1. Aha do na jotjot mempengaruhi tindakanta?

 DANG soal baru dope hita tardidi manang nungnga martaon-taon, lomo do rohatta patuduhon pangalaho na dihalomohon Jahowa. Asa boi songon i, ikkon takendalihon do cara marpikkirta. Boasa? Alana jotjot do tindakanta dipengaruhi cara marpikkirta. Misalna, molo parniulaon ni daging do na sai torus tapikkirhon ujungna gabe i do na taulahon dohot tahatahon. (Eps. 4:17-19) Alai sebalikna, molo akka na denggan do na sai tapikkirhon gabe na denggan ma na taulahon dohot tahatahon. Ujungna gabe las ma roha ni Jahowa tabahen.​—Gal. 5:16.

2. Sukkun-sukkun aha do naeng tabahas di artikel on?

² Songon naung tabahas di artikel sebelumna, dang mungkin boi tabolokkon sude akka pikkiran na sala. Alai, boi do hita mengendalihon pikkiranta asa unang taulahon akka na sala. Jala asa boi hita tardidi, unang be tahatahon manang taulahon akka na dihasogohon Jahowa. I do cara na paling penting asa boi hita mananggalhon pangalaho na leleng. Alai dang sae holan i, ikkon taoloi do muse paretta ni Jahowa na mandok, “Pakke hamu ma pangalaho na imbaru.” (Kol. 3:10) Jadi di artikel on, naeng tabahas ma sukkun-sukkun on: Aha do “pangalaho na imbaru” i? Jala songon dia do asa boi torus tapakke pangalaho na imbaru i?

3. Songon dia do halak na mamakke “pangalaho na imbaru” i? (Galatia 5:22, 23)

³ Halak na mamakke “pangalaho na imbaru”, i ma halak na berupaya maniru Jahowa. Ala lomo rohana ditogu-togu  tondi parbadia ni Jahowa, gabe boi ma dipatudu ibana akka sifat na denggan songon na dipaboa di Galatia 5:22, 23. (Jaha.) Misalna, holong do rohana tu Jahowa dohot tu akka dongan. (Mat. 22:36-39) Toktong do las rohana nang pe mangadopi hasusaan. (Jak. 1:2-4) Siboan dame do ibana. (Mat. 5:9) Sabar jala burju do ibana tikki berurusan dohot halak na asing. (Kol. 3:13) Lomo do rohana tu akka na denggan jala diulahon ibana do i. (Luk. 6:35) Massai togu do haporseaonna tu Jahowa jala tarida do i sian tindakanna. (Jak. 2:18) Lambok do ibana nang pe kasar halak tu ibana. Jala boi do dirajai ibana dirina tikki digoda.​—1 Kor. 9:25, 27; Tit. 3:2.

4. Asa boi tapakke pangalaho na imbaru, boasa ikkon tapakke sude akka sifat na dipaboa di Galatia 5:22, 23 dohot di akka ayat na asing?

⁴ Asa boi tapakke pangalaho na imbaru, ikkon berupaya do hita mangulahon akka sifat na dipaboa di Galatia 5:22, 23 dohot di akka ayat na asing. * Mamakke pangalaho na imbaru i dang songon mamakke baju na sahali pakke dung i pittor digatti. Alana akka sifat na dipaboa nakkin saling berkaitan do i. Misalna molo holong rohatta tu halak na asing, pasti sabar jala burju do hita tu ibana. Dung i halak na marpangalaho na denggan, lambok do ibana jala boi mangarajai dirina.

5. Didok di Bibel ikkon adong do di hita “pikkiran ni Kristus”, aha do lapatan ni i jala aha do manfaatna? (1 Korint 2:16)

⁵ Jaha 1 Korint 2:16. Asa boi tapakke pangalaho na imbaru ikkon adong do di hita “pikkiran ni Kristus”. Lapatanna ikkon taparsiajari do songon dia cara marpikkir ni Jesus jala tatiru ma i. Ala sempurna do Jesus patuduhon akka parbue ni tondi parbadia gabe sempurna ma tong ibana maniru akka sifat ni Jahowa. (Heb. 1:3) Jadi molo tatiru do cara marpikkir ni Jesus gabe lam mirip ma pangalahotta tu ibana.​—Plp. 2:5.

6. Molo merasa hita dang mungkin boi maniru Jesus, aha do na porlu taingot?

⁶ Olo do ra didok rohatta dang mungkin boi tatiru Jesus, ala sempurna do ibana.  Molo songon i do dihilala hamu ingot ma on. Na parjolo, ditoppa do hita asa boi maniru Jahowa dohot Jesus. Jadi pasti boi do tatiru nasida. (1 Mus. 1:26) Na paduahon, adong do tondi parbadia ni Jahowa na boi mangurupi hamu. Alani i, gabe boi ma diulahon hamu akka ulaon na di luar kesanggupanmuna. Na patoluhon, dang diharappon Jahowa hamu saonari sempurna patuduhon parbue ni tondi parbadia. Sasittongna dilehon Jahowa do tikki saribu taon tu akka halak na lao mangolu salelengna di tano on asa gabe sempurna nasida. (Pgk. 20:1-3) Jadi na dipangido Jahowa sian hita saonari, tabahen ma nasa gogotta mangulahon lomo ni rohana jala taasahon ma Ibana.

