1. ¿Samaʉ̃ba zebʉ dayirãba obʉra?

 DAYIRÃ buru kʼoeda dããraba bʉsi, mawũã ẽ bʉrʉ aranʉweda buru kʼoeda bʉsi, jõmaʉ̃ba okĩrãpanʉ jõma Jeowaba kãgabʉta. Mawũẽra bia zokʼa kʼawuaibara dayi krĩchata. Daya obʉra dayi krĩchadeba zebʉta obʉ baera dayirãba badu krĩchabʉbʉrʉ daya kãgata oita, mawũãra kayiruata oyi (Efes. 4:17-19). Mamina dayirãba nebiata krĩchapanʉbʉrʉ nebiata jarayi akʉza nebiata oyi, mawũã Jeowaʼa sobiabiyi (Gál. 5:16).

2. ¿Kʼãrẽta kʼawuadai naʉ̃ artikulode?

² Artikulo nããbemane kʼawuasida dayirã obeda ẽãta krĩcha mitia ze ẽ marẽã dayirã krĩchaeda. Mamina oseapanʉ naʉ̃ krĩcha mitia zebʉrʉde oẽ bʼaita. Dayirã buru kʼoe ẽ nããra dayirãbara nemitia jarabadata akʉza nemitia obadata, idubʉibarabasi Jeowaʼa sobiabita. Maʉ̃ta nããra oibarabasi nãã kayirua jʉ̃bada idubʉita, mamina Jeowa sobiabira iya zokʼabʉta oibara: «Jʉ̃idua krĩcha yiwidita» (Col. 3:10). Naʉ̃ artikulode kʼawuadayi: ¿Kʼãrẽta jarakĩrãbʉta krĩcha yiwidibara? akʉza ¿sãwũã jʉ̃ita maʉ̃ krĩcha yiwidira? adewara ¿sãwũã ewari jõmaʉ̃nẽ erpanaseabʉta? Maʉ̃ra naʉ̃ artikulode kʼawuadayi.

3. Gálatas 5:22, 23ba jarabʉdebara, ¿kʼãrẽta jarakĩrãbʉ krĩcha yiwidibara akʉza ẽbẽrabara sãwũã jʉ̃i maʉ̃ra?

³ Krĩcha yiwidiba jarakĩrãbʉ bedʼeaita akʉza oita jõma Jeowade kĩrãkʼa. Ẽbẽra abaʉba krĩcha yiwidita jʉ̃bʉbʉrʉ, ũduyi Daizeze jaure zaredebema netata. Maʉ̃ ũdubita Daizeze jaure zareadebema nebia erbʉta yi edebibara,  dayi sãwũã krĩchabʉde, nekʼãrẽ obʉde akʉza sãwũa sentibʉde (akʉra Gálatas 5:22, 23). Bari jaraita, mebẽrãbara krĩcha yiwidi jʉ̃bʉbara kãgaibara Jeowata akʉza ẽbẽrarã iyi pʉwʉrʉdebemata (Mat. 22:36-39). Adewara maʉ̃ ẽbẽrabara sobiabʉta ũdubibʉ iyi bedʼea zroma ũdubʉidu (Sant. 1:2-4). Jʉrʉbʉ wuabemabawara aduʼa bʼaita (Mat. 5:9). Akʉza jʉ̃ã kʼawuabʉ, ibiadebʉ wuabemabawara (Col. 3:12, 13). Nebiata kãgabʉ akʉza obʉ (Luc. 6:35). Iya obʉdeba ũdubibʉ soiduba ĩjãbʉta Jeowata (Sant. 2:18). Yõ ẽ awuruba yõ jʉrʉbʉrʉde akʉza biʼia zokʼa kʼawuabʉ iyi kakuata (1 Cor. 9:25, 27; Tit 3:2).

