1. Sininke musinke sosinene esi asi kundama nkareso zetu?

 YIKARE ASI ntani tupu ka tu gwene ekuho ndi nare, natuvenye tuna hara kukara nonkareso zongwa ezi ga hara Jehova. Mokuninka asi yi tu tompoke oyo, twa hepa kupangera magazaro getu. Morwasinke? Morwa magazaro getu kukundama nkareso zetu. Nsene tupu tu gazara nkenye apa kuhamena omu natu lihafesa nyamwetu, ose ngatu uyunga ntani nokurugana yininke yoyidona. (Efe. 4:17-19) Nye mokulisiga, nsene tu gazara yininke yoyiwa, ose ngatu uyunga nokurugana yininke monkedi ezi azi hafesa Guhyetu Jehova.—Gar. 5:16.

2. Mapuro musinke natu kazogera mosirongwa esi?

² Ngomu tupu katu yi lirongere mosirongwa sina kapita, ose kapi ta tu vhuru kunyokera po magazaro nagenye gomadona. Nye ose kuvhura kutokora mokudira ku ga pulisira ga tu ninkise tu rugane yininke yoyidona. Komeho tu gwane ekuho, twa hepa kuhageka kuuyunga nokurugana yininke eyi ga nyenga Jehova. Oso kuna kara sininke sokuhova ntani somulyo unene kurugana mokuninka asi tu huture muntu gomukuru-kuru. Mokuninka asi tu hafese Jehova unene, twa hepa hena kulimburukwa kompangera ezi asi: ‘Dwareni muntu gomupe.’ (Koros. 3:10) Mosirongwa esi, natu ka limburura mapuro aga gana kukwama ko: Yisinke ayi tanta kudwara “muntu gomupe”? Ngapi natu dwara muntu gomupe ntani ngapi natu twikira kudwara ngorooro muntu gomupe?

3. Kuliza noVagarata 5:22, 23, yisinke ayi tanta kudwara “muntu gomupe” ntani ngapi omu muntu na dwara muntu gomupe?

³ Kudwara “muntu gomupe” kutanta asi kugazara nokurugana yininke monkedi omu ga yi harera Jehova. Muntu kuvhura  kudwara muntu gomupe pokulikida yiyimwa yompepo zaKarunga, noku pulisira mpepo zokupongoka zi pangere magazaro gendi, malizuvho gendi ntani yirugana yendi. (Resa Vagarata 5:22, 23.) Pasihonena, age kwa hara Jehova ntani novantu vendi. (Mat. 22:36-39) Muntu gwangoso kwa kara noruhafo nampili ngomu ana kulididimikira maudigu. (Jak. 1:2-4) Age muntu ogu a tulisa po mbili. (Mat. 5:9) Age kulididimika ntani kulikida nkenda kwava wopeke. (Koros. 3:13) Age kwa hara kurugana yininke yoyiwa. (Ruk. 6:35) Age kuyilikida moyirugana yendi asi ga kara nepuro mwaGuhyetu gemeguru. (Jak. 2:18) Age kulinunupika nsene wopeke vana hara kumurwanesa ndi nsene vana hara kumuhandukisa ntani age kulipangera apa ava mu heteke.—1 Kol. 9:25, 27; Tit. 3:2.

4. Mokuninka asi tu dware muntu gomupe, morwasinke twa hepera kulikida yikara nayinye eyi va tumbura moVagarata 5:22, 23 ntani noyikara eyi va tumbura momatjangwa gamwe?

⁴ Mokuninka asi tu dware muntu gomupe, twa hepa kutunga po yikara nayinye eyi va tumbura moVagarata 5:22, 23 ntani neyi va tumbura momatjangwa gamwe. * Yikara eyi kapi ya kara ngwendi yikoverero eyi atu dwara posikando simwe tupu. Nye yikara eyi kwa lifana noyikara yikwawo. Pasihonena, nsene asi ove sili wa hara mukweni, ngo mu likida nkenda. Ntani mokuninka asi o kare muntu gomuwa, wa hepa kulinunupika ntani nokulipangera.

