1. Jméni xi bakó josʼin nikjaʼaitsjeen.

 NI CHRIANSʼA kʼoa ni jekjoatse tsangínsʼenngindá, machjén nga tosi tonda si̱ndayaa yaoná ánni nga katasasénnile je Jeobá xi tʼatsaan. Nga si̱ndayaa yaoná machjén nga chósonnilee josʼin si̱kjaʼaitsjeen, nga̱ josʼin nikjaʼaitsjeen kui bakó jokjoaan. Kʼiatsa tokui tinikjaʼaitsjen ʼndeʼndee jmeni xi símekon yaoná tokuijin kʼoakuixoán kʼoa tokuijin kʼoasʼiaan xi chʼaotjín (Efes. 4:17-19). Tonga tsakui si̱kjaʼaitsjeen xi ndatjín, kuijin kʼoakuixoán kʼoa kuijin kʼoasʼiaan xi sa̱sénle Jeobá (Gál. 5:16).

2. Jmé xi chótʼayajiaan i̱ kjoaʼmiya jebi.

² Tojosʼin tsaʼyaa ya kjoaʼmiya xi jaʼato, alikui kʼoakoa̱nná nga ñaki tsínkui si̱kjaʼaitsjeen xi chʼaotjín, tonga koaan kʼoéchjoalee yaoná nga tsínkui kʼoasʼiaan xi chʼaotjín. Nga kjesa mangínsʼenngindájián, tjínnele nga tsínkui kʼoakuixoán kʼoa tsínkui kʼoasʼiaan jmeni xi jtike Jeobá. Kui jebi xi títjon tjínnele sʼiaan ánni nga tsín tikui kʼoasʼianñá jmeni xi chʼaotjín kinʼia ngasʼa. Kʼianga tsjoa kʼoé kon je Jeobá tjínnele si̱tjosoán je kjoatéxoma xi kʼoatso nga katasʼená “je ni̱ma̱ xi chjotse”, xi tsonile, nga kʼoakoa̱nkjoaan josʼin mele Niná (Col. 3:10). I̱ kjoaʼmiya jebi kui chótʼayajiaan jósʼin tsoyanile nga kʼoakoa̱nkjoaan josʼin mele Niná kʼoa jósʼiaan nga tosi tonda si̱ndayaa yaoná.

3. Jósʼin tsoyanile nga chjoe “je ni̱ma̱ xi chjotse” (Gálatas 5:22, 23).

³ Kʼianga chjoe “je ni̱ma̱ xi chjotse” kui xi tsonile nga kʼoasʼin nikjaʼaitsjeen kʼoa nga kʼoamakjoaan jokjoan  je Jeobá. Kʼoa kʼianga jetjínná je kjoanda xi tsjoá je nganʼiotsjele Niná ngisaa nda nikjaʼaitsjeen, nda sʼe tokoán kʼoa nindayañá yaoná (tʼexkiai Gálatas 5:22, 23). * Kʼoa kʼianga jekʼoamakjoaan josʼin mele Niná tsjoachaa maa je Jeobá kao choʼndale (Mat. 22:36-39). Tsjoa satío tokoán ninga kʼia nga kjoa bitjatojiaan (Sant. 1:2-4). Nda mangínkoaa xíngiaa (Mat. 5:9). Tsejta maa kʼoa nda chjota maa kao xíngiaa (Col. 3:12, 13). Kui kʼoanʼia xi ndatjín (Luc. 6:35). Jmeni xi nʼia yaa bakoñá nga ñaki makjainná xi tʼatsʼe Jeobá (Sant. 2:18). Alikui tokjoan nijtilee yaoná kʼianga ʼya xi jotsoná (Tito 3:2). Kʼoa maná chjoéxkoá yaoná kʼianga kui xi chʼaotjín sʼejnabasenná (1 Cor. 9:25, 27).

4. Ánni nga tsín mani nga tojngó jngó sʼe̱ná je kjoanda xi síkʼaxki̱ ya Gálatas 5:22, 23.