7. Aha do na lao tabahas muse?

⁷ Jadi songon dia do caratta maniru Jesus? Saonari tabahas ma opat sifat sian parbue ni tondi parbadia. Tabahas ma songon dia Jesus patuduhon akka sifat i. Jala tabahas ma muse akka sukkun-sukkun na boi mangurupi hita mamareso diri, asa lam denggan hita mamakke pangalaho na imbaru i.

8. Songon dia do Jesus patuduhon holongna?

⁸ Ala massai holong roha ni Jesus tu Jahowa, olo do ibana mangulahon paretta ni Bapakna jala berkorban tu hita. (Joh. 14:31; 15:13) Tarida do i sian parngoluonna tikki di tano on. Ganup ari dipatudu ibana do holong dohot asi ni roha tu sude halak, nang pe adong na marsogo ni roha tu ibana. Jala diajarhon ibana do muse taringot Harajaon ni Debata tu nasida. (Luk. 4:43, 44) Ala massai holong roha ni Jesus tu Jahowa dohot tu hita, olo do ibana dianiaya jala dipamate asa boi hita mandapot hangoluan na saleleng ni lelengna.

9. Songon dia do caratta maniru Jesus lao patuduhon holong?

⁹ Ala holong rohatta tu Jahowa, gabe olo ma hita mangalehon ngolutta tu Ibana jala tardidi. Jadi songon Jesus, molo holong rohatta tu Jahowa ikkon tahaholongi do na asing. Didok Apostel Johannes, “Molo dang dihaholongi sasahalak dongan na niidana, dang boi ibana makkaholongi Debata na so niidana.” (1 Joh. 4:20) Tasukkun ma diritta, ‘Memang tutu do holong rohakku tu akka halak? Boi do au lambok nang pe kasar nasida tu au? Alani holong do makana olo au mamakke tikki dohot gogokku mangurupi na asing marsiajar taringot Jahowa? Tetap do huulahon i nang pe dang sude halak mangargai au manang adong na menentang au? Hulului do cara na asing asa boi lam godang tikkikku marbarita?’​—Eps. 5:15, 16.

10. Songon dia do Jesus gabe sibahen dame?

¹⁰ Sibahen dame do Jesus. Tikki kasar halak tu Jesus dang olo ibana mambalos. Asing ni i, tikki adong halak na marsoal, dibahen ibana do asa tenang muse situasina jala diurupi Jesus do nasida asa mardame. Misalna, diajarhon Jesus do molo mardame nasida tu donganna pasti dijalo Jahowa do ibadat ni nasida. (Mat. 5:9, 23, 24) Jala torus do diurupi Jesus akka siseanna asa mardame tikki marsoal nasida taringot ise na ussangap.—Luk. 9:46-48; 22:24-27.

11. Songon dia do carana asa gabe sibahen dame hita?

¹¹ Asa gabe sibahen dame hita, dang sae holan menghindari parbadaan. Ikkon berupaya do tong hita asa mardame tu na asing jala mangurupi akka donganta asa pasaehon parsoalan ni nasida. (Plp. 4:2, 3; Jak. 3:17, 18) Tasukkun ma diritta,  ‘Olo do au mengalah asa mardame tu na asing? Molo adong dongan na mambahen haccit rohakku, torus do au muruk tu ibana? Olo do au na parjolo minta maaf nang pe ibana na sala? Molo cocok situasina, olo do au mangurupi akka dongan na marsalisi asa mardame nasida?’

12. Songon dia do Jesus patuduhon haburjuon?

¹² Halak na burju do Jesus. (Mat. 11:28-30) Lambok do ibana jala bersikap masuk akkal. Misalna hea do dipangido sahalak borua Penisia asa olo Jesus pamaluppon boruna. Mulana ditolak Jesus do pangidoan ni borua i. Alai ala diida Jesus massai togu haporseaonna, ujungna dipamalum Jesus ma boruna i. (Mat. 15:22-28) Alai nang pe burju Jesus, olo do ibana mangalehon nasehat. Sipata tegas do ibana pasingotton na asing jala i do bukti na holong rohana tu nasida. Misalna tikki berupaya si Petrus mangabbati Jesus asa unang mangulahon lomo ni roha ni Jahowa, dipissang Jesus do ibana di jolo ni akka sisean na asing. (Mrk. 8:32, 33) Diulahon Jesus pe i dang naeng pailahon si Petrus, alai lao mangalatik ibana do jala pasingotton sisean na asing asa unang diabbati nasida Jesus mangulahon lomo ni roha ni Jahowa. Pasti maila do si Petrus di tikki i, alai dapotna do manfaat sian nasehat ni Jesus i.

