1. Aha do na bahatan mampangaruhi kepribadian ni sasahalak?

 AGE PE baru atap domma dokah hita ididi, ganup do hita sihol marparlahou domu bani harosuh ni Jahowa. Ase boi sonai, porlu do ijaga hita pingkiranta. Mase? Halani kepribadian ni sasahalak bahatan do itontuhon cara marpingkirni. Anggo somal hita mamingkirhon na porlu bani dirinta tumang, ai mambahen parsahap ampa pambahenanta gabe lang madear. (Ep. 4:17-19) Sebalikni, anggo somal ipingkirhon hita na madear bani halak, holi iurupi ma hita marparlahou na madear. Gabe malas ma uhur ni Jahowa mangidah ai.​—Gal. 5:16.

2. Sungkun-sungkun aha ma na laho iulas hita bani artikel on?

² Songon na dob ipatugah bani artikel na salpu, lang boi ilanglangi hita pingkiran na buruk roh hubagas pingkiranta. Tapi na boi ibahen hita ai ma lang mangihutkon pingkiran na sisonai. Sanggah lape ididi, maningon itanggalhon hita do parlahou na buruk in. Halani ai, maningon ipasoh hita do ganup parsahap ampa pambahenan na ihagigihon Jahowa. Tapi, ase boi tongon-tongon pamalaskon uhur-Ni, dobkonsi ididi pe maningon idalankon hita do parentah on: ‘Pakei nasiam ma parlahou na baru in.’ (Kol. 3:10) Bani artikel on holi iulas hita ma sungkun-sungkun on: Aha do ‘parlahou na baru’ ai? Sonaha hita boi marparlahou na baru? Janah, sonaha hita boi totap manjaga parlahou na baru ai?

3. Aha do ‘parlahou na baru’ ai, anjaha sonaha sasahalak boi patuduhkon ai? (Galatia 5:22, 23)

³ Marparlahou na baru ai ma cara marpingkir ampa pambahenan  na maniru Jahowa. Ipatuduh do buah ni tonduy janah ipaturut do dirini ase itogu-togu tonduy na pansing pingkiran, pangahap, ampa pambahenanni. (Basa Galatia 5:22, 23.) Umpamani, ihaholongi ia do Jahowa ampa sanina botou. (Mat. 22:36-39) Totap do ia marmalas ni uhur age pe adong sitaronon. (Jak. 1:2-4) Siboan damei do ia. (Mat. 5:9) Sabar janah bujur do ia marparlahou bani na legan. (Kol. 3:13, Terjemahan Dunia Baru, NW) Marosuh do ia bani na madear anjaha ihorjahon do ai. (Luk. 6:35) Ipatuduh ia do humbani pambahenanni na toguh do haporsayaonni. (Jak. 2:18) Totap do ia lamlam sanggah adong na manggila hu bani, anjaha boi do ia manrajai dirini.​—1 Kor. 9:25, 27; Tit. 3:2.

4. Mase lang sungkup sahali-sahali tumang ipatuduh hita sifat-sifat na isobut bani Galatia 5:22, 23?

⁴ Ase boi patuduhkon parlahou na baru, maningon ipatuduh hita do ganup sifat na ipatugah bani Galatia 5:22, 23 ampa bani ayat-ayat na legan, halani markaitan do ganup sifat-sifat ai. * On sedo songon mamakei baju. Sanggah marosuh ipakei hita, sanggah lang marosuh ibuka hita. Umpamani, anggo holong uhurmu bani hasomanmu, tontu sabar janah bujur do ham hu bani. Anjaha ase boi ipatuduh ham habujuran, maningon lamlam janah boi ma irajai ham dirimu.

