1. Chumanyi chacheni chatuleteshaña kwikala nawuntu wawuha hela watama?

 HELA chakwila hanahiti mafuku antesha kufuma hitwapapatisheweli hela yaaka yayivulu, wejima wetu tunakukeña kwikala nawuntu wakeñañayi Yehova. Hakwila twikali naniwu wuntu twatela kuyuulaña yitoñojoka yetu. Muloñadi? Muloña yitoñojoka yetu diyatuleteshaña kwikala nawuntu wawuwahi hela watama. Neyi tutoñojokaña mpinji yejima chitunateli kuditiyisha kuwaha etu aweni, tukuhoshaña nikwila yuma yatama. (Efwe. 4:17-19) Munjila yikwawu, neyi tutoñojokaña hayuma yayiwahi, tukuhoshaña nikwila yuma munjila yamutiyishaña kuwaha Tata Yetu Yehova.—Ñal. 5:16.

2. Malwihwinyi itukuhanjekahu muchinu chibaaba?

² Neyi chitwahanjekeli muchibaaba chinafumihu, tukukañesha wanyi yitoñojoka yatama yejima kwiñila muyitoñojoka yetu. Ilaña tunateli kutondahu kubula kulondela yitoñojoka yeniyi. Henohu kanda tupapatishewi, twatela kuleka kuhosha nikwila yuma munjila yahelayi Yehova. Dichuma chatachi chalema chatela kwilayi muntu hakuvula wuntu wawukulu. Hela chochu, hakwila nawu tumuzañalesheña Yehova, twatela kwovwahila cheñi lushimbi lunakwila nawu: “Vwalenu wuntu wawuha.” (Kol. 3:10) Muchinu chibaaba, tukwakula awa malwihu analondelihu: “Wuntu wawuha” hichumanyi? Tunateli kuvwala ñahi wuntu wawuha nikutwalekahu kuwuvwala?

3. Kwesekeja naAÑalija 5:22, 23, “wuntu wawuha,” hichumanyi, nawa muntu wawuvwalaña ñahi?

³ “Wuntu wawuha” hikutoñojoka nikwila yuma neyi chelañayi Yehova. Muntu wavwalaña wuntu wawuha kuhitila mukumwekesha mukaabu waNzambi waspiritu, kwiteja spiritu  yajila yiyuuleña yitoñojoka yindi, chinakutiyayi, nichinakwilayi. (Tañenu AÑalija 5:22, 23.) Chakutalilahu, wamukeña Yehova niantu jindi. (Mat. 22:36-39) Watwalekañahu kwikala namuzañalu hela chakwila nakuumika kweseka. (Yak. 1:2-4) Wekala mukwakuleta kuwunda. (Mat. 5:9) Wekala wadiwunjika nawa wayitiyilaña akwawu luwi. (Kol. 3:13) Wafwilaña yuma yayiwahi nawa diyelañayi. (Luka 6:35) Wamwekeshaña muyilwilu yindi nindi wamukuhwelela chikupu Tata yindi wamwiwulu. (Yak. 2:18) Wadiwunjikaña neyi anamuvuloki nawa wadiyuulaña neyi wudi mukweseka.—1 Kor. 9:25, 27; Tit. 3:2.

4. Hakwila tuvwali wuntu wawuha, komana twatela kwikala nayilwilu yashimunawu haAÑalija 5:22, 23 hampinji yashiyashana? Lumbululenu.

⁴ Hakwila nawu tuvwali wuntu wawuha, twatela kwikala nayilwilu yejima yashimuna AÑalija 5:22, 23 niyikwawu yashimunawu muBayibolu. * Iyi yilwilu hiyidi neyi yakuvwala yavwalañayi muntu hampinji yashiyashanaku. Dichi yilwilu yayivulu yadifwana nayilwilu yikwawu. Chakutalilahu, neyi mwamukeña nankashi mukwenu, mukwikala adiwunjika nayena nawa mukumutiyilaña luwi. Nawa hakwila mwikali muntu wamuwahi mwatela kwikala amwovu nawa adiyuulaña.

5. Kwikala ‘nayitoñojoka neyi yaKristu’ kwatalisha mudihi nawa muloñadi chitwatela kwilukila chihandilu chaYesu? (1 AKorinda 2:16)

⁵ Tañenu 1 AKorinda 2:16. Hakwila tuvwali wuntu wawuha twatela “kwikala nayitoñojoka neyi yaKristu.” Munjila yikwawu, twatela kwiluka chatoñojokañayi Yesu nikumwimbujola. Nawa wamwekeshaña chikupu mukaabu waspiritu yaNzambi. Kufwana chibanjilu chamwekeshaña chiwahi, wembujolaña chikupu yilwilu yaYehova. (Heb. 1:3) Neyi tutoñojokaña neyi chatoñojokañayi Yesu, tukwilaña neyi chelañayi nawa tukwimbujolaña yilwilu yindi.—Fwili. 2:5.

