1. ¿Tiquʼn nim toklen tuʼn tok qxqʼuqin qximbʼetz?

 QA TZMA o qo bautisarin moqa o tzikʼ nim ambʼil in qo ajbʼen te Jehová, qkyaqilx qaj tuʼn tten tbʼanel qmod tuʼntzun ttzalaj Jehová qiʼj. Tuʼn tbʼant jlu quʼn, nim toklen tuʼn tok qxqʼuqin qximbʼetz. ¿Tiquʼn? Tuʼnju in kubʼ qbʼinchaʼn aju in kubʼ qximen. Qa kukx in qo ximen tiʼj tajbʼil qchibʼjal, jaku kubʼ qbʼinchaʼn nya bʼaʼn ex jaku qo yolin kyiʼj nya bʼaʼn yol (Efes. 4:17-19). Qatzun ma qo ximen kyiʼj tbʼanel tiʼchaq, che onil qiʼj tuʼn qyolin kyiʼj tbʼanel yol ex kxel qbʼinchaʼn qe tiʼchaq in tzalaj Jehová tiʼj (Gál. 5:16).

2. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

² Ik tzeʼn el qnikʼ tiʼj toj xnaqʼtzbʼil ma kyaj, kukx jaku che ul nya bʼaʼn ximbʼetz toj qwiʼ. Pero jaku tzʼok tilil quʼn tuʼn miʼn tkubʼ qbʼinchaʼn. Naʼmxtoq qbautisarin, nim toklen tuʼn miʼn qyolin kyiʼj nya bʼaʼn yol ex tuʼn t-xi qbʼinchaʼn qe tiʼchaq in tzalaj Jehová tiʼj. Atzun jlu kbʼantel quʼn tnejel ex atzun mas nim toklen tuʼntzun tkyaj qtzaqpiʼn ojtxe tten qanqʼibʼil. Pero tuʼn kukx ttzalaj Jehová qiʼj, il tiʼj tuʼn t-xi qbʼiʼn kawbʼil lu: «Ma tzʼok kyqʼoʼne ju akʼaj kytene» (Col. 3:10). Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu: ¿Tiʼ aju tuʼn tok qqʼoʼn akʼaj qten? Ex ¿tzeʼn jaku tzʼok qqʼoʼn te jumajx?

3. ¿Tiʼ aju tuʼn tok qqʼoʼn akʼaj qten ex tzeʼn in bʼant jlu quʼn? (Gálatas 5:22, 23).

³ Aju tuʼn tok qqʼoʼn akʼaj qten, atz in yolin jlu tiʼjju tuʼn tten qximbʼetz ex qmod ik tzeʼn te Jehová. ¿Tzeʼn jaku  bʼant jlu quʼn? Kbʼantel quʼn aj tkubʼ qyekʼin qeju mod in tqʼoʼn xewbʼaj xjan ex aj t-xi qqʼoʼn ambʼil te tuʼn tonin tiʼj qximbʼetz, tiʼjju in kubʼ qnaʼn ex kyiʼj qbʼinchbʼen (kjawil uʼjit Gálatas 5:22, 23). Jun techel, aju xjal in nok tqʼoʼn akʼaj tten, kʼujlaʼn Jehová tuʼn ex qe tmajen (Mat. 22:36-39). Kukx in tzalaj maske in nok weʼ twitz ambʼil kwest (Sant. 1:2-4). Kukx in jyon tiʼj mujbʼabʼil (Mat. 5:9). In ten tbʼanel tmod kyukʼil txqantl ex in ten tpasens (Col. 3:12, 13, TNM). Kʼujlaʼn aju bʼaʼn tuʼn ex in kubʼ tbʼinchaʼn (Luc. 6:35). In kubʼ tyekʼin tukʼil tbʼinchbʼen qa qʼuqli tkʼuʼj tiʼj Jehová (Sant. 2:18). Mintiʼ in tzaj tqʼoj aj tok ikʼleʼn kyuʼn txqantl (Tito 3:2). Ex in tjakʼun tibʼ aj tok weʼ kywitz joybʼil (1 Cor. 9:25, 27).

