1. Ka arufudubalin ka lan hawuyeri gürigia wagía?

 BARÜHADIWA lan yebe fiu weyu o saragu irumu lúmagiñe wabadiseirun, sun wagía busentiwa warufuduni igaburi le aubei lagundaara Heowá. Lun wibihini mosu wóunigiruni ka lan uagun wasaminara. Ka uagu? Ladüga arufuda lumuti ligaburi wasaminan ka lan hawuyeri gürigia wagía. Ánhawa asaminara luagu katei le lánina layumahan ǘgürügü wariñaguba ani wadügüba katei le mabuidunti (Efe. 4:17-19). Ánhawa abuinchagüdei wasaminan lau lubuidun saminaü chóuruti wayanuhaba lan ani adüga wameime katei kei le aubei línsiñeda lun Wáguchi Bungiu Heowá (Gal. 5:16).

2. Kaba burí álügüdahani ounabúa lidan aturiahani le?

² Kei le aubei warihei lidan aturiahani le lubaragiñebei le, siñati wararamuni sunsuinagubei lun mebelurun lan luriban saminaü wachügüwagun. Lau sun lira gayaraati wanúadirun madügün wamani. Lubaragiñe wabadiseirun lunti wígiruni wayanuhan luma wadügün katei le iyereegubei lun Heowá. Le furumiñeti katei le lunbei wadügüni ani le súdinitimabei, lun wagidaruni binadu igaburi wawariua. Ligíati lun wagundaaragüdüni Heowá sunsuinagubei mosu gaganbadi wamá lun adundehani le: “Daügua humá lau iseri igaburi” (Efe. 4:24). Lidan aturiahani le lóunabuba álügüdahani burí le: ka mini lubéi wadaüragun “lau iseri igaburi”? ani ida luba wadaürüni luma lun masansirun wamani?

3. Ka mini lubéi “iseri igaburi”, ani ida luba gagaburi wamani? (Galasiana 5:22, 23).

³ Mini lan “iseri igaburi” ligaburi lasaminarun gürigia luma ladügüni katei le arufudubalin ligaburi Heowá. Ani ida luba  gagaburi wamani? Lau warufuduni igaburi le líchugubei lani Bungiu sífiri lau wígirun lun ladundehani le wasaminarubei le wasandirubei luma le wadügübei (aliiha huméi Galasiana 5:22, 23). Kei hénpulu, gürigia le adaüragunbei “lau iseri igaburi” hínsiñeti Heowá hama lubúeingu lun (Mat. 22:36-39). Gúndaati íbini dan le lagagibudagun luma lénrengunga (Sant. 1:2-4). Áluaha lumuti darangilaü (Mat. 5:9). Gaguraasunti ani arufudati lubuidun igaburi houn amu (Kol. 3:12, 13). Adüga lumuti le buídubei ani hínsiñeti lun (Luk. 6:35). Arufuda lumuti lau le ladügübei weiri lan lafiñen luagu Lúguchi le siélubei (Sant. 2:18). Óuserati lau darangilaü íbini dan le hagañidagüdüni (Titu 3:2). Ani ragüguati lungua dan le lóuchawagun (1 Ko. 9:25, 27).

4. Lun gayara lan wadaüragun lau iseri igaburi ka uagu súdini lubéi wáyeihani igaburi le lídanbei Galasiana 5:22, 23 o le áfuachubei lidan amu burí bérusu le tídanbei Bíbülia?

⁴ Lun wadaüragun lau iseri igaburi, mosu wáyeihani lubuidun burí igaburi le áfuachubei lidan Galasiana 5:22, 23 kei le áfuachubei lidan amu burí bérusu tidan Bíbülia. * Mítaranti wadaürüni igaburi le kei wadaürün ámuñegueinarügü tuwuyeri daüguaü. Lubaragiñe lira, gániti lúmagua. Anhein inarüni lubéi hínsiñe hamá gürigia woun, gagurasunbadiwa habá ani buídubei wóuseruniña. Lun gürigia wamá ha buítiña, mosu darangilu wamá ani ragügua wagíame woungua.

5. Ka mini lubéi gama wamani “lisaminan Kristu”, ani ka uagu lunti lubéi waturiahani libagari Hesusu? (1 Korintuna 2:16).