6. Yumanyi yitwatela kwanukaña hampinji yitunakufwila kuvwala wuntu wawuha?

⁶ Komana chikutwesheka etu kulondela chakutalilahu chaYesu? Hadaha tunateli kutoñojoka netu: ‘Yesu wawanina. Hinukutwesha kwikala neyi yenaku!’ Neyi mumona nenu munatachiki kutoñojoka muniyi njila, mwanukeña iyi yikuma. Chatachi, ayileñeli neyi chekalayi Yehova niYesu. Dichi munateli  kutondahu kuyimbujola nawa mukutwesha kwikala neyi wena, munateli kuyimbujola hanakumini ñovu yenu. (Kutach. 1:26) Chamuchiyedi, spiritu yaNzambi yajila diyi ñovu yabadika mukuleña kwejima. Yikuyikwasha kuzata nyidimu yayivulu yimukukañanya kuzata nañovu jenu. Chamuchisatu, Yehova hakuhwelelaña nindi mukumwekeshaña mukaabu waspiritu nakushikahuku. Kafwampi, Tata yetu wukweti kukeña washaku yaaka 1,000 kulonda antu akweti kuchiñeja kwakushakama hamaseki akekali awanina. (Chim. 20:1-3) Chuma chinakukeñayi Yehova chayinu mpinji hikuzata nañovu nikumushindamena yena kulonda atukwashi.

7. Yumanyi yitukutachika kuhanjekahu?

⁷ Munjilanyi mutunateli kumwimbujolila Yesu? Tukuhanjeka muwihi nyikaabu yiwana yaspiritu yaNzambi. Hamukaabu himukaabu, tukumona chitunateli kudizila kudi Yesu chamwekesheleñayi owu mukaabu. Nawa tukuhanjeka cheñi hamalwihu akutukwasha kudishinshika kulonda tumoni neyi chakwila tunakuvwala chiwahi wuntu wawuha hela nehi.

8. Yesu wamwekesheli ñahi kukeña?

⁸ Chineli Yesu wamukeñeli chikupu Tata yindi chumichi chamuletesheli yadihani kukoola Tata yindi ninetu. (Yow. 14:31; 15:13) Yesu wamwekesheli nindi wakeña nankashi antu kwesekeja nanochu chahandiliyi chihandilu chindi chahanu hamaseki. Ifuku nifuku, wamwekesheleña kukeña niwushona, hela chakwila antu amudimbulwileña. Njila yimu mwamwekesheleleñayi antu kukeña hikuyidizisha haWanta waNzambi. (Luka 4:43, 44) Yesu wamwekesheli cheñi nindi wamukeña Nzambi niantu kuhitila mukudihana kulonda yakabakani nikumujaha kudi akanshidi. Dichi watwenzunwinini njila wejima wetu kulonda twakekali nawumi wahaya nyaaka.

9. Tunateli kumwimbujola ñahi Yesu hakumwekesha kukeña?

⁹ Twadihanini etu aweni kudi Yehova nikupapatishewa muloña wakwila twamukeña Tata yetu wamwiwulu. Kufwana Yesu, twatela kumwekesha netu twamukeña Yehova kwesekeja nanochu chitwahandaña nawantu. Kapostolu Yowanu wasonekeli nindi: “Muntu wabula kukeña manakwindi amonañayi namesu, hakutwesha kukeña Nzambi abula kumonayiku.” (1 Yow. 4:20) Twatela kudihula netu: ‘Komana nayikeña nankashi antu? Komana nayitiyilaña antu wushona hela chakwila adi nawinyi? Komana kukeña kunukweti kwanleteshaña kuzatisha maheta ami nimpinji yami kulonda nikwashi nachu antu amwiluki Yehova? Komana nelaña mwenimu hela chakwila antu etejaña wanyi chinnazataña nañovu? Komana nateli kuwanaku njila jikunletesha kwikalaku nampinji yeneni yakuzataku mudimu wakwilisha atumbanji?’—Efwe. 5:15, 16.

