bongi mapatpat ma warukogi ki acel acel. Ki lok ada, pol pa kit magi ma nyak pi cwiny maleng pa Lubanga girom aroma ki kit mukene. Me labolle, ka imaro lawoti ada, ci ibidiyo cwinyi i kome dok ibinyute kica. Dok wek ibed ngat maber, omyero ibed mwol dok ijukke keni.

5. Tyen lokke ngo me bedo ki “tam pa Kricito” dok pingo omyero wakwan lok i kom kwo pa Yecu? (1 Jo Korint 2:16)

⁵ Kwan 1 Jo Korint 2:16. Me ruko kit pa dano manyen, mitte ni wabed ki “tam pa Kricito.” Me ketone i yo mukene, omyero wapwony kit ma Yecu tamo kwede dok walub lanenne. Yecu nyuto nyig ma nyak pi cwiny maleng pa Lubanga i yo maber adada. En nyuto kit pa Jehovah ducu i yo maber loyo. (Ibru 1:3) Ka wamedde ki tam calo Yecu, ci wabimedde ki timo jami kit ma en timo kwede dok wabibedo ki kero me ruko kit pa dano manyen.—Pil. 2:5.

6. Lok ada ango ma omyero wiwa opo iye ka watye ka ruko kit pa dano manyen?

⁶ Tika twere piwa me lubo lanen pa Yecu? Waromo tamo ni: ‘Yecu pe ki roc. An pe atwero bedo calo en matwal!’ Ka iwinyo kit meno, wi opo i kom lok ada magi. Mukwongo, kicweyi me bedo calo  Jehovah ki Yecu. Itwero yero me lubo lanengi, dok itwero bedo calo gin i rwom mo olo. (Acak. 1:26) Me aryo, cwiny maleng pa Lubanga aye obedo teko madit loyo i polo ki lobo. Ki kony pa cwiny maleng, itwero cobo jami ma onongo pe ibicobo piri keni. Me adek, Jehovah pe keto gingi ni omyero inyut nyig ma nyak pi cwiny maleng labongo roc mo keken i kare-ni. Ki lok ada Wonwa ma lamar-ri oketo mwaki 1,000 kulu pi jo ma gitye ki gen me kwo i lobo-ni me doko jo ma gipe ki roc. (Yabo 20:1-3) Gin ma Jehovah mito ki botwa kombeddi aye ni watute ki kerowa ducu dok wajenge i kome pi kony.

7. Gin ango ma dong wabinyamo kombeddi?

⁷ Dong, watwero lubo lanen pa Yecu nining? Wabinyamo kit angwen ki i kin nyig ma nyak pi cwiny maleng pa Lubanga. Pi kit magi ki acel acel, wabineno gin ma watwero pwonyo ki i yo ma Yecu onyuto kwede kit meno. Ka wawoto ki kwano kit magi wabinyamo lapeny mogo ma twero konyowa me medde ki dongo kit pa dano manyen.

8. Yecu onyuto mar nining?

⁸ Mar matut ma Yecu tye kwede pi Jehovah otugo cwinye me jalle kene pi Wonne ki piwa. (Jon 14:31; 15:13) Yecu onyuto tut pa mare pi dano ki i kit ma en okwo kwede i lobo kany. Nino ducu en onyuto mar ki kica, kadi bed jo mogo onongo gidage. Yo acel ma pire tek ma en onyuto kwede mare pi dano obedo ki pwonyogi lok i kom Ker pa Lubanga. (Luka 4:43, 44) Yecu bene onyuto ni etye ki mar ma kwako jalle ken pi Lubanga kacel ki pi dano, i kare ma oye ni lubalo guune dok guneke i yo malit adada. Timo meno oyabiwa yo me nongo kwo ma pe tum.

9. Waromo lubo lanen pa Yecu me nyuto mar nining?

⁹ Wadyere bot Jehovah dok wanongo batija pien wamaro Wonwa me polo. Dong calo Yecu, omyero wanyut marwa pi Jehovah i kit ma watero kwede dano. Lakwena Jon ocoyo ni: “Ngat ma pe maro ominne ma en oneno kome, pe twero maro Lubanga ma pe oneno kome.” (1 Jon 4:20) Waromo pennye kekenwa ni: ‘Tika dong adongo mar matek pi dano? Tika anyuto cwiny me kica bot jo mukene, kadi bed gin pe gitera maber? Tika mar tugo cwinya me tic ki cawana kacel ki jamina me konyo jo mukene me pwonyo lok i kom Jehovah? An mono atye atera me timo man kadi bed pol pa dano pe ginyuto pwoc pi tutena nyo ka gukwero lokka woko? Tika atwero nongo cawa me medo ticca me pwony?’—Ep. 5:15, 16.

