1. Mulandu nshi tulingile ukubikila amano ku fyo tutontonkanya?

 NAMPO nga papitile fye inshiku ishinono nelyo imyaka iingi ukutula apo twabatishiwilwa, bonse fye tufwaya ukuba ne mibele iyo Yehova atemwa. Pa kuti tube ne yi, tufwile ukwaluka mu fyo tutontonkanya. Mulandu nshi? Pantu ilingi line ifyo tutontonkanyapo e fyo tucita. Nga ca kuti lyonse tutontonkanya pa fifwaya imitima yesu, ninshi tukalalanda no kucita ifintu ifyabipa. (Efes. 4:17-19) Lelo nga tuletontonkanya pa fintu ifisuma, tukalalanda no kucita ifintu ifingalenga Shifwe Yehova asekelela.—Gal. 5:16.

2. Fipusho nshi twala-asuka muli cino cipande?

² Nga fintu twasambilile mu cipande cafumineko, te kuti tulekelele fye ukutontonkanya pa fyabipa. Lelo kuti twasalapo ukukanacita ifyabipa ifyo tuletontonkanyapo. Ilyo tushilabatishiwa, tufwile ukuleka ukulalanda no kucita ifintu ifingakalifya Yehova. Ici e cacindama kabili e co tulingile ukubalilapo ukucita nga tulefwaya ukufuula ubuntu bwa kale. Lelo nga tulefwaya ukulenga Yehova alesekelela, tulingile no kumfwila ifunde lyakwe ilya kuti: “Fwaleni ubuntu bupya.” (Kol. 3:10) Muli cino cipande, twala-asuka amepusho yakonkapo: Bushe umuntu uwafwala “ubuntu bupya” aba shani? Kuti twafwala shani ubuntu bupya no kukanabufuula?

3. Ukulingana na Abena Galatia 5:22, 23, bushe umuntu uwafwala “ubuntu bupya” aba shani, kabili bushe umuntu afwala shani ubuntu bupya?

³ Umuntu uwafwala “ubuntu bupya” apashanya imibele iyo Yehova akwata. Umuntu afwala ubuntu bupya nga ali ne fisabo fya mupashi wa kwa Lesa kabili aleleka umupashi wa mushilo  uletungulula ifyo atontonkanya, ifyo omfwa ne fyo acita ifintu. (Belengeni Abena Galatia 5:22, 23.) Ku ca kumwenako, alitemwa Yehova e lyo na bantu bakwe. (Mat. 22:36-39) Alatwalilila ukuba ne nsansa nangu ca kuti aleshipikisha amafya. (Yako. 1:2-4) Muntu wa mutende. (Mat. 5:9) Alitekanya kabili wa cikuuku. (Kol. 3:13) Alitemwa ukulacita ifisuma. (Luka 6:35) Ifyo acita filanga ukuti alicetekela sana Wishi wa ku muulu. (Yako. 2:18) Takalipa bwangu nga bamukalifya kabili alailama ilyo atunkwa.—1 Kor. 9:25, 27; Tito 3:2.

4. Pa kuti tufwale ubuntu bupya, mulandu nshi tulingile ukubela ne mibele yonse iyaba pa Abena Galatia 5:22, 23 e lyo na imbi iyalembwa mu Baibolo?

⁴ Pa kufwala ubuntu bupya, tufwile ukuba ne mibele yonse iyaba pa Abena Galatia 5:22, 23 e lyo na imbi iyo balemba mu Baibolo. * Iyi mibele tayaba kwati fya kufwala ifyalekanalekana ifyo tufwala pa nshita iyapusanapusana. Na kuba imibele iyaba pa Abena Galatia 5:22, 23 yalipalana sana ne mibele imbi iyalembwa mu Baibolo. Ku ca kumwenako, nga ca kuti mwalitemwa abantu banenu, mukalabatekanishisha kabili mukaba ne cikuuku. Nga ca kuti muli bantu abasuma, tamufwile ukufulwa bwangu kabili mufwile ukulailama.

5. Calola mwi ‘ukutontonkanya nge fyo Kristu atontonkanya,’ kabili mulandu nshi tulingile ukulasambilila pa bumi bwa kwa Yesu? (1 Abena Korinti 2:16)

⁵ Belengeni 1 Abena Korinti 2:16. Pa kufwala ubuntu bupya tulingile ‘ukulatontonkanya nge fyo Kristu atontonkanya.’ E kutila, tufwile ukwishiba ifyo Yesu atontonkanya e lyo no kulamupashanya. Yesu alalanga bwino bwino ifisabo fya mupashi wa kwa Lesa. Apo Yesu e cipasho ca kwa Lesa, e mumonekela imibele iisuma iyo Yehova akwata. (Heb. 1:3) Nga tuletontonkanya sana nge fyo Yesu aletontonkanya, tukalacita nge fyo alecita kabili tukalapashanya sana imibele yakwe.—Fil. 2:5.

