1. Kisa ki ka fè sa nou ka divini ?

 KI NOU fin batizé ouben ki nou batizé dipi patché lannen, nou tout lé gen roun pèrsonalité Jéova kontan. Pou nou rivé fè sa, nou divèt kontrolé sa nou ka mété annan nou lèspri. Poukisa ? Paské sa nou ka mété annan nou lèspri, a sa ki ka fè sa nou ka divini. Si sa nou ka sonjé, a toujou fè nou kò plézi, nou ké di ké fè mové bagaj (Éph. 4:17-19). Mé si nou ka mété nou lidé asou bon bagaj, sa ké pi fasil pou nou di ké fè bagaj ki ka fè nou Papa Jéova plézi (Gal. 5:16).

2. Ki késyon nou ké réponn annan sa artik-a ?

² Kou nou wè l’ annan ròt artik-a, a pa tout tan nou pouvé anpéché mové lidé vini annan nou lèspri. Mé nou pouvé désidé pa fè sa nou lidé ka di nou fè. Anvan nou batizé, nou divèt arété di ké fè bagaj Jéova rayi. A prémyé bagaj pou to fè é a sa ki pi enpòrtan lò to lé tiré vyé pèrsonalité-a. Mé pou nou vréman fè Jéova plézi, nou divèt obéyi sa koumannman-an osi : « A pou zòt abiyé ké nouvo pèrsonalité-a » (Col. 3:10). Annan sa artik-a, nou ké réponn sa késyon-yan : A kisa ki « nouvo pèrsonalité-a » ? Kouman nou pouvé mété nouvo pèrsonalité-a é pa janmen tiré l’ ?

3. A kisa ki nouvo pèrsonalité-a, é kouman roun moun ka abiyé ké li ? (Galates 5:22, 23).

³ Roun moun ki gen nouvo pèrsonalité-a ka imité Jéova. Roun krétyen ka abiyé ké nouvo pèrsonalité-a lò i ka montré ki i gen kalité frwi lèspri sen-an ka bay  (li Galates 5:22, 23). Sa lé di ki i ka lésé lèspri sen-an aji asou sa i ka pansé, sa i ka rousanti ké sa i ka fè. Parèkzanp, i kontan Jéova ké sa-ya ki ka adoré l’ (Mat. 22:36-39). Roun moun konsa toujou kontan menm lò i gen problèm (Jacq. 1:2-4). I ka chaché fè lapè ké ròt moun (Mat. 5:9). I gen pasyans é i janti ké ròt-ya (Col. 3:12, 13). I kontan sa ki drèt é i ka fè sa ki drèt (Luc 6:35). Asou fason i ka fè, i ka montré ki lafwa i gen annan so Papa ki annan syèl-a, fò (Jacq. 2:18). I ka rété dous lò moun lé fè li faché é i ka kontrolé so kò lò i douvan tantasyon (1 Cor. 9:25, 27 ; Tite 3:2).

4. Poukisa nou divèt chaché gen tout kalité-ya ki annan Galates 5:22, 23 an menm tan pou nou mété nouvo pèrsonalité-a ?

⁴ Pou nou mété nouvo pèrsonalité-a, nou divèt chaché gen tout kalité-ya ki annan Galates 5:22, 23 ké sa-ya ki annan ròt vèrsé *. Sa kalité-ya, a kousidiré a té roun konplè : to pa ka mété roun parti annan konplè-a san to pa mété ròt-ya osi an menm tan, sinon a pa roun konplè ankò. A menm bagaj-a pou sa kalité-ya. Anfèt nou ka jwenn roun ran annan sa kalité-ya annan ròt kalité osi. Parèkzanp, si to vréman kontan to konpanyen, to ké pran pasyans ké li é to ké janti ké li. É lò to ka montré vré bonté-a (sa lé di si to kontan sa ki byen *), to ka aji ké dousèr é to ka kontrolé to kò.

