1. Dhubuwelo dhehu dhimpatta dhavi omuttu wehu?

 KINTANALA akala nibatiziwe malabo mang’onovi obe vyaka dhinjene mundduni iyo notene ninofwanyela okala attu ana mikalelo dhinkwela Yehova. Wi niwodhe okala attu ana mikalelo esi ninofwanyelela wang’anela dhubuwelo dhehu. Sabwaya? Sabwani dhubuwelo dhehu dhinopatta omuttu wehu. Iyo nigakalela wubuwelavi makalelo a ovizivela nanya ejo enonittukulela ologa vina okosa dhilobo dhabure. (Ef. 4:17-19) Iyo nigobuwelaga dhilobo dhapama, ejo enele onikamihedha okosa vina ologa dhilobo dhinamwagalalihe Babi wehu Yehova.—Gal. 5:16.

2. Mavuzo gani anasekeserihu mwari mwa nsunzo ntti?

² Ninga mulogeliwani munsunzoni nivirile, iyo kaninwodha obarela dhubuwelo dhotene dhabure ovolowa mmusoroni mwehu. Mbwenye enowodheya osakula ohikosa dhilobo mohiwanana na dhubuwelodha. Iyo nihinatti obatiziwa, ninofwanyelela ottiya ologa vina okosa dhilobo dhinidda Yehova. Eji ji ttarho yoroma vina yamakamaka wi niwodhe orula omuttu wawale. Wi niwodhe omwagalaliha Yehova mowakwana-mwene ninofwanyela wiwelela nlamulo ntti na: ‘Ottukula ekalelo ya omuttu oswa.’ (Kol. 3:10) Mwari mwa nsunzo ntti ninele wakula mavuzo aba: ‘Omuttu oswa’ txini? Ninawodhe dhavi wabala omuttu oswa vina ohittiya omuttu obu oswa?

3. Mowiwanana na Galásia 5:22, 23, ‘omuttu oswa’ txini, nanda muttu onabale dhavi?

³ ‘Omuttu oswa’ entapulela wubuwela vina okosa dhilobo dhahene ninga munkosela Yehova. Wila muttu abale omuttu oswa onofwanyela olagiha dhimbala muya wa Mulugu, dila  dhotedhene muya wokoddela onofwanyela opatta dhubuwelo dhaye, mukalelo oniwamo iyene vina dhokosa dhaye. (Kengesa Galásia 5:22, 23.) Motagiha, iyene onomukwela Yehova vina nlogo Naye. (Mt. 22:36-39) Muttu oddu kayeleliwa wagalala masiki afwanyiwaga makattamiho. (Tia. 1:2-4) Iyene muttu ontamela murenddele. (Mt. 5:9) Ddovilela vina ddapama na attu otene. (Kol. 3:13) Onokwela dhilobo dhaderetu vina onovilibihedha okosa ejiwene. (Lk. 6:35) Onotonyihedha na merelo aye wi onomuroromela vaddiddi Babi waye wa wirimu. (Tia. 2:18) Iyene nokala wokurumuwene agaligiwaga vina onovyang’anela.—1 Kor. 9:25, 27; Tito 3:2.

4. Wi nabale omuttu oswa iyo ninofwanyela wabala mikalelo mmodha-mmodha dhinlogiwa va Galásia 5:22, 23? Katapulelamo.

⁴ Wi nabale omuttu oswa, ninofwanyela okana mikalelo dhinlogiwa va Galásia 5:22, 23 vina mmaleboni meena a mBibiliani. * Mikalelo esi kadhili ninga guwo dhinabalihu modha-modha. Ebaribariya jiji, mikalelo esi dhinjidha dhinoligana na mikalelo dhina. Motagiha, akala weyo onomukwela muttu mukwawo onele onvilela vina onele okala wapama na iyene. Weyo vina onele okala waderetu, wovyeviha vina wovyang’anela.

