1. Anni i primeru nga makafekto ta kata-katoletam?

 KAYÀ tam ngamin nga mapagayayya si Jehova ta kata-katoletam, maski nu bagu ittam laman nga nabawtisowan onu nabayag ngana. Tapenu makua tam yatun, mawag nga magimmugug ittam ta nononopattam. Ngatta? Megafu ta dakal i efekto na nononopattam ta kata-katoletam. Nu kanayun nga agga-nono tam i pamagustu ta baggi tam, makekagi onu makakua ittam tu marake. (Efe. 4:17-19) Ngem nu pannuattam i nono tam tu mapia nga ganna-gannug, siguradu nga makapagayayya ta Yama tam nga si Jehova i pabbibida anna i kukukuattam.​—Gal. 5:16.

2. Anni ira i tabbagattam taw nga artikulo?

² Nagigiammu tam ta nappasa nga artikulo nga ariattam interamente nga mebita nga mannono tu marake. Ngem awayya tam nga pilian nga ari nga kuan danatun. Nige tam mabawtisowan, mawag nga iyemmattam i maguvovug onu magangngua tu gannug ira nga ikalussaw ni Jehova. Yatun i ollu anna pinaka-importante nga dakkua tapenu malaffu i dana nga kata-katolay. Ngem tapenu mapagayayya tam tu mapia si Jehova, mawag nga tuttulattam yaw nga dob: “Ibaruasi nu i bagu nga kata-katolay.” (Col. 3:10, NW ) Taw nga artikulo, tabbagattam i tumunug ira nga pakkiavu: Anni i “bagu nga kata-katolay”? Kunnasi tam mebaruasi i bagu nga kata-katolay anna mapattalupaddian yatun?

3. Segun ta Galacia 5:22, 23, anni i “bagu nga kata-katolay,” anna kunnasi nga mebaruasi yatun?

³ Makagi nga ‘bagu i kata-katolay’ na tadday nu paparigan na si Jehova. Mebaruasi na i bagu nga kata-katolay gukaban na pangipasingan ta vunga na espiritu na Dios. Nu kunnatun, ipamavulun  na nga igiya na masanto nga espiritu i appana-panono, mataga-tageno, anna kukukuan na. (Bibbigan i Galacia 5:22, 23.) Angngarigan na, iddeddukan na si Jehova anna i totolena. (Mat. 22:36-39) Magayayya lagapa yayya maski nu egga ira i attattamman na nga problema. (Sant. 1:2-4) Minangngirattal yayya tu imammo. (Mat. 5:9) Minappasensia yayya anna masippo ta tanakuan. (Col. 3:13) Kakayà na nga kuan i mapia. (Luc. 6:35) Ipasingan na gapa ta kukukuan na nga egga i masikan nga pangurug na ta Yama na ta langi. (Sant. 2:18) Mattalupaddian gapa yayya nga kalmadu maski nu kiddaman yayya na tanakuan anna mafugaddan na i baggi na maski nu meparubang ta tentasion.​—1 Cor. 9:25, 27; Tito 3:2.

4. Tapenu mebaruasi i bagu nga kata-katolay, ngatta mawag nga kultibattam i ngamin nga kualidad nga nakagi ta Galacia 5:22, 23 anna ta karuan paga nga teksto?

⁴ Tapenu mebaruasi i bagu nga kata-katolay, mawag nga kultibattam i ngamin nga kualidad nga nakagi ta Galacia 5:22, 23 anna ta karuan paga nga teksto. * Ari tu kagitta na nadduruma nga sinnun nga sinaggi-tadday nga ibaruasi tam danatun ngamin nga kualidad. Mawag tu ibaruasi tam ngamin danatun nga kualidad megafu ta egga i koneksiodda ta kataggi-tadday. Angngarigan na, nu talaga iddeddukammu i kasittolem, pasa-pasensiammu gapa yayya anna masippo ka nisa. Nu talaga mapia ka, mawag gapa nga kalmadu ka anna fugaddammu i baggim.

