1. O maanan ko taˈangayay a mamifiyor to capeling no mita?

 ANO pinaayho romiˈad micada kita to paputisem, anca pinaayto poloˈ a miheca, makalimay kita o kahacecacecay tamdaw mala kaolahan ni Yihofa a tamdaw. Sapalaˈosiaw tonini a patosokan i, misaaliay kita to sapiˈimeraw to harateng no niyah. Misamaanay hani? Samanen o harateng ita taˈangayay ko pifiyor to capeling. Ano micerid kita miharateng misamaan parenec to no tekedan a coos, o sasowalen waywayan ita wa irato ko pasangar. (Ifiso 4:17-19) O roma pakayraan i, ano micerid kita miharateng to ciepocay a demak, o sasowalen ato waywayan ita wa madoloto pakahemek to kakarayan a Wama ci Yihofaan.—Kalatiya 5:16.

2. Onini a lalakaw mamilengo to maanan hani?

² Masowalay i fafekangay lalakaw, itini i ponoˈ ita awaawa sa iraay ko mararaway a harateng, kawra ngaˈayay kita mipiliˈ eca ka pitoor tonini a harateng midemak. ˈAyaw no micada kita to paputisem o fafalahento ko kaˈintehan ni Yihofa a sasowalen ato waywayan, o saka cecay konini mihelong to katelangan a capeling, o sakakaay kalimlaan konini. Sapakahemekaw ci Yihofaan, o mamitengilho kita to laenoay a sapalimoˈot: ‘Ka picaˈedong to faelohay a capeling.’ (Kolosay 3:10) Onini a lalakaw mamilengo to laenoay a salicay: O maanan ko ‘faelohay a capeling’? Sasamaan ngaˈ micaˈedong to faelohay a capeling, hanaca padadotoc micaˈedong i tireng?

3. O maanan ko ‘faelohay a capeling’? Samaan ko demak no tamdaw, o micaˈedongayto to ‘faelohay a capeling’? (Kalatiya 5:22, 23)

³ ‘O faelohay a capeling’ o pakayraan a misimsim ato midemak, ngaˈay paihkal to capeling ni Yihofa. O cecay a tamdaw piharateng no niyah, nafalocoˈan ato pidemak makayat no fangcalay saocor, paihkal to minaroˈan no fangcalay saocor a capeling, o micaˈedongayto to ‘faelohay a capeling.’ (ˈOsien ko Kalatiya 5:22, 23.) * Tinakoen, maolahay cingra ci Yihofaan, maolahho to romaroma midokoay ci Yihofaan a tamdaw. (Matay 22:36-39) Tahalifa to sapalifet ato pasangaray i, padadotocay cingra a lipahak. (Yakop 1:2-4) Micowatay cingra to rihaday. (Matay 5:9) Micada to tao i, pairaay cingra to mihadidiay ato sidaˈitay. (Kolosay 3:13) Maolahay cingra to ngaˈayay, micerid midemak to ngaˈayay. (Luka 6:35) Tanoktokay ko pakasoˈlin ningra to kakarayan a Wama, iraayho ko mahecaday a demak. (Yakop 2:18) Ano ira ko pakangolaway cingranan a tamdaw, padadotocay cingra a damsay. Ano makayhid i, paihkalay cingra to miˈimeray.—1 Korinto 9:25, 27; Titus 3:2.

4. Masowalay i Kalatiya 5:22, 23 a makapahay a capeling, wa ngaˈay kita cecay aca ko palahadan a capeling han? Tadtaden hena.

⁴ Sapicaˈedongaw to faelohay a capeling, o papalahad kita to masowalay i Kalatiya 5:22, 23 ato masowalay no roma sinael a polong makapahay a capeling. * Onini a capeling caka lecad to cecacecay a rikoˈ, kinacecay cecayay aca ko micaˈedongan. Soˈlinay i, onini a capeling cowa ka ngaˈay palicinowasen, o malalitingay maemin. Tinakoen, ano soˈlinay maolah kiso to tao, o sasidaˈit mihadidi a micada cangranan. Ano soˈlinay ngaˈay kiso, o papaihkal kiso to damsayay ato miˈimeray to niyah.

5. ‘Pairaen ko ni Kristo a harateng’ o manan ko tatodong hani? Hano mamicalep kita minanam to pakayraan ni Yis mala tamdaw ato dademak? (1 Korinto 2:16)

⁵ ˈOsien ko 1 Korinto 2:16. Sapicaˈedongaw kita to faelohay a capeling i, pairaen ko ni ‘Kristo a harateng,’ o tatodong i wa minanam kita to pakayraan ningra a misimsim, hanaca mitodong to taˈarawan ningra. Malefotay ci Yis paihkal to minaroˈan no fangcalay saocor a masakenakenaay a capeling, mahecaday cingra to cowa ka ˈari a makapahay a dadingoan, malefotay a paihkal to makapahay a capeling ni Yihofa. (Hipray 1:3) O harateng ita mangalef ko nika hecad ci Yisan, o waywayan wa mangalef ko nika hecad cingranan, ano mihaen o capeling ita wa matongal ko kalecad cingranan.—Filipi 2:5.