5. Txini entapulela okana “zelu ya Kristu,” vina ninfwanyelelani osunza egumi ya Yezu? (1 Korinto 2:16)

⁵ Kengesa 1 Korinto 2:16. Wi nabale omuttu oswa, ninofwanyela okana “zelu ya Kristu.” Na mazu meena, iyo ninofwanyela osunza dhubuwelo dha Yezu vina nimutagiye iyene. Yezu ohitonyihedha mikalelo dhimbala muya wa Mulugu mowakwana-mwene. Ninga supeyo, iyene ohilagiha mikalelo dha Yehova dhahene ninga mulani. (Aheb. 1:3) Nigavilibihedhaga wubuwela ninga Yezu, ninele owodha okosa dhilobo ninga iyene vina ninele odhowavi nikanaga mubuwelo wa Yezu Kristu.—Fil. 2:5.

6. Dhibaribari gani dhinfwanyela iyo okana muyubuweloni nigafunaga wabala omuttu oswa?

⁶ Enowodheya txibarene iyo ofwara yotagiha ya Yezu? Txino ninowubuwela: ‘Yezu ddoligana. Miyo txipo kaddinawodhe okala ninga iyene!’ Akala onowiwamo dhahene kobuwela dhibaribari esi. Yoroma, weyo ottanddiwe moladdana na Yehova vina Yezu. Nona enowodheya weyo osakula watagiha awene  vina enowodheya weyo okala ninga awene ngafuna-wene vakittikittivi. (Wita 1:26) Yanawili, muya wokoddela wa Mulugu guru ehimpimeya mwilaboni. Na nikamihedho na muya obu, enowodheya weyo okosa elobo ehigawodhiliwe okosa weka. Yaneraru, Yehova kanjedhela wi weyo olagihe mikalelo dha dhimbala muya mowakwana-mwene masaka abano. Mwebaribari, Babi wehu wokwela ohinivaha njedhelo wi mwari wa vyaka 1.000 nikale attu oligana. (Ovuh. 20:1-3) Enfuna Yehova ja iyo okosa mpaka vanwodhelihu vina okuluvela nikamihedho naye.

7. Txini enasekeserhe iyo ovanene?

⁷ Ninawodhe dhavi omutagiha Yezu? Iyo ninele osekeserha mikalelo minayi dha esile dhimbala muya wa Mulugu. Mwa mikalelo esi mmodha-mmodha, ninele wona ensunza iyo na marhe alagihile Yezu. Ninele osekeserha vina mavuzo ananikamihedhe wona mikalelo dhowabala omuttu oswa.

8. Yezu otonyihedhile dhavi okwela?

⁸ Omukwela waye Yehova omuttukulela Yezu omwiwelela Babe vina onilevela egumi yaye. (Jo. 14:31; 15:13) Yezu ohitonyihedha wi onowakwela attu venjene modhela orumela odha velaboni ya vati. Labo na labo, iyene wantonyihedha okwela vina ttagaraga masiki attu ena amwiddaga. Mukalelo wamakamaka olagihile Yezu wi wanakwela attu bo wasunziha awene Omwene wa Mulugu. (Lk. 4:43, 44) Yezu wahitonyihedha wi wanimukwela Yehova vina attu, modhela orumela otabuwa vina okwa mmadani mwa attegi. Sabwa ya iyene okosa ejene, ovano iyo nihikana njedhelo nowakela egumi yamukalakala.

9. Ninawodhe dhavi omutagiha Yezu nigalagihaga okwela

⁹ Iyo nihivipereka wa Yehova vina nihibatiziwa sabwani ninomukwela Babi wehu wa wirimu. Nona, ninga Yezu, iyo ninotonyihedha omukwela Yehova modhela mukalelo onaweddihihu attu ena. Murumiwi Joao ohileba: “Txibarene ohinimukwela mukwaye onimoniye, kanwodha omukwela Mulugu ohinimoniye.” (1 Jo. 4:20) Iyo ninofwanyela ovikosa mavuzo aba: ‘Miyo ddinovilibihedha wenjedhedha wakwela attu? Miyo ddinowaweddela ttagaraga attu masiki agahiddeddihe nofwanyelela? Okwela onoddittukulela olabihedha dhokana dhaga vina mudhidhi waga wi ddakamihedhe attu ena osunza mwaha wa Yeohva? Miyo ddili womala nawale wi ddikose ejene masiki akala awene kantamalela guru yaga vina anoddidda? Enowodheya miyo olabihedha mudhidhi mwinjene mmabasani owakosa anamafwara?’—Ef. 5:15, 16.

