1. Һәри зедә сәр хәйсәте мә чь һʹӧкӧм дькә?

 ФЬРԚИ тʹӧнә әм зудава һатьнә ньхӧмандьне йан жи тʹәзә, әм гьшк дьхԝазьн бьбьнә мәрьвнә ӧса, кӧ дьле Йаһоԝа хԝәш бен. Сәва ве йәке, лазьм ә әм фькред хԝә контрол бькьн. Гәло чьрʹа? Чьмки щурʹе фькьрандьна мә сәр кьред мә һʹӧкӧм дькьн. Һәгәр әм бәрдәԝам кьн ль сәр хԝәстьнед бәдәне бьфькьрьн, әме тьштед хьраб бежьн у бькьн (Әфәси 4:17-19). Ле алийе дьнва жи, һәгәр әм һʹьше хԝә пе фькред баш тʹьжә кьн, хәбәрдан у кьред мә ԝе дьһа баш бьн, у Йаһоԝа жи ԝе жь мә рʹази бә (Галати 5:16).

2. Ве готареда, әме щабед кʹижан пьрса бьстиньн?

² Чаԝа мә готара пешийа веда дитьбу, фькред хьраб щарна дькарьн бькʹәвьнә һʹьше мә. Диса жи, мәва гьредайи һәла әме бькʹәвьнә бәр байе ԝан фькра йан на. Пешийа кӧ әм бенә ньхӧмандьне, гәрәке әм тʹәрка хәбәрдан у кьред ӧса бьдьн, кʹижан кӧ Йаһоԝа нәфрʹәт дькә. Әԝ һәйә гава пешьн у лапә фәрз, кʹижан кӧ ԝе али мә бькә «мәрьве кәвьн» жь хԝә бехьн. Ӧса жи, сәва кӧ Йаһоԝа жь мә рʹази бә, гәрәке әм гӧһ бьдьнә ве тʹәмийа жь Кʹьтеба Пироз, кӧ дьбежә ԝәки әм гәрәке «мәрьве ну» ль хԝә кьн (Колоси 3:10). Ве готареда, әме щабед ван пьрса бьстиньн: Гәло «мәрьве ну» чь те һʹәсабе? Әм ча дькарьн «мәрьве ну» ль хԝә кьн у хԝәй кьн?

3. Ль гора Галати 5:22, 23, «мәрьве ну» чь те һʹәсабе, у әм ча дькарьн мәрьве ну ль хԝә кьн?

³ Кәсе кӧ «мәрьве ну» ль хԝә кьрийә, бь хәбәрдан у кьред хԝә чʹәʹв дьдә Йаһоԝа. Сәва кӧ әм «мәрьве ну» ль  хԝә кьн, гәрәке әм һʹӧнӧред «бәре рʹӧһʹ» нав хԝәда пешда биньн у изне бьдьн ԝәки рʹӧһʹе пироз сәр фькьр, һәст у кьред мә һʹӧкӧм кә (Галати 5:22, 23 бьхунә). Һәгәр әм ӧса бькьн, әме Йаһоԝа у хьзмәткʹаред ԝи һʹьз бькьн (Мәтта 22:36-39). Әме нава тәнгасийада жи шабуна хԝә ӧнда нәкьн (Аԛуб 1:2-4). Әме әʹдьлайе пешда биньн (Мәтта 5:9). Әме һьндава мәрьва нәрм у бь сәбьр бьн (Колоси 3:13). Әме ԛәнщийе һʹьз бькьн у хԝәха жи ԛәнщийе бькьн (Луԛа 6:35). Әме пе кьред хԝә нишан кьн ԝәки әм баԝәрийа хԝә Баве хԝәйи әʹзмана тиньн (Аԛуб 2:18). Әме зу һерс нәкʹәвьн у ԝәʹде щерʹьбандьна хԝәгьрти бьн (1 Корьнтʹи 9:25, 27; Тито 3:2).

4. Сәва кӧ әм «мәрьве ну» ль хԝә кьн, гәло әм дькарьн һʹәму һʹӧнӧред кӧ Галати 5:22, 23-да әм дьхуньн, нав хԝәда пешда биньн?

⁴ Сәва кӧ әм «мәрьве ну» ль хԝә кьн, гәрәке әм һʹәму һʹӧнӧред кӧ Галати 5:22, 23-да у рʹезед дьнда һәнә, нав хԝәда пешда биньн. * Әв һʹӧнӧр гьшк һәвва гьредайи нә, у гәрәке әм ԝан һʹәму һʹӧнӧра «ль хԝә кьн». Мәсәлә, һәгәр тӧ бь рʹасти мәрьва һʹьз дьки, тӧйе һьндава ԝанда һʹәйф у бь сәбьр би. Ӧса жи, сәва кӧ тӧ бьби йәки ԛәнщ, лазьм ә ԝәки тӧ йәки нәрм у хԝәгьрти би.

