1. Ihi ifwinyisa dingi o ukexilu wetu?

 KIKALE se atubatizala kindala mba ukulu kya, etwenyoso twamesena kukala ni ukexilu wazolo Jihova. Phala kukala athu a ukexilu yú, twabhingi kulanga o ixinganeku yetu. Mukonda dyahi? Mukonda o ixinganeku yetu ifwinyisa kyavulu o ukexilu wetu. Se mu ithangana yoso tuxinganeka kubhanga o jihanji jetu ja xitu, twandazwela ni kubhanga ima yayibha. (Efe. 4:17-19) Maji se tu zalesa o kilunji kyetu ni ixinganeku yambote, kikyandatubhonza kuzwela ni kubhanga o ima mu ukexilu usangulukisa Tata yetu, Jihova.—Nga. 5:16.

2. Ibhwidisu yebhi itwandadilonga mumilongi yiyi?

² Kala ki twadilongo mumilongi yatundumu, etu kitutena kufidisa o ixinganeku yoso yayibha kubokona mu kilunji kyetu. Maji tutena kusola kudituna kubhanga o ima ituxinganeka. Ande dya kutubatizala, twabhingi kweha kya o uzwelelu ni ibhangelu yazembe Jihova. Kiki kyene o kima kyadyanga, kyabetadingikota mukuzula o ukexilu wokulu. Maji phala kusangulukisa kyambote Jihova, twatokala we kubelesela o kitumu kiki: “Zwatenu o ukexilu wa ubhe.” (Kol. 3:10) Mumilongi yiyi, twandatambwijila o ibhwidisu yakayela: “O ukexilu wa ubhe” ihi? Kyebhi ki tutena kuzwata o ukexilu wa ubhe ni kukalanawu jinga?

3. Kala kilondekesa Ngalásya 5:22, 23, “o ukexilu wa ubhe” ihi? Kyebhi o muthu kyatena kukalanawu?

³ “O ukexilu wa ubhe,” kifwa, ukexilu wengi wakuxinganeka ni kubhanga o ima mukukayela o idifwa ya Jihova. O muthu ulondekesa kwila wazwata o ukexilu wa ubhe, mukulondekesa o idifwa yakibundu kya nzumbi ikôla ya Nzambi, mukwehela o  nzumbi ikôla kufwinyisa o ixinganeku, o ukexilu udivwa ni ibhangelu yê. (Tanga Ngalásya 5:22, 23.) Mukifika, mwene uzola Jihova ni mundu Wê. (Mat. 22:36-39) O muthu wakidifwa kiki usanguluka né mwene kyoso kyadibhana ni ibhidi. (Tiya. 1:2-4) Mwene usota o kutululuka. (Mat. 5:9) Mwene mukwa mwanyu, utalatala kyambote akwá. (Kol. 3:13) Mwene wazolo o mbote, usota ku ibhanga. (Luka 6:35) Bhukaxi ka ibhangelu, mwene ulondekesa kwila wala ni kixikanu kyakolo kwa Tata yê yadyulu. (Tiya. 2:18) Kyoso kyamulokalala, utululuka; kyoso kyadibhana ni jitendasá, ulanga o jihanji jê.—1 Kol. 9:25, 27; Titu 3:2.

4. Mukonda dyahi twatokala kulondekesa o idifwa yoso yotumbule mu Ngalásya 5:22, 23 ni mu jimbandu jamukwa ja Bibidya, phala kuzwata o ukexilu wa ubhe? Jimbulula.

⁴ Phala kuzwata o ukexilu wa ubhe, twabhingi kukala ni idifwa yotumbule mumukanda ku akwa Ngalásya 5:22, 23 ni mu jimbandu jamukwa ja Bibidya. * O idifwa yiyi kiyadifu ni izwatu, sayi ithangana tu izwata, mu ithangana yamukwa tu ikatula. Mukidi, o idifwa yiyi yadifwe ngó ni idifwa yamukwa yotumbule mu Bibidya. Mukifika, se eye wazolo mukidi o jivizinyu jê, wanda kwa akwatela mwanyu ni kwa atalatala kyambote. Phala kubhanga o mbote ni kidi kyoso, watokala kulenduka ni kuditumina o jihanji.

