1. Ano ang may daku nga impluwensia sa aton personalidad?

 ANG iban sa aton mga pila ka adlaw pa lang nabawtismuhan kag ang iban naman madamo na nga tinuig nga nabawtismuhan. Pero gusto naton tanan nga ipakita ang personalidad nga nanamian ni Jehova. Para mahimo naton ini, dapat naton kontrolon ang aton panghunahuna. Ngaa? Bangod ang aton mga ginahunahuna amo ang may daku nga impluwensia sa aton personalidad. Kon parte sa aton makasasala nga handum ang pirme naton ginahunahuna, makahambal kita kag makahimo sang malain. (Efe. 4:17-19) Pero kon maayo nga mga butang ang pirme naton ginahunahuna, malipay gid ang aton Amay nga si Jehova sa aton mga ginahambal kag ginahimo.—Gal. 5:16.

2. Ano nga mga pamangkot ang binagbinagon naton sa sini nga artikulo?

² Natun-an naton sa nagligad nga artikulo nga indi posible nga puro lang maayo ang aton mahunahuna, kay may tion gid nga makahunahuna kita sang malain. Pero masarangan naton nga indi paghimuon ang aton malain nga ginahunahuna. Antes kita mabawtismuhan, dapat naton untatan ang aton paagi sang paghambal kag mga ginahimo nga ginadumtan ni Jehova. Amo ini ang pinakauna kag pinakaimportante nga dapat naton himuon para mauba ang daan nga personalidad. Pero para malipay sa aton sing bug-os si Jehova, dapat man naton tumanon ini nga sugo: “Isuksok ninyo ang bag-o nga personalidad.” (Col. 3:10) Sa sini nga artikulo, sabton naton ini nga mga pamangkot: Ano “ang bag-o nga personalidad”? Paano naton masuksok ang bag-o nga personalidad kag padayon ini nga ipakita?

3. Base sa Galacia 5:22, 23, ano “ang bag-o nga personalidad,” kag paano ini ginasuksok sang isa ka tawo?

³ Kon ang isa ka tawo may “bag-o nga personalidad,” mabal-an sa iya mga ginahunahuna kag makita sa iya ginahimo ang personalidad ni Jehova. Ginasuksok sang isa ka tawo ang bag-o nga personalidad kon ginapakita niya ang mga kinaiya nga ginapatubas sang espiritu sang Dios, ukon ginatugutan niya nga ang balaan nga espiritu ang mag-impluwensia sa iya mga ginahunahuna, ginabatyag, kag ginahimo. (Basaha ang Galacia 5:22, 23.) Halimbawa, ginahigugma niya si Jehova kag ang Iya katawhan. (Mat. 22:36-39) Malipayon gihapon sia bisan pa may ginabatas sia nga mga kabudlayan. (Sant. 1:2-4) Importante sa iya ang paghidait. (Mat. 5:9) Mapinasensiahon sia kag mainayuhon sa iban. (Col. 3:13) Gusto gid niya himuon ang maayo. (Luc. 6:35) Ginapakita niya paagi sa iya mga ginahimo nga mabakod ang iya pagtuo sa iya Amay sa langit. (Sant. 2:18) Malulo sia gihapon bisan ginainsulto sia, kag ginapunggan niya ang iya kaugalingon kon ginasulay sia.—1 Cor. 9:25, 27; Tito 3:2.

4. Para masuksok naton ang bag-o nga personalidad, puede bala nga isaisa lang naton nga ipakita ang mga kinaiya nga ginasambit sa Galacia 5:22, 23? Ipaathag.

⁴ Para masuksok naton ang bag-o nga personalidad, dapat naton ipakita ang tanan nga kinaiya nga ginasambit sa Galacia 5:22, 23 kag sa iban pa nga mga teksto. * Ini nga mga kinaiya indi pareho sa mga bayo nga isaisa lang naton masuksok ukon indi naton masuksok sing dungan. Ang matuod, madamo sa sini nga mga kinaiya ang halos pareho man sa iban pa nga mga kinaiya. Halimbawa, kon ginahigugma mo gid ang imo isigkatawo, mangin mapinasensiahon kag mainayuhon ka sa iya. Kag para mapakita mo ang matuod nga kaayo, dapat ka mangin malulo kag dapat mo ipakita ang pagpugong sa kaugalingon.

