1. Ɔdi gē lɛ abɔ kwu uce ō ya ku alɔ fiyɛ duu a?

 ƆDAŊ ka ó gboji nɛ a ya ubatisim ɛ ŋ amāŋ ku a ya ubatisim gboji ɛ, oduudu alɔ dɔka ō lɛ uce ō ya nɛ Ujehofa dɔka a. O ya ɛɛ kóō tɔɔtɛ lɛ alɔ ō ya ɛnyā, alɔ cɛgbá ō kwu ɔwɛ nɛ alɔ gē gbɛla a bi. Ɔdiya a? Ohigbu ka ɔdā éyi nōo gē lɛ abɔ kwu ɔwɛ nɛ alɔ gē lā oyeeyi ku alɔ fiyɛ duu a, wɛ ɛlá ō gbo ku alɔ. Ɔdaŋ ku alɔ gē gbɛla eko doodu lɛyikwu unwu ku ɔkpiye ku alɔ, ó lɔfu ya ku alɔ kɛla amāŋ ya aɔdā obɔbi. (Āfi. 4:17-19) Amáŋ ɔdaŋ ku alɔ gē gbɛla lɛyikwu ɔdā olɔhi eko doodu, ó géē tɔɔtɛ lɛ alɔ ō kɛla olɔhi klla ya uce, nōo géē he Ujehofa Adā alɔ nōo yɔ ɔkpanco a ɔtu.—Ugal. 5:16.

2. Ɔka nyá nɛ alɔ gáā leyi yɔ ipu ikpɛyi ɛlā nyā a?

² Ɛgɛ nɛ alɔ ka ŋma ikpɛyi ɛlā nōo gā yɛ a, ó gáā tɔɔtɛ ku alɔ lɛ ɛlá ō gbo amāŋ unwu obɔbi fu ŋma ipu ɔtu ku alɔ duudu gla ŋ. Amáŋ alɔ lɔfu je, ku alɔ i gáā yuklɔ mla ɛlá ō gbo ɔɔma ŋ. Gbɔbu ɛɛ ku alɔ ya ubatisim, alɔ cɛgbá ō habɔ ɛlā obɔbi ō ka mla auce ō ya obɔbi nɛ Ujehofa i dɔka ŋ ma ta. Ɔɔma wɛ ɔwɛ aflɛyi mla ɔwɛ o cɛgbá fiyɛ duu, nɛ alɔ lɔfu habɔ oyeeyi nɛ̄ncɛ̄ a ta a. O ya ɛɛ kóō tɔɔtɛ lɛ alɔ ō ya ɔdā nɛ Ujehofa dɔka a, alɔ cɛgbá ō lɛyitaajɛ lɛ ukɔ́ nɛ ó tu alɔ a piii. Ó kahinii: “Aá kē kwú pīya ɔ̄cɛ ɛ̄yīpɛ̄” a. (Ukól. 3:10) Ipu ikpɛyi ɛlā nyā, alɔ géē cila ohi ku aɔka nōo ba nyā: Ɔdi wɛ ɛyi ō je “pīya ɔ̄cɛ ɛ̄yīpɛ̄” a? Ɛgɛnyá nɛ alɔ gáā je piya ɔcɛ ɛyipɛ a klla yɔ i gɔbu ipu nu a?

3. Ɛgɛ nɛ ɔkpá ku Ācɛ Ugalésīya 5:22, 23 ka a, ɔdi wɛ ɛyi ō je “pīya ɔ̄cɛ ɛ̄yīpɛ̄” a, ɛgɛnyá nɛ ɔcɛ kē lɔfu lɛ uce ō ya nyā wiiye a?

