1. Nemene la ka troa xatua së matre hetrenyi la itre thiina ka hnyipixe?

 NGACAMA easa xötrei bapataiso maine ekö hë së pena ngöne la nyipici ngo easa ajane troa hetrenyi la itre thiina ka amadrinë Iehova. Celë hi matre, nyipiewekë tro sa thupën la itre mekune së. Pine nemen? Pine laka, ijije hi troa ajolëne la itre aja ne la hni së hnene la itre mekune së. Eje hi, maine tro palahi sa mekun la itre aja ne ngönetrei, tro hë sa qaja maine kuca la itre ewekë ka ngazo. (Efe. 4:17-19) Ngo maine tro sa hetrenyi la itre mekun ka lolo, tro hë sa kuca la itre ewekë ka amadrinëne la hni Iehova, Keme së e hnengödrai.​—Gal. 5:16.

2. Nemene la hne së hna troa ce wang ngöne la tane mekun celë?

² Hne së lo hna ce wang ngöne lo tane mekun hnapan laka, thatreine kö së troa thingijëne la itre mekun ka ngazo troa lö e hnine la he së. Ame pe, ijije hi tro sa thipetrije itre ej. Qëmekene tro sa xomi bapataiso, nyipiewekë tro sa nuetrije la aqane ithanata me itre aqane ujë hna methinëne hnei Iehova. Celë hi lai nyine tro sa kuca matre troa thipetrije la itre thiina hnapan. Ngo maine easa ajane troa amadrinë Iehova, nyipiewekë tro sa drengethenge la hna amekötin hna hape: “Hetrëne jë la itre thiina ka hnyipixe.” (Kol. 3:10) Ame ngöne la tane mekun celë, kola troa sa la lue hnying: Nemene la aliene la hna hape, “itre thiina ka hnyipixe”? Nge nemene la nyine tro sa kuca matre heetrëne la itre thiina cili me thupëne itre ej?

3. Thenge la Galatia 5:22, 23, nemene la aliene la hna hape, “itre thiina ka hnyipixe,” nge nemene la nyine troa kuca hnene la ketre atr matre hetrenyi la itre thiina cili?

³ “Ame la hna hape, “itre thiina ka hnyipixe,” ke kola qaja la itre mekun me aqane ujë i Iehova. Ame la Keresiano ka thele troa hetrenyi la itre thiina cili, ke angeice a amamane ngöne la mele i angeic la itre thiina i Iehova. Angeic a nue la uati hmitrötr troa xomiujine la itre mekun me aliene hni angeic me itre hnei angeice hna kuca. (E jë la Galatia 5:22, 23.) Angeice fe a hnimi Iehova memine la nöje i Nyidrë. (Mat. 22:36-39) Ketre, angeic a madrin ngacama angeic a cile kowe la itre jol. (Iako. 1:2-4) Angeice fe a thele tingetinge me itre xan. (Mat. 5:9) Angeic a xomihni aqean me thiina ka loi me itre xan. (Kol. 3:13) Angeic a hniin me kuca la itre ewekë ka loi. (Luka 6:35) Angeice fe a amamane ngöne la itre hnei angeice hna kuca laka, tru la lapaune i angeice koi Iehova. (Iako. 2:18) Nge angeice a hmitr troa elëhni ngöne la kola akötrë angeic, me catre xomihni ngöne la kola tupathi angeic.​—1 Kor. 9:25, 27; Tito 3:2.

4. Pine nemen matre nyipiewekë tro sa eënyine asë la itre thiina hna qaja ngöne Galatia 5:22, 23? Qejepengöne jë.

⁴ Maine easa ajane tro heetrëne la itre thiina ka hnyipixe, loi e tro sa eënyine asë la itre thiina hna qaja ngöne Galatia 5:22, 23 me ngöne la itre xaa xötr ne la Tusi Hmitrötr. * Ame la itre thiina cili ke, tha ceitu kö memine la itre sine mano hna thupa nge hna icanekeun. Ame la itre igötranene la itre thiina cili, ke itre ej a mama ngöne la itre xaa thiina. Eje hi, maine easa hnime la itre xan tro hë sa xomihni aqean me thiina ka loi. Nge maine easa ajane troa thiina ka loi, nyipiewekë tro sa thiina ka menyik me catre xomihni.