10. Yesu wadiña ñahi mukakuleta kuwunda?

¹⁰ Yesu wadiña mukakuleta kuwunda. Antu chamwililiwu chatama, hafuntishili katama nakatamaku. Ilaña wakoñeli yuma yinabadiki haniyi. Diyi wadiña mutachi kuleta kuwunda nawa wakolesheli amakwawu kumanisha kukala mulwawu. Chakutalilahu, wayilejeli nindi atela kuleta kuwunda namanakwawu neyi chakwila anakukeña nawu Yehova eteji kudifukula kwawu. (Mat. 5:9, 23, 24) Nawa kakavulu wayikwashili apostolu kulonda aleki kuditadikisha hamuntu wadiña mukulumpi hakachi kawu.—Luka 9:46-48; 22:24-27.

11. Tunateli kwikala ñahi akakuleta kuwunda?

¹¹ Hakwila twikali akakuleta kuwunda, twatela kuzata nañovu kubadika kutondolwela hohu kuleta yikonkojola. Twatela kuzata nañovu kulonda twikaleña atachi kuleta kuwunda nawakwetu nikuyikolesha amanakwetu  niahela kulonda amanisheña kukala mulwawu. (Fwili. 4:2, 3; Yak. 3:17, 18) Twatela kudihula etu aweni awa malwihu netu: ‘Chumanyi chinatela kuleka kulonda nileteña kuwunda nawakwetu? Neyi manakwetu hela muhela naneñeshi, komana namuhembelaña nkunyi? Komana nahembelelaña mukwetu kulonda yasambilihu kwinza nakuleta kuwunda nanami ntahindi natachikilañahu hela chakwila mukwetu diyi wavundumuna oku kukala? Neyi hanateleli, komana nayikoleshaña antu adi nakukala kulonda aleti kuwunda mulwawu?’

12. Yesu wamwekesheli ñahi luwi?

¹² Yesu wadiña naluwi. (Mat. 11:28-30) Wamwekesheleña luwi kuhitila mukubula kwikala wakalisha nimumpinji yakala. Chakutalilahu, chelili ona mumbanda kaFwenisa amulembeleli nindi amukili mwanindi, Yesu hakusambila wamukaanini ilaña chamwekesheliyi chikuhwelelu chakola, wamuukilili mwanindi. (Mat. 15:22-28) Hela chakwila wadiña naluwi, Yesu wayifumbileña antu. Mpinji yikwawu wayitiyilileña luwi kuhitila mukuyifumba antu akeñeliyi chakadi kuyihita mumbadi. Chakutalilahu, Petulu cheliliyi nindi eseki kumukañesha Yesu kwila nkeñelu yaYehova, Yesu wamuzuwilili hamesu awatumbanji amakwawu. (Maku 8:32, 33) Cheliliyi mwenimu bayi neyi wakeñeleña kumusawisha Petuluku, ilaña wakeñeleña kumudizisha nikusoñamisha atumbanji amakwawu kubula kwikala nachilwilu chakudivwimba. Chakadi nikujina, Petulu watiyili nsonyi ilaña kuna kufumba kwamukwashili.

13. Tunateli kwikala ñahi naluwi chikupu?

¹³ Hakwila nawu mumwekeshi nenu mwayitilaña antu imwakeña luwi, mpinji yikwawu mwatela kuyifumba chakadi kuyihita mumbadi. Neyi munakufumbana mwimbujolenu Yesu kuhitila mukushindamena hayishina yekala Mwizu daNzambi. Ikalenu amwovu. Ilukenu nenu anakukeña kwila yuma yaloña, nawa kuhwelelenu nenu antu amukeña Yehova nawa ayikeña enu akwiteja kufumba kwenu. Dihulenu awa malwihu nenu: ‘Neyi nimona muntu innakeña nakwila chuma chatama, komana nahamukaña nakumulejamu? Neyi innakukeña kufumbana, komana nahoshaña naluwi, ntahindi nakuzuwa? Chumanyi chanleteshaña nifumbani? Komana namufumbaña muloña wakwila namutiyaña kutama, tahindi muloña wakwila nakeñaña kumukwasha?’

