1. ?Wanem i gat moa paoa long ol fasin blong yumi?

 NATING se yumi baptaes sam dei i pas o blong plante yia, be yumi evriwan i wantem wokem ol fasin we Jehova i laekem. Blong wokem ol fasin olsem, yumi mas kontrolem tingting blong yumi. ?From wanem? From samting we i gat moa paoa long ol fasin blong yumi, hemia ol tingting blong yumi. Sipos oltaem yumi stap tingbaot ol samting we yumi nomo i wantem, bambae yumi talem mo mekem ol samting we i no stret. (Efes. 4:17-19) Be sipos yumi stap tingbaot ol gudfala samting, bambae yumi mekem mo talem ol tok we i mekem Papa blong yumi Jehova i glad.—Gal. 5:16.

2. ?Wanem ol kwestin we bambae yumi ansarem long stadi ya?

² Olsem we yumi bin tokbaot long las stadi, yumi no save blokem fulwan ol nogud tingting we oli kam long maen blong yumi. Be yumi save jusum blong no tekem aksen folem ol nogud tingting ya. Bifo we yumi tekem baptaes, yumi mas stop blong talem mo mekem ol fasin we Jehova i no laekem. Hemia nao faswan impoten step blong tekemaot olfala fasin blong yumi. Be tu, blong Jehova i glad fulwan long yumi, yumi mas obei long komanmen ya we i se: “Yufala i mas werem niufala fasin we God i givim long yumi.” (Kol. 3:10) Long stadi ya, bambae yumi ansarem ol kwestin ya: ?Wanem ya “niufala fasin”? ?Olsem wanem blong werem niufala fasin mo kipim i stap?

3. Folem Galesia 5:22, 23, ?wanem ya “niufala fasin,” mo olsem wanem wan man i save werem?

³ Taem wan man i gat “niufala fasin,” tingting mo fasin blong  hem i sem mak long hemia blong Jehova. Man we i werem niufala fasin i soemaot ol frut blong tabu spirit blong God, mo i letem tabu spirit i gat paoa long ol tingting, filing, mo aksen blong hem. (Ridim Galesia 5:22, 23.) Eksampol, hem i lavem Jehova mo ol man blong Hem. (Mat. 22:36-39) Man olsem i gohed blong stap glad nating se hem i fesem ol hadtaem. (Jem. 1:2-4) Hem i man blong mekem pis. (Mat. 5:9) Hem i gat longfala tingting mo i kaen long narafala. (Kol. 3:13) Hem i laekem samting we i gud mo i mekem. (Luk 6:35) Hem i soemaot long ol aksen blong hem se hem i bilif strong long Papa blong hem long heven. (Jem. 2:18) Hem i stap kwaet taem ol narafala oli mekem i nogud long hem, mo i bos long tingting blong hem taem wan samting i traem hem.—1 Kor. 9:25, 27; Taet. 3:2.

4. Blong werem niufala fasin, ?from wanem yumi mas wokem ol fasin we Galesia 5:22, 23 mo ol narafala fasin we Baebol i tokbaot? Yu eksplenem.

⁴ Blong werem niufala fasin, yumi mas wokem evri fasin we Galesia 5:22, 23 i tokbaot, wetem ol narafala fasin tu we Baebol i tokbaot. * Ol fasin ya oli no olsem ol wanwan klos we yumi werem wan afta narawan. Defren olgeta, plante long ol fasin ya oli sem mak long ol narafala fasin. Eksampol, sipos yu rili lavem neba blong yu, bambae yu gat longfala tingting mo yu kaen long hem. Mo blong kam wan gudfala man, yu mas gat kwaet fasin mo soemaot se yu bos long tingting blong yu.

