1. Ki biten ki ka aji plis asi pèwsonalité an nou ?

 KI NOU toufré pran lèbatèm, ki sa ja ka fè onpakèt lanné kè nou pran lèbatèm, noutout anvi ni on pèwsonalité ki ka fè Jéova plézi. Pou nou rivé fè sa, fò-nou métrizé sa nou ka pansé. Poukwa ? Pas prèmyé biten ki ka aji asi pèwsonalité an nou sé sa nou ka pansé. Si nou toujou ka sonjé kijan nou pé fè noumenm an nou plézi, nou ké di oben nou ké fè dé biten ki pa bon (Éféz. 4:17-19). Men si nou ka mèt dé bon biten adan lèspri an nou, sa nou ké di é jan-la nou ké aji la ké fè Pap’an nou Jéova plézi (Gal. 5:16).

2. A ki kèsyon nou ké réponn adan awtik-lasa ?

² Kon nou vwè adan awtik a simenn pasé, menmsi nou té’é vé, nou pé pa anpéché tout mové lidé vin an lèspri an nou. Men nou pa oblijé lésé-yo pran lanmen asi nou é fè-nou fè mové biten. Avan nou pran lèbatèm, fò-nou arété di é fò-nou arété fè dé biten kè Jéova pa enmé. Sé prèmyé biten pou nou fè lè nou bizwen woté vyé pèwsonalité-la anlè nou, é sé sa ki pli enpòwtan. Men pou nou fè Jéova plézi a san pou san, fò-nou suiv lòd-lasa osi : « Mété nouvo pèwsonalité-la anlè zòt » (Kol. 3:10). Adan awtik-lasa, nou ké réponn a sé kèsyon-lasa : Ka ki « nouvo pèwsonalité-la » ? Kijan nou pé mété nouvo pèwsonalité-la anlè nou, é ka nou pé fè pou nou pa jen woté-y ?

3. Ka ki « nouvo pèwsonalité-la » é kijan nou pé mété-y anlè nou ? (Galat 5:22, 23).

³ On moun ki ni « nouvo pèwsonalité-la » anlè-y ka imité Jéova. Men pou on moun mèt nouvo pèwsonalité-la anlè-y, fò i fè éfò pou ni sé kalité-la ki adan fwi a lèspri sen a Bondyé (li Galat 5:22, 23). Sa vé di kè moun-lasa ka lésé lèspri sen a Bondyé aji asi jan i ka pansé, asi sa i ka rèsanti é asi jan i ka aji. Pa ègzanp, i enmé Jéova é i enmé sèwvitè a Jéova osi  (Mat. 22:36-39). I toujou ni tchè-kontan menmsi i ka jwenn bon éprèv (Jak 1:2-4). I ka fè tousa i pé pou antann-li byen èvè lézòt (Mat. 5:9). I ni pasyans é i ni bonté (Kol. 3:13). I enmé sa ki byen é sé sa i ka fè osi (Lik 6:35). Anplisdisa, jan-la i ka aji la ka montré kè i ni on fwa ki solid adan Pap’a-y ki an syèl-la (Jak 2:18). Lè on moun vé babyé èvè-y i ka aji èvè dousè, é siwvwè i ka touvé-y douvan on tantasyon, i ni métriz (1 Kor. 9:25, 27 ; Tit 3:2).

4. Pou nou pé sa mèt nouvo pèwsonalité-la anlè nou, poukwa fò-nou travay tout sé kalité-la nou ka touvé an Galat 5:22, 23 é adan dòt pasaj a Labib ?

