1. Yika kanji-kanji yakukwata ha utu wetu?

 ATU amwe kali ni miaka yinji ya upapachiso, akwo kali wika ni amwe matangwa. Alioze umwenemwene uli ngwo, chipwe ngwe tuli ni miaka yeswayo ya upapachiso, nihindu yetweswe tunase tachi hanga tupwe ni yitanga yize muyivwisa Yehova kuwaha. Mba tuhase kuchilinga, tunafupiwa kufunga manyonga jetu. Mumu liaka? Mumu yuma yize twakunyonga yakukwata ha utu wetu. Nyi mutununga ni kunyonga wika ha kulinga yuma ya musunya, acho mutuhanjika ni kulinga yuma yipi. (Efwe. 4:17-19) Alioze, nyi twazalisa mbunge yetu ni manyonga apema, muchipwa chashi kuhanjika ni kulinga yuma yize muyivwisa Yehova kuwaha.—Ngala. 5:16.

2. Yihula yika mutushimutwina ha mutwe uno?

² Ngwe chize twamona ha mutwe wapalika, kutuchi kuhasa kwehuka manyonga eswe api. Alioze tuli ni uhashi wa kufunga manyonga jetu. Kutwatambile kulinga yuma kulita ni manyonga jetu api. Kashika, twatamba kwecha kuhanjika ni kulinga yuma yize Yehova keshi kuzanga. Chino che chuma chitangu nawa chilemu chize twatamba kulinga mba tuzule utu ukulu hanga atupapachise. Alioze mba tuvwise Yehova kuwaha, twatamba nawa kwononokena shimbi yinambe ngwo: ‘Zalenu utu waha.’ (Kolo. 3:10) Ha mutwe uno, mutushimutwinaho yihula yino: ‘Utu waha’ yika unalumbunuka? Kuchi mutuhasa kuzala utu waha ni kuufunga?

3. Kulita ni A-Ngalashia 5:22, 23, ‘utu waha’ yika unalumbunuka, nawa kuchi mutu mahasa kuuzala?

³ Mutu yoze uli ni ‘utu waha’ kakwimbulula kunyonga cha Yehova ni mutapu uze akulingilamo yuma. Muze umwe mutu  akuzala utu waha, kakupwa ni yitanga ya mihuko ya spiritu yisandu ya Zambi, nawa kakwecha spiritu yacho hanga yisongwele yize akwivwa, manyonga ni yitanga yenyi. (Tanga A-Ngalashia 5:22, 23.) Chakutalilaho, mutu yoze uli ni utu waha, kakuzanga Yehova ni mandumbu jenyi a ku ufulielo. (Mateu 22:36-39) Chikwo nawa, kakununga ni kuwahilila chipwe ngwe kanapalika mu yipikalo. (Tia. 1:2-4) Iye kakusa tachi hanga apwe ni sambukila ni akwo. (Mateu 5:9) Kakusolwela akwo uhomboloji ni keke. (Kolo. 3:13) Kakuzanga yuma yipema ni kuyilinga. (Luka 6:35) Yuma yeswe akulinga yakusolola ngwo, kali ni ufulielo ukolo muli Yehova. (Tia. 2:18) Nawa kakununga ni kulihumikiza chipwe muze akumusosomba.—1 Kori. 9:25, 27; Titu 3:2.

4. Mba tuzale utu waha, mumu liaka twatamba kusolola yitanga yeswe yize yili ha A-Ngalashia 5:22, 23, ni yize yili mu yisoneko yikwo?

⁴ Mba tuzale utu waha, twatamba kusolola yitanga yeswe yize yili ha A-Ngalashia 5:22, 23, ni yize yili mu yisoneko yikwo. * Yitanga yino kuyishi ngwe mazalo alisa waze twakuzala-zala hita tangwa. Kwamba umwenemwene, yinji ya ku yitanga yacho yalifwa ni yikwo. Chakutalilaho, nyi chamwenemwene wakuzanga akwenu, mwasolwela uhomboloji ni keke. Mba upwe mutu mupema, watamba kupwa chimbovu ni kulihumikiza.