5. Nemene la aliene la hna hape, troa hetrenyi la “aqane waiewekë i Keriso,” me pine nemene matre tro sa inine la aqane mele i Iesu? (1 Korinito 2:16)

⁵ E jë la 1 Korinito 2:16. Maine easa ajane troa hetrenyi la itre thiina ka hnyipixe, nyipiewekë troa hetrenyi la “aqane waiewekë i Keriso.” Kolo lai a hape, troa inine  la itre mekune i Iesu me xötrethenge la tulu i nyidrë. Eje hi, hnei Iesu hna eënyine la itre thiina i Iehova Akötresie me amamane itre ej ngöne la mele i nyidrë. (Heb. 1:3) Haawe, maine tro sa nyitipune la aqane waiewekë i Iesu me aqane ujë i nyidrë, tro hë sa xötrethenge la tulu i nyidrë.​—Fil. 2:5.

6. Nemene la hne së hna troa lapa mekun ngöne la easa thel troa heetrëne la itre thiina ka hnyipixe?

⁶ Hapeu, ijije kö tro sa xötrethenge hnyawa la tulu i Iesu? Maine jë, tro epuni a qaja ka hape: ‘Atr ka pexeje Iesu, matre thatreine kö ni troa xötrethenge hnyawa la tulu i nyidrë!’ Ngo tha tro kö epuni a thëthëhmine la köni ewekë celë. Ame la hnapan, hna xupi së matre tro sa atreine nyitipu Iehova me Iesu. (Gen. 1:26) Ame la hnaaluen, uati hmitrötr la trengecatre i Akötresie. Jëne la trengecatre cili, ijije hi tro epuni a kuca la itre hnei epuni hna thatrein. Nge ame la hnaakönin, atre hnyawa hi Iehova laka, thatreine kö epuni troa hetrenyi asë la itre thiina i Nyidrë. Celë hi kepin matre hnei Nyidrëti hna nue la 1000 lao macatre matre tro la itre ka mejiun troa mel e celë fen a pexej me mel uti hë la pun. (Hna ama. 20:1-3) Celë hi matre, Iehova a ajane tro sa kuca la hne së hna atrein koi Nyidrë me sipo ixatua fe koi Nyidrë.

7. Nemene la hne së hna troa ce wang enehila?

⁷ Tune kaa la aqane tro sa nyitipu Iesu? Tro sa ce wang enehila la foa lao igötranene la wene la ua i Akötresie, memine la aqane amamane Iesu la itre thiina cili. Thupene lai, tro sa ce ithanatane la itre hnying ka troa aijijë së troa isa waipengö së me xatua së troa eënyine la itre thiina ka hnyipixe.

8. Tune kaa la aqane amamane Iesu la ihnimi Nyidrë?

⁸ Hnene la ihnimi Iesu koi Iehova matre hnei nyidrëti hna nue la mele i nyidrë kowe la Keme i nyidrë me koi easë fe. (Ioane 14:31; 15:13) Hnei Iesu fe hna amamane la ihnimi nyidrë kowe la itre atr, lo nyidrëti e celë fen. Eje hi, hnei Iesu hna hnim me utipine la itre atr ngacama hnei angatr hna icilekeu me nyidrë. Hnei nyidrëti fe hna ini angatr la Baselaia i Akötresie. (Luka 4:43, 44) Ketre, ngacama hnei Iesu hna akötr nge hna humuthi nyidrë, ngo hnei nyidrëti hna amamane la ihnimi nyidrë koi Iehova me kowe la itre atr. E cili, ijije hi tro la nöjei atr a hetrenyi la mel ka pë pun.

9. Tui Iesu, tune kaa la aqane tro sa amamane la ihnimi së koi itre xan?

⁹ Hnene la ihnimi së koi Iehova matre hne së hna nue la mele së koi Nyidrë me xomi bapataiso. Celë hi matre, tui Iesu loi e tro sa amamane la ihnimi së koi Iehova ngöne la aqane ujë së kowe la itre atr. Öni Ioane aposetolo: “Ame la ka tha hnime la trejin me angeic, lo hnei angeic hna öhn, thatreine kö troa hnimi Akötresie, lo hna tha öhn.” (1 Ioane 4:20) Haawe, loi e tro sa isa hnying ka hape: ‘Hapeu eni kö a hnime la itre atr? Eni kö a utipine la itre xan ngacama angatr a akötrë ni? Ihnime kö la ka upi ni troa nue la traemeng me itre mo matre xatuane la itre xan troa hane atre Iehova? Hapeu, celë kö lai hnenge hna kuca ngacama tha madrine kö la itre xan? Eni kö a xomi ijin matre troa xatuane la itre xan matre cainöj me inine la itre atr?’​—Efe. 5:15, 16.

