1. ¿Baqui cʌyʌl bajcheʼ yilal jiñi lac melbal?

 TI LAC pejtelel la com lac mel lac bʌ cheʼ bajcheʼ miʼ mulan Jehová, mach yʌlʌyic jalix tsaʼ lac chʼʌmʌ jaʼ. Chaʼan miʼ mejlel lac mel (chaʼlen) iliyi, yom mi lac ticʼ lac ñaʼtʌbal. ¿Chucoch? Come jiñi lac melbal (chaʼlibal) yaʼ cʌyʌl ti bajcheʼ yilal jiñi lac ñaʼtʌbal. Mi jin jach mi lac ñaʼtan chuqui tac yom jiñi lac bʌcʼtal, mi caj la cʌl yicʼot mi caj lac mel chuqui tac mach bʌ weñic (Efes. 4:17-19). Pero mi mucʼʌch la cotsan chuqui tac wen ti lac ñaʼtʌbal, mi caj la cʌl yicʼot lac mel chuqui miʼ mulan jiñi lac Tat Jehová (Gál. 5:16).

2. ¿Chuqui ti cʼajtiya tac mi caj lac jacʼ ti ili estudio?

² Cheʼ bajcheʼ tsaʼ laj qʼuele ti jiñi yambʌ estudio, wersa mucʼʌch i yochel mach bʌ weñic lac ñaʼtʌbal. Pero mucʼʌch i mejlel la cʌl chaʼan maʼañic mi caj lac mel. Chaʼan mi lac mejlel ti chʼʌmjaʼ yom mi laj cʌy la cʌl yicʼot lac mel chuqui tac miʼ tsʼaʼlen Jehová. Ili jiñʌch yom bʌ mi lac ñaxan mel yicʼot jiñi ñumen ñuc bʌ i cʼʌjñibal chaʼan miʼ mejlel laj cʌy jiñi ñoxix bʌ lac melbal. Pero chaʼan mi lac tijicñesan Jehová tiʼ sujm, yom mi lac jacʼ ili mandar: «Lʌpʌla tsijiʼ bʌ laʼ melbal» (Col. 3:10). Ti ili estudio, mi caj i jajqʼuel ili cʼajtiya tac: ¿Chuquiyes jiñi tsijiʼ bʌ lac melbal? I ¿bajcheʼ miʼ mejlel lac lʌp yicʼot chaʼan chʌn an lac chaʼan?

3. ¿Chuquiyes jiñi tsijiʼ bʌ lac melbal, i bajcheʼ mi lac lʌp? (Gálatas 5:22, 23).

³ Jiñi tsijiʼ bʌ lac melbal jiñʌch jiñi lac ñaʼtʌbal yicʼot lac melbal muʼ bʌ i pʌs jiñi melbalʌl tac am bʌ i chaʼan Jehová. ¿I bajcheʼ  mi lac lʌp jiñi? Jiñʌch cheʼ mi lac pʌs jiñi melbalʌl tac muʼ bʌ i yʌcʼ jiñi i yespíritu Dios cheʼ bʌ mi la cʌcʼ chaʼan miʼ tojʼesan jiñi lac ñaʼtʌbal, lac melbal yicʼot bajcheʼ yubil mi la cubin (pejcan Gálatas 5:22, 23). Jumpʼejl ejemplo, jiñi am bʌ i chaʼan jiñi tsijiʼ bʌ i melbal miʼ cʼuxbin Jehová yicʼot i wiñicob (Mat. 22:36-39). Chʌn tijicña anquese miʼ ñusan wocol (Sant. 1:2-4). Miʼ sʌclan ñʌchʼtʌlel (Mat. 5:9). Miʼ pʌs i pijt yicʼot uts tiʼ tojlel yañoʼ bʌ (Col. 3:13). Miʼ mulan chuqui tac wem bʌ yicʼot mucʼʌch i mel (Luc. 6:35). Miʼ pʌs ti chuqui tac miʼ mel chaʼan pʼʌtʌlʌch i ñopoñel tiʼ tojlel Jehová (Sant. 2:18). Maʼañic miʼ michʼan anquese miʼ techbentel (Tito 3:2). Yicʼot miʼ ticʼ i bʌ cheʼ bʌ an chuqui miʼ mejlel i yʌcʼ ti mulil (1 Cor. 9:25, 27).

