1. Ki kitsoz ena enn gran linflians lor nou personalite?

 NINPORT ki kantite letan ki nou’nn pran batem, nou tou nou anvi ena enn personalite ki fer plezir Zeova. Pou ki nou vinn sa kalite dimounn-la, nou bizin kontrol nou fason panse. Kifer? Parski nou bann panse ena enn gran linflians lor nou personalite. Si nou touletan pans bann kitsoz ki fer noumem plezir, nou pou dir ek fer bann kitsoz ki move. (Efe. 4:17-19) Parkont, si nou pans bann bon kitsoz, nou pou koz ek azir dan enn fason ki fer plezir nou Papa, Zeova.​—Gal. 5:16.

2. Ki kestion nou pou reponn dan sa lartik-la?

² Dan lartik avan, nou ti trouve ki nou pa kapav anpes tou bann move panse rant dan nou lespri. Me nou kapav swazir pou pa les nou inflianse par sa bann panse-la. Avan ki nou pran batem, nou bizin aret dir ek fer bann kitsoz ki Zeova deteste. Samem premie kitsoz, ek kitsoz pli inportan, ki nou bizin fer pou tir nou vie personalite lor nou. Selman, pou ki nou fer plezir Zeova, nou bizin osi obeir sa komannman-la: “Met nouvo personalite lor zot.” (Kol. 3:10, NW) Dan sa lartik-la, nou pou reponn sa bann kestion-la: Ki ete “nouvo personalite”? Kouma nou kapav met “nouvo personalite” ek gard li lor nou?

3. Dapre Galat 5:22, 23, ki ete “nouvo personalite,” ek kouma enn kikenn met nouvo personalite lor li?

³ Enn kikenn ki ena “nouvo personalite” lor li, li imit Zeova. Kan enn kikenn met “nouvo personalite” lor li, li manifeste frwi lespri sin Bondie, setadir li les lespri sin Bondie inflians so fason panse, so bann santiman, ek so  bann aksion. (Lir Galat 5:22, 23.) Par exanp, li kontan Zeova ek li kontan so bann frer ek ser. (Mat. 22:36-39) Li res zwaye mem kan li fer fas ar bann difikilte. (Zak 1:2-4) Li kontan fer lape ar lezot. (Mat. 5:9) Li ena pasians ek li bon anver lezot. (Kol. 3:13) Li kontan fer lebien. (Lik 6:35) Li montre par so bann aksion ki li ena enn lafwa for dan Bondie. (Zak 2:18) Li azir avek douser kan lezot provok li, ek li metriz limem kan li gagn bann tantasion.​—1 Kor. 9:25, 27; Tit 3:2.

4. Pou ki nou met “nouvo personalite” lor nou, kifer nou bizin manifeste tou bann kalite ki mansione dan Galat 5:22, 23 ek dan bann lezot verse Labib?

⁴ Pou ki nou met “nouvo personalite” lor nou, nou bizin manifeste tou bann kalite ki mansione dan Galat 5:22, 23 ek dan bann lezot verse Labib. * Sa bann kalite-la, zot pa kouma bann linz ki nou mete enn apre lot. An realite, boukou parmi sa bann kalite-la, zot resanble bann lezot kalite. Par exanp, si to vremem kontan to prosin, to pou ena pasians ek to pou bon anver li. Ek si to vremem bon anver lezot, to pou metriz tomem ek to pou ena douser.

5. Ki savedir “ena panse Lekris,” ek kifer nou bizin etidie Zezi so lavi? (1 Korintien 2:16)

⁵ Lir 1 Korintien 2:16. Pou nou met “nouvo personalite” lor nou, nou bizin “ena panse Lekris,” setadir nou bizin aprann kouma Zezi panse ek nou bizin imit li. Zezi manifeste frwi lespri sin Bondie dan enn fason parfe. Parey kouma enn laglas ki pena defo, Zezi reflet bann kalite so Papa dan enn fason parfe. (Ebre 1:3) Plis nou pans parey kouma Zezi, plis nou pou kapav azir parey kouma li, ek plis nou pou kapav imit li.​—Fil. 2:5.

