1. Kwa ki annan en gran lefe lo nou personnalite?

 KI SWA nou’n batize pour zis detrwa zour oubyen pour plizyer lannen, nou tou nou anvi annan sa kalite personnalite ki Zeova i kontan. Pour reisi fer sa, nou bezwen kontrol sa ki nou mazinen. Akoz? Parski sa ki nou mazinen i annan en gran lefe lo nou personnalite. Si nou toultan pe mazin pour fer plezir nou lekor, nou pou dir e fer bann move keksoz. (Efe. 4:17-19) Me si nou mazin lo bann bon keksoz, i tre probab ki nou pou dir e fer bann keksoz ki fer plezir Zeova.​—Gal. 5:16.

2. Ki nou pou vwar dan sa lartik?

² Parey nou’n vwar dan sa lartik avan, nou pa kapab toultan anpes bann move panse antre dan nou lespri. Me nou kapab swazir pour pa fer sa bann keksoz. Avan nou batize, nou bezwen aret koz e azir dan en fason ki Zeova pa kontan. Sa i sa premye keksoz ki nou bezwen fer pour debaras nou avek sa vye personnalite. I osi sa keksoz pli enportan. Me pour nou kapab vreman fer plezir Zeova, nou bezwen osi obei sa lord: “Kontinyen devlop sa nouvo personnalite.” (Kol. 3:10) Dan sa lartik, nou pou reponn sa bann kestyon swivan: Kisisa “sa nouvo personnalite”? Ki mannyer nou kapab devlop “sa nouvo personnalite” e kontinyen fer li?

3. Dapre Galat 5:22, 23, kisisa “sa nouvo personnalite” e ki mannyer en dimoun i devlop sa nouvo personnalite?

³ En dimoun ki annan “sa nouvo personnalite,” i swiv legzanp Zeova. I devlop sa nouvo personnalite par demontre bann kalite ki form parti fri lespri sen. I les lespri  sen enfliyans sa ki i mazinen, son santiman ek sa ki i fer. (Lir Galat 5:22, 23.) Par egzanp, i kontan Zeova ek Son pep. (Mat. 22:36-39) I reste zwaye menm ler i fer fas avek difikilte. (Zak 1:2-4) I kontan fer lape. (Mat. 5:9) I demontre pasyans ek labonte anver lezot dimoun. (Kol. 3:13) I kontan fer sa ki byen. (Lik 6:35) I montre par son aksyon ki i annan en lafwa for dan son Papa ki dan lesyel. (Zak 2:18) I demontre ladouser ler i ganny provoke e i annan kontrol lo son lekor ler i ganny tante.​—1 Kor. 9:25, 27; Tit 3:2.

4. Akoz nou bezwen demontre tou bann kalite ki ganny mansyonnen dan Galat 5:22, 23 e dan lezot verse Labib pour nou kapab devlop sa nouvo personnalite?

⁴ Pour devlop sa nouvo personnalite, nou bezwen devlop tou bann kalite ki ganny mansyonnen dan Galat 5:22, 23 e dan lezot verse Labib. * Sa bann kalite pa parey lenz ki nou met lo nou enn alafwa. Anfet, serten sa bann kalite i annan pour fer avek lezot kalite. Par egzanp, si ou vreman kontan ou prosen, ou pou demontre pasyans ek labonte anver li. Pour fer sa ki byen, ou devret annan ladouser ek kontrol lo ou lekor.

5. Ki savedir “konn fason panse Kris” e akoz nou devret etidye konsernan lavi Zezi? (1 Korentyen 2:16)

⁵ Lir 1 Korentyen 2:16. Pour devlop sa nouvo personnalite, nou bezwen “konn fason panse Kris.” Andotmo, nou bezwen aprann fason panse Zezi e apre swiv son legzanp. Zezi ti demontre bann kalite ki form parti fri lespri sen Bondye dan en fason parfe. Zezi i parey en laglas ki parfe. I reflekte bann kalite Zeova dan en fason parfe. (Ebr. 1:3) Pli nou annan menm fason panse avek Zezi, pli nou pou azir parey li e nou pou pli kapab devlop sa nouvo personnalite.​—Fili. 2:5.

6. Ki nou devret reflesir lo la ler nou pe esey devlop sa nouvo personnalite?

⁶ Eski i posib pour nou swiv legzanp Zezi? Nou kapab mazinen: ‘Zezi i parfe. Mon pa pou zanmen kapab fer parey li!’ Si ou santi koumsa, reflesir lo sa bann keksoz swivan. Premyerman,  ou’n ganny kree dan resanblans Zeova ek Zezi. Alor, ou kapab swazir pour swiv zot legzanp e ou kapab reisi fer li menm si ou pa fer li egzakteman parey zot. (Zen. 1:26) Dezyenmman, lespri sen Bondye i sa lafors pli pwisan dan liniver. Avek led lespri sen, ou kapab fer bann keksoz ki ou pa ti pou zanmen kapab fer lo ou menm. Trwazyenmman, Zeova pa ekspekte ki ou demontre bann kalite ki form parti fri lespri sen dan en fason parfe la konmela. Anfet, nou Papa ki kontan nou pou donn bann ki annan sa lespwar pour viv pour touzour lo later 1,000 an pour zot vin parfe. (Rev. 20:1-3) Me antretan, Zeova i anvi ki nou fer nou mye e depan lo li pour ganny led.

