1. Anhte a akyang lailen hpe hpa gaw madung shingkang ka-up da ai kun?

 HKALUP hkam ngut ai nau n na shi ai raitim, shaning ni grai na sai raitim, Yehowa ra sharawng ai akyang ni anhte hta nga mayu ai. Dai zawn byin na matu, anhte a myit mang ai lam hpe hkang ra ai. Myit mang ai lam gaw, akyang lailen hpe shingkang ka-up chye ai majaw re. N kaja ai ra marin ai myit hte maren ayan myit taw na nga yang, n kaja ai hku tsun hkrup, galaw hkrup chye ai. (Ehp 4:17-19) Raitim, kaja ai hku sha myit na nga yang, Wa Yehowa ra sharawng ai hte maren tsun shaga, hkawm sa lu na re.​—Gal 5:16.

2. Ndai sumhpa hta gara ga san ni hpe bawngban na kun?

² Shawng na sumhpa hta tsun wa sai hte maren, myit de shang wa ai n kaja ai myit mang lam yawng hpe koi lu na n re. Raitim, dai myit mang lam hte maren, n hkan galaw na matu gaw dawdan lu ai. Yehowa nju ndawng ai tsun shaga ai lam, galaw ai lam ni hpe hkalup n hkam shi ai kaw na koi ra ai. Gawng shing-yan dingsa hpe raw kau ai hta, dai gaw madung lam re. Raitim, Yehowa ra sharawng ai lam hpring tup lu mayu yang, ‘gawng shing-yan ningnan hpe nanhte dagraw nga mu’ ngu ai lam matsun hpe mung madat ra ai. (Kol 3:10) “Gawng shing-yan ningnan” ngu ai gaw hpa rai kun? Dai hpe gara hku hpun na kun? Gara hku makawp maga na kun? ngu ai ga san ni hpe ndai sumhpa hta bawngban na re.

3. Galati 5:22, 23 hku nga yang, “gawng shing-yan ningnan” ngu ai gaw hpa rai kun? Gara hku hpun lu na kun?

³ “Gawng shing-yan ningnan” ngu ai gaw, Yehowa a myit mang ai lam, galaw ai lam ni hpe kasi la ai hpe tsun mayu ai re.  Wenyi atsam ningja ni hpe madun ai, wenyi lam matsun hte maren, myit ai, tsun ai, galaw ai hku nna, gawng shing-yan ningnan hpe hpun lu ai. (Galati 5:22, 23 hpe hti u.) Ga shadawn, gawng shing-yan ningnan hpe hpun da ai wa gaw, Yehowa hte Shi a amyu masha ni hpe tsawra ai. (Mat 22:36-39) Mayak mahkak hkrum ai aten hta pyi matut ngwi pyaw ai. (Yak 1:2-4) Simsa lam nga hkra galaw ai. (Mat 5:9) Kaga ni hte kanawn mazum ai shaloi, myit galu ai, tsawra matsan dum ai. (Kol 3:13) Mai kaja ai lam galaw ai hpe ra sharawng ai. (Luk 6:35) Sumsing Kawa hpe teng sha kam ai lam tatut madun ai. (Yak 2:18) Tinang hpe jahte tam wa ai shaloi, akatsi sha nga nna, gunglau hkrum ai shaloi hta mung myit hpe hkang lu ai.​—1 Ko 9:25, 27; Tit 3:2.

4. Gawng shing-yan ningnan hpe hpun na matu, Galati 5:22, 23 hte kaga Chyum daw ni hta lawm ai atsam ningja yawng hpe hpa majaw shalat ra ai kun? Sanglang dan u. 

⁴ Gawng shing-yan ningnan hpun na matu, Galati 5:22, 23 hte kaga Chyum daw ni hta lawm ai atsam ningja yawng hpe shalat ra ai. * Dai atsam ningja ni gaw, langai hte langai san san byin nga ai n re. Matut mahkai nga nna, bung ai atsam ningja ni re. Ga shadawn, nang gaw masha shada da hpe tsawra na nga yang, myit galu na, matsan dum na re. Mai kaja ai wa rai yang, sumnung shingdi na, myit hpe hkang lu na re.