10. Tune kaa la aqane amamane Iesu laka nyidrëti a thele tingeting?

¹⁰ Iesu la ketre atr ka thele tingeting. Ame lo kola qanangazo nyidrë hnene la itre atr ke, tha hnei nyidrëti kö hna të la ngazo i angatr. Ngo hnei nyidrëti pe hna ithuecatre koi angatr troa iloi. Eje hi, hnei Iesu hna qaja koi angatr ka hape, maine  tro angatr a thele tingeting memine la trejin me angatr, tro Iehova a kapa la hmi angatr. (Mat. 5:9, 23, 24) Ketre, hnei Iesu hna xatuane la itre aposetolo ngöne lo angatr a iwesitrë göi troa atre ka hape, drei la ka tru e angatr.​—Luka 9:46-48; 22:24-27.

11. Tune kaa la aqane tro sa amamane laka, easa thele tingeting me itre xan?

¹¹ Maine easa troa thele tingeting me itre xan, tha tro kö sa thele iwesitrë me angatr. Loi e tro pe sa iloi me angatr me ithuecatre kowe la itre trejin troa hane iloi me itre xan. (Fil. 4:2, 3; Iako. 3:17, 18) Ketre, nyipiewekë tro sa isa hnying ka hape: ‘Eni kö a thele tingeting me itre xan, ngamaca tha ka hmaloi kö koi ni? Ame la kola akötrë ni hnene la ketre trejin, eni kö a lapa fë trengehni? Eni kö a thele troa canga iloi me angeic maine treqene pena tro angeic a qeje menu koi ni? Ame ngöne la itre ijine jol, eni kö a ithuecatre koi itre xan troa thele tingeting me canga iloi?’

12. Tune kaa la aqane amamane Iesu laka, ka loi hni nyidrë?

¹² Hnei Iesu hna thiina ka menyik me loi hni koi itre xan ngöne la itre ijine jol. (Mat. 11:28-30) Ame la ketre föe ne Kanana a sipo iele Iesu troa aloine la meci ne la nekö i eahlo, hnei nyidrëti hna pane thipetrije la sipo i eahlo. Ngo pine laka, hnei eahlo hna catre lapaun, matre hnei Iesu hna loi hni me aloine la meci ne la nekö i eahlo. (Mat. 15:22-28) Eje hi, ka loi hni Iesu, ame pe, nyidrëti fe a amekötin la itre hnei nyidrëti hna hnim. Ame lo Peteru a sewe Iesu troa kuca la aja i Iehova, hnei Iesu hna ameköti angeic qëmekene la itre xaa aposetolo. (Mar. 8:32, 33) Tha Iesu kö a thele troa thaipië Peteru. Nyidrëti pe a ini angeic me hmekëne la itre xaa aposetolo matre tha tro kö angatr a pi mama. Maine jë, hnei Peteru hna hmahma, ngo ame pe, nyine loi koi angeic.

13. Tune kaa la aqane tro sa loi hni koi itre xan?

¹³ Ame la troa loi hni ke, ene la troa ithanata meköti kowe la itre hne së hna hnim. Tui Iesu, loi e tro sa nyitrepene la itre eamo hnene la Tusi Hmitrötr. Loi e tro fe sa menyik. Ketre, tha tro kö sa thëthëhmin laka, angeic a hnimi Iehova me easë fe. E cili, tro angeic a canga a kapa madrin la eamo. Loi e tro sa isa hnying ka hape: ‘Eni kö a xou troa amekötin la ketre trejin hnenge hna hnim? Tro kö ni a ithanata amenyikene koi angeic maine catre pena? Nemene la kepin matre eni a hamë eamo koi angeic? Eni kö a wesitre koi angeic, maine eni a thele troa xatua angeic?’

