1. Ino nciinshi cinene citupa kuba amibo njetucite?

 INGA caba ayi twakabombekwa conoono na mpashi twekala mucancine kwamyaaka iinji, soonse tulayandika kuba amibo Yehova njaasuni. Kwaamba ayi tucikoonshe kucita boobo, tulyeelete kulama miyeeyo yesu. Ino nceebonshi? Nceebo cakwaamba ayi cinene citupa kuba amibo njetucite nshintu nshetuyeeya. Na lyoonse katuyeeya mbweenga twalisangalasha, tulaakunookwaamba akucita shintu shibiibi. (Efe. 4:17-19) Ano na katuyeeya pashintu shibotu, tulaakunookwaamba akucita shintu shisangalasha Ishiwesu Yehova.—Gala. 5:16.

2. Ino njimiipusho nshi njeshi tucane shikumbulo mumutwi uyu?

² Bweenka mbotwakeeya mumutwi wamana, inga tatucikoonshi kuleya cakumaninina kuyeeya pashintu shitabete kabotu. Sombi inga twasalawo kutakonkela miyeeyo iyo. Katutana kubombekwa, tulyeelete kutaanguna kucileka kwaamba akucita shintu Yehova nshaapatite. Ici ncecintu cakutaanguna alimwi ciyandika abuumbi ceenga catucafwa kufuula buntu bwakale kale. Nacibi boobo, kwaamba ayi tucite shisangalasha Yehova, tulyeelete kukonkela mulawo waamba ayi: “Amulifwalike buntu bupya.” (Kolo. 3:10) Mumutwi uyu, tutocana shikumbulo kumiipusho iyi: Ino “buntu bupya” cilaamba nshi? Ino inga twabufwala buyani akutolelela kucita boobo?

3. Kweelana a Bene Galatiya 5:22, 23, ino “buntu bupya” cilaamba nshi, alimwi ino muntu alabufwala buyani?

³ “Buntu bupya” cilaamba kuyeeya akucita shintu munshila itondesha mibo yakwe Yehova. Muntu inga watondesha ayi alifwete buntu bupya na kaatondesha shisepo sha mushimu usalashi wakwe Lesa, kusuminisha mushimu usalashi kutanjilila mbwaayeeya, mbwaalinyumfwa alimwi ambwaacita shintu.  (Amubelenge Bene Galatiya 5:22, 23.) Kucakubonenaako, alisuni Yehova abantu Bakwe. (Mate. 22:36-39) Aboobo alatolelela kuba usangalete nabi ndyaatokwiinda mumapensho. (Jemu. 1:2-4) Ngumuntu uyuminisha luumuno. (Mate. 5:9) Alakalika moyo alimwi akutondesha nkumbu kubamwi. (Kolo. 3:13) Alacita shintu shibotu alimwi alishisuni. (Luka 6:35) Alacita shintu shitondesha kwaamba ayi ncakwiila alicite lushomo luyumu muli Yehova. (Jemu. 2:18) Taafwambaani kukalala na bamwi bamukalasha alimwi alalikasha na wacana bweelesho.—1 Koli. 9:25, 27; Taitasi 3:2.

4. Ino nceebonshi kufwala buntu bupya kulayandika kutondesha mibo yoonse yaambwa pa Bene Galatiya 5:22, 23 aimwi yaambwa mu Malembo amwi?

⁴ Kwaamba ayi tufwale buntu bupya, tulyeelete kutondesha mibo yoonse yaambwa pa Bene Galatiya 5:22, 23 alimwi aimwi yaambwa mu Malembo amwi. * Mibo iyi taibete anga nshakufwala nsheenga twafwala lyalo paciindi cimwi twashifuula akufwala shimwi. Mbasu sha mibo iyi shilacanika amumibo imwi. Kucakubonenaako, na mulicite lusuno lwancinencine pabamwi, mulaakubakalikila moyo akubatondesha nkumbu. Kwaamba ayi mutondeshe ayi muli muntu uli kabotu, mulyeelete kuba muntu utafwambaani kukalala alimwi ulikasha.

5. Ino kuba a “miyeeyo yakwe Klistu” cilaamba nshi, alimwi ino nceebonshi tulyeelete kwiiya pabuumi bwakwe Yesu? (1 Bene Kolinto 2:16)

⁵ Amubelenge 1 Bene Kolinto 2:16. Kwaamba ayi tufwale buntu bupya, tulyeelete kuba a “miyeeyo yakwe Klistu.” Munshila imwi inga twaamba ayi tulyeelete kwiiya kubona shintu bweenka mbuli Yesu mbwaashibona, akukonkela cakubonenaako cakwe. Yesu alatondesha kabotu shisepo sha mushimu wakwe Lesa. Bweenka mbuli ligilasi libonesha kabotu abuumbi, Yesu alatondesha mibo yakwe Yehova bweenka mboibete. (Ebu. 1:3) Kweelesha cankusu kubona shintu bweenka mbuli Yesu, kulaakutucafwa kucikonsha kukonkela cakubonenaako cakwe.—Filip. 2:5.

