1. ¿Kasa sünainpünaaka tü wakuwaʼipakat?

 JAʼITAINNA jekenain jee kakaliainnale waya woutiisain, aneesü wakuwaʼipa wapüshuaʼa noʼuluʼu Jehová. Süpüla wountuin tia, eejeesü waaʼin suulia tü jülüjakat waaʼin. Waaʼinrüinjatü tia süka sünainpünaain wakuwaʼipa tü jülüjakat waaʼin. Jülüjale waaʼin tü kasa mojusü suchuntaakat waaʼin, mojeerü wanüiki otta waaʼinreerü kasa mojusü (Éf. 4:17-19). Eekajasaʼa jülüjale waaʼin süchiki kasa anasü, aneerü tü waashajaakalü achiki otta tü kasa waaʼinrakat nüpüleerua chi Washikai Jehová (Gal. 5:16).

2. ¿Kasa wekirajaajeetka anain sünain ekirajaayakat tüü?

² Wekirajaaitpa anain suluʼu ekirajaaya 10 eejeerüin kaʼi jülüjeetka oʼu waaʼin kasa mojusü. Eepejeʼe süpüla nnojoluin waaʼinrüin shia. Süpüla woutiisain waya, ooʼulaashii waya suulia aashajawaa jee aaʼinraa kasa mojusü nülerajaka Jehová. Tia shia tü palajatkat kasa waaʼinrüinjatka süpüla wooʼulaain suulia tü kasa mojusü keejiapuʼukat wamüin. Anuu sooʼomüin tü kasa waaʼinrüinjatkat süpüla talatüinjachin maʼin Jehová wamaa: «Anakaja jaashajiraale pütchi shiimüin, süka shiiʼiranajaaitpain jukuaippa» (Col. 3:10). Sünain ekirajaayakat tüü, wekirajaajeerü anain pütchikat tüü: ¿Jamüsü maʼin nukuwaʼipa chi wayuu eeʼiratakai nukuwaʼipa? ¿Kasa waaʼinrajatka süpüla weeʼiratüin wakuwaʼipa otta ayatüinjatüin waaʼinrüin shia?

3. (1) ¿Jamüsü maʼin nukuwaʼipa chi wayuu eeʼiratakai nukuwaʼipa? (2) ¿Kasa waaʼinrajatka süpüla weeʼiratüin wakuwaʼipa? (Galacia 5:22, 23).

³ Chi wayuu eeʼiratakai nukuwaʼipa, müshi naʼatakai naaʼin nünain wanee nüsheʼin jeketü süka niiʼiratüin tü jülüjakat naaʼin süpüla jülüjain naaʼin tü jülüjakat naaʼin Jehová jee nüshatüin nukuwaʼipa. ¿Kasa waaʼinrajatka süpüla müin waʼatakai  saaʼin wanain tia akuwaʼipaakat? Shia wooʼulaainjatüin nunouteʼerüin Jehová tü jülüjakat waaʼin otta tü waaʼinrakat süpüla washatüin tü akuwaʼipaa eekat sutuma tü nüpülainkat (paashajeʼera Galacia 5:22, 23). Jamüshijaʼa wanee wayuu eeʼiratakai nukuwaʼipa, aishi Jehová nüpüla otta na aʼyataakana nümüin (Mat. 22:36-39). Ayatüsia talatüin naaʼin mayaainjeʼe niʼrüin müliaa (Sant. 1:2-4). Paaʼinwajiraasü wayuu nutuma (Mat. 5:9). Nnojoishi kashapajaaralin otta kamaneeshi nia namüin na waneinnua (Col. 3:12, 13). Kamalainsü nümüin aaʼinraa tü kasa anasükat (Luc. 6:35). Saaʼujee tü naaʼinrakat, atüjaana aaʼuchi kanoulain maʼin nia nünain chi Washi iipünajachikai (Sant. 2:18). Jaʼitairü mojulaajüin wayuu nümüin, nnojoishi jashichin (Tito 3:2). Achechetshi naaʼin suulia tü ooʼulakünakalü aka naaʼin (1 Cor. 9:24, 25, 27).

4. ¿Jamüsü weʼitaainjatka sünain wakuwaʼipa süpüshuaʼa tü akuwaʼipaairua eekat sutuma nüpülain Maleiwa aküjünaka suluʼu Galacia 5:22, 23?