5. Kisa sa lé di gen ‘mantalité Kris-a’, é poukisa nou divèt étidyé lavi Jézi ? (1 Corinthiens 2:16).

⁵ (Li 1 Corinthiens 2:16.) Pou nou mété nouvo pèrsonalité-a, nou divèt gen ‘mantalité Kris-a’. Sa lé di ki nou divèt byen konnèt kouman Jézi ka réfléchi épi fè kou li. Jézi ka montré frwi lèspri sen-an roun fason ki parfè. Kou roun mirwè ki parfè, i ka byen montré kalité Jéova-ya (Héb. 1:3). Pi nou ké réfléchi kou Jézi, pi nou ké aji kou li é pi nou ké rivé gen menm pèrsonalité-a (Phil. 2:5).

6. Kisa nou pa divèt bliyé lò nou ka éséyé mété nouvo pèrsonalité-a ?

⁶ Ès nou pouvé vréman swiv èkzanp Jézi ? Pitèt nou ka di : « Jézi parfè ! Mo  pa ké janmen rivé fè kou li parfètman ! » Si a sa to ka rousanti, sonjé sa : Prémyèrman, to fèt pou to sanblé Jéova ké Jézi. Donk to pouvé chwazi imité yé é to pouvé rivé fè l’ menm roun tibi (Gen. 1:26). Dézyèmman, lèspri sen Bondjé-a, a li ki pi pwisan annan tout inivèr-a. I pouvé idé to fè bagaj to pa té ké janmen rivé fè to rounso. Trwazyèmman, Jéova pa ka doumandé to gen tout kalité ki annan frwi lèspri sen-an roun fason ki parfè dipi aprézan. I prévwè 1 000 lannen pou sa-ya ki gen èspwar viv asou latè-a divini parfè (Rév. 20:1-3). Sa Jéova ka doumandé nou aprézan, a fè tousa nou pouvé é konté asou li pou nou rivé fè sa.

7. Kisa nou ké wè aprézan ?

⁷ Kouman nou pouvé imité Jézi ? Nou ké wè kat kalité lèspri sen-an ka bay. Chak fwa, nou ké wè sa nou pouvé anprann asou fason Jézi montré sa kalité-ya. É gras a plizyèr késyon, nou ké wè si nou ka rivé mété nouvo pèrsonalité-a ankò pi byen.

8. Kouman Jézi montré so lanmou ?

⁸ Kou Jézi kontan Jéova bokou, i fè sakrifis pou so Papa Jéova ké pou nou osi (Jean 14:31 ; 15:13). Asou fason i viv asou latè-a, Jézi montré kouman i té kontan moun-yan bokou. Touléjou i té ka montré ki i té plen ké lanmou ké konpasyon menm lò moun té kont li. Pi bèl fason i montré ki i té kontan moun-yan, a lò i palé yé di rwayonm Bondjé-a (Luc 4:43, 44). Jézi montré osi kouman i té kontan Bondjé ké moun-yan lò i asèpté soufri é lò i asèpté moun ki té péchèr tchwé li. A konsa, i louvri chimen-an pou nou tout gen lavi pou tout-tan.

9. Kouman nou pouvé montré menm kalité lanmou Jézi té gen ?

⁹ Nou vouwé nou lavi pou Jéova é nou batizé paské nou kontan nou Papa ki annan syèl-a. Donk kou Jézi fè l’, nou divèt montré nou lanmou pou Jéova asou fason nou ka aji ké ròt-ya. Apot Jan ékri : « Sa-la ki pa kontan so frè i ka wè pa pouvé kontan Bondjé i pa pouvé wè » (1 Jean 4:20). Nou pouvé doumandé nou kò : « Ès mo ka fè tousa mo pouvé pou kontan moun-yan bokou ? Ès mo ka aji ké konpasyon ké yé, menm lò yé pa janti ké mo ? Ès mo ka sèrvi mo tan ké tousa mo gen pou idé ròt-ya anprann konnèt Jéova paské mo kontan yé ? Ès mo paré pou fè sa, menm si près yé tout pa gen rékonésans pou éfòr mo ka fè ouben yé kont mo ? Ès mo pouvé trouvé roun mwayen pou mo pasé plis tan annan travay prédikasyon-an ké ansèyman-an ? » (Éph. 5:15, 16).

