1. Хасијјәтимизи әсасән нә формалашдырыр?

 БӘЗИЛӘРИМИЗ бир нечә ҝүндүр, бәзиләримиз исә узун илләрдир вәфтиз олунуб. Бундан асылы олмајараг, һәр биримиз истәјирик ки, Јеһованын бәјәндији бир инсан олаг. Белә инсан олмаг үчүн исә дүшүнҹәмизи идарә етмәлијик. Чүнки дүшүнҹәмизин хасијјәтимизә бөјүк тәсири вар. Әҝәр фикримиз-зикримиз нәфсимизи тәмин етмәкдәдирсә, данышығымыз да, давранышымыз да пис олаҹаг (Ефес. 4:17—19). Јох әҝәр ағлымызы јахшы шејләрлә гидаландырырыгса, онда өз данышығымызла вә һәрәкәтимизлә Јеһованын гәлбини севиндирәҹәјик (Гал. 5:16).

2. Бу мәгаләдә һансы суаллары мүзакирә едәҹәјик?

² Өтән мәгаләдән өјрәндик ки, пис фикирләрин үмумијјәтлә ағлымыза ҝәлмәмәси мүмкүнсүздүр. Амма бу фикирләрә ујғун давраныб-давранмамаг бизим әлимиздәдир. Вәфтиз олунмамышдан габаг Јеһованын нифрәт етдији данышыға вә давраныша сон гојмалыјыг. Бу, көһнә шәхсијјәти әјнимиздән чыхармаг үчүн ән башлыҹа вә ән мүһүм аддымдыр. Амма Јеһованы там шәкилдә разы салмаг үчүн биз һәмчинин «јени шәхсијјәти ҝејинин» әмринә дә табе олмалыјыг (Кол. 3:10). Бу мәгаләдә нөвбәти суалларын ҹавабыны тапаҹағыг: «“Јени шәхсијјәт” нәдир? Ону неҹә ҝејинә биләрик? Бу шәхсијјәтин әјнимиздә галмасы үчүн нә едә биләрик?»

3. «Јени шәхсијјәт» нәдир вә инсанын ону ҝејиндији нәдән ҝөрүнүр? (Галатијалылара 5:22, 23).

³ «Јени шәхсијјәти» ҝејинән инсан чалышыр ки, дүшүнҹәси вә давранышы илә Јеһоваја бәнзәсин. Белә инсан мүгәддәс руһун бәһрәсини әкс етдирир. Мүгәддәс руһун онун дүшүнҹәсини, һиссләрини вә һәрәкәтләрини формалашдырмасына изин верир. (Галатијалылара 5:22, 23 ајәләрини охујун.) Мәсәлән, о, Јеһованы вә Онун халгыны севир (Мәт. 22:36—39). Сынаглар  заманы севинҹини горујур (Јаг. 1:2—4). О, сүлһпәрвәрдир (Мәт. 5:9). Башгаларына гаршы сәбирлидир, хејирхаһдыр (Кол. 3:13). Јахшылыг етмәји севир (Лука 6:35). Өз әмәлләри илә сүбут едир ки, сәмави Атасына иманы ҝүҹлүдүр (Јаг. 2:18). Кимсә ону өзүндән чыхармаға чалышса да, мүлајим давраныр, тамаһ гаршысында өзүнә һаким олур (1 Кор. 9:25, 27; Тит. 3:2).

4. Нәјә ҝөрә Галатијалылара 5:22, 23 ајәләриндә јазылан хүсусијјәтләрин һамысыны тәзаһүр етдирмәлијик?

⁴ «Јени шәхсијјәти» ҝејинмәк үчүн Галатијалылара 5:22, 23 ајәләриндә вә диҝәр ајәләрдә гејд олунан бүтүн хүсусијјәтләри өзүмүздә јетишдирмәлијик *. Бу хүсусијјәтләрин һансынаса әһәмијјәтсиз јанашмаг олмаз, һамысыны ејни анда тәзаһүр етдирмәлијик. Нәјә ҝөрә? Сәбәбләрдән бири одур ки, бу хүсусијјәтләрин һансыса јөнләри диҝәр хүсусијјәтләрлә әлагәлидир. Мәсәлән, әҝәр сиз инсанлара мәһәббәт бәсләјирсинизсә, онлара гаршы һәм сәбирли, һәм дә хејирхаһ олаҹагсыныз. Әҝәр сиз јахшы инсан олмаг истәјирсинизсә, мүлајим вә өзүнүзә һаким олмалысыныз.