6. Itini pisaˈicel micaˈedong to faelohay a capeling i, mamiharateng kita to maanan pina a demakan hani?

⁶ O ngangaˈay kita mitodong to taˈarawan ni Yis han? Saan kita miharateng alatek: “O malefotay ci Yis, ano tahadaˈocto cato ka lecad kako cingranan.” Ano iraay ko mahaenay a harateng iso, haratengen ko ilaenoay pina a demak. Saka 1, o mitooran ni Yihofa aci Yis ko tatirengan a misangaˈ kiso, mihaenay o ngangaˈay kiso mipiliˈ a mitodong Cangranan, hanaca o mamadangar iso. Soˈlin cowa ko mamalefot ko midemakan iso, kawra, itini cecay palinian o mamalecad kiso Cangranan. (Satapangan 1:26) Saka 2, o fangcalay saocor no Kawas o sataˈangayay a ˈicel itini i dohaw. Ira ko sapadama nonini a ˈicel, o mamalaˈosi ita ko cowa ko mamadangar no niyah a demak. Saka 3, cowa pisaali ci Yihofa tisowanan anini malefot ko paihkal to masakenakenaay a capeling no minaroˈan no fangcalay saocor. Tada sidaˈitay ko kakarayan a Wama ita, itini i lakoing pairaen Ningra ko 1,000 miheca a toki no tamdaw palidlid sa a malefot. (Paˈarawan 20:1-3) O saali ni Yihofa kitaanan anini edeng misarocod kita mitadiˈec Cingranan, hanaca misaˈicel a midemak.

7. Dotoc wa milengo to maanan hani?

⁷ Ihkalen ko sowal i, sasamaan kita mitodong ci Yisan hani? Dotoc i, maminengneng kita to minaroˈan no fangcalay saocor a sepat a capeling. Milengo to kahacecay a capeling i, wa minengneng kita mikitini ci Yisan mananam ko maanan, wa misaka dademak to salicay mifolfol to samanay ko demak ita itini i picaˈedong to faelohay a capeling.

8. Samaanay ci Yis paihkal to olah?

⁸ Tangongolay ko olah ni Yis ci Yihofaan, kawra cowa ko kakarayan aca a Wama ko paihkalan ningra to cowa pisateked a olah, paihkalayho kitaanan to mahaenay a olah. (Yohani 14:31; 15:13) Mikitini kaˈorip ni Yis i fafekang no sera wa ngaˈay mahapinang ita tangongolay ko olah ningra to tamdaw. Soˈlin micada to pisafelit, kamayan ci Yis to romiˈamiˈad paihkal to olah ato siniˈadaay a falocoˈ i tamdaw. O kalimlaan a pakayraan ningra a paihkal to olah i tamdaw i, pasifanaˈ cangranan mafanaˈ to Hongti Kitakit no Kawas. (Luka 4:43, 44) Roma i, hayi sanay ci Yis i kamay no mararaway a tamdaw misemsem a mapatay, paira to hatoki no polong a tamdaw milifok to midaˈocay a ˈorip paihkalay konini to cowa pisateked a olah ningra to Kawas ato tamdaw.

9. Sasamaan kita mitodong ci Yisan paihkal to olah i tamdaw?

⁹ Patafang to tireng micada to paputisem kita samanen o tangongolay ko olah ci Yihofaan. Mahecad ci Yisan, maolah kita ci Yihofaan i, o mamisaˈicel maolah to tao. Saan ko tarokos ci Yohani: ‘O cima ko cowa ka olah to maˈaraway a salikaka, cowa ko mamaolah to cowa kaˈaraw a Kawas.’ (1 Yohani 4:20) Ngaˈay salalicayen ita ko niyah: “Iraay ko tangongolay a olah ako to tao han? Soˈlin caka ngodo ko tao takowanan, wa makahi kako misodod cingranan, padadotoc mikangaˈay cingranan han? Mamakahi kako misaka dademak to toki ato hafay padama to tao mafanaˈ ci Yihofaan han? Soˈlin caka semer ko ˈalomanay tamdaw to mihadakan ako a ˈicel, misafelitho takowanan, kamayan kako makahi padadotoc mitosil han? Wa makahi kako mipalak to adihayay a toki padama to tao mala Krisciyang han?”—Ifiso 5:15, 16.

