ATUAQQISSAAGASSAQ 11
‘Kinaassuseq nutaaq’ atisimajuaruk
‘Kinaassuseq nutaaq atisiuk.’ – KOL 3:10.
ERINARSUUT 49 Jehovap uummataa nuannaartitsigu
QILANAARTUUT *
1. Pingaarnertut suna kinaassusitsinnut sunniisarpa?
QANORLUUNNIIT sivisutigisumik Nalunaajaasuusimagaluarutta tamatta Jehovap iluarisaanik kinaassuseqarusuppugut. Taama ittumik kinaassuseqassagutta eqqarsaatigut aqussinnaasariaqarpagut. Sooq? Eqqarsaatigut kinaassusitsinnut sunniisarmata. Assersuutigalugu pilerissusipiluit eqqarsaatigiinnaavikkutsigit ajortunik oqaaseqarlutalu iliuuseqassaagut. (Ef 4:17-19) Paarlattuanilli ajunngitsut eqqarsaatigisarutsigit Jehovap iluarisaatut oqalullutalu pissusilersornissarput ajornannginnerussaaq. – Gal 5:16.
2. Apeqqutit suut allaaserisami matumani eqqartussavagut?
2 Allaaserisap siuliani eqqaaneqartutut eqqarsaatit ajortut piivissinnaanngilagut. Aalajangersinnaavugulli eqqarsaatit taakku timitalerniarnagit. Imermut morsutsinneqanngikkallaratta Jehovap uumigisaatut oqaluttarneq iliuuseqartarnerlu taamaatittariaqarsimavagut. Taakkulu kinaassusitoqqap iperarnissaanut iliuuserisatta pingaarnersaraat. Jehovali nuannaartinnerussagutsigu una maleruartariaqarparput: ‘Kinaassuseq nutaaq atisiuk.’ (Kol 3:10) Allaaserisami matumani apeqqutit uku eqqartussavagut: ‘Kinaassuseq nutaaq’ sunaava? Qanoq atisinnaavarput, qanorlu iperarnaveersaarsinnaavarput?
‘KINAASSUSEQ NUTAAQ’ SUNAAVA?
3. Galaatiamiut 5:22, 23-lu naapertorlugit ‘kinaassuseq nutaaq’ sunaava, qanorlu taamatut kinaassuseqalersinnaavugut?
3 Inuup ‘nutaamik kinaassusillip’ Jehovap pissusii eqqarsartaasialu ilaartarpai. Guutip anersaavanit sunnerneqarluni eqqarsartaatsimigut, misigissutsimigut iliuutsimigullu anersaap inerititaanik ersersitsisarpoq. (Galaatiamiut 5:22, 23 atuakkit). Assersuutigalugu Jehovamik taassumalu innuttaanik asannippoq. (Mat 22:36-39) Misilinneqaraluaraangamiluunniit nuannaarnini attattuarpaa. (Jaak 1:2-4) Eqqissisitsiniartuuvoq. (Mat 5:9) Inoqatiminut kamagittarlunilu inussiarnersuuvoq. (Kol 3:13) Ajunngitsut nuannaralugillu iliuuserisarpai. (Luk 6:35) Iliuutsimigut ersersittarpaa Ataataminut qilammiusumut upperluartuulluni. (Jaak 2:18) Aamma kamassaarneqaraangami saamajuarpoq ussernartorsiornerminilu imminut aqussinnaasarluni. – Kor 1. 9:25, 27; Tit 3:2.
4. Kinaassuseq nutaaq atissagutsigu pissuserisassat Galaatiamiut 5:22, 23-milu eqqaaneqartut ataasiakkaarlugit ineriartortissavagut? Nassuiaruk.
4 Kinaassuseq nutaaq atissagutsigu pissuserisassagut Galaatiamiut 5:22, 23-milu aamma allassimaffinni allani eqqaaneqartut ineriartortittariaqarpagut. * Pissusit taakku imminnut ataqatigiimmata ataasiakkaarlugit atineqarsinnaanngillat. Assersuutigalugu inoqatigut ilumoorluta asagutsigit kamagittarfigalugillu inussiarnisaarfigissavagut. Aamma ajunngitsuugutta saamasuussaagut imminullu aqussinnaassalluta.
KINAASSUSEQ NUTAAQ QANOQ ATISINNAAVARPUT?