5. Ano ang buot silingon nga “yara sa aton ang hunahuna sang Cristo,” kag ngaa dapat naton tun-an ang kabuhi ni Jesus? (1 Corinto 2:16)

⁵ Basaha ang 1 Corinto 2:16. Para masuksok naton ang bag-o nga personalidad, dapat “yara sa aton ang hunahuna sang Cristo.” Buot silingon, dapat naton tun-an ang panghunahuna ni Jesus kag dapat naton sia ilugon. Perpekto nga ginpakita ni Jesus ang mga kinaiya nga ginapatubas sang espiritu sang Dios. Pareho sa isa ka matinlo nga espiho, ginpakita ni Jesus kon ano gid ang mga kinaiya ni Jehova. (Heb. 1:3) Kon pirme naton ginailog ang panghunahuna ni Jesus, mas  mailog naton sia sa aton ginahimo kag mas mapakita naton ang iya personalidad.—Fil. 2:5.

6. Ano ang dapat naton dumdumon samtang ginapanikasugan naton nga isuksok ang bag-o nga personalidad?

⁶ Posible gid bala nga mailog naton si Jesus? Basi hunahunaon naton: ‘Perpekto si Jesus. Gani indi ko gid sia mailog.’ Kon amo sini ang imo ginabatyag, dumduma ini. Una, gintuga ka nga may ikasarang nga mailog si Jehova kag si Jesus. Gani kon gusto mo sila ilugon, masarangan mo ini nga himuon. (Gen. 1:26) Ikaduha, ang balaan nga espiritu sang Dios amo ang pinakagamhanan nga puersa sa uniberso. Buligan ka sini nga mahimo ang mga butang nga indi mo masarangan kon ikaw lang. Ikatlo, kabalo si Jehova nga indi mo pa subong mapakita sing perpekto ang mga kinaiya nga ginapatubas sang espiritu. Ang matuod, 1,000 ka tuig ang gintigana sang aton mahigugmaon nga Amay para buligan ang mga may paglaum nga mabuhi sing wala sing katapusan sa duta nga mangin perpekto. (Bug. 20:1-3) Subong, ang gusto ni Jehova amo nga himuon naton ang aton bug-os nga masarangan kag magdangop sa iya.

7. Ano ang binagbinagon naton?

⁷ Paano naton mailog si Jesus? Binagbinagon naton ang apat ka kinaiya nga ginapatubas sang espiritu sang Dios. Samtang ginabinagbinag naton ang kada isa sa sini, tun-an naton kon paano ini ginpakita ni Jesus. Kag binagbinagon naton ang pila ka pamangkot nga makabulig sa aton nga padayon nga mapakita ang bag-o nga personalidad.

8. Paano ginpakita ni Jesus ang gugma?

⁸ Bangod palangga gid ni Jesus si Jehova, nagsakripisyo sia para sa iya Amay kag para sa aton. (Juan 14:31; 15:13) Sang ari si Jesus sa duta, ginpakita niya nga palangga gid niya ang mga tawo. Kada adlaw, mahigugmaon sia kag maluluy-on bisan pa ginpamatukan sia sang iban. Ang isa ka importante nga paagi nga ginpakita niya nga palangga niya ang mga tawo amo ang pagtudlo sa ila parte sa Ginharian sang Dios. (Luc. 4:43, 44) Ginpakita man ni Jesus nga palangga niya ang Dios kag ang mga tawo kay handa sia nga magsakripisyo, kag handa sia nga mag-antos kag patyon sang mga makasasala. Bangod sang iya ginhimo, nangin posible para sa aton tanan nga makabaton sang kabuhi nga wala sing katapusan.

9. Paano naton mailog si Jesus sa pagpakita sang gugma?

⁹ Nagdedikar kita kay Jehova kag nagpabawtismo bangod palangga naton ang aton Amay sa langit. Gani pareho kay Jesus, dapat naton ipakita kay Jehova nga palangga naton sia paagi sa pagpalangga man sa mga tawo. Nagsulat si apostol Juan: “Ang isa nga wala nagahigugma sa iya utod, nga makita niya, indi makahigugma sa Dios, nga wala niya makita.” (1 Juan 4:20) Puede naton pamangkuton ang aton kaugalingon: ‘Palangga ko gid bala ang mga tawo? Naluoy bala ako sa iban bisan pa ginapamatukan nila ako? Ginapalig-on bala ako sang akon gugma nga gamiton ang akon tion kag kuarta para buligan ang iban nga makatuon parte kay Jehova? Handa bala ako nga himuon ini bisan indi interesado ang kalabanan nga tawo sa sini ukon bisan ginapamatukan nila ako? Puede ko pa bala dugangan ang akon tion nga ginagamit sa pagtudlo sa iban para buligan sila nga mangin disipulo?’—Efe. 5:15, 16.