³ Ɔcɛ nōo kwu “pīya ɔ̄cɛ ɛ̄yīpɛ̄” a, géē gbɛla klla ya odee bɛɛka Ujehofa a. Ɔcɛ ɛgɛnyā géē bi ikpo ku alelekwu ihɔ a le  yuklɔ, oŋma lɛ ō jɛ ɛga lɛ alelekwu ihɔ kóō lɛ abɔ kwu ɔwɛ nɛ ó gē kɛla, ɔwɛ nɛ ó gē gbɛla mla ɔwɛ nɛ ó gē ya uce a. (Jé Ācɛ Ugalésīya 5:22, 23.) Ocabɔ mafu, ó gē yihɔtu ku Ujehofa mla ācɛ nōo gē gba Ujehofa ɛ̄gbā a. (Umát. 22:36-39) Ɔcɛ ɛgɔɔma gē gɔbu yɔ i lɛ eeye, naana nɛ ó kóō yɔ i má unwalu ɛyɛɛyɛyi. (Ujɛ́m. 1:2-4) Ó géē wɛ ɔcɛ o ya ɛbɔ. (Umát. 5:9) Ó gē lɔtu klla gbonɛnɛ lɛ ācɛ ɔhá. (Ukól. 3:13) Ó gē yihɔtu ku ɔdā olɔhi klla ceyitikwu ya uwa. (Ulúk. 6:35) Ó klla géē mafu ŋma uce ō ya ku nu, ka ó kpɔtuce Adā nu nōo yɔ ɔkpanco a nɛhi. (Ujɛ́m. 2:18) Ó gē ceyitkwu kwu icɔnu ku nu tu, eko nɛ ācɛ yɔ i ceyitikwu kéē nuunu tu ɔ amāŋ lɛ ɔ ya cɔnu. Ó klla gē kwu iyi nu bi eko duuma nɛ ó yɔ i má ojama ō ya ɔdā obɔbi.—1 Ukɔ́r. 9:25, 27; Utáy 3:2.

4. Lɛyikwu auce ō ya nōo yɔ ipu ɔkpá ku Ācɛ Ugalésīya 5:22, 23 a, ɔdaŋ ku alɔ dɔka ō je piya ɔcɛ ɛyipɛ a, alɔ mafu ekponu ku nu foofunu eko nɛ alɔ dɔka a gla a? Kwu ɔ teyi peee.

⁴ O ya ɛɛ ku alɔ kwu piya ɔcɛ ɛyipɛ a piii a, alɔ cɛgbá ō yɔ i mafu ɛjɛɛji auce ō ya nōo yɔ ipu ɔkpá ku Ācɛ Ugalésīya 5:22, 23 a, mla ohile nɛ Ubáyíbu kɛla lɛyikwu ɔ kpɛmm a. * Auce ō ya nyā i lɛbɛɛka aili nɛ alɔ gē lɛ éyi ku uwa wiiye, eko duuma nōo he alɔ ɔtu a ŋ. Ku ɛlā ɔkwɛyi a, aya ku auce ō ya nyā yɔ ipu auce ō ya ɔhá. Ocabɔ mafu, ɔdaŋ ku a yihɔtu ɔmpa ku uwɔ, a géē lɔtu klla gbonɛnɛ lɛ ɔ. O ya ɛɛ ku a kē mafu ka wɛ ɔcɛ ɔkwɛyi, a cɛgbá ō ta ɔtu waajɛ klla lɛ uce ō kwu iyi ɔcɛ bi.

5. Ɔdi wɛ ɛyi ō “jé ɛ́gɛ́nɛ̄ Ohɔ́nyɛtá ā gē gbɛlá lɛ ā,” ɔdiya nɛ alɔ kē cɛgbá ō klɔcɛ lɛyikwu oyeeyi ku Ujisɔsi a? (1 Ācɛ Ukɔ́rīnti 2:16)

⁵ Jé 1 Ācɛ Ukɔ́rīnti 2:16. O ya ɛɛ ku alɔ kwu piya ɔcɛ ɛyipɛ a, alɔ cɛgbá ō “jé ɛ́gɛ́nɛ̄ Ohɔ́nyɛtá ā gē gbɛlá lɛ ā.” Ɛyi ku ɛnyā wɛ kahinii, alɔ cɛgbá ō nwu ɛgɛ nɛ Ujisɔsi gē gbɛla a, klla yɛce ocabɔ ku ku. Ujisɔsi bi ikpo ku alelekwu a le yuklɔ mɛɛlɛ. Bɛɛka ogigo omɛɛbɛ nōó ɛnyá ŋ ma, ó yɛce ocabɔ ku uce ō ya ku Ujehofa yiili. (Uhíb. 1:3) Ɔdaŋ ku alɔ gē ceyitikwu gbɛla bɛɛka Ujisɔsi a eko doodu, ó géē ta alɔ abɔ ya uce bɛɛka anu a. Oŋma lɛ ō ya ɛgɛnyā a, ó géē tu alɔ abɔ je piya ɔcɛ ɛyipɛ a.—Ufíl. 2:5.