5. Aha do artini ‘adong do uhur ni Kristus banta’, janah mase maningon iparlajari hita pasal Jesus? (1 Korint 2:16)

⁵ Usih songon na markaca, sempurna do itiru Jesus sifat-sifat ni Jahowa. Dear tumang do ipatuduh ia buah ni tonduy ibagas goluhni. (Heb. 1:3) Jadi ase boi hita patuduhkon parlahou na baru, maningon ‘adong do uhur ni Kristus banta’. (Basa 1 Korint 2:16.) Halani ai, maningon iparlajari hita do cara marpingkir ni Jesus janah tiru hita ma ai. Lambin dos cara marpingkirta pakon Jesus, lambin dos ma pambahenanta pakonsi. Anjaha gabe dos ma paruhuranta songon paruhuran ni Jesus.​—Pil. 2:5.

6. Sanggah marusaha hita patuduhkon parlahou na baru, aha ma na porlu idingat hita?

⁶ Ai mungkin do boi itiru hita Jesus? Ra do nini uhurta, ‘Jesus ai kan sempurna.  Huahap lang boi pas hubahen songon na ibahen ia.’ Anggo sonai do homa pangahapmu, dingat ma on: Na parlobei, itompa Naibata do ham usih songon Jahowa pakon Jesus. Tontu boi do itiru ham sifat-sifat ni sidea. (1 Mus. 1:26) Na paduahon, gogohan do Jahowa i alam semesta on. Janah iurupi Ia do ham marhitei tonduy-Ni ase boi patuduhkon parlahou na baru. Na patoluhon, lang ongga ipindo Jahowa ase sempurna ham patuduhkon buah ni tonduy sonari on. Holi ibere Ia do panorang 1.000 tahun ase boi ganup halak na i tanoh on jadi sempurna. (Pangk. 20:1-3) Tapi anggo sonari, ipindo Jahowa do ase hita mambahen na sidearan janah tongtong mangindo pangurupion hu Bani.

7. Sonari aha ma na laho iulas hita?

⁷ Jadi, sonaha ma ase boi itiru hita Jesus? Ulas hita ma ompat sifat humbani buah ni tonduy. Iulas hita ma aha do na boi iparlajari hita sanggah ipatuduh Jesus ganup sifat ai. Anjaha ibalosi hita ma homa sungkun-sungkun na boi mangurupi hita ase lambin dear patuduhkon parlahou na baru.

8. Sonaha Jesus patuduhkon holong ni uhurni?

⁸ Halani holong tumang uhur ni Jesus bani Bapani, ra do ia mambahen pengorbanan. (Joh. 14:31; 15:13) Umpamani, sadokah ia i tanoh on, tongtong do ipatuduh ia holong ampa idop ni uhurni bani ganup jolma, age pe adong na lang marosuh mangidah ai. Na sipontingan, ipatuduh Jesus do holong ni uhurni bani jolma marhitei mangajarhon pasal Harajaon ni Naibata bani sidea. (Luk. 4:43, 44) Ra do homa ia manaron hamarsikon janah matei i tangan ni pardousa. Halani pengorbananni ai, gabe boi ma hita mandapot hagoluhan na sadokah ni dokahni. Ai ma na mambuktihon holong tumang do uhur ni Jesus hubani Naibata ampa bani ganup jolma.

9. Sonaha hita boi patuduhkon holong songon na ipatuduh Jesus?

⁹ Halani holong bani Jahowa, ra do hita mangondoskon diri hu Bani janah ididi. Songon Jesus, ipatuduh hita do holongta bani Jahowa marhitei mangkaholongi ganup halak. Apostel Johannes mangkatahon, “Anggo seng ihaholongi hasomanni na nididahni, Naibata na so nididahni pe, seng boi haholonganni.” (1 Joh. 4:20) Jadi sungkun hita ma dirinta: ‘Ai banggal do holong ni uhurhu bani ganup jolma? Ai maidop do uhurhu bani na legan age pe kasar sidea bangku? Ai holong do na mangojur ahu mamakei panorang ampa gogohku laho mangurupi halak marlajar pasal Jahowa? Ai totap do huhorjahon ai hassi pe bahat halak na lang manjalo atap sogam uhurni mangidah ahu? Ai marusaha do ahu mangindahi buei cara ase boi mambere lambin bahat panorang laho mangurupi halak gabe susian ni Jesus?’​—Ep. 5:15, 16.