6. Finshi tulingile ukulaibukisha nga tulefwaya ukufwala ubuntu bupya?

⁶ Nalimo kuti twalatwishika nga ca kutila kuti twakumanisha ukupashanya Yesu. Nalimo kuti twalatontonkanya ukuti: ‘Yesu alipwililika. Te kuti imbe nge fyo aba.’ Ifi nge fyo mutontonkanya, muleibukisha ifi fishinka twalalandapo. Ica kubalilapo, mwabumbilwe mu cipasho ca kwa Yehova na Yesu. Kanshi  nga mulefwaya kuti mwabapashanya nangu ca kuti te kuti mube filya fine fye baba. (Ukute. 1:26) Icalenga bubili, umupashi wa mushilo uwa kwa Lesa walikwatisha amaka, kanshi kuti walenga mwacita ne fintu ifyo mushingakumanisha ukucita ku maka yenu. Icalenga butatu, Yehova tenekela ukutila kuti mwakumanisha bwino bwino ukuba ne mibele iyaba pa fisabo fya mupashi. Na kuba, Shifwe wa ku muulu uwatutemwa alipekanya ukuti kukabe imyaka 1,000 umo abakwata isubilo lya kwikala pano isonde bakapwililika. (Ukus. 20:1-3) Ico Yehova afwaya ukuti tulecita pali ino nshita, kulabomba apapelele amaka yesu pa kuti twaba ne yi mibele e lyo no kulashintilila pali ena pa kuti aletwafwa.

7. Finshi twalalandapo nomba?

⁷ Bushe kuti twacita shani pa kuti tulepashanya Yesu? Twalasambilila pa mibele 4 iyaba pa fisabo fya mupashi wa kwa Lesa. Ilyo tulesambilila pali iyi mibele, twakulamona ne fyo twingasambililako ku fyo Yesu alangile iyi mibele. Na kabili twalalanda pa fipusho ifyo twingalatontonkanyapo, ifingatwafwa ukwishiba nga ca kuti twalifwala bwino bwino ubuntu bupya.

8. Bushe Yesu alangile shani ukuti aliba no kutemwa?

⁸ Pa mulandu wa kuti Yesu alitemenwe sana Yehova, alemumfwila kabili atuulile no mweo wakwe pa mulandu wesu. (Yoh. 14:31; 15:13) Ifyo Yesu alecita ilyo ali pano isonde fyalilangile ukuti alitemenwe sana abantu. Lyonse aleba no kutemwa ne cikuuku nangu ca kuti bamo balemulwisha. Inshila imo iyacindama iyo alangilemo ukuti alitemwa abantu, kubasambilisha pa Bufumu bwa kwa Lesa. (Luka 4:43, 44) Na kabili Yesu alilangile ukuti alitemwa Lesa na bantu ilyo aitemenwe ukucula no kuleka abantu ababembu bamwipaya. Ifyo acitile fyalenga ukuti bonse tube ne subilo lya kwikala umuyayaya.

9. Kuti twalanga shani ukutemwa nga filya Yesu alecita?

⁹ Twali-ipeele kuli Yehova no kubatishiwa pantu twalitemwa Shifwe wa ku muulu. Nga filya fine Yesu alecita, na ifwe kuti twalanga ukuti twalitemwa Yehova ku fyo tucita ku bantu. Umutumwa Yohane alembele ukuti: “Uushatemwa munyina, uo amona, te kuti atemwe Lesa, uo ashamona.” (1 Yoh. 4:20) Tufwile ukutontonkanya pali ifi fipusho: ‘Bushe nalitemwa sana abantu? Bushe ndalanga uluse ku bantu nangu ca kuti balensaalula? Bushe naliba no kutemwa ica kuti ndabomfya inshita yandi ne fyo nakwata pa kuti nsambilishe abantu pali Yehova? Bushe ndaitemenwa ukutwalilila ukubila imbila nsuma nangu ca kuti abantu abengi tabakutika nelyo balakaanya umulimo tubomba? Bushe kuli ifyo ningacita pa kuti ndepoosa inshita iikalamba mu mulimo wa kulenga abantu ukuba abasambi?’—Efes. 5:15, 16.