Jiisusitut eqqarsartaaseqarneruleraangatta taassuma pissusii ilaarsinnaanerulertarpagut (Immikkoortut 5, 8, 10, 12, 14 takukkit)
5. ‘Kristusitut eqqarsartaaseqarneq’ qanoq paasisariaqarpa, aamma sooq Jiisusip inuunera pillugu ilinniartariaqarpugut? (Korintimiunut 1. 2:16)
5 Korintimiunut 1. 2:16 atuaruk. Kinaassuseq nutaaq atissagutsigu ‘Kristusitut eqqarsartaaseqartariaqarpugut’. Tassa Jiisusi ilaassagutsigu taassuma eqqarsartaasia ilinniartariaqarparput. Guutip anersaavata inerititaanik tamakkiisumik Jiisusi ersersitsisarpoq. Jehovap pissusii ilaaqqissaartarpai. (Hebr 1:3) Jiisusitut eqqarsartaaseqarnerujartortilluta taassumatut pissuseqarnerujartulissaagut. – Flp 2:5.
6. Kinaassutsip nutaap atiniarnerani suut eqqaamasariaqarpagut?
6 Immaqa eqqarsarputit Jiisusi naammalluinnartuummat illit ilaarsinnaanaviarnagu. Taama misigiguit uku eqqarsaatigikkit. Siullertut, Jehova Jiisusilu ilaarlugit pissuseqarsinnaanngorlutit pinngortitaavutit. Tassa taakku ilaarniarlugit aalajangeruit amerlanertigut iluatsissinnaavutit. (Mos 1. 1:26) Aappaattut, Guutip anersaava nukiuvoq allanit tamanit sunniisinnaanerpaaq. Taanna iluaqutigalugu illit nammineerlutit naammassisinnaanngisatit naammassisinnaassavatit. Pingajuattut, Jehovap piumaffiginngilaatit anersaap inerititaanik kukkunngivillutit ersersitsisassasutit. Ataatatta asannittup inuit nunarsuarmiinnissaminnik neriugisallit ukiunik 1.000-nik naammalluinnartunngornissaannik periarfississavai. (Saqq 20:1-3) Jehovap piumasariinnarpaa uagut tamatta sapinngisatsinnik iliuuseqartarlutalu taanna tunaarissagipput.
7. Suut maanna sammilerpagut?
7 Jiisusi qanorpiaq ilaarsinnaavarput? Anersaap inerititaasa ilaat sisamat maanna sammilaassavagut. Paasissavarput Jiisusip pissusit taakku qanoq ersersikkai qanorlu ilinniarfigisinnaanerlutigu. Aamma apeqqutit kinaassutsip nutaap atiniarnerani iluaqutigisinnaasagut misissoqqissaassavagut.
8. Jiisusip asanninnini qanoq ersersippaa?
8 Jiisusi Jehovamik qamannga pisumik asannikkami taanna pillugu uagullu pilluta pilliuteqartarpoq. (Joh 14:31; 15:13) Nunarsuarmiikkallarami inooriaatsimigut ersersippaa inunnik qanoq asannitsigaluni. Ullut tamaasa asannittuliortarlunilu misiginneqataasarpoq, allaat akerlilersorneqaraluaraangami. Asannittuliornerisa pingaarnersaasa ilagaat inunnik Guutip kunngeqarfianik ilinniartitsinini. (Luk 4:43, 44) Aamma inunnit ajortunit naalliutsitaanissani toqutaanissanilu akuerigamiuk Guutimik inunnillu asanninnini uppernarsarpaa. Taamaaliornermigut naassaanngitsumik inuunissamik tamatsinnut ammaassivoq.
9. Jiisusi ilaarlugu qanoq asanninnermik ersersitsisinnaavugut?
9 Ataatarput qilammiusoq, Jehova, asagatsigu tassunga tunniulluinnarpugut imermullu morsutsinneqarluta. Taamaattumik Jiisusi ilaarlugu inunnik ajunngitsumik pinnittarnitsigut Jehovamik asanninnerput ersersittariaqarparput. Apustili Johannesi ima allappoq: ‘Qatanngutiminik takusimasaminik asanninngitsup Guuti takusimanngisani asasinnaanngilaa.’ (Joh 1. 4:20) Apeqqutit uku eqqarsaatigikkit: ‘Inuit qamannga pisumik asavakka? Allaat ajortumik pigaluaraangaminnga saamaffigiinnartarpakka? Asanninnera killitsissutigalugu piffissara pigisakkalu Jehova pillugu ilinniartitsinermut atortarpakka, aamma inuit amerlanersaasa qujamasuutiginngikkaluaraat immaqalu allaat akerlilersuigaluartut? Oqaluussinermi ilinniartitsinermilu peqataanerujumallunga periarfissarsiorsinnaavunga?’ – Ef 5:15, 16.