10. Sonaha Jesus gabe sibahen damei?

¹⁰ Sahalak sibahen damei do Jesus. Sanggah dong halak na mambahen na lang madear hu bani, lang ra ia mambalas. Tapi lang pitah ai. Iajari do homa halak na legan ase dear pasaloseihon parsoalanni. Umpamani, ase ijalo Jahowa galangan ni sidea, maningon mardamei do lobei sidea pakon hasomanni. (Mat. 5:9, 23, 24) Anjaha gati do iurupi Jesus apostelni ase ulang marsoal pasal ise na sibanggalan.​—Luk. 9:46-48; 22:24-27.

11. Sonaha hita boi gabe sibahen damei?

¹¹ Ase boi gabe sibahen damei, lang sungkup pitah padaohkon diri humbani parsalisihan. Maningon marusaha  do homa hita mardamei pakon na legan janah mangojur sanina botou ase dear pasaloseihon parsalisihanni. (Pil. 4:2, 3; Jak. 3:17, 18) Sungkun hita ma dirinta: ‘Ai ra do ahu mambahen pengorbanan ase boi mardamei pakon na legan? Sanggah adong sanina atap botou na mambahen borit uhurhu, ai gabe mardomdom do ahu? Ai hupaima do roh sidea mangindo maaf bangku, atap ahu do na parlobei manjumpahi sidea, age pe lang salahku ai? Anggo sosok situasini, ai ra do ahu mangojur na legan ase mardamei?’

12. Sonaha Jesus patuduhkon habujuran?

¹² Basar janah bujur tumang do Jesus. (Mat. 11:28-30) Lamlam do Jesus janah iarusi do pangahap ni halak age pe lang urah situasini. Umpamani, sanggah adong sahalak naboru Penisia mangindo ase ipamalum Jesus boruni, manjua do mungkahni ia bani pangindoan ni naboru ai. Tapi halani banggal ni haporsayaon ni naboru ai, gabe ipamalum ma boruni. (Mat. 15:22-28) Hassi pe bujur Jesus, tapi lang iambati ia dirini laho mambere podah. Contohni, sanggah si Petrus manlanglangi Jesus laho mangkorjahon harosuh ni Jahowa, mintor ipinsang do si Petrus i lobei ni susian na legan. (Mrk. 8:32, 33) Ibahen ia pe sonai sedo na laho pailahon si Petrus, tapi na laho mangajari ia ampa susian na legan do ase tongtong sidea palobeihon harosuh ni Naibata. Tontu borit do mungkahni pangahap ni si Petrus ai. Tapi halani ijalo ia do pinsang-pinsang ai, ujungni gabe mandapot guna ma ia hunjai.

13. Sonaha hita boi patuduhkon habasaron?

¹³ Laho patuduhkon habasaron hubani halak na ihaholongi hita, sipata maningon torang-torang do hita marsahap hubani sidea. Tapi, songon Jesus gunahon ma prinsip ni Bibel sanggah mambere podah. Anjaha tegas ma tapi lamlam. Pos ma uhurta ra do sidea mambahen na madear janah ra do sidea manjalo podah ai. Sungkun ma dirimu: ‘Ai barani do ahu pasingatkon hasomanku sanggah huidah lepak pambahenanni? Anggo maningon hupodahi do ia, lamlam do ahu padaskon ai atap kasar? Aha do na mangojur ahu mamodahi? Halani na lang marosuh do ahu bani, atap halani sihol uhurhu mangurupisi?’

