1. A tlângpui thuin, kan mizia chu engin nge thunun?

 BAPTISMA kan channa chu a la rei lo emaw, kum tam tak a ni tawh emaw pawh ni se, kan za hian Jehova ngainat tak miziate neih chu kan duh ṭheuh va. Chutiang miziate nei tûr chuan, kan ngaihtuahna kan thunun a ngai a ni. Engvângin nge? Kan mizia chu kan ngaihtuahnain nasa taka a thunun vâng a ni. Tisa châknate kan ngaihtuah fo a nih chuan, thil ṭha lote kan sawiin, kan ti ang. (Eph. 4:17-19) Kawng leh lamah chuan, kan rilru chu ngaihtuahna ṭhatea kan tihkhah chuan, kan Pa, Jehova tilâwm zâwngin thu kan sawiin thilte kan tih ngei a rinawm.—Gal. 5:16.

2. He thuziakah hian eng zawhnate nge kan sawiho vang?

² Thuziak hmasaa kan sawiho tawh angin, ngaihtuahna ṭha lo zawng zawng chu kan rilrua lût lo tûrin kan dang vek thei lo va. Mahse, chûng ngaihtuahnate mila thil ti lo tûrin duh kan thlang thei a ni. Baptisma kan chan hma aṭangin, Jehova huat zâwng thusawi leh thiltihte chu kan bânsan a ngai a. Chu chu mihring hlui hlihthlâknaa rahbi hmasa ber leh pawimawh ber a ni. Mahse, Jehova tilâwm tak zet tûr chuan, ‘Mihring thar chuan inthuam rawh u,’ tih thupêk hi kan zâwm tûr a ni. (Kol. 3:10) He thuziakah hian hêng zawhnate hi chhân a ni ang: “Mihring thar” chu eng nge ni? Engtin nge mihring thar chuan kan inthuam theih a, kan inthuam zawm zêl theih? tihte hi.

3. “Mihring thar” chu eng nge a ni a, engtin nge mi chu mihring thara a inthuam theih? (Galatia 5:22, 23)

³ “Mihring thar” chu Jehova mizia lantîr zâwnga ngaihtuahna hman leh thiltih hi a ni a. Mi chu a ngaihtuahna te, rilru vei  zâwng te, leh thiltihte Pathian thlarau thianghlim inthununtîra, a nunah thlarau rah hmêlhmangte lantîrna hmangin mihring tharin a inthuam a ni. (Galatia 5:22, 23 chhiar rawh.) Entîr nân, ani chuan Jehova leh a mite chu a hmangaih a. (Mt. 22:35-39) Chutiang mi chuan fiahnate a hmachhawn hunah pawh hlimna a nei reng a ni. (Jak. 1:2-4) Ani chu remna siamtu a ni a. (Mt. 5:9) Dawhthei tak leh ngilnei takin mite a cheibâwl ṭhîn a ni. (Kol. 3:13) Thil ṭha a ngainain, a ti ṭhîn bawk. (Lk. 6:35) Vâna a Pa chungah rinna nghet tak a nei tih a thiltihin a lantîr a. (Jak. 2:18) Tihthinrima a awm hunah rilru dam takin a awm a, thlêmna a tawh hunah insûmtheihna a lantîr a ni.—1 Kor. 9:25, 27; Tit. 3:1, 2.

4. Mihring thara inthuam tûr chuan, engvângin nge Galatia 5:22, 23-na leh Bible châng danga târ lan mizia zawng zawngte chu kan neih a ngaih?

⁴ Mihring thara inthuam tûr chuan, Galatia 5:22, 23-na leh Bible châng danga târ lan mizia zawng zawngte chu kan neih a ngai a. * Chûng miziate chu ṭum khata kan hâk thawmhnawte ang a ni lo. Dik tak chuan, chûng mize tam takte chu a dangte nên a inang a ni. Entîr nân, i vêngte i hmangaih tak tak a nih chuan, an chungah i dawhtheiin, ngil i nei ngei ang. Chu bâkah, mi ṭha tak ni tûr chuan, mi zaidam tak leh insûmthei tak i ni tûr a ni.

