1. Was is tas haupste tings woo unser personaliteet influentsiire tuut?

 EKAAL op mer khërtslich orer xon yoore lang ketaaft sin, meyer al wole een personaliteet hon woo Yeehoowa kefalt. Fer soo een sort persoon sin, mise mer unser ketanke kontroliire. Warom? Wayl niks tuut unser personaliteet mee petrefe wii unser ketanke. Wën mer ploos in ferkheerte winxe tenke, tuun mer xlechte tinge saan un mache. (Ëfe. 4:17-19) Awer wën mer unser khop fol mache mit kuute ketanke, tuun mer tsiimlich sicher tinge mache un saan woo Yeehoowa kefale. (Kal. 5:16)

2. Was tuun mer in tiise artikel lërne?

² Wii mer im letste artikel kesiin hon, tan un wan khome uns xlechte ketanke foer. Meyer khene net tëne al um hale; awer meyer khene raus suuche net uns aan xtele tëm noo soo sorte ketanke. Foer uns taafe lose, mise mer noo lose tinge saan un mache woo Yeehoowa hast. Tas is tas eyerste un haupst xrit fer ti alt personaliteet aus tuun. Awer fer Yeehoowa wërklich kefale, mise mer aach een aner kepoot aan heere: ‘Tuut ti nay personaliteet aan tsiie.’ (Kol. 3:10) Awer, was is “ti nay personaliteet”? Wii khene mer se aan tsiie un se net mee aus tuun? Tas is was mer in tiise artikel lërne.

3. Was is ti “nay personaliteet” un wii khan yemant se aan tsiie? (Kalater 5:22, 23)

³ Yemant woo “ti nay personaliteet” hot, macht Yeehoowa noo. Wii tuut een persoon ti nay personaliteet aan tsiie? Tii tuut ti frucht fon Kot sayn hayliche kayst tsayche; tii lost tiise kayst sayn ketanke, xpiirunge un aktsyoone petrefe.  (Lees Kalater 5:22, 23.) * Tsum payxpiil, yemant woo ti nay personaliteet hot, tuut Yeehoowa un sayn folek liipe. (Mat. 22:36-39) Tee tuut aach froo plaype soo kaar wën eyer propleeme mit macht. (Tya. 1:2-4) Tee is aach een friitxafer. (Mat. 5:9) Tee is ketultich un froyntlich wën eyer mit te anere um keet. (Kol. 3:13) Tee liipt was kuut is un macht tas aach. (Luk. 6:35) Torich sayn aktsyoone khene mer siin tas eyer een xtarke klaape aan sayn himlixe Fater hot. (Tya. 2:18) Wën yemant tëm prowokt, playpt eyer tsaam; wën eyer fersuucht is, tsaycht eyer selepst kontrol. (1 Kor. 9:25, 27; Tit. 3:2)

4. Wën mer wole ti nay personaliteet aan tsiie, khene mer ti kwaliteete fon Kalater 5:22, 23 eene noom aner tsayche? Lee tas aus.

⁴ Fer ti nay personaliteet aan tsiie, mise mer ëntwikele al ti kwaliteete woo in Kalater 5:22, 23 un in anere tekste fon te Piipel xteen. * Tiise kwaliteete sin net wii unerxiitliche xtik tsaych woo mer eene noom aner aan tsiie tuun. In woerheet, fiile fon tiise kwaliteete sin eenlich tswixich sich. Tsum payxpiil, wëns tuu ti anere wërklich liipst, pist tuu froyntlich un ketultich mit tëne. Un wëns tuu wërklich kuut pist, tuust tuu aach tsaam sin un selepst kontrol tsayche.

