1. Ngaˬ hui hkʼaˬ hkʼe ve chaw hpehꞈ ve aˬ htoꞈ ma htaꞈ shiˍ ve le?

 Ngaˬ hui Baˆtiˆsaˬ haꞈ yuˬ gehˇ sheˍ ve maˇ heˆ leh hkʼaˬ nyiˇ chi hkʼawꞈ gaˬ˗oˬ ve htawˇ, ngaˬ hui teˇ gʼaˇ le le Yaˬhoˉvaˬ haꞈ laˇ tuˬ ve te hkʼaˇ dawˇ hkʼaˇ cawˬ tcuh gaˇ ve yoˬ. Chi hkʼe te gʼa tuˬ ngaˬ hui ve te hkʼaˇ dawˇ hkʼaˇ htaꞈ gʼa tawˍ daꞈ ve yoˬ. Aˬ htoꞈ ma pa taw le? Ngaˬ hui hkʼaˬ hkʼe ve chaw hpehꞈ ve htaꞈ shiˍ tuˬ, ngaˬ hui ve te hkʼaˇ dawˇ hkʼaˇ htaꞈ shiˍ gʼa ve yoˬ. Ngaˬ hui ve te hkʼaˇ dawˇ hkʼaˇ htaꞈ tiˉ te ve kʼo, ngaˬ hui tawˇ yaw ve maˇ heˆ leh maˇ daꞈ ve awˬ ceuˬ htaꞈ te la ve yoˬ. (Eˇfeˇsuꞈ 4:17-19) Ngaˬ hui daꞈ ve awˬ ceuˬ htaꞈ hkʼaˬ htaˆ kaꞈ dawˇ nyi ve kʼo, ngaˬ hui kʼoˆ ve leh te ve awˬ ceuˬ Yaˬhoˉvaˬ nyi hkʼaˇ suh tuˬ te piˇ gʼa ve yoˬ.—Gaˍlaˍtiˆ 5:16.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ponˬ taˉ ve teˇ lawn hkʼaw ngaˬ hui gʼa henˇ˗oˬ ve hkʼe, ngaˬ hui ve nyi ma hkʼaw maˇ daꞈ ve dawˇ hkʼaˇ teˇ ceuˬ le le maˇ cawˬ tcuh tuˬ te maˇ gʼa. Yaꞈ hkʼaˇ, ngaˬ hui te hkʼaˇ dawˇ hkʼaˇ chi hkʼe ve htaꞈ maˇ gʼaꞈ te tuˬ leuˆ gʼa ve yoˬ. Ngaˬ hui Baˆtiˆsaˬ maˇ haꞈ yuˬ sheˍ htaˇ, maˇ daꞈ ve tawˇ maˇ yaw leh Yaˬhoˉvaˬ maˇ dawˇ cawˇ ve awˬ ceuˬ maˇ te˗oˬ ve yoˬ. “Chaw awˬ piˍ ve” te hkʼaˇ dawˇ hkʼaˇ htaꞈ baˬ taˉ tuˬ, chi ve lehˬ awˉ lawˉ teˇ ceuˬ hpehꞈ leh a yeˇ uiˍ jaˇ ve yoˬ. Yaꞈ hkʼaˇ, Yaˬhoˉvaˬ nyi hkʼaˇ suh tuˬ ‘chaw awˬ suhˉ ve’ te hkʼaˇ dawˇ hkʼaˇ cawˬ tuˬ, ngaˬ hui gʼa te cawˇ ve yoˬ. (Kawˇlawˇsehˇ 3:9) Awˬ lawn chi ve hkʼaw ‘chaw awˬ suhˉ ve’ te hkʼaˇ dawˇ hkʼaˇ aˬ htoꞈ ma le, leh ngaˬ hui ‘chaw awˬ suhˉ ve’ te hkʼaˇ dawˇ hkʼaˇ hkʼaˬ hkʼe te cawˬ tcuh gʼa tuˬ le, teˇ geh henˇ tuˬ yoˬ.

3. Gaˍlaˍtiˆ liꞈ 5:22, 23 hkʼaw kʼoˆ taˍ ve hkʼe, ‘chaw awˬ suhˉ ve’ te hkʼaˇ dawˇ hkʼaˇ aˬ htoꞈ ma le? Leh “chaw awˬ suhˉ ve” te hkʼaˇ dawˇ hkʼaˇ hkʼaˬ hkʼe hpehꞈ ve le?