5. ?I minim wanem blong “gat tingting blong Kraes”? ?Mo from wanem yumi mas stadi long laef blong Jisas? (1 Korin 2:16)

⁵ Ridim 1 Korin 2:16. Blong werem niufala fasin, yumi mas “gat tingting blong Kraes.” Hemia i min se yumi mas lanem blong save ol tingting blong Jisas mo folem eksampol blong hem. Jisas i soemaot gud ol frut blong tabu spirit blong God. Olsem wan mira, Jisas i soemaot klia ol fasin blong Jehova we i no mestem wan nating. (Hib. 1:3) Taem yumi traehad blong gat tingting olsem Jisas, hemia i save gat paoa long ol aksen blong yumi mo bambae yumi naf blong folem gud ol fasin blong hem.—Fil. 2:5.

6. ?Yumi mas tingbaot wanem taem yumi stap traehad blong werem niufala fasin?

⁶ ?I posibol blong yumi folem eksampol blong Jisas? Maet yumi stap tingting se: ‘Jisas i stret gud olgeta. !Bambae mi neva save  folem gud eksampol blong hem!’ Sipos yu gat tingting olsem, i gud yu tingbaot ol poen ya. Faswan, Jehova i wokem yu blong yu tekem fasin blong hem mo Jisas. Taswe yu save jusum blong folem fasin blong tufala, go kasem mak we yu naf blong kasem. (Jen. 1:26) Seken, tabu spirit blong God i gat moa paoa i bitim eni narafala samting long yunives, mo i save halpem yu blong mekem ol samting we bambae yu neva save mekem long prapa paoa blong yu. Nambatri, Jehova i no ekspektem yu blong wokem ol frut blong tabu spirit long fasin we i stret gud olgeta. Be bambae hem i givim 1,000 yia long olgeta we oli gat hop blong laef olwe long wol ya, blong oli kam stret gud olgeta. (Rev. 20:1-3) Samting we Jehova i wantem blong yumi mekem naoia, hemia blong mekem bes blong yumi mo dipen long hem blong i halpem yumi.

7. ?Naoia bambae yumi tokbaot wanem?

⁷ ?Olsem wanem yumi save folem eksampol blong Jisas? Fastaem bambae yumi tokbaot fo fasin we oli frut blong tabu spirit blong God. Biaen, bambae yumi luk olsem wanem Jisas i soemaot wanwan long ol fasin ya, mo samting we yumi save lanem from. Mo tu, bambae yumi tokbaot sam kwestin we i save halpem yumi blong kam gud moa long niufala fasin blong yumi.

8. ?Olsem wanem Jisas i soemaot lav?

⁸ From we Jisas i lavem Jehova tumas, hem i lego sam samting blong mekem Papa blong hem i glad mo blong givhan long yumi. (Jon 14:31; 15:13) Ol fasin we Jisas i soemaot taem hem i stap long wol, i soemaot se hem i lavem tumas ol man. Evri dei hem i soemaot lav mo sore long ol man, nating se samfala oli agensem hem. Wan impoten rod we hem i soemaot lav long ol man, hemia taem hem i tijim olgeta long saed blong Kingdom blong God. (Luk 4:43, 44) Mo tu, Jisas i pruvum se hem i lavem God mo ol man taem hem i rere blong safa mo letem ol man blong mekem sin oli kilim hem i ded. Mo hemia i openem rod blong yumi evriwan i save kasem laef we i no save finis.

9. ?Olsem wanem yumi save folem eksampol blong Jisas blong soemaot lav?

⁹ Yumi givim laef blong yumi long Jehova mo baptaes from we yumi lavem Papa blong yumi long heven. Olsem Jisas, yumi soem se yumi lavem Jehova taem yumi mekem i gud long ol narafala. Aposol Jon i raetem se: “Sipos man i no lavem brata blong hem we hem i stap luk oltaem, hem i no save lavem God we hem i no luk hem samtaem.” (1 Jon 4:20) Yumi save askem yumi wan se: ?Lav we mi gat long ol narafala i stap kam bigwan moa? ?Mi mi soemaot sore long ol narafala nating se oli mekem i nogud long mi? ?Lav i pulum mi blong yusum taem mo ol samting we mi gat blong halpem ol narafala blong save Jehova? ?Mi mi rere blong mekem wok ya nating se plante man oli nogat fasin tangkiu from traehad blong mi o taem oli agensem mi? ?Mi save faenem sam narafala rod blong spenem moa taem long wok blong mekem disaepol?’—Efes. 5:15, 16.