10. Yezu wonihile dhavi wi wali muttu ontamela murenddele?

¹⁰ Yezu wali muttu watamela murenddele. Iyene ageddihiwa na obure, keyiha obure na obure. Mbwenye wankosa elobo opitta ejene. Iyene wannivibihedha otehiyana na muttuya vina wanalibiha attu ena okosa yakene. Motagiha, iyene wahasunziha attu wi akala anfuna wi Yehova arumele webedha wawa anfwanyela otehiyana na mbalawa. (Mt. 5:9, 23, 24) Wili-wili wanakamihedha anamafwara aye otehiyana venevo vawanelani onddimuwa.—Lk. 9:46-48; 22:24-27.

11. Ninawodhe dhavi okala attu antamela murenddele?

¹¹ Wi nikale attu antamela murenddele, ninofwanyela okosa elobo yina opitta orabela maguddulano. Ninofwanyela okana efunelo yotehiyana na attu ena vina walibiha abali na arogora okosa yakakene. (Fil. 4:2, 3; Tia. 3:17, 18) Iyo ninofwanyela ovikosa mavuzo aba: ‘Miyo ddinovilibihedha otehiyana na attu ena? Akala mbali obe murogora onoddilogela elobo enddinyimula, ddinele osilidheya  na iyene? Miyo ddinojedhela wi muttu mwina attukule ttaro ya otehiyana obe ddimiyo onkala woroma odhowa otehiyana na muttuya masiki ddiziwaga wi ddi iyene ovonyile? Egakala yofuneya, ddinodhowa wakamihedha abale anrutxiwa otehiyana muttu na mukwaye?’

12. Yezu walagihile dhavi wi wali muttu wapama?

¹² Yezu wali wapama. (Mt. 11:28-30) Iyene ohilagiha opama oku modhela okala muttu wokurumuwa masiki afwanyiwaga makattamiho. Motagiha, muyana Wofenisiya vamukumbiriliye wi anvulumutxe mwanaye, iyene vamaromo-vene kakosile yakumbiriye, mbwenye voniliye nroromelo naye noliba, venevo Yezu wahinvulumutxa mwanaye. (Mt. 15:22-28) Masiki Yezu akalaga muttu wapama karabele ovaha malago. Dila dhina iyene wantonyihedha okwela oku modhela okala woliba murima na abale akweliye. (Mk 8:32, 33) Motagiha siku dhahi yafuna Pedro omobaniha Yezu wi ahikose efunelo ya Yehova, iyene wahimusisigula vari va anamafwara akwaye. Iyene kakosile ejene wi amutotele Pedro manyazo. Wakosile ejene wi amuswagihe Pedro na anamafwara ena orabela opanela. Ebaribari wi pedro wahitoteya manyazo mbwenye iyene wahipurelamo venjene nlago navahiwiye.

13. Ninawodhe dhavi okala attu apama?

¹³ Wi natonyihedhe opama abale anakwelihu ninofwanyela ologa na awene s’opipiriha. Nigakosa dhahene ninimutagiha Yezu, niwananihaga malago ehu na magano anfwanyeya mu Nzuni na Mulugu. Kakala muttu wapama, okane nikuluvelo wi awene anofuna okosa ejile eli yapama. Abale animukwela Yehova vina anukwela anele wakela pama nlago ninavayiwe. Kavikose mavuzo aba: ‘Ddigamona muttu onimukwelimi akosaga elobo yabure ddinoliba murima wi ddimulogena? Akala jofuneya onvaha malago ddinvaha na oderetu, obe ddinimulogana na onyanyuwa? Txini endditukulela ovaha nlago? Ddinvahela nlagona sabwa ya osilidheya na muttuya obe ddininvahela wi nimukamihedhe?’