5. Was wil es saan “Kristus sayn ferxtant” hon, un warom sole mer Yeesus sayn leepe xtutiire? (1^te Korinter 2:16)

⁵ Lees 1^te Korinter 2:16. * Fer ti nay personaliteet aan tsiie, mise mer “Kristus sayn ferxtant” hon, es wil saan, meyer mise lërne tenke wii Yeesus tenkt un tëm noo mache. Yeesus tsaycht ti frucht fom hayliche kayst in een perfekt aat. Tee is tas perfekte pilt fon Yeehoowa sayn kwaliteete. (Hep. 1:3) Woo mer mee wii Yeesus tenke, woo peser kriin mer es hin tëm noo mache un uns soo wii tee aan xtele. (Fili. 2:5)

6. Was sole mer uns net ferkese wën mer uns aan xtrenge fer ti nay personaliteet aan tuun?

⁶ Meecht es wërklich meechlich fer uns sin Yeesus sayn payxpiil noo mache? Im xtant, tenkst tuu: ‘Yeesus is perfekt. Ich kriin es nii  hin soo wii tee sin.’ Wëns tuu tich soo xpiirst, ferkes tich net fon tiise 3 tinge. Eyerst: tuu pist kemacht kep fer soo wii Yeehoowa un Yeesus sin. Tes weeche, khanst tuu raus suuche tëne noo mache, un tuu khanst es hin kriin, opwool tas yets net perfekt is. (Xee. 1:26) Tsweet: Kot sayn hayliche kayst is ti xtarkste kraft fom Uniwërsum. Mit tëm sayn hilef, khanst tuu tinge mache woos tuu teest nii aleen hin kriin. Trit: Yeehoowa tuut net waarte tas tuu yets ti frucht fom kayst perfekt tsayche tuust. In woerheet, unser liipliche Fater kept 1000 yoore fer tii woo ti eyertlich hofnung hon perfekt wëre. (Apo. 20:1-3) Was Yeehoowa yets fon uns waart, is tas mer unser pestes mache un uf tëm sayn hilef traue.

7. Was tuun mer yets siin?

⁷ Wii khene mer Yeesus noo mache? Yets, tuun mer xpreche iwer 4 kwaliteete woo fon Kot sayn hayliche kayst khome. Meyer tuun siin was mer lërne khene mit te aat wii Yeesus yeete eene fon tiise kwaliteete ketsaycht hot. Meyer tuun aach etliche frooche noo kuke, woo uns helfe unser nay personaliteet ferpesere.

8. Wii hot Yeesus liip ketsaycht?

⁸ Wayl Yeesus Yeehoowa aarich fiil liipt, hot eyer fon fiiles uf kep weeche sayn Fater un fer uns. (Yoo. 14:31; 15:13) Ti aat wii eyer uf te eyert keleept hot, tsaycht wii fiil eyer ti layt liipt. Tee hot yeete taach liip un mitlayt ketsaycht, soo kaar fer tii woo tëm net kërn hate. Un een wichtich aat wii Yeesus liip fer ti layt ketsaycht hot, waar torich ti kuute notisye fom Raych fer tëne preetiche. (Luk. 4:43, 44) Yeesus waar aach wilich fer se layte un een xlim toot hon in te hënt fon sintiche mënxe. Soo hot eyer te weech uf kemacht tas mer khene tas eewiche leepe hon. Sicher, tas sin kroose pewaysunge fon liip tsu Kot un ti mënxe.

9. Wii khene mer soo wii Yeesus liip tsayche?

⁹ Wayl mer Yeehoowa liipe, hon mer uns tetikiirt un uns taafe kelos. Un soo wii Yeesus, tsayche mer unser liip tsu Yeehoowa torich ti aat wii mer ti layt pehantele. Te aphostel Yoohan hot kexrip: “Weer sayne pruuter net liipt, woo eyer siit, khan net Kot liipe, woo eyer net siit.” (1 Yo. 4:20) Tan, khene mer uns frooe: ‘Tuun ich ti layt hërtslich liipe? Tsayche ich mitlayt fer ti anere soo kaar wën se krop mit mich sin? Tuun ich weeche liip, mayn tsayt un tinge penutse fer ti anere helfe iwer Yeehoowa lërne? Sin ich wilich fer tas wayter mache soo kaar wën ti meyerste khee weyert fer tas kepe, orer wën se sich keeche mich xtele? Khan ich aate fine fer mee tsayt in te preetich aarwayt xafe?’ (Ëfe. 5:15, 16)