6. Ɔdi nɛ alɔ cika ō bi ɔtu abɔ alɔ yɔ i ceyitikwu ku alɔ kwu piya ɔcɛ ɛyipɛ a?

⁶ Ó tɔɔtɛ ku alɔ yɛce ocabɔ ku Ujisɔsi ɔkwɔɔkwɛyi gla? Alɔ lɔfu gbɛla kahinii: ‘Ujisɔsi jila iyē. Ń gáā lɛbɛɛka anu a gboogboo gla  ŋ!’ Ɔdaŋ ka ɔtu gē ya uwɔ lɛ a, blatu ɛlā ɔkwɛyi nyā. Aflɛyi, bla ka Ujehofa ya uwɔ ku a lɛbɛɛka anu mla Ujisɔsi a. Ohigbu ɛnyā a lɔfu je ō yɛce ocabɔ ku uwa, ɔdaŋ ka kē ya lɛ a, a lɔfu lɛbɛɛka uwa gā ɛji ōhī. (Ohút. 1:26) Ɔmpa, alelekwu ihɔ ku Ɔwɔico lɔfu fiyɛ duu ipu oduudu ɛcɛ a. Mla otabɔ ku alelekwu ihɔ, a lɔfu ya aɔdā ōhī nɛ a gáā lɔfu ya abɔ iyi uwɔ gla ŋ ma. Ɔmɛta, Ujehofa i cɛgbá ŋma ɛgiyi uwɔ ku a yɔ i yɛce ikpo ku alelekwu ihɔ a mɛɛlɛ babanya ŋ. Adā alɔ nōo yɔ ɔkpanco nōo yihɔtu alɔ nɛhi a, lɛ ihayi ula ɛpa cofigwo (1,000) miya taajɛ lɛ ācɛ, nōo lɛ eyiyoce ō lā ipu ɛcɛ nyā piyoo a kéē kwu jila iyē. (Mafú 20:1-3) Ɔdā nɛ Ujehofa cɛgbá ŋma ɛgiyi alɔ babanya a, wɛ ku alɔ ceyitikwu gbolo ce ɔ o ya ɛɛ kóō tu lɔ abɔ.

7. Ɔdi nɛ alɔ gáā leyi yɛ ɔ babanya a?

⁷ Ɔwɛ ōhī nyá, nɛ alɔ lɔfu yɛce ocabɔ ku Ujisɔsi a? Alɔ leyi yɛ auce ō ya ɛnɛ nɛ alelekwu ihɔ ku Ɔwɔico gē ta alɔ abɔ lɛ a. Ipu eyeeye ku uwa, alɔ géē má ɔdā nɛ alɔ lɔfu nwu ŋma ɛgɛ nɛ Ujisɔsi mafu uce ō ya ɔɔma a. Alɔ klla géē leyi yɛ aɔka ōhī nōo géē ta alɔ abɔ, je piya ɔcɛ ɛyipɛ a fiyɛ otɛtɛ.

8. Ɛgɛnyá nɛ Ujisɔsi ma ihɔtu fu a?

⁸ Ihɔtu nɛhi nɛ Ujisɔsi lɛ lɛ Adā nu mla alɛɛcɛ a, ya kóō leyi gwu ɔdā alɛwa bonu. (Ujɔ́n. 14:31; 15:13) Ɛpkeeko nɛ Ujisɔsi yɔ ipu ɛcɛ a, ó mafu ɛgɛ nɛ ó yihɔtu ācɛ nɛhi lɛ a, oŋma lɛ ɛgɛ nɛ ó je ō lā oyeeyi ku nu a. Ɛ̄cī doodu ó gē yihɔtu ācɛ klla gē meyinyinyi uwa, naana nɛ ācɛ ōhī kóō ya ɔ ŋmo ekoohi a. Ɔwɛ o cɛgbá fiyɛ duu nɛ ó mafu ka ó yihɔtu ācɛ a, wɛ oŋma lɛ ō nwu uwa lɛyikwu Ajɔɔcɛ Ku Ɔwɔico. (Ulúk. 4:43, 44) Ujisɔsi klla mafu ka ó yihɔtu ku Ɔwɔico mɛmla alɛɛcɛ nɛhi, oŋma lɛ ō cɛ ō má owe nɛhi klla gekwu ipu abɔ ku ācɛ obiya íne. Oŋma lɛ ō ya lɛ a, ó le tɔɔtɛ ku oduudu alɔ kóō lɛ ɛga lɛ ō lā oyeeyi opiyoo.