14. Yezu wonihile dhavi okala muttu wapama?

¹⁴ Ottiya oziwiwavi ninga muttu wapama Yezu wavirihamo merelo apama. Yezu wanimukwela Babe vina mudhidhi wotene wankosa dhilobo dhaderetu na efunelo ya pama. Yezu ohoniha wi wali muttu wapama sabwa ya wakwela attu ena. Muttu wapama onotamela makalelo a wakamihedha attu ena vina wakosela attu dhilobo dhapama. Oziwa wi ddinofwanyela okosa dhilobo dhapama kinakwana, iyo ninofwanyela okosa dhilobo dhapama na efunelo yapama. Txino muttu onovivuza, ‘Enopadduwa muttu okosa elobo yapama na efunelo yabure?’ Ndde, enopadduwa. Motagiha, Yezu wahaloga abale akamihedha ayelegi mbwenye akosela ejuwene wila asibiwe na attu ena. Mabasa abo akosani masiki oniwaga ninga apama, kana ttima vamentoni va Yehova.—Mt. 6:1-4.

15. Ninawodhe dhavi okala attu apama?

¹⁵ Iyo ninotonyihedha okala attu apama nigarabela okosa dhilobo dhapama na efunelo yosibiwa na attu ena. Weyo onofwanyela ovivuza: ‘Miyo ottiya oziwavi wi eji ji elobo yapama enfwanyelimi okosa ddinovilibihedha ovirihamo? Txini enddittukulela okosa elobo yapama?’

16. Txini enfwanyela iyo okosa labo na labo nanda sabwaya jani?

¹⁶ Kaninfwanyela ovipela malago nubuwela wi mabasa odhowanavi omuttu oswa ongoma nigamala obatiziwa. ‘Omuttu oswa’  enladdanihiwa na wabala yabalo eswa enfwanyelihu odhowavi nikoddelihaga. Nona labo na labo nitamelege marhe olagiha dhobala dha muya wa Mulugu. Sabwaya? Sabwani Yehova Mulugu wa merelo vina muya waye guru ena ewodhelo. (Wita 1:2) Nona dhobala dhotene dha muya dhinowodha vina dhinele onittukulela okosa merelo apama. Motagiha, namafwara Tiago ohiloga dhahi: “Nroromelo vina nihina merelo thokwa.” (Tia. 2:26) Yakene jimpadduwa na dhobala dhotene dha muya. Mudhidhi wotene onlagiha iyo dhobala dha muya mwigumini mwehu ninowoniha wi nineddihiwa na guru ya muya wokoddela wa Mulugu.

17. Txini enfwanyela iyo okosa nigavonya olagiha dhimbala muya?

¹⁷ Mukristu obatiziwe vyaka dhinjene dila dhina onodhaga ovonya olagiha dhimbala muya. Mbwenye keyelele mundduni. Katanalela yotagiha eji. Weyo ogakana guwawo enuzivela vaddiddi nanda bitaya onele omaguvela oponya? Nne. Onele osona apale vatayile vasogorova onele okalela pasope wila enataye vina. Na mukalelo wakakene, akala weyo olovonya omutonyihedha muttu ovilela, opama vina okwela, kukumuwe. Muttu ona murima wolevelela onele otamela ologela makaniya wi awodhe ovenyihedha wili mandano anani. Ogane odhowavi okosaga dhilobo dhapama.

18. Nikuluvelo gani ninfwanyeliwe okana?

¹⁸ Ninotamalela venjene sabwa ya yotagiha enittiyedhi Yezu! Venevo vandowihu nisazaga mubuwelo na mukalelo wa Yezu kinanirutxe okosaga dhilobo ninga mwakoseliye. Vina nigadhowavi nikosaga dhilobo ninga mwakoseliye ninodhowavi nabalaga omuttu oswa. Mwari mwa nsunzo ntti, nisekeseri bahi mikalelo minai dha dhobala dha muya wokoddela. Onkoddelani otamela mudhidhi wa osunza mikalelo dhina dha dhimbala muya wokoddela nanda butamela ovirihamo mwigumini mwawo? Weyo onele ofwanya muddonddonddo dha mitona esi mu Guia de Pesquisa para as Testemunhas de Jeová mutoma onloga “Vida Crista” ogamala ovede musorho obu “Fruto de Espirito.” Kakana nikuluvelo na wi ogakosa mpaddi wawo Yehova onele wukamihedha wabala omuttu oswa vina odhowavi wabalagavi.