10. Warom khene mer saan tas Yeesus een friitxafer waar?

¹⁰ Yeesus waar een friitliche mënx kewees. Wën ti layt tëm xlecht pehantelt hon, hot eyer net tsurik petsaalt. Awer tee hot mee wii tas kemacht — tee hot te eyerste xrit kep fer friit mache, un hot ti anere uf kemuut fer sayn xtrayte resolwiire. Tsum payxpiil, tee hot in kelërnt tas sayn tisipele miste friit mit sayn priiter mache wën se wolte tas Yeehoowa tëne sayn aanpeetung aan nëme teet. (Mat. 5:9, 23, 24) Tee hot aach noo un noo sayn aphostele keholef noo lose se tsënke iwer weer te kreeste weyer. (Luk. 9:46-48; 22:24-27)

11. Wii khene mer een friitxafer sin?

¹¹ Khee xtrayt aan fange is kuut; awer fer een friitxafer sin, mise mer mee mache. Meyer mise te eyerste xrit kepe fer friit mit te anere suuche, un mer mise unser priiter un xwestere uf muute sayn xtrayte resolwiire. (Fili. 4:2, 3; Tya. 3:17, 18) Meyer khene uns tiise frooche mache: ‘Fer friit mit te anere mache, fon was sin ich wilich fer uf kepe? Wën  een pruuter orer xwester mich traurich lost, tuun ich pees mit tëne plaype? Soo kaar wëns aus siit tas ti aner persoon te propleem aan kefang hot, tuun ich te eyerste xrit kepe fer te friit mache orer waarte ich ti aner persoon tas mache? Wëns phast, tuun ich ti anere uf muute sayn xtrayte resolwiire?’

12. Wii hot Yeesus froyntlichkheet ketsaycht?

¹² Yeesus waar froyntlich kewees. (Mat. 11:28-30) Tee waar liiplich un net xtreng, soo kaar in xweyere situatsyoone. Tsum payxpiil: een mool, hot een feniisix fraa tëm aan kehal fer sayn khint heele. Am aanfang, hot eyer net kemacht was se ferlangt hot, awer wayl se een xtark klaape ketsaycht hot, hot eyer sayn khint keheelt. (Mat. 15:22-28) Opwool Yeesus froyntlich waar, hot eyer sich net tsurik kehal fon aanreete kepe. Als mool, fer sayn froyntlichkheet tsayche, hot eyer xtarke aanreete fer sayn froynte kep. Tsum payxpiil: een mool, hot Pheeter fersuucht Yeesus um hale Yeehoowa sayn wile mache; too, hot Yeesus tëm korikiirt foer ti anere tisipele. (Mar. 8:32, 33) Sicher, hot eyer tas net kemacht fer Pheeter niter xtele; tee wolt Pheeter iipe un fer ti anere tisipele tsayche tas se solte net hoochnaasich sin. Kewis, hot Pheeter sich een pisye ferxeemt; awer, tee hot nutse fon te tisipliin kriit.

13. Wii khene mer wërklich froyntlich sin?

¹³ Fer wërklich froyntlich mit te layt woo mer liipe sin, mise mer als mool tëne aanreete kepe. Kewis, soo wii Yeesus, tuun mer unser aanreete aan te Piipel xtaype. Meyer sole aach imer liiplich sin un klaape tas ti layt tas richtiches mache wole. Trau tas tii woo Yeehoowa un tich liipe, tuun sich kuut aan xtele foer tayn liiplich aanreet. Mach tich tiise frooche: ‘Hon ich ti koraaj fer was saan wën ich siin yemant woo ich liipe was ferkheertes mache? Wën ich een aanreet kepe mus, sin mayn wërter froyntlich orer krop? Weeche was tuun ich te aanreet kepe? Is wayl ti persoon mich pees kelos hot, orer wayl ich tas pestes fer tii wil?’