10. Ci Yis samaanay micowat to rihaday hani?

¹⁰ Misaˈicelay ci Yis micowat to rihaday. Ano mariˈang ko tao cingranan i, cowa ka tano mariˈangay ko patikol to mariˈangay. Cowa ka hatini aca, talaˈayawayho cingra micowat to rihaday, pakalalok cangranan misaysay to lacongis. Tinakoen, pasifanaˈay cingra to tao, ano makalimay cangra cadaen ni Yihofa ko pidoko nangra, o mararihaday to salikaka. (Matay 5:9, 23, 24) Tinakoen, saliyaliyaw sanay ko tarokos malacongis to cima ko sataˈangayay, kawra cowa ka ˈisang ci Yis a padama cangranan mararihaday a malacafay.—Luka 9:46-48; 22:24-27.

11. Sasamaan kita micowat to rihaday hani?

¹¹ Sapicowataw to rihaday, cowa ko piliyas aca ita mikidat to lacongis, mifekad ko pasangar i, talaˈayaw malakangaˈay to tao. Roma i, pakalaloken ita ko salikaka mifalah to misakakinihay. (Filipi 4:2, 3; Yakop 3:17, 18) Ngaˈay salalicayen ita ko niyah: “Sapitafoaw to rihaday to tao, wa makahi kako kinafalah to manan hani? Ano madokaˈ no salikaka kako i, wa ˈinteh ko falocoˈ ako han? Ano mifekad ko pasangar i, mitalaay kako to tao malakangaˈay takowanan han? Anca, soˈlin o tao ko saˈayaw mararaw, mamakahi kako talaˈayaw a malakangaˈay han? Ano matatodongay i, papakalalok kako to tao misaysay to lacongis han?”

12. Samanay ko demak ni Yis, paihkal to damsayay cingra to tamdaw?

¹² Tada sidaˈitay ci Yis, mansa padadotocay a damsay, makahi a micaˈi. (Matay 11:28-30) Tinakoen, o cecay Foinikiya a fafahiyan micangacangay ci Yisan miadah to wawa ningra, satapang aca minaˈayan ni Yis. Kawra paihkal konini fafahiyan to tanektekay a pakasoˈlinay ikor, sidaˈitayto ci Yis cingranan, miadah to wawa ningra. (Matay 15:22-28) Roma i, soˈlin tada sidaˈitay ci Yis, kawra cowa pitoor cingra to nafalocoˈan a dademak, latekay tanektekay cingra misalof to kaolahan ningra a tamdaw. Tinakoen, tiya miconged ci Pitiro ci Yisan midofdof to araaw no Kawas i, itini kaˈayaw no romaroma a nisawawaan mirikecan ni Yis ci Pitiro. (Marko 8:32, 33) Mihaen ko demak ni Yis cowa ko papakangodo ci Pitiroan, ao papadama ci Pitiroan a macakat. Patalipaˈelalay ci Yis to romaroma nisawawaan, o mamidama cangra cingranan cowa ko mamiconged cingranan midofdof to araaw no Kawas. Maedeng mangodoay ci Pitiro itiya, kawra macadaay ningra ko sapasifanaˈ itiya.

13. Sasamaan ko demak ita ngaˈ o soˈlinay sidaˈit to tamdaw hani?

¹³ Ano maolahay kiso to cecay a tamdaw, latekay wa patodicek kiso mihadak to pasangaray ningra, mihaen ngaˈ o soˈlinay sidaˈit cingranan. Tonini a tatokian o tatodongen ci Yis. O sapalimoˈot iso salalangien ko Fangcalay Cudad, damsayenho ko waywayan. Minengneng to tamdaw pairaen ko tawlikay, pakasoˈlin to maolahay ci Yihofaan ato maolahay tisowanan a tamdaw o mamitengil to sapalimoˈot iso. Ngaˈayay licayen iso ko niyah: “Ano maˈaraw ako ko kaolahan ako a tamdaw mararaw ko demak i, o tatimolo kako mihadak to raraw ningra han? Ano mihadak to sapalimoˈot i, o waywayan ako o damsayay anca o pakidemay ko saali han? O manan ko araaw no falocoˈ ako mihadak to sapalimoˈot hani? O pakayniay maketeray, anca patadoay cingranan miharateng hokira?”