³ ‘Chaw awˬ suhˉ ve’ te hkʼaˇ dawˇ hkʼaˇ Yaˬhoˉvaˬ hkʼe dawˇ leh te ve yoˬ. Yawˇ Gʼuiˬ sha ve daꞈ kehˬ ve awˬ ha hpu awˬ shiˍ nawꞈ ve tehꞈ  hpeuꞈ maw laˇ ve yoˬ. Leh yawˇ ve te hkʼaˇ dawˇ hkʼaˇ hkʼaw Gʼuiˬ sha ve daꞈ kehˬ ve awˬ ha hpu cawˬ tcuh ve yoˬ. (Gaˍlaˍtiˆ 5:22, 23 gʼaw sheˍ.) Tawˇ pa haˉ te kʼo, Yaˬhoˉvaˬ lehˬ yawˇ ve chaw htaꞈ haꞈ ve yoˬ. (Maꞈhtehˍ 22:36-39) Yawˇ tuꞈ hkanˍ ve htaꞈ gʼa hpuˇ ve htawˇ hkʼaˬ htaˆ kaꞈ ha lehˬ gʼa sheˍ ve yoˬ. (Yaˍkoˆ 1:2-4) Yawˇ shu geh cawˇ daꞈ hui daꞈ tuˬ te ve yoˬ. (Maꞈhtehˍ 5:9) Yawˇ suh htaꞈ yeunˇ hkanˍ leh ha kʼaˉ piˇ ve yoˬ. (Kawˇlawˇsehˇ 3:13) Yawˇ daꞈ ve awˬ ceuˬ htaꞈ haꞈ leh daꞈ ve kaꞈ te ve yoˬ. (Luˉkaꞈ 6:35) Yawˇ Yaˬhoˉvaˬ htaꞈ yonˍ ve tehꞈ hpeuꞈ maw laˇ ve yoˬ. (Yaˍkoˆ 2:18) Shu awˬ lawn cawˬ tuˬ ca te la ve htawˇ, yawˇ nyi ma nuˇ nehˬ ve yoˬ. Yaꞈ ve te tuˬ lawˇ nyi piˇ ve htawˇ, yawˇ awˬ to htaꞈ tawˍ daꞈ gʼaˇ ve yoˬ.—1 Kawˇrenˍhtuˆ 9:25, 27; Tiˇtuˆ 3:2.

4. Ngaˬ hui ‘chaw awˬ suhˉ ve’ te hkʼaˇ dawˇ hkʼaˇ cawˬ tcuh ve kʼo, Gaˍlaˍtiˆ liꞈ 5:22, 23 hkʼaw te hkʼaˇ dawˇ hkʼaˇ teˇ hpaˍ teˇ ceuˬ leh teˇ ceuˬ hpeuꞈ maw laˇ hpehꞈ˗aw laˇ? Kʼoˆ maˍ laˇ sheˍ.

⁴ Ngaˬ hui ‘chaw awˬ suhˉ ve’ te hkʼaˇ dawˇ hkʼaˇ cawˬ tuˬ, Gaˍlaˍtiˆ liꞈ 5:22, 23 leh awˬ nu ve Liꞈ hpu awˬ tawn hkʼaw te hkʼaˇ dawˇ hkʼaˇ teˇ ceuˬ le le htaꞈ ngaˬ hui gʼa hpeuꞈ maw piˇ ve yoˬ. * Ngaˬ hui aˉ poꞈ veuꞈ kʼaˇ teˇ hkʼoˆ peuˬ teˇ hkʼoˆ veuꞈ ve hkʼe, te hkʼaˇ dawˇ hkʼaˇ teˇ ceuˬ peuˬ teˇ ceuˬ hpeuꞈ maw piˇ maˇ gʼa. Tawˇ pa haˉ te kʼo, aˉ poꞈ veuꞈ ve, haˍ htaw veuꞈ ve, leh haˍ pi tcuhꞈ ve, te hkʼaˇ dawˇ hkʼaˇ chi ve teˇ hpaˍ hpaˍ ceh caˉ daꞈ ve pa taw, ngaˬ hui te hkʼaˇ dawˇ hkʼaˇ chi ve teˇ hpaˍ teˇ geh gʼa hpeuꞈ maw piˇ ve yoˬ. Ngaˬ hui awˬ nu ve chaw htaꞈ haꞈ ve kʼo, ngaˬ hui yawˇ htaꞈ yeunˇ hkanˍ leh ha kʼaˉ ve yoˬ. Ngaˬ hui shu htaꞈ daꞈ ve te piˇ ve kʼo, ngaˬ hui nyi ma nuˇ nehˬ ve leh a shu yawˇ awˬ to htaꞈ gʼaˇ puiˉ ve yoˬ.

5. “Hkriꞈ ve nyi ma” cawˬ ve aˬ htoꞈ ma htaꞈ kʼoˆ gaˇ ve le? Leh Yeˍsuˆ htaꞈ caˉ daꞈ ve ngaˬ hui aˬ htoꞈ ma te henˇ cawˇ ve le? (1 Kawˇrenˍhtuˆ 2:16)