5. Anni i kebalinan na “egga nittam i annonopan ni Cristo,” anna ngatta mawag nga gigiammuattam i pattolay ni Jesus? (1 Corinto 2:16)

⁵ Bibbigan i 1 Corinto 2:16. Tapenu mebaruasi tam i bagu nga kata-katolay, mawag tu “egga nittam i annonopan ni Cristo.” Kebalinan na nga mawag nga gigiammuattam i appana-panono ni Jesus anna parigattam yayya. Perfekto nga mepasingan ni Jesus i vunga na espiritu na Dios. Mananawag nga mepasingan na i kualidad ira ni Jehova, kagitta na kuruga manawag nga ispefu. (Heb. 1:3) Nu kanayun nga parigattam i appana-panono ni Jesus, mas nga maparigattam i kukukuan na anna i kata-katolena.​—Fil. 2:5.

6. Anni ira i mawag nga daddammattam ta pangibaruasi tam ta bagu nga kata-katolay?

⁶ Posible kari nga maparigattam i ehemplo  ni Jesus? Baka manono tam: ‘Perfekto si Jesus. Imposible nga maparigakku yayya!’ Nu kunnatun i matageno mu, daddammammu i tumunug ira: Ollu, naparatu ka ta imahe ni Jehova anna ni Jesus. Yayya nga awayyam nga pilian nga parigan ira anna makuam yatun, maski nu ari nga perfekto. (Gen. 1:26) Mekadua, i masanto nga espiritu na Dios i pinakamakapangngua nga fuersa ta uniberso. Yatun i makoffun nikaw tapenu makuam i gannug ira nga ariammu makua ta pakawayyam lagapa. Mekatallu, ari nga ekspektan na minaggiddu nga Yama tam nga si Jehova nga perfekto nga mepasingammu sangawe i vunga na espiritu. Gakkag na nga mattolay labbi tu 1,000 dagun danuri magiddanama nga mattolay tu mannanayun taw ta davvun nige da nga mabbalin tu perfekto. (Nep. 20:1-3) Kayà ni Jehova nga kuattam sangawe i ngamin nga mawayya tam anna mappoffun ittam nisa.

7. Anni i ikonsidera tam?

⁷ Anni ira i parigattam kani Jesus? Ikonsidera tam i appa nga aspeto na vunga na espiritu na Dios anna i magigiammu tam ta pangipasingan ni Jesus tatun ira nga kualidad. Ikonsidera tam gapa i karuan nga pakkiavu nga makoffun nittam nu kunnasi ngana i pangibaruasi tam tu bagu nga kata-katolay.

8. Kunnasi nga nipasingan ni Jesus i aya?

⁸ Megafu ta dakal nga aya ni Jesus kani Jehova, napaguyu yayya nga massakrifisio para nittam anna para ta Yama na. (Juan 14:31; 15:13) Nipasingan ni Jesus i dakal nga aya na ta totolay gukaban na kikkingngua na turi ta egga yayya taw ta davvun. Kanayun nga iniddu anna nikallo na i totolay maski danuri nangokkontra nisa. I tadday ta importante nga kingngua na tapenu mepasingan i aya na ta totolay ay i panuddu nira meyannung ta Pappatulan na Dios. (Luc. 4:43, 44) Kunnasi paga nipasingan ni Jesus i minassakrifisio nga aya na ta Dios anna ta totolay? Sigga-paran nga inattamman na i mataki nga kapatay ta lima na minattagaruli. Megafu tatun, posible para nittam ngamin nga mapeggan tu mannanayun nga inango.

9. Kunnasi tam nga maparigan si Jesus ta pangipasingan tu aya?

⁹ Naddedika ittam ta Yama tam ta langi nga si Jehova anna nappabawtiso ittam megafu ta pangaya tam nisa. Yayya nga kagitta ni Jesus, ipasingattam gapa i aya kani Jehova ta pattratu tam ta totolay. Nitura ni apostol Juan: ‘Nu ari nga ayatan na sinni laman i wagi na nga masingan na, kunnasi gafu na pangaya na ta Dios nga arian na nga masingan?’ (1 Juan 4:20) Awayya tam iyavu ta baggi tam: ‘Napafutuan kari i aya ku ta totolay? Ikallo ku kari i tanakuan maski nu marake i pattratu da niakan? Paguyuan nà kari na aya tapenu usan i tiempò anna i pakkukuà ta panguffun ta tanakuan nga magigiammu i meyannung kani Jehova? Sigga-parakku kari nga kuan yaw maski aru i ari nga maka-appresia ta pappursigì onu maski kokkontraddà? Egga paga kari i makuà tapenu mas aru i tiempò ta pagangngua tu disipulos?’—Efe. 5:15, 16.