14. Sonaha Jesus patuduhkon anggo ia ringgas marsibere-bere?

¹⁴ Holong tumang do uhur ni Jesus bani Bapani. Halani ai, lang sungkup pitah ibotoh ia aha na madear, tapi ihorjahon do ai humbani borsih ni uhurni. Halak na ringgas marsibere-bere ai, sai ipindahi do cara laho mangurupi halak na legan anjaha mambahen na madear bani sidea. Jadi lang sungkup pitah ibotoh hita na madear. Maningon ihorjahon hita do ai janah humbani borsih ni uhur ma bahen. Ra do adong na sungkun-sungkun, ‘Ai adong do halak na marsibere-bere tapi lang humbani borsih ni uhurni?’ Adong. Songon na ihatahon Jesus adong do halak na marsibere-bere bani halak na miskin, tapi itingtinghon sidea do ai ase ibotoh halak sibere-bereni. Age pe domma ibahen sidea na madear tapi lang marosuh Jahowa mangidah ai.​—Mat. 6:1-4.

15. Sonaha carani ase boi ihorjahon hita na madear humbani borsih ni uhur?

¹⁵ Hita boi mangkorjahon na madear humbani borsih ni uhur anggo ipingkirhon hita na porlu bani halak. Jadi sungkun ma dirimu: ‘Anggo dob hubotoh ai do na madear, ai domma tongon-tongon huhorjahon ai? Aha do na mangojur ahu mangkorjahon na madear?’

16. Aha do na maningon ipatuduh hita bai ganup ari, janah mase?

¹⁶ Ulang ma iagan hita dobkonsi ididi, lang porlu be ipatuduh hita parlahou na baru. Usih songon baju na baru do parlahou na baru, na maningon ijaga hita ase totap jenges. Sonaha carani? Marusaha ma patuduhkon buah ni tonduy bai ganup ari. Mase? Halani tenaga aktif ni Naibata do tonduy na pansing, janah boi do ai mangojur hita laho patuduhkon sifat-sifat na madear. (1 Mus. 1:2, NW) Jadi maningon ipatuduh hita do ganup sifat humbani buah ni tonduy ai. Umpamani, si Jakobus mangkatahon, “Matei [do] haporsayaon na so marhorja.” (Jak. 2:26) Boi ihatahon sonai ma homa ganup sifat humbani buah ni tonduy. Sanggah ipatuduh hita sifat-sifat ai, taridah ma marhorja do tonduy ni Naibata ibagas dirinta.

17. Aha ma bahenonta anggo sipata gagal hita patuduhkon buah ni tonduy?

¹⁷ Age pe domma martahun-tahun hita ididi, ra do sipata gagal hita patuduhkon buah ni tonduy. Tapi marusaha ma totap patuduhkon sifat-sifat ai. Pardiateihon ma contoh on, anggo maribak baju na iharosuhkon ham, tontu lang mintor igijigkon ham ai kan? Marusaha do ham manjahit ai janah marhati-hati do ham sanggah mamakei baju ai ase ulang maribak use. Sonai ma homa sanggah gagal ham patuduhkon holong ni uhur, hasabaron, ampa habujuran hubani sasada halak, ulang ma mintor maretek ni uhur. Anggo ra ham mangindo maaf, boi do mardear use ham pakon halak ai. Janah marusaha ma mambahen na sidearan i lobei ni ari.

18. Aha do na mambahen pos uhurta?

¹⁸ Martarima kasih tumang do hita halani dong sitiruan na ibahen Jesus! Anggo lambin itiru hita cara marpingkir ampa parlahou ni Jesus, lambin urah ma hita marpambahenan songon ia. Anggo lambin dos pambahenanta songon Jesus, lambin dear ma hita patuduhkon parlahou na baru. Bani artikel on, pitah ompat sifat ope humbani buah ni tonduy ai na dob na iulas hita. Dear do anggo igunahon ham panorangmu laho mamparlajari sifat-sifat na legan humbani buah ni tonduy. Anjaha pingkirhon ma atap adong ope na porlu ipadear laho patuduhkon sifat-sifat ai. Pindahi ma artikel pasal ai i Panduan Riset untuk Saksi-Saksi Yehuwa bani topik “Kehidupan Kristen”, dob ai pilih ma “Buah Kuasa Kudus”. Pos ma uhurmu, anggo marusaha ham patuduhkon parlahou na madear anjaha manjaga ai, tontu urupan ni Jahowa do ham.