1. Kai si utamana si mpengaruhi sipat-sipatta?

 LA SOAL kita mbaru denga iperidiken ntah pe enggo ndekah, ateta min meriah ukur Jahwe ngidah sipat-sipatta. Guna ngelakoken si e, perlu sikendaliken perukurenta. Engkai? Perban perukurenta mbelin kel pengaruhna ku sipat-sipatta. Adi kesenangenta saja si lalap siukuri, ranan ras perbahanenta banci la mehuli. (Ep. 4:17-19) Tapi adi siukuri kai si mehuli, ranan ras perbahanenta banci erban reh riahna ukur Bapakta Jahwe.​—Gal. 5:16.

2. Penungkunen kai saja kari sibahas bas artikel enda?

² Bagi si ituriken bas artikel sebelumna, mon-mon banci turah sura-sura si salah bas ukurta. Tapi kita nge si nentukenca silakoken ntah lang perukuren si salah e. Sope kita iperidiken, arus lebe sipengadi ranan ras perbahanenta si segat ate Jahwe. Enda me cara si utama ras si pentingna guna nangtangi sipat-sipat si dekah. Gelah banci siban meriah ukur Jahwe, arus ka sipatuhi perentah enda: “Pakelah sipat-sipat si mbaru.” (Kol. 3:10) Bas artikel enda, sijawap kari penungkunen-penungkunen enda: Kai kin “sipat-sipat si mbaru” e? Uga carata makesa ras mpertahankenca?

3. Uga kin kalakna si make “sipat-sipat si mbaru” e? (Galati 5:22, 23)

³ Kalak si make “sipat-sipat si mbaru” eme kalak si ngusih sipat-sipat Jahwe. Perukurenna, perasanna, ras perbahanenna ipengaruhi kesah si badia. Emaka, banci lalap cidahkenna sipat-sipat si ihasilken kesah si badia. (Baca Galati 5:22, 23.) Contohna, keleng atena Jahwe ras umatNa. (Mat. 22:36-39) Tetap ia ermeriah ukur amin  pe lit percuban. (Jak. 1:2-4) Nggit ia erban dame. (Mat. 5:9) Sabar ras mehuli ia man kalak. (Kol. 3:13) Ngena atena si mehuli ras perbahanenna pe mehuli. (Luk. 6:35) Ibuktikenna arah perbahanenna maka paguh kinitekenna man Bapakna si i surga. (Jak. 2:18) Tetap ia lembut amin pe lit si erban ia merawa, janah kendalikenna dirina sanga lit godan.​—1 Kor. 9:25, 27; Tit. 3:2.

4. Guna make sipat si mbaru, engkai maka perlu sipebelin kerina sipat si icatat bas Galati 5:22, 23 bage pe bas ayat-ayat si deban?

⁴ Guna make sipat si mbaru, perlu sipebelin kerina sipat si icatat bas Galati 5:22, 23 bage pe bas ayat-ayat si deban. * Sipat-sipat enda labo seri ras bagin-bagin arah sada paken si arus ipake sada per sada. Situhuna, sipat-sipat e erhubungen sada ras si debanna. Contohna, adi keleng atendu kalak si deban, pasti sabar ras mehuli kam man bana. Ntah, adi jadi kalak si mehuli atendu, arus kam jadi kalak si lembut ras banci kendalikenndu bandu.

5. Kai maksudna “bas kita lit kap perukuren Kristus,” ras engkai maka arus sipelajari usihen Jesus? (1 Korinti 2:16)

⁵ Baca 1 Korinti 2:16. Guna makeken sipat-sipat si mbaru, arus ‘lit bas kita perukuren Kristus.’ Enda maksudna arus sipelajari uga cara Jesus rukur ras siusih ia. Enggo cidahken Jesus sipat-sipat si ihasilken kesah si badia alu cara si sempurna. Jesus bali bagi cermin si ncidahken uga kin situhuna sipat-sipat Jahwe. (Heb. 1:3) Adi reh miripna carata rukur ras Jesus, reh miripna ka perbahanenta bage pe sipat-sipatta ras ia.​—Pil. 2:5.

6. Kai si perlu siinget sanga sipake ateta sipat-sipat si mbaru?

⁶ Tuhu nge banci siusih Jesus? Banci saja rukur kita, ‘Jesus me sempurna, labo aku banci bagi ia!’ Adi bage perasanta, lit telu si perlu siinget. Si pertama, kita iciptaken mirip bagi Jahwe ras Jesus. Emaka adi nggit kita, banci nge siusih Jahwe ras Jesus amin pe labo alu cara si sempurna. (Kej. 1:26) Si peduaken, kesah si badia Dibata me kuasa si megegehna bas alam semesta enda. Alu penampat kesah si badia, banci silakoken kai si  la banci silakoken alu gegehta. Si peteluken, labo pindo Jahwe sicidahken sipat-sipat si ihasilken kesah si badia alu sempurna gundari. Situhuna, man kalak si erpengarapen nggeluh i doni, enggo sikapken Bapakta Jahwe pagi 1.000 tahun dekahna gelah banci jadi sempurna. (Ket. 20:1-3) Si ipindo Jahwe gundari eme silakoken si mehulina ras siandalken Ia.