5. Yika “kunyonga cha Kristu” chinalumbunuka, nawa mumu liaka twatamba kulilongesa hakutwala ku mwono wenyi? (1 A-Korindu 2:16)

⁵ Tanga 1 A-Korindu 2:16. Mba tuzale utu waha, twatamba kupwa ni “kunyonga cha Kristu.” Mu maliji akwo, twatamba kulilongesa chize Yesu akunyonga ni kumwimbulula. Iye kasolwele yitanga yeswe ya mihuko ya spiritu yisandu. Chizechene ngwe katalilo, Yesu neye kasolwele kanawa yitanga yeswe ya Yehova. (Hepre. 1:3) Nyi mutusa tachi hanga tunyonge ngwe Yesu, muchipwa chashi kulinga yuma ngwe chize iye apwile ni kulinga nawa mutupwa ni yitanga ngwe ya iye.—Fwili. 2:5.

6. Yuma yika yitatu twatamba kwiwuluka hakutwala ku kupwa ni utu waha?

⁶ Shina mutuhasa lume kwimbulula chilweza cha Yesu? Mutuhasa kunyonga ngwe: ‘Yesu kali mungunu. Yami kuchishi kuhasa kupwa ngwe iye!’ Nyi wakulivwa chocho, iwuluka yikuma yino. Chitangu, katutangile hanga tupwe ngwe Yehova ni Yesu. Kashika mutuhasa  kwaembulula, chekwamba, mutuhasa kupwa ngwe ayo. (Uputu. 1:26) Chamuchiali, spiritu yisandu ya Zambi yili ndundo jize jahiana tachi jeswe mu malilu ni hashi, nawa muyihasa kutukwasa kulinga yuma yize kutushi kuhasa kulinga ukawetu. Chamuchitatu, Yehova kananyingika ngwenyi, kutuchi kuhasa kusolola mihuko ya spiritu ni ungunu weswe musono. Kashika asakwile kanunu ka miaka hanga waze ali ni kutalatala cha mwono wa mutolo hano hashi apwe angunu. (Uso. 20:1-3) Alioze, Yehova kanatwite tulinge yize mutuhasa hanga tujikijile ha ukwaso wenyi.

7. Yika mutushimutwina ha mutwe uno?

⁷ Mba, yika lume twatamba kwimbulula ha chilweza cha Yesu? Mutushimutwina yitanga yiwana ya mihuko ya spiritu yisandu ni chize Yesu asolwele yitanga yacho. Mutushimutwina nawa yimwe yihula yize muyihasa kutukwasa kuhengwola chize mutululieka utu wetu waha.

8. Kuchi Yesu asolwele zango?

⁸ Yesu kakuzanga chinji Yehova, kashika alingile upale wa Tato ni kulihana ngwe chitapo hali yetu. (Yoa. 14:31; 15:13) Yuma yize Yesu alingile muze apwile hano hashi, yasolwele ngwo kakuzanga chinji atu. Hita tangwa, iye te kakusolola zango ni keke, chipwe muze amwe apwile ni kulimika nenyi. Yesu kasolwele zango kuli atu ha kwalongesa hakutwala ku Wanangana wa Zambi. (Luka 4:43, 44) Chikwo nawa, zango lize Yesu apwile nalio hali Zambi ni hali atu liapwile linji, chocho yahana mwono wenyi ni kumona lamba ha kufwa mu moko ja akwa-shili. Mumu lia yize alingile, yetweswe yitupwa ni uhashi wa kupwa ni mwono wa mutolo.

9. Kuchi mutuhasa kwimbulula Yesu ha kusolola zango?

⁹ Twakuzanga chinji Yehova, kashika twalihanyine kuli iye ni kutupapachisa. Chizechene ngwe Yesu, twatamba kusolola zango lietu kuli Yehova ha kutwama kanawa ni akwetu. Postolo Yoano yasoneka ngwenyi: “Yoze keshi kuzanga ndumbwenyi yoze anamono, ngwe kuchi mahasa kuzanga Zambi yoze kamumweneko.” (1 Yoa. 4:20) Kashika, mutuhasa kulihula ngwetu: ‘Shina nakuzanga akwetu ni mbunge yeswe? Kutala nakusolwela akwetu keke chipwe ngwe mangulinga yuma yize kuyalitele? Shina nakuzachisa mashimbu ni yikumba yami hanga ngukwase atu anyingike Yehova? Kutala nakusa tachi hanga ngukwase atu chipwe ngwe anji a kuli ayo kakulimika ni yami nawa keshi kulemesa yize nakulinga? Shina munguhasa kusa mashimbu hanga ngulihane chinji mu mulimo wa kutayisa tumbaji?’—Efwe. 5:15, 16.