⁴ Kʼianga si̱ndayaa yaoná machjén nga kʼoakoa̱nkjoaan jotso Gálatas 5:22, 23 kʼoa jmesani xi tso xi kjaʼaí texto. * Je kjoanda jebi tojngoo yʼa xínkjín, alikui ya mangóson jonʼia nga ngotjo ngosa nikʼantjaiyañá je najñoná. Tobʼelañá, kʼiatsa tsjoachaa xíngiaa tsjoachaa koaan kʼoa ndʼé si̱koaa ngantsjai. Kʼoa tsa mená nga nda chjota koaan tjínnele nga nangitokon koaan kʼoa nga koa̱nná chjoéxkoá yaoná.

5. Jmé xi tsoyanile nga sʼená “je kjoafaʼaitsjen xi tsʼe Cristo”, kʼoa ánni machjénsíni nga chótʼayá xi tʼatsʼe Jesús (1 Corintios 2:16).

⁵ (Tʼexkiai 1 Corintios 2:16). * Kʼianga si̱ndayaa yaoná tjínnele sʼe̱ná “je kjoafaʼaitsjen xi tsʼe Cristo”, xi tsonile, nga kʼoasʼin si̱kjaʼaitsjeen josʼin síkjaʼaitsjen Jesús kʼoa nga chjénngilee. Je Jesús ñaki bakó je kjoanda xi tsjoá je nganʼiotsjele Niná kʼoa ñaki kʼoasʼin kjenngile jokjoan je Jeobá (Heb. 1:3).  Kʼianga tosi tonda kʼoénelee yaoná nga kʼoasʼin si̱kjaʼaitsjeen josʼin síkjaʼaitsjen je Jesús, ngisaa nda chjénngilee josʼín kʼoa jokjoan (Filip. 2:5).

6. Jméni xi machjén nga kuenta sʼiaan nga tosi tonda si̱ndayaa yaoná.

⁶ Tsakui nichxin i̱si: “Nga chjotatsje je Jesús, alikuijinkʼia kʼoakjoansʼin skenngile”. Tsa kʼoasʼin nikjaʼaitsjain, jan koya tjínni xi kuenta tʼiain. Xi títjon, kuinga kʼoasʼin kisindaná Jeobá nga koa̱n chjénngilee jokjoan je kʼoa nga koa̱n chjénngilee je Jesús. Ninga tsínkjoan ñaki kʼoakoa̱nkjoain jokjoan je, tonga koaan chjénngilai (Gén. 1:26). Xi majaoni, jé nganʼiotsjele Niná koasenkaoli jmeni xi tsín bele tokuin nga kʼoakoa̱nli nga toji. Xi majanni, je Jeobá be nga tsín kuitjoson tsjetsjeli nichxin xi tiyoaa ndʼaibi nga koakui je kjoanda xi tsjoá nganʼiotsje. Kuenta tʼiain nga jngo jmi nó tíjnaná nga tosi tonda si̱ndayaa yaoná saʼnda nga chjotatsje koaan josʼin mele Jeobá (Apoc. 20:1-3). Je xi mele Jeobá kuinga tosi tonda si̱ndayaa yaoná kʼoa nga kʼoakʼoé tokoán nga je koasenkaoná.

7. Jméni xi chótʼayajiaan.

⁷ Jósʼin koa̱n chjénngilee je Jesús. Ñola koya kjoanda xi tsjoá je nganʼiotsje chótʼayajiaan. Kui jchaa jósʼin tsakakó je Jesús nga jngó jngó koya jebi kʼoa jméni xi bakóyaná ñá. Kʼoati chótʼayajiaan xi koasenkaoná nga tosi tonda si̱ndayaa yaoná.

