1. Ahanene, bichi birhuma rhwagwarha oborhere bwinja changwa obubihire?

 RHUBE rhurhazi legama, changwa rhwamamala myaka minene rhubatizwe, rhweshi rhulonzeze kugwarha oborhere Yehova asimire. Yi rhubugwarha, rhukwanene rhugerereze amawazo merhu. Bulagurhe? Bulala amawazo merhu mamanarhuma rhwagwarha oborhere bwinja changwa obubi. Nka rhuziganire kuwaza oku byakazusya enyifinjo z’omubiri, rhwakaderha n’okukola ebintu bibi. (Efe. 4:17-19) Aliko nka rhuyunjwize obwenge bwerhu mw’amawazo menja, kweri byashobokana oku rhwaderha n’okujira ebyakasimisa Darha, Yehova.​—Gal. 5:16.

2. Bibazo bihe hwaganirako mu gunola mwazi?

² Nk’oku rhwabonaga omu mwazi gwageraga, ntako rhwakagala kurhangana amawazo mabi moshi-moshi marhahikaga omu bwenge bwerhu. Aliko rhwakachishoga okurhakola eby’amola mawazo marhuhemere. Embere rhubatizwe, bihemere rhuleke kuyinja rhwaderha n’okujira ebigayisize Yehova. Echola chili chintu chirhanzi chena ch’akamaro bwenene rhukwanene kujira amango rhuli rhwahogola oborhere bwa mira. Aliko yi rhusimisa Yehova loshi, bishubire kurhuhema rhukenge elila rhegeko: “Muyambale oborhere buhyahya.” (Kol. 3:10) Mu gunola mwazi rhwashubiza kw’ebila bibazo: “Oborhere buhyahya” bili bichi? Nka gurhe rhwakayambala oborhere buhyahya n’okububerana?

3. Nk’oku olwandiko lwa Wagalatia 5:22, 23 luderhere, “oborhere buhyahya” bili bichi, na gurhe omuntu anabuyambala?

³ “Oborhere buhyahya” kuli kuwaza n’okukola omu bulyo buyiganyize Yehova. Omuntu anayambala oborhere buhyahya  omu kuyerekana etunda ly’eroho lya Mungu. Anayemera eroho lichesibwa lishunike amawazo mage, okuntu ali achiyunva, n’ebijiro byage. (Osome Wagalatia 5:22, 23.) Omufano, anazigira Yehova n’olubaga lwage. (Mt. 22:36-39) Oyo muntu anagenderera kugwarha omwishingo chiro n’amango ali ahurana ebibazo. (Yak. 1:2-4) Aba wa kujira omurhula. (Mt. 5:9) Analembera n’okukolera abandi oku lukogo. (Kol. 3:13) Anasima ebinja n’okubikola. (Lu. 6:35) Anayerekana kugerera ebijiro byage okw’agwerhe obwemere bukomeere mw’Eshe w’embingu. (Yak. 2:18) Anabeera arhulerere amango abandi bamalonza kumulwisa, n’okuchigala amango bamamuhalalira.​—1 Kor. 9:25, 27; Tit. 3:2.

4. Omu kuyambala oborhere buhyahya, ka rhukwanene kuyinja rhwayerekana ngeso nguma-nguma omu ziyerekenwe mu Wagalatia 5:22, 23? Ofasiriye.

⁴ Yi rhuyambala oborhere buhyahya, bihemere rhugwarhe engeso zoshi ziyerekenwe mu Wagalatia 5:22, 23 n’omu mandi mandiko me Biblia. * Ezola ngeso zirhali nka myambaro omuntu anayinja ayambala muguma-muguma. Sy’ahubwe, ezinene mw’ezila ngeso zibonekene kugerera ezindi. Omufano, akaba kweri ozigiire mwalungwe (muturanyi) wawe, wamulembera n’okumuyereka olukogo. Kandi, y’oba muntu mwinja kanuni, bihunire obe mwirhohye n’okuchigala.