6. Ino nshiinshi nshotweelete kwiibaluka ndyetutookweelesha kufwala buntu bupya?

⁶ Ano sa inga twacikonsha kukonkela cakubonenaako cakwe Yesu? Mpashi inga twayeeya ayi: ‘Yesu wakalinga kumaninite. Inga tacikonsheki kuba mbuli nguwe!’ Na mbomulinyumfwa ubo, amwiibaluke pamakani aya ancine. Cakutaanguna, mwakalengwa ankusu shakucikonsha kutondesha mibo ibotu bweenka mbuli Yehova a Yesu. Aboobo inga mwasala  kukonkela cakubonenaako cabo, akweeleshako kuba mbuli mbabo. (Mata. 1:26) Cabili, mushimu usalashi wakwe Lesa ulicite nkusu kwiinda cintu cimwi cili coonse mububumbo boonse. Inga wamucafwa kukumanisha shintu nsheenga tamucikoonshi palwaanu nweenka. Catatu, pacecino ciindi Yehova alamulangila kutondesha shisepo sha mushimu kweelana ambweenga mwacikonsha mbuli muntu utamaninite. Alimwi mbuli Ishiwesu shilusuno, wabika myaaka 1,000 yakucafwa baabo batolangila kukala kwamuyayaya pacishi capanshi kuba bamaninite. (Ciyu. 20:1-3) Yehova ncaasuni pacecino ciindi nkucita shoonse nsheenga twacikonsha akucinka manungo muli nguwe kwaamba ayi atucaafwe.

7. Ino nshiinshi nsheshi twiiye ano?

⁷ Ino cakubonenaako cakwe Yesu inga twacikonkela buyani? Tutoobandika mbasu shili 4 sha shisepo sha mushimu usalashi. Ndyetutobandika lubasu lomwi alomwi, tutoobona Yesu mbwakatondesha cisepo ico akwiiya mbweenga twakonkela cakubonenaako cakwe. Lyalo tutobandika amiipusho yeenga yatucafwa kuya panembo mukutondesha ayi tulifwete buntu bupya.

8. Ino Yesu wakatondesha buyani lusuno?

⁸ Yesu wakaaba buumi bwakwe ceebo cakwaamba ayi wakalinga kusuni Yehova abuumbi andiswe. (Joni 14:31; 15:13) Yesu nshaakalinga kucita ndyaakalinga pacishi shakatondesha patuba kwaamba ayi wakalinga kubasuni abuumbi bantu. Bushiku abushiku, Yesu wakalinga kutondesha bantu lusuno akubanyumfwila nkumbu nabi bamwi ndyebakalinga kumupikisha. Nshila iyandika abuumbi mbwaakatondesha ayi alisuni bantu nkwiinda mukubaiisha sha Bwaami bwakwe Lesa. (Luka 4:43, 44) Alimwi wakatondesha ayi alisuni Lesa abantu kwiinda mukulyaaba kufwa lufu lwakupenshekwa ku bamucita shibiibi. Ici cakapa kwaamba ayi soonse tube acoolwe cakulangila kuba abuumi butamaani.

9. Ino cakubonenaako cakwe Yesu cakutondesha lusuno inga twacikonkela buyani?

⁹ Twakalyaaba kuli Yehova akubombekwa mukwiinga tulisuni Ishiwesu wakwiculu. Aboobo bweenka mbuli Yesu, aswebo tulyeelete kutondesha ayi tulisuni Yehova kwiinda mukucitila bantu shintu shibotu. Mutumwi Joni wakalemba ayi: “Na umwi waamba ayi, Lesa ndimusuni, sombi kaapatite mubye, ngumubeshi. Anu inga wasuna buyani Lesa ngwaatana kubonaawo na kaapatite mubye ngwaabona?” (1 Joni 4:20) Inga twaliipusha ayi: ‘Sa ndibasuni abuumbi bantu? Sa ndatondesha nkumbu kubamwi, nabi kwaamba ayi tabantondeshi bulemu? Sa lusuno lulampa kulyaaba kusebensesha ciindi ashintu shangu kucafwa bamwi kwiiya pali Yehova? Sa ndilyaabite kucita boobo nabi kwaamba ayi bantu baanji tabanduumbi nabi na balampikisha? Sa kuli shimwi nsheenga ndaciita kwaamba ayi nooba aciindi cikwene cakwaabanamo lubasu muncito yakucafwa bantu kuba bashikwiiya?’—Efe. 5:15, 16.