⁴ Pou nou pé sa mèt nouvo pèwsonalité-la anlè nou, a pa onsèl kalité pou nou travay, men fò-nou travay tout sé kalité-la nou ka touvé an Galat 5:22, 23 é adan dòt pasaj a Labib, é fò-nou travay yotout anmenmtan *. Pa ègzanp, yo ka di kè on moun ni on konplé asi-y si i ni tout pyès a konplé-la asi-y anmenmtan. Menmjan-la osi, on moun pé pa travay onsèl kalité é mèt sélézòt kalité-la akoté, fò i travay tout sé kalité-la anmenmtan. Dayè pou yonn, ni onlo adan sé kalité-lasa ki ka sanm. Pa ègzanp, lèwvwè ou enmé pwochen a-w, ou ka aji èvè pasyans èvè-y é ou ka aji èvè bonté èvè-y. É lè ou vréman enmé sa ki byen *, ou ka aji èvè dousè é ou ka aji èvè métriz osi.

5. Lè on moun ‘ni mantalité a Kris’, ka sa vlé di, é poukwa fò-nou pran tan étidyé vi a Jézi ? (1 Korentyen 2:16).

⁵ (Li 1 Korentyen 2:16.) Pou nou mèt nouvo pèwsonalité-la asi nou, fò-nou ‘ni mantalité a Kris’, kivédi, fò-nou konnèt mantalité a Jézi byen pou nou pé sa imité-y. Adan tousa Jézi ka fè, i ka montré kè i ni sé kalité-la ki adan fwi a lèspri sen a Bondyé é i ka montré sa on mannyè ki pawfè. Tèlman Jézi ka imité kalité a Pap’a-y byen, lè ou ka gadé-y sé konsi sé Pap’a-y ou ka vwè (Ébr. 1:3). Pli mantalité an nou ké sanm ta Jézi, pli nou ké aji kon-y é pli pèwsonalité an nou ké sanm pèwsonalité a-y (Filip. 2:5).

6. Ka pou nou sonjé toupannan nou ka fè éfò pou mèt nouvo pèwsonalité-la anlè nou ?

⁶ Pétèt kè nou ka pansé kè nou pé’é jen rivé suiv ègzanp a Jézi. Kifè, nou ka di an tchè an nou : « Jézi té pawfè men mwen  konm an pa pawfè an pé’é jen rivé fè ègzaktèman kon-y ! » Si sé sa ou ka pansé, mi déotwa ti lidé pou ou sonjé : Prèmyèwman, Jéova kréyé-w pou ou pé sa sanm-li é pou ou pé sa sanm Jézi. Kifè, ou pé chwazi imité-yo menmsi ou pa’a rivé fè sa on mannyè ki pawfè (Jén. 1:26). Dézyèmman, adan linivè pa ni ayen ki pli puisan ki lèspri sen a Bondyé. Sé pousa, grasa lèspri sen a-y, ou pé fè dé biten kè ou pa té’é jen rivé fè tousèl a-w. Twazyèmman, Jéova pa ka atann kè ou montré kè ou ni sé kalité-la ki adan fwi a lèspri sen la on mannyè ki pawfè dépi konnyéla. Dayè, i ké ba moun ki ni lèspwa dè viv si latè pou touttan 1 000 an pou yo vin pawfè (Rév. 20:1-3). Sa Jéova ka mandé-nou jòdijou, sé kè nou ba-y sa nou ni dè méyè toupannan nou ka fè fon asi-y.

7. Ka nou kay ègzaminé alèla ?

⁷ Adan ki domenn an pawtikilyé nou pé imité Jézi ? Nou ké palé tibwen dè 4 kalité ki adan fwi a lèspri sen a Bondyé. Jézi montré kè i té ni sé 4 kalité-lasa é nou ké vwè ka ègzanp a-y ka aprann-nou. Aprésa, nou ké sèvi èvè déotwa kèsyon pou nou vwè ka ki pé édé-nou pou nou abiyé-nou pibyen èvè nouvo pèwsonalité-la.