5. ‘Krista rilru ang pu,’ tih awmzia chu eng nge ni a, engvângin nge Isua nun kawng chu kan zir ang? (1 Korinth 2:16)

⁵ Korinth thawn khat 2:16 chhiar rawh. Mihring thara inthuam tûr chuan ‘Krista rilru ang kan put’ a ngai a. Thu danga sawi chuan, Isua ngaihtuah dânte kan zira kan entawn a ngai a ni. Ani chuan Pathian thlarau rah hmêlhmangte chu ṭha famkimin a lantîr a. Dârthlalang fîm tak angin, Jehova miziate chu a nihna ang takin a lan chhuahtîr a ni. (Heb. 1:3) Isua ngaihtuah dânte kan entawn nasat poh leh amah angin thil kan ti lehzual ang a, a miziate lantîrnaah kan hlawhtling lehzual bawk ang.—Phil. 2:5.

6. Mihring thara inthuam kan tum hunah eng thilte nge kan hriat reng ang?

⁶ Isua entawn tûr siam chu kan zui thei tak tak em? ‘Isua chu ṭha famkim a ni a. Amah ang ka ni thei ngai lo vang!’ tiin kan ngaihtuah mai thei. Chutianga i ngaihtuah a nih chuan, hêngte hi hre reng ang che. Pakhatna, Jehova  leh Isua ang ni thei tûra siam i ni a. Chuvângin, anmahni i entawnna kawngah eng emaw chen chu i hlawhtling thei a ni. (Gen. 1:26) Pahnihna, Pathian thlarau thianglim chu lei leh vâna chakna thiltithei ber a ni a. Chumi ṭanpuinain, mahni chaknaa i tihtheih ngai loh tûr thilte chu i ti thei a ni. Pathumna, Jehova’n thlarau rah hmêlhmangte chu tûnah ṭha famkima lantîr tûrin a beisei lo che. Dik tak chuan, hmangaihna nei tak kan Pa vâna mi chuan lei lam beiseina neite chu ṭha famkim ni tûrin kum 1,000 chhûng hun a pe ang. (Thup. 20:1-3) Tûna Jehova min phût chu theih tâwp chhuah leh a ṭanpuina rinchhan hi a ni.

7. Tûnah eng nge kan ngaihtuahho vang?

⁷ A nih chuan, engtin nge Isua kan entawn theih? Pathian thlarau rah hmêlhmangte zînga pali kan bih chiang ang a. Chûng hmêlhmang tinte kan bih chian laiin, Isua’n chûng miziate a lantîr dân aṭanga kan zir theihte kan hmu ang. Chutianga kan tih laiin, engtiang takin nge mihring thara kan inthuam tih hriat nân zawhna ṭhenkhat kan ngaihtuah bawk ang.

8. Engtin nge Isua’n hmangaihna a lantîr?

⁸ Isua chuan a Pa Jehova a hmangaih êm avângin, a Pa tân leh kan tâna inpe tûrin a chêttîr a. (Joh. 14:31; 15:13) Mihringte a hmangaihzia chu a lei nun kawng hman dânah a lang a ni. Mi ṭhenkhatin an dodâl chung pawhin, nî tinin hmangaihna leh khawngaihna a lantîr reng a. Mite a hmangaihzia a lantîr dân kawng pawimawh tak pakhat chu an hnêna Pathian Ram chanchin zirtîr hi a ni. (Lk. 4:43, 44) Chu bâkah, Pathian leh mite chunga mahni hmasial lo hmangaihna a neihzia chu hrehawm tam tak tuara inhuam taka mi sualte kuta thiin a lantîr bawk. Chutiang chuan kan zaa chatuana nunna kan neih theih nân kawng min hawnsak a ni.

9. Engtin nge hmangaihna lantîrna kawngah Isua kan entawn theih?

⁹ Kan Pa vâna mi Jehova kan hmangaih avângin a hnênah inpumpêkin baptisma kan chang a. Chuvângin, Isua angin, mite kan cheibâwl dânah Jehova kan hmangaihzia kan lantîr tûr a ni. Tirhkoh Johana chuan: “A unau a hmuh tawh renga mah a hmangaih loh chuan, Pathian a hmuh ngai lohva chu engtin nge a hmangaih theih ang?” tiin zawhna a siam a. (1 Joh. 4:20) Heti hian kan inzâwt thei a ni: ‘Mite chu ka hmangaih tak tak em? Anni chuan râwng taka min cheibâwl a nih pawhin an chungah khawngaihna ka lantîr em? Hmangaihnain Jehova hre tûra mi dangte ṭanpui nâna ka hun leh tha leh zungte sêng tûrin min chêttîr em? Mi a tam zâwkin ka thawhrimna an ngaihlu lo emaw, min dodâl hial emaw a nih pawhin, an tâna hun leh tha sên chu ka inhuam em? Zirtîr siam rawngbâwlnaah hun tam lehzual hman theih dân kawngte chu ka zawng em?’ tiin.—Eph. 5:15, 16.