4. Krĩcha yiwidi jʉ̃ira, ¿kʼãrẽa nesidapanʉ nebia Gálatas 5:22 akʉza 23ba adewara wuabemara testoba jarabʉta oita?

⁴ Dayirãbara krĩcha yiwidiyi jʉ̃ira, nesidapanʉ Gálatas 5:22, 23de jarabʉ nebiata oita akʉza awuru testoba Daizeze Bedʼeaba jarabʉta. * Krĩchara naʉ̃ yizata, dayirãba wua jʉ̃bʉdera idi jʉ̃bʉ wuata nrʉema awuruta jʉ̃bʉ, dayirãbara iyabaʉ ewaride wua bio jʉ̃bʉ ẽ. Mamina dayirãbara nebiara iyabaʉ ewaride bio ũdubiseabʉ. Bari jaraita dayirãba awuruta kãgabʉta ũdubira, ãyita bia edaibara akʉza mejãcha jʉ̃ãbʉta ũdubibara. Adewara dayirã ẽbẽra bia ũdubira nesidabʉ dayirã kakuata jipa zokʼa kʼawuita akʉza jʉ̃ã kʼawua bʼaita.

5. 1 Corintios 2:16ba jarabʉdebara, ¿kʼãrẽta jarakĩrãbʉ Jesu krĩcha erbaibara akʉza kʼãrẽa iya kʼãrẽ oda ʉ̃rʉ kʼawuaibara?

⁵ (Akʉra 1 Corintios 2:16). Krĩcha yiwidi jʉ̃ita, nesidabʉ erbaita «Jesu krĩchata», maʉ̃ba jarakĩrãbʉ, kʼawuaita Jesu sãwũã krĩchabadata akʉza iyi krĩchabʉ kĩrãkʼa krĩchaita. Jesubara biʼia oũdubisi nebia jaure zareadebemara. Espejoba nekʼãrẽ iyi kĩrãbita erbʉta biʼia ũdubibʉ kĩrãkʼa, Jesuba biʼia oũdubibasi yi zezeba nebia erbʉta (Heb. 1:3). Dayirãba Jesu kĩrãkʼa krĩchadara, Jesude kĩrãkʼa odayi, mawũã iyi nebiata erpanañi (Filip. 2:5).

6. ¿Kʼãrẽta kĩrãbedaibara krĩcha yiwidi jʉ̃ira?

⁶ ¿Wãrĩnu dayirãbara Jesuba obada kĩrãkʼa oseabʉka? Oseabʉ, mamina bʉara krĩchaseabʉ obe ẽãta akʉza krĩchaseabʉ  «Jesura nemitia okabasi, mamina mʉ̃ra nemitia omia». Bʉa mawũã krĩchabʉbʉrʉ kĩrãbera naʉ̃ta: Nããra, bʉra Daizezebara iyi kĩrãkʼa parãsi akʉza Jesu kĩrãkʼa, maʉ̃ kʼarea bʉara jidaseabʉ ãyide kĩrãkʼa oita (Gén. 1:26). Yi ũmera, Daizeze jaurera yi zroma baera, kʼarebaseabʉ bʉa ʉ̃ta nekʼãrẽ obe ẽ badata. Yi ũbeata, Jeowaba jʉ̃ã ẽ bʉa idi jõma aripe oũdubimarẽã nebia jaure zareadebemara. Dayirãra kãga baera diayi 1.000 poaga maʉ̃ nebia aripe oũdubita (Apoc. 20:1-3). Atiara Jeowabara kãgabʉ dayirãba oseabʉta odamarẽã, nebia jaure zareadebema erbaita akʉza ĩjãnamarẽã iya dayirãra wãrĩnu kʼarebaita.

7. ¿Kʼãrẽta kʼawuadai atiara?

⁷ ¿Dayirãbara sãwũã Jesude kĩrãkʼa oseapanʉ? Naʉ̃ne kʼawuadaya Jesuba sãwũã Daizeze jaure zareadebema nebia kimare erbʉta oũdubisita akʉza dayirãba kʼãrẽta kʼawuapanʉta maʉ̃neba. Adewara kʼawuadayi ʉ̃kʉrʉ bedʼea widibʉta, maʉ̃bara kʼarebayi dayirãba kʼawuaita krĩcha yiwidi sãwũã jʉ̃panʉta.

8. ¿Jesubara sãwũã kãgabʉta ũdubisi?