10. Paano ginpakita ni Jesus nga importante sa iya ang paghidait?

¹⁰ Importante kay Jesus ang paghidait. Sang gin-insulto sia sang mga tawo, wala sia nagbalos sang malain sa ila. May ginhimo pa gid sia nga nagapakita nga importante sa iya ang paghidait. Ginbuligan niya nga magkalma ang mga nagabaisay, kag ginpalig-on niya nga makighidait ang mga wala nagahangpanay. Halimbawa, gintudluan niya sila nga dapat sila makighidait sa ila utod kon gusto nila nga batunon ni Jehova ang ila pagsimba. (Mat. 5:9, 23, 24) Kag sulitsulit niya nga ginbuligan ang mga apostoles para mauntat ang ila pagbinaisay kon sin-o ang pinakamataas sa ila.—Luc. 9:46-48; 22:24-27.

11. Paano naton mapakita nga importante sa aton ang paghidait?

 ¹¹ Para mapakita naton nga importante sa aton ang paghidait, dapat naton likawan nga mangin rason kita sang indi paghangpanay. Pero may dapat pa kita himuon. Dapat naton tinguhaan nga makighidait sa iban, kag dapat naton palig-unon ang aton mga kauturan nga solbaron ang ila indi paghangpanay. (Fil. 4:2, 3; Sant. 3:17, 18) Puede naton pamangkuton ang aton kaugalingon: ‘Handa bala ako magsakripisyo para makighidait sa iban? Kon may ginsiling ukon ginhimo ang isa ka utod nga nagpalain sang akon buot, nagadumot bala ako sa iya? Ginahulat ko bala nga sia ang makighidait sa akon, ukon ako ang una nga nagatinguha nga makighidait sa iya bisan pa pamatyag ko sia ang may sala? Kon nagakaigo, ginapalig-on ko bala nga makighidait ang mga wala nagahangpanay?’

12. Paano ginpakita ni Jesus nga mainayuhon sia?

¹² Mainayuhon si Jesus. (Mat. 11:28-30) Ginpakita niya ini paagi sa pagpabilin nga kalmado kag makatarunganon bisan sa mga sitwasyon nga mabudlay ini himuon. Halimbawa, ginpangabay sia sang isa ka babayi nga taga-Fenicia nga ayuhon ang iya anak. Sang primero, wala ginhimo ni Jesus ang iya ginpangabay. Pero sang nakita ni Jesus ang iya daku nga pagtuo, mainayuhon nga gin-ayo ni Jesus ang iya anak. (Mat. 15:22-28) Mainayuhon si Jesus, pero nagahatag man sia sang laygay. Kon kaisa, ginapakita niya nga mainayuhon sia sa iya mga pinalangga paagi sa paghatag sa ila sang prangka nga laygay. Halimbawa, sang gusto ni Pedro nga punggan si Jesus nga himuon ang kabubut-on ni Jehova, ginsabdong ni Jesus si Pedro sa atubangan sang iban pa nga mga disipulo. (Mar. 8:32, 33) Ginhimo niya ini, indi para pakahuy-an si Pedro, kundi para hanason sia. Gusto man ni Jesus paandaman ang iban pa nga mga disipulo nga indi nila sia dapat punggan nga himuon ang kabubut-on sang Dios, kundi dapat nila sia unungan. Posible gid nga nahuy-an si Pedro, pero nakabenepisyo sia sa pagdisiplina sa iya.

13. Paano naton mapakita nga mainayuhon gid kita?

¹³ Para mapakita mo sa imo mga pinalangga nga mainayuhon ka gid, posible nga kinahanglan mo sila nga prangka nga laygayan kon kaisa. Kon kinahanglan mo sila laygayan, iluga si Jesus. Gamita ang mga prinsipio sa Pulong sang Dios kon nagalaygay ka. Mangin malulo. Hunahunaa nga gusto nila himuon kon ano ang maayo, kag magsalig nga batunon nila ang imo mahigugmaon nga laygay kay palangga nila si Jehova kag palangga ka nila. Pamangkuta ang imo kaugalingon: ‘Kon makita ko nga may ginahimo nga indi maayo ang akon pinalangga, may kaisog bala ako nga laygayan sia? Kon nagalaygay ako, mainayuhon bala ako, ukon masakit ako maghambal? Ano ang akon motibo sa paglaygay? Nagalaygay bala ako bangod naugot ako sa iya, ukon bangod gusto ko sia buligan?’