5. Yisinke ayi tanta kukara “nomagazaro gaKristusa” ntani morwasinke natu lirongera eparu lyaJesus? (1 Vakolinte 2:16)

⁵ Resa 1 Vakolinte 2:16. Mokuninka asi yi tu tompoke kudwara muntu gomupe, twa hepa kukara “nomagazaro gaKristusa.” Monkango zimwe, twa hepa kudiva omu Jesus a gazara ntani nokumuhonena. Jesus kulikida nawa-nawa yiyimwa yompepo. Ngwendi ntarero zongwa, Jesus kulikida yikara yoGuhwe moomu ya fira. (Heb. 1:3) Nsene tu gazara ngwendi Jesus, ayo ngayi tu vatera tu rugane yininke ngwendi moomu ayi rugana age ntani ngayi tu tompoka kuhonena nkareso zendi.—Fil. 2:5.

6. Yitwa musinke twa hepa kudiworoka nsene kuna kuhetekera ko kudwara muntu gomupe?

⁶ Kuvhura sili yi tu tompoke kukwama sihonena saJesus ndi? Ose kuvhura nampo tu gazare asi ‘Jesus ga sikilira mo, kapi tani vhuru  kumuhonena nawa-nawa.’ Nsene yimo o lizuvhu ngoso, diworoka yitwa eyi yina kukwama ko. Sokuhova, ove kwa kusita yipo o fane ngwendi Jehova naJesus. Yipo nye, ove kuvhura yi ku tompoke kuvahonena pokusikisa mo yininke yimwe eyi ava rugana. (Gen. 1:26) Sauvali, mpepo zokupongoka kuna kara nonkondo dononene po mouzuni mudima. Nevatero lyompepo zokupongoka, ove kuvhura kurugana yininke eyi nodira kusikisa mo pwanyamoge. Sautatu, Jehova kapi ana kundindira ko koge o likide yiyimwa yompepo nawa-nawa. Nye Guhyetu geharo kwa tura po nomvhura eyovi yipo vantu ava va kara nehuguvaro lyokukaparukira pevhu ngava ka sikilire mo. (Ehor. 20:1-3) Jehova kuna kundindira ko kwetu tu rugane paapa twa hulira ntani nokuhuguvara mwendi yipo a tu vatere.

7. Yisinke natu kazogera ngesi?

⁷ Ngapi omu natu honena Jesus nawa-nawa? Natu kazogera yikara yine eyi azi retesa po mpepo zokupongoka. Ano mwa nkenye ukaro, natu ka tara eyi natu lirongera ko monkedi omu Jesus ga likidire yikara oyo. Ntani natu kazogera mapuro gamwe aga naga tu vatera yipo tu dware muntu gomupe.

8. Ngapi omu Jesus ga likidire eharo?

⁸ Mokumona asi Jesus kwa here unene Jehova, eyi kwa mu ninkisire a ture po malizambero koGuhwe ntani noku kwetu. (Joh. 14:31; 15:13) Jesus kwa likidire eharo lyendi lyenene kwetu monkedi omu gaya parukire pevhu. Age nga likida eharo nonkenda nkenye ezuva, nampili apa vamwe ngava mu rwanesa. Nkedi zimwe zomulyo omu nga likida eharo kovantu kwa kere pokuvaronga kuhamena Uhompa waKarunga. (Ruk. 4:43, 44) Jesus kwa likidire eharo lyendi kwaKarunga ntani nokovantu, pokulizambera yipo a ya hepe ntani nokumudipaga. Pokuyirugana ngoso, age kwa tupa mpito yipo natuvenye ngatu ka gwane mwenyo gwanarunye.

9. Ngapi natu honena Jesus pokulikida eharo?

⁹ Ose kwa ligava kwaJehova ntani nokugwana ekuho morwa twa hara Guhyetu gemeguru. Ngwendi Jesus, twa hepa kulikida eharo kwaJehova monkedi omu atu tekura vantu. Mupositoli Johanesa kwa tjenge asi: “Ogu ga dira kuhara mukwawo ogu a mono, omu na vhura kuhara Karunga ogu ga dira kumona ngapi?” (1 Joh. 4:20) Ose kuvhura tu li pure nyamwetu asi: ‘Ame na tunga po eharo lyenene lyokuhara vantu ndi? Ame kulikida nkenda kovantu wopeke nampili va dire kukara nononkedi donongwa ndi? Eharo kutumangeda nge ni ruganese siruwo sange noyiweka yange yipo ni vatere wopeke va lironge kuhamena Jehova ndi? Ame na kara neharo lyokuyirugana oyo nampili ngomu sinzi sovantu ava dili kukara norupandu kweyi ani rugana ndi nsene kuna kurwanesa nge ndi? Ame kuvhura ni papare nonkedi dimwe yipo ni lihameke mo mosirugana sokutulisa po varongwa ndi?—Efe. 5:15, 16.

