1. Wat da di mayn ting weh afek wi persnaliti?

 IH NOH mata how lang wi baptaiz fa, weda da fi wahn fyoo dayz er fi wahn lata yaaz, aala wi waahn bee di kaina persn weh Jehoava lov. Fi bee di kaina persn weh Jehoava lov, wi need fi kanchroal di way how wi tink. Wai? Bikaaz di mayn ting weh afek wi persnaliti da di way how wi tink. If wi aalwayz di tink bowt wayz fi pleez wiself, wi wahn du ahn seh tingz weh bad. (Ifee. 4:17-19) Pahn di ada han, if wi tink bowt tingz weh gud, den moa dan laikli wi wahn seh tingz an ak eena wahn way weh pleez wi Faada, Jehoava.—Gal. 5:16.

2. Weh kweschanz wi wahn ansa eena dis aatikl?

² Az wi laan eena di laas aatikl, wi kyaahn stap evri singl bad ting fahn kom op eena wi main. Bot wi ku chooz fi noh du di rang tingz weh mait kom op eena wi main. Bifoa wi mi geh baptaiz, wi mi haftu stap taak an ak eena wahn way weh Jehoava hayt. Dis da di fers ahn moas impoatant step weh wi mi tek fi geh rid a di oal persn. Fi mek wi pleez Jehoava wid aala wi haat, wi haftu obay di koman weh seh: “Jos laik how unu put aan kleen kloaz, put aan di nyoo persn.” (Kol. 3:10) Eena dis aatikl, wi wahn ansa dehnya kweschan: Wat da “di nyoo persn”? How wi ku put aan di nyoo persn ahn kip it aan?

3. Akaadn tu Galayshanz 5:22, 23, wat da “di nyoo persn,” ahn how sohnbadi ku put aan “di nyoo persn”?

³ Sohnbadi put aan “di nyoo persn” wen ih shoa di kwalitiz weh Gaad hoali spirit bayr, an yu ku kompyaa dat tu  wen wahn persn put aan kleen kloaz. Dat meenz dat hihn alow di hoali spirit fi gaid di way how ih tink, feel, an ak. (Reed Galayshanz 5:22, 23.) Fi egzampl, ih lov Jehoava ahn fi Hihn peepl. (Mach. 22:36-39) Ih kantinyu fi bee hapi eevn wen ih di goh chroo chraiyalz. (Jay. 1:2-4) Ih da wahn persn weh redi fi mek pees. (Mach. 5:9) Ih payshent ahn kain wen ih di deel wid adaz. (Kol. 3:13) Ih lov du gud tingz fi adaz. (Look 6:35) Ih shoa dat ih ga schrang fayt eena ih hevnli Faada bai di tingz weh ih du. (Jay. 2:18) Wen adaz chrai pik fait wid ahn er get ahn beks ih stay kaam, an ih shoa self kanchroal wen ih fays temtayshan.—1 Kor. 9:25, 27; Taitos 3:2.

4. Wai wi need fi shoa aala di kwalitiz weh geh menshan da Galayshanz 5:22, 23 an eena ada paats a di Baibl soh dat wi ku put aan di nyoo persn? Pleez eksplayn yu ansa.

⁴ Fi put aan di nyoo persn, wi need fi werk haad fi ga aala di kwalitiz weh geh menshan da Galayshanz 5:22, 23 an eena ada paats a di Baibl. * Dehnya kwalitiz da noh laik kloaz weh yu put aan wan bai wan. Az a mata a fak, som a dehnya kwalitiz simila tu ada kwalitiz. Fi egzampl, if yu reeli lov yu nayba, yu wahn bee payshent wid ahn, an yu wahn bee kain tu ahn. Ahn fi mek yu bee wahn gud persn, yu haftu ga wahn jentl haat ahn shoa self-kanchroal.

5. Weh ih meen fi “ga di main a Krais,” ahn wai wi shuda stodi Jeezas laif? (1 Korintyanz 2:16)

⁵ Reed 1 Korintyanz 2:16. Fi put aan di nyoo persn, wi need fi “ga di main a Krais.” Soh dat meenz dat wi need fi laan how Jeezas tink ahn den chrai fala ahn. Jeezas mi shoa di froot weh di hoali spirit bayr eena wahn perfek way. Jeezas da laik wahn perfek miro; hihn shoa Jehoava kwalitiz eena wahn perfek way. (Heeb. 1:3) Di moa wi tink laik Jeezas, di moa wi wahn ak laik hihn ahn wi wahn ga sokses di put aan di nyoo persn.—Fil. 2:5.