14. Paano ginpakita ni Jesus ang kaayo?

¹⁴ Kabalo si Jesus kon ano ang maayo kag ginahimo niya ini. Palangga ni Jesus ang iya Amay, gani pirme niya ginahimo kon ano ang husto, kag husto pirme ang iya motibo. Ang maayo nga tawo pirme nagapangita sing paagi para makabulig sa iban kag nagahimo sia sing maayo sa ila. Indi bastante nga nabal-an lang naton kon ano ang husto. Dapat gid naton ini himuon, kag dapat husto gid ang aton motibo. Mahimo mamangkot kita, ‘Posible bala nga husto ang aton ginahimo pero sala ang aton motibo?’ Huo. Halimbawa, ginsambit ni Jesus ang parte sa mga tawo nga nagahatag sang bulig sa mga imol pero ginasigurado nila nga mabal-an ini sang iban. Maayo ang ila ginahimo pero wala malipay sa ila si Jehova.—Mat. 6:1-4.

15. Paano naton mapakita nga matuod ang aton kaayo?

¹⁵ Mapakita naton nga matuod ang aton kaayo kon himuon naton ang husto kag kon ginahimo naton ini indi para sa aton kaayuhan. Gani puede mo pamangkuton ang imo kaugalingon: ‘Kon nabal-an ko kon ano ang husto nga himuon, ginahimo ko gid bala ini? Ano ang akon motibo sa paghimo sang maayo?’

16. Ano ang dapat naton himuon kada adlaw, kag ngaa?

¹⁶ Indi naton dapat paghunahunaon nga wala na kita sang dapat pauswagon pagkatapos kita mabawtismuhan kay nasuksok na naton ang bag-o nga personalidad. Kon may bag-o kita nga bayo, ginahalungan gid naton ini para mangin matahom ini pirme tan-awon. Amo man sini ang dapat naton himuon sa aton bag-o nga personalidad. Ang isa ka paagi nga mahimo naton ini amo ang pagpanikasog nga ipakita kada adlaw ang mga kinaiya nga ginapatubas sang espiritu sang Dios. Ngaa? Kay kon ginapanikasugan naton nga ipakita ini nga mga kinaiya, buligan pa gid kita sang espiritu ni Jehova. Ginagamit ni Jehova ang iya espiritu sa iya mga ginahimo, kag ang iya espiritu isa ka aktibo nga puersa. (Gen. 1:2) Gani importante gid nga may himuon kita. Halimbawa, si disipulo Santiago nagsulat: “Ang pagtuo nga wala sing mga buhat patay.” (Sant. 2:26) Matuod ini sa tanan nga kinaiya nga ginapatubas sang espiritu sang Dios.

17. Ano ang himuon naton kon may tion nga wala naton mapakita ang mga kinaiya nga ginapatubas sang espiritu?

¹⁷ May mga tion nga wala mapakita sang mga kauturan nga madugay na nabawtismuhan ang mga kinaiya nga ginapatubas sang espiritu. Pero ang importante, padayon kita nga nagapanikasog nga ipakita ini. Binagbinaga ini nga ilustrasyon. Kon nagisi ang imo paborito nga bayo, ihaboy mo bala ini dayon? Indi. Posible gid nga tahion mo ang gisi, kag magahalong ka gid samtang ginahimo mo ini. Kon natahi mo na ini, mas magahalong ka pa gid kon ginasuksok mo na ini. Gani kon may tion nga wala ka nangin mainayuhon, mapinasensiahon, ukon mahigugmaon sa isa ka tawo, indi ka dapat maluyahan sang buot. Sinsero nga mag-sorry para indi maguba ang inyo kaangtanan. Dayon panikasugi nga ipakita pirme ang maayo nga mga kinaiya.

18. Ano ang masigurado naton?

¹⁸ Nagapasalamat gid kita sa halimbawa ni Jesus. Kon panikasugan naton nga ilugon ang iya panghunahuna, mas mailog naton sia sa aton ginahimo. Kon pirme naton ginailog si Jesus sa aton ginahimo, mas masuksok naton sing maayo ang bag-o nga personalidad. Ginbinagbinag naton sa sini nga artikulo ang apat lang ka kinaiya nga ginapatubas sang espiritu sang Dios. Maayo gid kon binagbinagon mo ang iban pa nga mga kinaiya nga ginapatubas sang espiritu kag pamalandungan kon paano mo ini ginapakita. Makita mo ang mga artikulo parte sa sini sa Giya sa Pagtuon Para sa mga Saksi ni Jehova. Pangitaa sa sini nga reperensia ang “Bahin sang Bunga sang Espiritu” sa topiko nga “Cristianong Pagkabuhi.” Makasigurado ka nga kon panikasugan mo nga isuksok ang bag-o nga personalidad kag padayon ini nga ipakita, buligan ka ni Jehova nga mahimo ini.