⁸ Jesubara Jeowara mejãcha kãga baera, nekʼãrẽ mejãcha osi iyi bari akʉza dayirã bari (Juan 14:31; 15:13). Jesu nama egorobasidera ẽbẽrarã mejãcha kãgabʉta ũdubisi, ʉ̃kʉrʉba iyi kãgada ẽ basimina iya kãga ũdubisi. Akʉza so borokea ũdubisi, adewara iyi kãga ũdubita ẽberãra jaradiasi Daizeze Nokʼo ʉ̃rʉ (Luc. 4:43, 44). Akʉza Jesuba ẽbẽrarã iyi zʉbʉria beabiside ũdubisi dayirãʼa kãgabʉta akʉza Jeowata. Mawũã Jesu beidadeba dayirãta ewari jõmaʉ̃nẽ bamarẽã osi.

9. ¿Dayirãbara sãwũã kãgata ũdubiseabʉ Jesude kĩrãkʼa?

⁹ ¿Kʼãrẽta kʼawuapanʉ? Dayirãbara Jeowaʼa dayi bebʉta diasi akʉza buru kʼoesida Jeowata kãgabʉ baera. Jesuba Jeowaʼa kãga ũdubida kĩrãkʼa dayirãbida Jeowa kãgabʉta ũdubiseabʉ wuabema ẽbẽra kãga ũdubibʉrʉde. Apostol Juanba bʉsi: «Yi mebẽã kãga ẽãra iya ũdubʉta Daizezearara kãga ẽ ũdu ẽ baera» (1 Juan 4:20). Dayikʉza widiseabʉ: ¿Mʉ̃ara soiduba kãgabʉka ẽbẽrarãra? ¿Mʉ̃ara so borekea akʉbʉka ẽbẽrarãra mʉ̃ta bia edada ẽ mina? ¿Mʉ̃ara kãgaba zokʼabʉka mʉ̃ ewarita akʉza mʉ̃ platata wuabemara Jeowa ʉ̃rʉ jaradiaita? ¿Ẽbẽraba kãga ẽ mina mʉ̃a obʉta mʉ̃a ãyara kãgata ũdubibʉka? ¿Mʉ̃ara audre ewari jʉrʉseabʉka Daizeze Bedʼea ẽbẽrarã jaradia wãita? (Efes. 5:15, 16).

10. ¿Sãwũã ũdubisi Jesubara aduʼa bakĩrãbʉta wuabemabawara?

¹⁰ Jesubara jʉrʉbasi wuabemabawara aduʼa bʼaita akʉza iyi bia edada ẽ baside krĩcha ẽ basi abarika oita. Iyi bedʼea zroma erbasidera iya nãã jʉrʉbasi wuabemarabawara aduʼa bʼaita akʉza wuabema ẽbẽrarã bedʼea zroma erbʉdera iya ũrãgʼabasi maʉ̃ bedʼea zroma ara odamarẽã mawũã aduʼa bʼaita. Bari jaraita Jesubara jaradiabasi yi mebẽrãinu bedʼea zroma erbʉta nããra ara omarẽã, Jeowaba ãya obʉta bia akʉmarẽã kãgabasibʉrʉ (Mat. 5:9, 23, 24). Iyi apostolera biode yõbaside kʼaita yi nããbema bʼai kʼarea, maʉ̃ne Jesubara biode kʼarebasi ãyira (Luc. 9:46-48; 22:24-27).

11. ¿Dayirãbara kʼãrẽta oseabʉ wuabemabawara aduʼa bʼaita?

¹¹ Dayirãra yõna ẽ baibara, mamina  maʉ̃ awa ẽ. Dayirãbara jʉrʉibara sãwũã wuabemabawara aduʼa bʼaita akʉza kʼarebaibara dayirã mebẽrã ãyi bedʼea zroma erbʉta ara odamarẽã (Filip. 4:2,3; Sant. 3:17, 18). Dayikʉza widibara: ¿Mʉ̃ara kʼãrẽta idubʉkĩrãbʉ wuabemabawara aduʼa bʼaita? Mebẽã abaʉba mʉ̃ta mitia osibʉrʉ, ¿maʉ̃ta ariya krĩchabʉka? ¿Mʉ̃ara jʉ̃ãbʉka mebẽãba iyiareba aba oseamarẽã mawũã ẽ bʉrʉ mʉ̃areba maʉ̃ bedʼea zroma ara oika? ¿Mʉ̃a kʼarebaseabʉde ẽbẽraʉ̃me yõbʉta ũdura jaraika ãyi bedʼea zromara ara odamarẽã?