7. Kai nge si nandangi sibahas?

⁷ Uga carata ngusih Jesus? Sibahas kari empat sipat si ihasilken kesah si badia Dibata. Sipelajari kari uga cara Jesus ncidahken sipat-sipat e. Sibahas ka kari piga-piga penungkunen si banci nampati kita mereksa dirita, enggo nge tuhu-tuhu sipebelin sipat-sipat si mbaru e ntah lenga.

8. Uga cara Jesus ncidahken kekelengen?

⁸ Perban keleng kel ate Jesus man Jahwe, nggit ia erkorban man Bapakna ras man banta. (Joh. 14:31; 15:13) Arah kegeluhen Jesus sanga i doni, ibuktikenna maka keleng atena kerina kalak. Tiap wari, cidahkenna kekelengenna ras perkuah atena, amin pe lit kalak si rate segat man bana. Salah sada cara Jesus si utama si mbuktiken kekelengenna man jelma eme ngajari kalak e kerna Kerajan Dibata. (Luk. 4:43, 44) Selain si e, buktiken Jesus ka kekelengenna si la mentingken bana man Dibata ras man jelma sanga nggit ia ngenanami kiniseran ras ibunuh kalak perdosa. Alu bage, banci sidat kegeluhen si rasa lalap.

9. Uga carata ngusih Jesus bas ncidahken kekelengen?

⁹ Perban keleng ateta Bapakta si i surga, nggit kita mbaktiken diri ras iperidiken. Emaka, arus sibuktiken kekelengenta man Jahwe arah perbahanenta man kalak si deban, bali bagi Jesus. Bagenda nina Rasul Johanes, “Kalak si la engkelengi turang seninana si banci idahna, labo tuhu banci kelengina Dibata si la pernah idahna.” (1 Joh. 4:20) Cuba siukuri penungkunen-penungkunen enda: ‘Kupebelin nge kekelengenku man kalak si deban? Sabar nge aku man kalak si deban, amin pe kasar kalak e bangku? Kekelengen nge si ngiahken aku make waktuku ras kai si lit bas aku guna ngajari kalak kerna Jahwe? Nggit nge aku ngelakoken si e amin pe buen si la ngergai usahaku ntah pe itentangna aku? Kuusahaken nge make terbuen waktuku bas dahin njadiken murid?’​—Ep. 5:15, 16.

10. Uga cara Jesus erban dame?

¹⁰ Jesus kalak si nggit erban dame. Sanga la mehuli perbahanen kalak man bana, la ibalasna. Tapi labo terjeng la ibalasna. Sanga lit kalak si la sicocoken, usahakenna erban dame janah iahkenna kalak ndungi masalahna. Contohna, ajarkenna man kalak e maka gelah ialoken Jahwe persembahenna arus lebe ia erdame ras seninana. (Mat. 5:9, 23, 24) Selain si e, mulih-ulih sampatina rasul-rasulna gelah ula nai erjengil kerna ise si mbelinna arah kalak e.​—Luk. 9:46-48; 22:24-27.

11. Uga carana jadi kalak si erban dame?

¹¹ Gelah banci jadi kalak si erban dame, labo terjeng la siban masalah ras kalak si deban. Perlu siusahaken erban dame ras kalak si deban, janah siiahken turang seninata ndungi masalahna ras kalak si deban. (Pil. 4:2, 3; Jak. 3:17, 18) Banci siukuri penungkunen-penungkunen enda: ‘Nggit nge aku erkorban gelah banci erban dame? Sanga kitik ukurku ban turang seninaku, lalap nge nembeh ateku ia? Kutimai nge kalak si deban si erban  dame, ntah aku leben si rusaha erban dame amin pe kuakap ia nge si salah? Adi cocok, kuiahken nge kalak si lit masalahna gelah nggit erdame?’

12. Uga cara Jesus ncidahken kiniulin?

¹² Jesus kalak si mehuli. (Mat. 11:28-30) Cidahkenna kiniulin alu cara si lembut ras masuk akal amin pe bas situasi si mesera. Contohna, sanga lit sekalak diberu arah Punike si mindo kel ia gelah ipepalem Jesus anakna. Tangtangna labo lakoken Jesus kai si pindo diberu e. Tapi sanga cidahken diberu e kinitekenna si paguh, ipepalemna anakna ndai. (Mat. 15:22-28) Amin pe Jesus mehuli, la ia segan mereken nasehat. Mon-mon, cidahkenna kekelengenna alu mereken nasehat man kalak si keleng atena. Contohna, sanga ihalangi Petrus atena Jesus ngelakoken peraten Jahwe, persingeti Jesus ia i lebe-lebe murid-murid si deban. (Mrk. 8:32, 33) Bage iban Jesus labo gelah mela akap Petrus, tapi guna ngajari Petrus ras jadi persinget man murid-murid si deban gelah idukung kalak e ia ngelakoken peraten Dibata, labo ihalangina. Pasti mela nge akap Petrus paksa si e, tapi persinget e erguna man bana.