⁵ 1 Kawˇrenˍhtuˆ liꞈ 2:16 gʼaw sheˍ. Ngaˬ hui chaw awˬ suhˉ ve te hkʼaˇ dawˇ hkʼaˇ cawˬ gʼa tuˬ, ngaˬ hui “Hkriꞈ ve nyi ma cawˬ” cawˬ ve yoˬ. Chi kʼoˆ gaˇ ve lehˬ, Yeˍsuˆ hkʼaˬ hkʼe dawˇ ve htaꞈ ngaˬ hui henˇ yuˬ leh gʼaꞈ te cawˇ ve yoˬ. Yeˍsuˆ lehˬ Gʼuiˬ sha ve awˬ ha hpu awˬ shiˍ nawꞈ ve tehꞈ hkʼa dehꞈ hpeuꞈ maw laˇ leh Yaˬhoˉvaˬ ve te hkʼaˇ dawˇ hkʼaˇ hkʼa shuˍ gʼaꞈ te gʼa ve yoˬ. (Heˍbrehˇ 1:3) Ngaˬ hui Yeˍsuˆ hkʼa shuˍ dawˇ ve kʼo, ngaˬ hui kaꞈ yawˇ te ve hkʼa shuˍ te gʼa leh te hkʼaˇ dawˇ hkʼaˇ yawˇ hkʼe leˇ cawˬ ve tehꞈ hpeuꞈ maw piˇ gʼa ve yoˬ.—Hpiˇliˇpiˆ 2:5.

6. Ngaˬ hui ‘chaw awˬ suhˉ ve’ te hkʼaˇ dawˇ hkʼaˇ cawˬ tuˬ te htaˇ, ngaˬ hui aˬ htoꞈ ma htaꞈ gʼa tawnˇ taˍ cawˇ ve le?

⁶ Ngaˬ hui Yeˍsuˆ htaꞈ henˇ yuˬ gʼa˗aw laˇ tehꞈ htawˇ dawˇ nawˬ dawˇ cawˬ ve yoˬ. Ngaˬ hui dawˇ ve, ‘Yeˍsuˆ lehˬ biˇ jaˇ ve chaw hpehꞈ ve yoˬ. Ngaˬ yawˇ hkʼe leˇ te maˇ gʼa taˬ.’ Nawˬ chi hkʼe dawˇ htaˇ chi  ve 3 ceuˬ htaꞈ tawnˇ taˍ sheˍ. Awˉ lawˉ teˇ ceuˬ lehˬ, nawˬ lehˬ Yaˬhoˉvaˬ ve awˬ hoꞈ awˬ han hkʼe hpanˍ taˍ laˇ ve yoˬ. Hkʼe te leh, nawˬ yawˇ htaꞈ henˇ yuˬ gʼa ve yoˬ. Yaꞈ hkʼaˇ, nawˬ a ciˉ ceh tiˉ te gʼa ve htawˇ, yawˇ hui htaꞈ henˇ yuˬ gʼa ve yoˬ. (Awˬ hkuiˉ puiˍ 1:26) Nyiˇ ceuˬ lehˬ, Gʼuiˬ sha ve daꞈ kehˬ ve awˬ ha hpu lehˬ, mvuhˇ naw ma miˬ naˆ ma hkʼoˆ kanˇ paˆ uiˍ jaˇ ve yoˬ. Nawˬ Gʼuiˬ sha geh daꞈ kehˬ ve awˬ ha hpu lawˬ ve kʼo, nawˬ hkʼaˇ nawˬ te maˇ gʼa ve awˬ ceuˬ htaꞈ te gʼa tuˬ yoˬ. Shehˆ ceuˬ lehˬ, chi teˇ hkui nawˬ Gʼuiˬ sha ve awˬ ha hpu awˬ shiˍ hkʼa biˇ nawꞈ ve tehꞈ hpeuꞈ maw piˇ tuˬ, Yaˬhoˉvaˬ maˇ dawˇ law. Miˬ guiˬ hkʼoˆ lo dawˇ law kuiˬ cawˬ ve chaw lehˬ biˇ ve chaw hpehꞈ tuˬ, Yaˬhoˉvaˬ 1,000 hkʼawꞈ awˬ yanˇ peꞈ laˇ ve yoˬ. (Hpeuꞈ maˍ ve 20:1-3) Chi teˇ hkui Yaˬhoˉvaˬ ngaˬ hui htaꞈ te tcuh gaˇ ve awˬ ceuˬ lehˬ, ngaˬ hui ‘chaw awˬ suhˉ ve’ te hkʼaˇ dawˇ hkʼaˇ cawˬ tcuh tuˬ, leh yawˇ htaꞈ hkʼaˬ htaˆ kaꞈ gʼaˇ va tuˬ, yawˇ ngaˬ hui htaꞈ te tcuh gaˇ ve yoˬ.

7. Chi teˇ hkui ngaˬ hui aˬ htoꞈ ma ve awˬ lawn htaꞈ henˇ tuˬ le?

⁷ Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le? Chi teˇ hkui ‘Gʼuiˬ sha ve awˬ ha hpu ve awˬ shiˍ nawꞈ la ve teˇ hpaˍ’ chi ve htaꞈ caˉ daꞈ ve te hkʼaˇ dawˇ hkʼaˇ 4 ceuˬ htaꞈ teˇ geh henˇ tuˬ yoˬ. Te hkʼaˇ dawˇ hkʼaˇ chi ve teˇ hpaˍ htaꞈ teˇ ceuˬ leh teˇ ceuˬ kʼoˆ htaˇ, chi ve teˇ hpaˍ htaꞈ Yeˍsuˆ hkʼaˬ hkʼe hpeuꞈ maw laˇ ve teˇ geh henˇ tuˬ yoˬ. Leh ‘chaw awˬ suhˉ ve’ te hkʼaˇ dawˇ hkʼaˇ hkʼa dehꞈ cawˬ gʼa tuˬ ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le kaꞈ teˇ geh henˇ tuˬ yoˬ.