5. Ihi ilombolola kukala ni “kilunji kya Kidistu,” ni mukonda dyahi twatokala kudilonga yalungu ni mwenyu wa Jezú? (1 Kolindu 2:16)

⁵ Tanga 1 Kolindu 2:16. Phala kuzwata o ukexilu wa ubhe twabhingi kukala ni “kilunji kya Kidistu.” Mu izwelu yamukwa, kifwa, twatokala kudilonga kyebhi kixinganeka Jezú ni kumukayela. Jezú walondekesa o idifwa ya nzumbi ya Nzambi mu ukexilu watenena. Kala lumwenu lwatenena, mwene walondekesa kyambote o idifwa ni ukexilu wa Jihova. (Jihe. 1:3) Kyoso ki tuya ni kuxinganeka kala Jezú, twandabhanga dingi ima yambote kala mwene ni kuditunda kyambote mukulondekesa o idifwa yê.—Fil. 2:5.

6. Mukusota kuzwata o ukexilu wa ubhe, ihi itwatokala kulembalala?

⁶ O kwila tutena mwene kukayela o phangu ya Jezú? Nange tutena kuxinganeka: ‘Jezú wexile muthu wayuka. Eme nuka ngandatena  kusokela nê!’ Se kyene ki wamudivwa, lembalala o ima yiyi. Kyadyanga, eye akubhange phala kudifwa ni Jihova ni Jezú. Kyenyikiphe, eye wala ni kutena kwakukayela o idifwa yâ, sumbala umukwa ituxi. (Dim. 1:26) Kayadi, o nzumbi ikôla ya Nzambi yene yabetakota kukala ni nguzu mungongo yoso. Ni kikwatekesu kiki, eye utena kubhanga ima nuka wejitena ku ibhanga munguzu yê. Katatu, Jihova kakingila kwila eye ulondekesa o idifwa ya nzumbi ni kuyuka kwoso. Mukidi, o Tata yetu ya henda wandakingila 1.000 ya mivu phala athu yó ala ni kidyelelu kyakukala ni mwenyu wakalelaku mu ixi kukituka athu ayuka. (Dij. 20:1-3) Kindala kiki, Jihova wamesena ngó kwila, tubhanga yoso itutena, tudyelela we kwa mwene.

7. Ihi itwandadilonga kindala kiki?

⁷ Mu maukexilu ebhi mu tutena kukayela o phangu ya Jezú? Twandazwela bhofele yalungu ni maukexilu awana a idifwa ya nzumbi ya Nzambi. Mu idifwa yoso twandamona o mbote itukatula mu ukexilu wa Jezú walondekesa o idifwa yiyi. Kyoso ki twandaya ni kubhanga kiki, twandadilonga ibhwidisu yandatukwatekesa kutonginina se twamukayela mwene kyambote o idifwa ya nzumbi ikôla ya Nzambi.

8. Kyebhi Jezú kyalondekesa o henda?

⁸ Jezú wazolo kyavulu Jihova, kiki kyene kyamubhangesa kudibhakula kala sata phala kuzelesa o dijina dya Tat’ê ni kutubhulula. (Nzwá 14:31; 15:13) Jezú walondekesa o henda yonene yakwatela o athu mu ukexilu wambata o mwenyu wê mu ixi. Mu ithangana yoso, mwene wexile mulondekesa henda ni kulendukila katé mwene o jinguma jê. Ukexilu umoxi wabetakota walondekesa o henda ku athu, o kwalonga yalungu ni Utuminu wa Nzambi. (Luka 4:43, 44) Jezú walondekesa o henda yadikota yakwatela kwa Nzambi ni athu, mukuxikina kutala o hadi ni kumujibha ku athu akwa ituxi. Mukubhanga kiki mwene wajikula o njila, phala etwenyoso tutene kukala ni mwenyu wakalelaku.

9. Kyebhi kitutena kukayela o phangu ya Jezú mukulondekesa o henda?

⁹ Etu twadibhakula ni kudibatizala mukonda twazolo Jihova, Tata yetu yadyulu. Kyenyikiphe, kala kyabhange Jezú, twatokala kulondekesa o henda kwa Jihova mu ukexilu ututalatala o athu. Poxolo Nzwá wasoneka: “Woso kazolo phang’yê wene mu mumona, katena kuzola Nzambi kene mu mumona.” (1 Nzw. 4:20) Tutena kudibhwidisa: ‘O kwila ngazolo ni muxima woso o athu? O kwila ngilondekesa kilendu mukudibhana ni akwetu, né mwene se angitalatala kyayibha? O kwila o henda ingibhangesa kungastala o kithangana ni jimbote jami phala kukwatekesa akwetu kwijiya Jihova? O kwila ngixikina kubhanga kiki, né mwene se athu avulu kalondekesa kisakidilu mu nguzu ingibhanga mba angizukutisa? O kwila ngitena kusota jindunge phala kungastala dingi kithangana mu kikalakalu kya kubhanga maxibulu?’—Efe. 5:15, 16.