14. Samaanay ci Yis paihkal to ngaˈayay?

¹⁴ Cowa ko kafanaˈ aca ni Yis to manan ko ngaˈayay, miceridayho midemak to ngaˈayay. Maolahay cingra to kakarayan a Wama, mansa micerid ira ko matatodongay a araaw no falocoˈ midemak to matatodongay a demak. Mikitini taˈarawan ni Yis mahapinang ita, o ngaˈayay tamdaw mikilimay to toki padama to tao, paira to haepoc no tamdaw. Roma i, o kafanaˈ aca to maanan ko matatodongay a demak cangoˈotayho, pairaenho ko matatodongay araaw no falocoˈ a midemak. Saan ko harateng no roma tamdaw alatek: “Wa ngaˈay ko tamdaw mararaw ko araaw no falocoˈ a midemak to matatodongay a demak han?” Hatira alatek. Tinakoen, sowal ni Yis paladaˈ ko roma tamdaw i, makalimay mafanaˈ ko ˈalomanay tamdaw. Soˈliˈlin o ngaˈayay ko midemakan nangra, kawra cowa ko papakahemek ci Yihofaan.—Matay 6:1-4.

15. O soˈlinay a ngaˈayay o maanan ko tatodong hani?

¹⁵ O soˈlinay a ngaˈayay mikitiniay cowa pisateked a midemak to matatodongay a demak. Ngaˈayay licayen ita ko niyah: “Cowa ko kafanaˈ aca ako to o maanan ko matatodongay, hanaca misaˈicelay a midemak han? Midemak kako to ngaˈayay o maanan ko araaw no falocoˈ hani?”

16. Sasamaan ko pidemak ita to romiˈamiˈad? Misamanay?

¹⁶ Maharek micada to paputisem o micaˈedongayto to faelohay a capeling, aka saan ko harateng, hawad sato a misaˈicel. Onini a ‘faelohay rikoˈ’ misaaliay to sapadadotocaw ita a misolimet. Sasamaan ko pidemak ita hani? O cecay a pakayraan i, to romiˈamiˈad misaˈicel mikilim to toki palahad to minaroˈan no fangcalay saocor, paihkal to makapahay a capeling. Haratengen, misaka dademakan no Kawas ko fangcalay saocor palaˈosi to araaw Ningra, mihaenay ano adihay ko mihadakan ita a ˈicel, patalahkal to masakenaay makapahay a capeling, mamatongal ko adihay a sapadama no fangcalay saocor kitaanan. (Satapangan 1:2) Mahapinangay, kalimlaan ko waywayan. Sowal no nisawawaan ci Yakop: ‘Awa ko waywayan no pakasoˈlinay falocoˈ malecaday o mapatayay.’ (Yakop 2:26) O romaroma a capeling no minaroˈan no fangcalay saocor malecaday. Ano patalahkal kita tonini a capeling i, paihkalay koni iraay ko sapadama no fangcalay saocor no Kawas i tireng no mita.

17. Ano cowa ka paihkal kita to capeling no minaroˈan no fangcalay saocor i, sasamaan ko pidemak hani?

¹⁷ O halafinay micada to paputisem a Krisciyang latekay cowa ka paihkal to capeling no minaroˈan no fangcalay saocor. Ano mahaen ko pakayraan, kalimlaan i, aka pisawad. Haratengen ilaenoay a sapatinako. Ano macicih ko kaolahan iso a rikoˈ, tatangsol kiso mifalah ciraan han? Cowa. Mamisaˈicel kiso mitapid ciraan alatek, ano micaˈedong noikor o maminaˈon ko demak. Malecaday, cecay liyad eca ka patalahkal kiso to olah, mihadidiay ato sidaˈitay, aka matoled. O mikifalocoˈay a piliˈay ngaˈayay misalof to lacongis, miliyaw a malakangaˈay to tao. Mamisetekho kiso to falocoˈ ngaˈay ko pidemak noikor.

18. Ngaˈay pakasoˈlin kita to maanan hani?

¹⁸ Tada miakoˈiday kita to patirengan ni Yis malefotay a taˈarawan no mita. O harateng ita ato waywayan ano mangalef ko kalecad ci Yisan, mamalecad ko waywayan ita cingranan. Mihaenay, o faelohay a capeling ita o mamatongal a mahapinang. Oniya lalakaw milengoay to sepat capeling no minaroˈan no fangcalay saocor, ngaˈayay kiso mipalak to toki cipinang to romaroma a capeling no minaroˈan no fangcalay saocor, hanaca misaharaterateng samaanay ko demak no niyah. Ngaˈayay nengnengen iso ko Pirorodan to Mitepangan Cudad no Misawacayay Tamdaw ni Yihofa, kilimen ko “Kaˈorip no Krisciyang” a lalangian, ikor asipen ko “Minaroˈan no Fangcalay Saocor” a lalakaw. Ngaˈay pakasoˈlin kiso, ano misaˈicel kiso a midemak, o papadamaen ni Yihofa kiso micaˈedong to faelohay a capeling, hanaca padadotoc micaˈedong i tireng.