8. Yeˍsuˆ haꞈ pehnˇ ve tehꞈ hkʼaˬ hkʼe hpeuꞈ maw laˇ ve le?

⁸ Yeˍsuˆ lehˬ Yaˬhoˉvaˬ htaꞈ haꞈ jaˇ ve pa taw, yawˇ ve Awˬ pa leh ngaˬ hui teˇ gʼaˇ le le ve awˬ pon a shaꞈ tanˇ laˇ ve yoˬ. (Yoˇhanˬ 14:31; 15:13) Yeˍsuˆ miˬ guiˬ hkʼoˆ chehˇ htaˇ yawˇ te ve awˬ ceuˬ htaꞈ ngaˬ hui nyi htaˇ yawˇ chaw yaˇ htaꞈ hkʼaˬ hkʼe taw haꞈ ve ngaˬ hui mawˬ ve yoˬ. Yawˇ htaꞈ maˇ daꞈ ve te piˇ ve chaw htaꞈ htawˇ, yawˇ yawˇ hui htaꞈ haꞈ leh ha kʼaˉ piˇ ve yoˬ. Yawˇ yawˇ hui htaꞈ haꞈ ve a yeˇ uiˍ jaˇ ve tehꞈ hpeuꞈ maw piˇ ve lehˬ, Gʼuiˬ sha ve mvuhˇ miˬ daꞈ ve awˬ lawn sha tanˇ yawˇ hui htaꞈ maˍ piˇ ve yoˬ. (Luˉkaꞈ 4:43, 44) Yeˍsuˆ lehˬ Gʼuiˬ sha leh chaw yaˇ htaꞈ haꞈ ve tehꞈ hpeuꞈ maw laˇ ve teˇ hkʼaˇ lehˬ, venˇ baˆ yaˇ ve laꞈ hkʼaw gʼa tuꞈ gʼa hkanˍ suh ve yoˬ. Yawˇ te ve awˬ ceuˬ lehˬ nga hui co co taiˍ taiˍ a shaꞈ gʼa tuˬ awˬ hkʼaˇ cawˬ ve yoˬ.

9. Yeˍsuˆ hkʼa shuˍ ngaˬ hui haꞈ pehnˇ ve hkʼaˬ hkʼe te hpeuꞈ maw piˇ gʼa tuˬ le?

⁹ Ngaˬ hui Yaˬhoˉvaˬ htaꞈ haꞈ ve pa taw, awˬ to chiˇ aꞈ leh Baˆtiˆsaˬ haꞈ yuˬ ve yoˬ. Yeˍsuˆ hkʼa shuˍ ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ ve lehˬ, awˬ nu ve chaw htaꞈ haꞈ ve yoˬ. Tcuh yaˇ Yoˇhanˬ kʼoˆ ve, “a shu yawˇ mawˬ chehˇ ve awˬ viˉ awˬ nyi htaꞈ maˇ haꞈ ve chaw teˇ gʼaˇ lehˬ, maˇ mawˬ jaw ve Gʼuiˬ sha htaꞈ yawˇ hkʼaˬ hkʼe te haꞈ hpehꞈ tuˬ le?” (1 Yoˇhanˬ 4:20) Chi htaꞈ pa taw, a shu yawˇ awˬ to htaꞈ na nyi cawˇ ve, ‘peuˬ laˬ htaˇ ngaˬ awˬ nu ve chaw htaꞈ haꞈ˗aw laˇ? Yawˇ ngaˬ htaꞈ maˇ daꞈ ve te laˇ ve htawˇ, ngaˬ yawˇ htaꞈ ha kʼaˉ piˇ˗aw laˇ? Ngaˬ awˬ nu ve chaw htaꞈ Yaˬhoˉvaˬ ve awˬ lawn maˍ piˇ tuˬ, awˬ yanˇ leh cawˬ taˍ ve awˬ ceuˬ yuˬ tanˇ˗aw laˇ? Ngaˬ te ve awˬ ceuˬ htaꞈ maˇ˗awˍ ve chaw awˬ hpfuhˇ maˇ shiˍ ve pa taw tawˍ laˇ ve htawˇ, chi ngaˬ caˉ leh ha lehˬ ha kʼa te˗aw laˇ? Awˬ nu ve chaw awˬ laꞈ gʼawˇ hpehꞈ la tuˬ ngaˬ awˬ yanˇ yuˬ tanˇ leh maˍ piˇ˗aw laˇ?’—Eˇfeˇsuꞈ 5:15, 16.