8. Jósʼin tsakakó Jesús nga tjínle kjoatsjoacha.

⁸ Je Jesús nʼio tsjoake koan je Jeobá, kuinga nʼio nda kisixánile kʼoa kitsjoantjainá je kjoabijnachonle (Juan 14:31; 15:13). Jokisʼin je Jesús nga tsakʼejna i̱ Sonʼnde, kʼoasʼin tsakakóni nga tsjoake koan je chjota. Ndʼé koan kʼoa koanmake je chjota ninga je xi kitjenngike. Kʼoa kitsoyale chjota xi tʼatsʼe Chjotaxále Niná (Luc. 4:43, 44). Nga tsjoake koan je Niná kao chjota, kitsjoaʼnde nga kinikjaʼá kjoañʼai kʼoa nga kinikʼien. Nga kʼoakisʼin kui kjoanda sʼe̱ná nga koa̱n kuiyoaa ngantsjai nichxin.

9. Tojo kisʼin je Jesús, jósʼin koakoá kjoatsjoacha.

⁹ Kʼiatsa jetsakʼaitʼalee yaoná je Jeobá kʼoa tsa jetsangínsʼenngindá kui kʼoakinʼiañá nga tsjoachaa. Tojo kisʼin je Jesús, kʼoatisʼin tjínnele tsjoacha koaan je chjota. Je pastro Juan i kitso: “Je xi ndsʼe̱ tsabeni xko̱n, kʼoa tsín tjaoke ndsʼe̱, jósʼin koa̱nni nga tjaoke koa̱nni Niná, xi tsín tsa tsabeni xko̱n” (1 Juan 4:20). Si̱kjaʼaitsjenjiaan jebi: “A tsjoake̱ña xi ngikʼa. A bakole kjoamatokon ninga je xi chʼao síkaona. A kʼoasʼin sichjén jmeni xi tjínna nga basenkoa xi kjaʼaí nga katabe xi tʼatsʼe Jeobá kʼoa a sikʼayaña nichxinna nga xinyale. A tosi tonda xinyale je chjota ninga tsín mandosinle kʼoa ninga batiochjoana. A koaan tsa ngisa tse xínyasoan” (Efes. 5:15, 16).

10. Jméni xi kisʼin je Jesús nga nda kikao je chjota.

¹⁰ Je Jesús nda kikao chjota. Alikui kisijndani kʼianga jme xi koantʼain. Kjoanyʼán tsakásjai je Jesús kʼoa kʼoakitsole xi kjaʼaí nga katabʼéndajin kʼiatsa jme kjoa tjínle. Tobʼelañá, kʼoakitso nga tjínnele si̱chatʼalee xíngiaa kʼiatsa mená nga sa̱sénle Jeobá josʼin tiʼyaxkoán (Mat. 5:9, 23, 24). Kjitʼaa kʼoakitsole je pastrole nga tsínkui katafáotiyani ʼyani xi ngisa ngʼa tíjnale xínkjín (Luc. 9:46-48; 22:24-27).

11. Jósʼiaan nga nda kjuinkoaa xíngiaa.

 ¹¹ Tsa mená nga nda kjuinkoaa xíngiaa ali tsa tokuijin xi machjén nga tsín kjoa kuinójiaan yaoná. Machjén nga ñá títjon si̱chatʼalee xíngiaa kʼoa kʼoakʼuínlee je ndsʼee nga katabʼéndajin tsa jme kjoa tjínle (Filip. 4:2, 3; Sant. 3:17, 18). Koaan si̱kjaʼaitsjenjiaan jebi: “A tijnandaña ninga ñʼai koa̱nna nga sichatʼale xi ngikʼa. A bʼengijtiña tokoan kʼiatsa jngo ndsʼee kisikiʼaon kjoafaʼaitsjenna. A kui koyale nga je katasíjéna kjoanichatʼa. Axo an títjon sijéle kjoanichatʼa ninga tsín an tjínna jée. Kʼiatsa ʼya xi kʼoakuitsona nga kjoa tjínle, a kʼoaxinle nga katasíchatʼale xínkjín”.