8. Kijan Jézi montré kè i té ni lanmou ?

⁸ Konm Jézi enmé Jéova toubònman, i fè onlo sakrifis pou Pap’a-y é pou nou osi (Jan 14:31 ; 15:13). Jan-la Jézi viv la lè i té asi latè montré kè i té enmé sé moun-la onlo menm. Touléjou, i té ka fè lézòt dibyen, é i té ka aji èvè konpasyon épi yo menm lèwvwè yo té kont li. Jézi fè onlo biten ki ka montré jan i té enmé sé moun-la. Men yonn adan sé pli bèl biten-la i fè la, sé lè i palé-yo dè wayòm a Bondyé (Lik 4:43, 44). Tèlman i té enmé Bondyé é tèlman i té enmé lézòm, i aksèpté soufè é mò anba men a moun ki té ka fè péché. Grasa sa i fè la, noutout pé ni lavi étèwnèl.

9. Kijan an pé montré kè an ni lanmou kon Jézi ?

⁹ Nou ba Jéova vi an nou é nou pran lèbatèm pas nou enmé Pap’an nou ki an syèl-la. Kon Jézi, fò-nou montré kè nou enmé Jéova. É si nou ka aji byen èvè pwochen an nou, nou ké montré sa on mannyè ki klè. Mi sa lapòt Jan maké : « On moun ki pa enmé frè a-y, kè i ka vwè, pé pa enmé Bondyé, kè i pa ka vwè » (1 Jan 4:20). Alò mi sa pou nou mandé-nou : « Ès an ni onlo lanmou pou sé moun-la ? Ès an ka aji épi konpasyon èvè yo menm lèwvwè yo rèd èvè mwen ? Ès lanmou-la an ni la pou sé moun-la ka pousé-mwen pran adan tan an mwen é adan sa an ni pou édé-yo konnèt Jéova ? Ès an paré a fè sa menmsi lamajorité a sé moun-la pa dakò èvè sa an ka fè la, oben menmsi yo kont mwen ? Ès an pé òwganizé-mwen mwen pé sa pasé plis tan ka préché é plis tan ka anségné sé moun-la ? » (Éféz. 5:15, 16).

10. Kijan Jézi té ka fè ansòt pou lézòt rété anpé ?

¹⁰ Jézi toujou té ka fè ansòt pou lézòt rété anpé. Lè yo té ka fè-y méchansté, i pa té ka rann lèmal pou lèmal. Men a pa sa tousèl i té ka fè. Lè sé moun-la ki té ka kouté-y la pa té dakò antrè yo, i té ka pran douvan pou kalmé sitiyasyon-la é i té ka ankourajé-yo a réglé pwoblèm a yo. Pa ègzanp, i aprann-yo kè si yo té vlé kè Jéova aksèpté sa yo té ka fè pou sèvi-y, fò pa yonn té rété kòlè èvè lòt (Mat. 5:9, 23, 24). É Jézi édé sé apòt-la chanjé mannyè yo té ka rézonné a plizyè rèpriz, pas souvantfwa yo té ka babyé pou sav kilès adan yo ki té pli gran (Lik 9:46-48 ; 22:24-27).

11. Ka an pé fè pou antann-mwen byen èvè lézòt é pou édé lézòt fè menm biten osi ?

¹¹ Fò-nou fè ansòt pou nou pa trapé bab èvè moun, men a pa enki sa pou nou fè. Fò-nou fè éfò pou nou wouvin byen èvè frè é sè an nou, é fò-nou ankourajé-yo fè menm biten lèwvwè yonn trapé on ti bab èvè lòt (Filip. 4:2, 3 ; Jak 3:17, 18). An-nou pozé-nou  sé kèsyon-lasa : « Ki sakrifis an paré a fè pou mwen pé sa wouvin byen èvè frè an mwen oben èvè sè an mwen ? Lèwvwè on frè oben on sè fè-mwen on biten ki fè-mwen mal, ès an ni-y asi tchè ? Ès an ka atann kè moun-lasa vin owa an mwen pou nou fè lapé, oben ès an k’ay owa a-y pou nou fè lapé menmsi pou mwen sé-y ki ni tò ? Ès an ka ankourajé frè é sè an mwen wouvin byen si yonn trapé on ti bab èvè lòt lè an byen plasé pou fè sa ? »