10. Yeˍsuˆ lehˬ cawˇ daꞈ hui daꞈ tuˬ hkʼaˬ hkʼe te ve le?

¹⁰ Yeˍsuˆ htaꞈ shu maˇ daꞈ ve te piˇ htaˇ yawˇ te hkʼawꞈ tuˬ maˇ dawˇ leh yawˇ cawˇ daꞈ hui daꞈ tuˬ te ve yoˬ. Chi hkʼe ceh tiˉ maˇ heˆ. Yeˍsuˆ awˉ lawˉ shu geh cawˇ daꞈ hui daꞈ tuˬ te leh shu cawˇ daꞈ hawˍ daꞈ tuˬ kaꞈ ga piˇ ve yoˬ. Tawˇ pa haˉ te kʼo, yawˇ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tcuh gaˇ ve kʼo, yawˇ hui awˬ viˉ awˬ nyi geh awˉ lawˉ gʼa cawˇ daꞈ ve tehꞈ Yeˍsuˆ maˍ piˇ ve yoˬ. (Maꞈhtehˍ 5:9, 23, 24) Tcuh yaˇ hui hkʼaˬ ve teˇ gʼaˇ shu aꞈ kehˉ uiˍ ve tehꞈ teˇ gʼaˇ leh teˇ gʼaˇ laiˉ pawˆ tawˇ gʼawˬ daꞈ htaˇ, yawˇ hui cawˇ daꞈ hawˍ daꞈ tuˬ Yeˍsuˆ ga piˇ gʼa ve yoˬ.—Luˉkaꞈ 9:46-48; 22:24-27.

11. Ngaˬ hui cawˇ daꞈ hui daꞈ ve chaw hkʼaˬ hkʼe hpehꞈ gʼa tuˬ le?

¹¹ Ngaˬ hui shu geh cawˇ daꞈ hawˍ daꞈ ve chaw hpehꞈ gaˇ ve kʼo, ngaˬ hui shu geh awˬ lawn maˇ cawˬ  daꞈ ve ceh maˇ heˆ. Shu ngaˬ hui geh awˬ lawn cawˬ ve kʼo, ngaˬ hui awˉ lawˉ yawˇ geh cawˇ daꞈ tuˬ te cawˇ ve yoˬ. Awˬ viˉ awˬ nyi awˬ lawn cawˬ daꞈ ve tehꞈ ngaˬ hui shiˍ ve kʼo, yawˇ hui cawˇ daꞈ tuˬ ngaˬ hui ga piˇ gʼa ve yoˬ. (Hpiˇliˇpiˆ 4:2, 3; Yaˍkoˆ 3:17, 18) Ngaˬ hui a shu yawˇ awˬ to htaꞈ na nyi cawˇ ve, ‘ngaˬ shu geh cawˇ daꞈ hawˍ daꞈ tuˬ, ngaˬ ha lehˬ ha kʼa aˬ htoꞈ ma te gʼa ve le? Awˬ viˉ awˬ nyi ngaˬ nyi ma naˬ tuˬ te laˇ ve kʼo, ngaˬ yawˇ htaꞈ beuꞈ chehˇ sheˍ ve laˇ? Yawˇ ngaˬ htaꞈ tawˇ yaw laˇ tuˬ maˇ heˆ leh cawˇ daꞈ hawˍ daꞈ te tuˬ ngaˬ law chehˇ˗aw laˇ? Yawˇ yaꞈ ve htawˇ ngaˬ awˉ lawˉ cawˇ daꞈ hawˍ daꞈ tuˬ te˗aw laˇ? Awˬ viˉ awˬ nyi awˬ lawn cawˬ daꞈ ve tehꞈ ngaˬ shiˍ ve kʼo, yawˇ hui cawˇ daꞈ hawˍ daꞈ tuˬ ngaˬ ga piˇ˗aw laˇ?’