12. ¿Jesubara sãwũã ũdubisi ibiade basita?

¹² Jesubara ibiadebʉta ũdubisi (Mat. 11:28-30). Jesubara ibiade bʉta ũdubisi iyi bedʼea zroma erbasimina. Bari jarita ẽbẽra wẽrã Feniciadebemaba jarasi Jesuʼa yi wauta bebimarẽã, aramaʉ̃ta Jesubara ibiade jarasi bebi ẽãta, mamina Jesuba ũduside ẽbẽra wẽrãba soiduba ĩjãbʉta aramaʉ̃ta kʼarebasi (Mat. 15:22-28). Jesura ibiade bedʼeabasimina iya ũrãga diai ewaridera jarabasi adewara iduaribi ẽ basi iyi neũdukʼawuaraba akʉza yi mebẽrãba ãya kãgabʉta odamarẽã. Bari jaraita, Pedroba jaraside Jesuʼa oẽ baibarata Jeowaba zokʼabʉta, Jesubara Pedrora kẽãsi iyi kʼaidubemara daidu (Mar. 8:32, 33). Jesubara mawũã oẽ basi Pedrota sopʉa sentimarẽã awuarabʉrʉ jaradiakĩrãbasi iyi kʼaidubemaraʼa ʉ̃tabʉta krĩchaira zeri ẽãta. Pedro maʉ̃ kʼarea so perasimina nekʼãrẽ biata kʼawuasi.

13. ¿Dayirãbara sãwũã ibiadebʉta ũdubiseabʉ?

¹³ Dayirãta wãrĩnu ibiade panʉta ũdubikĩrãpanʉbʉrʉ dayĩrãba nekʼãrẽta jaraita bʉbʉrʉ dayi neũdukʼawua mawũã ẽ bʉrʉ awuruʼa mawũã bedʼeabʉrʉdera bedʼeara Daizeze Bedʼeadeba, ibiade edara ãyita, krĩchara ãyara ara okĩrãbʉta adewara ãyide ĩjãra, mawũã odara ũrĩñi bʉa ũrãgʼa diabʉra. Bʉyikʉza widira: ¿Mʉ̃ra perabʉka ũrãgʼa diaita mʉ̃ neũdukʼawuaraba mawũã ẽ bʉrʉ mʉ̃ mebẽrãba aña obʉta ũdubʉrʉdera? ¿Mʉ̃a ũrãgʼa diaita nesidabʉdera ibiade jaradiabʉka mawũã ẽ bʉrʉ kʼai kʼaia jarabʉka? ¿Mʉ̃a kʼãrẽa ũrãgʼa diabʉ iyiʉ̃me kĩrʉbʉ baera mawũã ẽ bʉrʉ iyi kʼarebaita?

14. ¿Jesubara sãwũã ẽbẽra biata ũdubisi?

¹⁴ Jesubara kʼawuabʉ kʼãrẽta nebiara akʉza maʉ̃ta obʉ. Jesubara soiduba obʉ nebiata iya yi Zezeta kãgabʉ baera. Dayirãbara ẽbẽra biata ũduseabʉ iyi sãwũã sentibibʉdeba ẽbẽrarã iyi kʼawabʉ kʼarea akʉza ẽbẽra biabara badua jʉrʉbʉ wuabemara sãwũã kʼarebaita. Kʼawuaibara kʼãrẽta nebiara, mamina maʉ̃ awa ẽ maʉ̃ra soiduba oibara. Bʉara bʉyikʉza widiseabʉ: «¿Mʉ̃ara soiduba oseabʉka nebiara?» Oseabʉ. Bari jaraita, Jesubara jarasi ʉ̃kʉrʉ ẽbẽrabara yi zʉbʉria bea nekʼãrẽ biata diabʉta, mamina wuabemaba akʉbaramʉ daidu naʉ̃ra ẽbẽraba nekʼãrẽ bia obʉ kĩrãkʼa basimina Jeowabara bia akʉ ẽ basi (Mat. 6:1-4).

15. ¿Dayirãbara sãwũã ũdubiseabʉ ẽbẽra biata?