9. Ɛgɛnyá nɛ alɔ lɔfu yɛce ocabɔ ku Ujisɔsi oŋma lɛ ō mafu ihɔtu a?

⁹ Alɔ je iyi alɔ gwɛɛya lɛ Ujehofa klla lɛ ubatisim ya, ohigbu ku a alɔ yihɔtu Adā alɔ nōo yɔ ɔkpanco a. Ohigbu ɛnyā bɛɛka Ujisɔsi a, alɔ mafu ihɔtu lɛ Ujehofa oŋma lɛ ɛgɛ nɛ alɔ gē ya ɛlā mla ācɛ ɔhá a. Ɔyikpo Ujɔni ta ɔkpá kahinii: “Ɔ̄cɛ dúúmā nɛ̄ ó ī yíihɔtū tū ɔyínɛ́ nū nōó gē má eyī ā ŋ́, ó gáā lɔfú yíihɔtū tū Ɔwɔicō nōó má eyī ɛ́ɛ́ ŋ́ mā glá ŋ́.” (1 Ujɔ́n. 4:20) Mla ɛnyā ipu ɔtu, alɔ da iyi alɔ aɔka nyā: ‘N gē yihɔtu ācɛ ɔhá ŋma ɛjɛɛji ɔtu ku um? N gē mafu eyinyinyi lɛ ācɛ ɔhá kwu eko néē kóō lɛ um ya cɔnu? Ihɔtu nɛ um lɛ lɛ ācɛ a gē lɛ abɔ kwu um ɔtu cɛɛ ku um bi eko mla aɔdā nɛ um lɛ a, le je otabɔ lɛ ācɛ ɔhá o ya ɛɛ kéē gáā lɛ Ujehofa jé? N gē ceyitikwu ya ɛnyā naana nōo ceyitikwu ku um i lɔfu jɛ ācɛ alɛwa eyī ŋ, amāŋ ka eko néē yɔ i ya um ŋmo? N lɔfu dɔka ɔwɛ ōhī nɛ um lɔfu ceyitikwu ya nwune fiyɛ ipu uklɔ ku ɔna ō ta ku um?’—Āfi. 5:15, 16.

10. Ɛgɛnyá nɛ Ujisɔsi mafu ka ó wɛ ɔcɛ o ya ɛbɔ a?

¹⁰ Ujisɔsi wɛ ɔcɛ o ya ɛbɔ. Eko nɛ ācɛ ya ɔ ɔdā obɔbi a, ó ya uwa cigbihi ŋ. Ó klla ya fiyɛ ɔɔma. Ó ceyitikwu ya ku ɛbɔ kóō yɔ, klla tu ācɛ ɔhá ɔtu kwu ɔtu kéē lɛ unwalu néē lɛ a kagwo. Ocabɔ mafu, ó nwu ācɛ ka é cɛgbá ō lɛ ɛbɔ ya mla ayinɛ uwa piii, ɔdaŋ ka é dɔka ku Ujehofa kóō miyɛ ɛ̄gbā ō gba ku uwa. (Umát. 5:9, 23, 24) Igbalɛwa ó kē ta ayikpo a ɔtu kwu ɔtu kéē hii taafu mla iyi uwa, lɛyikwu ɔcɛ nōo nwune fiyɛ ipu uwa a ŋ.—Ulúk. 9:46-48; 22:24-27.

11. Ɛgɛnyá nɛ alɔ gáā mafu ku alɔ wɛ ācɛ o ya ɛbɔ a?

¹¹ O ya ɛɛ ku alɔ mafu ku alɔ wɛ ācɛ o ya ɛbɔ, alɔ cɛgbá ō ya fiyɛ ō kwu ŋma āhɔ̄ ku unwalu ofoofunu. Alɔ cɛgbá ō ceyitikwu ya ɛbɔ mla ācɛ ɔhá, klla ta ayinɛ alɔ ɔtu kwu ɔtu kéē lɛ unwalu néē lɛ ɔtahɛ ku iyi uwa a kagwo. (Ufíl. 4:2, 3; Ujɛ́m. 3:17, 18) Alɔ lɔfu da iyi alɔ aɔka  nyā: ‘Ɔdi nɛ um lɔfu leyi gwu ɔ bonu, o ya ɛɛ ku um ya ɛbɔ mla ācɛ ɔhá a? Eko nɛ ɔyinɛ um ipu ujɔ lɛ um ya cɔnu, n gē bi ɛlā ɔɔma ɔtu eko doodu? N gē ceyitikwu nyɔ gā ɛgiyi ɔcɛ a o ya ɛɛ ku alɔ lɛ ɛbɔ ya a, kɛɛ ka um gē gbeyi kóō wa ɛgiyi um gbɔbu, ɔdaŋ ka anu lé ɛpɔbi ku ɛlā a? Ɔdaŋ ka ó tɔɔtɛ, n gē ceyitikwu ta ācɛ ɔhá nōo lɛ unwalu ɔtahɛ ku iyi uwa ɔtu kwu ɔtu kéē le kagwo?’