5. “Hkristu a amyit rawng” ai ngu ai gaw hpa hpe tsun mayu ai kun? Yesu a prat hkrun lam hpe hpa majaw hkaja ging ai kun? (1 Korinhtu 2:16)

⁵ 1 Korinhtu 2:16 hpe hti u. Gawng shing-yan ningnan hpe hpun na matu, “Hkristu a amyit rawng” ra ai. Lam mi hku tsun na nga yang, Yesu zawn myit nna, shi hpe kasi la na matu shakut ra ai. Yesu gaw wenyi atsam ningja ni hpe hpring tup madun wa ai. Ra n rawng ai jamna zawn, Yehowa a atsam ningja ni hpe shi madun dan wa ai. (Heb 1:3) Yesu zawn myit chye magang, shi zawn grau galaw lu magang rai nna, shi a lailen ni hpe grau kasi la lu magang rai na re.​—Hpl 2:5.

6. Gawng shing-yan ningnan hpun ai hta gara lam ni hpe dum ging ai kun?

⁶ Yesu a kasi ningli hpe hkan sa na matu byin mai na kun? ‘Yesu gaw hkum tsup ai. Shi zawn gaw, raw n mai byin ai’ ngu myit hkrup na re. Dai zawn hkamsha yang, ndai lam ni hpe dum u: Langai, Yehowa hte Yesu a hkrang bung sumla hte maren hpan da hkrum ai. Dai  majaw, shanhte hpe kasi la lu ai. Madang langai du hkra gaw shanhte zawn byin lu ai. (Nin 1:26) Lahkawng, Karai a chyoi pra ai wenyi gaw, ninggawn tawa hta atsam kaba htum re. Tinang a atsam hte n dang di lu ai lam ni hpe chyoi pra ai wenyi a karum shingtau lam hte galaw lu ai. Masum, wenyi atsam ningja ni hpe hpring tup madun na matu, Yehowa n myit mada ai. Tsawra myit nga ai Kawa re ai majaw, gingding aga myit mada lam nga ai ni hkum tsup wa hkra, shaning 1,000 pyi aten jaw na re. (Shr 20:1-3) Ya aten hta, Yehowa hpyi shawn ai gaw, dang lu ai daram shakut na matu, Karai a karum shingtau lam hpe kamhpa na matu re.

7. Ya, hpa lam hkaja na kun?

⁷ Yesu hpe laksan hku nna gara hku kasi la mai ai kun? Karai a chyoi pra ai atsam ningja 4 hpe kadun dawk hkaja yu ga. Langai hpra hpe hkaja ai shaloi, dai atsam ningja ni hpe Yesu madun wa ai kaw na hpa sharin la lu ai hpe chye wa na re. Gawng shing-yan ningnan hpun ai hta, kade daram rawt jat nga ai hpe chye hkra karum ya ai ga san nkau hpe mung hkaja mat wa ga.

8. Yesu gara hku tsawra myit madun wa ai kun?

⁸ Yehowa hpe Yesu grai tsawra ai majaw, Karai a matu, anhte a matu sak jaw wa ai. (Yhn 14:31; 15:13) Ginding aga hta nga ai shaloi hta mung, masha ni hpe grai tsawra ai lam tatut sakse madun wa ai. Masha nkau ninghkap tim pyi, tsawra matsan dum myit hpe shani shagu madun ai. Masha ni hpe tsawra ai lam Yesu madun ai madung lam gaw, Karai Mungdan hte seng ai lam sharin ya ai hku nna re. (Luk 4:43, 44) Yubak masha ni a lata hta, nni nkri hkrum let si hkam na matu sharawng awng wa ai. Dai lam hku nna, Karai hte masha ni hpe tingkyeng akyu n tam ai tsawra myit nga ai lam madun wa ai. Anhte yawng htani htana asak lu na matu lam hpaw ya wa ai.

9. Tsawra myit madun ai hta Yesu hpe gara hku kasi la mai ai kun?

⁹ Sumsing Kawa hpe tsawra ai majaw, anhte gaw Yehowa hpang tinang hkum tinang apnawng nna hkalup hkam ai. Dai majaw, masha ni hpe kanawn mazum ai lam hta, Yesu hpe kasi la nna Yehowa hpe tsawra ai lam sakse madun ging ai. Kasa Yawhan ndai hku ka wa ai: “Tinang mu lu ai kahpu kanau wa hpe n tsaw ra a yang gaw, tinang n mu lu ai Karai Kasang hpe tsaw ra lu na n rai.” (1 Yh 4:20) Tinang hkum tinang ndai ga san ni san mai ai: ‘Masha ni hpe ngai teng sha tsawra ai kun? Tinang a ntsa grai zai ai wa hpe pyi myit tau ya ai kun? Yehowa a lam kaga ni chye wa hkra ahkying aten, n-gun atsam hpe akyu jashawn nga ai kun? Tinang shakut shaja ai lam hpe, masha ni chyeju n dum ai (sh) ninghkap ai nga yang pyi, sharawng awng let galaw mayu ai kun? Sape shatai ai magam hta aten grau jaw lu ai lam ni hpe tam nga ai kun?’​—Ehp 5:15, 16.