10. Ino Yesu wakatondesha buyani ayi ngumuntu uyuminisha luumuno?

¹⁰ Yesu wakalinga muntu uyuminisha luumuno. Taakalinga kubooshesha cibiibi pacibiibi na bantu bamucitila shibiibi. Sombi kuli shiinji nshaakacita. Wakalinga kutaanguna kucitawo comwi kwaamba ayi anoonyumfwana abamwi alimwi wakayuminisha bamwi kubandikishanya na bapusana. Kucakubonenaako, wakabaiisha ayi bakalinga kweelete kunoonyumfwana abamwi kwaamba ayi Yehova atambule kulambila kwabo. (Mate. 5:9, 23, 24) Alimwi mankanda aanji wakacafwa batumwi kucileka kupikishanya pamakani a wakalinga munene pakati kabo.—Luka 9:46-48; 22:24-27.

11. Ino inga twacita buyani kwaamba ayi tuyuminishe luumuno?

¹¹ Kuba muntu uyuminisha lumuuno tacaambi kuleyabo kupusana abamwi sobwe. Tulyeelete  kutaanguna kucitawo comwi kwaamba ayi tube muluumuno abamwi akuyuminisha bamakwesu abenankashi kubandikishanya na bapusana. (Filip. 4:2, 3; Jemu. 3:17, 18) Inga twaliipusha ayi: ‘Ino nshiinshi nshondyaabite kucita kwaamba ayi noonyumfwana abamwi? Sa ndabikila mfundilishi mukwesu nabi nankashi wankalasha? Sa ndime ntaanguna kucitawo comwi kwaamba ayi mbooshe luumuno nabi teshi ndime ndabisha, na ndalindila kwaamba ayi uyo wakabisha ngwaeelete kutaanguna kucitawo comwi? Na kaceelela, sa ndayuminisha bamwi na bapusana kubandikishanya kwaamba ayi babooshe luumuno?’

12. Ino Yesu wakatondesha buyani nkumbu?

¹² Yesu wakalinga muntu uli kabotu. (Mate. 11:28-30) Wakatondesha nkumbu kwiinda mukutayuminina pashintu, nabi ndyaakalinga mubukaalo buyumu. Kucakubonenaako, mwanakashi waku Fonisha ndyaakamusenga ayi ashilike mwanaakwe, pakutaanguna wakakaka kucitila mwanakashi uyo nshaakalinga kusenga. Ano mwanakashi uyo ndyaakatondesha lushomo, Yesu wakashilika mwaana wa mwanakashi uyo. (Mate. 15:22-28) Nabi kwaamba ayi Yesu wakalinga kucite nkumbu, taakwe kuleya kululika bamwi. Cimwi ciindi wakalinga kutondesha nkumbu kubamwi kwiinda mukululika baabo mbwaakalinga kusuni. Kucakubonenaako, Pita ndyakeelesha kumukasha kucita shakalinga kweelete kukumanisha kuyanda kwakwe Yehova, Yesu wakamululika pameenso abashikwiiya bamwi. (Maako 8:32, 33) Taakwe kucita boobo kwaamba ayi alenshe nsoni Pita, sombi wakalinga kusuni kumwiisha akucenjesha bashikwiiya bamwi kutacita shintu nshebatakwe kupekwa nkusu shakucita. Ncakutatoonsha kwaamba ayi Pita wakanyumfwa nsoni, sombi kululika kulya kwakamucafwa.

13. Ino inga twatondesha buyani ayi tulicite nkumbu shancinencine?

¹³ Cimwi ciindi inga twayandika kutondesha nkumbu kubaabo mbotusuni kwiinda mukubalulika cakuteenda mweela. Amukonkele cakubonenaako cakwe Yesu kwiinda mukubalulika kusebensesha Maswi akwe Lesa. Amwaambe camoyo nteeka. Amushome ayi balicite luyaando lwakucita shibotu. Abo bamusuni alimwi basuni Yehova, balaakukonkela kululika kwanu kwalusuno. Amuliipushe ayi: ‘Sa ndacikonsha kwaambawo na ndabona muntu ngoonsuni kaacita cintu cimwi citabete kabotu? Na ntoyandika kululika bamwi, sa ndatondesha nkumbu, na ndaamba cabukali? Ino nciinshi cimpa kululika bamwi? Sa ndacita boobo ceebo cakwaamba ayi muntu uyo wancima, na ceebo cakwaamba ayi ndisuni kumucafwa?’