6. Ki kitsoz nou bizin rapel kan nou pe esey met “nouvo personalite” lor nou?

⁶ Eski nou vremem kapav imit Zezi? Kitfwa nou kapav dir noumem: ‘Zezi li parfe. Zame mo pou kapav vinn parey kouma li!’ Si to ena sa santiman-la, rapel sa bann kitsoz-la. Premierman, to finn kree dan “resanblans” Zeova ek  Zezi. Alor, to kapav swazir pou imit zot, ek dan enn sertenn fason, to kapav reisi fer li. (Zen. 1:26) Deziemman, lespri sin Bondie se lafors pli pwisan ki ena dan liniver. Gras-a lespri sin Bondie, to kapav fer bann kitsoz ki to pa kapav fer par tomem. Trwaziemman, pou linstan Zeova pa atann ki to manifeste frwi lespri sin dan enn fason parfe. Zeova pou donn tou bann ki ena lesperans pou viv pou touletan lor later, mil an pou ki zot vinn parfe. (Rev. 20:1-3) Seki Zeova atann asterla, se ki nou fer nou best ek ki nou kont lor Li kan nou bizin led.

7. Ki nou pou examine asterla?

⁷ Dan ki fason nou kapav imit Zezi? Anou examinn kat kalite ki form parti dan frwi lespri sin Bondie. Ek pou sak kalite, anou gete seki nou kapav aprann ar fason ki Zezi ti manifeste sa bann kalite-la. Amezir ki nou fer sa, nou pou examinn sertin kestion ki pou ed nou pou amelior nou personalite.

8. Kouma Zezi inn montre ki li ena lamour?

⁸ Zezi telman kontan Zeova ki sa ti motiv li pou fer bann sakrifis pou so Papa ek pou nou. (Zan 14:31; 15:13) Kan li ti lor later, li ti montre ki kantite li kontan bann dimounn par fason ki li ti viv. Li ti montre lamour ek konpasion anver tou dimounn, mem anver bann dimounn ki ti opoz ar li. Enn parmi bann meyer fason ki li’nn montre so lamour pou bann dimounn se kan li’nn ansegn zot lor Rwayom Bondie. (Lik 4:43, 44) Zezi ti osi montre ki li kontan Bondie ek bann dimounn, kan li ti aksepte pou soufer ek donn so lavi an sakrifis. Kan li’nn fer sa, li’nn donn nou tou posibilite pou viv pou touletan.

9. Kouma nou kapav montre lamour parey kouma Zezi?

⁹ Nou’nn vwe nou lavi ar Zeova ek nou’nn pran batem, parski nou kontan nou Papa, Zeova. Alor, parey kouma Zezi, nou montre ki nou kontan Zeova par fason ki nou tret bann dimounn. Lapot Zan ti ekrir: “Si [enn kikenn] pa kontan so frer oubien so ser ki li trouve ar so lizie, li pa kapav kontan Bondie ki li pa trouve.” (1 Zan 4:20) Nou kapav demann noumem: ‘Eski mo vremem kontan bann dimounn? Eski mo montre konpasion anver lezot, mem si zot dir anver mwa? Eski lamour motiv mwa pou servi mo letan ek mo bann kitsoz materyel pou ed lezot pou aprann konn Zeova? Eski mo pre pou fer sa, mem si laplipar bann dimounn ki mo zwenn pa apresie mo bann zefor ouswa zot opoz ar mwa? Eski mo kapav trouv lezot fason pou pas plis letan dan predikasion?’​—Efe. 5:15, 16.