12. Jósʼin tsakakó je Jesús nga nda chjota koan.

¹² Je Jesús nda chjota koan (Mat. 11:28-30). Ndʼé koan kʼoa kiskosonnile jmeni xi kisʼin, ninga kʼianga ñʼai tjín kjoa jaʼatojin. Tobʼelañá, tsín tokjoán kisindaya je tsotiʼndíle jngo chjoón kananita nga kʼoakitsole nga katasíndaya. Tonga nga tsabe nga makjainle chjoón jebi, je Jesús kisindaya je tsotiʼndíle (Mat. 15:22-28). Ningalani nda chjota koan, alikui tokui kini jokisʼe kon. Tosaa kʼoakitsokixile josʼin síkjaʼaitsjen ʼyani xi tsjoake koan. Tobʼelañá, kʼianga kʼoakitso Pedro nga tsín katasítjoson je Jesús josʼin mele Niná, je Jesús kʼoakitsokixile Pedro josʼin síkjaʼaitsjen ninga ya tjío pastro xi ngikʼa (Mar. 8:32, 33). Nga kʼoakitsole Jesús je Pedro ali tsa kiskankaojin, tosaa kitsoyale kʼoa kʼoasʼin tsabeni xi ngikʼa nga tjínnele tsjoánganʼiole nga kui kʼoakatasʼín josʼin mele Niná. Tsakui nichxin soa koanle je Pedro, tonga tsakasenkao jme xi tsakʼinle.

13. Jméni xi machjén nga sʼian sakʼoa kʼiatsa mená nga nda chjota koaan.

¹³ Tsa mená nga nda chjota koaan kao xíngiaa sakʼoa machjén nga kʼoakʼuínkixilee jotjín tokoán. Kʼianga jme xi kuixoán chjénngilee je Jesús kʼoa ya Biblia chʼa̱ngiñá je kjoafaʼaitsjen xi kʼoee. Ngasin nganda chja̱kaonajmiá xíngiaa kʼoa kuenta sʼiaan nga je xi tsjoake Jeobá kʼoa je xi tsjoakená sitjoson je kjoafaʼaitsjen xi kʼoailee. Si̱kjaʼaitsjenjiaan jebi: “Kʼiatsa tiʼbe xíngia nga chʼao tísʼín, a tsjoale kjoafaʼaitsjen. Kʼoa nga ʼya xi kjoafaʼaitsjen tsjoale, a ngasin nganda fakoa axo toxkia xinle. Ánni nga kjoafaʼaitsjen tsjoanile. A kuinga tísíjtina axo kuinga mena nga nda kʼoéjna”.

14. Jósʼin tsakakó kjoanda je Jesús.

¹⁴ Je Jesús be xi ndatjín kʼoa kui kʼoasʼín. Nga tsjoake je Nʼaile kui kʼoasʼín ngantsjai xi ndatjín kʼoa jmeni xi sasénle je Nʼaile. Je chjota xi bakó kjoanda básjaile josʼin basenkao xi kjaʼaí. Ali tsa tokuijin xi machjén nga jchaa xi ndatjín, tjínnená nga kʼoasʼiaan kʼoa nga si̱kjaʼaitsjenjiaan ánni nga kʼoasʼianñá. Tsakui nichxin i̱ kuixoán: “A tjín chjota xi totjín xi sʼínnile nga binyakao xínkjín”. Tjínkʼa chjota xi kʼoasʼín. Tobʼelañá, je Jesús kʼoakitso nga tjín chjota xi tao̱n kitsjoale je xi ma̱ tjío, tonga tokui kʼoakisʼinni nga katabe xi ngikʼa jmeni xi sʼín. Jmeni xi kisʼin chjota jebi alikui kisasenle Jeobá (Mat. 6:1-4).

15. Jósʼin koakoá nga nda chjota.

¹⁵ Kʼoasʼin koakoñá kjoanda nga kuinyakoaa xíngiaa jme nganʼio xi machjénle kʼoa nga tsín totjín xi sʼiannilee. Machjén nga si̱kjaʼaitsjenjiaan jebi: “A ʼbeña jmeni xi ndatjín kʼoa a kʼoasʼian. Ánni nga kui xi ndatjín kʼoasʼinña”.