10. Kunnasi nga nabbalin tu minangngirattal tu imammo si Jesus?

¹⁰ Minangngirattal tu imammo si Jesus. Turi ta marake i pinattratu ta nisa na totolay, ari yayya nga nangibali. Ngem egga paga i makasta nga kingngua na. Nikaguman na nga irattal i imammo anna pinagaram na i tanakuan nga ayusadda i ari nga pakkarantindian. Angngarigan na, sinudduan na i totolay nga makippakoma ta wagi da tapenu alawatan ni Jehova i paddayoda. (Mat. 5:9, 23, 24) Namippiga gapa nga inuffunan na i apostoles na tapenu iyemmadda i pakiddiskusion nu sinni nira i katannangan.​—Luc. 9:46-48; 22:24-27.

11. Kunnasi ittam mabbalin tu minangngirattal tu imammo?

 ¹¹ Tapenu mabbalin tu minangngirattal tu imammo, mawag tu ariattam laman nga lillitan nga mangigafu tu paddarama. Mawag nga ikagumattam nga makippakoma ta tanakuan anna pagarammattam i kapangngurug tam nga makkapinnakoma. (Fil. 4:2, 3; Sant. 3:17, 18) Awayya tam iyavu ta baggi tam: ‘Anni i mawayyà nga isakrifisio tapenu makippakoma ta tanakuan? Nu natakitan ngà na tadday nga wagi, mangipappappan ngà kari tu taki na nono? Innaggakku kari nga yayya i makippakoma onu sakan ngana i magollu nga makippakoma maski nu gitta na yayya i makalliwa? Nu mepangngo, pagarammakku kari i tanakuan nga makkapinnakoma?’

12. Kunnasi nga nepasingan ni Jesus i kinasippo?

¹² Masippo si Jesus. (Mat. 11:28-30) Nipasingan na yatun gukaban na pabbalin tu malumamo anna rasonable maski ta mariga nga situasion. Angngarigan na, turi ta nakimemallo kani Jesus i babay nga taga-Canaan nga pammapian i ana na, masippo nga pinammanakitan yayya ni Jesus ta gafu. Ngem turi ta nipasingan na babay i kuruga dakal nga pangurug na, pinammapia ni Jesus i ana na. (Mat. 15:22-28) Masippo si Jesus ngem ari gapa nga nabbabang nga manabarang. Nipasingan na yatun gukaban na pangivuya ta iddeddukan na ira. Angngarigan na, turi ta pinurueban ni Pedro nga fugaddan si Jesus nga kuan i uray ni Jehova, nitunung ni Jesus si Pedro ta arubang na tanakuan nga disipulos. (Mar. 8:32, 33) Awayya na tu nepasiranan si Pedro tatun, ngem i gakkag laman mabba talaga ni Jesus ay sanayan si Pedro anna tudduan i karuan nga disipulos nga suportadda nakuan si Jesus anna ariadda yayya fugaddan ta pangngua ta uray na Dios. Magga nabenefisiowan yayya tatun nga tabarang.

13. Kunnasi ittam nga mabbalin tu kurug nga masippo?

¹³ Tapenu mabbalikka tu kurug nga masippo ta iddeddukammu ira, mawag nga tabarangngammu ira nu karuan. Parigammu si Jesus nga nibase na i tabarang na ta prinsipio ira nga malegan ta Uvovug na Dios. Mabbalikka tu masippo. Nonopammu nga kayà da nga kuan i fustu anna mattalo ka nga ginnadda i tabarang mu megafu ta ayataddaka anna si Jehova. Awayyam iyavu ta baggim: ‘Nu masingakku nga magangngua tu marake i iddeddukakku, magutu ngà kari nga kagianan yayya? Nu mawag nga tabarangngakku yayya, masippo kari i pakibbidà onu makapataki? Anni i motibò ta panabarang? Tabarangngakku kari yayya megafu ta mairita ngà onu megafu ta ikavurungakku yayya?’