⁴ Süpüla weeʼiratüinjatüin wakuwaʼipa müinjatü wakuwaʼipa maʼaka saaʼin tü aküjünakat suluʼu Galacia 5:22, 23 otta waneirua pütchi eekat suluʼu tü Bibliakat. * Tü akuwaʼipaairua eekat sutuma tü nüpülainkat Maleiwa, nnojotsü müin aka saaʼin washeʼin naatawalin eeka süpüla waʼatawalin wanain. Tia akuwaʼipaakalüirua sünainpünaajiraasü süpüshuaʼaya. Jamüshiijaʼa aire wapüla na waneinnua kamaneejeena waya namüin sümaa nnojoleenain waashichijaamaatüin namüin. Shiimainrejeʼeya kamaneein waya, anamieena waya otta atüjeena waya achecheraa waaʼin.

5. (1) ¿Jamüsü wayaawatüinjatka saaʼu tü jülüjakat naaʼin Jesús? (2) ¿Jamüsü wekirajaainjatka sünain tü nukuwaʼipakat Jesús? (1 Corinto 2:15, 16).

⁵ (Paashajeʼera 1 Corinto 2:15, 16). Süpüla weeʼiratüinjatüin wakuwaʼipa, wayaawatüinjatü aaʼu tü jülüjakat naaʼin Jesús süpüla washatüin nukuwaʼipa. Nia Jesús ashataka maʼin tü akuwaʼipaa eekat sutuma tü nüpülainkat Maleiwa. Jaʼyasü maʼin nukuwaʼipa Jehová nünain Jesús maʼaka jaʼyain maʼin shiyaakua wanee kasa suluʼu rouya (Heb. 1:3). Müleka wayaawatüle maʼin saaʼu tü jülüjakat naaʼin Jesús washateerü maʼin tü kasa naaʼinrakat otta tü nukuwaʼipakat (Filip. 2:4, 5).

6. ¿Kasa jülüjainjatka maʼin waaʼin wanaa sümaa waʼyataain maʼin süchiirua weeʼiratüin wakuwaʼipa?

⁶ ¿Eesüche süpüla washatüin nukuwaʼipa Jesús? «Loto akuwaʼipachi Jesús, nnojoireejaʼa süpüla müinjachin taya maʼaka naaʼin», eesüjaʼa  müle paaʼin. Müle pünüiki, jülüja paaʼin apünüinsü kasa. Palajana, akumajünüshi pia süpüla müin pukuwaʼipa maʼaka naaʼin Jehová otta Jesús. Müsüjeseʼe eein süpüla püshatüin nakuwaʼipa (Gén. 1:26). Tü piamakat shia eein süpüla nükaalinjain pia Maleiwa sükajee tü nüpülainkat. Nnojotsü eein wanee kasa pülaleeka maʼin suulia tü nüpülainkat Jehová. Apünüin, nütüjaa aaʼu Jehová nnojoleerüin pansaashaatain maʼin watuma washatüin tü akuwaʼipaa eekat sutuma tü nüpülainkat. Jülüja paaʼin niʼitaain Jehová 1.000 juya süpüla lotuinjatüin maʼin nakuwaʼipa na wayuu katüinjanakana oʼu yaa mmapaʼa (Alat. Map. 20:1-3). Tü keeʼireekat naaʼin Jehová wapüleerua maaʼulu yaa shia waaʼinmaainjatüin maʼin washatüin nukuwaʼipa Jesús otta weʼitaainjatü waaʼin sünain nükaalinjeenain waya.

7. ¿Kasa wekirajaainjatka anain jooluʼu?

⁷ ¿Kasa amaa waaʼinrüinjatka süpüla washatüin nukuwaʼipa Jesús? Wekirajaa joo sünain pienchisü akuwaʼipaa eeka sutuma tü nüpülainkat Maleiwa. Wekirajaajeerü anain tü naaʼinrakat Jesús süpüla nüshatüin tia akuwaʼipaakat otta tü watüjakat nünainjee. Otta wekirajaajeerü anain waneirua pütchi wasakirüinjatka anain waaʼin süpüla wayaawatüin saaʼu weeʼiratüle wakuwaʼipa.

8. ¿Jamüsü watüjaaka saaʼu aipüralin wayuu Jesús?