14. Wii tuut Yeesus kuutheet tsayche?

¹⁴ Yeesus wees was kuut is un macht tas aach. Yeesus liipt sayn Fater; tes weeche, macht eyer imer tas richtiches mit te richtich uersach. Een persoon woo kuut is, tuut imer aate suuche fer ti anere helfe un kuute tinge fer tëne mache. Es is net kenuuch ploos wise was richtich is — meyer mise tas aach mache un mit te richtich uersach. Awer im xtant, frooe mer uns: ‘Khan yemant tas richtiches mache weeche ti ferkheert uersach?’ Yawool. Tsum payxpiil, Yeesus hot kexproch iwer tii woo kexenke fer ti aarme kep hon, awer hon tas kemacht ploos fer loop fon te anere kriin. Opwool se was kuutes kemacht hon, hon se Yeehoowa net kefalt. (Mat. 6:1-4)

15. Wii khene mer wërklich kuut sin?

¹⁵ Meyer khene wërklich kuut sin ploos wën mer tas richtiches mache weeche kuute uersache. Tan, froo tich: ‘Tuun ich ploos wise was richtich is, orer tuun ich tas aach mache? Weeche was tuun ich tas kuutes mache?’

16. Was sole mer yeete taach mache un warom?

¹⁶ Meyer sole net tenke: ‘Yets woo ich mich ketaaft hon, is mayn aarwayt mit te nay personaliteet am ën; yets, hon ich se kans aan ketsoo.’ Ti nay personaliteet is wii een “nay tsaych”, woo mer mise xeen hale. Meyer khene tas mache wën mer yeete taach aate suuche fer ti frucht fon Kot sayn hayliche kayst tsayche. Warom? Wayl Yeehoowa penutst sayn kayst fer resultaate pringe.  (Xee. 1:2) Tes weeche, woo kreeser unser aanxtrengung is fer tiise kwaliteete tsayche, woo mee tuut Yeehoowa sayn kayst uns helfe. Soo, siin mer tas aktsyoone wichtich sin. Tsum payxpiil, te tisipel Tyako hot kexrip: “Te klaape oone aarwayte [is] toot.” (Tya. 2:26) Meyer khene tas selwiche saan fon te anere kwaliteete fon te frucht fon Kot sayn hayliche kayst. Yeetes mool woo mer tiise kwaliteete tsayche, kepe mer pewaysunge tas Kot sayn kayst uns am helfe is.

17. Wii sole mer uns aan xtele wën mer als mool net ti frucht fom kayst tsayche?

¹⁷ Soo kaar kriste woo xon yoore lang ketaaft sin, tuun als mool net ti frucht fom kayst tsayche. Awer tas wichtiches is net uf kepe. Kuk mool ti neekst ferklaychung. Wëns tuu tayn liipst tsaych feris hëst, teest tuu tas klaych wech xmayse? Nee; tsiimlich sicher, teest tuu tich aan xtrenge fer tas flike, wëns meechlich is. Un noo tas, teest tuu noch mee uf phase. Kraat soo, wëns tuu als mool net froyntlichkheet, ketult orer liip tsu yemant tsaychst, playp net oone muut. Tuu tich eerlich ëntxultiche, tas tuu khanst tayn froyntxaft mit te persoon hale. Un say pextimt tas peser im futuer mache.

18. Fon was khene mer uns sicher sin?

¹⁸ Meyer sin aarich petanklich tas mer Yeesus sayn payxpiil hon! Woo mer mee soo wii Yeesus tenke, woo laychter wërt es fer uns soo wii tee uns aan xtele. Un wën mer uns soo wii Yeesus aan xtele, tuun mer ti nay personaliteet aan tsiie. In tiise artikel, hon mer iwer 4 kwaliteete fon te frucht fom kayst kexproch. Es weyer kuut fer tich tsayt hoole fer ti anere kwaliteete fon te frucht fom kayst xtutiire un tan tenke aan wii tiise kwaliteete noch peser tsayche. Tuu tuust een list fon tiise sache fine in te Guia de Pesquisa para Testemunhas de Jeová unich tëm theema “Vida cristã” un tan “Fruto do espírito”. Say tich sicher tas, wëns tuu tayn pestes machst fer ti nay personaliteet aan tsiie un se net aus tuun, tuut Yeehoowa tich helfe.