12. Ɛgɛnyá nɛ Ujisɔsi mafu ka ó gbonɛnɛ a?

¹² Ujisɔsi wɛ ɔcɛ o gbonɛnɛ. (Umát. 11:28-30) Ujisɔsi mafu ka ó wɛ ɔcɛ ogbonɛnɛ oŋma lɛ ō yɔ cii klla gbɛla lɔɔlɔhi, eko nɛ ó kóō yɔ ipu āhɔ̄ olɔnɔ naana. Ocabɔ mafu, eko nɛ ɔnyā ku Ufinisiya gbɔɔkɔ lɛ ɔ kóō lɛ ɔyi ku nu hɛta a, ó ta ō ya ɔdā nɛ ɔnyā a da ɔ a, amáŋ abɔ ɔnyā a gɔbu mafu ka ó lɛ ɔtu okpoce olɔfu a, ó lɛ ɔyi nɔnya ku nu a hɛta. (Umát. 15:22-28) Naana nɛ Ujisɔsi gbonɛnɛ nɛhi a, ɔɔma i ci ɔ ŋma ō tu ācɛ ɔhá ukɔ́ ŋ. Ekoohi ó gē mafu ka ó gbonɛnɛ lɛ ācɛ nɛ ó yihɔtu uwa a, oŋma lɛ ō da uwa ɔkwɛyi a. Ocabɔ mafu, eko nɛ Upita dɔka ō ci Ujisɔsi ŋma ō ya ɔdā nɛ Ujehofa dɔka a, Ujisɔsi ta ɔ kwu ɔwɛ ipeyi oduudu ayikpo ohile a. (Umát. 8:32, 33) Ó ya ɛnyā ohigbu ka ó dɔka ō kpo uweyi ta Upita ɛyi ŋ, amáŋ o ya kóō nwu ayikpo ohile a ɛlā kéē hii ya odee fiyɛ ɛji ku uwa ŋ. Ó lɛ aafu ŋ uweyi lɔfu kwu Upita ligii, amáŋ ó géē lɛ itene ŋma ahɔ̄ ō pi ɔɔma nɛhi.

13. Ɛgɛnyá nɛ alɔ gáā mafu ku alɔ ogbonɛnɛ ɔkwɔɔkwɛyi a?

¹³ Ɔdaŋ ku a dɔka ō mafu ɔkwɔɔkwɛyi ku a gbonɛnɛ lɛ ācɛ nɛ a yihɔtu uwa a, bēē da uwa ɔkwɛyi a. Eko duuma nɛ a yɔ i ya lɛ a, yɛce ocabɔ ku Ujisɔsi ŋma lɛ ō ya ku ɛjɛɛji aukɔ́ a kóō ŋma ipu Ubáyíbu. Ta ɔtu waajɛ. Jé kpɔcii ka é dɔka ō ya ɔdā okpaakpa. Ku a klla kpɔtuce ku ācɛ nōo yihɔtu Ujehofa mɛmla awɔ duu a, géē bi ahɔ̄ nɛ a pi uwa anu ipu ihɔtu a le yuklɔ. Da iyi uwɔ aɔka nyā: ‘N gē lɛ ɔtu ō kɛla eko nɛ um má ɔcɛ nɛ um yihɔtu nu, yɔ i ya ɔdā nōó kpaakpa ŋ? Ɔdaŋ ka um cɛgbá ō pi ɔcɛ ahɔ̄, n gē kɛla ɔwɛ ogbonɛnɛ, kɛɛ ka ipu icɔnu? Ɔdi nɛ um bi ɔtu ɛɛ nɛ um yɔ i pi ɔcɛ ahɔ̄ a? N yɔ i pi ɔ ahɔ̄ a ohigbu ka um yɔ i cɔnu mla anu nɛɛ, kɛɛ ka ohigbu ka um dɔka ō ta ɔ abɔ?’