10. Kuchi Yesu asolwele ngwenyi kakuneha sambukila?

¹⁰ Yesu kapwile ni kuneha sambukila. Muze apwile ni kumulinga yuma yipi te keshi kufunyisa upi ha upi. Shimbu achilinge, te kakusa tachi anehe sambukila ni kukolweza akwo hanga ahwise kapinda hakachi ko. Chakutalilaho, kalongesele ngwenyi nyi mutu kanazange hanga Yehova atayize uwayilo wenyi, katamba kupwa ni sambukila ni akwo. (Mateu 5:9, 23, 24) Chikwo nawa, kanungine ni kukwasa apostolo jenyi hanga ahwise kapinda yoze te akupwa nenyi wa kunyingika mutu munene hakachi ko.—Luka 9:46-48; 22:24-27.

11. Kuchi mutuhasa kuneha sambukila?

¹¹ Twalilongesa ngwetu, mba tunehe sambukila tunafupiwa kulinga yuma yinji hi wika ko kwecha kuneha mbwanja. Twatamba kusa tachi hanga tupwe ni sambukila ni akwetu ni kukolweza mandumbu jetu hanga no achilinge. (Fwili. 4:2, 3; Tia. 3:17, 18) Mutuhasa kulihula ngwetu: ‘Shina nakulikolweza hanga ngupwe ni sambukila ni akwetu? Nyi umwe ndumbu hanji pangi mangulemeka ku mbunge,  shina nakumutulikila toto? Kutala nakushimbwila hanga akwetu aliange kuneha sambukila, nyi hanji yami mwe nakulianga kuneha sambukila, chipwe muze ngunanyongo ngwe mukwetu mwe wapihisa? Nyi muchilita, shina nakukolweza akwetu hanga apwe ni sambukila umwe ni mukwo?’

12. Kuchi Yesu asolwele umbovu?

¹² Yesu kapwile chimbovu. (Mateu 11:28-30) Iye kasolwele umbovu ha kutwama kanawa ni akwo ni kupwa mutu mwashi chipwe ha mashimbu akalu. Chakutalilaho, muze umwe pwo wa ku Kanana etele Yesu hanga awuke mwanenyi, kuuputukilo iye yalituna, alioze muze pwo wacho asolwele ufulielo ukolo, Yesu yamusolwela umbovu ha kuwuka mwanenyi. (Mateu 15:22-28) Yesu kapwile chimbovu, chipwe chocho te keshi kwecha kuhana chiyulo nyi muchifupiwa. Ha mashimbu amwe kapwile ni kusolola umbovu ha kuhana chiyulo cha pundu kuli waze te azanga. Chakutalilaho, muze Petulu esekele kumukanjisa kulinga upale wa Yehova, Yesu yamukumika kulutwe lia tumbaji akwo. (Marku 8:32, 33) Iye kakachilingile hanga akolese Petulu sonyi, alioze hanga amufumbe ni kutoweza tumbaji akwo eche kulijikijila ene. Kwamba pundu, Petulu kevwile sonyi, chipwe chocho kayukile ha fumbo liacho.

13. Kuchi mutuhasa kusolola umbovu wamwenemwene?

¹³ Mba tusolole umbovu wamwenemwene kuli waze twakuzanga, ha mashimbu amwe twatamba kwaha yiyulo chakuhona kwaswekela umwenemwene. Nyi chino muchilingiwa, twimbululenu Yesu ha kuhana yiyulo yize yinakatuka mu Liji lia Zambi. Solola zango muze unahanjika. Fuliela ngwe atu waze akuzanga Yehova nawa akukuzanga, makaula chiyulo che cha zango. Lihule ngwe: ‘Nyi mutu yoze nakuzanga maputuka kulinga yuma yipi, shina nguli ni hamu lia kumwaha chiyulo? Nyi ngunafupu kuhana chiyulo, shina nakuchihana ni zango, nyi nakuchihana ni mbunge yikalu? Yika yakungutwala mba nguhane yiyulo kuli akwetu? Shina nakuyihana mumu ngunevu uli, nyi mumu ngunazange kwakwasa?’