5. «Нет-фькьра Мәсиһ» чь йә, у чьма фәрз ә кӧ әм жийина Иса леколин бькьн? (1 Корьнтʹи 2:16)

⁵ 1 Корьнтʹи 2:16 бьхунә. Сәва кӧ әм «мәрьве ну» ль хԝә кьн, гәрәке әм сәр «нет-фькьра Мәсиһ» бьн, демәк гәрәке әм бьзаньбьн кӧ Иса ча дьфькьрә у паше чʹәʹв бьдьнә ԝи. Иса һʹӧнӧред «бәре рʹӧһʹ» бь щурʹәки беԛьсур әʹйан дькә. Чаԝа кӧ нәйнькәкә беԛьсур, әԝ бь тʹәмами һʹӧнӧред Йаһоԝа әʹйан дькә (Ибрани 1:3). Чьԛас һе зедә әм мина Иса бьфькьрьн, һаԛас һе зедә әме кьред хԝәда чʹәʹв бьдьнә ԝи, у хәйсәте мә ԝе дьһа зедә бьбә мина хәйсәте ԝи (Филипи 2:5).

6. Гава әм «мәрьве ну» ль хԝә дькьн, гәрәке әм чь бир нәкьн?

⁶ Гәло әм бь рʹасти дькарьн мина Иса бьн? Дьԛәԝьмә тӧ бежи: «Иса йәки беԛьсур бу. Әз тʹӧ щар нькарьм бь тʹәмами бьбьмә мина ԝи!» Ле ван тьшта бир нәкә: Йа йәке, әм сурәте Йаһоԝа у  Исада һатьнә әʹфьрандьне, ләма жи әм хәйсәт-һʹӧнӧред хԝәда дькарьн бьбьнә мина ԝан. Әԝ те һʹәсабе кӧ тӧ дькари чʹәʹв бьди ԝан у ве йәкеда пешда һәрʹи (Дәстпебун 1:26). Йа дӧда, рʹӧһʹе пироз тʹәмамийа гәрдунеда ԛәԝата һәри мәзьн ә. Рʹӧһʹе пироз дькарә али тә бькә, тьштед ӧса бьки, кʹижан кӧ тәйе тʹӧ щар пе ԛәԝата хԝә нькарьбуйа бькьра. Йа сьсийа, Йаһоԝа набежә кӧ гәрәке тӧ «бәре рʹӧһʹ» бь щурʹәки беԛьсур әʹйан ки. Дьнйа тʹәзәда, Баве мәйи дәлал, 1 000 сали ԝе һивийе бә һʹәта мәрьв бьгьһижьнә беԛьсуртийе (Әʹйанти 20:1-3). Ле ньһа Йаһоԝа тʹәне дьхԝазә кӧ әм чь жь дәсте мә те бькьн у итʹбарийа хԝә ԛәԝата ԝи биньн.

7. Ньһа әме чь шеԝьр кьн?

⁷ Гәло әм ча дькарьн чʹәʹв бьдьнә Иса? Ньһа әме кьн чар һʹӧнӧред «бәре рʹӧһʹ» шеԝьр кьн. Әме бьвиньн кӧ Иса ча ван һәр чар һʹӧнӧра әʹйан дькьр у әм ча дькарьн чʹәʹв бьдьнә ԝи. Ӧса жи, әме бьвиньн кӧ гәрәке әм жь хԝә чь бьпьрсьн, ԝәки тедәрхьн һәла мә «мәрьве ну» ль хԝә кьрийә йан на.

8. Иса чаԝа нишан дькьр кӧ әԝ Йаһоԝа у инсана һʹьз дькә?