5. «Мәсиһин дүшүнҹәсинә» саһиб олмаг нә демәкдир вә нәјә ҝөрә ону јахындан танымалыјыг? (1 Коринфлиләрә 2:16).

⁵ 1 Коринфлиләрә 2:16 ајәсини охујун. «Јени шәхсијјәти» ҝејинмәк үчүн биз «Мәсиһин дүшүнҹәсинә» саһиб олмалыјыг. Јәни Исанын дүшүнҹә тәрзи һагда өјрәнмәлијик вә она бәнзәмәјә чалышмалыјыг. Иса Аллаһын руһунун бәһрәсини мүкәммәл шәкилдә тәзаһүр етдирир. О, Јеһованын хүсусијјәтләрини гүсурсуз ҝүзҝүтәк дәгигликлә әкс етдирир (Ибр. 1:3). Биз Иса Мәсиһ кими дүшүнмәји өјрәндикҹә һәм давранышымызда, һәм дә хүсусијјәтләримиздә она даһа чох бәнзәјәҹәјик (Филип. 2:5).

6. «Јени шәхсијјәти» ҝејинәркән һансы амилләри унутмамалыјыг?

⁶ Исанын нүмунәсини изләмәк, һәгигәтәнми, мүмкүндүр? Ола билсин, белә дүшүнүрүк: «Иса камил иди, мән һеч вахт онун кими ола билмәрәм». Әҝәр сиз дә белә фикирләширсинизсә, нөвбәти амилләри јадда сахлајын. Биринҹиси, биз Јеһованын вә Исанын бәнзәриндә јарадылмышыг. Демәли, онлара охшамаға чалыша биләрик вә мүәјјән дәрәҹәдә дә олса, бу биздә алынаҹаг (Јар. 1:26). Икинҹиси, Аллаһын мүгәддәс руһу  Каинатда ән гүдрәтли гүввәдир. Онун көмәји илә биз тәкбашына һеч вахт ҝөрә билмәјәҹәјимиз ишләри ҝөрә биләрик. Үчүнҹүсү, Јеһова һал-һазырда биздән мүгәддәс руһун бәһрәсини мүкәммәл сурәтдә әкс етдирмәјимизи ҝөзләмир. О, јерүзү ҹәннәтдә јашамаг үмиди оланларын камиллијә јетишмәси үчүн мин ил вахт верәҹәк (Вәһј 20:1—3). Инди Јеһованын биздән истәји одур ки, әлимиздән ҝәләни едәк вә Онун көмәјинә архаланаг.

7. Инди нәји арашдыраҹағыг?

⁷ Исадан конкрет нәдә нүмунә ҝөтүрә биләрик? Биз инди мүгәддәс руһун бәһрәсинә дахил олан дөрд хүсусијјәти гысаҹа нәзәрдән кечирәҹәјик вә арашдыраҹағыг ки, Иса бу хүсусијјәтләри неҹә тәзаһүр етдирирди вә биз ондан неҹә өрнәк ала биләрик. Һәмчинин мүәјјән суаллар олаҹаг вә онларын көмәји илә јени шәхсијјәти нә дәрәҹәдә јахшы ҝејиндијимизи тәһлил едә биләҹәјик.

8. Иса мәһәббәт хүсусијјәтини неҹә тәзаһүр етдирмишди?