4. ¿Chucoch mach jujumpʼejlic yom mi lac taj jiñi melbalʌl tac muʼ bʌ i yʌjlel ti Gálatas 5:22, 23?

⁴ Chaʼan an lac chaʼan jiñi tsijiʼ bʌ lac melbal, yom mi lac chaʼlen wersa chaʼan mi lac taj jiñi melbalʌl tac muʼ bʌ i yʌjlel ti Gálatas 5:22, 23 yicʼot ti yan tac bʌ texto. * Ili mach lajalic bajcheʼ jiñi lac pislel jujumpʼejl bʌ yom mi lac lʌp. Ili melbalʌl tac miʼ luʼ taj majlel i bʌ. Jumpʼejl ejemplo, mi mucʼʌch laj cʼuxbin yañoʼ bʌ, mi caj lac pʌsbeñob lac pijt yicʼot uts mi lac mel lac bʌ tiʼ tojlelob. I chaʼan weñoñʌchla tiʼ sujm, yom xucʼulon jachla yicʼot mi lac ticʼ lac bʌ.

5. ¿Chuqui yom i yʌl cheʼ an lac chaʼan «i ñaʼtʌbal Cristo», yicʼot chucoch yom mi lac wen qʼuel bajcheʼ yilal tsaʼ chumle Jesús? (1 Corintios 2:16).

⁵ (Pejcan 1 Corintios 2:16). Chaʼan mi lac taj jiñi tsijiʼ bʌ lac melbal, yom an lac chaʼan «i ñaʼtʌbal Cristo», ili yom i yʌl chaʼan mi laj cʌn bajcheʼ yilal i ñaʼtʌbal yicʼot mi lac lajin. Jesús tsiʼ pʌsʌ ti toj jiñi melbalʌl tac muʼ bʌ i yʌcʼ jiñi i yespíritu Dios. Cheʼ bajcheʼ jumpʼejl espejo, wen miʼ lajin jiñi melbalʌl tac am bʌ i chaʼan Jehová (Heb. 1:3). Cheʼ bʌ ñumen lajal lac ñaʼtʌbal bajcheʼ i chaʼan Jesús, ñumen wen mi caj lac lajiben i melbal yicʼot bajcheʼ yilal (Filip. 2:5).

6. ¿Chuqui yom mi laj cʼajtesan cheʼ bʌ mi lac chaʼlen wersa chaʼan mi lac taj jiñi tsijiʼ bʌ lac melbal?

⁶ ¿Mucʼʌch ba i mejlel lac lajin i yejemplo Jesús? Tajol maʼ ñaʼtan: «¡Maʼañic baʼ ora mi caj c sujtel bajcheʼ Jesús come i bajñeli toj!». Mi cheʼ maʼ ñaʼtan bajcheʼ jiñi, cʼajtesan ili uxchajp. Ñaxam bʌ, jatet tsaʼ mejliyet  cha’an che’ yilalet bajcheʼ Jehová yicʼot Jesús. Jin chaʼan, mucʼʌch i mejlel a yajcan a lajiñob i mucʼʌch i mejlel a mel anquese mach ti tsʼʌcʌlic (Gn. 1:26). I chaʼpʼejlel, jiñi i yespíritu Dios jiñʌch jiñi ñumen ñuc bʌ pʼʌtʌlel am bʌ. Iliyi miʼ wen coltañet a mel jiñi mach bʌ mejlic a mel ti a bajñelil. I yuxpʼejlel, ili ora Jehová maʼañic miʼ pijtan chaʼan maʼ pʌs ti toj jiñi melbalʌl tac muʼ bʌ i yʌcʼ jiñi espíritu. Cʼajtesan chaʼan mi caj i yʌqʼuen Mil jab jiñi muʼ bʌ caj i chumtʌlob ila ti Lum chaʼan miʼ sujtelob ti toj (Apoc. 20:1-3). Jehová miʼ pijtan ili ora chaʼan mi lac chaʼlen wersa yicʼot chaʼan mi lac ñop chaʼan mucʼʌch caj i coltañonla.

7. ¿Chuqui mi caj laj qʼuel?