10. Kouma Zezi ti montre ki li kontan fer lape?

¹⁰ Zezi ti enn kikenn ki ti kontan fer lape. Kan bann dimounn ti tret li dan enn move fason, li pa ti rann lemal pou lemal. Li ti fer zefor pou fer lape avek lezot, ek li ti ankouraz bann dimounn pou regle zot bann problem. Par exanp, li ti ansegn zot ki zot ti bizin fer lape avek zot prosin si zot ti anvi ki Zeova aksepte zot ladorasion. (Mat. 5:9, 23, 24) Ek kan so bann disip ti pe diskite pou kone kisannla pli gran parmi zot, plizir fwa Zezi ti ed zot pou fer lape.​—Lik 9:46-48; 22:24-27.

11. Kouma nou kapav vinn enn kikenn ki fer lape?

¹¹ Pou nou vinn enn kikenn ki fer lape, nou bizin pa zis fer an-sort ki nou pa  kree bann problem. Nou bizin fer zefor pou fer lape avek lezot ek pou ankouraz bann frer ek ser pou regle zot bann problem. (Fil. 4:2, 3; Zak 3:17, 18) Nou kapav demann noumem: ‘Eski mo aksepte pou pran perdi pou ki mo fer lape avek lezot? Kan enn kikenn bles mwa, eski mo gard dan leker? Eski mo atann ki li vinn ver mwa pou ki nou fer lape, ouswa eski se mwa ki al ver li, mem si kitfwa se li ki ena tor? Eski mo ankouraz lezot pou fer lape ant zot?’

12. Kouma Zezi ti montre ki li ti zanti?

¹² Zezi ti bien zanti. (Mat. 11:28-30) Li ti montre sa kan li ti ena douser anver lezot ek kan li ti montre li rezonab, mem kan sa ti difisil. Par exanp, kan enn madam, ki ti res Fenisi, ti sipliy Zezi pou geri so zanfan,o-koumansman, Zezi pa ti fer seki madam-la ti demann li. Me kan madam-la ti montre ki li ti ena enn gran lafwa, Zezi ti zanti avek li ek li ti geri so zanfan. (Mat. 15:22-28) Mem si Zezi ti bien zanti, li pa ti ezite pou donn bann konsey. Parfwa, Zezi ti montre ki li ti zanti kan li ti fran anver bann dimounn ki li kontan. Par exanp, kan Pier ti esey anpes li pou fer volonte Zeova, Zezi ti koriz li devan bann lezot disip. (Mark 8:32, 33) Zezi pa ti fer sa pou rabes Pier. Li ti fer sa pou form Pier, ek pou donn bann lezot disip enn lavertisman konsernan lorgey. Sirman Pier ti gagn onte, me li ti gagn bann bienfe ar sa disiplinn-la.

13. Kouma nou kapav montre ki nou vremem zanti?

¹³ Kan nou zanti avek bann dimounn ki nou kontan, sa pa vedir ki nou pa kapav donn zot bann konsey. Selman, kan nou fer sa, nou bizin imit Zezi ek donn bann konsey ki sorti dan Labib. Nou bizin osi ena douser. Nou bizin res pozitif, ek ena konfians ki zot pou ekout nou konsey parski zot kontan Zeova ek zot kontan nou. Nou kapav demann noumem: ‘Si enn kikenn ki mo kontan pe fer enn move kitsoz, eski mo pou ena kouraz pou koz avek li? Si mo bizin donn enn konsey, eski mo pou zanti ouswa mo pou brit anver li? Ki kitsoz pe pous mwa pou donn li sa konsey-la? Eski mo pe fer sa parski mo ankoler avek li, ouswa parski mo anvi ed li?’