5. “Okugwarha obwenge bwa Kristu” k’okuderha gurhe, na bulagurhe rhukwanene kuyiga oku bilolere akalamo kage? (1 Wakorinto 2:16)

⁵ Osome 1 Wakorinto 2:16. Yi rhuyambala oborhele buhyahya, bihemere rhugwarhe “obwenge bwa Kristu.” K’okuderha oku rhukwanene kurhegeera okuntu Yesu anawaza, naho, rhwanamuyiganya. Yesu anayerekana etunda ly’eroho lya Mungu oku bushinganyanya. Kuguma n’echiyo chinja, anayerekana engeso za Yehova nk’okuzinali. (Ebr. 1:3) Oku rhuli rhwawaza kuguma na Yesu, ku rhwanakola kuguma naye, n’okugala kuyiganya oborhere bwage.​—Flp. 2:5.

6. Bichi rhukwanene kuyibuka amango rhuli rhwachihangana kuyambala oborhere buhyahya?

⁶ Byakahashikana rhukulikire omufano gwa Yesu si? Hali oku rhwakachibwira: ‘Yesu ali mushinganya. Ntako byakaba mpu mbe kuguma  naye!’ Akaba ntyo k’oli wawaza, oyibuke ebila: Ech’oburhanzi, rhwalemerwe omu kuntu rhwakagala kuyiganya Yehova na Yesu. Bobuno wakachishoga kubayiganya, wakanagala; aliko arhali oku bushinganyanya. (Mwa. 1:26) Echa kabiri, eroho lichesibwa lya Mungu y’emisi ekomeere bwenene omu mahanga moshi. Kugerera oburhabale bwalyo, wakakola ebintu orhakagalire kujira chiro oku misi yawe wenyine. Echa kasharhu, Yehova arhalangalire mpu wayerekana etunda ly’eroho lichesibwa oku bushinganyanya zene. Sy’ahubwe, Darha w’obuzigire arheganyize myaka 1 000 yoshi ku balala bagwerhe obulangalire b’okulama oku gulu yi bahikira obushinganyanya. (Ufu. 20:1-3) Echi Yehova arhuhemere zene, kuli kuchihangana rhujire okwerhu koshi n’okulangalira okw’arhurhabala.

7. Bichi rhukali shambalako?

⁷ Ahanene, nka gurhe rhwakayiganya Yesu? Rhwaganira oku bugeke ku bigabi bine by’etunda ly’eroho lya Mungu. Mu buli hali, rhwalola bichi rhwakayiga kugerera okuntu Yesu ayerekanaga ezola ngeso. Oku rhuli rhwabiganirako, rhwabona bibazo biguma byakarhurhabala kugerereza kangana gurhe yirhwachihangana kuyambala oborhere buhyahya.

8. Nka gurhe Yesu ayerekanaga obuzigire?

⁸ Obuzigire bunene Yesu agwerhe kw’Eshe, Yehova, bwalimushunikire ayemere amurhume n’okufa eju yerhu. (Yoh. 14:31; 15:13) Yesu aliyerekene oku kweri azigiire abantu omu kuntu alilamire hanola oku gulu. Buli lusiku aliri ayerekana abuzigire, olukogo, chiro n’amango baguma baliri bamupinga. Enjira nkulu ayerekanagamo okw’azigiire abantu, kwaliri kubayigiriza oku bilolere Obwami bwa Mungu. (Lu. 4:43, 44) Yesu alishubire kuyerekana obuzigire bwage b’okuchihaana embere za Mungu n’eju y’abantu, omu kuyemera afe olufu lw’amalibuko n’amalumwa manene omu fune z’abanya-byaha. Omu kujira ntyo, arhufungulira rhweshi enjira y’okugwarha akalamo k’esiku n’amango.

9. Nka gurhe rhwakayerekana obuzigire kuguma n’oku Yesu ajiraga?

⁹ Rhwachihaanire emwa Darha w’embingu Yehova n’okubatizwa, bulala rhumuzigiire. Che chirhumire, kuguma na Yesu, rhukwanene rhuyerekane oku rhuzigiire Yehova kugerera okuntu rhunakolera abandi. Entumwa Yowane aliyandikire ntya: “Orhazigira mwene-wabo ali abonako, arhakazigira Mungu arhasaga bonako.” (1 Yo. 4:20) Rhwakaja rhwachibaza: ‘Nkala njira buzigire bunene oku bantu si? Nankolera abandi oku lukogo, na chiro akaba bambulire obukenge si? K’obuzigire bunanshunika mpaane emisi n’ebirugu byani omu kurhabala abandi bayige oku bilolere Yehova? Indi tayari kujira ntyo chiro n’amango bantu banene barhalagire n’okuntu nachihanganire, changwa amango bamampinga? Hali okuntu nakajira y’imbona kasanzi kanene k’okugeza omu kasi k’okujira abanafunzi?’​—Efe. 5:15, 16.