7. Ki nou pou diskite aprezan?

⁷ Ki mannyer nou kapab swiv legzanp Zezi? Nou pou vwar kat kalite ki lespri sen Bondye i ed nou devlope. Nou pou vwar ki mannyer Zezi ti demontre sak sa bann kalite. Apre, nou pou vwar serten kestyon ki pou ed nou vwar si nou pe vreman devlop sa nouvo personnalite.

8. Ki mannyer Zezi ti demontre lanmour?

⁸ Zezi ti telman kontan Zeova ki i ti fer bann sakrifis pour son Papa e pour nou. (Zan 14:31; 15:13) Zezi ti montre ki kantite i kontan bann dimoun par lafason ki i ti viv son lavi ler i ti lo later. Sak zour, i ti demontre lanmour ek konpasyon menm ler serten dimoun ti opoz li. En fason enportan ki Zezi ti demontre lanmour pour bann dimoun ti par ansenny zot konsernan Rwayonm Bondye. (Lik 4:43, 44) Zezi ti osi demontre lanmour anver Bondye ek bann imen par met zot lentere avan sa ki pour li ler i ti pare pour soufer e ganny touye par bann move dimoun. Par fer sa, i’n fer li posib pour bann imen ganny lavi eternel.

9. Ki mannyer nou kapab demontre lanmour parey Zezi ti fer?

⁹ Nou’n dedye nou lavi avek Zeova e batize parski nou kontan nou Papa ki dan lesyel. Alor, parey Zezi nou devret montre ki nou kontan Zeova par lafason ki nou tret lezot. Zapot Zan ti ekri: “Sa enn ki pa kontan son frer ki i kapab vwar, pa kapab kontan Bondye ki i pa kapab vwar.” (1 Zan 4:20) Nou kapab demann nou lekor: ‘Eski mon vreman kontan lezot dimoun? Eski mon demontre konpasyon anver lezot menm ler zot brit avek mwan? Eski lanmour i pous mwan pour servi mon letan ek resours pour ed lezot aprann konn Zeova? Eski mon pare pour fer sa menm ler laplipar dimoun pa apresye mon zefor oubyen ler zot opoz mwan? Eski mon kapab aranz mon progranm pour mwan pas plis letan dan predikasyon?’​—Efe. 5:15, 16.

10. Ki mannyer Zezi ti montre ki i kontan fer lape?

¹⁰ Zezi ti kontan fer lape. Ler dimoun pa ti tret li dan en bon fason, i pa ti rann mal pour mal. Me i ti fer plis ki sa. I ti pran linisyativ pour fer lape e i ti ankouraz lezot osi pour fer lape. Par egzanp, i ti ansenny son bann disip ki zot bezwen fer lape avek kanmarad si zot anvi Zeova i aksepte zot ladorasyon. (Mat. 5:9, 23, 24) Plizyer fwa, i ti ed son bann zapot pour aret argimante konsernan lekel parmi zot ki ti pli gran.​—Lik 9:46-48; 22:24-27.

11. Ki mannyer nou kapab vin en dimoun ki kontan fer lape?

¹¹ En dimoun ki kontan fer lape, i bezwen fer plis ki zis evite fer problenm.  I bezwen pran linisyativ pour fer lape avek lezot e ankouraz nou bann frer ek ser pour zot osi fer lape avek kanmarad. (Fili. 4:2, 3; Zak 3:17, 18) Nou kapab demann nou lekor sa bann kestyon swivan: ‘Ki mon pare pour fer pour fer lape avek lezot? Eski mon gard rankin ler en frer ouswa en ser i bles mon santiman? Eski mon esper sa dimoun fer lape ouswa eski mon esey fer lape avek li menm si mon santi ki i annan tor? Ler i apropriye, eski mon ankouraz de dimoun ki annan problenm antre zot pour fer lape avek kanmarad?’

12. Ki mannyer Zezi ti demontre labonte?

¹² Zezi ti demontre labonte anver lezot. (Mat. 11:28-30) I ti fer sa par tret lezot dan en fason zantiy e par pare pour sede menm dan bann sityasyon difisil. Par egzanp, ler en madanm Fenisyen ti sipliy li pour geri son zanfan, premye kou, i pa ti fer sa ki sa madanm ti’n demann li. Me ler sa madanm ti demontre en lafwa for, Zezi ti geri son zanfan. (Mat. 15:22-28) Menm si Zezi ti demontre labonte anver lezot dimoun, i ti donn zot konsey ler zot ti bezwen. Parfwa, i ti demontre labonte par donn bann konsey ferm avek bann ki i ti kontan. Par egzanp, ler Pyer ti esey dekouraz Zezi pour fer lavolonte Zeova, Zezi ti koz severman avek li devan lezot disip. (Mark 8:32, 33) I pa ti fer sa pour imilye Pyer me pour ansenny li e pour averti lezot disip pour pa fer bann keksoz ki zot ti napa drwa fer. San dout, Pyer ti santi li en pti pe anbarase me sa disiplin ti ed li.