10. Kyebhi Jezú kyalondekesa kwila wexile mukwa kusota o kutululuka?

¹⁰ Jezú wexile mukwa kusota o kutululuka. Kyoso athu kyamutalatala kyayibha, mwene kavutula phonzo. Maji mwene wabhange dingi kima kyengi. Mwene wasoto kukala ku paze ni akwâ, waswinisa we akwa kubatula o maka mâ. Mukifika, mwene wa alongo kwila, phala Jihova kuxikina o ubhezelu wâ, ene atokalele kukala kupaze ni akwâ. (Mat. 5:9, 23, 24) Mu veji javulu, Jezú waswinisa o jipoxolo jê phala kazoke, mukusota kwijiya se nanyi wabetakota mukaxi kâ.—Luka 9:46-48; 22:24-27.

11. Kyebhi kitutena kukala tu akwa kusota o kutululuka?

¹¹ Phala kukala tu akwa kusota o kutululuka, twatokala kubhanga dingi kima, o kulenga ngó kuzoka ni akwetu kikusoko. Twabhingi kubhanga nguzu phala kukala ni kutululuka ni akwetu,  twatokala we kuswinisa o jiphange jetu phala kubatula o maka ni akwâ. (Fil. 4:2, 3; Tiya. 3:17, 18) Tutena kudibhwidisa kiki: ‘Ihi ingixikina kuxisa kudima phala kukala kupaze ni akwetu? O kwila ngene mubhaka phonzo kyoso phange kyangiluwalesa? O kwila ngikingila mukwetu kubhinga muloloki inga ngidyanga kusota kukala kupaze, né mwene se kyedi kala mukwetu mwéne wamateka o maka? Se kibhana, o kwila ngene muswinisa akwetu kubatula o maka mudyâ?’

12. Kyebhi Jezú kya londekesa o henda?

¹² Jezú wexile mukwa kubhanga mbote. (Mat. 11:28-30) Mwene walondekesa o mbote ni kilendu, né mwene mu ithangana yabhonzo. Mukifika, kyoso muhatu mukwa Fenixa kya mubhingi phala kusaka mon’ê, kudimatekenu, Jezú waditunu kusaka o mona. Maji kuma o muhatu walondekesa kixikanu kyadikota, ni henda yoso, mwene wasake o mona. (Mat. 15:22-28) Sumbala wexile mukwa henda, Jezú kexile ni hele yakubhana itendelesu. Sayi ithangana mwene walondekesa o henda yê, mukuzwela sé hele, ni yó azolele. Mukifika, kyoso Phetele kyasoto kumufidisa kubhanga o vondadi ya Jihova, Jezú wamubazela bhupholo ya maxibulu amukwa. (Mál. 8:32, 33) Mwene kabhange kiki phala kutolesa Phetele, kana; maji wakibhange phala kumulonga ni kudimuna o maxibulu amukwa ku kilwezu kya kubhanga o ima sé kuxinganeka. Sé phata, kiki kyabhekela jisonyi kwa Phetele, maji mwene wakatula mbote mu kibazelu.

13. Kyebhi kitutena kubhanga o mbote ni muxima woso?

¹³ Phala kubhanga o mbote kwa yó utwazolo, sayi ithangana kubhinga kwa abazela. Mukubhanga kiki kayela o phangu ya Jezú, mukubazela bhukaxi ka Mak’â Nzambi. Zwela ni kilendu. Sota kwa atala mu ukexilu wambote, dyelela kuma ene azolo Jihova, andaxikina o kibazelu kyé kya henda. Utena kudibhwidisa: ‘O kwila ngenemukala ni woma wakuzwela kima se ngimona muthu ungazolo kubhanga kima kyayibha? Se kubhinga kubazela, o kwila ngene muzwela ni kilendu, inga ngizwela ni kuthathamana? Ihi ingibhangesa o kubazela? O kwila ngibazela mukonda ngathathamana ni muthu, inga ngamesena ngó mwene o mbote yê?’