10. Kouman Jézi té ka chaché fè lapè ?

¹⁰ Jézi té sa roun moun ki té ka chaché fè lapè. Lò roun moun té ka fè li méchansté, i pa té ka randé. Mé i té ka fè plis ki sa. I té ka pran douvan pou fè lapè é i té ka ankourajé ròt-ya ranjé problèm yé té gen. Parèkzanp, i anprann yé ki yé té divèt fè lapè ké yé frè si yé té lé Jéova asèpté yé ladorasyon (Mat. 5:9, 23, 24). É i té toujou dèyè so apot pou idé yé. Lò apot-ya babyé plizyèr fwa pou savé kilès ki té pi gran, Jézi idé yé pou yé té chanjé fason yé té ka pansé (Luc 9:46-48 ; 22:24-27).

11. Kouman nou pouvé chaché fè lapè ké ròt-ya ?

¹¹ Si nou sa roun moun ki ka chaché fè lapè, a vré ki nou pa ka chaché problèm ké pyès moun, mé nou divèt fè plis ki sa. A pou nou toujou pran douvan pou fè  lapè, épi ankourajé nou frè ké sò-ya ranjé problèm yé gen ké yé konpanyen (Phil. 4:2, 3 ; Jacq. 3:17, 18). Annou doumandé nou kò : « Kisa mo paré pédi pou fè lapè ké ròt-ya ? Lò roun frè ouben roun sò ka fè mo lapenn, ès mo ka tchenbé l’ asou mo tchò ? Ès mo ka antann i vini wè mo pou fè lapè, ouben ès mo ka pran douvan pou alé wè moun-an menm si mo ka pansé ki a akoz di li tout bagaj koumansé ? Lò mo byen plasé pou fè sa, ès mo ka ankourajé sa-ya ki faché fè lapè ? »

12. Kouman Jézi montré i té bon ?

¹² Jézi té bon (Mat. 11:28-30). I montré i té bon lò i rété janti ké rézonab memn lò sitiasyon-an té rèd. Parèkzanp, lò roun madanm Fénisi sipliyé l’ pou i géri so tifi, i palé jantiman ké li. O koumansman, Jézi pa asèpté fè sa madanm-an té ka doumandé l’. Mé lò i wè kouman i té gen lafwa, i géri so pitit (Mat. 15:22-28). Menm si Jézi té bon, sa pa anpéché l’ di sa i té gen pou di. Pas i té bon, détan i palé franchman ké sa-ya i té kontan. Parèkzanp, lò Pyèr éséyé anpéché Jézi fè volonté Jéova, i rouprann li douvan tout ròt disip-ya (Marc 8:32, 33). I pa fè sa pou fè Pyèr ronté, mé a té pou fòrmé l’ é pou montré ròt disip-ya ki yé té divèt rété a yé plas. Pyèr té divèt jennen, mé sa disiplin-an idé li.

13. Kouman nou pouvé vréman janti ?

¹³ Pou to vréman bon ké sa-ya to kontan, détan to divèt palé franchman ké yé. Lò to ka fè sa, fè kou Jézi. Konsèy to ka bay divèt apiyé asou prensip ki annan Labib-a. A pou to janti. To pa divèt di annan to tchò ki moun-an pa lé fè sa ki byen. A pou to sir ki roun krétyen ki kontan Jéova é ki kontan to ké byen réyaji lò to ké bay li roun konsèy ki plen ké lanmou. Doumandé to kò : « Lò mo ka wè roun moun mo kontan ki ka fè roun bagaj ki pa bon, ès mo gen kouraj alé palé pou li ? Si mo divèt bay roun konsèy, ès mo ka fè l’ jantiman ouben ès mo ka palé rèd ké moun-an ? Kisa ki ka pousé mo bay roun konsèy ? Ès a paské sa moun-an fè mo faché ouben ès a paské mo lé idé l’ ? »

14. Kouman Jézi ka montré ki i kontan sa ki byen ?

¹⁴ Jézi savé sa ki bon, mé i ka fè l’ osi. Kou i kontan so Papa, i toujou ka fè bon bagaj é i ka fè l’ ké bon lentansyon. Roun moun ki kontan fè sa ki byen toujou ka chaché mwayen pou idé ròt-ya é i ka fè bon bagaj pou yé. A pa loutou di savé sa ki byen. A fè sa ki byen ké bon lentansyon ki tout. Pitèt nou pouvé doumandé nou kò : « Ès sa posib fè bon bagaj ké mové lidé annan nou tèt ? » Malérèzman sa pouvé rivé. Parèkzanp, annan lépòk Jézi, roun ran té ka idé maléré-ya, mé yé té ka byen fè tousa ki fo pou tout moun té savé sa. Mé sa yé té ka fè ki té byen swadizan pa té gen pyès valò pou Jéova (Mat. 6:1-4).