14. Ɛgɛnyá nɛ Ujisɔsi ya ɔdā olɔhi lɛ ācɛ ɔhá a?

¹⁴ Ujisɔsi i jé ɔdā nōo wɛ ɔdā olɔhi a ofoofunu ŋ, amáŋ ó gē ya ɔ. Ujisɔsi yihɔtu Adā nu nɛhi, ohigbu ɛnyā ɛjɛɛji ɔdā olɔhi nɛ ó gē ya a ŋma ipu ɔtu ku nu. Ɔcɛ olɔhi gē ceyitkwu eko doodu kóō ta ācɛ ɔhá abɔ, kóō klla ya ɔdā olɔhi lɛ uwa. Ó jɛ ō jé ɔdā olɔhi nɛ alɔ cika ō ya lɛ ācɛ ofoofunu ŋ, alɔ klla cika ō bi ɔdā olɔhi amāŋ ɔdā okpaakpa ipu ɔtu abɔ alɔ yɔ i ya ɛnyā a. Ācɛ ōhī lɔfu dɔka kahinii: ‘Ó tɔɔtɛ ku ɔcɛ kóō ya ɔdā olɔhi, amáŋ kóō bi ɔdā okpaakpa amāŋ ɔdā olɔhi ipu ɔtu ŋ?’ Ohi a wɛ u ii. Ocabɔ mafu, Ujisɔsi kɛla lɛyikwu ācɛ nōo je ɛhi lɛ ācɛ ogbɛha, amáŋ nōo ceyitikwu ku ācɛ ɔhá kéē lɛ uwa má cɛɛ kéē cɛtra uwa ohigbu nu a. Naana nɛ ɛhi néē je a i wɛ ɔdā obɔbi ŋ ma, ɔtu i he Ujehofa lɛyikwu ɔ ŋ.—Umát. 6:1-4.

15. Ɛgɛnyá nɛ alɔ lɔfu wɛ ācɛ o ya ɔdā olɔhi lɛ ācɛ ɔhá ɔkwɔɔkwɛyi a?

¹⁵ Ó géē tɔɔtɛ ku alɔ wɛ ācɛ o ya ɔdā olɔhi lɛ ācɛ ɔhá ɔkwɔɔkwɛyi, ɔdaŋ ku alɔ yɔ i ya ɔ ŋma ipu ɔtu olɔhi amāŋ ɔtu okpaakpa. A lɔfu da iyi uwɔ aɔka nyā: ‘N jé ɔdā nōo wɛ ɔdā okpaakpa ō ya lɛ ācɛ ɔhá a, klla gē ceyitikwu ya ɔ? Ɔdi nɛ um bi ɔtu ɛɛ nɛ um yɔ i ya ɔdā olɔhi lɛ ācɛ ɔhá a?’

16. Ɔdi nɛ alɔ cɛgbá ō ya ɛ̄cī doodu a, ɔdi kē ya a?

¹⁶ Alɔ hii gbɛla ka o ceyitikwu nɛ alɔ cɛgbá ō ya, o ya ɛɛ ku alɔ je piya ɔcɛ ɛyipɛ a, gē mɛ eko  nɛ alɔ lɛ ubatisim ya ŋ. Alɔ jé ka ō kwu “pīya ɔ̄cɛ ɛ̄yīpɛ̄” a lɛbɛɛka ɛnɛɛnɛ ili ɛpɛɛpɛ nɛ ɔcɛ je wiiye, nɛ ó cɛgbá ō ya kóō yɔ i lɔhi eko doodu a. Ɔwɛ éyi nɛ alɔ kē lɔfu ya ɛnyā gla a, wɛ ka alɔ géē gɔbu yɔ i mafu ikpo ku alelekwu a, ipu uce ō ya ku alɔ ɛ̄cī doodu. Ɔdiya a? Ohigbu ka Ujehofa i wɛ Ɔwɔico nōo gē yɔ cii ŋ, alelekwu ku nu yɔ i yuklɔ eko doodu. (Ohút. 1:2) Ohigbu ɛnyā ɛjɛɛji ikpo ku alelekwu a cika ō yɔ i yuklɔ ipu oyeeyi ku alɔ eko doodu. Ocabɔ mafu, ɔyikpo Ujemisi kahinii: ‘Ɛlā Ɔwɔicō ō cɛ̄ nɛ̄ ó lɛ úklɔ́ ŋ́ wɛ o kwú.’ (Ujɛ́m. 2:26) Ɛgɔɔma nōó wɛ mla oduudu ikpo ku alelekwu a. Eko duuma nɛ alɔ mafu uce ō ya ku alelekwu ihɔ a, alɔ gē mafu ka ikpo ku alelekwu a gē yuklɔ ipu oyeeyi ku alɔ ɔkwɔɔkwɛyi.