⁷ ¿Bajcheʼ miʼ mejlel lac lajin Jesús? Mi caj laj qʼuel chʌmpʼejl melbalʌl muʼ bʌ i yʌcʼ jiñi i yespíritu Dios. Mi caj laj qʼuel bajcheʼ tsiʼ pʌsʌ Jesús ili melbalʌl tac yicʼot chuqui miʼ mejlel laj cʌn. Mi caj laj qʼuel cʼajtiya tac jaʼel muʼ bʌ caj i coltañonla lac ñaʼtan mi yomto mi lac ñumen weñʼesan jiñi tsijiʼ bʌ lac melbal.

8. ¿Bajcheʼ tsiʼ pʌsʌ i cʼuxbiya Jesús?

⁸ Jesús tsiʼ wen cʼuxbi Jehová i cabʌl chuqui tsiʼ mele tiʼ tojlel yicʼot ti lac tojlel (Juan 14:31; 15:13). I tsiʼ pʌsʌ jiñi ñuc bʌ i cʼuxbiya tiʼ tojlel lac piʼʌlob ti bajcheʼ tsaʼ chumle ila ti Lum. Tsiʼ chʌn pʌsʌ i cʼuxbiya yicʼot i yutslel, yicʼotto tiʼ tojlel jiñi tsaʼ bʌ i contrajiyob. Tsiʼ pʌsʌ ili ñuc bʌ cʼuxbiya cheʼ bʌ tiʼ subu jiñi wen tʼan chaʼan bʌ Yumʌntel (Luc. 4:43, 44). Cheʼ jaʼel, cheʼ bʌ tsiʼ ñusa wocol yicʼot tsiʼ yʌcʼʌ i bʌ ti tsʌnsʌntel tiʼ cʼʌb jiñi xmulilob tsiʼ pʌsʌ bajcheʼ cʼamel miʼ cʼuxbin Dios yicʼot jiñi lac piʼʌlob. Cheʼ bajcheʼ jiñi, tsiʼ yʌcʼʌ jiñi pijtaya chaʼan ti lac pejtelel mi lac mejlel ti chumtʌl tiʼ pejtelel ora.

9. ¿Bajcheʼ miʼ mejlel lac pʌs cʼuxbiya cheʼ bajcheʼ tsiʼ mele Jesús?

⁹ Tsaʼ la cʌcʼʌ lac bʌ ti Jehová yicʼot tsaʼ lac chʼʌmʌ jaʼ come mi laj cʼuxbin. Jin chaʼan, cheʼ bajcheʼ tsiʼ mele Jesús, yom mi lac pʌs jiñi cʼuxbiya ti bajcheʼ yilalonla la quicʼot yambʌlob. Jiñi apóstol Juan tiʼ tsʼijbu: «Jiñi maʼañic bʌ miʼ cʼuxbin i yermañu, muʼ bʌ i taj i qʼuel, maʼañic miʼ mejlel i cʼuxbin Dios, maʼañic bʌ miʼ taj i qʼuel» (1 Juan 4:20). Laʼ laj cʼajtiben lac bʌ: «¿Mucʼʌch ba c wen cʼuxbiñob jiñi yañoʼ bʌ? ¿Muʼ ba c pʌs c pʼuntaya tiʼ tojlelob anquese mach cheʼobic tic tojlel? ¿Muʼ ba i ñijcañon jiñi j cʼuxbiya chaʼan mij cʼʌn jiñi c tiempo yicʼot chuqui tac an c chaʼan chaʼan mi cʌqʼuen i cʌn yambʌlob chaʼan bʌ Jehová? ¿Muʼ ba c mel jaʼel cheʼ bʌ cabʌlob maʼañic miʼ qʼuelob ti ñuc, o cheʼ bʌ mach wen yomobic i qʼueloñob? ¿Mejl ba c ñumen aqʼuen i yorajlel jiñi subtʼan?» (Efes. 5:15, 16).

10. ¿Chuqui tsiʼ mele Jesús chaʼan miʼ sʌclan jiñi ñʌchʼtʌlel?