4. ¿Tiquʼn il tiʼj tuʼn kyten qmod in tzaj qʼamaʼn toj Gálatas 5:22 ex 23, ex kyoj junjuntl texto?

⁴ Tuʼn tok qqʼoʼn akʼaj qten, kʼokel tilil quʼn tuʼn kyten tbʼanel qmod ik tzeʼn in tzaj tqʼamaʼn Gálatas 5:22 ex 23 ex qeju in che tzaj qʼamaʼn kyoj junjuntl texto. * In che ok tbʼanel mod lu ik tzeʼn aj tok qqʼoʼn tkyaqil qxbʼalun. Jun techel, qa kʼujlaʼn qe txqantl quʼn, ktel qpasens ex kbʼel qyekʼin tbʼanel qmod kyukʼil. Ex nim toklen tuʼn qjakʼunte qibʼ ex tuʼn qok te mans qa qaj tuʼn qok te tbʼanel xjal.

5. ¿Tiʼ t-xilen tuʼn tten qnabʼil ik tzeʼn «tnabʼl Crist», ex tiquʼn nim toklen tuʼn qxnaqʼtzan tiʼj tanqʼibʼil? (1 Corintios 2:16).

⁵ (Kjawil uʼjit 1 Corintios 2:16). Tuʼn tok qqʼoʼn akʼaj qten, nim toklen tuʼn tok qnabʼil ik tzeʼn «tnabʼl Crist», toj juntl yol, tuʼn tel qnikʼ kyiʼj t-ximbʼetz ex tuʼn tel qkanoʼn tiʼj. In kubʼ tyekʼin Jesús qe mod in tqʼoʼn xewbʼaj xjan toj jun tten tzʼaqli. Ik tzeʼn jun tbʼanel espej, qʼanchaʼlxix qa in kubʼ tyekʼin Jesús qe tbʼanel tmod Jehová (Heb. 1:3). Qa mas ma ten qximbʼetz ik tzeʼn te Jesús, mas kʼelel qkanoʼn tiʼj tbʼinchbʼen ex kbʼel qyekʼin qe tbʼanel tmod (Filip. 2:5).

6. ¿Tiʼ bʼaʼn tuʼn ttzaj qnaʼn aj tok tilil quʼn tuʼn tok qqʼoʼn akʼaj qten?

⁶ ¿Jakupe tzʼel qkanoʼn tiʼj techel kyaj tqʼoʼn Jesús? Bʼalo jaku kubʼ t-ximana jlu: «Tzʼaqli te Jesús, mlayx chin oke ik tzeʼn te». Qa in kubʼ t-ximana jlu, bʼaʼn tuʼn ttzaj tnaʼna oxe tiʼ nim toklen.  Tnejel, kubʼ bʼinchaʼna tuʼn tel tkanoʼna tiʼj Jehová ex Jesús. Tuʼntzunju, jaku kubʼ t-ximana tuʼn tel tkanoʼna kyiʼj ex jaku bʼant tuʼna maske at maj jaku tzʼel txalpaja (Gén. 1:26). Tkabʼin, bʼaʼn tuʼn ttzaj tnaʼna qa nim tipumal xewbʼaj xjan. Jaku tzʼonin tiʼja tuʼn t-xi tbʼinchaʼna junjun tiʼchaq aju mlay bʼant tuʼna tjunalxa. Toxin, mintiʼ in tzaj tqanin Jehová teya tuʼn tkubʼ tyekʼina qe mod in tzaj tqʼoʼn xewbʼaj xjan toj jun tten tzʼaqli. Naʼntza qa tzul tqʼoʼn Jehová 1,000 abʼqʼi kye xjal che anqʼil twitz Txʼotxʼ tuʼn kyok te tzʼaqli (Apoc. 20:1-3). ¿Tiʼtzun taj Jehová tuʼn tbʼant quʼn toj ambʼil jaʼlo? Taj tuʼn tok tilil quʼn ex tuʼn tok qeʼ qkʼuʼj tiʼj qa kʼonil qiʼj.

7. ¿Tiʼ kʼelel qnikʼ tiʼj kyoj junjuntl taqikʼ?