12. Kijan Jézi montré kè i té ni bonté ?

¹² Jézi té janti (Mat. 11:28-30). I montré sa lèwvwè i aji èvè bonté èvè lézòt é lèwvwè i montré-y rézonab menmsi a pa toutlè biten-la té fasil. Pa ègzanp, lè on madanm Fénisyèn sipliyé Jézi pou i té pé sa géri tifi a-y, i pa fè sa madanm-la mandé-y fè odépa. Men lè i vwè jan madanm-la té ni fwa, i désidé géri timoun-la (Mat. 15:22-28). Men a pa paskè Jézi té ni bonté é kè i té janti kè sa té ka anpéché-y ba on moun on konsèy. Okontrè, lè i té ka palé franchman ba moun i té enmé, i té ka fè sa pas i té ni sé kalité-lasa. Pa ègzanp, lèwvwè Pyè éséyé dékourajé Jézi dè fè volonté a Jéova, i woupran-y douvan sélézòt disip-la (Mawk 8:32, 33). Jézi pa té vé fè-y wont men i té vé fòwmé-y. Jézi té vé montré sélézòt disip-la osi kè moun ki ka suiv-li dwètèt soutyenn-li olyé yo anpéché-y fè volonté a Pap’a-y. Pétèt Pyè touvé-y tibwen wont, men sèten sa Jézi di-y la édé-y toubònman.

13. Ni sèwten biten nou pé fè pou montré kè nou ni bonté poudèbon, ki biten ésa ?

¹³ Fò ou aji èvè bonté épi moun ou enmé, é pousa, dépawfwa fò ou ké palé franchman ba yo. Lè ou ka fè sa, fò ou fè kon Jézi, fò ou bazé tousa ou ka di asi prensip ki adan Labib, é fò ou fè sa èvè onlo jantiyès. Avan ou ay vwè moun-la, fò ou mèt fon an tèt a-w kè moun-lasa enmé Jéova, kè i enmé-w, é kè i anvi fè sa ki byen. Kifè, moun-lasa ké aksèpté konsèy-la ou ka ba-y la pas ou ké fè sa èvè onlo lanmou. Mi sa pou ou mandé-w : « Lè on bon moun an mwen ka fè on mové biten, ès an ka pran kouraj an mwen a 2 men pou an ay di-y sa ? Si i mérité on konsèy, ès an ké ba-y li on mannyè ki rèd oben ès an ké di-y sa èvè onlo jantiyès ? Poukwa an vé ba-y konsèy-lasa ? Ès sé pas moun-lasa ka égri-mwen oben ès sé pas an vlé édé-y ? »

14. Kijan Jézi montré kè i té ni lanmou pou sa ki byen ?

¹⁴ Jézi té sav sa ki byen, é sé sa i té ka fè. Konm i té enmé Pap’a-y, i toujou té ka fè sa ki byen, é lè i té ka fè sa, i té sensè. Lè on moun enmé sa ki byen, yo ka vwè sa pas sa ka pousé-y fè lézòt dibyen. Apatoudi konnèt sa ki byen, men fò-nou fè-y, é fò-nou fè sa èvè tout tchè an nou. Pétèt nou ka mandé-nou : « Men kijan on moun pé fè sa ki byen alòskè sé on mové rézon ki ka pousé-y fè sa ? » Ében malérèzman sa pé rivé, pas pa ègzanp, an tan a Jézi, sèwten moun té ka ba sé maléré-la déotwa biten, men yo té ka fè sa pou toutmoun vwè-yo. Pétèt nou té’é pé di kè sa yo té ka fè la té byen, men pou Jéova, sa pa té ni pon valè (Mat. 6:1-4).