⁸ Süka alin maʼin Jehová nüpüla Jesús, wainma kasa naaʼinraka nüpüleerua otta süpüleerua wayuu (Juan 14:31; 15:13). Atüjaana aaʼu alin wayuu nüpüla Jesús saaʼujee tü nukuwaʼipakat yaa mmapaʼa. Aipürai jee amüliajüi nia, jaʼitashii namüin na eʼrüliikana wayumüin nümüin. Tü wane kasa anaʼleekat maʼin naaʼinraka Jesús shia nüküjain süchiki tü eeinjateetkat nuluwataapeena Maleiwa (Luc. 4:43, 44). Atüjaana aaʼu alin maʼin Maleiwa nüpüla Jesús otta na wayuukana saaʼujee nücheküin müliain nia otta nuʼutunuin aaʼin sutuma wayuu kaainjarannuu. Sükajee tü naaʼinrakat eeshii süpüla katüin woʼu süpüla kaʼikat süpüshuaʼa.

9. ¿Kasa waaʼinrajatka süpüla sütüjaanüin aaʼu alin wayuu wapüla maʼaka naaʼin Jesús?

⁹ Waapüin waaʼin nümüin Jehová otta woutiisashii waya süka alin nia wapüla. Atüjaaneerü aaʼu alin wapüla Jehová sünainjee tü wakuwaʼipakat namüin na waneinnua maʼaka naaʼinrüin shia Jesús. Anuu tü nümakat chi aluwataaushikai Juan: «Nnojoliireje alin nüpüla na nuwalayuukana nümaakana, nialeekaja aijeematüin Maleiwa nüpüla, nnojoishija niʼrüin» (1 Juan 4:20). Wasakira waaʼin sünain tüü: «¿Aisüche maʼin tapüla wayuu? ¿Amülialaasüche taaʼin naalin na waneinnua mayaashiijeʼe neʼrüliin wayumüin tamüin? ¿Akatatshiche taya kaʼi süpüla taashajaain namaa na wayuukana nüchiki Jehová saaʼu alin naya tapüla? ¿Taaʼinrüinche tia mayaainjeʼe mojutuin shia sümüin wainma wayuu jee jaʼitainna jashichin naya tamüin? ¿Eeshiche süpüla taʼyataain maʼin sünain aküjaa pütchi?» (Éf. 5:15, 16, TNM).

10. ¿Kasa naaʼinrapuʼuka Jesús süpüla eeinjatüin paaʼinwajirawaa nutuma?

¹⁰ Süka anamiain Jesús nnojotsü nüchekajüin sümüin wayuu tü shiʼralakat wayumüin. Eesü wanee kasa naaʼinrakaʼaya, nia akumajapuʼuka palajana sukuwaʼipa wanee mojujirawaa otta nütütüleʼerapuʼuin naaʼin na waneinnua süpüla naaʼinrüin tia. Nikirajapuʼuin na waneinnua sünain akumajaa sukuwaʼipa mojujirawaa süpüla nücheküin Maleiwa naʼwaajüin nia (Mat. 5:9, 23, 24). Wainmatua nüküjain namüin na nikirajüinkana nnojoliinjanain naʼülüjiraain süchiki jaralüin miyoʼu naʼakajee (Luc. 9:46-48; 22:24-27).

11. ¿Kasa waaʼinrajatka süpüla eeinjatüin anajirawaa?

¹¹ Süpüla eeinjatüin anajirawaa nnojotsü neʼe nnojoluinjatüin atkawaa watuma. Wakumajamaatüinjatü sukuwaʼipa wanee mojujirawaa namaa na waneinnua otta watütüleʼerüinjatü  naaʼin na wawalayuukana süpüla nanouteʼeramaatüinjatüin wanee mojujirawaa (Filip. 4:2, 3; Sant. 3:17, 18). Anasü wasakirüle waaʼin sünain tüü: «¿Eesüche süpüla walatirüin sooʼopünaa waaʼin wanee kasa mojusü süpüla anajiraainjanain waya namaa na waneinnua? ¿Üttakuʼu müsüche taaʼin naaʼinrüle tamüin wanee tawala wanee kasa eekai mojuin? ¿Taʼatapajüinche niainjachin aashajaain tamaa chi wayuu mojujiraakai amaa taya? ¿Tayainjachitaapa aashajaain nümaa palajana mayaainjeʼe niain kasirüin tü alatakat saaʼin tamüin? ¿Tatütüleʼerüinche naaʼin na waneinnua süpüla nanouteʼerüin wanee mojujirawaa?».