⁷ ¿Tiʼxix jaku bʼant quʼn tuʼn tel qkanoʼn tiʼj Jesús? Qo xnaqʼtzan kyiʼj kyaje mod in tqʼoʼn xewbʼaj xjan. Kʼelel qnikʼ tiʼj tzeʼn kubʼ tyekʼin Jesús teyele junjun mod lu ex tzeʼn jaku tzʼel qkanoʼn tiʼj. Ax ikx, kʼelel qnikʼ kyiʼj junjun xjel che onil qiʼj tuʼn tel qnikʼ tiʼj qa il tiʼj tuʼn tbʼant junjun chʼixpubʼil quʼn.

8. ¿Tzeʼn kubʼ tyekʼin Jesús tkʼujlabʼil?

⁸ Tuʼnju kʼujlaʼntoq Jehová tuʼn Jesús, xi tbʼinchaʼn tajbʼil ex kyaj tkolin junjun tiʼchaq noq tuʼn tonin qiʼj (Juan 14:31; 15:13). Tej tten Jesús tzalu twitz Txʼotxʼ, kubʼ tyekʼin tkʼujlabʼil kyiʼj xjal, tzaj qʼaqʼin tkʼuʼj kyiʼj ex kubʼ tyekʼin tbʼanel tmod kyiʼj, axpe ikx kyiʼj qeju kubʼ kyyekʼin nya bʼaʼn kymod tukʼil. Kubʼ tyekʼin tkʼujlabʼil lu tej t-xi tqʼamaʼn Tkawbʼil Dios kye (Luc. 4:43, 44). Ex kubʼ tyekʼin tkʼujlabʼil tiʼj Jehová ex kyiʼj xjal tej t-xi tqʼoʼn ambʼil tuʼn tkubʼ bʼyoʼn. Tuʼnju bʼant jlu tuʼn, tzaj qʼoʼn ambʼil qe tuʼn qanqʼin te jumajx.

9. ¿Tzeʼn jaku kubʼ qyekʼin qkʼujlabʼil ik tzeʼn bʼant tuʼn Jesús?

⁹ Tuʼnju kʼujlaʼn Jehová quʼn, xi qqʼamaʼn tuʼn qajbʼen te ex tuʼn qbautisarin. Tuʼntzunju, nim toklen tuʼn tkubʼ qyekʼin qkʼujlabʼil lu aj tkubʼ qyekʼin tbʼanel qmod kyiʼj xjal. Kubʼ ttzʼibʼin apóstol Juan jlu: «Qa mintiʼ in tkʼujlaʼn xjal terman aju nnoʼk tkeʼyin, ax mlay bʼant tuʼn tkʼujlanjtz Dios tuʼn, aju naʼnx tok tkeʼyin» (1 Juan 4:20). Bʼaʼn tuʼn tkubʼ qxjelin jlu: «¿In kubʼpe nyekʼine nkʼujlabʼile kyiʼj xjal? ¿In tzajpe qʼaqʼin nkʼuʼje kyiʼj txqantl, axpe ikx kyiʼj qeju in kubʼ kyyekʼin nya bʼaʼn kymod wukʼile? ¿In nelpe npaʼne ambʼil tuʼn nyoline tiʼj Jehová kyukʼil xjal tuʼnju kʼujlaʼn wuʼne? ¿Kukxpe in chin pakbʼane, axpe ikx qa mintiʼ in nok kyqʼoʼn xjal toklen moqa in tzaj kyqʼoj wiʼje? ¿Jakupe tzʼel npaʼne mas ambʼil tuʼn npakbʼane?» (Efes. 5:15, 16).

10. ¿Tiʼ bʼant tuʼn Jesús tuʼn tten mujbʼabʼil?