10. Finshi Yesu alecita ifyalelangilila ukuti ali wa mutende?

¹⁰ Yesu ali uwa mutende ku bantu. Ilyo abantu balemucusha, talebwesesha ububi pa bubi. Lelo kwali na fimbi ifyo alecita. Aleitemenwa ukuba pa mutende na bantu kabili alekoselesha na bantu ukulaumfwana. Ku ca kumwenako, abasambilishe ukuti nga balefwaya Yehova alepokelela ukupepa kwabo, bafwile ukulaumfwana na bantu banabo. (Mat. 5:9, 23, 24) Kabili pa miku iingi alifundile abasambi bakwe ukuleka ukuumanina pa wali umukalamba pali bena.—Luka 9:46-48; 22:24-27.

11. Finshi twingacita pa kuti tube aba mutende?

¹¹ Pa kuti tube aba mutende ku bantu, tatulingile ukupeleela fye pa kukanacita ifintu ifingalenga twapusana. Tulingile ukuitendekelako ukulaumfwana na bantu kabili  tufwile ukukoselesha bamunyinefwe na bankashi ukulaumfwana. (Fil. 4:2, 3; Yako. 3:17, 18) Kuti twatontonkanya pali ifi fipusho: ‘Finshi ningaipeelesha ukucita pa kuti ndeumfwana na bantu? Nga ca kuti munyinefwe nelyo nkashi ankalifya, bushe ndatwalilila ukwenda ne cikonko ku mukoshi? Bushe ndalolela ukuti uundufyenye ese pa kuti tuwikishanye nelyo ndaitendekelako ukumfwana no muntu nangu ca kuti te ine ndufyenye? Nga kuti caba fye bwino, bushe kuti nakoseleshako abashumfwana ukuwikishanya pa kuti batendeke ukumfwana na kabili?’

12. Bushe Yesu alangile shani ukuti wa cikuuku?

¹² Yesu ali uwa cikuuku. (Mat. 11:28-30) Alilangile ifyo ali ne cikuuku ilyo ali uwanakilila no kukanapampamina pa cintu cimo nangu ca kuti ifintu nafyafya. Ku ca kumwenako, ilyo umwanakashi umwina Foinike amulombele ukuti ondape umwana wakwe, pa kubala tacitile ifyo uyu mwanakashi amulombele, lelo ilyo amwene ukuti uyu mwanakashi ali ne citetekelo icakosa, alyundepe umwana wakwe. (Mat. 15:22-28) Nangu ca kuti Yesu ali ne cikuuku, alelungika abalekabila ukubafunda. Inshita shimo alelanga icikuuku ilyo alefunda abo atemenwe ukwabula ukubapita mu mbali. Ku ca kumwenako, ilyo Petro alefwaya ukulesha Yesu ukucita ukufwaya kwa kwa Yehova, Yesu alimulungike pa menso ya basambi. (Marko 8:32, 33) Yesu talefwaya ukuseebanya Petro, lelo acitile ifi pa kuti amusambilishe no kusoka abasambi bambi ukuti tabalingile ukulaituntumba. Ukwabula no kutwishika, Petro alyumfwile insoni, na lyo line alisambilileko ku fyo bamulungike.

13. Bushe kuti twaba shani ne cikuuku?

¹³ Pa kuti mulange ukuti muli ba cikuuku ku bantu abo mwatemwa, inshita shimo mulingile ukubafunda ukwabula ukubapita mu mbali. Pa kubafunda, mulepashanya Yesu. Mulebomfya amashinte ya mafunde ayaba mu Cebo ca kwa Lesa. Muleba abanakilila. Mulecetekela ukuti balafwaya ukucita icalungama, no kuti ifi batemwa Yehova kabili ne fi bamutemwa bakacita ifyo mukabafunda cikuuku cikuuku. Kuti mwatontonkanya pali ifi fipusho: ‘Bushe nga namona uo natemwa alecita ifyabipa, kuti nashipa no kumulungika? Ilyo ndefunda umuntu, bushe ndamufunda cikuuku cikuuku nelyo ndakalipa ilyo ndemufunda? Bushe cinshi cilenga mfunde umuntu? Bushe icilenga nafunda umuntu ni pa mulandu wa kuti nankalifya pa fyo alecita nelyo ni co ndefwaya fye ukumulungika?’

