1. Бистиҥ эдип турган керектерис ле айткан сӧстӧрис озо ло баштап недеҥ камаанду?

 БИС туку алдында да чӧҥӱрилген болзоос эмезе бу јуукта да чӧҥӱрилген болзоос, Кудайга јараар эдип јӱрерге кӱӱнзейдис. Је Кудайга јараарга, бажысты неле толтырып турганысты кӧрӱп турар керек. Нениҥ учун дезе эдип турган керектерис кӧп сабада бажыстагы санааларыстаҥ камаанду. Јаҥыс бойыныҥ кӱӱнин бӱдӱрерге јӱрген кижиниҥ куучыны да, эткен керектери де јакшы болбос (Эф. 4:17—19). Је Кудайдыйын сананып јӱрген кижиниҥ эткен керектери ле айткан сӧстӧри Иегова Адабысты сӱӱндирер (Гал. 5:16).

2. Бу јӧрмӧлдӧҥ кандый сурактардыҥ карууларын аларыс?

² Ӧткӧн јӧрмӧлдӧ јаман санаалар тӱҥей ле келип турар деп кӧргӧнис. Је бис андый санааларга јединдирбес аргалу. Сууга чӧҥӱрилердеҥ озо Иегованыҥ кӧрӧр кӱӱни јок керектердеҥ ле санаалардаҥ айрылып калар керек. Бу дезе «озогы кижини» уштыырга болужатан баштапкы јаан алтам болуп јат. Је биске јӱк ле «озогы кижини» уштып салар керек эмес, је Агару Бичикте айдылганыла, «јаҥы кижини» кийип алар керек (Кол. 3:10). Бу јӧрмӧлдӧ мындый сурактар кӧрӱлер: 1) «Јаҥы кижи» ол не дегени? 2) Оны канайып кийип алар ла оны уштыбаска нени эдер керек?

3. Галаттарга 5:22, 23-ле болзо, «јаҥы кижини» кийип алганы ол не дегени? «Јаҥы кижини» кийип алган кижи кандый болот?

³ «Јаҥы кижини» кийип алган кижи санаазыла, керектериле Иегованыҥ кылык-јаҥына тӱҥей. Андый кижи Кудайдыҥ агару тыныныҥ тӱжӱмине кирип турган кылык-јаҥдарды кӧргӱзет. Оныҥ санаазынаҥ, сезимдеринеҥ ле керектеринеҥ ондо Кудайдыҥ агару тыны бар деп кӧрӱнип  јат. (Галаттарга 5:22, 23 кычырыгар.) Темдектезе, ол Иегованы да, оныҥ улузын да сӱӱп јат (Матф. 22:36—39). Кӱчтердиҥ ӧйинде сӱӱнчизин јылыйтпай јат (Иак. 1:2—4). Улусла амыр-энчӱ јадарга албаданат (Матф. 5:9). Улуска чыдамкай ла јалакай болот (Кол. 3:12, 13). Јакшыны сӱӱйт, јакшыны эдет (Лука 6:35). Анайда ок теҥеридеги Иегова Адазына бек бӱдӱмјизин бойыныҥ керектериле кӧргӱзет (Иак. 2:18). Кем-кем ӧнӧтийин ачындырып турза, јобош болот. Ченелте болгон тушта бойын тудунып јат (1 Кор. 9:25, 27; Тит. 3:2).

4. Агару тынныҥ кылык-јаҥдарын кийимди кийгени чилеп, бирдеҥ кийер арга бар ба? Јартап беригер.

⁴ «Јаҥы кижини» кийип аларга, агару тынныҥ тӱжӱмине кирип турган кылык-јаҥдардыҥ ончозын кийип алар керек *. Је оны кийимди бир уунда бирдеҥ кийгени чилеп кийип болбозыс. Нениҥ учун дезе бу кылык-јаҥдар бой-бойыла јуук колбулу. Темдектезе, јуугына јалакай, чыдамкай эмес кижини јуугын сӱӱп турган деп айдарыс па? Ол эмезе бойын тудунып билбес, јобош эмес кижини јалакай деп айдарыс па?

5. Христос чылап сананары ол не дегени? Нениҥ учун Иисустыҥ јӱрӱмин шиҥдеп турар керек? (1 Коринфтегилерге 2:16).