⁵ (Aliiha huméi 1 Korintuna 2:16). Lun wadaüragun lau iseri igaburi, mégeitiwa gama wamani “lisaminan Kristu”, mini lan le, megei wamá wafurendeirun ida liña lan lasaminarun Hesusu ani áyeiha wameime. Arufuda lumuti Hesusu igaburi le líchugubei lani Bungiu sífiri machararunga. Ítara kei aba isubusei buitu, arufuda lumuti Hesusu ligaburi Heowá kei lubeibei (Ebü. 1:3). Eibu genegegua lan ligaburi wasaminan luma lisaminan Hesusu, buídutimabei wáyeihani ligaburi luma le ladügübei ani larihúba lubuidun igaburi ligía wawagu (Fili. 2:5).

6. Ka lunbei waritaguni dan le wáfaagun lun wadaüragun lau iseri igaburi?

⁶ Le san lúgubu gayara lan wáyeihani lani Hesusu hénpulu? Másiñati hasaminarun: “macharati Hesusu. Le lúgubu siñabei ítara nan kei Hesusu!”. Anhein ligía lubéi hisaminanbei,  haritagua humá ǘrüwa katei. Furumiñe, adügǘwatün lun lenege humá Heowá luma Hesusu. Ligíati gayara lubéi hanúadirun háyeihaniña gayaraati hibihini, darí le ñein lubéi laguraba Heowá húmagiñe (Agu. 1:26). Libiaman, lani Bungiu sífiri sandu ligía erei le gabafutimabei. Lau lídehan sífiri le, gayaraati hibihini katei le siñabei hibihini habugúa. Lǘrüwan, magurabunti Heowá harufuduni igaburi le líchugubei sífiri machararunga uguñe weyu. Samina humá líchuguba lan wáguchi le hínsiñehabubei milu irumu houn gürigia ha lúnbaña hawinwandun ubouagu lun lagidarun figóu hawéi (Aruf. 20:1-3). Le lagurabubei Heowá wámagiñe uguñe weyu lun wadügüni áfaaguni le emegeirubei afiñeñu luagu líderagubadiwa lan.

7. Kaba wariha guentó?

⁷ Ídatima luba gayara lan wáyeihani Hesusu? Wakutiha gádürü igaburi lídangiñe le líchugubei lani Bungiu sífiri. Warihubei ida liña lan larufuduni Hesusu kada aban lídangiñe igaburi le, luma ka lan gayaraabei wafurendeirun lídangiñe. Warihuba giñe fiu álügüdahani le lunbei líderaguniwa arihei anhein megei wabéi wabuiduragüdüni iseri wagaburi.

8. Ida liña larufuduni Hesusu línsiñehabu?

⁸ Wéiriti línsiñe Heowá lun Hesusu darí lun ladügün sákürifisiu luagu luma wawagu (Huan 14:31; 15:13). Ani arufuda lumuti óunwenbu ínsiñeni le lasandirubei hawagu gürigia lau ligaburi lawinwandun dan le ya lubéi ubouagu. Súnwandan hínsiñehabu lan, ani gudemehabu ligía íbini houn gürigia ha mínsiñehabubaña lun. Arufuda lumuti ínsiñeni espechaliti le, dan le layanuhan hama gürigia luagu Larúeihan Bungiu (Luk. 4:43, 44). Arufuda lumuti giñe óunwenbu ínsiñeni le lasandirubei luagu Bungiu luma hawagu gürigia lau aranseñu liña lan lun lasufurirun ani hilá ligía háhaburugu gafigountiña. Ítara liña líchugun chansi woun súngubei lun wawinwandun lun súnwandan.

9. Ida luba gayara lan warufudun ínsiñeni, lau wáyeihani Hesusu?

⁹ Anhein deregeguaadiwa lubéi woungua lun Heowá ani badisei wagía, adüga wamuti ladüga hínsiñe lan Wáguchi Bungiu le siélubei woun. Ítara kei Hesusu, lunti warufuduni ínsiñeni le lau ligaburi wóuseruniña gürigia. Abürühati apostolu Huan: “Anhein mínsiñe lubéi líbiri aba gürigia lun, le ariha lumuti, siñabei giñe hínsiñe lan Bungiu lun, le marihin lubéi” (1 Huan 4:20). Álügüdagua wamá woungua: “Wéiriti san ínsiñeni le nasandirubei hawagu amu? Gudemehabutina san houn amu, íbini dan le wuriba lan hóuserunina? Ínchaha lumutina san ínsiñeni le nasandirubei lun nayusuruni nidaani luma númati lun nayanuhan hama amu gürigia luagu Heowá? Aranseñu niña san nadügüni íbini mínsiñe lan houn hiibe-agei gürigia, o meberesen hamá nau? Gayaraati san naganwoundagüdüni napurichihan?” (Efe. 5:15, 16).