14. Kuchi Yesu asolwele ngwenyi kali mutu mupema?

¹⁴ Yesu te keshi kukolweza wika akwo alinge yuma yipema, alioze ni mwene kapwile ni kuyilinga. Mumu lia kuzanga Tato, Yesu nihindu te kakulinga yuma yipema ni nyonga lialita. Yitanga yipema yakusoloka ha chize kwetu akwivwa ha yuma yize twakwalingila. Mutu mupema kakufupa majila akukwashilamo akwo ni kwalingila yuma yipema mashimbu eswe. Kutwatambile wika kulingila akwetu yuma yipema, alioze twatamba kuyilinga ni nyonga lialita. Umwe mahasa kulihula ngwenyi: ‘Shina mutu mahasa kulinga chuma chipema ni nyonga lipi?’ Ewa, mahasa. Chakutalilaho, Yesu kahanjikile hali atu waze te akuhana yawana kuli yiswale muze akwo anamono hanga aachichimieke. Chipwe ngwe yawana yacho yapwile yipema, nihindu kuli Yehova te kuyishi ulemu.—Mateu 6:1-4.

15. Kuchi mutu mahasa kulingila akwo yuma yipema?

¹⁵ Mutu mahasa kulingila akwo yuma yipema nyi mayilinga wika ni nyonga lialita chakuhona kushimbwila yimwe. Lihule ngwe: ‘Shina nakunyonga kulingila akwetu yuma yipema, alioze kuchishi kuyilinga? Yika yakungutwala mba ngulingile akwetu yuma yipema?’

16. Yika twatamba kulinga hita tangwa, nawa mumu liaka?

¹⁶ Kanda tunyonga ngwetu, nyi hatupapachisa kwahwa kutwatambile nawa kusa tachi hanga tuzale utu waha. Chipwe hanyima lia upapachiso, twatamba kufunga ‘utu waha.’  Mutuhasa kuchilinga ha kufupa uhashi wakusolwelamo mihuko ya spiritu yisandu hita tangwa. Mumu liaka? Mumu Yehova Zambi kakuzachisa spiritu yenyi hanga alinge yuma. (Uputu. 1:2) Kashika, hita chitanga cha mihuko ya spiritu yisandu chatamba kutukwasa hanga ni yetu tulinge yimwe. Chakutalilaho, kambaji Tiangu kasonekene ngwenyi: “Ufulielo kuushi yitanga kuunafu.” (Tia. 2:26) Yino ye yakulingiwa nawa ku yitanga ya mihuko ya spiritu yisandu. Nyi kutwalingile yuma kulita ni yitanga yacho, yitanga yacho muyifwa muchima lietu. Alioze hita shimbu mutuyisolola, acho tunasolola pundu ngwetu spiritu yisandu ya Zambi yinatukwase.

17. Yika twatamba kulinga nyi tangwa limwe mutuhona kusolwela akwetu mihuko ya spiritu?

¹⁷ Chipwe akwa-Kristu waze hanaapapachisa ha miaka yinji, mumu lia uhenge, ha mashimbu amwe kakuhona kusolola mihuko ya spiritu yisandu. Alioze chuma chilemu chili ngwo, kutwatambile kuhonga. Tunyongenu ha chilweza chino: nyi chikuto chize wakuzanga muchisuwika hakehe, shina muchimbila? Ka. Kota munuka kanawa chikuto chacho ni kusa tachi hanga chichine kusuwika nawa. Chizechene nawa, nyi tangwa limwe muhona kusolwela mutu umbovu, uhumikizo hanji zango, kanda uhonga, sako tachi hanga wite ukonekeno ni kuneha sambukila. Chino muchikukwasa hanga ufunge usepa wenu. Chikwo nawa, sako tachi hanga yino yichine kulingiwa cheka.

18. Yika twatamba kunyingika?

¹⁸ Chochene, chili chilemu chinji kukaula chilweza chipema cha Yesu! Nyi mutukaula yitanga yenyi, muchipwa chashi kumwimbulula kanawa. Chikwo nawa, nyi mutulinga yuma ngwe Yesu, acho muchipwa chashi kuzala utu waha. Ha mutwe uno, twalilongesaho yitanga yiwana ya mihuko ya spiritu. Nyi muchilita, sako mashimbu hanga ulilongese yitanga yikwo ya mihuko ya spiritu ni kupukuna ha chize muhasa kuyikaula ku mwono we. Muwana mitwe yinji yinalumbununa chikuma chino mu mukanda wa kuhengwola nawo, ha chikuma “Mwono wa Akwa-Kristu” ni ha chikuma, “Mihuko ya Spiritu.” * Nyingika ngwe, nyi wasa tachi Yehova makukwasa kupwa ni utu waha haliapwila ni kuufunga ndo kulutwe lia matangwa.