14. Kunnasi nga nipasingan ni Jesus i kinapia?

¹⁴ Ari laman nga ammu ni Jesus i mapia. Kukukuan na gapa yatun. Iddeddukan ni Jesus i Yama na yatutta kanayun na nga kuan i fustu anna fustu gapa i motibo na. Kanayun nga magaleg i mapia nga tolay tu chansa tapenu uffunan i tanakuan anna magangngua yayya tu mapia ta nira. Ari gafu nga makalanno nga ammu tam i fustu. Mawag nga kuattam i fustu anna fustu nakuan i motibo tam. Baka iyavu tam, ‘Posible kari nga kuattam i fustu ngem marake i motibo tam?’ Wan. Angngarigan na, kinagi ni Jesus i meyannung ta mangiyawa ira tu limus ta pobre ngem siguraduadda nga masingan na tanakuan i kukukuadda tapenu medayaw ira. Maski nu makasta i kukukuadda nga panguffun, ari nga magayayya tatun si Jehova.​—Mat. 6:1-4.

15. Kunnasi ittam nga mabbalin tu kurug nga mapia?

¹⁵ Mabbalin ittam tu kurug nga mapia nu kuattam i fustu anna fustu i motibo tam. Iyavu mu gafu ta baggim: ‘Ammù kari nu anni i fustu anna talaga kuakku yatun? Anni i motibò ta pangngua tu mapia?’

16. Anni i mawag nga kuattam kagaggaw, anna ngatta?

¹⁶ Ariattam nakuan nonopan nga nu nabawtisowan ittam ngana ay awan ngana tu kuattam tapenu mebaruasi i bagu nga kata-katolay. Mawag tu immugurattam yatun nga gitta na pagimmugug tam ta bagu nga sinnuttam. Magaleg ittam nakuan tu chansa kagaggaw nga ipasingan i aspeto ira na vunga na masanto nga espiritu na Dios. Ngatta? Megafu ta nu egga i kukukuattam tapenu ipasingan danatun, mas nga uffunan ittam na espiritu ni Jehova. Kanayun gare nga egga i kukukuan na Dios nga Jehova anna usu-usan na i espiritu na. (Gen. 1:2) Importante gafu gapa nga egga i kuattam. Angngarigan na, nitura na disipulo nga si Santiago: “Natay i angngurug nu awan tu annangngua.” (Sant. 2:26) Kunnatun gapa ta tanakuan paga nga aspeto na vunga na espiritu na Dios.

17. Anni i kuattam nu ari tam nga nepasingan i aspeto ira na vunga na espiritu?

¹⁷ Maski nu nabayag ittam ngana nga bawtisadu, egga lagapa ira i tiempo nga ari tam nga mepasingan i aspeto ira na vunga na espiritu. Ngem mawag lagapa nga ikagumattam nga ipasingan danatun. Nonopan yaw nga angngarigan. Nu ari sadya nga nadaral mu i faboritom nga sinnun, insigida kari nga itabbo mu yatun? Ari. Nu posible, magga kuammu i adde na mawayyam tapenu pakappian i nadaral. Tapus mas memmugug ka ngana gapa sonu uli. Kunnatun gapa nu ari ittam nga nakepasingan tu kinasippo, pappasensia, anna pangiddu ta tanakuan nga tolay. Ari nakuan nga makkafi i nono tam. Awayya tam nga mapakappian i nadaral nga relasiottam tatun nga tolay nu napafutuan nga makippakoma ittam. Magimmugug ittam gapa tapenu ari tam ngana nga makua uli yatun.

18. Ta anni ittam nga makasiguradu?

¹⁸ Mapia ngana laman ta egga i ehemplo ni Jesus! Nu mas nga parigattam i appana-panono anna ugu-ugali na, mas malogon gapa nittam nga parigan yayya ta kukukuattam. Durante nga mas paparigattam i kukukuan ni Jesus, mas nga mebaruasi tam i bagu nga kata-katolay. Appa laman nga aspeto na vunga na espiritu na Dios i ginigiammu tam taw nga artikulo, yayya nga makasta nu gigiammuammu i tanakuan paga ira nga aspeto anna nonopammu nu kunnasim ngana nga mepasa-pasingan danatun. Makaleg ka tu artikulo ira meyannung tatun ta Tulong sa Pag-aaral ng mga Saksi ni Jehova. Alegan i topiko nga “Kristiyanong Pamumuhay” tapus umay ta “Bunga ng Espiritu.” Makasiguradu ka nga adde ta kukukuammu i mawayyam, uffunan naka ni Jehova nga ibaruasi i bagu nga kata-katolay anna pattalupaddianan yatun.