1. Amchea sobhavacher kiteacho chodd probhav poddtta?

 AMI halinch bautizm ghetla zait vo bautizm gheun amkam khub vorsam zaleant zait. Punn ami soglim Jehovak zai toslim munxam zaunk sodhtat. Oxem korunk ami amchea chintpacher tabo dovrunk zai. Karonn amchea chintnancho amchea sobhavacher probhav poddtta. Tor ami amchea kuddichea vondovnnea pormonnem kam korunk chintʼtat zalear ami vaitt utram ulounk ani vaitt kamam korunk pavtolim. (Ef. 4:17-19) Punn ami borem tem korunk chintʼtat zalear amchim utram ani kornneo chodd korun, amcho Bap Jehovak manvota toslim astolim.—Gal. 5:16.

2. Hea lekhant ami khoinchea prosnanche zobab polloitolim?

² Ami fattlea lekhant polloilʼlem toxem amchea monant ietat tim vaitt chintnam ami purnn toren addaunk xokonant. Punn tea chintpa pormonnem ami vagtolim kai na tem ami tharaunk zata. Tor hea pasot, bautizm gheunchea poilim Jehova dves korta teo sogleo vostu ami pois korunk zai. Ani porno sobhav soddun diunk hem poilem ani mhotvachem pavl zaun asa. Tor purnn toren Jehovak manvota tem korunk ami hi adnea pallunk zai: ‘Tumi novea munxacho akar gheiat.’ (Kol. 3:9) Tor hea lekhant ami hea prosnanche zobab polloitolim: ‘Novo sobhav’ mhunnttlear kitem? Novo sobhav apnnaunk ani to soddun dina zaunk ami kitem korunk zai?

3. Galasiekarank 5:22, 23-a pormonnem, ‘novo sobhav’ mhunnttlear kitem, ani ho sobhav ek munis aplea jivitant koso dakhoun dita?

³ ‘Novo sobhav’ aslolo munis Jehovachi dekh gheta. Tem mhunnttlear, to aplea chintnancher, bhavnancher ani  vagnnukecher Jehovache povitr xoktek kam korunk dita. Ani aplea jivitant Devachea povitr xokteche gunn dakhoun dita. (Galasiekarank 5:22, 23 vachat.) Zoxem, to Jehova ani tachea lokancho mog korta. (Mt. 22:36-39) Tacher oddchonneo ietat tednam pasun to apli khuxalkai samballtta. (Jak. 1:2-4) To ek xanti korpi munis asta. (Mt. 5:9) Dusream sangata to pasiensan ani doiallaien vagta. (Kol. 3:13) To boreponnacho mog korta ani sodanch borem tem korunk fuddem sorta. (Lukas 6:34) Aplea kornneamnim taka aplea sorginchea Bapacher ghott bhavarth asa mhunn to dakhoita. (Jak. 2:18) Dusreamnim taka rag haddlear pasun to dulobaien vagta. Ani taka tallnneo ietat tednam to svotacher tabo dovorta.—1 Kor. 9:25, 27; Titak 3:2.

4. Ami novo sobhav apnnaitolim zalear, Galasiekarank 5:22, 23-ant sanglole sogle gunn ani Bible-antlea her versamnim sanglole gunn ami vaddovop kiteak gorjechem?

⁴ Tor ami ‘novo sobhav’ apnnaitolim zalear, Galasiekarank 5:22, 23-ant sanglole sogle gunn ani Bible-antlea her versamnim sanglole gunn ami vaddounk zai. * He gunn ami ek-ek korun ghaltat toslea veg-vegllea kopddeam bhaxen nhoi. Punn te gunn eka-mekak mellon asat. Udharonnak, ami amchea xezareancho khoreanich mog kortat zalear ami tanche lagim pasiensan ani doiall toren vagtolim. Toxench, ami khoreanich borem korunk sodhtat zalear ami dulob astolim ani svotacher tabo dovortolim.

5. “Kristachem mon” asop mhunnttlear kitem, ani ami Jezu vixim kiteak xikonk zai? (1 Korintkarank 2:16)

⁵ 1 Korintkarank 2:16 vachat. Novo sobhav apnnaunk amkam “Kristachem mon” asonk zai. Tem mhunnttlear, ami Jezuchem chintop apnnaunk xikonk zai ani tachi dekh gheunk zai. Povitr xokti utpon korta te gunn Jezun poripurnn toren dakhoile. Eka arxeant amchem tondd sarkem dixtti poddtta toxem, ami Jezuchem jivit polloitat tednam Jehovache gunn amkam sarke dison ietat. (Heb. 1:3) Tor jitlim chodd ami Jezu bhaxen chintʼtat titlinch chodd ami tache bhaxen vagonk pavtolim. Ani hea vorvim ami tacho sobhav apnnaunk pavtolim.—Filp. 2:5.