13. Kai nge si ilakoken kalak si mehuli?

¹³ Gelah banci kita mehuli man kalak si keleng ateta, mon-mon perlu sibereken nasehat man bana. Sanga ngelakoken si e, usihlah Jesus alu mereken nasehat si cocok ras prinsip-prinsip Pustaka. Ula kita mbiar. Teklah maka kalak e nggit ngelakoken si benar. Tek ka min kita maka kalak si keleng atena Jahwe ras keleng atena kita, mehuli nge kari tanggapenna man nasehatta si perkeleng. Cuba ukuri penungkunen-penungkunen enda: ‘Pang nge aku ngerana man kalak si keleng ateku si ngelakoken kai si salah? Adi perlu kubereken nasehat, mehuli nge aku ngerana, ntah kasar aku ngerana? Kai nge alasenku mereken nasehat, perban merawa nge aku ntah perban kusampati ateku ia?’

14. Kai buktina Jesus kalak si bujur?

¹⁴ Jesus labo terjeng meteh kai si bujur, tapi perbahanenna pe bujur. Keleng ate Jesus Bapakna, emaka lalap lakokenna si benar alu alasen si benar. Kalak si bujur, lalap daramina cara nampati kalak si deban, janah lakokenna si mehuli man kalak e. Emaka labo bias terjeng meteh kai si benar. Arus silakoken kai si benar alu alasen si benar. Banci saja lit si tersungkun-sungkun, ‘Banci kin silakoken si benar alu alasen si la benar?’ Banci. Contohna, pernah icakapken Jesus kerna kalak si mere hadiah man kalak mesera. Tapi usahaken kalak e gelah teh kalak si deban si lakokenna e gelah ipuji kalak ia. Amin pe tempa-tempa bujur perbahanen kalak e, tapi la meriah ukur Jahwe ngidahsa.​—Mat. 6:1-4.

15. Uga carana jadi kalak si bujur?

¹⁵ Banci kita jadi kalak si bujur adi silakoken si benar alu alasen si la mentingken bana. Ukurilah penungkunen-penungkunen enda: ‘Kulakoken nge si benar ntah terjeng kuteh saja ngenca tapi la kulakoken? Kai nge alasenku ngelakoken kai si bujur?’

16. Kai si arus silakoken tiap wari, ras engkai?

¹⁶ Ula min siakap maka kenca iperidiken enggo dung perjuangenta bas makeken sipat-sipat si mbaru. Sipat-sipat si mbaru bali bagi “baju si mbaru” si arus  sijaga tetap mejile. Salah sada carana eme alu ncidahken sipat-sipat si ihasilken kesah si badia tiap wari. Engkai? Perban adi reh belinna usahata bas makeken sipat-sipat e, reh belinna ka penampat kesah si badia man banta. Kesah si badia igelari ka gegeh Dibata si erdahin. Gegeh e me si ngiahken kita ertindak. (Kej. 1:2) Emaka, kerina sipat-sipat si ihasilken kesah si badia arusna ngiahken kita ertindak. Contohna, bagenda itulis Jakup, “Kiniteken si la ikut ras perbahanen, mate kap.” (Jak. 2:26) Sipat-sipat si deban si ihasilken kesah si badia pe arus teridah arah perbahanen. Tiap sicidahken sipat-sipat e, sibuktiken maka isampati kesah si badia kita.

17. Uga arusna tanggapenta sanga mesera siakap ncidahken sipat-sipat si mbaru?

¹⁷ Kalak Kristen si enggo ndekah iperidiken pe mon-mon mesera kapna ncidahken sipat-sipat si mbaru. Tapi si pentingna, terus siusahaken ncidahken sipat-sipat e. Cuba siukuri perumpaman enda: Adi merigat baju si ngena kel atendu, mis nge ambekkenndu baju e? Lang! Biasana usahakenndu asa ngasupndu mpekenasa adi banci denga. Kenca si e, lebih hati-hati kam. Bage ka pe, adi mon-mon mesera siakap ncidahken sipat si mehuli, sabar, ras perkeleng man kalak si deban, ula kitik ukurta. Mindo maaplah kita arah ukurta nari gelah tetap mehuli hubungenta ras kalak si deban. Kenca si e, siusahaken jadi kalak si reh ulina.

18. Kerna kai nge kita tek?

¹⁸ Ngata bujur kel kita perban lit usihen si bere Jesus man banta! Reh buena siusih perukuren Jesus reh nukahna siakap ngusih perbahanenna. Reh buena siusih perbahanen Jesus, reh ulina me carata makeken sipat-sipat si mbaru. Bas artikel enda, enggo sipelajari empat sipat si ihasilken kesah si badia. Pasti erguna man banta adi sipelajari sipat-sipat si deban si ihasilken kesah si badia, ras siukuri enggo mehuli ntah lang carata makekenca. Banci sidat artikel-artikel si erhubungen ras topik e bas Panduan Riset untuk Saksi-Saksi Yehuwa bas bagin “Kehidupan Kristen” jenari ku bagin “Buah Kuasa Kudus.” Adi silakoken baginta, tek kita pasti sampati Jahwe kita makeken sipat-sipat si mbaru ras mpertahankenca.