13. Songon dia do carana patuduhon haburjuon?

¹³ Lao patuduhon haburjuon tu halak na tahaholongi, sipata ikkon talehon do nasehat tu nasida. Tikki mangalehon nasehat, tatiru ma Jesus. Talehon ma nasehat sian Bibel jala lambok ma hita makkatai tu ibana. Berpikiran positif ma hita tu ibana. Jala pos ma rohatta, molo memang holong do rohana tu Jahowa dohot tu hita, pasti dijalo ibana do nasehat i. Tasukkun ma diritta, ‘Barani do au pasingotton halak na huhaholongi molo sala ibana? Molo ikkon hunasehati ibana, lambok do au makkatai manang kasar? Boasa ikkon hunasehati ibana, alani jut ni rohakku do manang ala na lomo rohakku mangurupi ibana?’

14. Songon dia do Jesus patuduhon pangalaho na denggan?

¹⁴ Jesus dang holan mamboto aha na denggan, alai diulahon ibana do i. Ala holong rohana tu Bapakna, sai diulahon ibana do na sittong jala denggan do motifna mangulahon i. Sian on taboto ma molo halak na marpangalaho na denggan, sai dilului do cara lao mangurupi na asing. Jadi dang sae holan mamboto aha na denggan, ikkon taulahon do i jala ikkon denggan do motifta mangulahon i. Adong do halak na marpikkir, ‘Boi do haroa taulahon na denggan alai sala motifta?’ Boi. Misalna, hea do dipaboa Jesus taringot halak na mangalean bantuan tu halak na pogos. Alai dipaboa-boa nasida do i tu na asing asa dipuji nasida. Nang pe denggan ulaon ni nasida i, alai dang marlapatan i di jolo ni Jahowa.​—Mat. 6:1-4.

15. Songon dia do carana patuduhon pangalaho na denggan?

¹⁵ Molo marpangalaho na denggan hita, berarti olo hita mangulahon na denggan jala tulus do rohatta mangulahon i. Tasukkun ma diritta, ‘Molo huboto i denggan, huulahon do i? Boasa olo au mangulahon i?’

16. Aha do ikkon taulahon ganup ari jala boasa?

¹⁶ Unang ma didok rohatta molo nga tardidi hita, berarti nga tapakke sude pangalaho na imbaru jala nga cukup be i.  Pangalaho na imbaru i sarupa songon pakkean na baru na ikkon torus tarawat. Alani i, ikkon berupaya do hita patuduhon parbue ni tondi parbadia ganup ari. Molo torus taulahon i, gabe torus ma hita diurupi Jahowa. Boasa? Alana tondi parbadia i, gogo ni Jahowa do i jala boi do i mangurupi hita bertindak. (1 Mus. 1:2) Alani i ma sude sifat na gabe parbue ni tondi parbadia, seharusna ikkon menggerakkon hita lao bertindak. Contohna didok si Jakobus, “Mate do haporseaon molo so adong parniulaon.” (Jak. 2:26) Songon haporseaon i, akka sifat na asing na gabe parbue ni tondi parbadia pe, ikkon tapatudu do sian parniulaonta. Molo taulahon i, on patuduhon na adong do tondi parbadia di hita.

17. Boha do seharusna sikapta molo gagal hita patuduhon parbue ni tondi parbadia?

¹⁷ Nang pe nungnga martaon-taon hita tardidi alai olo do sipata gagal hita patuduhon parbue ni tondi parbadia. Alai na paling penting unang ma menyerah. Bayakkon ma ilustrasi on. Molo maribak bajutta, pittor tabolokkon do i? Daong. Pasti tapadenggan do baju i, apalagi molo lomo hian rohatta mamakke i. Jala dung tapadenggan, pasti hati-hati do hita asa unang ribak muse baju i. Suang songon i ma, molo sipata gagal hita patuduhon haburjuon, hasabaron, dohot holong tu sasahalak, unang ma gabe kecil hati hita. Berinisiatif ma hita minta maaf lao padenggatton hubungatta tu ibana. Jala bertekad ma hita asa torus padenggatton pangalahotta.

18. Aha do na lao diulahon Jahowa molo berupaya hita asa torus mamakke pangalaho na imbaru?

¹⁸ Mandok mauliate do hita ala nungnga dilehon Jesus teladan tu hita. Molo berupaya hita maniru cara marpikkirna gabe lam mirip ma pangalahotta tu ibana. Hasilna gabe boi ma tapakke sude pangalaho na imbaru i. Di artikel on, nungnga tabahas opat sifat sian parbue ni tondi parbadia. Denggan do molo dilehon hamu tikkimuna lao mamparsiajari akka sifat na asing sian parbue ni tondi parbadia i, jala songon dia carana patuduhon akka sifat i. Boi do diida hamu taringot i di Tudutudu na Dipangke Sitindangi Ni Jahowa Laho Marsiajar, di bagian “Hangoluan ni Halak Kristen”, dung i pillit ma bagian “Parbue ni Tondi”. Pos ma rohamuna molo berupaya hamu torus mamakke pangalaho na imbaru, pasti urupan ni Jahowa do hamu.