15. Kouman nou pouvé montré ki nou vréman kontan sa ki byen ?

¹⁵ A sèlman si nou ka fè bon bagaj ké bon lentansyon nou pouvé vréman bon. Alòr doumandé to kò : « Anplis di savé kouman fè sa ki byen, ès mo ka fè sa ki byen ? Kisa ki ka pousé mo fè bon bagaj ? »

16. Kisa nou divèt fè chak jou, é poukisa ?

¹⁶ Lò nou batizé, nou pa divèt krè ki nou pa gen pyès éfòr pou fè ankò  pou abiyé ké nouvo pèrsonalité-a. Nou toujou divèt protéjé nou bèl « lenj » pou i rété nòv ké bèl. Roun fason nou pouvé fè sa, a lò nou ka chaché mwayen pou nou montré chak jou kalité lèspri sen-an ka bay. Poukisa ? Paské Jéova sa roun Bondjé ki ka aji é so lèspri sa roun fòrs ki ka aji osi (Gen. 1:2). Donk, chak kalité annan frwi lèspri-a pouvé fè nou aji é divèt fè nou aji. Disip Jak ékri : « Si roun moun pa ka fè anyen pou montré i gen lafwa, so lafwa mouri » (Jacq. 2:26). A menm bagaj-a pou tout ròt kalité-ya annan frwi lèspri sen-an. Chak fwa nou ka aji ké kalité ki annan frwi lèspri-a, nou ka montré ki sa lèspri-a ka aji asou nou.

17. Kouman nou divèt réyaji lò nou pa ka rivé aji ké kalité frwi lèspri sen-an ?

¹⁷ Menm roun krétyen ki ja batizé dipi nanninannan, a pa tout tan i ké rivé aji ké kalité frwi lèspri sen-an. Mé sa ki pi enpòrtan-an, a di pa lésé tonbé. Annou pran roun èkzanp : Si san to pa fè parèsprè to ka déchiré to lenj to pi kontan-an, ès to ké jité l’ lanmenm ? Non. To ké pitèt éséyé koud li é apré sa to ké fè ankò pi atansyon ké sa lenj-a. Menm fason-an, si roun jou to pa janti, to pa pasyan ouben to pa ka aji ké lanmou ké roun moun, a pa pou to dékourajé. Si to ka doumandé pardon ké tout to tchò, sa ké pouvé ranjé bagaj-ya é sa ké pèrmèt to viré byen ké moun to fè lapenn-an. Pou fini, a pou to byen désidé fè pi byen prochen kou-a.

18. Di kisa nou pouvé sir ?

¹⁸ Nou byen kontan Jézi bay nou roun bèl èkzanp konsa ! Pi nou ké fè tousa nou pouvé pou réfléchi kou li, pi sa ké pi fasil pou nou aji kou li. É pi nou ké aji kou li, pi nou ké abiyé ké nouvo pèrsonalité-a pi byen. Annan sa artik-a, nou wè kat kalité annan frwi lèspri-a rounso. Sa to ka di ? Ès sa pa té ké byen si to té ka pran tan pou étidyé ròt kalité ankò, épi réfléchi asou fason to ka aji dapré sa kalité-ya ? To ké trouvé roun lis artik asou sa sijè-a annan Guide de recherche pour les Témoins de Jéhovah anba « Mode de vie chrétien », é apré « Fruit de l’esprit ». Si to ka fè tousa to pouvé, to pouvé sir ki Jéova ké idé to mété nouvo pèrsonalité-a épi pa janmen tiré l’.