14. Kyebhi Jezú kyalondekesa o mbote?

¹⁴ Jezú kejidile ngó o ima yambote, maji wexile mu ibhanga we. Jezú wazolo Tat’ê, kyenyiki, mu ithangana yoso wexile mubhanga o ima yambote ni muxima wambote. O mukwa kubhanga o mbote, usota maukexilu akukwatekesa akwa, ukibhanga phala o mbote yâ. Kitwatokala ngó kwijiya o kima kyafwama o kubhanga, maji twatokala kukibhanga ni muxima woso. Maji sayi muthu utena kudibhwidisa: ‘O kwila o muthu utena kubhanga o kima kyambote ni muxima wayibha?’ Kyene, utena. Mukifika, Jezú wazwela yalungu ni athu exile mubhana maujitu kujingadyama, maji exile mukibhanga bhupholo dya athu amukwa phala kwa aximana. Sumbala yexile ibhangelu yambote, Jihova kasangulukile ni maujitu yá.—Mat. 6:1-4.

15. Kyebhi kitutena kubhanga o mbote ni kidi kyoso?

¹⁵ Tutena ngó kubhanga o mbote ni kidi kyoso, se tukibhanga sé kusota kudifumanesa. Kyenyinyiki, utena kudibhwidisa: ‘O kwila eme kingejiya ngó okima kyambote, maji ngisota kukibhanga? Ihi ingiswinisa kubhanga o mbote kwa akwetu?’

16. Ihi itwatokala kubhanga izuwa yoso, ni mukonda dyahi?

¹⁶ Kitutokala kuxinganeka kwila, o kikalakalu kyakuzwata o ukexilu wa ubhe kibhwa  kyoso kyatubatizala. O ukexilu wa ubhe wadifu ni “kizwatu kya ubhe,” twatokala kukilanga jinga. Tutena kubhanga kiki, mukusota maukexilu akulondekesa o idifwa ya nzumbi ikôla ya Nzambi izuwa yoso. Mukonda dyahi? Mukonda Jihova Nzambi mukwa kukalakala, o nzumbi yê ikôla yala ni kutena kwavulu. (Dim. 1:2) Kyenyikiphe, o maukexilu oso a idifwa ya nzumbi ikôla, atena kutuswinisa kubhanga o ima yatokala mwene. Mukifika, o dixibulu Tiyaku wasoneka: “O kixikanu sé ikalakalu kyafu.” (Tiya. 2:26) Kyene we kibhita ni maukexilu oso amukwa a idifwa ibhanga mbandu ku kibundu kya nzumbi ikôla ya Nzambi. Ithangana yoso itulondekesa o idifwa yiyi, twamulondekesa kwila twala ni nzumbi ikôla ya Nzambi.

17. Kyebhi kitwatokala kudivwa se tulembwa kulondekesa o idifwa ya nzumbi ikôla?

¹⁷ Katé mwene o Jikidistá a abatizala kya mivu yavulu kudima, sayi ithangana alembwa kulondekesa o idifwa ya nzumbi ikôla. Maji o kima kyabetakota o kukamba kubhwila. Tala o kifika kiki: Se o kizwatu ki wawabhela kyavulu, kitanduka, o kwila wandakitexa kya? Kana. Nange wandabhanga yoso phala kukitunga dingi, se kibhana. Kupholo, eye wandadilanga dingi phala kikitanduke lwamukwa. Kyene kimoxi we, se sayi kithangana ulembwa kubhanga mbote, kulondekesa mwanyu mba henda ku muthu, kana kuluwala. O kubhinga muloloki ni muxima woso kutena kubatula o maka, kyenyikiphe sota kubhanga yoso phala kuyudika o ukamba ni mukwenu. O kuhádya, sota kubhanga o ima mu ukexilu wengi.

18. Ihi itutena kudyelela?

¹⁸ Tusanguluka kyavulu mukonda Jezú watuxila phangu yambote! Kyoso ki tuya ni kukayela dingi o ixinganeku ni ukexilu wê, kikyandatubhonza kubhanga o ima kala mwene. O kubhanga o nguzu phala kukayela o phangu ya Jezú, kwandatukwatekesa we kuzwata kyambote o ukexilu wa ubhe. Mumilongi yiyi, twadilongo ngó maukexilu atatu a idifwa ya nzumbi ikôla ya Nzambi. Sota kukatula kithangana phala kubhitulula o idifwa yamukwa ya nzumbi ya Nzambi ni kutonginina se kyebhi ki wamuditunda mu ku ilondekesa. Wandasanga milongi yalungu ni maka yá mu Kadivulu ka Kutokwesa Phala o Jimbangi ja Jihova, bweta kumbandu “Ukexilu wa Ukidistá,” ni mbandu “Kibundu kya Nzumbi.” Utena kudyelela kwila, se ubhanga o mbandu ye, Jihova wandakukwatekesa kukala jinga ni ukexilu wa ubhe.