¹⁵ Dayirã ẽbẽra bia ũdubira nebia soiduba obʉdebʉrʉ mawũã ũdubiyi. Bʉyikʉza widira: «¿Mʉ̃ara kʼawuabʉka nebiara akʉza maʉ̃ta oʉ̃dubibʉka? ¿Kʼãrẽa mʉ̃ara nebiata obʉ?».

16. ¿Ewariza kʼãrẽta odaibara akʉza kʼãrẽa?

¹⁶ Krĩchada ẽ baibara dayirã buru kʼoeda tẽã krĩcha yiwidira dayidebidata,  wua jʉrʉira nesida ẽãta. Krĩcha yiwidira dayirãba wua yiwidi akʉbʉ kĩrãkʼa akʉ erbaibara nesidapanʉ ewari za ũdubita nebia Daizeze jaure zareadebemata, ¿kʼãrẽa? Zarea nesidapanʉbʉrʉ bia erbaita Daizeze jaure zareaba audre kʼarebayi. Maʉ̃ra mawũã berabaribʉ Daizezedeba zebʉ baera iyira pikibʉ ẽ ewari za nekʼãrẽ obʉ (Gén. 1:2). Maʉ̃ kʼarea dayirãra piki ba ẽ baibara. Jesu kʼaidubema Santiagoba naʉ̃ta bʉsi: «Maʉ̃ kĩrãkʼa daya ĩjãbʉta ũdubi ẽ bʉrʉ beibʉ» (Sant. 2:26). Dayirãba nebia jaure zareadebemata erbʉbʉrʉ maʉ̃ta oʉ̃dubibara mawũã opanʉbʉrʉ dayirãbara wãrĩnu ũdudayi Daizeze jaure zareaba kʼarebabʉta.

17. ¿Kʼãrẽta oibara dayirã aripe oẽ bʉrʉ nebiata Daizeze jaure zareadebemata?

¹⁷ Ʉ̃kʉrʉ kristianora dããrabamina buru kʼoedata edaʉde nemitiata opanʉ, maʉ̃ kʼarea nebia jaure zareadebemata aripe oʉ̃dubibʉbe ẽ mamina zarea odaibara maʉ̃ nebia jẽda oʉ̃dubidaita. Bari jaraita, bʉ wua kãgabʉta ãrĩra, ¿bʉra balbʉika? Mawũã ẽ, awuarabʉrʉ kasuyi akʉza maʉ̃neba ʉ̃ta nekʼãrẽ jõma oyi maʉ̃ ãrĩ ẽ marẽã. Ewari abaʉde bʉa bia eda ẽ basibʉrʉ awuru ẽbẽrata akʉza iyiʉ̃me kĩrʉsibʉrʉ krĩcha orara maʉ̃ kʼarea, awuarabʉrʉ iyaʼa widira kĩrãduamarẽã bʉ nemitia odata mawũã ora akʉza jẽda aduʼa panañi. Maʉ̃neba ʉ̃ta nekʼãrẽ jõma ora iyabaʉ nemitiata oẽ bʼaita.

18. ¿Kʼãrẽta ĩjãseabʉ dayirãbara?

¹⁸ Kʼãrẽaba biga diapanʉ Jesuʼa, iya yiza biata amaesi baera. Dayirãta zarea opanʉbʉrʉ iyi kĩrãkʼa krĩchaita zare ẽ bayi iyide kĩrãkʼa odaita. Jesude kĩrãkʼa opanʉbʉrʉ zare ẽ bayi krĩcha yiwidʼi jʉ̃ita. Naʉ̃ artikulodera kʼawuasida nebia Daizeze jaure zareadebema biobʉdebemata kimare pai. Mamina biode yibia bayi bʉ ewari jʉrʉita yi wuabema nebia jaure zareadebemaba erbʉta kʼawuaita akʉza maʉ̃ nebiara bʉa sãwũã oʉ̃dubiseabʉta maʉ̃ ʉ̃rʉ kʼawuaira bʉa jʉrʉseabʉ Guía de Estudio de los testigos de Jehová mama ũduyi «El vivir cristiano» maʉ̃ne eda jarabʉ «Fruto del espíritu». Bʉta zarea ora krĩcha yiwidi jʉ̃ita akʉza maʉ̃ ewari jõmaʉ̃nẽ erbaita, ĩjãra Jeowaba bʉ kʼarebaita.