⁸ Иса Јеһованы чох севдији үчүн һәм Онун јолунда, һәм дә бизләрдән өтрү гурбанлар вериб (Јәһ. 14:31; 15:13). О, јер үзүндә сүрдүјү фәдакар һәјат тәрзи илә инсанлара олан бөјүк мәһәббәтини сүбут етди. Һәтта бәзиләри она гаршы чыхса да, о, һәр ҝүн мәһәббәтлә вә шәфгәтлә давранырды. Ән әсасы да инсанлара севҝисини онлара Аллаһын Падшаһлығы һаггында данышмагла ҝөстәрирди (Лука 4:43, 44). Үстәлик, о, ҝүнаһкарларын әлиндә әзабла өлмәјә разы олмагла ҝөстәрди ки, Аллаһы вә инсанлары өзүндән дә чох севир. Бунунла да бизим әбәди јашамағымыз үчүн јол ачды.

9. Мәһәббәт ҝөстәрмәкдә Исаја неҹә бәнзәјә биләрик?

⁹ Биз Јеһованы севдијимиз үчүн өзүмүзү Она һәср едиб вәфтиз олунмушуг. Бу севҝидән ирәли ҝәләрәк Иса кими биз дә инсанларла јахшы рәфтар етмәлијик. Һәвари Јәһја јазмышды: «Ҝөрдүјү гардашыны севмәјән адам ҝөрмәдији Аллаһы севә билмәз» (1 Јәһ. 4:20). Өзүмүзә нөвбәти суаллары верә биләрик: «Инсанлары үрәкдән севирәм? Һәтта инсанлар мәнимлә кобуд давранса да, онлара шәфгәт ҝөстәрирәм? Мәһәббәт мәни вахтымы вә вәсаитими сәрф едиб, инсанлара Јеһова һагда өјрәтмәјә тәшвиг едир? Буну чохлары зәһмәтими гијмәтләндирмәсә дә, мәнә гаршы чыхса да, етмәјә һазырам? Шаҝирд һазырламаг ишинә даһа чох вахт сәрф етмәк үчүн нә едә биләрәм?» (Ефес. 5:15, 16).

10. Исанын сүлһпәрвәр олдуғуну нәдән ҝөрүрүк?

¹⁰ Иса сүлһпәрвәр инсан иди. Инсанлар онунла пис даврананда о, пислијә писликлә ҹаваб вермирди. Амма тәкҹә бунунла кифајәтләнмирди. Ҝәрҝин вәзијјәти јумшалтмаг үчүн тәшәббүс ҝөстәрирди. Башгаларыны да тәшвиг едирди ки, араларындакы анлашылмазлығы һәлл етсинләр. Мәсәлән, онлара өјрәдирди ки, ибадәтләринин гәбул олунмасы үчүн гардашлары илә күсүлү галмамалыдырлар (Мәт. 5:9, 23, 24). Иса һәр дәфә шаҝирдләринә көмәк едирди ки, кимин бөјүк олмасы үстүндә етдикләри мүбаһисәјә сон гојсунлар (Лука 9:46—48; 22:24—27).

11. Биз неҹә сүлһпәрвәр ола биләрик?

¹¹ Сүлһпәрвәр инсан олмаг үчүн мүбаһисәләрдән гачынмаг аздыр. Биз башгалары илә фикирајрылығы јаранан заман сүлһү бәрпа етмәк үчүн тәшәббүс ҝөстәрмәлијик вә баҹы-гардашларымызы да буна тәшвиг етмәлијик (Филип. 4:2, 3; Јаг. 3:17, 18). Өзүмүзә нөвбәти суаллары верә биләрик: «Башгалары илә арамда сүлһ јаратмаг үчүн гурбанлар вермәјә һазырам? Баҹы-гардашлар хәтримә дәјәндә онлара гаршы кин сахлајырам? Һәтта дүшүнсәм дә ки,  проблемин сәбәбкары гаршы тәрәфдир, сүлһ јаратмаг үчүн өзүм тәшәббүс ҝөстәрирәм? Мүнасибдирсә, аралары дәјән диндашларымы бир-бириләри илә мүнасибәтләрини дүзәлтмәјә тәшвиг едирәм?»

¹². Иса хејирхаһ олдуғуну неҹә ҝөстәрмишди?