13. Ki mannyer nou kapab demontre labonte?

¹³ Pour demontre labonte anver bann ki ou kontan, i kapab ki parfwa ou bezwen donn zot konsey. Ler ou donn konsey, swiv legzanp Zezi e donn bann konsey ki baze lo bann prensip Labib. Tret zot dan en fason zantiy. Mazinen ki zot anvi fer sa ki byen. Annan konfyans ki bann ki kontan Zeova e ki kontan ou pou reazir byen ler ou donn zot konsey. Demann ou lekor sa bann kestyon swivan: ‘Eski mon annan kouraz pour dir en keksoz ler mon vwar en dimoun ki mon kontan pe fer en keksoz mal? Si mon bezwen donn konsey, eski mon koz dan en fason zantiy oubyen mon koz brit? Kwa ki motiv mwan pour donn konsey? Eski mon pe donn sa konsey parski mon ankoler avek sa dimoun oubyen akoz mon anvi ed li?’

14. Ki mannyer Zezi ti montre ki i kontan fer sa ki byen?

¹⁴ Zezi ti konnen kwa ki byen e i ti fer li. Zezi i kontan son Papa alor i toultan fer sa ki byen avek sa bon motivasyon. En dimoun ki fer sa ki byen, i toultan rod fason pour ed lezot e i fer bann bon keksoz pour zot. Menm si nou konnen kwa ki byen, nou bezwen fer plis ki sa. Nou bezwen fer sa ki byen e avek sa bon motivasyon. Nou kapab mazinen: ‘Eski en dimoun i kapab fer sa ki byen me avek move motivasyon?’ Wi i kapab. Par egzanp, Zezi ti koz lo bann ki ti donn kado bann pov me ki ti fer sir ki lezot dimoun i vwar sa ki zot pe fer e felisit zot. Menm si sa ki zot ti pe fer ti byen, zot pa ti pe fer plezir Zeova.​—Mat. 6:1-4.

15. Ki mannyer nou kapab vin en dimoun ki kontan fer sa ki byen?

¹⁵ Pour nou vin en dimoun ki kontan fer sa ki byen, nou pa devret fer sa ki byen pour bann rezon egois. Nou devret  demann nou lekor: ‘Eski mon konnen kwa ki byen e mon fer li? Kwa ki motiv mwan pour fer sa ki byen?’

16. Ki nou devret fer toulezour e akoz?

¹⁶ Nou pa devret mazinen ki ler nou’n batize, nou’n fini devlop sa nouvo personnalite e ki nou nepli bezwen travay lo nou personnalite. Sa nouvo personnalite i parey en nouvo lenz ki nou bezwen gard li dan en bon kondisyon. Toulezour, nou bezwen demontre bann kalite ki form parti fri lespri sen Bondye. Akoz? Parski pli nou fer zefor pour demontre sa bann kalite, pli lespri sen Bondye pou ed nou. Sa i akoz Zeova i en Bondye ki azir e lespri sen i son lafors. (Zen. 1:2) Alor i enportan pour azir. Par egzanp, disip Zak ti ekri: “Lafwa san aksyon osi i mor.” (Zak 2:26) Sa i osi leka pour tou lezot kalite ki lespri sen Bondye i ed nou devlope.

17. Ki nou devret fer si nou pa arive demontre bann kalite ki form parti fri lespri sen?

¹⁷ I kapab arive ki parfwa menm bann ki’n batize pour plizyer lannen, pa reisi demontre bann kalite ki form parti fri lespri sen. Me i enportan ki nou kontinyen esey demontre sa bann kalite. Annou vwar en legzanp. Meton ou lenz prefere i desire. Eski ou ti pou zet li deswit? I tre probab ki ou ti pou koud sa lenz si i posib e ou ti pou fer atansyon pour ki i pa desir ankor. Pareyman, pa dekouraze si parfwa ou pa demontre labonte, pasyans oubyen lanmour anver en dimoun. Demann leskiz pour ki ou kapab aranz keksoz avek sa dimoun e gard sa bon lanmitye ki zot annan. Apre, fer zefor pour fer pli byen dan lavenir.

18. Ki nou kapab asire?

¹⁸ Nou vreman rekonesan pour annan legzanp Zezi pour swiv. Pli nou annan menm fason panse avek Zezi, pli nou pou fer parey li. Pli nou fer parey Zezi, nou pou pli byen kapab devlop sa nouvo personnalite. Dan sa lartik, nou’n vwar zis kat kalite ki form parti fri lespri sen Bondye. I ti pou byen si ou pran letan pour etidye bann lezot kalite ki form parti fri lespri sen Bondye e reflesir lo ki mannyer ou pe demontre sa bann kalite. Ou pou vwar serten lartik lo sa topik dan Liv resers pour Temwen Zeova anba topik “Lavi Kretyen” e apre “Fri lespri.” Ou kapab asire ki si ou devlop sa nouvo personnalite e gard li, Zeova pou ed ou.