¹⁰ Bʼaʼn tuʼn tonina tuʼn tten mujbʼabʼil kyxol xjal. Onin Jesús tuʼn tten mujbʼabʼil kyxol xjal ex mintiʼ aj tqʼoʼn t-xel nya bʼaʼn ok bʼinchaʼn tiʼj. Pero nya oʼkx jlu bʼant tuʼn, sino xi tjyoʼn tumel tuʼn tkyaj nya bʼaʼn toj ttxolil ex xi tqʼamaʼn kye txqantl tuʼn tbʼant ax jlu kyuʼn. Jun techel, xi tqʼamaʼn kye txqantl qa oʼkx jaku tzalaj Jehová tiʼj kykʼulbʼil qa ma tzʼok tilil kyuʼn tuʼn tkyaj nya bʼaʼn toj ttxolil (Mat. 5:9, 23, 24). Ex nimku maj onin kyiʼj t-apóstol tuʼn miʼn kyximen tiʼj alkye mas nim toklen (Luc. 9:46-48; 22:24-27).

11. ¿Tzeʼn jaku qo onin tuʼn tten mujbʼabʼil?

¹¹ Tuʼn qonin tuʼn tten mujbʼabʼil, mintiʼ tuʼn qjyon qʼoj. Pero nya oʼkx jlu kbʼantel quʼn, sino il tiʼj tuʼn tok tilil quʼn  tuʼn tkyaj nya bʼaʼn toj ttxolil ex tuʼn qonin kyiʼj txqantl tuʼn tbʼant axju kyuʼn (Filip. 4:2, 3; Sant. 3:17, 18). Jaku kubʼ qxjelin jlu: «¿In nokpe tilil wuʼne tuʼn tkyaj jun nya bʼaʼn toj ttxolil? ¿In xipe nkʼuʼne qʼoj aj tok tbʼinchaʼn jun erman nya bʼaʼn wiʼje? ¿In kubʼpe wayoʼne tzmaxi aj t-xi tbʼinchaʼn erman tiʼj nya bʼaʼn? ¿Moqa in nok tilil wuʼne tuʼn nyoline tukʼil maske a sok bʼinchante nya bʼaʼn wiʼje? Qa jaku bʼant, ¿in xipe nqʼoʼne onbʼil kye txqantl tuʼn tten mujbʼabʼil kyxol aj ttzaj jun nya bʼaʼn?».

12. ¿Tzeʼn kubʼ tyekʼin Jesús tbʼanel tmod?

¹² Kubʼ tyekʼin Jesús tbʼanel tmod (Mat. 11:28-30). El tnikʼ kyiʼj txqantl, axpe ikx tej tok weʼ twitz nya bʼaʼn. Jun techel, tej tkubʼsan jun xuʼj te Fenicia twitz tuʼn tkubʼ tqʼanin tal, mintiʼ xi tbʼinchaʼn aju xi tqanin te, pero toj tumel xi ttzaqʼweʼn te. Tejtzun tok tkeʼyin qa at qʼuqbʼil tkʼuʼj xuʼj, kubʼ tqʼanin tal (Mat. 15:22-28). Noqtzun tuʼnj, mintiʼ xi tbʼinchaʼn Jesús qe tiʼchaq noq tuʼnju tzaj tbʼis moqa noq tuʼnju tzaj tqʼoj. At maj, ten tipumal tuʼn t-xi tqʼamaʼn qe tiʼchaq toj tumel kye qeju e ok tkʼujlaʼn. Jun techel, tej t-xi tqʼamaʼn Pedro te Jesús qa nya il tiʼj tuʼn tikʼ toj yajbʼil tuʼn tbʼant tajbʼil Jehová, xi tkawin kywitz txqantl t-xnaqʼtzbʼen (Mar. 8:32, 33). Mintiʼ bʼant jlu tuʼn tuʼn ttzaj tchʼixwi Pedro, sino tajtoq tuʼn tel kynikʼ kykyaqil t-xnaqʼtzbʼen tiʼj qa nim toklen tuʼn kyonin tiʼj tuʼntzun tbʼant tajbʼil Jehová. Tzajlo chʼin tchʼixwi Pedro, pero onin jlu tiʼj.

13. ¿Tiʼ il tiʼj tuʼn tbʼant quʼn junjun maj tuʼn tkubʼ qyekʼin tbʼanel qmod?