14. Tune kaa la aqane amamane Iesu laka, ka thiina ka loi nyidrë?

¹⁴ Atre hnyawa hi Iesu la aliene la thiina cili, nge hnei nyidrëti hna amamane ngöne la mele i nyidrë. Eje hi, tru la ihnimi Iesu kowe la Keme i nyidrë. Celë hi kepin matre hnei nyidrëti palahi hna kuca la loi. Ketre tune fe, maine tro sa hetrenyi la thiina cili, tro hë lai a mama koi itre xan. Ketre, tha tro hmekuje kö sa atre la ka loi, ngo loi e tro fe sa kuca, me hetre nyipi kepin. Maine jë, tro sa hnying ka hape, ‘Ijije kö tro sa kuca la loi ngo tha göi nyipi kepine kö?’ Eje hi. Ame ngöne lo hneijine i Iesu, hnei itre xan hna hamë manie kowe la itre ka pë ewekë. Ngo öni Iesu ka hape, itre ka pi mama angatr. Nyipici, ka loi hi la hnei angatre hna kuca, ame pe, ka gufa koi Iehova.​—Mat. 6:1-4.

15. Tune kaa la aqane tro sa thiina ka loi koi itre xan?

¹⁵ Nyipiewekë troa hetre nyipi kepin matre troa kuca la loi. Celë hi matre, loi e tro sa isa hnying ka hape: ‘Atre hi ni laka, troa  kuca la loi. Ngo hapeu, eni kö a kuca? Nemene la kepin matre eni a kuca la loi?’

16. Nemene la nyine tro sa kuca e nöjei drai, nge pine nemen?

¹⁶ Tha tro kö sa mekune laka, hetrenyi hë së la itre thiina ka hnyipixe thupene la easa xomi bapataiso. Loi e tro palahi sa thupëne la ‘iheetre së ka hnyipixe.’ Eje hi, nyipiewekë tro sa catre amamane la itre thiina i Akötresie. Pine nemen? Pine laka, ame Iehova ke Akötresie ka huliwa catr me trene men. (Gen. 1:2) Celë hi matre, ame la itre igötranene la wene la ua i Akötresie ke kola upi së troa catr huliwa. Hnei Iakobo hna cinyihan ka hape: “Meci hë la lapaun e pëkö huliwa.” (Iako. 2:26) Ketre tune fe, maine tro sa hetrenyi la itre xaa igötranene la thiina i Iehova, tro ha mama laka, kola huliwa ngöne la mele së la uati hmitrötre i Akötresie.

17. Nemene la nyine tro sa kuca e thatreine kö së troa eënyine itre thiina i Akötresie?

¹⁷ Ngacama ekö hë së ngöne la nyipici, ngo thatreine kö së troa eënyine asë la itre thiina i Akötresie. Ame pe, nyipiewekë tro sa catre thel troa eënyine itre thiina cili. Hanawang la ketre ceitun. Maine kola zezenyi la ketre iheetre së, hapeu tro kö sa canga trij? Waea. Tro pe sa cane hmaca me nyihnyawane ej. Ketre tu së fe, tha tro kö sa hnehengazo me kucakuca e tha hne së kö hna thiina ka loi me xomihni me hnime la ketre atr. Loi e tro pe sa qeje menu me thel troa iloi me angeic. Nge nyipiewekë fe troa thupëne la aqane ujë së.

18. Nemene la ka troa xecie koi së?

¹⁸ Tru la hni ne ole së kowe la tulu hna hamën hnei Iesu! Maine tro sa nyitipune la itre mekun me itre thiina i nyidrë, tha jole hë koi së troa xötrethenge la tulu i nyidrë. Nge maine tro sa nyitipu Iesu, tro hë sa heetrëne la itre thiina ka hnyipixe. Ame ngöne la tane mekun celë, hne së hmekuje hi hna ce ithnatane la 4 lao igötranene la wene la ua i Akötresie. Ngo loi e tro sa xomi ijine matre tro sa inine la itre xaa igötranene la wene la ua i Akötresie, me lapa mekun la aqane tro sa amamane la itre thiina cili ngöne la mele së. Hetre ngöne la boroshür, Nyine Thele Mekun Ne La Itretre Anyipici Iehova la itre tane mekun ka qaja la itre thiina cili. Tro jë kowe la “Mele Ne La Keresiano” ngöne la götrane hna hape, “Lapaune koi Iehova.” Haawe, loi e xecie koi së laka, tro Iehova a xatua së e tro sa nue trengecatre matre eënyin me amamane la itre thiina ka hnyipixe ngöne la mele së.