6. Weh wi need fi tink bowt wen wi di chrai put aan di nyoo persn?

⁶ Yu tink ih reeli pasabl fi mek wi fala Jeezas egzampl? Wi mait tink tu wiself: ‘Jeezas perfek. Ai kuda neva bee laik  hihn!ʼ If yu feel da way, pleez tink bowt dehnya tingz. Fers, Jehoava mek yu eena wahn way fi bee laik hihn an ih Son, Jeezas. Soh yoo ku chooz fi du yu bes fi fala fi dehn egzampl ahn bee laik dehn. (Gen. 1:26) Sekant, Gaad hoali spirit da di moas powaful foas eena di yoonivers. Wid fi hihn hoali spirit, yu ku du tingz weh yu kuda neva du pahn yu oan. Terd, Jehoava noh ekspek yu fi bee perfek eena di way how yu shoa di kwalitiz weh di hoali spirit bayr now. Az a mata a fak, wi lovin Faada wahn gi dehn wan weh ga di hoap fi liv pahn ert 1,000 yaaz fi mek dehn ku geh fi bee perfek. (Rev. 20:1-3) Weh Jehoava waahn wi du rait now da fi chrai wi bes fi pleez ahn, an pen pahn hihn fi help.

7. Weh wi wahn diskos now?

⁷ How wi ku fala Jeezas? Wi wahn luk pahn foa kwalitiz weh Gaad hoali spirit bayr. Fi eech a dehnya kwalitiz, wi wahn si weh wi ku laan fahn di way how Jeezas mi shoa dehnya saym kwalitiz. Az wi du dat, wi wahn diskos sohn kweschanz weh wahn help wi fi si if wi di put aan di nyoo persn eena di karek way.

8. How Jeezas mi shoa lov?

⁸ Jeezas deep lov fi Jehoava mi moov ahn fi mek wahn lata sakrifais fi ih Faada ahn fi wee tu. (Jan 14:31; 15:13) Jeezas mi shoa humoch hihn lov peepl bai di way how ih mi liv ih laif pahn ert. Evri day, hihn mi shoa lov ahn kompashan fi peepl, eevn wen som a dehn mi deh gens ahn. Wahn impoatant way Jeezas mi shoa dat ih lov peepl da wen ih mi teech dehn bowt Gaad Kingdom. (Look 4:43, 44) Jeezas mi aalso shoa dat ih neva selfish, dat ih mi lov Gaad, ahn dat ih mi lov peepl wen ih mi wilin fi sofa ahn fi mek sinaz kil ahn. Eena da way, hihn mi mek it pasabl fi aala wi geh evalastin laif.

9. How wi ku shoa lov laik Jeezas?

⁹ Wi mi dedikayt wi laif tu Jehoava ahn geh baptaiz bikaaz wi lov wi hevnli Faada. Soh, jos laik Jeezas, wi shuda shoa Jehoava dat wi lov ahn bai di way how wi chreet peepl. Di apasl Jan mi seh: “Kaaz if ih noh lov ih bradaz weh ih ku si, den ih kyaahn lov Gaad weh ih neva si yet.” (1 Jan 4:20) Wee ku aks wiself dehnya kweschan: ‘Ai reeli lov peepl? Ai shoa kompashan wen Ah di deel wid adaz, eevn if dehn noh chreet mi gud? Lov fi adaz moov mi fi yooz mi taim an ada tingz weh impoatant tu mee fi help dehn laan bowt Jehoava? Ai wilin fi du dis eevn wen moas peepl noh apreeshiayt di werk weh Ah di du er wen dehn deh gens mi? Ai ku spen moa taim eena di minischri?ʼ—Ifee. 5:15, 16.