16. Jméni xi machjén nga sʼiaan nga nyaon nyaon, kʼoa ánni.

¹⁶ Alikui koa̱n kʼoasʼin si̱kjaʼaitsjeen nga tsín tijme xi chaniná nga si̱ndayaa yaoná kʼianga jemangínsʼenngindá. Kʼianga nindayaa yaoná, yaa mangóson jngo najño xi tjínnele tsje si̱ká ʼndeʼndee. Kuinga tjínnenile nga nyaon nyaon koakoá je kjoanda xi tsjoá je nganʼiotsjele Niná. Nga̱ je Jeobá kui nganʼiotsjele tísíchjén nga nyaon nyaon nga tíbasenkaoná nga si̱ndayaa yaoná (Gén. 1:2). Kui xi tsonile jebi nga je kjoanda xi tjínle je nganʼiotsje basenkaoná nga nindayaa yaoná. Tobʼelañá, je Santiago i kitso: “Je xi makjainná tochajinní, tsa tsín nda tjín xáná” (Sant. 2:26). Kʼoa kʼoati ma je kjoanda xi ngikʼa xi tsjoá nganʼiotsjele Niná, kʼianga ñandia ñandia bakoá je kjoanda xi tsjoá nganʼiotsjele Niná kʼoasʼin ʼyanile nga kui nganʼiotsjele Niná tíbándiaaná.

17. Jósʼiaan tsa sakʼoa tsín kʼoasʼin bakoá je kjoanda xi tsjoá nganʼiotsjele Niná josʼin tjínnele koakoá tsakai.

¹⁷ Ninga jenkjín nó kisʼenngindá kʼa je chjotale Cristo sakʼoa tsín bakó je kjoanda xi tsjoáná je nganʼiotsjele Niná. Ninga kʼoalani, alikui koa̱n nga tokʼoéjngoaa tokoán. Tobʼelañá, tsa xíjndalani je najño xi tsjoachaa, alikuijin to ndi̱to̱n ni̱kʼatjeen. Kʼoéndayajián kʼoa ngisajin nda si̱kuindaa. Tikʼoasʼinni, tsa sakʼoa tsín nda chjota koaan, tsa tsín tsejta koaan kʼoa tsa tsín koakolee kjoatsjoacha xíngiaa, alikui koa̱n nga si̱kʼajenlee tokoán. Koaan si̱jélee kjoanichatʼa xíngiaa, nga̱ kui xi koasenkaoná nga nda cho̱bá ijngokʼá. Kʼoa tsa tikʼoakoa̱nngáni tosi tonda si̱ndayaa yaoná.

18. Jméni xi tsín jao tjín tokoán.

¹⁸ Bʼaiñá kjoanda nga kisikʼéjnaná choa̱ je Jesús jmeni xi tjínnele sʼiaan. Tsa kʼoasʼin si̱kjaʼaitsjeen josʼin síkjaʼaitsjen je, ngisaa choa ñʼai koa̱nná nga kʼoasʼiaan jokisʼin je, kʼoa kʼoasʼin koakoñá nga tosi tonda tinindayaa yaoná. I̱ kjoaʼmiya jebi to ñola koya tjínni xi kaʼyaa je kjoanda xi tsjoá je nganʼiotsjele Niná. Tonga koaan chótʼayajiaan je kjoanda xi tsjoása je nganʼiotsjele Niná ánni nga tosi tonda si̱ndayañá yaoná. Yaa koa̱nsjaitʼasaná xi tʼatsʼe jebi ya Xo̱n xi síchjén je testigole Jeobá nga jme xi básjaiya jñani “Xi tʼatsʼe chjotale Cristo” tso, xijekoa̱n ya jñani “je kjoanda xi tsjoájin ni̱ma̱ná je espíritu Santo”. Alikui jao tjín tokoán nga je Jeobá koasenkaoná nga tosi tonda si̱ndayaa yaoná.