10. Ngapi omu Jesus nga tulisa po mbili?

¹⁰ Jesus kwa kere mugara ogu nga tulisa po mbili. Apa vantu ngava mu tekura momudona age kapi ngava rugana yuma yoyidona. Nye koyili yimwe yoyiwa eyi nga rugana. Age nga tulisa po mbili ntani nga korangeda wopeke yipo va kohonone po madiro kulizuvha gawo. Pasihonena, age kwa va rongere asi va hepere kutulisa po mbili novakwawo yipo Jehova a tambure ukareli wawo. (Mat. 5:9, 23, 24) Age nga ruguruka kuvatera vapositoli yipo va hageke kulipatana asi yilye munene po mokatji kawo.—Ruk. 9:46-48; 22:24-27.

11. Ngapi omu natu tulisa po mbili?

¹¹ Mokuninka asi tu tulise po mbili, twa hepa kurugana paapa twa hulira kupitakana tupu kunyokere po madiro kulizuvha. Twa hepa kurugana paapa twa hulira yipo tu tulisepo mbili  nava wopeke ntani twa hepa kukorangeda vanavazinyetu yipo nawo va tulise po mbili nava wopeke. (Fil. 4:2, 3; Jak. 3:17, 18) Ose kuvhura tu lipure mapuro aga asi: ‘Yisinke ani rugana yipo ni tulise po mbili nava wopeke? Nsene asi munazinyetu ana koresa nge, ame kukara nonkoko nage ndi? Ame kundindira muntu yipo aya tulise po mbili name ndi ame ku za yipo ni ka tulise po mbili nampili yikare asi yige ana retesa po udigu ndi? Apa ayi kara hepero, ame kukorangeda ava va kara nomadiro kulizuvha yipo va tulise po mbili nava wopeke ndi?

12. Ngapi omu Jesus ga likidire nkenda?

¹² Jesus kwa kere nonkenda. (Mat. 11:28-30) Age kwa likidire nkenda pokukara nougomoki nampili ngomu ga kere momaukaro goudigu. Pasihonena, apa mukadi gomoFonisiya ga mu likwamberere asi a verure munendi, pomuhowo kapi ga here kurugana eyi ga mu pulire mukadi gwina, nye apa ga likidire epuro lyenene mwendi, yipo ga verwire munendi. (Mat. 15:22-28) Nampili ngomu Jesus ga kere nonkenda, age kapi ga hagekere kugava mapukururo. Poyiruwo yimwe, Jesus nga likida nkenda pokupukurura ava ga here. Pasihonena, apa Peturusa ga hetekerere ko kukava Jesus mokudira kurugana mpango zoGuhwe, Jesus kwa mu pukwilire komeho zovarongwa vakwawo. (Mar. 8:32, 33) Jesus kapi ga yi rugene eyi mokuhandukisa Peturusa, nye age kwa yi rugene nositambo sokumudeura nokupukurura varongwa vakwawo yipo va dire kukara nonkareso zangoso. Yimo, Peturusa kwa lizuvhire nomuga, nye age ga gwaneene mo uwa mepukururo lina.

13. Ngapi omu natu likida nkenda?

¹³ Mokuninka asi tu likide nkenda vantu ava twa hara, twa hepa kuvapukurura poyiruwo yimwe. Nsene kuna kuyirugana ngoso, honena Jesus pokugava mapukururo kuliza nonompango domoBibeli. Yi rugana monkedi zongwa. Yi pura asi awo vana hara kurugana youhunga ntani kara nehuguvaro asi ava va hara Jehova ntani ava va ku hara ngava tambura epukururo lyoge. Lipura nyamoge mapuro aga asi: ‘Ame na kara nouradi wokuuyunga nsene gumwe ogu na hara a rugana yininke yepuko ndi? Nsene asi yina kara hepero kugava epukururo, ame kuuyunga nonkenda ndi nehandu? Sitambo musinke seyi nani gavera epukururo? Ame kugava epukururo morwa yeeyi ana handukisa nge muntu ogo ndi ame kuligava morwa nina hara kumuvatera?’