12. Yeˍsuˆ lehˬ ha kʼaˉ puiˉ ve chaw hkʼaˬ hkʼe hpehꞈ ve le?

¹² Yeˍsuˆ lehˬ ha kʼaˉ puiˉ ve chaw hpehꞈ ve yoˬ. (Maꞈhtehˍ 11:28-30) Teˇ pawˆ pawˆ kʼo, Yeˍsuˆ chi hkʼe te tuˬ maˇ sha ve htawˇ, yawˇ nyi ma nuˇ nehˬ ve, awˬ hkʼaˇ ca ve, shu htaꞈ venˇ baˆ hpehˇ piˇ ve yoˬ. Tawˇ pa haˉ te kʼo, teˇ pawˆ htaˇ Hkaˍnanˍ mvuhˇ miˬ hkʼaw chehˇ ve yaˇ miˇ teˇ gʼaˇ yawˇ ve yaˇ miˇ ehˉ htaꞈ haꞈ shaˉ laˇ tuˬ Yeˍsuˆ geh lawˬ ve yoˬ. Awˉ lawˉ htaˇ yawˇ lawˬ ve hkʼe Yeˍsuˆ maˇ ga piˇ ve htawˇ, yawˇ yonˍ yeˬ jaˇ ve htaꞈ Yeˍsuˆ gʼa mawˬ htaˇ, Yeˍsuˆ lehˬ yawˇ ve yaˇ miˇ htaꞈ nuˇ nehˬ ve hkʼaw gu na˗e piˇ ve yoˬ. (Maꞈhtehˍ 15:22-28) Yeˍsuˆ ha kʼaˉ puiˉ ve chaw hpehꞈ leh, yawˇ haꞈ ve chaw maˇ te cawˇ ve htaꞈ yawˇ mawˬ htaˇ, awˬ hkʼaˇ beˆ maˍ piˇ ve yoˬ. Tawˇ pa haˉ te kʼo, Yaˬhoˉvaˬ ve a loˍ htaꞈ maˇ gʼaꞈ te kaꞈ hpehꞈ ve yoˬ tehꞈ Peˍtruˆ Yeˍsuˆ htaꞈ kʼoˆ piˇ ve yoˬ. Yeˍsuˆ kaꞈ awˬ nu ve chaw mehˆ gʼuˇ suhˍ Peˍtruˆ htaꞈ deˇ piˇ ve yoˬ. (Maˍkuˆ 8:32, 33) Yawˇ Peˍtruˆ mehˆ hpfuhˇ luˬ tuˬ maˇ te piˇ gaˇ. Awˬ leuˉ maˇ gʼa te tuˬ yawˇ leh awˬ nu ve awˬ laꞈ gʼawˇ htaꞈ maˍ piˇ leh shaˍ tiꞈ piˇ ve yoˬ. Oˇ ve teˇ yanˇ Peˍtruˆ yaꞈ taw ve htawˇ, peuˬ hkʼawꞈ nawˉ Peˍtruˆ Yeˍsuˆ beˆ maˍ piˇ ve htaꞈ awˬ bon gʼa ve yoˬ.

13. Ngaˬ hui ha kʼaˉ puiˉ ve chaw hkʼaˬ hkʼe hpehꞈ gʼa tuˬ le?

¹³ Nawˬ ha kʼaˉ puiˉ ve chaw hpehꞈ leh awˬ viˉ awˬ nyi htaꞈ haꞈ ve kʼo, yawˇ te ve maˇ cawˇ ve htaꞈ mawˬ htaˇ hteˇ˗ehˍ kʼoˆ piˇ gʼa ve yoˬ. Nawˬ chi hkʼe te htaˇ Yeˍsuˆ htaꞈ henˇ yuˬ cawˇ ve yoˬ. Nawˬ yawˇ htaꞈ nuˇ nehˬ ve hkʼaw kʼoˆ piˇ leh Liꞈ hpu hkʼaw ve awˬ liˇ awˬ hkʼaˇ htaꞈ kaꞈ beˆ maˍ piˇ cawˇ ve yoˬ. Yawˇ Yaˬhoˉvaˬ htaꞈ haꞈ leh cawˇ ve awˬ ceuˬ htaꞈ te gaˇ ve dawˇ hkʼaˇ cawˬ ve tehꞈ nawˬ tawnˇ taˍ cawˇ ve yoˬ. Yawˇ nawˬ htaꞈ haꞈ leh nawˬ beˆ maˍ piˇ ve tawˇ htaꞈ gʼaꞈ te gaˇ tuˬ yoˬ. A shu yawˇ awˬ to htaꞈ na nyi cawˇ ve, ‘yehˬ kʼa hkʼaw ve chaw maˇ heˆ leh ngaˬ haꞈ ve awˬ viˉ awˬ nyi teˇ ceuˬ ceuˬ te ve maˇ cawˇ ve kʼo, ngaˬ yawˇ htaꞈ beˆ maˍ piˇ haˆ˗aw laˇ? Ngaˬ yawˇ htaꞈ gʼa beˆ maˍ piˇ cawˇ ve kʼo, hehnˇ chaweh beˆ maˍ piˇ ve, maˇ heˆ leh nuˇ nehˬ ve hkʼaw beˆ maˍ piˇ cawˇ ve laˇ? Leh ngaˬ yawˇ htaꞈ aˬ htoꞈ ma pa taw beˆ maˍ piˇ ve le? Ngaˬ yawˇ htaꞈ nyi bawˬ ve maˇ heˆ leh awˬ tehˬ tehˬ ga piˇ gaˇ ve laˇ?’