⁵ 1 Коринфтегилерге 2:16 кычырыгар. «Јаҥы кижини» кийип аларга, Христос чылап сананар керек. Ӧскӧртӧ айтса, биске оныҥ санаазын билип алар керек ле оноҥ тем аларга албаданар керек. Нениҥ учун дезе Иисус агару тынныҥ тӱжӱмине кирип турган кылык-јаҥдардыҥ ончозын кӧргӱзерге сӱреен јакшы ӱренип алган. Иисустаҥ Адазыныҥ кылык-јаҥы јалтырада јыжып койгон кӱскӱнеҥ чилеп јап-јарт кӧрӱнип јат (Евр. 1:3). Канча ла кире Иисус чылап сананарга албаданып турзаас, ончо ло кире ого тӱҥей болуп каларыс (Флп. 2:5).

6. «Јаҥы кижини» кийип аларга нени ундыбас керек?

⁶ Бис Иисуска тӱҥейлежип болорыс па? Је кезик улус айдар болор: «Иисус бийик кеминде не. Бисте ондый болотон арга јок!» Слерде андый санаа келип турган болзо, шӱӱп кӧрӧр. Баштапкызында,  Иегова ла Иисус бисти бойына кеберлеш эдип јайаган (Баш. 1:26) Је мындый сурак чыгып јат: слер чыннаҥ ла тӱзединер кӱӱндӱ бе? Тӱзединер арга бар, слер албаданзаар келиже ле берер. Экинчизинде, Иегова ла Иисус биске бойыныҥ агару тынын берет. Агару тын — јер-телекейдиҥ ӱстинде эҥ ле јаан ийде-кӱч. Оныҥ болужыла бис этпести де эдерис. Ӱчинчизинде, Иегова бистеҥ эмди ле Иисус ошкош бийик кеминде болорын сакыбай јат. Оныҥ учун биске тӱзединерге Иегова 1 000 јыл бергенин ундыбагар! (Ачыл. 20:1—3). Иегова бистиҥ канча кире аргабыс бар ого иженип тӱзединеристи сакып јат.

7. Бис нени кӧрӧрис?

⁷ Биске Иисуска тӱҥейлежерге нени эдер керек? Агару тынныҥ тӱжӱминиҥ тӧрт јараш кылык-јаҥын кӧрӱп ийектер. Иисус улуска сӱӱштӱ, јымжак ла јалакай баштанган, анайда ок улусты амыр-энчӱге јӱткӱткен. Оныҥ учун Иисустаҥ неге ӱренип аларысты кӧрӱп ийерис. Анайда ок «јаҥы кижини» јазап кийип алганыс па деп билип аларга болужатан сурактар шӱӱжип ийерис.

8. Иисустыҥ сӱӱжи недеҥ кӧрӱнген?

⁸ Иисустыҥ сӱреен тыҥ сӱӱжи Кудайла бисти јууктадарга бойыныҥ јӱрӱмин тайылга эдип бергенинеҥ кӧрӱнип јат (Иоанн 14:31; 15:13). Иисус јерде јӱрерде улуска сӱӱжин кажы ла кӱн кӧргӱскен. Је база бир јаан сӱӱжи, оныҥ улуска Каандык керегинде сӱӱнчилӱ јар айтканы (Лука 4:43, 44). Је анайда ок оны истеп ле јаман кӧрӱп турган улуска ол јалакай ла јымжак баштанган. Иисус Иегова ла улусты сӱӱген учун бойыныҥ јӱрӱмин бир де кысканбай, шыралгалу ӧлӱмле ӧлгӧн. Оныҥ ӧлӱми Иисусты сӱӱген улуска ӱргӱлјиге јӱретен јол ачкан.

9. Бис Иисустыҥ сӱӱжине тӱҥейлежерге нени эдер аргалу?

⁹ Бис теҥеридеги Адабысты тыҥ сӱӱп турганыстаҥ улам ого јӱрӱмисти учурлап, чӧҥӱрилгенис. Је Иеговага сӱӱжисти тыҥыдарга, бис Иисус чылап улусты сӱӱр учурлу. Апостол Иоанн мынайып айткан: «Кӧрӱп турган карындажына карузыбазы, кӧрбӧй турган Кудайды сӱӱп болбос» (1 Иоанн 4:20). Оныҥ учун биске бойыстаҥ сураар керек: «Бис улусты чыннаҥ ла сӱӱп турганыс па? Бис белен бе, ӧйисти ле кӱчисти карамдабай, улуска Иегова Кудай керегинде куучындаарга? Биске удура кату баштанган улуска бис јымжак баштанып болорыс па? Мениҥ албаданганымды кӧп саба улус керекке албай турза эмезе јаман кӧрӱп турза, мен канайдарым? Ӱренчиктер белетейтен ишке кӧп ӧйимди берип болорым ба?» (Эф. 5:15, 16).

10. Иисус улусла амыр јӱрерин сӱӱген кижи деп, нениҥ учун айдарыс?