⁸ Иса гәләк Йаһоԝа һʹьз дькә, ләма жи әԝи һьм бона хатьре Баве хԝә һьм жи бона мә әʹмьре хԝә ԛӧрбан кьр (Йуһʹәнна 14:31; 15:13). Жийина Исайә сәр әʹрде әшкәрә дькьр, кӧ әԝ мәрьва чьԛас һʹьз дькә. Рʹож бь рʹож, әԝ һьндава мәрьва, һәла һе һьндава дьжмьнед хԝә жи, бь һʹьзкьрьн у дьлшәԝат бу. Һʹьзкьрьна хԝә һьндава мәрьва Иса ве йәкеда дьда кʹьфше, кӧ дәрһәԛа Пʹадшатийа Хԝәде ԝана һин дькьр (Луԛа 4:43, 44). Сәрда жи Иса һазьр бу кӧ бькʹәвә дәсте гӧнәкʹара, бьчәрчьрә у бе кӧштьне. Әв йәк нишан дькә кӧ Иса чьԛас Хԝәде у мәрьва һʹьз дькә. Бь сайа ве ԛӧрбане, әԝи рʹийа жийина һәрһәйи бона мә һʹәмуйа вәкьрийә.

9. Әм ча дькарьн мина Иса һʹьзкьрьне әʹйан кьн?

⁹ Мә жийина хԝә дайә дәсте Йаһоԝа у әм һатьнә ньхӧмандьне, чьмки әм Баве хԝәйи әʹзмана һʹьз дькьн. Ләма жи мина Иса, гәрәке әм һьндава мәрьва баш бьн у бь ви щурʹәйи нишан кьн кӧ әм Йаһоԝа һʹьз дькьн. Йуһʹәннайе шанди ньвисибу: «Һәгәр әԝе бьре хԝә кӧ дьбинә һʹьз накә, ԝе чаԝа бькарьбә Хԝәде һʹьз бькә кӧ набинә?» (1 Йуһʹәнна 4:20). Ԝе баш бә әм жь хԝә бьпьрсьн: «Гәло әз бь дьл инсана һʹьз дькьм? Гәло әз һьндава мәрьва дьлшәԝат ьм, һәла һе һьндава мәрьвед сәрт жи? Гәло әз һазьр ьм ԝәки ԝәхт хәрщ кьм у тьштед кӧ щәм мьн һәнә бьдьмә хәбате, ԝәки али мәрьва бькьм дәрһәԛа Йаһоԝа пебьһʹәсьн? Һәгәр һʹәчʹи зәʹф мәрьв гӧһ надьн мьн, йан жи мьԛабьли мьн дәртен, гәло әз диса жи һазьр ьм ве йәке бькьм? Гәло әз дькарьм бона хьзмәте һе зедә ԝәʹдә хәрщ кьм?» (Әфәси 5:15, 16).

10. Иса чаԝа әʹдьлайи дькьрә нав мәрьва?

¹⁰ Иса мәрьвәки әʹдьлайиһʹьз бу. Гава мәрьва хьраби ле дькьр, әԝи тʹӧ щар хьраби ль ԝан нәдькьр. Сәрда жи, әԝи хирәт дькьр кӧ әʹдьлайе бькә нав мәрьва, у әԝи кәсед дьнрʹа дьгот ԝәки әԝана проблемед нав һәвда сафи кьн. Мәсәлә, әԝи гот ԝәки сәва кӧ Йаһоԝа һʹәбандьна кәсәки ԛәбул бькә, гәрәке әԝ пешийе «бьре хԝәрʹа ль һәв ԝәрә» (Мәтта 5:9, 23, 24). Ӧса жи, гава шандийед ԝи сәр пьрса кӧ нав ԝанда йе һәри мәзьн кʹи йә, һәврʹа дькʹәтьнә дәʹԝе, әԝи али ԝан дькьр ԝәки һәвдӧрʹа нәкʹәвьнә ләще (Луԛа 9:46-48; 22:24-27).

11. Әм ча дькарьн әʹдьлайиһʹьз бьн?

 ¹¹ Сәва кӧ әм әʹдьлайиһʹьз бьн, бәс нинә ԝәки әм тʹәне нәбьнә сәбәбе шәрʹ-дәʹԝа. Әм гәрәке гава пешьн бавежьн, сәва тʹәви кәсед дьн ль һәв бен у хушк-бьра һелан кьн, ԝәки әԝана проблемед нав һәвда сафи кьн (Филипи 4:2, 3; Аԛуб 3:17, 18). Жь хԝә бьпьрсә: «Жь алийе хԝәва әз һазьр ьм чь бькьм, ԝәки тʹәви мәрьва ль һәв бем? Гава хушк йан бьрак дьле мьн дешинә, гәло дьле мьн ле дьминә? Гәло әз һивийе мә, ԝәки мәрьве дьн гава пешьн бавежә, сәва тʹәви мьн ль һәв бе, йан әз һазьр ьм гава пешьн бавежьм? Һәгәр әԝ бь тʹәхмина мьн нәһәԛ бә жи, гәло әз диса жи һазьр ьм ԝәки тʹәви ԝи ль һәв бем? Һәгәр дьбә, гәло әз кәсед дьн һелан дькьм кӧ әԝана ль һәв бен?»