12. ¿Jamüsü sütüjaanaka saaʼu kamaneein maʼin Jesús?

¹² Kamaneeshi Jesús (Mat. 11:28-30). Aipürai maʼin nia otta nnojoishi macheʼein süchiirua tü nümakat. Soʼu wanee kaʼi achuntusü kaalinwaa wanee wayuu nnojotka judíoin nümüin Jesús süpüla niiyajüin tü süchonkot. Mayaainjeʼe nnojoluin naaʼinrüin paala tü keeʼireekat saaʼin, kamaneeshi nia sümüin otta niiyajüin tü süchonkot mapa süka niʼrüin kanoulain maʼin shia (Mat. 15:22-28). Mayaainjeʼe kamaneein Jesús, ayatüshia nüchiaain wanee wayuu choʼujaapa shia nümüin. Wanaa sümaa nütaʼülüin Pedro nukuwaʼipa Jesús suulia nikeraajüin tü keeʼireekat naaʼin Maleiwa, nüchiaain nia Jesús noʼupala na waneinnua (Mar. 8:32, 33). Nnojotpejeʼe naaʼinrüin tia süpüla mojutuinjachin Pedro nutuma. Naaʼinrüin tia süpüla nikirajüin nia otta süpüla eejüinjatüin naaʼin na wane aluwataaushikana suulia nataʼülüin nukuwaʼipa suulia nikeraajüin tü keeʼireekat naaʼin Maleiwa. Mayaapejeʼe japülin Pedro sutuma tia alatakat, anasü nukuwaʼipa sünainjee.

13. ¿Kasa waaʼinrawalinjatka shiimainre kamaneein waya sümüin wayuu?

¹³ Shiimainre kamaneein maʼin waya namüin na aikana wapüla, anashii wachiaale naya choʼujaale shia namüin. Washatüinjatü nukuwaʼipa Jesús waaʼinrapa tia. Wachiaainjana na wayuukana sükajee tü sümakat tü Bibliakat, kamaneeinjatü wanüiki namüin. Jülüja waaʼin eein süpüla naapaain sümaa tü wachiaakalü oulia naya süka alin napüla Jehová otta alin waya napüla. Wasakira waaʼin sünain tüü: «¿Eeshiche süpüla tachiaain wanee wayuu aikai tapüla suulia naaʼinrüin kasa mojusü jaʼitashi jashichin nia tamüin? ¿Jamüsü sukuwaʼipa tatuma? ¿Kamaneesüche tanüiki nümüin? ¿Airuʼuttaapa tanüiki nümüin? ¿Jamüshi tachiaakai nia? ¿Shiache süka jashichin taya nümüin? ¿Shiataapa süka aneein nukuwaʼipa tatuma?».

14. ¿Jamüsü watüjaaka saaʼu shiimain anain tü naaʼinrakat Jesús?

¹⁴ Nnojotsü neʼe nütüjaain aaʼu Jesús tü kasa anasükat, naaʼinrüiña shia. Süka alin nüpüla Jesús chi Nüshikai naaʼinrüin waneepia tü kasa anasükat sümaa nütüjaain saaʼu jamüin naaʼinraka shia. Wanee wayuu kamaneekai nüchajaain sukuwaʼipa süpüla nükaalinjain na waneinnua. Nnojotsü neʼe nütüjaain saaʼu tü kasa anasükat, naaʼinrüiña shia otta niyaawata aaʼu jamüin naaʼinraka tia. Eesü süpüla nüsakirüin naaʼin wanee wayuu sünain tüü: «¿Mojusüche taaʼinrüle wanee kasa anasü shiiʼiree aneein neʼe takuwaʼipa?». Aashajaashi Jesús nachiki na asülajakana namüin na wayuu maʼletsekana shiiʼiree sütüjaanüinjatüin aaʼu sutuma wayuu. Mayaainjeʼe anain nasülajüin namüin na maʼletsekana, nnojotsü nücheküin Jehová tü naaʼinrakat süka nütüjaain saaʼu tü suluʼukat naaʼin nayakana (Mat. 6:1-4).

15. ¿Jamüsü süpüla watüjaain saaʼu shiimainre anain tü waaʼinrakat?