¹⁰ Иисус улусла амыр јӱрерин сӱӱр кижи болгон. Ого јаман баштанган улуска ол качан да јаман баштанбаган. Катулана берген айалганы ол јымжадып туратан. Улус сӧс блаажып турза, ол олорды эптештирип койотон. Бис ака-эјелерле амыр-энчӱ јӱрер учурлу, оноҥ башка бистиҥ Иеговага бажырганыс калас болор деп, Иисус ӱреткен (Матф. 5:9, 23, 24). Ол канча ла катап апостолдорына «кемизи улу-јаан» деп блааш-тартышты токтотсын деп айдып туратан (Лука 9:46—48; 22:24—27).

11. Амырды јайаарга нени эдер керек?

¹¹ Амырды јайаганы — ол јаҥыс ла блааш-тартышту айалганаҥ кыйып турары эмес. Андый кижи амыр јок јерде амыр јайап јат ла ака-эјелердиҥ ортозында кериш-чугаан болуп турза, ол олорды эптештирерге албаданат (Флп. 4:2, 3;  Иак. 3:17, 18). Оныҥ учун бойыстаҥ мындый сурактар сураар керек: «Айландыра улусла амыр јадарга, мен нени эдерге белен? Мен кемге-кемге ачынзам, ачынганымды бойыма тӱӱп аладым ба? Јаражып аларга озо мен бойым јууктайдым ба, ол эмезе мени ачындырган кижи озо јууктазын деп сакыйдым ба? Кезик айалгаларда, ачыныжып турган улусты эптештирерге албаданадым ба?»

12. Иисустыҥ јалакайы кайдаҥ кӧрӱнген?

¹² Иисус сӱреен јалакай кижи болгон (Матф. 11:28—30). Кезикте Иисуска јеҥил эмес те болгон болзо, ол улустыҥ кӱӱн-санаазын оҥдоп, олордыҥ кӱӱн-санаазыла болзын деп эдип туратан. Санаагарга кирет пе, бир учуралда Финикий ӱй кижи Иисустаҥ баламды јазып ийзеҥ деп коркышту јайнаган. Озо баштап Иисус оныҥ сурагын бӱдӱрбеске сананган, је ӱй кижиниҥ тыҥ бӱдӱп турганын кӧрӱп, оныҥ сок јаҥыс кызычагын јазып ийген (Матф. 15:22—28). Иисус кандый учуралда јалакай болотонын, кандый учуралда тӱзедип ийетенин билер болгон. Оныҥ учун кезик ӱренчиктерине тӱзедӱ керек болзо, ол јалтанбай тӱзедип ийетен. Бир катап Пётр Иегованыҥ кӱӱн-табын оҥдобой, Иисуска чаптык эткен. Мынаҥ улам Иисус оны ӧскӧ ӱренчиктериниҥ кӧзинче кезе тӱзедип ийген (Марк 8:32, 33). Је ол Пётрды уйатка тӱжӱрерге эмес, карын ӧскӧ ӱренчиктери бойына база ӱредӱ алзын деп эткен. Нениҥ учун дезе ӱренчиктери Иисуска чаптык этпей, карын ого бастыра јанынаҥ јӧмӧжӧр учурлу болгон. Ол ӧйдӧ Пётрга эби јок то болгон болзо, је кийнинде ол бойына јаан туза алган.

13. Улуска јалакай баштанганыс кайдаҥ кӧрӱнет?

¹³ Кезикте бистиҥ јалакайыс јуук најыларыстыҥ јастырып турганын кӧрӱп, кӧзине тӱзеткенистеҥ кӧрӱнет. Је мындый айалгада Иисуска тӱҥейлежерге албаданыгар. Слердиҥ айткан сӧзигер Агару Бичикке тӧзӧлӧнгӧн болзын. Улустыҥ санаа-шӱӱлтезин тооп туругар, анайда ок јастырып турган најыгарды кӧрӱп, ол керегинде јаман неме сананбагар. Иегова ла Иисусты сӱӱп турган најыҥ кийнинде сениҥ болушканыҥды кӧрӱп, быйанду болор. Бойоордоҥ мындый сурактар сурагар: «Мениҥ јуук најым јастырып турза, оны јалтанбай тӱзедип болорым ба? Тӱзедер тушта мен ого јалакай эмезе кату баштанадым ба? Мен болужарга турганымнаҥ улам ба эмезе кыртыштанып турганымнаҥ улам тӱзедедим бе?»

14. Јакшыны канай эдерин Иисустыҥ теминеҥ јартап беригер.