6. Ami novo sobhav apnnaunk proitn kortat tednam kitem ugddas dovrunk zai?

⁶ Punn ami ghoddie chintunk puro: ‘Jezu tor poripurnn aslo. Hanv Jezu bhaxen kednanch zaunk pavchona!’ Tor ami Jezuchi dekh gheun novo sobhav apnnaunk zatolo kai na mhunn dubhavtat zalear, heo tin vostu ugddas dovrunk zai. Poilem, ami Jehova ani Jezuchi dekh  gheunk zata, tea bhaxen amkam rochleant. Tor ami tanchi dekh gheunk proitn kelo zalear, purnn toren nhoi punn ami thoddi-bhov tori tanchi dekh gheunk pavtolim. (Ut. 1:26) Dusrem, vixvantlea khoinchea-i xokte poros, Devachi povitr xokti bollixtt asa. Ani amchean korunk zaina tem korunk ti xokti amkam modot korunk xokta. Tisrem, Jehovachea povitr xokteche gunn ami atanch purnn toren dakhounche mhunn Jehova sangona. Punn hea prithumer jieunk bhorvonso asa tankam fuddarak Jehova Devan poripunn zaunk 1,000 vorsam dovorleant. (Prok. 20:1-3) Tor novo sobhav apnnaunk amchean zata tem soglem korop ani modoti pasot tacher ami patieun ravop, Jehovak zai.

7. Atam ami kitem pollounchim asat?

⁷ Atam, ami povitr xoktechea char gunnancher dhean dium-ia. Oxem kortana, Jezun te gunn aplea jivitant koxe dakhoile ani ami tachea thaun kitem xikonk zata tem polloum-ia. Toxench, ami apnnaitat to novo sobhav soddun dina zaunk modot kortole, tosle thodde prosn pasun ami polloum-ia.

8. Jezun mog koso dakhoilo?

⁸ Jezun Devacho itlo mog kelo ki tannem aplea Bapai pasot ani munxakulla pasot zaite teag kele. (Juanv 14:31; 15:13) Ani prithumer ailea uprant to aplem jivit koso jielo tantuntlean tannem hem dakhoun dilem. Tannem sodanch sogleank ani apleak virodh kortoleank pasun mog ani doia-maia dakhoili. Toxench, lokank Devachea Rajea vixim xikoun ek mhotvache vatten tannem tankam mog dakhoilo. (Lukas 4:43, 44) Tea bhair, to tras sosun patki munxanchea hatamnim moronk pasun toiar zalo. Ani hea ritin, svotacho teag korun to Devacho ani munxakullacho kitlo mog korta tem tannem dakhoun dilem. Oxem kelolean tannem amkam sogleank sasnachem jivit zoddunk ek vatt ukti keli.

9. Jezuchi dekh gheun ami mog koso dakhounk zata?

⁹ Ami somorponn korun bautizm ghetlo tednam ami Jehovacho kitlo mog kortat tem ami dakhoun dilem. Toxench, Jezu bhaxen ami lokam sangata koxem vagtat tachea voilean ami Jehovacho kitlo mog kortat tem ami dakhoun ditat. Karonn apostl Juanvan oxem boroilem: “Apunn dekhtat tea bhavacho vo bhoinnicho tim mog korinant zalear, apnnem polleunk na tea Devacho koxim mhonn tim mog kortolim?” (1 Juanv 4:20) Tor ami amkanch he prosn vicharunk zatat: ‘Hanv lokancho khoreanich mog korta kai? Tim mhojea sangata bore toren vagonant zalear pasun, hanv tankam doia-maia dakhoita kai? Lokancho mog korta dekhun tankam Jehova vixim xikounk mhozo vell ani mhojea lagim asat teo vostu uzar korunk hanv toiar asa kai? Ani choddxim zannam mhojea hea vavracho valor korinant vo virodh kortat zalear pasun, oxem korit ravonk hanv toiar asa kai? Xis korchea kamant chodd vell sarunk hanvem anik vatto sodhun kaddunk zatat kai?’—Ef. 5:15, 16.