10. Jiisusi qanoq eqqisseqateqarnissamik siuarsaasarpa?
10 Jiisusi eqqisseqateqarnissamik siuarsaasarpoq. Ajortumik pineqaraangami akiniaaneq ajorpoq. Tamatuma saniatigut allat eqqisseqatigiinnermik siuarsaaqataanissaannut kajumissaartarpai. Assersuutigalugu inuup guutisiornermini Jehovamit iluarisaarusuttup qatanngutimi eqqisseqatigeqqaarnissaa Jiisusip ilinniartitsissutigaa. (Mat 5:9, 23, 24) Aamma apustilit arlartik kina annerpaanersoq assortuussutigileraangassuk eqqisseqatigiinnissaannut ikiortarpai. – Luk 9:46-48; 22:24-27.
11. Eqqissinermik qanoq siuarsaaqataasinnaavugut?
11 Eqqisseqateqarnissamik siuarsaaneq isumaqatigiinnginnernik pinaveersaarinerinnaanngilaq. Allat eqqisseqatigiumallugit iliuuseqaqqaartariaqarpugut qatanngutigullu isumaqatigiinngitsut eqqisseqatigiinnissaannik kajumissaarlugit. (Flp 4:2, 3; Jaak 3:17, 18) Apeqqutit uku eqqarsaatigikkit: ‘Allat eqqisseqatigiumallugit iliuuseqariaannaavunga? Uppeqatinnit misigissutsikkut annersinneqaruma kamaattuassavara? Misigigama taanna ajornartorsiummut pisuusoq eqqisseqatigiumallunga iliuuseqarnissaa utaqqissavara, imaluunniit uanga iliuuseqaqqaassaanga? Naleqqukkaangat isumaqatigiinngissuteqartut eqqisseqatigiissikkumallugit kajumissaartarpakka?’
12. Jiisusi qanoq inussiarnersuua?
12 Jiisusi inussiarnersuuvoq. (Mat 11:28-30) Pissutsit ajornakusooraluaraangataluunniit saamasuunermigut naleqqussarsinnaasarnermigullu inussiarnisaartarpoq. Assersuutigalugu arnap Fønikiamiup panini ajorunnaarseqqullugu kimigiiserfigimmani Jiisusi kissaatigisaatut aallaqqaammut iliunngilaq, arnalli uppersuseqarnini ersersimmagu pania ajorunnaarsippaa. (Mat 15:22-28) Jiisusi inussiarnersuugaluarluni oqaaqqissaarisarpoq. Ilaatigummi asasaminut taamaaliornermigut inussiarnisaartarpoq. Assersuutigalugu Jehovap piumasaatut Jiisusi iliorniarluni Petrusimit nangartarneqaraluarami ilinniartitani allat tusaatillugit taanna naqqippaa. (Mak 8:32, 33) Petrusi nikanarsarniarlugu taamaaliunngilaq. Ilinniartikkusukkamiulli ilinniartitallu allat makitalinnginnissaannik mianersoqqorusukkamigit taamaaliorpoq. Soorunami Petrusip oqaaqqissaarneqarnini kanngutsissutigisimassavaa, iluaqutigivaali.
13. Qanoq inussiarnersuusinnaavugut?
13 Asasatit inussiarnisaarfigiumallugit ilaannikkut oqaaqqissaartariaqarsinnaavatit. Taamaappat Jiisusi ilaarlugu najoqqutassiat Guutip oqaasianiittut tunngavigisakkit. Saamasumik oqalugit. Aamma upperiuk ajunngitsuliorusuttut asanninnertillu tunngavigalugu oqaaqqissaarininnut ajunngitsumik qisuariassasut. Apeqqutit uku eqqarsaatigikkit: ‘Asasama ilaat ajortuliortoq takugukku oqarfigissallugu sapissanngilara? Oqaaqqissaarisariaqaraangama inussiarnersumik oqaluttarpunga, imaluunniit sukannersumik? Sooq oqaaqqissaarisarpunga? Oqaaqqissaagara uumitsaakkakku, imaluunniit ikiorusukkakku?’
14. Jiisusi qanoq ajunngitsuliortarpa?
14 Jiisusip suut ajunngitsuunersut ilisimaannarnagit iliuuserisarpai. Ataatani asagamiuk ajunngitsuliortuaannarpoq pissutiginiagaalu ajunngitsuujuaannarluni. Inuup ajunngitsuusup allat ikiorniartarlugillu ajunngitsuliorfigisarpai. Eqqortuliornissaq nalunagu naammanngilaq, ajunngitsumilli pissutiginiagaqarluta eqqortumik iliuuseqartariaqarpugut. Immaqali ima eqqarsarputit: ‘Ajortumik pissutiginiagaqarluni ajunngitsuliortoqarsinnaagami?’ Aap. Assersuutigalugu inuit malugeqqusaarlutik piitsunut tunissuteqartartut Jiisusip eqqaavai. Iliuusaat ajunngitsuugaluartoq Jehovap inuit taakku iluarinngilai. – Mat 6:1-4.