10. How Jeezas mi shoa dat ih mi aalwayz wilin fi mek pees?

¹⁰ Jeezas da-mi wahn persn weh aalwayz wilin fi mek pees. Wen peepl mi chreet ahn bad, hihn neva chreet dehn bad. Hihn mi tek di fers step fi mek pees an ih mi aalso inkorij adaz fi mek pees wid enibadi weh dehn mi ga prablemz wid. Fi egzampl, hihn mi teech dehn dat dehn haftu mek pees wid dehn bradaz if dehn waahn Jehoava aksep dehn wership. (Mach. 5:9, 23, 24) Ahn hihn mi help ih apasl dehn fi stap aagyu bowt hoo da-mi di moas impoatant monks dehn.—Look 9:46-48; 22:24-27.

11. How wi ku bee sohnbadi weh wilin fi mek pees?

¹¹ If wi wahn bee wilin fi mek pees, wi haftu du moa dan jos avoid prablemz wid adaz. Wi need fi mek di efoat fi mek pees wid adaz an inkorij wi bradaz ahn sistaz fi fiks eni prablem weh dehn ga wid wan  anada. (Fil. 4:2, 3; Jay. 3:17, 18) Wi ku aks wiself dehnya kweschan: ‘Weh Ai wilin fi giv op fi mek pees wid adaz? Wen wahn brada er sista hert mi feelinz, Ai hoal malis gens dehn? Ai wayt fi mek di ada persn tek di fers step fi mek pees, er Ai tek di fers step fi mek pees, eevn if Ai tink dat da di ada persn kaaz di prablem? Wen ih prapa, Ai inkorij dehn wan weh ga prablem wid eech ada fi mek pees?ʼ

12. How Jeezas mi shoa dat ih kain?

¹² Jeezas da-mi wahn kain persn. (Mach. 11:28-30) Jeezas mi shoa dat ih da wahn kain persn bikaaz eevn wen di sichuwayshan mi haad, ih mi jentl an ih mi reeznabl wid adaz. Fi egzampl, wen wahn uman fahn Foneesha mi aks ahn fi heel ih pikni, hihn mi taak tu ahn eena wahn kain way. Fers, hihn mi tel ahn no, bot bikaaz shee mi shoa dat ih ga schrang fayt, Jeezas mi heel di uman pikni. (Mach. 15:22-28) Jeezas mi kain, bot dat noh meenz dat hihn neva kongsl adaz wen dehn mi need it. Sohntaim, hihn mi shoa dat hihn kain wen ih mi schrik wid dehn wan weh ih lov. Fi egzampl, wen Peeta mi chrai stap Jeezas fahn du Jehoava wil, Jeezas mi karek ahn fronta aala di ada disaipl dehn. (Maak 8:32, 33) Hihn neva du dis fi shaym Peeta, bot ih du it fi chrayn ahn an fi help di ada disaipl dehn fi noh bee prowd ahn du sohnting weh dehn noh ga di rait fi du. Peeta mi praabli feel shaym wahn lee bit, bot hihn mi benifit wahn lat fahn da disiplin.

13. How wi ku shoa chroo kainis tu adaz?

¹³ Fi mek wi shoa chroo kainis tu dehn wan weh wi lov, sohntaim wi mait haftu gi dehn kongsl. Wen yu du dis, fala Jeezas egzampl ahn bays yu kongsl pahn di prinsiplz weh yu fain eena Gaad Werd. Bee jentl. Bileev dat di persn waahn du weh rait, ahn chros dat dehn wan weh lov Jehoava ahn weh lov yoo wahn lisn tu di lovin kongsl weh yu gi dehn. Aks yuself dehnya kweschan: ‘Ai ga di korij fi seh sohnting wen Ah si sohnbadi weh Ah lov di du sohnting rang? If Ai need fi gi dehn kongsl, Ah giv it eena wahn kain way, er Ah giv it eena wahn rof way? Wat da mai reezn fi gi dehn kongsl? Ai di gi dehn kongsl bikaaz Ah kyaahn stan dehn, er Ah di gi dehn kongsl bikaaz Ah waahn help dehn?ʼ