10. ?Wanem i soemaot se Jisas i wan man blong mekem pis?

¹⁰ Jisas i wan man blong mekem pis. Taem ol man oli mekem i nogud long hem, hem i no givimbak long olgeta. Be hem i tekem faswan step blong mekem pis mo i enkarejem ol narafala blong oli stretem ol raorao blong olgeta. Eksampol, hem i tijim olgeta se oli mas mekem pis wetem brata blong olgeta sipos oli wantem se Jehova i akseptem wosip blong olgeta. (Mat. 5:9, 23, 24) Mo tu, hem i gohed blong halpem ol aposol blong oli stretem raorao blong olgeta se hu long olgeta i hae moa.—Luk 9:46-48; 22:24-27.

11. ?Olsem wanem blong kam wan man blong mekem pis?

 ¹¹ Blong kam wan man blong mekem pis, yumi mas mekem sam moa samting i bitim we yumi blokem ol raorao. Yumi mas tekem faswan step blong mekem pis wetem ol narafala mo enkarejem ol brata mo sista blong oli stretem ol raorao blong olgeta. (Fil. 4:2, 3; Jem. 3:17, 18) Yumi save askem yumi wan se: ‘?Mi mi rere blong lego wanem blong mi save mekem pis wetem narafala? Taem wan brata o sista i mekem mi harem nogud, ?mi holemtaet kros? ?Mi mi wet se narafala nao bambae i mekem pis, o mi tekem faswan step nating se i no fol blong mi? Sipos i stret, ?mi mi enkarejem olgeta we oli stap raorao blong oli mekem pis bitwin olgeta?’

12. ?Wanem i soemaot se Jisas i kaen?

¹² Jisas i kaen. (Mat. 11:28-30) Hem i soemaot fasin ya taem hem i no mekem i strong long narafala mo i rere blong lego prapa tingting blong hem, nating se samtaem i had. Eksampol, taem wan woman Fonisia i askem strong long Jisas blong i hilim pikinini blong hem, Jisas i no mekem samting we hem i askem, be taem woman ya i soemaot strong bilif, Jisas i kaen mo i hilim pikinini blong hem. (Mat. 15:22-28) Nating se Jisas i kaen, be hemia i no blokem hem blong givim advaes. Samtaem hem i soemaot se hem i kaen, taem hem i tok strong long olgeta we hem i lavem olgeta. Eksampol, taem Pita i traem blokem Jisas blong mekem wil blong Jehova, Jisas i stretem hem long fored blong ol narafala disaepol. (Mak 8:32, 33) Hem i mekem olsem i no blong daonem Pita, be i blong trenem hem mo i olsem wan woning long ol narafala disaepol se oli no mas kam flas. I sua se Pita i sem smol, be fasin stretem ya i givhan long hem.

13. ?Olsem wanem yumi save soemaot se yumi rili kaen?

¹³ Blong soem se yu rili kaen long ol man we yu lavem olgeta, maet samtaem yu mas tok stret long olgeta. Taem yu mekem olsem, i gud yu folem eksampol blong Jisas blong givim advaes we i stanap long Tok blong God, mo yu no mekem i strong long olgeta. Yu mas tingbaot se olgeta oli wantem blong mekem samting we i stret. Mo yu mas trastem se olgeta we oli lavem Jehova mo oli lavem yu, bambae oli folem advaes we yu givim wetem lav. Askem yu wan se: ‘?Mi mi gat strong tingting blong toktok taem mi luk wan man we mi lavem hem i mekem wan samting we i no stret? Sipos i nidim blong mi givim advaes, ?mi mi toktok kaen, o nogat? ?Wanem nao i pulum mi blong givim advaes? ?Mi givim advaes jes from we mi no laekem man ya, o from we mi wantem halpem hem?’

14. ?Olsem wanem Jisas i soemaot gud fasin?