15. Kijan nou pé montré kè nou vréman enmé sa ki byen ?

¹⁵ Nou pé montré kè nou vréman enmé sa ki byen si nou ka fè sa ki byen menmsi nou pa ni pon entéré adan sa. Mi sa pou ou mandé-w : « Sé vré an konnèt kijan mwen fè sa ki byen, men ès an ka fè-y ? Lè an ka fè on biten ki byen, ka ki ka pousé-mwen fè sa ? »

16. Ka pou nou fè touléjou, é poukwa fò-nou fè sa ?

¹⁶ Fò pa nou mèt an tèt an nou kè dépi nou pran lèbatèm nou ni nouvo pèwsonalité-la asi nou, é nou pé rété la alawoulib-lébwa-kwazé. Fò-nou fè éfò.  Nouvo pèwsonalité-la ka touvé-y kon on bèl « lenj » ki nèf é fò-nou pran prékosyon èvè-y. On mannyè nou pé fè sa, sé lèwvwè nou ka chèché diféran lokazyon pou nou montré kè nou ni sé kalité-la ki adan fwi a lèspri sen a Bondyé touléjou. Poukwa ? Pas pli nou ka fè éfò pou nou ni sé kalité-la ki adan fwi a lèspri sen a Bondyé, pli lèspri sen a Bondyé ké édé-nou. Sa posib pas Jéova ka sèvi èvè lèspri sen a-y pou fè onlo biten (Jén. 1:2). Sa vé di kè sa nou ka fè ni onlo valè. Pa ègzanp, mi sa Jak, on disip a Jézi maké : « Si lafwa pa ni aksyon ki k’ay èvè-y, i mò » (Jak 2:26). Nou pé di menm biten-la pou tout sélézòt kalité-la ki adan fwi a lèspri sen a Bondyé.

17. Lèwvwè nou pa’a rivé montré kè nou ni sé kalité-la ki adan fwi a lèspri sen a Bondyé, kijan pou nou réyaji ?

¹⁷ Menmsi sa ja ka fè on bèl moman kè on frè oben on sè pran lèbatèm, sa pé rivé kè i pa aji èvè sé kalité-la ki adan fwi a lèspri sen a Bondyé. Men fò pa sa kasé 2 bra a-y, pas sa ki pli enpòwtan sé kè i kontinyé travay sé kalité-lasa. An-nou pran on ègzanp : Imajiné ou mèt lenj-la ou pli enmé la asi-w, é lèwgadé ou ka pasé on koté é on biten ka chiré lenj-la. Ès lè ou ké woté-y asi-w, ou ké mété-y an poubèl-la tousuit ? Awa, okontrè, sèten ou ké chèché on mwayen pou ranjé lenj-lasa é pwochen kou ou ké pran plis prékosyon pou ayen pa rivé lenj a-w. Menmjan-la osi, siwvwè on jou ou pa aji èvè bonté, oben èvè pasyans, oben kè ou pa aji èvè lanmou épi on moun, fò pa sa dékourajé-w. Siwvwè ou ka mandé moun-lasa padon é kè ou sensè lèwvwè ou ka fè sa, sa ké édé-w wouvin byen èvè moun-lasa. É fò ou byen désidé aji myé ki sa pwochen kou.

18. Dè ki biten nou pé sèten ?

¹⁸ A pa ti kontan nou kontan bèl ègzanp-la Jézi lésé pou nou la ! Pli nou ké fè éfò pou nou ni menm mantalité ki-y, pli nou ké rivé aji kon-y, é pli sa ké fasil pou nou dè fè sa. Anplisdisa, pli nou ké aji kon li, é pli nou ké rivé mèt nouvo pèwsonalité-la anlè nou. Adan awtik-lasa, nou vwè 4 kalité ki adan fwi a lèspri sen a Bondyé. Sa té’é byen si ou té ka pran on ti tan pou étidyé dòt kalité ki adan fwi a lèsprisen a Bondyé é si ou té ka réfléchi pou ou vwè si ou ka montré kè ou ni sé kalité-lasa. Pou édé-w, ou pé sèvi èvè awtik ki adan Guide de recherche pour les Témoins de Jéhovah. Ay adan « Mode de vie chrétien », é aprésa ay adan « Fruit de l’esprit ». Si ou ka fè tousa ou pé pou mèt nouvo pèwsonalité-la anlè-w é pou ou pa jen woté-y, ou pé sèten kè Jéova ké édé-w.