15. Qanoq ajunngitsuusinnaavugut?
15 Namminissarsiorata eqqortuliortarutta ajunngitsuussaagut. Imminut ima aperisinnaavutit: ‘Ajunngitsuliornissara eqqarsaatigiinnarnagu timitaliisarpunga? Suna pissutiginiagarisarpara?’
KINAASSUSEQ NUTAAQ QANOQ ATISIMAJUARSINNAAVARPUT?
16. Ullut tamaasa susariaqarpugut, aamma sooq?
16 Eqqarsarnaveersaartariaqarpugut imermut morsutsinneqaratta kinaassuseq nutaaq atilluinnaripput taamaattumillu sulissutigisariaqarnagu. Atisimajuarniartariaqarparpulli. Ilaatigut taamaaliorsinnaavugut ullut tamaasa Guutip anersaavata inerititaanik ersersitsiniartarnikkut. Sooq taamaappa? Jehova Guutiummat anersaani atorlugu iliuuseqartartoq. (Mos 1. 1:2) Tassa nammineq iliuuseqaraangatta anersaava sunniuteqartillugulu iluaqutigisarparput. Assersuutigalugu Jaaku ima allappoq: “Iliuuseqarnani upperneq toqungavoq.” (Jaak 2:26) Taamatuttaaq Guutip anersaavata inerititai tamaasa pillugit oqartoqarsinnaavoq. Iliuuseqarnitsigut anersaap inerititaanik ersersitsigaangatta uppernarsartarparput Guutip anersaava sunniuteqartittarlutigu.
17. Anersaap inerititaanik ersersitsinngitsooraangatta qanoq iliortariaqarpugut?
17 Kristumiut ukiorpassuarni Nalunaajaasooreeraluarlutik ilaannikkut anersaap inerititaanik ersersitsinngitsoorsinnaapput. Tunniutiinnannginnissarli pingaaruteqarpoq. Ima assersuusiorsinnaavugut. Atisanni nuannarinerpaasat siittoorukku ingerlaannaq igissaviuk? Ilaa naamik? Ilimanarporli sapinngisannik ilaartorniarsarissagit kingornalu mianersuunnerullugu. Tamatumunnga assingusumik uppeqatit inussiarniitsuliorfigisimagukku, kamaffigisoorsimagukku uumitsaffigisoorsimagukkuluunniit nikalloqinak. Qamannga pisumik utoqqatserfigigukku attaveqarfigilluaqqilersinnaavat. Kingorna ajunnginnerusumik iliuuseqartarnissat eqqumaffigiuaruk.
18. Suna qularissanngilarput?
18 Jiisusip maligassiuinera qujamasunnangaarami! Eqqarsartaasia ilaarneruleraangatsigu taassumatut pissusilersornissaq ajornannginnerulertarpoq. Jiisusilu ilaarlugu pissusilersornerujartortilluta kinaassutsip nutaap atinissaa ajornannginnerulertarpoq. Guutip anersaavata inerititaasa immikkoortui sisamaannaat allaaserisami matumani sammereerpagut. Soormi sinneri misissorukkit eqqarsaatigalugulu taakku inuuninni qanoq ersersilluartigisarnerlugit? Allaaserisat taakkununnga tunngasut Jehovap Nalunaajaasuisa ujarliutaat-ni nanisinnaavatit, toorukku “Kristumiutut inooriaaseq” taavalu “Anersaap inerititaa”. Qularissanngilat kinaassutsip nutaap atinissaa atisimajuarnissaalu ilungersuutigigukku Jehovap ikiorumaaraatit.
ERINARSUUT 35 ‘Suut pingaarnerusut qulakkeertigit’
^ par. 5 Qanorluunniit tunuliaqutaqaraluarutta tamatta ‘kinaassuseq nutaaq’ atisariaqarparput. Taamaaliorumalluta eqqarsartaaserput Jiisusip eqqarsartaasianut naleqqussarniartuartariaqarparput. Jiisusip eqqarsartaasia iliuusiilu allaaserisami matumani sammissavagut. Aamma eqqartussavarput imermut morsutsinneqareeraluaruttaluunniit qanoq ilaarniartuarsinnaaneripput.
^ par. 4 Guutip anersaava iluaqutigalugu pissusit ineriartortissinnaasagut tamarmik Galaatiamiut 5:22, 23-milu allaatigineqanngillat. Paasisaqarnerorusukkuit takuuk Napasuliaq Alapernaarsuiffik juuni 2020-moortumi allaaserisaq “Atuartartut apeqqutaat”.