10. Yesu gaw gara lam hku nna simsa lam nga hkra galaw ai wa rai kun?

¹⁰ Yesu gaw simsa lam nga hkra galaw ai wa re. Masha ni shi hpe n kaja ai hku kanawn mazum ai shaloi hta pyi, n kaja ai hku bai n htang ai. Dai sha n-ga, simsa lam nga hkra shi maga kaw nna galaw hpang ai. Ningdang hkat ai lam ni hpe hparan na matu mung, kaga ni hpe n-gun jaw ai. Ga shadawn, tinang a nawku dawjau ai lam hpe Yehowa hkap la na matu, hpunau nauna ni hte simsa hkra galaw ra ai ngu sharin ya ai. (Mat 5:9, 23, 24) Kadai grau kaba ai hte seng nna kasa ni ningdang hkat ai shaloi hta mung hparan na matu, chyahkring hkring karum ya wa ai.​—Luk 9:46-48; 22:24-27.

11. Gara lam hku nna simsa lam nga hkra galaw lu ai kun?

 ¹¹ Simsa lam nga hkra galaw ai wa byin na matu, manghkang n byin hkra koi ai daram sha n re. Kaga ni hte htuk na matu tinang maga kaw na galaw hpang ra ai. Manghkang ni hpe hparan na matu, hpunau nauna ni hpe n-gun jaw ra ai. (Hpl 4:2, 3; Yak 3:17, 18) Tinang hkum tinang ndai hku san mai ai: ‘Kaga ni hte htuk na matu ngai sharawng awng let sak jaw ai kun? Hpunau nauna langai ngai myit hkra machyi hkra galaw ai shaloi masin n si hkraw ai kun? Kaga ni sa hparan ai du hkra la nga ai kun? Kaga wa a majaw manghkang byin ai ngu shadu yang pyi, simsa hkra tinang maga kaw na shawng galaw ai kun? Htap htuk ai aten shagu, shada da bai htuk hkra hparan na matu kaga ni hpe n-gun jaw ai kun?’

12. Yesu gaw matsan dum myit hpe gara hku madun ai kun?

¹² Yesu gaw matsan dum chye ai wa re. (Mat 11:28-30) Yakhkak ai masa ni hta pyi, sumnung ai, rap ra ai lam nga ai hku nna matsan dum myit madun ai. Ga shadawn, Hponisha num gaw, kasha hpe shamai ya na matu, Yesu hpe hpyi shawn ai. Nnan hta n hkraw tim, ngang kang ai makam masham hpe mu ai shaloi, matsan dum myit hte Yesu shamai ya ai. (Mat 15:22-28) Yesu gaw matsan dum myit nga tim, ra ang yang mung sharin shaga ai. Kalang lang, ngang kang ai lam madun ai hku nna matsan dum myit madun ai. Ga shadawn, Yehowa a myit ra ai hku n galaw na matu, Petru pat shingdang ai shaloi, kaga sape ni a man hta shi hpe sharin shaga ai. (Mrk 8:32, 33) Dai hku galaw ai gaw, Petru hpe kaya jahkrum na matu n re. Shi hpe shaman ya na matu, kaga sape ni mung n gumrawng wa hkra sadi jaw na matu re. Petru myit n pyaw mat na raitim, sharin shaga ai lam kaw na akyu lu wa ai.

13. Gara ladat hte matsan dum myit madun mai ai kun?

¹³ Tsawra ai ni hpe matsan dum myit madun na matu, kalang lang dan dan leng leng tsun ra chye ai. Dai hku tsun ai shaloi, Chyum Laika npawt tara ni hpe madung tawn ai hku nna Yesu hpe kasi la u. Sumnung shingdi u. Jaw ai hpe shanhte galaw mayu ai hpe kam u. Yehowa hte nang hpe tsawra yang, na a hpaji jaw ga hpe madat na hpe kam u. Tinang hkum tinang ndai hku san u: ‘Tsawra ai marai langai shut ai lam galaw nga ai hpe mu ai shaloi, shading sharai gwi ai kun? Hpaji jaw nna sharin shaga ra ai shaloi, matsan dum myit hte tsun ai kun? (sh) Laja lana tsun ai kun? Gara myit jasat hte hpaji jaw ai kun? Pawt ai majaw kun? (sh) Shi akyu lu na matu kun?’