14. Ino Yesu wakatondesha buyani ayi wakalinga muntu uli kabotu?

¹⁴ Yesu taeelibo pakushiba shibotu sombi alacita shibotu. Mukwiinga alibasuni Baishi, lyoonse Yesu alacita shintu shiluleme aluyaando lweelete. Muntu uli kabotu, lyoonse aleelesha kucana nshila sha mbweenga wacita shintu shibotu kubamwi. Tatweelete kweelabo pakushiba shintu sheelete; sombi tulyeelete kucita shintu isho aluyaando lwakucafwa bamwi. Ano mpashi inga mwayeeya ayi, ‘Sa muntu inga wacita cintu ceelete aluyaando lutabete kabotu?’ Ee. Kucakubonenaako, Yesu wakaamba pabaabo bakalinga kupa lucafwo kubakandu, sombi bakalinga kushinisha kwaamba ayi bantu bamwi bashiba shipo isho nshebapa kwaamba ayi babalumbaishe. Nabi kwaamba ayi bakacita shintu shibotu, Yehova taakwe kukondwa anshobakacita.—Mate. 6:1-4.

15. Ino inga twacita buyani kwaamba ayi tunoocita shibotu?

¹⁵ Inga twatondesha ayi tuli bantu bali kabotu na katucita shintu sheelete aluyaando luli kabotu. Aboobo inga mwaliipusha ayi: ‘Sa ndeelabo pakushiba shintu sheelete kucitwa sombi akutashicita? Ino nciinshi cimpa kucita shintu shibotu?’

16. Ino nshiinshi nshotweelete kucita bushiku abushiku, alimwi ino nceebonshi?

¹⁶ Tatweelete kuyeeya ayi na twabombekwa ingayi camana twafwala buntu bupya. Tulyeelete kutolelela kusebensa cankusu. Buntu bupya buli anga ncakufwala cipya ncotweelete kutolelela kulama kabotu. Nshila yomwi mbweenga twacita boobo, nkwiinda mukuyeeya mbweenga twatondesha shisepo sha mushimu wakwe Lesa bushiku abushiku. Ino nceebonshi? Yehova ngu Lesa ukumanisha shintu, alimwi mushimu wakwe ni nkusu shisebensa. (Mata. 1:2) Aboobo lubasu luli loonse lwa shisepo sha mushimu lulyeelete kutucafwa kucitawo comwi. Kucakubonenaako, mutumwi Jemusi wakalemba ayi: “Lushomo na talucite micito lulifwite.” (Jemu. 2:26) Ubu mbocibete akushisepo shoonse sha mushimu wakwe Lesa. Lyoonse na twatondesha shisepo sha mushimu, cilabonekela patuba kwaamba ayi mushimu wakwe Lesa utootucafwa.

17. Ino nciinshi ncotweelete kucita na twaalilwa kutondesha shisepo sha mushimu?

¹⁷ Beneklistu bakabombekwa kale kale abalo cimwi ciindi balaalilwa kutondesha shisepo sha mushimu. Nacibi boobo, cintu ciyandika nkutolelela kweelesha cankusu kutondesha shisepo sha mushimu. Amuyeeye cakubonenaako ici. Na cakufwala ncomusuni abuumbi cakwamuka, sa inga mwacisowa peenkapo? Sobwe. Mpashi na kacikonsheka inga mwacitunga. Lyalo inga mwatalika kucilama cakubikila maano. Aboobo na cimwi ciindi mwaalilwa kutondesha nkumbu, kukalika moyo, na lusuno kumuntu umwi, mutalefuki. Amusenge kulekelelwa kuswa panshi lya moyo kwaamba ayi mutolelele kunyumfwana amuntu uyo. Amube bashinishite kucita kabotu kunembo.

18. Ino nciinshi nceenga twashoma cakutatoonsha?

¹⁸ Tulalumba abuumbi kwaamba ayi Yesu wakatutondesha cakubonenaako cibotu! Na katuyeeya akubona shintu bweenka mbuli nguwe, cilaakutubeta cuubu kukonkela cakubonenaako cakwe. Cilaakuba cuubu kufwala buntu bupya na katucita shintu bweenka mbuli Yesu. Mumutwi uyu tweeyabo pa shisepo sha mushimu wakwe Lesa shili 4. Inga camucafwa abuumbi na mwacaana ciindi cakwiiya pa shisepo shimwi sha mushimu usalashi lyalo akulanga langa mbweenga mwashitondesha. Inga mwacana mitwi imwi yaamba pamakani aya mulibuku lyamu Chitonga lyaamba ayi Bbuku Ligwasya Kuvwuntauzya lya Bakamboni ba Jehova pamutwi utokwaamba ayi “Buumi bwa Bunakristo” lyalo akubona palembetwe ayi “Mucelo Wamuuya.” Inga mwashoma cakutatoonsha kwaamba ayi na mwacita nsheenga mwacikonsha kwaamba ayi mufwale buntu bupya akutabufuula, Yehova alaakumucafwa.