¹⁴ Jisas i save samting we i gud, be tu hem i mekem. Jisas i lavem Papa blong hem, taswe oltaem hem i mekem samting we i stret wetem stret tingting. Man we i gat gud fasin, hem i lukaot rod blong givhan long ol narafala mo i mekem i gud long olgeta. Taem yumi save samting we i stret blong mekem, yumi mas mekem, be wetem wan tingting we i stret. Maet samfala bambae oli askem se: ‘?I save hapen se man i mekem samting we i stret, be wetem wan rong tingting?’ Yes, i save hapen. Eksampol, Jisas i tokbaot ol man we oli stap givim presen long ol puaman, be long semtaem oli wantem se ol narafala oli luk samting we oli mekem mo presem olgeta from. Nating se wok ya i gud, be Jehova i no glad long olgeta.—Mat. 6:1-4.

15. ?Olsem wanem yumi save soemaot gud fasin?

¹⁵ Yumi save soemaot gud fasin nomo sipos yumi mekem samting we i stret, be wetem wan gudfala tingting. Taswe, askem yu wan se: ‘?Mi mi save samting we i stret mo mi mekem? ?Wanem nao i pulum mi blong mekem ol gudfala samting?’

16. ?Evri dei yumi mas mekem wanem mo from wanem?

¹⁶ Yumi no mas ting se taem yumi tekem baptaes, yumi werem fulwan niufala fasin mo se yumi no moa nid blong wokem olgeta. “Niufala fasin” i olsem wan “niufala klos” we yumi mas kipim i stap gud oltaem. Wan rod blong mekem samting ya, hemia taem yumi traehad evri dei blong wokem ol frut blong tabu spirit blong God. ?From wanem? From we Jehova i wan God we i stap wok oltaem, mo paoa blong hem tu i stap wok. (Jen. 1:2) So evri frut blong tabu spirit oli save pulum yumi blong tekem aksen. Eksampol, disaepol Jemes i raetem se: “Bilif we i no gat wok i go wetem, hem tu i ded.” (Jem. 2:26) Mo hemia i sem mak tu long olgeta narafala fasin we oli frut blong tabu spirit blong God. Evritaem we yumi wokem ol fasin ya, yumi stap pruvum se tabu spirit blong God i stap halpem yumi.

17. ?Yumi mas gat wanem tingting taem yumi mestem blong soemaot ol frut blong tabu spirit?

¹⁷ Ol Kristin we oli baptaes plante yia finis, samtaem oli faenem i had tu blong wokem ol frut blong tabu spirit. Be samting we i moa impoten hemia se yumi no mas givap. Tingbaot eksampol ya. Sipos yu brekem wan klos blong yu we yu laekem tumas, ?bambae yu sakemaot klos ya kwiktaem nomo? Ating nogat. Sipos i posibol, maet bambae yu somap ples we i brok, mo biaen bambae yu lukaot gud long hem. Long sem fasin, sipos wanwan taem yu mestem blong soemaot kaen fasin, longfala tingting, mo lav long narafala, yu no mas harem nogud. I impoten blong talem sore, olsem nao bambae yu save gohed blong frengud wetem narafala. Be tu, yu mas gat strong tingting blong kam gud moa long fiuja.

18. ?Yumi save sua long wanem samting?

¹⁸ !Yumi glad tumas we Jisas i soemaot gudfala eksampol blong yumi save folem! Taem yumi gohed blong folem fasin blong Jisas, bambae i moa isi blong yumi mekem olsem hem mo werem niufala fasin. Long stadi ya, yumi tokbaot nomo fo frut blong tabu spirit blong God. I gud yu spenem sam taem blong lanem sam moa frut blong tabu spirit blong God, mo luk olsem wanem yu save wokem olgeta. Bambae yu faenem wan lis blong ol atikol long saed blong topik ya long Buk Blong Mekem Risej aninit long topik ya “Laef Blong Ol Kristin” mo biaen yu go long “Frut Blong Spirit.” Yu save sua se sipos yu traehad blong werem niufala fasin mo kipim i stap, Jehova bambae i halpem yu.