¹⁵ Waaʼinrüle kasa anasü namüin na waneinnua süka kapülain waaʼin nakuwaʼipa suulia wakuwaʼipa neʼe wamüiwaʼa, shiimainjaʼamata anain tü kasa waaʼinrakat. Wasakireʼera waaʼin sünain tüü: «¿Tatüjaa aaʼuche tü kasa anasükat sümaa taaʼinrüin shia? ¿Jamüsüche taaʼinraka kasa anasü sümüin wayuu?».

16. (1) ¿Kasa waaʼinrüinjatka waneepia? (2) ¿Jamüsü waaʼinrüinjatka tia?

¹⁶ Nnojotsü eeʼiratüin süpüshuaʼa wakuwaʼipa woutiisapa waya. Eesü sooʼomüin tü waaʼinrajatkat. Tü wakuwaʼipa weeʼiratakat müinjatü aka saaʼin wanee washeʼin weisalajüinjatka. Wachajaainjatü sukuwaʼipa waneepia süpüla washatüinjatüin tü akuwaʼipaa eekat sutuma nüpülain Maleiwa. Waaʼinrüinjatü tia süpüla nükaalinjain waya Jehová, jama niʼyataain waneepia sükajee nüpülain (Gén. 1:2). ¿Kasa watüjaka sünainjee tia? Shia wanouteʼerawalinjatüin wakuwaʼipa waneepia. Nüküjain Santiago nnojoluin kasain saamüin nunoula wanee wayuu nnojorüle naaʼinrüin tü kasa anasü nüchekakat chi Maleiwakai (Sant. 2:26). Müsia neʼe sukuwaʼipa tü wane akuwaʼipaairua eekat sutuma tü nüpülainkat Maleiwa. Jaʼyale saaʼu wakuwaʼipa tü eekat sutuma tü nüpülainkat Maleiwa, atüjaaneerü aaʼu wooʼulaain nükaalinjain waya Jehová.

17. ¿Kasa waaʼinrajatka nnojorüle jaʼyain maʼin waaʼu tü akuwaʼipaa eekat sutuma tü nüpülainkat Maleiwa?

¹⁷ Jaʼitainna na kakaliainnakana woutiisain, eejeerü kaʼi nnojoleetka jaʼyain saaʼu nakuwaʼipa tü akuwaʼipaa eekat sutuma tü nüpülainkat Maleiwa. Müle tia, anasü nnojorüle sümalajaain nanoula. Jülüjataa waaʼin tüü: süchatajaale wanee washeʼin kamalainka maʼin wamüin, ¿aashin nnojoleerüin wojutuin shia? Eesü süpüla wayapüjüin shia süchikuaʼa. Shiasaʼa süchikijee tia, weisalajeerü maʼin shia. Müsia neʼe wakuwaʼipa, eejeerü kaʼi nnojoleenaka oʼu kamaneein waya otta washapajaajeenaka oʼu. ¿Amalajaainjatche waaʼin sutuma tia? Nnojo. «Nnojotsü alein taaʼin», wamüle sümüin wanee wayuu eekai jashichin amüin waya, aneerü wakuwaʼipa sümaa süchikuaʼa. Anasü wachajaale maʼin sukuwaʼipa süpüla anaʼleeinjatüin wakuwaʼipa wanee sukueena.

18. ¿Kasa watüjaaka maʼin aaʼu?

¹⁸ Anataʼaleesüjaʼa maʼin süka eein süpüla washatüin nukuwaʼipa Jesús. Wayaawatüle saaʼu tü jülüjakat naaʼin Jesús, mapüleejeerü wamüin washatüin nukuwaʼipa, jaʼyeetkalaka waaʼu weeʼiratüin wakuwaʼipa. Sünain ekirajaayakat tüü, wekirajaa anainrü pienchisü neʼe akuwaʼipa eeka sutuma tü nüpülainkat Maleiwa. Anapejeʼe wekirajaale süchiki tü waneirua akuwaʼipaa süpüla jaʼyainjatüin maʼin waaʼu. Wanteerü anain waneirua pütchi anaka maʼin suluʼu Nachajaayainjatü pütchi na aküjaliikana pütchi nüchiki Jeʼwaa, eere sümüin «Nakuwaʼipainjatka na anoujashiikana» otta müsia sünain «Akuwaʼipaa eeka nutuma chi naaʼinkai Maleiwa». Watüjaa aaʼu nükaalinjain maʼin waya Jehová süpüla weeʼiratüin wakuwaʼipa otta ayatajatüin weeʼiratüin shia waneepia.