14. Bushe Yesu alangile shani ukuti ali ne mibele ya busuma?

¹⁴ Yesu tapelela fye pa kwishiba icintu icisuma, lelo alacita ne cisuma. Yesu alitemwa Wishi, e ico lyonse alacita icalungama kabili alakwata ne milandu iisuma iya kucitila icalungama. Umuntu umusuma lyonse alafwaya inshila isha kwafwilamo abantu kabili alabacitila icisuma. Tatufwile ukupeleela fye pa kwishiba ifintu ifisuma lelo tulingile ukulacita ifisuma kabili tufwile no kwishiba umulandu tulecitila ifyo. Bushe kuti cacitika ukucitila abantu ifisuma pa kuti fye batumone? Ee kuti cacitika. Ku ca kumwenako, Yesu alandile pa bantu abalepeela abapiina ifya bupe pa kuti fye abantu bambi balebalumbanya. Nangu ca kuti ifyo balecita fyali fisuma, Yehova tatemenwe ifyo balecita.—Mat. 6:1-4.

15. Bushe kuti twaba shani abantu abasuma?

¹⁵ Nga ca kuti ilyo tulecita icalungama tatulecita fye pa kuti abantu batumone nelyo batulumbanye, ninshi tuli bantu basuma. Kanshi kuti mwatontonkanya pali aya mepusho: ‘Bushe nga naishiba icalungama, ndacicita no kucicita? Cinshi cilenga ndecita ifisuma?’

16. Cinshi tufwile ukulacita cila bushiku, kabili mulandu nshi?

¹⁶ Tufwile ukulaibukisha ukuti nangu twabatishiwa tulingile ukutwalilila ukufwala ubuntu bupya. Ubuntu bupya bwaba kwati ca kufwala icipya ico tulingile ukusunga bwino. Cimo ico twingacita pa kuti tusungilile ubuntu bwesu ubupya, kulamona ifyo twingalalanga ifisabo fya mupashi wa kwa Lesa cila bushiku. Mulandu nshi? Pantu Yehova ni Lesa uubombesha kabili umupashi wakwe uwa mushilo maka ayabomba. (Ukute. 1:2) Kanshi imibele yonse iyaba pa fisabo fya mupashi ifwile ukumonekela mu fyo tucita. Ku ca kumwenako, umusambi Yakobo alembele ukuti: ‘Icitetekelo cabula imilimo califwa.’ (Yako. 2:26) Ifi fine e fyo caba na ku mibele imbi iyaba pa fisabo fya mupashi wa kwa Lesa. Kanshi nga tuli ne mibele iyi, ninshi tulelanga ukuti umupashi wa kwa Lesa uletwafwa.

17. Cinshi tufwile ukucita nga ca kuti twafilwa ukuba ne fisabo fya mupashi?

¹⁷ Nangu fye Bena Kristu aba kuti kale sana babatishiwe, limo balafilwa ukuba ne fisabo fya mupashi. Lelo calicindama ukutwalilila ukuba ne yi mibele. Natulande pa ca kumwenako. Nga ca kuti ica kufwala ico mwatemwa calepuka, bushe kuti mwacipoosa ilyo line fye? Awe. Kuti mwabila fye apalepwike nga kuti mwakumanisha. Kabili nga mwabila, mukalacisunga bwino sana. Kanshi nga ca kuti inshita shimo mwafilwa ukuba ne cikuuku, ukutekanya nelyo ukulanga ukutemwa, tamufwile ukufuupuka. Mufwile ukulomba ubwelelo ukufuma pa nshi ya mutima kabili ukucita ifi kuti kwalenga mutendeke ukumfwana na kabili. Kabili mulingile ukwesha na maka ukubombela pa fyo mwalufyenye.

18. Cinshi mwingacetekela?

¹⁸ Ala tulatasha sana pa fyo Yesu alecita ilyo ali pano isonde! Nga tuletontonkanya nge fyo aletontonkanya e lyo no kulacita ifintu nge fyo alecita ninshi cikatwangukila ukulamupashanya. Nga ca kuti tulepashanya sana ifyo Yesu alecita, cikalenga tukafwale bwino bwino ubuntu bupya. Muli cino cipande, twasambilila fye pa mibele 4 iyaba pa fisabo fya mupashi wa kwa Lesa. Kuti cawama ukusangako inshita ya kuisambilisha pa mibele na imbi iyaba pa fisabo fya mupashi no kutontonkanyapo nga ca kuti mwalikwata bwino bwino iyi mibele. Kuti mwasanga ifyebo na fimbi mu Icitabo ca Kwafwa Inte sha kwa Yehova Ukusanga Ifyebo pa mutwe utila “Abena Kristu” lyena mwaya apatila “Ifisabo fya Mupashi.” Mulecetekela ukuti nga mule-esha na maka ukufwala ubuntu bupya no kukanabufuula, Yehova akulamwafwa.