¹⁴ Иисус јалакай болор керек деп јӱк ле оҥдогон эмес, је јалакайын керектериле кӧргӱскен. Ол Адазын сӱӱгенинеҥ улам ӱзе немени чын кӱӱн-санаалу эдип, бир де јастырбай туратан. Оныҥ учун јалакай болор керек деп јӱк ле оҥдоор керек эмес, је керектерле де кӧргӱзер керек. Бистиҥ керектерис улуска тузазын эмезе каршузын јетирет. Айдарда, јакшы неме эдип тура, бистиҥ санаабыс та ару болор керек. Та кем де кайкаар болор: «Јакшы неме эдип турган кижиде јаман санаа канай болот?» Мындый учуралдар болуп ла турган. Темдектезе, санаагарга кирет пе, Иисустыҥ ӧйинде кезик улус јоктуларга болужып туратан. Је олор оны улуска ла јакшы кӧрӱнерге ле олордоҥ мак аларга эткен. Олордыҥ экијӱстенип эткен јакшы кереги Иегова Кудайды бир де сӱӱндирбеген (Матф. 6:1—4).

15. Јалакай болоры ол не дегени?

¹⁵ Јалакай болоры — јакшы керектерди акту јӱректеҥ эдери. Бойыгардаҥ сурап кӧрӱгер: «Мен јалакай болор керек деп јӱк ле оҥдоп јадым ба, ол эмезе керектеримле де кӧргӱзип јадым ба? Мен  нениҥ учун јалакай болорго кӱӱнзеп јадым?»

16. Биске кажы ла кӱн нени эдер керек ле нениҥ учун?

¹⁶ Чӧҥӱрилген кийнинде јаантайынга «јаҥы кижи» болуп калдым деп сананары јастыра. Јараш јаҥы кийимди чеберлеер керек. Је оны канайып чеберлеер? Агару тын бисле башкарзын деп, кажы ла кӱн албаданар керек. Канча ла кире албаданзаас, ончо ло кире Иегова биске агару тынын берер. Нениҥ учун дезе Иегова бойы да нени де этпей отурбай јат, оныҥ агару тыны да бойыныҥ ижин эдет (Баш. 1:2). Оныҥ учун агару тынныҥ тӱжӱми бистиҥ эткен керектеристеҥ кӧрӱнип турар керек. Темдектезе, Агару Бичикте Иаков бичиген: «Бӱдӱмји де эдилген керектер јокко јӱрӱм јок» (Иак. 2:26). Мынайып агару тынныҥ тӱжӱминиҥ ӧскӧ дӧ кылык-јаҥдарын айдарга јараар.

17. Кезикте христиан кылык-јаҥды кӧргӱзип болбогон болзоос, биске нени эдер керек?

¹⁷ Бис канча јыл кайра чӧҥӱрилип калган да болзоос, христиан кылык-јаҥдарды кӧргӱзерге кӱч болуп јат. Је слер бир де чӧкӧбӧгӧр. Эмди бир тем кӧрӱп ийектер: бойоорго јарап турган эптӱ кийим јыртылып калган болзо, слер оны капшай ла чачып ийбезигер не? Слер оны ойто кӧктӧп алала, чеберлеп тудунараар. Бу темди ака-эјелердиҥ ортозында канайып тузаланарын кӧрӱп ийектер. Кезикте бис ака-эјелерге сӱӱштӱ, јалакай, јымжак баштанбаганыстаҥ улам бистиҥ јуук колбуларыс сооп, бой-бойыстаҥ ыраажа берердеҥ айабазыс. Ондый айалгада акту кӱӱнистеҥ «јаманымды ташта» деп сураганыс најыларысла колбуларысты јылыдар. А кийнинде јуук колбуларысты чеберлеерге албаданарыс.

18. Биске неде алаҥзыбас керек?

¹⁸ Бис Иегова Кудайыска Иисус Христостыҥ теминеҥ ӱренетен арга бергенине сӱреен јаан быйанду. Иисустыҥ кӧрӱм-санаазын бойыска алынзаас, биске ол чылап јӱрерге јеҥил болор. Анайып, «јаҥы кижиниҥ» кийимин јазап кийип аларыс. Бу јӧрмӧлдӧ агару тынныҥ тӱжӱминиҥ јӱк ле тӧрт кылык-јаҥын кӧрдис. Агару тынныҥ тӱжӱминиҥ арткан кылык-јаҥдарын бойыгар шиҥдеп кӧрӱгер. Слер олорды бойоордыҥ јӱрӱмеерде канайып кӧргӱзип турганаар? Мынайып шиҥдеерге, «Путеводитель по публикациям Свидетелей Иеговы» (Христианская жизнь > Плод духа) деп бичик болужар. Бир де алаҥзыбагар, канча кире аргагар бар албаданып турзагар, Иегова биске «јаҥы кижини» кийип алала, качан да уштыбаска болужар.