10. I yo ma nining ma Yecu onongo obedo ngat ma kelo kuc?

¹⁰ Yecu onongo obedo ngat ma maro kuc. I kare ma dano gutere marac, en pe oculo wang gin marac i kom marac. Ento en pe ogiko ki timo meno keken. En okwanyo kare me yubo wat dok ocuko cwiny jo mukene me cobo peko ma tye i kingi. Me labolle, en opwonyogi ni omyero guyub wat ki utmegigi ka gimito ni Jehovah ojol worogi. (Mat. 5:9, 23, 24) Dok kare ki kare en otute me konyo lukwenane.—Luka 9:46-48; 22:24-27.

11. Watwero bedo jo ma gikelo kuc nining?

¹¹ Me bedo ngat ma kelo kuc, pe mitte ni wagwokke ki kelo kukukuku keken. Mitte bene ni wakwany kare me yubo wat kun wacuko cwiny omegiwa ki lumegiwa me cobo peko ma tye i kingi. (Pil. 4:2, 3; Yak. 3:17, 18) Waromo pennye kekenwa ki lapeny  magi: ‘Gin ango ma an atye atera me jalone wek ayub wat ki jo mukene? Ka omego nyo lamego mo ocwero cwinya, tika an amako lok i cwinya? Tika an akuro ni ngat ca aye obin bota ka yubo wat, nyo mono an aye akwongo kwanyo kare me yubo wat kadi bed nen calo ngat ca aye okelo peko-ni? Ka opore, tika an acuko cwiny jo ma gitye ki niang manok i kingi me yubo wat?’

12. Yecu onyuto cwiny me kica nining?

¹² Yecu onongo obedo ngat ma lakica. (Mat. 11:28-30) En onyuto kica ki bedo ngat mamwol kun bene ye tam pa jo mukene, kadi wa i kare ma timone pe yot. Me labolle, i kare ma dako mo ma Lakanaan olege ni ocang latinne, i acakkine, en okwero timo gin ma dako-ni olege ni otim, ento lacen i kare ma dako-ni onyuto niye matek, en ocango latinne. (Mat. 15:22-28) Kadi bed ni Yecu onongo obedo lakica, en pe olworo miyo tira. I kare mukene, en onongo nyuto cwiny me kica ki miyo tira bot jo ma en marogi. Me labolle, i kare ma Petero otemo gengo Yecu ki timo miti pa Jehovah, Yecu omine tira atyer ka maleng i nyim lupwonnyene mukene-ni. (Mar. 8:32, 33) En otimo man pe me lano Petero, ento me mine pwony ki me ciko lupwonnyene mukene-ni pe me ette ka timo gin ma pe gitye ki twero me timone. Labongo akalakala mo, lewic omako Petero ento en bene onongo pwony maber ki i tira meno.

13. Watwero nyuto cwiny me kica nining?

¹³ Me nyuto kica bot jo ma imaro, i kare mukene twero mitte ni iminigi tira. Ka ibitimo meno, itwero lubo lanen pa Yecu ki miyo tira ma jenge i Lok pa Lubanga. Mi tira labongo gero. Bed ki neno maber i komgi, kun igeno ni jo ma maro Jehovah dok gimari gibijolo tirani me mar. Pennye kekeni ki lapeny magi: ‘Tika atye ki tekcwiny me miyo tira ka aneno ngat mo ma amaro tye ka timo gin ma pe tye atir? Ka mitte ni ami tira, tika aloko i yo me kica, nyo aloko ki gero? Tyen lok ango ma weko an amiyo tira? Tika amiyo tira pien dano-ni otimo gin ma ocwero cwinya nyo pien aparo pire?’