10. Engtin nge Isua chu remna siamtu a nih?

¹⁰ Isua chu remna siamtu a ni a. Mite’n ṭha lo taka an cheibâwl hunah pawh sual chu sualin a thungrûl lo. Chu mai aia tam pawh a ti a ni. Remna siam tûrin hma a la hmasa a, mite chu an buainate chingfel tûrin a fuih a ni. Entîr nân, Jehova’n an biakna a pawm an duh chuan, an unaute nên an inrem tûr a ni tih a zirtîr a. (Mt. 5:9, 23, 24) Tu nge ropui ber tih chungchânga a tirhkohte zînga inhnialna a chhuah pawh khân, anni chu inhnial lo tûrin a ṭanpui fo a ni.—Lk. 9:46-48; 22:24-27.

11. Engtin nge remna siamtu kan nih theih?

¹¹ Remna siamtu ni tûr chuan, inhnialna thlentu thilte pumpelh mai aia tam kan tih a ngai a. Mi dangte nêna remna siam tûr leh kan  unaute chu an inkâr buainate chingfel tûra fuih tûrin hma kan la hmasa tûr a ni. (Phil. 4:2, 3; Jak. 3:17, 18) Hêng zawhnate hi kan inzâwt thei a ni: ‘Mi dangte nêna remna siam tûrin engte nge chân ka inhuam? Ka unau tu emawin ka rilru a tihnat hian a chungah ka thinrim reng em? Mi dangte chu remna siam tûra hma la hmasa tûrin ka beisei em? Nge ni a, buaina chu keimah vâng a nih loh pawhin, hma ka la hmasa zâwk? Unaute inkâra intihthiam lohna a thlen hian remna siam tûrin anni chu ka fuih ṭhîn em?’ tihte hi.

12. Engtin nge Isua’n khawngaihna a lantîr?

¹² Isua chu mi khawngaih thei tak a ni a. (Mt. 11:28-30) Dinhmun harsa tak hnuaiah pawh ngilneihna leh nunnêmna lantîrin mite chungah khawngaihna a lantîr a ni. Entîr nân, Kanaan hmeichhe pakhatin a fa tidam tûra a ngen khân, a tîr chuan a ngenna chu a hnâwl a; mahse, rinna nasa tak a lantîr tâkah chuan a fa chu a tihdamsak a ni. (Mt. 15:22-28) Isua chu khawngaihna nei tak ni mah se, a châng chuan, a hmangaih takte chu fuihna khauh tak pein an chungah khawngaihna a lantîr a. Entîr nân, Petera’n Jehova duh zâwng ti lo tûra Isua dan a tum khân, Isua’n ani chu zirtîr dangte hmaah a zilh a ni. (Mk. 8:32, 33) Chutianga a tih chhan chu Petera tihmualpho a duh vâng ni lovin, amah a zirtir duh vâng leh zirtîr dangte pawh chapona laka vaukhân a duh vâng a ni. Petera chu a zak ngei ang; mahse, chu zilhna chu a hlâwkpui a ni.

13. Engtin nge mite khawngaih thei tak kan nih theih?

¹³ I hmangaihte chunga khawngaihna dik tak lantîr tûr chuan, tlang taka thu i hrilh a ngaih chângte a awm thei a. Chutianga i tih hunah Isua entawnin Bible thu bulte ṭanchhanin hrilh ang che. Mi zaidam tak ni la. Jehova leh nangmah hmangaihtute chuan hmangaihna nei taka i pêk fuihna chu ṭha takin an chhâng lêt ang tih ring tlatin, an tâna ṭha ber tûr chu ngaihtuah ang che. Hêng zawhnate hi inzâwt rawh: ‘Ka hmangaih tak tu emawin thil dik lo a ti tih ka hmuh hian ka hrilh ngam em? Fuihna pêk a ngai a nih chuan, ngilnei takin nge ka pêk a, na tak zâwkin? Fuihna pe tûra min chêttîrtu chu eng nge ni? Min tihlungnih loh avânga pe nge ka nih a, a ṭhatna tûr ngaihtuah avânga pe ka ni zâwk?’ tiin.