14. Yesu wamwekesheli ñahi chilwilu chakuwaha?

¹⁴ Yesu hakumina hohu dakwiluka yuma yayiwahiku ilaña wayilaña nikuyila. Yesu wamukeña Tata yindi, dichi mpinji yejima welaña yuma yaloña nankeñelu yayiwahi. Chilwilu chakuwaha chamwekenaña muyuma yelañawu antu neyi tuyimwekeshelachu. Hichilwilu chitunateli kumwekesha kuhitila mukuyilila akwetu yuma yayiwahi. Hitwatela kukumina hohu kwiluka chuma chaloña chitwatela kwila nawa nankeñelu yayiwahiku. Muntu nateli kudihula nindi, ‘Komana chikutwesheka kwila chuma chaloña iku wudi nankeñelu yatama?’ Eña, chikutwesheka. Chakutalilahu, Yesu wahosheli hadi antu ahanineña yawaana yawu kudi atuzweñi ilaña azatileña nañovu kulonda antu amoni yuma yelileñawu nawa ayihamekeña. Hela chakwila nyidimu yazatileñawu yadiña yayiwahi Yehova hayitiyili kuwahaku.—Mat. 6:1-4.

15. Tunateli kwikala ñahi antu amawahi?

¹⁵ Tunateli kwikala amawahi neyi twila chuma chaloña nankeñelu yayiwahi. Dihulenu nenu: ‘Komana ami neluka chuma chaloña chinatela kwila nikuchiila? Chumanyi chansañumunaña kwila yuma yayiwahi?’

16. Chumanyi chitwatela kwilaña ifuku nifuku, nawa muloñadi?

¹⁶ Bayi tutoñojokaña netu kuvwala wuntu wawuha kwakuminaña hohu hakupapatishewaku. Wuntu wawuha wudi neyi “chakuvwala chachiwahi chachiha” chitwatela kuhembaña chiwahi. Njila yimu mutunateli kwilila mwenimu hikukeñakeña njila mutunateli kumwekeshelaña mukaabu waNzambi ifuku nifuku. Muloñadi? Muloña Yehova hiNzambi wakalakalaña, nawa spiritu yindi hiñovu yazatikaña. (Kutach. 1:2) Dichi mukaabu wejima waspiritu wunateli kutukwasha kukalakala. Chakutalilahu, kambanji Yakoba wasonekeli nindi: “Chikuhwelelu chakadi nyidimu chafwa.” (Yak. 2:26) Dichuma chochimu chitunateli kuhosha kutalisha kunyikaabu yaspiritu yaNzambi. Mpinji yejima yitwayimwekeshaña, twamwekeshaña netu spiritu yaNzambi yinakuzatika mudi etu.

17. Tunateli kwila ñahi neyi tunakañanyi kumwekesha mukaabu waspiritu?

¹⁷ NiakaKristu apapatisheweli dehi mpinji jikwawu akañanyaña kumwekesha mukaabu waspiritu. Ilaña chuma chalema chidi chakwila nawu twatela kutwalekahu kumwekesha iyi yilwilu. Talenu ichi chakutalilahu. Neyi mutabula chakuvwala chenu chimwakeña nankashi, komana mukushikena dakuchinata hohenohu? Inehi. Ilaña neyi chinatwesheki mukuchima hanatabuki. Nawa mukwikala asoñama kulonda mukabuli kuchitabula cheñi. Munjila yoyimu, neyi mpinji yikwawu mukañanya kumwekesha luwi, kudiwunjika, hela kumumwekeshela muntu kukeña, bayi muneñaku. Kudanakena chakufuma hamuchima, kudi neyi kuchima hanatabuki nawa mukwikala cheñi amabwambu amawahi nanowu muntu. Nawa zatenuña nañovu kulonda kumbindi mwakeli chachiwahi.

18. Chumanyi chimwatela kwiluka?

¹⁸ Twasakililaña nankashi hakwikala naYesu watulejeli chuma chitwatela kwilaña! Neyi twimbujolaña yitoñojoka yindi niyilwilu yindi, chikwikala chaswayi kwila neyi chelileñayi. Neyi tutwalekahu kwila neyi chelileñayi Yesu tukuvwalaña wuntu wawuha. Muchinu chibaaba, tunahanjeki hohu hanyikaabu yaspiritu yaNzambi yiwaana. Chikuwaha neyi mukwikala nampinji yakudiza hayilwilu yikwawu yanyikaabu yaspiritu nikutoñojoka chimunakuyimwekesha oyu yilwilu. MuChitwa Chakusandujola chawaYinsahu Yehova munateli kuwanamu yibaaba yinakuhosha haniwu mutu, hakamutu kanakuhosha nawu “Chihandilu chawakaKristu” nikamutu kanakuhosha nawu “Nyikaabu yaSpiritu.” Mwatela kwiluka chikupu nenu neyi muzata hanakumini ñovu yenu, Yehova wukuyikwasha kuvwala wuntu wawuha nikutwalekahu kwikala nawu.