¹³ Tuʼn tkubʼ qyekʼin tbʼanel qmod kyukʼil qeju kʼujlaʼn quʼn, at maj il tiʼj tuʼn tten qipumal tuʼn t-xi qqʼamaʼn jun kypaltil. Aj tbʼant jlu quʼn, bʼaʼn tuʼn tel qkanoʼn tiʼj Jesús ex bʼaʼn tuʼn tajbʼen Tyol Dios quʼn aj t-xi qqʼoʼn jun consej. Qqʼonk tilil tuʼn tkubʼ qyekʼin tbʼanel qmod kyukʼil. Qeʼk qkʼuʼj tiʼj qa kykyaqil qeju kʼujlaʼn Jehová kyuʼn ex kʼujlaʼn qoʼ kyuʼn, kxel kybʼiʼn consej. Bʼaʼn tuʼn tkubʼ qxjelin jlu: «Aj tel txalpaj jun xjal kʼujlaʼn wuʼne, ¿in tenpe wipumale tuʼn t-xi nqʼamaʼne te? ¿Tzeʼn nmode in kubʼ nyekʼine aj tbʼant jlu wuʼne? ¿In kubʼpe nyekʼine tbʼanel nmode moqa tukʼil qʼoj in chin yoline tukʼil? ¿Tiquʼn in xi nqʼoʼne consej? ¿In xipe nqʼamaʼne tuʼnju in chin qʼojine tiʼj moqa tuʼnju waje tuʼn ttzalaj?».

14. ¿Tzeʼn kubʼ tyekʼin Jesús qa ok te tbʼanel xjal?

¹⁴ Nya oʼkx ojtzqiʼn tuʼn Jesús alkyeqe tbʼanel tiʼchaq, sino ax ikx in xi tbʼinchaʼn. Kʼujlaʼn Jehová tuʼn Jesús, tuʼntzunju in xi tbʼinchaʼn qe tbʼanel tiʼchaq. Aju xjal in nok tilil tuʼn tuʼn kyten tbʼanel tmod, in jyon tumel tzeʼn tuʼn tonin kyiʼj txqantl. Nya oʼkx tuʼn tel qnikʼ tiʼjju bʼaʼn, sino il tiʼj tuʼn t-xi qbʼinchaʼn tukʼil kʼujlabʼil. Bʼalo jaku kubʼ qxjelin jlu: «¿Jakupe txi qbʼinchaʼn jun xtalbʼil ex nya tukʼil kʼujlabʼil in bʼant quʼn?». Jaku. Jun techel, yolin Jesús kyiʼj xjal xi kyqʼoʼn kypwaq mebʼa ex ok tilil kyuʼn tuʼn tok kybʼiʼn txqantl. Pero tqʼama qa mintiʼ tzalaj Jehová tiʼjju bʼant kyuʼn (Mat. 6:1-4).

15. ¿Tzeʼn jaku qo ok te tbʼanel xjal?

¹⁵ Oʼkx jaku qo ok te tbʼanel xjal qa ma qo ximen kyiʼj txqantl aj qonin kyiʼj ex nya oʼkx tuʼn qximen qiʼjx. Bʼaʼn tuʼn tkubʼ qxjelin jlu: «¿Jakupe txi nqʼamaʼne qa nya oʼkx ojtzqiʼn qe tbʼanel tiʼchaq wuʼne, sino ax ikx in xi nbʼinchaʼne? ¿Tiquʼn in xi nbʼinchaʼne qe tbʼanel tiʼchaq?».

16. ¿Tiʼ il tiʼj tuʼn tbʼant quʼn tkyaqil qʼij ex tiquʼn?