¹⁰ Jesús tiʼ sʌcla jiñi ñʌchʼtʌlel. Maʼañic tiʼ sutqʼui chuqui tsaʼ melbenti. Pero añʌch chuqui yan tac bʌ tsiʼ mele. Tsiʼ chaʼle wersa chaʼan miʼ yajñel ti ñʌchʼtʌlel yicʼot jiñi lac piʼʌlob i tiʼ sube jiñi yañoʼ bʌ chaʼan yom miʼ tojʼesañob i wocol. Jumpʼejl ejemplo, tiʼ sube jiñi lac piʼʌlob chaʼan mi yomob chaʼan Jehová miʼ chʼʌm jiñi i chʼujutesayajob yom miʼ tojʼesañob jiñi i wocol yicʼotob i yermañu (Mat. 5:9, 23, 24). Mach junyajlic jach tiʼ sube jiñi i yapóstolob chaʼan yom miʼ cʌy i letojiñob (querajiñob) majqui jiñi ñumen ñuc bʌ (Luc. 9:46-48; 22:24-27).

11. ¿Bajcheʼ miʼ mejlel lac sʌclan ñʌchʼtʌlel?

¹¹ Chaʼan mi lac sʌclan jiñi ñʌchʼtʌlel, mach jasʌlic jach cheʼ bʌ maʼañic mi lac tech wocol. Yomʌch mi lac tojʼesan lac wocol la quicʼot yambʌlob yicʼot mi lac suben jiñi yambʌlob chaʼan cheʼʌch yom miʼ melob jaʼel (Filip. 4:2, 3; Sant. 3:17, 18). Miʼ mejlel laj cʼajtiben lac bʌ: «¿Chuqui tac com bʌ c mel chaʼan mic  tojʼesan c wocol quicʼot yañoʼ bʌ? ¿Muʼ ba c lot c michʼajel cheʼ bʌ an majqui miʼ lowbeñon c pusicʼal? ¿Com ba chaʼan jin jiñi yambʌ miʼ tech i tojʼesan jiñi wocol? ¿O joñon ba mic tech c tojʼesan anquese maʼañic c mul mic ñaʼtan? Mi weñʌch mij qʼuel, ¿muʼ ba c suben yañoʼ bʌ chaʼan yom miʼ tojʼesañob i wocol?».

12. ¿Bajcheʼ tsiʼ pʌsʌ Jesús chaʼan utsʌch?

¹² Jesús uts tsiʼ mele i bʌ (Mat. 11:28-30). Tsiʼ pʌsʌ i yutslel yicʼot tsiʼ chʼʌmbe i sujm yañoʼ bʌ anquese an i tajol wocol. Jumpʼejl ejemplo, cheʼ bʌ juntiquil xʼixic fenicia bʌ tiʼ sube chaʼan miʼ tsʼʌcʌben i yixicʼal, mach ti orajic tsiʼ mele jiñi woli (choncol) bʌ i cʼajtiben, pero tsaʼʌch i pʌsbe i yutslel i tiʼ tsʼʌca jiñi xchʼoc cheʼ bʌ tsiʼ qʼuele bajcheʼ cʼamel miʼ ñop jiñi xʼixic (Mat. 15:22-28). Pero mach tiʼ caj jach bajcheʼ yubil miʼ yubin i bʌ an chuqui tac tsiʼ mele. An i tajol tsiʼ yʌqʼue ticʼojel jiñi muʼ bʌ i cʼuxbiñob come utsʌch. Jumpʼejl ejemplo, cheʼ bʌ Pedro tsiʼ ñopo i mʌctan chaʼan maʼañic miʼ tsʼʌctiyel jiñi yom bʌ Jehová, Jesús tsiʼ tiqʼui tiʼ wut jiñi yambʌ xcʌntʼañob (Mar. 8:32, 33). Mach chaʼañic miʼ yʌcʼ ti quisin Pedro cheʼ tsiʼ mele iliyi, chaʼañʌch miʼ cʌntesan yicʼot miʼ pʌsben jiñi yambʌ xcʌntʼañob chaʼan yom miʼ coltañob yicʼot chaʼan mach yomic miʼ mʌctañob chaʼan miʼ mel chuqui yom bʌ Dios. Miʼ mejlel la cʌl chaʼan Pedro tsaʼʌch i tsʼitaʼ ubi quisin, pero tsaʼʌch i colta.