14. Yecu nyuto ber kit nining?

¹⁴ Yecu pe ngeyo gin maber keken ento en bene timo. Yecu maro Wonne, pi meno en timo gin ma atir kare ducu pi tyen lok ma atir. Ngat ma kite ber kare ducu yenyo yo me konyo jo mukene kun timo jami mabeco pigi. Ngeyo gin ma atir me atima keken pe romo, omyero watim gin ma atir dok pi tyen lok ma atir. Waromo pennye kekenwa ni: ‘Tika twere me timo gin maber pi tyen lok ma pe tye atir?’ Ada, twere. Me labolle, Yecu oloko i kom jo ma onongo gimiyo mic me konyo lucan ento onongo giyelle wek dano gunengi dok gupakgi pi gin ma gutimo. Kadi bed ticgi me miyo mic me konyo lucan onongo obedo gin maber, Jehovah cwinye pe obedo yom i komgi.—Mat. 6:1-4.

15. Watwero bedo jo maber nining?

¹⁵ Watwero bedo jo mabeco keken ka watimo gin ma atir pi tyen lok ma atir. Dong waromo pennye ki lapeny magi: ‘An mono pe angeyo gin maber me atima keken, ento bene atimo? Gin ango ma tugo cwinya me timo jami mabeco?’

16. Gin ango ma omyero watim nino ducu, dok pingo?

¹⁶ Pe omyero watam ni ka wanongo batija nongo dong watyeko ruko ki pa dano manyen woko dok pe mitte ni watute  ki rukone. Kit pa dano manyen tye calo “bongo manyen” ma omyero wagwok maber. Yo acel ma watwero timo kwede meno aye ki yenyo yo nino ducu me nyuto kit mogo ma tye i kin nyig ma nyak pi cwiny maleng pa Lubanga. Pingo? Pien Jehovah tiyo ki cwiny mere maleng me kelo adwogi maber. (Acak. 1:2) Pi meno, nyig ducu ma nyak pi cwiny maleng myero otug cwinywa me timo gin mo. Me labolle, lapwonnye Yakobo ocoyo ni: “Niye ka pe giketo i tic, nongo dong oto woko.” (Yak. 2:26) Meno tye ada pi nyig mukene-ni ducu ma nyak pi cwiny maleng pa Lubanga. Kare ducu ka wanyuto kit magi, wamoko ni cwiny maleng tye ka tic i kwowa.

17. Ngo ma omyero itim ka nyuto nyig ma nyak pi cwiny maleng oloyi woko i kare mogo?

¹⁷ Kadi wa Lukricitayo ma gunongo batija mwaki mapol angec, pud i kare mukene ginongo ni nyuto nyig ma nyak pi cwiny maleng loyogi woko. Ento gin ma pire tek aye ni omyero wamedde ki tute matek me nyuto kit magi. Nen kong labol man. Ka iyeco bongoni ma imaro loyo, tika ibibolo woko cutcut? Pe. Labongo akalakala mo ibitute matek me kwoyo ka ma oyec-ci. Dok ibigwokke adada i nge yubone. I yo acel-lu, ka i kare mo pe itero ngat mo ki kica nyo mar, dok pe idiyo cwinyi i kome, pe iwek cwinyi oballe woko. Ka icito ikwayo kica, ci itwero yubo wat ma oballe i kinwu-ni, dok man bedo calo kwoyo ka ma oyec ki i bongoni. Dok imok tammi pe me nwoyo bal acel-li i anyim.

18. Gin ango ma itwero bedo ki gen iye?

¹⁸ Pud dong watye ki pwoc madit adada ya me bedo ki labol pa Yecu! Ka wamedde ki lubo tamme ci bidoko yot piwa me poro kite. Ka walubo kit pa Yecu macok, wabibedo ki kero me ruko kit pa dano manyen. I pwony man, waneno kit angwen keken ki i kin nyig ma nyak pi cwiny maleng pa Lubanga. Twero bedo ber piri me kwanyo kare me kwano lok i kom kit mukene ma cwiny maleng konyowa me nyutone kun bene ingiyo ka itye ka nyutone i kwoni. Ibinongo kiryeyo pwony mapatpat ma loko i kom nyig ma nyak pi cwiny maleng i Buk ma Konyo Lucaden pa Jehovah me Kwedo Lok i te wi lok me “Kwo Calo Lakricitayo”, ci iyeny i te “Nyig ma Nyak pi Cwiny Maleng” Itwero bedo ki gen ni ka itimo me ka megi, Jehovah bikonyi me ruko kit pa dano manyen kun bene igwoko maber.