¹⁶ Miʼn kubʼ qximen qa in che ten kykyaqil tbʼanel qmod aj qbautisarin ex qa ya mlay tzʼok tilil quʼn. ¿Tiquʼn? Tuʼnju in che ok tbʼanel qmod ik tzeʼn jun qxbʼalun aju il tiʼj tuʼn tok qxqʼuqin tuʼntzun miʼn tnaj. Tuʼntzunju, nim toklen tuʼn t-xi qjyoʼn tumel tzeʼn tuʼn tkubʼ qyekʼin qe mod in tqʼoʼn xewbʼaj xjan. ¿Tiquʼn? Tuʼnju kukx in naqʼunan Jehová ex kukx in najbʼen xewbʼaj xjan tuʼn (Gén. 1:2). A jlu in tzaj tyekʼin qe qa jaku tzʼonin teyele junjun mod in tqʼoʼn xewbʼaj xjan qiʼj tuʼn t-xi qbʼinchaʼn qe tiʼchaq taj Jehová. Jun techel, kubʼ ttzʼibʼin discípulo Santiago jlu: «Qa mintiʼ ma txi qyekʼun qa at qokslabʼl tuʼnju bʼaʼn in qbʼinchaʼn, tuʼn jlu mintiʼ tajbʼen qokslabʼl» (Sant. 2:26). Ax jlu jaku txi qqʼamaʼn kyiʼj junjuntl mod in tqʼoʼn xewbʼaj xjan. Qa ma kubʼ qyekʼin qe tbʼanel qmod, in kubʼ qyekʼin qa in nonin xewbʼaj xjan qiʼj.

17. ¿Tiʼ jaku bʼant quʼn qa at maj mintiʼ in kubʼ qyekʼin qe mod in tqʼoʼn xewbʼaj xjan?

¹⁷ Ateʼ junjun erman ma tzikʼ ambʼil in che ajbʼen te Jehová, at maj mintiʼ in kubʼ kyyekʼin qe mod in tqʼoʼn xewbʼaj xjan. Pero mintiʼ tuʼn ttzaj bʼaj kykʼuʼj, sino il tiʼj tuʼn tok tilil kyuʼn. Qo ximen tiʼj jun techel. Qa ma kubʼ laqj qxbʼalun mas qgan, ¿kʼelexpe qxoʼn? Bʼalo mlay bʼant jlu quʼn, sino kʼokel tilil quʼn tuʼn tok qslepin. Aj tbʼant jlu quʼn, mas kʼokel qxqʼuqin qxbʼalun. Ax jlu jaku bʼant quʼn, mintiʼ tuʼn ttzaj bʼaj qkʼuʼj qa at maj mintiʼ in kubʼ qyekʼin tbʼanel qmod, qpasens ex qkʼujlabʼil kyiʼj txqantl. Qa ma txi qqanin najsam tuʼn tkyaqil qkʼuʼj te jun erman otoq tzaj tbʼis quʼn, jaku tzʼonin jlu tuʼn kukx tten tbʼanel qamiwbʼil tukʼil. Ex qqʼonk tilil tuʼn miʼn tbʼaj jlu toj juntl maj.

18. ¿Tiʼ jaku tzʼok qeʼ qkʼuʼj tiʼj?

¹⁸ In xi qqʼoʼn nim chjonte tuʼnju kyaj tqʼoʼn Jesús jun tbʼanel techel qwitz. Qa mas ma ten qximbʼetz ik tzeʼn te, mas nya kwest kxel qbʼinchaʼn qe tiʼchaq ik tzeʼn te. Iktzun tten kbʼel qyekʼin akʼaj qmod. Toj xnaqʼtzbʼil lu, oʼkx ma qo yolin kyiʼj kyaje mod in tqʼoʼn xewbʼaj xjan. Pero tbʼanel qa ma qo xnaqʼtzan kyiʼj junjuntl mod in tqʼoʼn xewbʼaj xjan tuʼntzun tkubʼ qyekʼin toj qanqʼibʼil. Jaku che kanet tbʼanel xnaqʼtzbʼil quʼn toj Onbʼil tuʼn kyxnaqʼtzan testigos de Jehová, jatumel in tzaj tqʼamaʼn «Kyanqʼibʼil okslal», «Aju in tzaj tuʼn xewbʼaj xjan». Qa kukx ma tzʼok tilil quʼn, jaku tzʼok qeʼ qkʼuʼj tiʼj qa kʼonil Jehová qiʼj tuʼn kukx kyten tbʼanel qmod, qximbʼetz ex qbʼinchbʼen tuʼntzun miʼn qmeltzʼaj tiʼjju ojtxe tten qanqʼibʼil.