14. Yesu gara hku mai kaja ai lam galaw ai kun?

¹⁴ Yesu gaw mai kaja ai lam hpe chye ai sha n-ga, tatut mung madun wa ai. Kawa hpe tsawra ai majaw, jaw ai hpe myit majing hte ayan galaw ai. Mai kaja ai lam gaw, kaga ni hpe akyu shabyin ya lu ai. Mai kaja ai wa gaw, kaga ni hpe karum ya lu ai lam ni hpe tam nna, karum ya ai. Jaw ai hpe chye ai hte sha n hkum tsup ai. Jaw ai hpe myit majing hte galaw ra ai. ‘Jaw ai hpe n kaja ai myit hte galaw lu ai kun?’ ngu nna nkau san yang san na re. Galaw lu ai. Ga shadawn, matsan mayan re ai ni hpe gam jaw gam ya tim, masha ni chye hkra jaw ai ni a lam Yesu tsun ai. Dai zawn, masha yu tsawm hkra galaw ai mai kaja ai lam ni hpe Yehowa n ra sharawng ai.​—Mat 6:1-4.

15. Gara lam hku nna mai kaja ai masha ajet byin mai ai kun?

¹⁵ Jaw ai hpe tingkyeng akyu n tam ai sha galaw yang she, mai kaja ai masha ajet byin na re. Dai majaw, ‘jaw ai hpe chye ai sha n-ga, tatut galaw nga ai kun? Gara myit jasat hte galaw nga ai kun?’ ngu tinang hkum tinang san u.

16. Shani shagu hpa galaw ging ai kun? Hpa majaw kun?

¹⁶ Hkalup hkam ai aten hta, gawng shing-yan ningnan hpe tsep kawp hpun ngut sai ngu n myit ging ai. “Palawng nnan” zawn, gawng shing-yan ningnan hpe mung makawp maga ra ai. Makawp maga lu ai lam langai gaw, wenyi atsam ningja ni hpe shani shagu madun ai hku nna re. Hpa majaw kun? Dai atsam ningja ni hpe grau madun yang, Yehowa a chyoi pra ai wenyi mung anhte hpe grau nna karum ya na re. Yehowa gaw chyoi pra ai wenyi hpe akyu jashawn nna, yawng mayawng hpe tatut galaw ai. (Nin 1:2) Dai majaw, anhte mung tatut madun ra ai. Ga shadawn, “makam masham hta mung, magam bungli n lawm yang gaw, chyasi rai nga ai” ngu sape Yaku tsun ai. (Yak 2:26) Karai a wenyi asi n si yang mung dai hte maren sha re. Wenyi asi si shagu anhte hta chyoi pra ai wenyi nga ai hpe madun nga ai re.

17. Wenyi asi n si lu ai shaloi gara hku galaw ging ai kun?

¹⁷ Hkalup hkam ngut ai shaning ni grai na sai Hkristan ni pyi, wenyi asi n si lu ai aten ni nga chye ai. Raitim, asum hkum jaw. Ndai ga shadawn hpe yu yu ga. Anhte grai ra ai palawng je mat yang, kalang ta kabai kau na kun? N kabai kau ai. Dang lu ai daram bai kaja hkra chywi na re. Moi na hta grau sadi na re. Dai zawn sha, marai langai ngai hpe matsan dum myit, tsawra myit, myit galu ai lam ni n lu madun ai shaloi myit hkum daw. Shi hpe myit majing hte hpyi nem u. Rai yang, hku hkau lam bai kaja wa na re. Htawm hpang, dai hta grau kaja hkra shakut na matu dawdan da u.

18. Hpa hpe kam mai ai kun?

¹⁸ Yesu a kasi ningli a matu anhte grai chyeju dum ai. Shi a myit mang lam, myit jasat ni hpe kasi la magang, shi zawn galaw na matu, grau loi wa magang rai na re. Gawng shing-yan ningnan hpe mung, grau lu hpun magang rai na re. Wenyi asi 4 a lam hpe ndai sumhpa hta bawngban wa sai. Kaga wenyi asi ni hpe mung, aten la nna myit sawn sumru u. Dai atsam ningja ni hpe gara hku madun nga ai hpe mung san jep u. Yehowa Sakse Ni A Matu Hkaja Lam Matsun (Myen) “Hkristan Prat” “Wenyi Asi” ngu ai ga baw npu hta, sumhpa ni hpe mu lu ai. Gawng shing-yan ningnan hpe hpun na matu, matut hpun na matu, dang lu ai daram shakut yang, Yehowa karum ya na hpe kam mai ai.