12. Иса чаԝа ԛәнщи дьда кʹьфше?

¹² Иса йәки һʹәйф у ԛәнщ бу (Мәтта 11:28-30). Гава зор бу жи, әԝ һьндава мәрьвада нәрм бу у дькʹәтә һʹале ԝан. Мәсәлә, чахе жьнькәкә Кәнани жь ԝи хԝәст, ԝәки әԝ ԛиза ԝе ԛәнщ кә, әԝи серида хԝәстьна ԝе инкʹар кьр, ле гава әԝи дит кӧ баԝәрийа ԝе чьԛас ԛәԝи йә, әԝи ԛиза ԝе ԛәнщ кьр (Мәтта 15:22-28). Иса чьԛас йәки дьлшәԝат бу жи, гава лазьм дьбу кӧ кәсәкирʹа ширәт бьда, әԝи хԝә паш нәдьхьст. Мәсәлә, чахе Пәтрусе шанди дьхԝәст Иса һелан кьра, кӧ әԝ хԝәстьна Йаһоԝа нәйнә сери, Иса әԝ ль бәр шагьртед дьн рʹаст кьр (Марԛос 8:32, 33). Иса һәмьки нәдьхԝәст Пәтрус бәр гьшка бьдә шәрме у ньмьз кә, ле әԝи дьхԝәст Пәтрус һин кә у дәрсе бьдә шагьртед дьн, ԝәки әԝана гәләк хԝәда баԝәр нибьн. Пәтрус бешьк шәрм кьр, ле чь жи һәбу әв ширәт гәләк кери ԝи һат.

13. Әм чаԝа дькарьн һьндава мәрьва һʹәйф у нәрм бьн?

¹³ Щарна лазьм ә ԝәки тӧ рʹастә-рʹаст ширәте бьди кәсед кӧ тӧ ԝана һʹьз дьки. Мина Иса, һәртʹьм ль гора принсипед Кʹьтеба Пироз, бь нәрми ширәте бьдә ԝан. Итʹбарийа хԝә ԝан бинә у баԝәр бә, ԝәки йед кӧ Йаһоԝа у тә һʹьз дькьн, ԝе ширәта тәйә дьлован ԛәбул бькьн. Жь хԝә бьпьрсә: «Гава әз дьвиньм кӧ һәваләки мьн тьштәки нәрʹаст дькә, гәло мерхасийа мьн һәйә кӧ жерʹа хәбәр дьм? Гава лазьм дьбә кӧ әз ширәте бьдьм, гәло әз бь нәрми хәбәр дьдьм йан сәрт? Гәло әз чьрʹа ширәте дьдьм, чьмки әԝи һерса мьн ани, йан әз ԛәнщийа ԝи дьхԝазьм?»

14. Иса ча ԛәнщи дькьр?

¹⁴ Иса нә кӧ тʹәне занә ԛәнщи чь йә, ле әԝ хԝәха жи ԛәнщийе дькә. Иса Баве хԝә һʹьз дькә, ләма жи әԝ һәртʹьм бь нета рʹаст ԛәнщийе дькә. Мәрьве ԛәнщ һазьр ә кӧ али кәсед дьн бькә у ԛәнщийе ль ԝан бькә. Бәс нинә тʹәне бьзаньбьн, ԝәки чь рʹаст ә, ле фәрз ә тьштед рʹаст бь нета рʹаст бькьн. Ле гәло дьбә ӧса кӧ мәрьв бь нета нәрʹаст ԛәнщийе бькә? Бәле. Мәсәлә, Иса бәʹса һьнә кәса дькьр, йед кӧ кʹәсибарʹа ԛәнщи дькьрьн, чьмки дьхԝәстьн бькʹәтана чʹәʹва у пʹайи бьстандана. Кьред ван кәса чьԛас жи ча ԛәнщи дьһатә кʹьфше, йәкә ԛәнщийа ԝан бәр чʹәʹве Йаһоԝа беԛимәт бу (Мәтта 6:1-4).

15. Әм ча дькарьн бь рʹасти бьбьнә мәрьвнә ԛәнщ?

¹⁵ Һәгәр әм бь нета рʹаст ԛәнщийе дькьн, ви чахи әм бь рʹасти мәрьвнә ԛәнщ ьн. Жь хԝә бьпьрсә: «Хенщи кӧ әз заньм ԝәки тьштед рʹаст чь йә, гәло әз хԝәха жи ван тьшта дькьм? Гава әз ԛәнщийе дькьм, әз ве йәке бь чь нете дькьм?»