14. Kouma Zezi ti montre bonte anver lezot?

¹⁴ Zezi pa ti zis kone ki ete bonte. Li ti kone osi kouma pou montre li bon anver lezot. Zezi kontan so Papa, alor li touletan ena bann bon lintansion ek li fer seki bon. Enn kikenn ki bon, li touletan rod bann fason pou ed lezot ek li fer seki bon pou zot. Li pa ase ki nou zis kone ki bon aksion nou bizin fer. Nou bizin fer bon aksion-la ek fer li avek bann bon lintansion. Kitfwa nou kapav demann noumem, ‘Eski li posib ki nou fer bann bon aksion avek bann move lintansion?’ Wi, li posib. Par exanp, Zezi ti koz lor bann dimounn ki ti donn bann pov sarite, me ki ti fer an-sort ki lezot trouv zot pou ki zot gagn laglwar. Zot bann bon aksion pa ti ena valer pou Zeova.​—Mat. 6:1-4.

15. Kouma nou kapav vremem montre nou bon anver lezot?

¹⁵ Si nou fer bann bon aksion avek bann bon lintansion, nou pou vremem montre nou bon anver lezot. Nou kapav demann noumem: ‘Si mo kone ki bon aksion mo bizin fer, eski mo fer li? Ki kitsoz motiv mwa pou fer sa?’

16. Ki kitsoz mo bizin fer toulezour, ek kifer?

¹⁶ Fode pa nou panse ki, kan nou pran batem, nou’nn fini met “nouvo personalite” lor nou ek ki nou pa bizin kontign fer zefor pou gard li lor nou. Nou “nouvo personalite”, li kouma enn nouvo linz ki nou bizin kontign gard lor nou. Enn fason ki nou kapav fer sa, se kan nou rod bann lokazion toulezour pou manifeste frwi lespri sin Bondie. Kifer? Parski Zeova Li enn Bondie ki azir, ek so lespri sin li enn “lafors aktif.” (Zen. 1:2) Alor, sak kalite ki form parti frwi lespri sin Bondie bizin motiv nou pou azir. Par exanp, disip Zak ti ekrir: “Lafwa . . . san bann aksion, li mor.” (Zak 2:26) Li parey osi pou tou bann lezot kalite ki form parti frwi lespri sin Bondie. Sak fwa ki nou manifeste sa bann kalite-la, nou montre ki lespri sin Bondie pe azir dan nou.

17. Kouma nou bizin reazir kan nou pa reisi manifeste frwi lespri sin Bondie?

¹⁷ Parfwa, mem bann Kretien ki’nn batize depi bien lontan pa reisi manifeste frwi lespri sin Bondie. Me li bien inportan ki to pa dekouraze. Anou get enn lexanp. Si to’nn desir to linz prefere, eski to pou zet li deswit? Non. Sirman to pou koud plas ki’nn desire-la, si sa posib, ek apre, to pou fer bien atansion ki to pa re-desir linz-la. Dan mem fason, si parfwa to pa reisi montre bonte, pasians, ek lamour anver enn kikenn, fode pa to dekouraze. Si to demann li pardon avek enn leker sinser, to pou kapav kontign gard enn bon lamitie avek li. Anplis, to bizin fer zefor pou to azir pli bien dan lavenir.

18. Ki kitsoz nou kapav sir?

¹⁸ Nou vremem rekonesan ki Zezi finn donn nou enn bon lexanp! Plis nou imit so fason panse, plis nou pou kapav azir parey kouma li. Ek plis nou azir parey kouma Zezi, plis nou pou kapav gard “nouvo personalite” lor nou. Dan sa lartik-la, nou finn examinn zis kat kalite ki form parti frwi lespri sin Bondie. Eski nou kapav pran letan pou examinn bann lezot kalite ki form parti frwi lespri sin Bondie, ek gete si nou pe manifeste zot? To kapav trouv bann lartik lor sa size-la dan Liv Resers pou Bann Temwin Zeova. Dan “Size,” al dan “Nou Lavi Kretien,” ek apre “Frwi Lespri.” To kapav sir ki, si to fer to best pou met “nouvo personalite” ek gard li lor twa, Zeova pou ed twa.