17. Ɔdi nɛ alɔ cika ō ya eko duuma nɛ alɔ i mafu ikpo ku alelekwu ihɔ a ŋ ma?

¹⁷ Ekoohi Ɔcɛ O Yɛce Ukraist nōo ya ubatisim ihayi alɛwa ɛ, i lɔfu bi ikpo ku alelekwu ihɔ a le yuklɔ ŋ. Ɔdā ō cɛgbá fiyɛ duu a wɛ ku a cɛ lɛ ɛ̄jɛ̄ jɛ uwɔ ŋ. Leyi yɛ ocabɔ mafu nyā. Ɔdaŋ ka ɛnɛɛnɛ ili ku uwɔ éyi nɛ a dɔka nɛhi a kwu hila, a géē jɛ ɔ kpo bonu boobu nɛɛ? Ehee. A géē ceyitikwu lɛ ɔ ga kpɔ ɔdaŋ ka ó tɔɔtɛ. Igbihi ɔɔma, a gē ceyitikwu leyi kwu ɔ lɔɔlɔhi fiyɛ eko aflɛyi a. Ɔwɛ ekponu ɔɔma, ɔdaŋ ka ó gē tɔɔtɛ gā uwɔ ō gbonɛnɛ, lɔtu, klla yihɔtu tu ācɛ ɔhá eko doodu ŋ, a hii cɛ lɛ abɔ hɛ uwa iyē ŋ. Ɔdaŋ ku a lɛ ɔcɛ ya cɔnu nɛ á kē kweyi gedee ŋ, ceyitikwu ku a lɛ ɛbɔ ya ŋma ipu ɔtu mla ɔcɛ ɔɔma, o ya ku ɛma olɔhi nɛ aa lɛ a kóō yɔ i gɔbu. Ofiyɛ duu a, lɛ ɔtu ku uwɔ yekponu ka géē ya lɔhi fiyɛ ɛcɔbu.

18. Ɔdi nɛ alɔ cika ō jé kpɔcii a?

¹⁸ Alɔ gweeye nɛhi ō lɛ ɛnɛɛnɛ ocabɔ ku Ujisɔsi! Abɔɔ alɔ gē ceyitikwu yɛce ocabɔ ku ɛgɛ nɛ ó gē gbɛla klla ya uce lɛ a, ɛgɔɔma nɛ ó gáā ta alɔ abɔ ya uce bɛɛka anu a. Abɔɔ alɔ kē yɔ i ceyitikwu ku alɔ ya uce bɛɛka Ujisɔsi a, ɛgɔɔma nɛ alɔ kē gáā yɔ i je piya ɔcɛ ɛyipɛ a tōōtɔ̄ɔ̄ a. Ipu ikpɛyi ɛlā nyā, alɔ kɛla lɛyikwu aya ɛnɛ ku ikpo ku alelekwu a. Ó géē lɔhi nɛhi ku a lɛ eko taajɛ, ku a klɔcɛ lɛyikwu aikpo ku alelekwu ohile a. Cɛɛ ku a gbɛla tu ɔ lɔɔlɔhi, ku a má ɛgɛ nɛ a yɔ i bi uwa le yuklɔ a. A klla lɔfu má aikpɛyi ɛlā ɛyɛɛyɛyi nōo kɛla lɛyikwu ikpɛyi ɛlā nyā, ipu Research Guide for Jehovah’s Witnesses ɛhaajɛ ikpɛyi ɛlā nōo kahinii: “Christian Life” mla u “Fruitage of the Spirit.” Jé kpɔcii ka ɔdaŋ ka ceyitikwu lɛ ɛji ɔfu ku uwɔ ya, Ujehofa géē ta uwɔ abɔ je piya ɔcɛ ɛyipɛ a piii.