16. Гәрәке әм һәр рʹож чь бькьн, у чьрʹа?

¹⁶ Гәрәке әм нәфькьрьн ԝәки паши ньхӧмандьне, ида нә лазьм ә әм хирәт бькьн кӧ «мәрьве ну» ль хԝә кьн. Лазьм ә әм ван «кʹьнщед хԝәйә бәдәԝ» хԝәй кьн. Бона ве йәке, ԝе баш бә әм һәр рʹож бьфькьрьн кӧ әм чаԝа дькарьн һʹӧнӧред «бәре рʹӧһʹ» нав хԝәда пешда биньн. Гәло чьрʹа? Чьмки рʹӧһʹе Хԝәде ԛәԝатәкә ӧса йә, кӧ мә һелан дькә тьштед рʹаст бькьн (Дәстпебун 1:2). Ләма жи, лазьм ә кӧ һәр хәйсәтәки «бәре рʹӧһʹ» ль сәр мә һʹӧкӧм кә у ԛәԝате бьдә мә тьштед рʹаст бькьн. Мәсәлә, Аԛуб ӧса ньвисибу: «Баԝәри бейи кьра мьри йә» (Аԛуб 2:26). Ве йәке әм дькарьн бежьн дәрһәԛа һʹәму хәйсәт-һʹӧнӧред кӧ дькʹәвьн нава «бәре рʹӧһʹ». Чьԛас әм ԝан һʹӧнӧра дьдьнә кʹьфше, һаԛас әм нишан дькьн кӧ рʹӧһʹе Хԝәде сәр мә һʹӧкӧм дькә.

17. Һәгәр мә дәрәщәкеда «бәре рʹӧһʹ» нәда кʹьфше, әм гәрәке чь бькьн?

¹⁷ Һәгәр әм ида гәләк сал хьзмәткʹаред Йаһоԝа нә жи, дьбәкә щарна мә зор бе ԝәки һʹӧнӧред «бәре рʹӧһʹ» әʹйан бькьн. Диса жи, гәрәке әм нәԝәстьн у ван һʹӧнӧра нав хԝәда пешда биньн. Һәла бьфькьрә: Һәгәр ләкʹә кʹьнщәки мә кʹәта, кʹижани кӧ әм гәләк һʹьз дькьн, ԛә мәйе әв кʹьнщ дәрберʹа бавита гәмаре? Һәмьки на! Мәйе һәр тьшт бькьра кӧ ве ләкʹә дәрхьн, у паше жи әме дьһа фәсал буна ԝәки ида ләкʹә ле нәкʹәта. Мина ве йәке, һәгәр тӧ щарәке һьндава кәсәки сәрт буйи йан бе сәбьр буйи, дьлтәнг нәбә. Һәгәр тӧ жь дьл бахшандьне бьхԝази, тӧ дькари ча бежи ве «ләкʹәйе» тʹәмьз ки у тʹәви ԝи кәси ль һәв бейи. Паше ве йәке хԝәрʹа нете дайнә, ԝәки диса ве шашийе нәки.

18. Әм дькарьн чьда баԝәр бьн?

¹⁸ Әм гәләк рʹази нә ԝәки Иса мәрʹа мәсәләкә баш һиштийә. Чьԛас һе зедә әм чʹәʹв дьдьнә фькьр у ньһерʹандьнед ԝи, һаԛас һе зедә әме рʹабун-рʹуньштьна хԝәда мина ԝи бьн. Һьнге ԝе мәрʹа дьһа һеса бә «мәрьве ну» ль хԝә кьн. Ве готареда, мә тʹәне дина хԝә да чар һʹӧнӧред «бәре рʹӧһʹ». Ԝе баш бә кӧ әм һʹӧнӧред дьн жи йед «бәре рʹӧһʹ» леколин бькьн у бьфькьрьн һәла әм ван һʹӧнӧра ча лазьм ә дьдьнә кʹьфше, йан на. Дәрһәԛа ван һʹӧнӧра һун дькарьн бьньһерʹьн «Рʹебәрийа Леколинкьрьне бона Шәʹдед Йаһоԝа», тʹема «Жийина Мәсиһити» у бьнсәри «Бәре Рʹӧһʹе Пироз». Баԝәр бә, һәгәр чь жь дәсте тә те тӧ бьки, Йаһоԝа ԝе али тә бькә ԝәки тӧ «мәрьве ну» ль хԝә ки у тʹӧ щар жь хԝә нәехи.