10. Jezu xanti korpi aslo mhunn ami kiteak mhunnonk zata?

¹⁰ Jezu ek xanti korpi munis aslo. Lok tachea sangata vaitt toren vagtalo tednam to vaittak vaittan farik korinaslo. Punn to apunn zaun xanti korunk fuddem sortalo, ani dusreankui tanche vad-vivad bond korun xanti korunk urba ditalo. Udharonnak, amchi bhokti Jehova Devak manvota tosli asonk zai zalear ami amchea bhav-bhoinnam sangata xanti korunk zai mhunn tannem lokank xikoilem. (Mt. 5:9, 23, 24) Toxench, tache xis apnna modem konn vhodd zait mhunn vad-vivad kortale tednam, Jezun porot-porot tankam te vad-vivad bond korunk, ani tanchea modem xanti samballunk modot keli.—Lukas 9:46-48; 22:24-27.

11. Ami xanti korpi koxim zaunk xoktat?

¹¹ Ami xanti korpi zaunk zai zalear ami zhogddim korchimnant tem khorem. Punn zhogddim zatat tednam xanti korunk pasun ami poilem pavl ghetolim. Toxench, bhav-bhoinnam modem vad-vivad zatat tednam te bond korun xanti korunk ami tankam urba ditolim. (Filp. 4:2, 3; Jak. 3:17, 18) Hea vixim ami amkanch  he prosn vicharunk zatat: ‘Xanti korunk hanv kitem pasun korunk toiar asa? Ek bhav vo bhoinn mhaka dukhoita tednam hanv rag dhorun ravta kai? Dusrim ieun mhoje lagim xanti kortolim mhunn hanv ravta kai, vo chuk tanchi oxem mhaka dista zalear pasun xanti korunk hanv poilem pavl gheta? Hanvem uloilʼlem sarkem zatolem zalear, konnachea-i modem vad-vivad zata tednam hanv tankam xanti korunk urba dita kai?’

12. Jezun dusreank doia koxi dakhoili?

¹² Jezu khub doiall aslo. (Mt. 11:28-30) To dusream sangata bore toren vagtalo ani kotthin porisithitint pasun somjikai dakhoitalo. Udharonnak, Kanaanchi ek bail tache lagim aple dhuvek bori kor mhunn sangonk aili tednam tannem poilem tichem aikon gheunk na. Punn uprant, tika kitlo bhavarth aslo tem polloun tannem tika doia dakhoili ani tiche dhuvek bori keli. (Mt. 15:22-28) Jezu doiall aslo tem khorem. Punn to dusreank, ani apunn mog kortalo tankam pasun goroz tednam solʼlo diunk fattim soronk na. Zoxem, ek pavtt Pedru taka Jehovachi khuxi korunk addaunk sodhtalo tednam Jezun taka sogleam xisam hujir tachi chuk dakhoun dili. (Marku 8:32, 33) Tannem Pedruk loz korunk oxem korunk na. Punn konnem-i aplea odhikara bhair voichem nhoi mhunn to Pedruk ani her xisank xittkaunk sodhtalo. Pedruk sogleam hujir loz zali tem khorem, punn Jezuchea hea solʼleantlean taka khub faido zalo.

13. Ami dusreank doia koxi dakhounk zata?

¹³ Ami dusreank doia dakhoitolim zalear, thodde pavtti ami tankam solʼlo diunk poddot. Tea vellar Jezuchi dekh gheun, Devachea Utrantlean ami tankam mogan solʼlo diunk zai. Oxem kortana, tim sarkem asa tench korunk sodhtat mhunn khatri dovrat. Tim Jehovacho ani tumcho mog kortat dekhun tumi mogan dilʼlo solʼlo tim apnnaitolim mhunn visvas dovrat. Ani tumkanch he prosn vicharat: ‘Hanv mog korta to munis chukta tednam taka solʼlo diunk mhaka dhir asa kai? Taka solʼlo diunk poddttach zalear, hanv tache lagim doiall toren uloita vo ragan uloita? Hanv taka kitea pasot solʼlo dita? Hanv tacher ragar asa mhunn vo taka modot korunk sodhta mhunn?’