10. Ka meha ladügübei Hesusu lun ñein lan darangilaü?

¹⁰ Darangiluti meha Hesusu. Maguyuguagüdünti wuribani luagu wuribani. Ani adügati amu katei. Adüga lumutiha sun liyaraati lun darangilu lan hama gürigia, ani ínchaha lumutiña amu lun haransehani haturobulin. Arufudahati houn amu lun haransehani haturobulin hama hábirigu anhein busén habéi lun lánharun Heowá lun áhuduraguni le híchugubei lun (Mat. 5:9, 23, 24). Súnwandan línchahaniña lani apostolugu lun masigenehan hamá luagu ka lan hádangiñe wéirigutimabei (Luk. 9:46-48; 22:24-27).

11. Ida luba wídehan lun ñein lan darangilaü?

¹¹ Lun ñein lan darangilaü, úati buídurügü lan lun magubuhan wamá wuribani. Mégeitiwa giñe wagía lan furumiñe adügei le emegeirubei lun ñein lan darangilaü hama amu, luma lun wínchaniña wábirigu lun haransehani haturobulin hádangua (Fili. 4:2, 3; Sant. 3:17, 18). Gayaraati wálügüdagun woungua: “Aranseñu niña san lun naranseruni niturobulin hama amu? Areidahatina san iyereehabúni dan le ladügün aban  íbiri aba katei le gáriti nun? Agurabatina san gürigiaba lan le adügüti aba katei le gáriti nun ligíaba lan aranserei turobuli? O nuguyaba san adügei sun niyaraati lun naranseruni turobuli íbini mama lan nuguya gadurunbei? Anhein gayara, ínchaha numutiña san ha gaturobulinbaña lun harandarun?”.

12. Ida liña larufuduni Hesusu luagu hínsiñehabu lan?

¹² Buiti meha lóuseruniña Hesusu gürigia (Mat. 11:28-30). Hínsiñehabuti, ani subudi lumuti ka lan hemegeirubei kada gürigia íbini lidan lénrengunga. Kei hénpulu, dan le tayumuragunbei aban würi fenisiana lun, lun lareidaguagüdünun tisaani, madügün lumuti lau lóufudagun. Gama lumoun buiti lóuserunu aba lareidaguágüdünu tisaani dan le larihini weiri lan tafiñen (Mat. 15:22-28). Lau sun areida lan meha Hesusu, mígirunti lun leredehani le lasandirubei lun líchugun adundehani houn amu. Lau sun areida lan madügünti le lun mayanuhanbei lan furangu houn ha hínsiñebaña lun. Luagu aban dan, dan le lálugunbei Féduru leredehani Hesusu luéi lagunfulirun lau lugundan Heowá, aba lébechuni Hesusu Féduru hagibugiñe ha híbiri disipulugu (Mar. 8:32, 33). Madügün lumuti lun lǘnabudagüdüni Féduru, adüga lumuti lun larufudahan lun, luma lun larufudahan houn ha híbiri disipulugu mosu lan hídehan lun lagunfulirun lugundan Bungiu. Chóuruti sandí lan Féduru murusun busiganu, gama lumoun lun lubuidun guánarügü lariñagei Hesusu katei le lun.

13. Ka lunbei wadügüni lun buidu lan wóuseruniña gürigia?

¹³ Lun warufudun ínsiñehabuni houn gürigia ha hínsiñebaña woun, anihein dan mosu lan wayanuhan houn furangu. Danme wadügüni, áyeiha waméi Hesusu ani yusu wamounme Lererun Bungiu kei lébuna adundehani le lunbei wíchuguni. Hínsiñehabu wamá. Le lan buídubei waguraba hámagiñe, lau wafiñerun ha lan hínsiñehabubaña lun Heowá ani hínsiñehabu hagía woun hánharuba lan lun adundehani le wíchugubei houn lau saragu ínsiñeni. Álügüdagua wamá woungua: “Ganigibadina san lun nayanuhan lun gürigia ligía dan le narihini adüga aban katei wuribati? Ani ida luba nayanuhan luma? Lau ínsiñehabuni, o lau irofuni? Ani ka uagu níchigei adundehani le lun? Ladüga san gañi nan luma gürigia ligía, o ladüga busén nani le buídutimabei lun?”.