10. Nka gurhe Yesu aliri muntu w’okujira omurhula?

¹⁰ Yesu aliri wa kujira omurhula. Amango abantu baliri bamukolera obuligo, arhaliri agalula obubi oku bwindi. Arhanali echola chonyine ch’aliri ajira. Yewaliri aba murhanzi kulerha omurhula, n’okuhira abandi omurhima bayunvikane. Omufano, aliyigirizebo oku bakwanene kujira omurhula na bene-babo, akaba balonzeze Yehova ayemere obuharamye bwabo. (Mt. 5:9, 23, 24) Analirhabere kanene entumwa zage bamale obuhaka baligwerhe oku bilolere inde mukulu bwenene mubo.​—Lu. 9:46-48; 22:24-27.

11. Gurhe rhwakaba bantu b’okujira omurhula?

¹¹ Yi rhuba bantu b’okujira omurhula, birhahemere mpu rhuyake konyine ebintu byakarhuma rhurhayunvikana n’abandi.  Rhukwanene kuba barhanzi okujira omurhula, n’okuhira bene-berhu na bali-berhu omurhima bayunvikane. (Flp. 4:2, 3; Yak. 3:17, 18) Rhwakachibaza ebila bibazo: ‘Bichi ndi tayari kuleka chaziga njire omurhula haguma n’abandi? Amango mwene-werhu changwa mwali-werhu amangayisa, inamubikira omujinya si? Ka nandingiriza owindi yebage murhanzi kugalula omurhula, changwa si, nyono nyemba murhanzi chiro akaba oku nkabaga oyola muntu yewarhumaga echibazo chabaho? Inampira abandi omurhima bayunvikane amango bihemereko si?’

12. Gurhe Yesu aliyerekene olukogo?

¹² Yesu aliri wa lukogo. (Mt. 11:28-30) Aliri ayerekana olukogo omukuba muntu w’okuyeegerwa n’okurhooleka, chiro n’omu bisanzi bikomeere. Omufano, amango mukazi muguma w’omu Foinike amulakirira afumye omwana wage, alirhangire lahira kujira eby’oyola mukazi amuhemaga, aliko abere ayerekana obwemere bukomeere, Yesu afumya omwana wage oku lukogo. (Mt. 15:22-28) Chiro akaba okw’aliri wa lukogo, Yesu arhaliri abula kuhaana ehano. Mango maguma aliri ayerekana olukogo lwage omu kurhayinja ashishiriza balala alizigiire. Omufano, amango Petro alonza kumubuza arhajiraga obulonza bwa Yehova, Yesu amukalihira omu masu m’abandi banafunzi. (Mk. 8:32, 33) Arhajiraga ntyo mpu y’akoza Petro eshonyi, sy’alonzaga amukoomeze n’okukengusa abandi banafunzi oku barhayinjaga bachirhumiriza. Bibonekene oku Petro aliyunvirhe eshonyi, aliko ayunguka n’elyola hano ahabwaga.

13. Nka gurhe rhwakayerekana olukogo lukwanene?

¹³ Omu kuyereka balala ozigiire olukogo lukwanene, mango maguma byakakuhema ohanulebo buzira kubashishiriza. Amango wamajira ntyo, oyiganye Yesu omu kuhaana ehano liyumangiire oku makanuni mali omu Chinwa cha Mungu. Oderhe n’olukogo. Ochizere oku nabo balonzeze bakole ebinja, onalangalire oku balala bazigiire Yehova banakuzigiire nawe, bakuyunviriza banakolese ehano wahabo. Ochibaze ntya: ‘Ka nangwarha obushiru b’okuderha amango namabona omuntu nzigiire y’ajira echintu chibi? Amango byamampema mpaane ehano, nanderha n’olukugo, changwa si n’obukali? Bichi binshunikire impaane ehano? Nalihaanaga bulala nyunvirhire oyola muntu oburhe, changwa si, nalishondere murhabale?’