14. Jezun borem tem koxem kelem?

¹⁴ Jezu borem kitem tem zannam aslo ani tem korunk pasun to fuddem sortalo. Ani to aplea Bapaicho khub mog korta dekhun, to sarko irado dovrun sarkem tench korta. Borem korunk sodhta to munis dusreank modot korunk vatto sodhta ani to dusreank sodanch borem korta. Punn oxem kortana amcho irado sarko asonk zai. Tor borem korpa fattlean chukicho irado asonk xokta kai? Hem zannam zaunk Jezun kitem sanglolem tem ugddas korat. Thoddim zannam goribank modot kortat, punn tim dusreank dakhounk ani apnnank vakhannʼnni mellonk oxem kortat mhunn Jezun sanglem. Tor tim dusreank borem kortat zalear pasun Jehovak tem manvona, karonn tancho irado chukicho asa.—Mt. 6:1-4.

15. Ami kednam khoreanich borem korunk pavtolim?

¹⁵ Borem korpa fattlean amcho irado chukicho na zalear, ami khoreanich borem korunk pavtolim. Tor ami amkanch vicharunk zata: ‘Borem korchea vixim hanv fokot chintʼtam kai vo tem korunk fuddem sorta? Borem tem korunk mhozo irado kitem?’

16. Ami dor disa kitem korunk zai, ani kiteak?

¹⁶ Bautizm ghetlea uprant, ami ‘novo sobhav’ apnnailo ani atam fuddem kainch korchi goroz na, oxem ami chintchem nhoi. Punn ami nove kopdde bore toren samballun dovortat teach bhaxen ami amcho novo sobhav bore toren samballunk zai. Oxem korunk ek vatt mhunnttlear, ami dor disa, Jehovache povitr xokteche gunn amchea jivitant dakhounk zai. He gunn dakhounk ami jitlo chodd vavr kortat titlich chodd Devachi povitr xokti amcher kam  korta mhunn ami ugddas dovrunk zai. Karonn Jehova apli povitr xokti uzar korun kam korit asta. (Ut. 1:2) Tor ami pasun vavr korit ravonk zai. Udharonnak, Jakoban mhunnttlem: “Bhavarth kornniam vinnem melʼlo zata.” (Jak. 2:26) Tor ami bhavartha sangata, povitr xokteche her gunn pasun amchea jivitant dakhoit ravop gorjechem.

17. Povitr xokteche gunn tumi adim dakhounk chukleant zalear tumi kitem korunk zata?

¹⁷ Ami bautizm gheun zaitim vorsam zaleant zalear pasun, thodde pavtti povitr xokteche thodde gunn ami dakhounk chukleant astolim. Tori punn te gunn dakhounk ami proitn korit ravop gorjechem. Hea vixim ek udharonn polloum-ia. Tumchem ek avddichem angvostr matxe pinzlem mhunn chintat. Tumi tem rokddench bhair martolim kai? Na. Tumi chodd korun tem xinvon sarkem kortolim ani tem porot pinzona zaunk samballun uzar kortolim. Teach bhaxen, tumi adim konnakui mog, doia, vo pasiens dakhounk chukleant zalear niraxi zainakat. Tumi kallzantlean tumchi chuk manun gheunk zata. Oxem kelolean tea munxa sangata tumcho sombond tuttchona. Ani uprant ti chuk porot korina zaunk tumi nichov korunk zata.

18. Tumi kosli khatri dovrunk zata?

¹⁸ Tor novo sobhav apnnaunk amkam Jezuchi dekh asa mhunn ami kitlim upkari! Tor ami Jezuchem chintop apnnaitat tednam ami tachi dekh gheunk pavtolim. Ani ami tachi dekh ghetat tednam, novo sobhav ami anik bore toren apnnaunk pavtolim. Hea lekhant ami povitr xoktechea fokot char gunnancher dhean dilem. Punn hantunt anikui gunn mellon asat. Tea gunnam vixim obheas korunk, ani tumi tumchea jivitant te koxe toren dakhoitat tea vixim chintunk tumi thoddo vell kaddunk zata. Tumi Research Guide for Jehovah’s Witnesses, hantunt “Christian Life” hea vixoi-a khala, “Fruitage of the Spirit” polloilem zalear, hea gunnam vixim mahiti diupi zaite lekh tumkam thoim mellttole. Tor tumi novo sobhav apnnaunk, ani to soddun dina zaunk proitn korit ravtat zalear Jehova tumkam modot kortoloch mhunn tumi khatri dovrunk zata!