13. ¿Chuqui yom mi lac bixel mel chaʼan mi lac pʌs chaʼan utsoñʌchla tiʼ sujm?

¹³ An i tajol yom mi lac chaʼlen toj bʌ tʼan chaʼan mi lac pʌs i sujm bʌ la cutslel tiʼ tojlel jiñi muʼ bʌ laj cʼuxbiñob. Cheʼ bʌ mi lac mel, yom mi lac lajin Jesús i yomʌch mi lac locʼsan tiʼ Tʼan Dios jiñi ticʼojel tac. Yom mi lac pʌs laj cʼuxbiya. Laʼ lac pijtan chuqui wem bʌ tiʼ tojlelob yicʼot laʼ lac ñop chaʼan jiñi muʼ bʌ i cʼuxbiñob Jehová yicʼot miʼ cʼuxbiñonla mucʼʌch caj i jacʼob jiñi ticʼojel tac muʼ bʌ la cʌqʼueñob yicʼot laj cʼuxbiya. Laʼ laj cʼajtiben lac bʌ: «¿Mucʼʌch ba c ticʼ juntiquil muʼ bʌ j cʼuxbin mi woli (yʌquel) i mel chuqui mach weñic? ¿I bajcheʼ mic mel? ¿Yicʼot ba cutslel o ti tsʌts bʌ tʼan? ¿I chucoch mic ticʼ? ¿Chaʼan ba michʼon quicʼot o chaʼan com j coltan?».

14. ¿Bajcheʼ tsiʼ pʌsʌ wem bʌ i pusicʼal Jesús?

¹⁴ Jesús mach yujilic jach chuqui jiñi wem bʌ, mucʼʌch i mel jaʼel. Miʼ cʼuxbin i Tat, jin chaʼan tiʼ pejtelel ora miʼ mel chuqui wen yicʼot chaʼañʌch i cʼuxbiya miʼ mel. Jiñi wem bʌ i pusicʼal miʼ chʌn sʌclan bajcheʼ miʼ mejlel i coltan yañoʼ bʌ. Mach jasʌlic cheʼ la cujil chuquiyes jiñi wem bʌ, yomʌch mi lac mel i chaʼañʌch laj cʼuxbiya. Tajol an majqui miʼ cʼajtiben i bʌ: «¿Am ba chuqui mi lac mel mach bʌ chaʼañic laj cʼuxbiya?». Añʌch. Jesús tsiʼ taja ti tʼan jiñi muʼ bʌ i coltañob pʼumpʼuñoʼ bʌ, pero chaʼan jach miʼ ñaʼtañob jiñi yañoʼ bʌ. Iliyi maʼañic miʼ mulan Jehová (Mat. 6:1-4).

15. ¿Bajcheʼ miʼ mejlel lac pʌs chaʼan weñoñʌchla tiʼ sujm?

¹⁵ Chaʼan weñonla tiʼ sujm yom mi lac ñaʼtan jiñi yañoʼ bʌ cheʼ bʌ mi lac mel chuqui wem bʌ, mach yomic jach mi lac bajñel ñaʼtan lac wenlel. Yom mi laj cʼajtiben lac bʌ: «¿Muʼ ba i mejlel cʌl chaʼan mucʼʌch c mel chuqui jiñi wem bʌ i mach toʼol cujilic jach? ¿Chucoch mic mel chuqui wem bʌ?».

16. ¿Chuqui yom mi lac mel ti jujumpʼejl qʼuin, i chucoch?