14. Engtin nge Isua’n ṭhatna a lantîr?

¹⁴ Isua chuan ṭhatna awmzia chu a hre mai ni lovin, a takin a lantîr a. A Pa a hmangaih avângin chêttîrtu dik tak nên thil dik a ti reng ṭhîn. Mi ṭha chuan mi dangte ṭanpui theih dân kawngte a zawng a, an tân thil ṭhate a tihsak ṭhîn a ni. Thil ṭha tih nachâng hriat mai chu a tâwk lo, chêttîrtu dik tak neiin thil ṭha kan ti tûr a ni. Tu emaw chuan, ‘Chêttîrtu dik lo nei chungin thil ṭha a tih theih em ni?’ tiin a zâwt mai thei. Theih e. Entîr nân, Isua chuan an thiltihte chu mi dangin hria se tih an duh avânga mi retheite hnêna thilpêk petute chungchâng a sawi a. Thil ṭha tak nia lang chûng thiltihte chuan Jehova tân hlutna rêng a nei lo.—Mt. 6:1-4.

15. Engtin nge mi ṭha kan nih theih?

¹⁵ Mahni hmasialna nei lova thil dik kan tih chauhvin mi ṭha kan ni thei a. Chuvângin, heti hian inzâwt ang che: ‘Thil ṭha tih tûr ka hre mai ni lovin, ka hriat ang chuan ka ti tak tak em? Thil ṭha ti tûra min chêttîrtu chu eng nge ni?’ tiin.

16. Nî tin hian eng nge kan tih ang a, engvângin nge?

¹⁶ Mihring thara inthuam tûra kan thawhrimnate chu baptisma kan chan hian a tâwp ta niin i ngai lo vang u. Mihring thara kan inthuamna chu thawmhnaw thar anga kan vawn  ṭhat tlat a ngai a. Chutianga kan tih theih dân kawng khat chu nî tina Pathian thlarau rah hmêlhmangte lantîr theih dân kawng zawn hi a ni. Engvângin nge? Jehova chu thil titu Pathian a ni a, a thlarau thianghlim chu a chakna chevêl reng a ni. (Gen. 1:2) Chuvângin, a thlarau rah hmêlhmang tinte chuan thil ti tûrin min chêttîr thei a, min chêttîr tûr rêng pawh a ni. Entîr nân, zirtîr Jakoba chuan: “Thiltih tel lovin rinna pawh chu thi a ni,” tiin a ziak a. (Jak. 2:26) Pathian thlarau rah hmêlhmang dangte pawh chutianga sawi theih vek a ni. Nî tina thlarau rah hmêlhmangte kan lantîr hian, chu chu thlarau thianghlimin min awmpui tih finfiahna a ni.

17. Thlarau rah hmêlhmangte kan lantîr lo a nih chuan eng nge kan tih ang?

¹⁷ Baptisma an channa kum tam tak ni tawh Kristiante meuh pawhin thlarau rah hmêlhmangte lantir loh châng an nei thei a. A pawimawh chu beidawn loh hi a ni. He entîrna hi han ngaihtuah teh. I thawmhnaw duh ber chu tithlêr palh ta la, i paih nghâl ang em? Nghâl lo vang. A thlêr lai chu uluk taka i ṭhui ṭhat leh ngei a rinawm. Chu bâkah, tithlêr leh tawh lo tûrin i fîmkhur lehzual ngei bawk ang. Chutiang bawkin, tu emaw chungah khawngaihna, dawhtheihna, a nih loh leh hmangaihna lantîr loh châng i neih chuan, lunghnual mai suh. Amah nêna inlaichînna ṭha nei leh tûrin thinlung takin ngaihdam dîl la. Tûn hnuah chuan, fîmkhûr lehzual tum ang che.

18. Eng nge kan chian theih?

¹⁸ Isua’n entawn tûr min hnutchhiah avângin kan va lâwm tak êm! A ngaihtuah dân leh rilru put hmang kan entawn nasat poh leh amah anga thil tih chu kan tân a awlsam lehzual ang a. Isua thiltih dân kan entawn nasat poh leh mihring tharin kan inthuam ṭha lehzual thei ang. He thuziakah hian Pathian thlarau rah hmêlhmang palite chungchâng chauh kan sawiho va. Engvângin nge thlarau rah hmêlhmang dangte chu ennawna, chûng miziate i lantîr dân ngaihtuah nân hun i hman loh vang? Jehova Thuhretute Tâna Zir Bingna Hmanrua tih lehkhabua “Kristian Nun,” tihah lûtin “Thlarau Rah Hmêlhmangte,” tih thupui hnuaiahte chuan thuziak tam tak hmuh tûr a awm a ni. Nangma lama i tih tûrte i tih phawt chuan, Jehova’n mihring thara inthuam tûr leh inthuam zawm zêl tûrin a ṭanpui ang che tih i chiang thei a ni.