14. Ida liña larufudun Hesusu areiduni?

¹⁴ Mámarügü subudi lumuti Hesusu le buídubei; adüga lumuti giñe. Hínsiñeti Lúguchi lun, ligía súnwandan lubéi ladügüni le buídubei ani lau aban igaburi buiti. Gürigia le areidabei súnwandan lálugun líderaguniña ha híbiri luma lun ladügün katei hawagu. Úati buídurügü lan wasubudiruni le buídubei; mosu wadügüni ani lau aban lubuidun igaburi. Másiñati lálügüdahan aban gürigia: “Gayaraati lubéi ladügǘn aban katei buiti lau aban luriban igaburi?”. Anha, gayaraati. Ayanuhati meha Hesusu hawagu ha ichugúbaña seinsu houn gudemetiña aba lan meha hachoururuni lun hasubudiruni amu le hadügübei. Katei buiti le hadügübei maweiridagüdün lumutu lanigi Heowá (Mat. 6:1-4).

15. Ida luba buídutima wamá?

¹⁵ Arufuda wamuti gürigia wamá ha buítiña dan le wadügün katei buiti hawagu amu mámarügü lun warihín. Lunti wálügüdagun woungua: “Ariñagarügü numuti san subudi nani le buídubei, o adüga numuti? Ka uagu nadüga katei buiti?”.

16. Ka lunbei wadügüni sagü weyu, ani ka uagu?

¹⁶ Masaminara wamá daü wamaali lan iseri igaburi, láurügü wabadiseirun, ani memegeirunhadiwa lan wadügün ni kata. Ítara liña iseri igaburi kei daüguaü, mosu wóunigirunu luéi tagadeirun. Ligíati, sagü weyu mosu wálugun warufuduni igaburi le líchugubei lani Bungiu sífiri.  Ka uagu? Ladüga benefa lan Heowá, ani lani sífiri aban erei nadagimeinti (Agu. 1:2). Mini lan le kada lan aban lídangiñe igaburi le líchugubei sífiri gayaraati ani mosu línchahaniwa lun giñe wánhingichun. Ligíati, labürühanbei disipulu Santiagu: “Hilañu liña giñe hafiñen anhein marufudun humá lau katei buiti le hadügübei” (Sant. 2:26). Ani gayaraati lariñawagún ligiaméme luagu igaburi le líchugubei lani Bungiu sífiri. Sagü warufuduni, warufuduñein lawadigimariduña lan lani Bungiu sífiri sandu wadan.

17. Ka lunbei wadügün anhein marufudun wamá igaburi lánina sífiri kei lubeibei?

¹⁷ Íbini kristiánugu ha barühaña saragu irumu badiseiñu anihein dan marufudun hamuti igaburi le líchugubei sífiri kei le aubei lagurabúa hámagiñe. Le súdinitimabei lun mábürühan lan harüna. Ru wamá aban hénpulu. Anhoun aheiridagua daüguaü tótima hínsiñeboun woun, Ma mágurun wabóun lau lóufudagun? Le chourubéi wóuchuba lan waranserunu, anhein gayara. Lúmagiñeti dan ligía góunigitima wamarume. Ítarameme, anhein móuserun wamá gürigia lau ínsiñehabuni, gaguraasuni luma ínsiñeni kei le aubei lagurabúa wámagiñe, mábürüha lan warüna. Wariñaguni lun sarí wamani tídangiñe sun wanigi, gayaraabei laranseragun katei wadan. Ani gayaraabei giñe ladügün katei le lun wanaagun woungua buidu luma gürigia ligía. Ani lúmagiñe ñéingiñe lun lubaruaguóun houcha wamá wadügüni katei lau lubuidun

18. Ka gayaraabei wachoururuni?

¹⁸ Seremei wamuti ígira lan Hesusu aban buiti hénpulu woun! Éibutima wáyeihani ligaburi lisaminan Hesusu, ménrenguntimabei woun wóuserun kei ligía. Ani ítara luba warufuduni iseri igaburi le buidu. Lidan aturiahani le, luágurügüñein gádürü igaburi le líchugubei lani Bungiu sífiri wayanuha. Buídubei giñe hamuga wadireirun dan lun wakutihani amu burí igaburi le líchugubei sífiri lun warihini anhein gayaraabei lubéi warufuduni buidu. Wadariruba aban lísüta to lunboun tahuudun woun, tidan garüdia Adundehani lun haturiahan gefentiña luagu Heowá, lidan tema “Habagari Kristiánugu” lúmati “Igaburi burí le líchugubei sífiri”. Chouru wamuti, ánhawa lan áfaagua lun wadaürüni iseri igaburi ani maragachun wameime, líderagubadiwa Heowá.