¹² Иса хејирхаһ инсан иди (Мәт. 11:28—30). Буну онун һәтта ҝәрҝин вәзијјәтләрдә белә башгалары илә нәзакәтлә давранмасындан вә ҝүзәштә ҝетмәсиндән ҝөрмәк олар. Мәсәлән, бир дәфә финикијалы гадын Исаја јалвармышды ки, онун хәстә ушағыны сағалтсын. Иса әввәл-әввәл онун хаһишини јеринә јетирмәк истәмәсә дә, онун бөјүк иманыны ҝөрүб ушағыны сағалтмышды (Мәт. 15:22—28). Амма Исанын хејирхаһ олмасы о демәк дејилди ки, о, мәсләһәт вермирди. Бәзән о, хејирхаһлығыны севдији кәсләрә дүзәлиш етмәклә ҝөстәрирди. Мәсәлән, бир дәфә Бутрус Исаны Аллаһын ирадәсини јеринә јетирмәкдән чәкиндирмәк истәјәндә Иса ону диҝәр шаҝирдләрин гаршысында мәзәммәт етмишди (Марк 8:32, 33). О, бунунла Бутрусу алчалтмаг истәмирди, она нәсиһәт вермәк истәјирди. Һәмчинин диҝәр шаҝирдләрә дә баша салмаг истәјирди ки, она дәстәк олмалыдырлар. Дүздүр, јәгин, Бутрус бир аз пис олмушду, амма бу мәсләһәтин хејрини ҝөрдү.

13. Һәгигәтән хејирхаһ олдуғумуз нәдән ҝөрүнәҹәк?

¹³ Севдијимиз инсанлара гаршы хејирхаһ давранмағымыз бәзән онларла ачыг данышмағымыздан ҝөрүнәҹәк. Белә мәгамларда Исадан өрнәк алараг Мүгәддәс Китабдакы принсипләрә әсасән мәсләһәт верин. Бу заман нәзакәтли давранын. Онлар һаггында мүсбәт фикирдә олун, етибар един ки, сизи вә Јеһованы севдији үчүн мәсләһәтинизи гәбул едәҹәк. Өзүнүзә нөвбәти суаллары верин: «Чох истәдијим бир инсан сәһв аддым атанда она мәсләһәт вермәјә ҹәсарәтим чатыр? Мәсләһәт вермәк лазым ҝәләндә буну меһрибан шәкилдә едирәм, јохса кобуд шәкилдә? Мәни мәсләһәт вермәјә нә тәшвиг едир: инсанын һәрәкәтиндән гыҹыгландығым үчүн мәсләһәт верирәм, јохса онун јахшылығыны дүшүнүрәм?»

14. Иса јахшылыг хүсусијјәтини неҹә тәзаһүр етдирирди?

¹⁴ Иса һәм јахшылығын нә олдуғуну билир, һәм дә јахшылыг едир. О, Аллаһа севҝисиндән ирәли ҝәләрәк һәмишә дүзҝүн шејләри дүзҝүн нијјәтдән ирәли ҝәләрәк едир. Јахшылыг хүсусијјәти өзүнү башгаларынын рифаһы наминә едилән хејирхаһ әмәлләрдә бүрузә верир. Дүзҝүн давранышын нә олдуғуну билмәк кифајәт дејил; биз дүзҝүн давранмалыјыг вә буну дүзҝүн нијјәтдән етмәлијик. Бәзән биздә белә бир суал јарана биләр: «Мәҝәр јахшы бир шеји сәһв нијјәтдән ирәли ҝәләрәк дә етмәк олар?» Бәли, олар. Мәсәлән, Исанын дөврүндә бәзи инсанлар касыблара сәдәгә верәндә буну елә тәрздә едирдиләр ки, башгалары да ҝөрсүн вә онлары тәрифләсин. Буна ҝөрә дә онларын саваб ишләри Јеһованын ҝөзүндә әһәмијјәтини итирирди (Мәт. 6:1—4).

15. Сөзүн әсл мәнасында јахшы инсан олмаг үчүн нә етмәлијик?

¹⁵ Биз сөзүн әсл мәнасында јахшы инсан олмаг истәјириксә, јахшы ишләри худбин нијјәтлә етмәмәлијик. Нөвбәти суаллар үзәриндә дүшүнә биләрсиниз: «Мән дүзҝүн давранышын нә олдуғуну садәҹә билирәм, јохса буну едирәм? Јахшы иши һансы нијјәтлә ҝөрүрәм?»