14. Yeˍsuˆ cawˇ ve htaꞈ hkʼaˬ hkʼe te ve le?

¹⁴ Yeˍsuˆ daꞈ ve awˬ ceuˬ htaꞈ ceh shiˍ ve maˇ heˆ. Yawˇ daꞈ ve kaꞈ ve yoˬ. Yawˇ yawˇ ve Awˬ pa htaꞈ haꞈ jaˇ. Hkʼe te leh, yawˇ cawˇ ve awˬ ceuˬ htaꞈ te leh cawˇ ve dawˇ hkʼaˇ hkʼaˬ htaˆ kaꞈ cawˬ ve yoˬ. Daꞈ ve chaw lehˬ shu htaꞈ ga piˇ tuˬ awˬ hkʼaˇ ca leh oˇ ve teˇ gʼaˇ htaꞈ daꞈ ve awˬ ceuˬ te piˇ ve yoˬ. Aˬ htoꞈ ma cawˇ ve htaꞈ shiˍ ve ceh maˇ lawꞈ. Cawˇ ve dawˇ hkʼaˇ cawˬ leh cawˇ ve awˬ ceuˬ htaꞈ laꞈ haˉ gʼa gʼaꞈ te ve yoˬ. Chaw teˇ hpaˍ hpaˍ htawˇ dawˇ nawˬ dawˇ cawˬ ve, ‘maˇ daꞈ ve dawˇ hkʼaˇ cawˬ ve htawˇ, cawˇ ve awˬ ceuˬ htaꞈ te gʼa tuˬ hpehꞈ kʼai gʼa˗aw laˇ?’ Hpehꞈ kʼai gʼa ve yoˬ. Haˍ ve gʼawˇ ve chaw htaꞈ ga piˇ ve chaw lehˬ, shu mawˬ leh chiˇ mvuh laˇ ve htaꞈ heuˆ gaˇ ve tehꞈ Yeˍsuˆ kʼoˆ ve yoˬ. Chi hkʼe te ve chaw lehˬ, Yaˬhoˉvaˬ mehˆ gʼuˇ suhˍ awˬ hpfuhˇ maˇ cawˬ ve tehꞈ Yeˍsuˆ kʼoˆ ve yoˬ.—Maꞈhtehˍ 6:1-4.

15. Ngaˬ hui daꞈ ve chaw hkʼaˬ hkʼe hpehꞈ gʼa tuˬ le?

¹⁵ Ngaˬ hui daꞈ ve chaw hpehꞈ ve lehˬ shu htaꞈ daꞈ ve te piˇ htaˇ, shu te hkʼawꞈ laˇ tuˬ ve htaꞈ maˇ dawˇ law ve yoˬ. A shu yawˇ awˬ to htaꞈ na nyi cawˇ ve, ‘ngaˬ cawˇ ve awˬ ceuˬ htaꞈ shiˍ ve ceh maˇ lawꞈ. Yaꞈ hkʼaˇ, ngaˬ laꞈ haˉ gʼaꞈ te˗aw laˇ? Ngaˬ chi hkʼe te ve aˬ htoꞈ ma pa taw le?’

16. Ngaˬ hui teˇ nyi le le aˬ htoꞈ ma te cawˇ ve le? Leh aˬ htoꞈ ma pa taw le?

¹⁶ Ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ chaw awˬ suhˉ ve te hkʼaˇ dawˇ hkʼaˇ maˇ cawˬ cawˇ ve tehꞈ maˇ dawˇ cawˇ ve yoˬ. Ngaˬ hui dawˇ cawˇ ve, “aˉ poꞈ veuꞈ kʼaˇ awˬ suhˉ” cawˬ ve kʼo, hkʼaˬ htaˆ kaꞈ haꞈ shaˉ tuˬ yoˬ. Chi ve hkʼa shuˍ shuˍ, ‘chaw awˬ suhˉ ve’ te hkʼaˇ dawˇ hkʼaˇ htaꞈ gʼa haꞈ shaˉ cawˇ ve yoˬ. Teˇ hkʼaˇ lehˬ, Gʼuiˬ sha ve awˬ ha hpu awˬ shiˍ nawꞈ ve tehꞈ hpeuꞈ maw piˇ tuˬ, teˇ nyi le le ngaˬ hui awˬ hkʼaˇ ca ve yoˬ. Aˬ htoꞈ ma pa taw ngaˬ hui chi hkʼe te cawˇ ve le? Awˬ lawn kʼo, Yaˬhoˉvaˬ lehˬ taꞈ iˉ maˇ chehˇ ve Gʼuiˬ sha hpehꞈ leh yawˇ teˇ ceuˬ le le htaꞈ laꞈ haˉ te ve yoˬ. Daꞈ kehˬ ve awˬ ha hpu kaꞈ Gʼuiˬ sha kanˉ te htaˇ yehˇ ve yoˬ. Chi htaꞈ pa taw, laꞈ haˉ gʼaꞈ te ve lehˬ a yeˇ uiˍ jaˇ ve tehꞈ ngaˬ hui mawˬ ve yoˬ. (Awˬ hkuiˉ puiˍ 1:2) Gʼuiˬ sha ve awˬ ha hpu hkʼaw ve awˬ shiˍ nawꞈ ve teˇ hpaˍ kaꞈ hkʼa shiˍ hpehꞈ ve pa taw, ngaˬ hui kaꞈ gʼa gʼaꞈ te cawˇ ve yoˬ. Tawˇ pa haˉ te kʼo, Yaˍkoˆ kʼoˆ ve, “yonˍ ve teˇ ceuˬ htawˇ kanˉ maˇ te ve kʼo, suh taˍ ve yoˬ.” (Yaˍkoˆ 2:26) Leh awˬ nu ve te hkʼaˇ dawˇ hkʼaˇ teˇ hpaˍ kaꞈ maˇ te tawˆ la ve kʼo, oˇ ve htaꞈ shuˍ ve yoˬ. Gʼuiˬ sha ve awˬ ha hpu awˬ shiˍ nawꞈ ve tehꞈ ngaˬ hui hpeuꞈ maw piˇ ve kʼo, daꞈ kehˬ ve awˬ ha hpu ‘chaw awˬ suhˉ ve’ te hkʼaˇ dawˇ hkʼaˇ cawˬ tuˬ ngaˬ hui htaꞈ hkʼaˬ htaˆ kaꞈ ga laˇ ve yoˬ.