14. Ngapi omu Jesus ga likidire sikara souwa?

¹⁴ Jesus kapi tupu ga diva yoyiwa po nye hena kuyirugana. Jesus kwa hara oGuhwe, yipo nye age kurugana yininke yoyiwa nositambo souhunga. Muntu gomuwa, kupapara nkenye apa nonkedi omu na vhura kuvatera wopeke ntani kuvaruganena yininke yoyiwa. Ayo kapi tupu ya gwanena po kudiva yininke youhunga eyi natu rugana, nye twa hepa kurugana yininke youhunga nositambo sosiwa. Ose nampo kuvhura tu lipure asi: ‘Muntu kuvhura a rugane yininke youhunga nositambo sepuko ndi?’ Yii, kuvhura. Pasihonena, Jesus kwa uyungire kuhamena vantu ava va geve mauhwi kovantu woruhepo, nye awo kwa here kudivilisa asi wopeke va mone yirugana yawo eyi va rugene ntani nokuvafumadeka. Nampili ngomu yirugana yawo ya kere yoyiwa, Jehova kapi gayi haferere.—Mat. 6:1-4.

15. Ngapi omu natu kara vantu wovawa?

¹⁵ Ose kuvhura kukara vantu wovawa nsene tu rugana yininke yoyiwa nositambo souhunga. Kuvhura o lipure nyamoge asi: ‘Ame kwa diva yininke youhunga ntani nokuyikwama ndi? Sitambo musinke seyi ani ruganene yininke yoyiwa?’

16. Yisinke twa hepa kurugana nkenye ezuva ntani morwasinke?

¹⁶ Twa ha gazara asi kudwara muntu gomupe ku ya haga konyima zekuho. Muntu gomupe kwa fana ngwendi sikoverero sosipe esi twa hepa kupakera mbili nawa. Twa hepa kulikida yikara eyi yoyiyimwa yompepo nkenye ezuva. Morwasinke? Morwa nsene tu litura mo unene mokulikida yikara eyi, yimo hena nga zi tu vatera mpepo zaJehova. Jehova kurugana unene, eyi yiyo mpepo zendi zokupongoka ava zi tumbwire asi ‘nonkondo edi a ruganesa. (Gen. 1:2) Yipo nye, nkenye siyimwa sompepo kuvhura kututumangeda tu rugane ko yuma. Pasihonena, mupositoli Jakopo kwa tjenge asi: “Epuro lya hana yirugana nalyo lya fa.” (Jak. 2:26) Eyi ya lifana hena noyiyimwa nayinye eyi za retesa po mpepo zaKarunga. Nkenye apa atu likida yiyimwa yompepo, ose kugava umbangi asi mpepo zaKarunga yizo zina kutuvatera tu yi rugane.

17. Yisinke natu rugana nsene kapi yina kututompoka kulikida yiyimwa yompepo?

¹⁷ Nampili Vakriste ava va gwana ekuho nomvhura dononzi dina kapita, nawo poyiruwo yimwe kapi ava likida yiyimwa yompepo. Nye ayo ya kara nomulyo tu hetekere ko kulikida yikara oyo. Tuzeni tu ka tare sihonena esi sina kukwama ko. Nsene sikoverero soge esi wa hara si tauka, ove no si zuguma ndi? Hawe. Ove nampo kuvhura o hetekere ko ku si honza. Ano kutunda opo, ove ngo hetekera ko ku si pakera mbili. Mokulifana, kapisi yi ku dompese nsene kukudigopera pamwe kulikida nkenda nelididimiko ndi eharo kwava wopeke. Nsene tu gusira po mukwetu kutundilira komutjima, ose ngatu tulisa po elikwatakano lyewa kumwe nendi. Tokomena kutura po malitjindjo.

18. Ehuguvaro musinke natu kara nalyo?

¹⁸ Ose tuna hafa kweyi Jesus ga tu tulira po sihonena sosiwa. Moomu tuna kuhonena magazaro ntani nonkareso zendi, yimo hena ngayi tu rerupira kurugana ngwendi moomu nga rugana age. Moomu tuna kuhonena Jesus, yimo hena ngayi tu rerupira kudwara muntu gomupe. Mosirongwa esi, ose kuna tarurura tupu yiyimwa yine yompepo zokupongoka. Nayi wapa o litulire po siruwo sokukonakona yiyimwa yimwe yompepo zokupongoka ntani nokugazadara ko omu ono kulikida yiyimwa oyo. Kuvhura o gwane yirongwa eyi ya zogera kuhamena sirongwa esi mobuke zepaparo zoNombangi daJehova konhi zosiparatjangwa “Eparu lyoSikriste” ntani “Yiyimwa yompepo.” Kara nehuguvaro asi nsene o rugana ko ruha roge, Jehova nga ku vatera yipo o dware muntu gomupe nokutwikira ngarooro.