14. How Jeezas mi shoa di kwaliti a gudnis?

¹⁴ Jeezas neva onli noa weh gud, bot hihn mi aalso du weh gud. Jeezas lov ih Pa, soh hihn aalwayz du di rait ting fi di rait reezn. Sohnbadi weh ga di kwaliti a gudnis aalwayz luk fi wayz fi help adaz ahn du gud tingz fi dehn. Da noh inof fi jos noa wat da di rait ting fi du, bot wi aalso haftu du it fi di rait reezn. Sohnbadi mait wanda, ‘Ih pasabl fi du di rait ting fi di rang reezn?ʼ Yes. Fi egzampl, Jeezas mi taak bowt dehn wan weh gi gif tu dehn wan weh poa, bot dehn mek shoar dat adaz kuda si weh dehn, du soh dat dehn ku geh prayz. Eevn doa weh dehn du mi gud, Jehoava neva pleez wid dehn bikaaz dehn mi du it fi di rang reezn.—Mach. 6:1-4.

15. How wi ku shoa dat wi chrooli gud tu adaz?

¹⁵ Wi ku bee chrooli gud tu adaz if wi du gud tingz fi di rait reezn. Yu ku aks yuself dehnya kweschan: ‘If Ai noa wat da di rait ting fi du, Ai akchwali du it? Wat da mai reezn fi du gud tingz fi adaz?ʼ

16. Weh wi shuda aalwayz du, ahn wai?

¹⁶ Wi neva waahn tink dat bikaaz wi geh baptaiz, wi don put aan di nyoo persn ahn  wi noh haftu werk pan it nohmoh. Di nyoo persn da laik wahn nyoo “kloaz” weh wi get, soh wi need fi kip it eena gud kandishan. Wi aalwayz need fi shoa di kwalitiz weh Gaad hoali spirit bayr. Wai? Bikaaz di moa efoat wi mek fi shoa dehnya kwalitiz, di moa Jehoava wahn help wi. Dis da bikaaz Jehoava da wahn Gaad a akshan, ahn fi hihn hoali spirit ga powa. (Gen. 1:2) Soh ih reeli impoatant fi mek wi kantinyu werk pahn di nyoo persn. Fi egzampl, di disaipl Jaymz mi rait: “Wi fayt ded if wi noh shoa it bai di gud tingz weh wi du.” (Jay. 2:26) Wi ku seh di saym ting bowt aal di ada kwalitiz weh Gaad hoali spirit bayr. Evri taim wi shoa di kwalitiz weh Gaad hoali spirit bayr, wi di gi proof dat Gaad hoali spirit di help wi.

17. Weh wi shuda du wen wi noh di shoa di kwalitiz weh Gaad hoali spirit bayr?

¹⁷ Eevn Kristyanz weh baptaiz fi wahn lata yaaz sohntaim noh shoa di kwalitiz weh Gaad hoali spirit bayr. Bot ih moa impoatant fi mek wi kip di chrai fi shoa dehndeh impoatant kwalitiz. Tink bowt dis: If yu mi tayr wan a yu fayvrit shert, yoo wuda dash it weh rait away? Af koars nat! Moa dan laikli yu wuda tek di taim fi fiks di shert. Ahn yu wuda bee moa kyaaful afta dat soh dat yu noh damij it agen. Jos laik dat, if yu noh aalwayz ak eena wahn kain, payshent, er lovin way tuwaadz sohnbadi, noh geh diskorij. Yu ku tel di persn dat yu veri sari ahn dat ku help yu kip wahn gud rilayshanship wid dehn. Ahn mek op yu main fi du beta eena di fyoocha.

18. Weh wi ku bee shoar a?

¹⁸ Wi soh tankful fi ga di egzampl weh Jeezas set fi wi! Di moa wi chrai fi fala di way how hihn tink, di eeziya ih wahn bee fi mek wi ak laik hihn. Di moa wi ak laik Jeezas, di eeziya ih wahn bee fi mek wi put aan di nyoo persn. Eena dis aatikl, wi mi luk pahn foa kwalitiz weh Gaad hoali spirit bayr. Ih wuda bee gud fi mek wi spen sohn taim di stodi di res a kwalitiz a Gaad hoali spirit ahn tink bowt how wee di shoa dehndeh kwalitiz. Yu ku fain wahn lis a aatikl pahn dis tapik eena di Risaach Gaid fi Jehoava Witnisiz anda “Kristyan Laif” ahn den “Froot a di Spirit.” Yu ku bee shoar dat if yoo chrai put aan di nyoo persn ahn kip it aan, Jehoava wahn help yu.