17. Gʼuiˬ sha ve daꞈ kehˬ ve awˬ ha hpu awˬ shiˍ nawꞈ ve tehꞈ ngaˬ hui maˇ hpeuꞈ maw piˇ ve kʼo, ngaˬ hui hkʼaˬ hkʼe te cawˇ ve le?

¹⁷ Awˬ viˉ awˬ nyi Baˆtiˆsaˬ haꞈ yuˬ ve laiˉ hkʼawꞈ gaˬ˗oˬ ve htawˇ, teˇ pawˆ pawˆ kʼo Gʼuiˬ sha ve awˬ ha hpu ve awˬ shiˍ nawꞈ ve tehꞈ maˇ hpeuꞈ maw piˇ. Yaꞈ hkʼaˇ, awˬ gʼaˇ taˇ nuˇ. Caˉ leh te kʼai sheˍ. Awˬ lawn chi htaꞈ dawˇ nyi sheˍ. Nawˬ dawˇ cawˇ jaˇ ve aˉ poꞈ teˇ hkʼoˆ tzuhꞈ˗e ve kʼo, nawˬ laꞈ haˉ gʼawˆ baˬ tuˬ laˇ? Chi hkʼe maˇ te taˬ. Nawˬ aˉ poꞈ chi htaꞈ gu leh gʼuˇ suhˍ hpawˇ kʼo aˉ poꞈ maˇ gʼa tzuhꞈ tuˬ shaˍ tiꞈ te ve yoˬ. Chi ve hkʼa shuˍ shuˍ teˇ pawˆ pawˆ nawˬ haꞈ pehnˇ ve, yeunˇ hkanˍ ve, maˇ heˆ leh shu htaꞈ haꞈ ve maˇ hpeuꞈ maw piˇ ve kʼo, awˬ gʼaˇ taˇ nuˇ sheˍ. Awˬ viˉ awˬ nyi oˇ ve teˇ gʼaˇ htaꞈ nyi ma awˬ tawˬ hkʼa gaˬ lawˬ hkʼawˉ piˇ sheˍ. Nawˬ awˬ viˉ awˬ nyi geh kʼawꞈ cawˇ daꞈ gʼa leh nawˬ ve te hkʼaˇ dawˇ hkʼaˇ pa tuˬ coˇ caˇ sheˍ.

18. Ngaˬ hui aˬ htoꞈ ma htaꞈ yonˍ gʼa ve le?

¹⁸ Yeˍsuˆ ve awˬ lawn htaꞈ ngaˬ hui gʼa henˇ yuˬ ve awˬ bon uiˍ jaˇ. Ngaˬ hui yawˇ hkʼe leˇ dawˇ ve kʼo, ngaˬ hui kaꞈ yawˇ hkʼe leˇ te gʼa ve yoˬ. Ngaˬ hui chi hkʼe gʼaˇ hteꞈ te ve kʼo, ngaˬ hui kaꞈ chaw awˬ suhˉ ve te hkʼaˇ dawˇ hkʼaˇ cawˬ gʼa ve yoˬ. Awˬ lawn chi ve hkʼaw Gʼuiˬ sha ve Awˬ ha hpu awˬ shiˍ nawꞈ ve te hkʼaˇ dawˇ hkʼaˇ 4 ceuˬ htaꞈ ngaˬ hui gʼa henˇ˗oˬ ve yoˬ. Awˬ nu ve te hkʼaˇ dawˇ hkʼaˇ htaꞈ awˬ yanˇ yuˬ tanˇ leh henˇ tuˬ hpfuhˆ nyi ve kʼo, nawˬ te hkʼaˇ dawˇ hkʼaˇ chi htaꞈ hkʼa dehꞈ hpeuꞈ maw piˇ˗aw laˇ tehꞈ dawˇ nyi sheˍ. Chi hkʼoˆ kaꞈ, Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ ve laꞈ caˉ hkʼaw “Hkriꞈ yaˇ ve a shaꞈ teꞈ hkʼaˇ” peuˬ leh “Awˬ ha hpu ve awˬ shiˍ nawꞈ ve teˇ hpaˍ” hpfuhˆ nyi leh gʼaw gʼa ve yoˬ. Nawˬ ‘chaw awˬ suhˉ ve’ te hkʼaˇ dawˇ hkʼaˇ cawˬ gʼa leh haꞈ shaˉ gʼa tuˬ yoˬ tehꞈ nawˬ yonˍ gʼa ve yoˬ. Nawˬ chi hkʼe te gʼa tuˬ Yaˬhoˉvaˬ ga laˇ tuˬ yoˬ.