¹⁶ Mach lac ñaʼtan chaʼan cheʼ bʌ chʼʌmʌlix lac chaʼan jaʼ tsʼʌcʌlix an lac chaʼan jiñi tsijiʼ bʌ lac melbal i chaʼan maʼañix chuqui yambʌ yom mi lac mel. Jiñi tsijiʼ bʌ lac melbal lajal bajcheʼ lac pislel yom bʌ mi laj cʌntan. Jin chaʼan, ti jujumpʼejl qʼuin yom mi laj qʼuel bajcheʼ yambʌ miʼ mejlel lac pʌs jiñi melbalʌl tac muʼ bʌ i yʌcʼ  jiñi i yespíritu Dios. ¿Chucoch? Come Jehová juntiquilʌch Dios chʌn woli bʌ ti eʼtel (troñel), i cheʼʌch jaʼel jiñi i yespíritu (Gn. 1:2). Ili yom i yʌl chaʼan jujumpʼejl melbalʌl muʼ bʌ i yʌcʼ jiñi espíritu miʼ mejlel yicʼot yomʌch miʼ ñijcañonla chaʼan an chuqui mi lac mel. Jumpʼejl ejemplo, jiñi xcʌntʼan Santiago tiʼ tsʼijbu: «Jiñi lac ñopoñel, chʌmeñix mi maʼañic mi lac mel chuqui tac wen» (Sant. 2:26). I cheʼʌch miʼ mejlel la cʌl jaʼel tiʼ tojlel jiñi yambʌ melbalʌl tac muʼ bʌ i yʌcʼ jiñi i yespíritu Dios. Jajayajl mi lac pʌs, woli lac pʌs chaʼan wolʌch i mel i yeʼtel ti lac tojlel jiñi i yespíritu Dios.

17. ¿Chuqui miʼ mejlel lac mel mi maʼañic mi lac pʌs cheʼ bajcheʼ yom jiñi melbalʌl tac muʼ bʌ i yʌcʼ jiñi espíritu?

¹⁷ Jiñi añix bʌ ora i chʼʌmʌyob jaʼ an i tajol maʼañic miʼ pʌsob cheʼ bajcheʼ yom jiñi melbalʌl tac muʼ bʌ i yʌcʼ jiñi chʼujul bʌ espíritu. Pero jiñi ñumen ñuc bʌ i cʼʌjñibal jiñʌch cheʼ maʼañic mi lac lujbʼan. Laʼ la cʌl jumpʼejl ejemplo. Cheʼ bʌ miʼ tsijlel jiñi lac pislel muʼ bʌ lac wen mulan mach ti orajic mi lac choc, mi laj qʼuel mi muʼto i mejlel lac tojʼesan. I muqʼuix lac ñumen cʌntan. Cheʼ jaʼel, mi ti jumpʼejl bʌ qʼuin maʼañic tsaʼ lac wen pʌsʌ la cutslel, lac pijt o laj cʼuxbiya mi la cubin, mach yomic mi la cubin lac chʼijyemlel. Muʼ bʌ caj i coltañonla jiñʌch cheʼ mi laj cʼajtin lac ñusʌbentel, ili mi caj i coltañonla chaʼan wen mi lac chaʼ ajñel la quicʼot jiñi yambʌ lac piʼʌl. I laʼ lac chaʼlen wersa chaʼan ti yambʌ ora ñumen wen mi lac pʌs ili melbalʌl tac.

18. ¿Chuqui miʼ mejlel lac ñop?

¹⁸ ¡Mi lac wen qʼuel ti ñuc cheʼ an lac chaʼan i yejemplo Jesús! Cheʼ bʌ mi lac ñumen lajiben i ñaʼtʌbal, mach wen wocolic mi caj la cubin chaʼan mi lac mel cheʼ bajcheʼ tsiʼ mele. I cheʼ bajcheʼ jiñi ñumen wen mi caj lac pʌs jiñi tsijiʼ bʌ lac melbal. Ti ili estudio, tsaʼ jach laj qʼuele chʌmpʼejl melbalʌl muʼ bʌ i yʌcʼ jiñi i yespíritu Dios. Pero wen cheʼ muqʼuic la cʌqʼuen i yorajlel chaʼan mi laj qʼuel jiñi yambʌ melbalʌl tac chaʼan mi laj qʼuel bajcheʼ miʼ mejlel lac ñumen pʌs ti wen. Mi caj a taj tema tac muʼ bʌ i mejlel i coltañet ti jiñi Coltʌntel chaʼan estudio ti jiñi tema «Yom bʌ miʼ mel xñoptʼan» i che’ jiñi «I yʌcʼbal jiñi espíritu». Miʼ mejlel lac ñop chaʼan Jehová mi caj i coltañonla mi mucʼʌch lac chaʼlen wersa chaʼan mi lac taj jiñi tsijiʼ bʌ lac melbal yicʼot mi lac chaʼlen wersa chaʼan chʌn an lac chaʼan.