16. Һәр ҝүн нә етмәлијик вә нәјә ҝөрә?

¹⁶ Биз дүшүнмәмәлијик ки, јени шәхсијјәти ҝејинмәк үчүн етдијимиз дәјишикликләр  јалныз вәфтиз олунана гәдәрдир. Биз бу ҝөзәл ҝејимимизи һәмишә јахшы вәзијјәтдә сахламаға чалышмалыјыг. Буну етмәјин үсулларындан бири Аллаһын руһунун бәһрәсинә дахил олан хүсусијјәтләри һәр ҝүн тәзаһүр етдирмәкдир. Нәјә ҝөрә? Чүнки Јеһова даим фәалијјәтдәдир вә Онун руһу да фәал гүввәдир (Јар. 1:2). Буна ҝөрә дә руһун бәһрәсинә дахил олан һәр бир хүсусијјәт бизи һәрәкәтә тәшвиг едә биләр вә етмәлидир дә. Мәсәлән, шаҝирд Јагуб јазмышды: «Әмәлсиз иман... өлүдүр» (Јаг. 2:26). Ејни шеји мүгәддәс руһун бәһрәсинә дахил олан диҝәр хүсусијјәтләр барәдә дә демәк олар. Һәр дәфә онлары тәзаһүр етдирәндә Аллаһын фәал гүввәсинин биздә фәалијјәт ҝөстәрдијини сүбут едирик.

17. Мүгәддәс руһун бәһрәсини тәзаһүр етдирә билмәјәндә нә етмәлијик?

¹⁷ Бәзән узун илләр вәфтиз олунмуш мәсиһиләрдә дә руһун бәһрәсини тәзаһүр етдирмәк алынмыр. Амма өнәмлиси одур ки, биз бу хүсусијјәтләри тәзаһүр етдирмәк үчүн даим чалышаг. Мәсәлән, белә бир нүмунәјә бахаг: тутаг ки, сизин севдијиниз һансыса бир палтарыныз ҹырылыб. Нә едәҹәксиниз? Ону дәрһал туллајаҹагсыныз? Хејр. Чалышаҹагсыныз ки, ону тикәсиниз. Ҝәләҹәкдә исә даһа еһтијатлы олаҹагсыныз. Ејнилә һансыса вәзијјәтдә кимәсә гаршы хејирхаһ олмамысынызса, сәбирлә вә ја мәһәббәтлә давранмамысынызса, руһдан дүшмәјин. Сәмими гәлбдән үзр истәсәниз, һәмин инсанла мүнасибәтинизи дүзәлтмәк үчүн санки бир тикиш атаҹагсыныз. Ҝәләҹәкдә исә чалышын ки, даһа јахшы давранасыныз.

18. Нәјә әмин ола биләрик?

¹⁸ Неҹә дә хошбәхтик ки, бизим Иса кими ҝөзәл өрнәјимиз вар. Иса кими дүшүнмәји өјрәндикҹә онун кими давранмаг даһа асан олаҹаг. Онун кими даврананда исә јени шәхсијјәти әјнимизә даһа јахшы ҝејинәҹәјик. Бу мәгаләдә биз мүгәддәс руһун бәһрәсинә дахил олан јалныз дөрд хүсусијјәтә бахдыг. Мәсләһәт ҝөрәрдик ки, вахт ајырыб руһун бәһрәсинә дахил олан диҝәр хүсусијјәтләри дә арашдырасыныз вә онлары нә дәрәҹәдә јахшы тәзаһүр етдирдијиниз һаггында дүшүнәсиниз. Бу һагда мәгаләләри тапмаг үчүн «Јеһованын Шаһидләринин нәшрләри үзрә ахтарыш» вәсаитиндә «Мәсиһи һәјаты» бөлмәсинә дахил олуб «Руһун бәһрәси» јарымбашлығына бахын. Әмин олун ки, әлиниздән ҝәләни етсәниз, Јеһова да сизә јени шәхсијјәти ҝејинмәјә вә ону әјниниздән чыхармамаға көмәк едәҹәк.