14. Gurhe Yesu anayerekana engeso y’obwinja?

¹⁴ Yesu arhaba amenyere amenja konyine, si n’okumakola. Ab’azigiire Eshe, n’echola chinarhuma buli mango akola amenja, ey’anashunikirwe n’omuhigo gwinja. Engeso y’obwinja enabonekana omu kuntu yirhwakolera abandi. Eli ngeso rhwakayerekana amango rhwamakola ebijiro by’okurhabala abandi. Okumenya echintu chinja ch’okukola konyine kurhatosheze; rhukwanene rhuchijire, eyi rhunashunikirwe n’omuhigo gwinja. Hali oku rhwakachibaza, ‘Byakagalika si okujira echintu chinja, eyi na muhigo gubi gushunikire omuntu?’ Nechi, byakabako. Omufano, Yesu aliderhere ku balala baliri barhabala abakene, aliko banajira okwabo koshi y’abandi bamenya oburhabale bahaanire. Ebyola bijiro byalibonekene nka binja, aliko ntacho byalimalire embere za Yehova.​—Mt. 6:1-4.

15. Nka gurhe rhwakayerekana obwinja bukwanene?

¹⁵ Rhwakayerekana obwinja bukwanene amango rhwamakola echintu chinja buzira kulonza rhuchikazize. Wakaja wachibaza: ‘Ka ntamenya echintu chinja ch’okujira konyine, s’inanchihangana okuchikola? Bichi binanshunika njire echintu chinja?’

16. Bichi rhukwanene kujira buli lusiku, na bulagurhe?

¹⁶ Rhurhawazaga okw’amango rhwamabatizwa eyi rhwamayambala loshi oborhere buhyahya, na nta chindi rhwakachijira. Oborhere buhyahya, ku bunali nka “mwambaro guhyahya” gwinja rhukwanene rhugenderere kulanga omu hali nyinja. Njira nguma rhwakajiramo ntyo, kuli kulola buli lusiku gurhe rhwakayerekana etunda ly’eroho lya Mungu. Bulagurhe? Bulala Yehova ali Mungu w’ebijiro, n’eroho lyage eli misi enakola. (Mwa. 1:2) Bobuno, buli chigabi ch’etunda ly’eroho chakagala, chinakwanene chirhushunike oku bijiro. Omufano, omwanafunzi Yakobo aliyandikire: “Obwemere buzira bijiro bufire.” (Yak. 2:26) Intyo ku binali oku bilolere ebindi bigabi byoshi by’etunda ly’eroho lya Mungu. Buli mango rhwamabiyerekana, byanabonekana oku kweri eroho lya Mungu yilyarhukolamo.

17. Gurhe rhwakajira amango rhwamagambwa kuyerekana entunda ly’eroho?

¹⁷ Chiro n’Abakristu bamalegama babatizwe, mango maguma banagambwa kuyerekana etunda ly’eroho. Aliko echintu ch’akamaro, kuli kurhachilekerera. Waza k’ogula mufano. Amango hali ahaberekere oku mwambaro gwawe osima bwenene, ka han’aho wanagukabula si? Nanga. Ahanene wakahanga bwinja ahola haberekere nka bigalikene. N’enyuma w’aho, nkabaga wakaja wagulanga bwenene. Konakuguma, nka hamagera akasanzi wagambwa kukolera omuntu oku lukogo, okumulembera, changwa okumuyereka obuzigire, orhavunikaga omurhima. Okuhema obubabale n’omurhima goshi kwakamala echibazo, n’okukurhabala oshube ogwarhe obwira haguma n’oyola muntu. Oje wahigirira kukola ebintu bwinja omu siku zili embere.

18. Bichi rhukwanene kuchizera?

¹⁸ Rhugwerhe shukurani nene bulala Yesu arhulekeere omufano gwinja! Oku rhuli rhwayiganya okuntu aliri awaza n’oborhere bwage, ku byanarhuyorohera kukola kuguma naye. Oku rhuli rhwakola kuguma na Yesu, ku rhwanagala kuyambala bwinja oborhere buhyahya. Mu gunola mwazi, rhwaganirire ku bigabi bine byonyine by’etunda ly’eroho lya Mungu. Kuli kwinja oje wachirholera akasanzi k’okushuba kulola ebindi bigabi by’etunda ly’eroho, n’okulola kangana gurhe oli wachihangana kuyerekana ezola ngeso. Wabona eperu ly’emyazi eganirire kw’ebyola omu Msaada Wakutafuta Habari omu rhwe liderhere “Maisha ya Kikristo” naho wanaja omu “Tunda la Roho.” Ochizere oku amango wamajira echawe chigabi, Yehova naye akurhabala oyambale oborhere buhyahya onabuberane.