1. Dhithu baani dhinavolowela emuthu yehu?

 ATHU amodhaya ehikanna yaka dhowinjhiva egabaddiziwe, mbwenye amodhaya ebaddiziwe ovanene. Ebaribariya sowihina kinapwatheya yaka ngasi nibaddiziwihu, iyo aatene ninna wilibihera wihina nikanne mubuwela onamuhagalasa Yehova. Yoviteyaya wihina nande werana ndo fusugwera mubuwela wehu. Mwahaya bwaddi? Mwaha dhithu nnubuwelihu dhinovolowela emuthu yehu yatene. Nubuwelaga baahi ohagalasa emuthu yehu yomwilini, nnere owoga obe werana dhithu dhabure. (Efé. 4:17-19) Ebaribariya sowi, nadhaliha mubuwelo wehu ni dhithu dhapama, enere okweya owoga ni werana dhithu dhinamuhagalasa Yehova.—Gál. 5:16.

2. Musolo ola nnawakule makoho baani?

² Ninga nihudherihu musolo wogomihera, iyo kannadha niselele odheliwa mubuwela wabure. Mbwenye iyo nihikanna kopolo wosugwera dhithu nnerihuna. Ethu yoobajha ni eri yathimaya wihina nikuguule emuthu yakale fuwerana nihinathi obaddiziwa. Niselele werana ni owoga dhithu dhiniidda Yehova. Mbwenye negi nimuhagalase ni murima wamutene Yehova, nnohowela werana okwaranya yeyo nilibihere ‘owara emuthu exa.’ (Col. 3:10) Yohudhera ela, nnere wawakula makoho ala enihina: ‘Emuthu exa’ ddiniyani? Ki iyo nnande addi owara ‘emuthu exa’ ofiyedha ohukuguula?

3. Mowiwanana ni Gálatas 5:22, 23, ‘emuthu exa’ ddiniyani, ki muthu ananda addi owara?

³ ‘Emuthu exa’ makalelo owubuwela ni owerana dhithu moligana ni Yehova. Mudhaari a Yehova awara emuthu exa onokanna dhowima dha muzimu wotxena, ni onohiya wihina muzimu wotxena ovolowele mubuwela waye ni dhowera dhaye.  (Omwileri Gálatas 5:22, 23.) Motajhiha, muthu anna emuthu exa onomudhivela Yehova ni addibila oomuzimuni. (Mat. 22:36-39) Ohiya eyo, oliye onohagalala naarive afwanyiwaga makathamiho. (Tia. 1:2-4) Onowilibihera okanna murenddele ni athu amodha. (Mat. 5:9) Doovilela ni dapama naathu amodha. (Col. 3:13) Oliye onodhivela ni onowerana opama. (Lucas 6:35) Dhatedhene dhineriyena anowooneya wihina ohukanna nroromelo nooliba ni Yehova. (Tia. 2:18) Mwaha woonona wivanyiha, oliye kanathamagela onyanyuwa naarive aaligiwaga.—1 Cor. 9:25, 27; Tito 3:2.

4. Nerege nnowanda woneyiha dhikalelo ndha dhinasorihiwa va Gálatas 5:22, 23, kadda ekalelo vamburoni vewa?

⁴ Wihina nande owara emuthu exa, nnohowela okanna dhikalelo dhatedhene dhinasorihiwa va Gálatas 5:22, 23, ni dhikalelo dhimodha dhinafwanyeya mBibliyani. * Dhikalelo ndha, kahiyo ninga dhowara nnawarihu modha modha. Mwebaribarene, dhikalelo dhowinjhiva dhinowiwanana ni dhikalelo dhimodha. Motajhiha, akala we onomudhivela mwanddamanaawo, onere onona onvilelana ni omweddiha pama. Negi nikale apama nnofwanelela okala athu oopwaseya ni owivanyiha.

5. Okanna mubuwela wa Kiristu enatapulela ddi, ki mwahaya bwaddi egahoweleya ohudhera egumi ya Yesu? (1 Coríntios 2:16)

⁵ Omwileri 1 Coríntios 2:16. Negi niware emuthu exa nnofwanelela okanna ‘mubuwelo wa Yehova.’ Eyo enatapulela wihina nnohowela ninone makalelo anubuwela Yesu, nindo nimutajhihege oliyeene. Yesu ahikanna dhikalelo dhatedhene dhinakosa epaddi dha dhowima dhomuzimuni. Mowindala ninga espelyu, Yesu owoneyiha mwamakalelo oologomana dhikalelo dhatedhene dha Yehova. (Heb. 1:3) Mowindo, nubuwelaga ninga Yesu ubuweliye, enere okweya werana dhithu ninga Yesu eriyena eri ekalelo yaye.—Fil 2:5

6. Dhithu baani tharu nihinafwanelelihu ohidduwala wodhela owara emuthu exa?

⁶ Enowenyeya iyo omutajhiha Yesu? Iyo podi wubuwela: ‘Yesu aari oologomana. Miyo kaginadha gimutajhiha pamadhene oliye!’ Akala we onubuwela ndo, kuddiwale dhithu ndha. Yobajha, iyo nipaddusiwe wihina nliganege ni Yehova vamodha ni Yesu. Bumwahaya iyo podi wanda watajhiha aliwa, teto  dhandeya iyo podi oliganaga naaliwa. (Gén. 1:26) Yanabili, kanidduwale wihina muzimu wotxena sikopolo enlubale yodhulu. Podi onikavihera werana dhithu nahandihu wakwaniha nahakale yekihu. Yanatharu, Yehova ohunona wi kunande ovirihamo dhikalelo dhatedhene dha muzimu wotxena mwamakalelo oologomana. Bumwahaya oliye adhe athomege yaka 1000 wihina dhivire wihina ale enna ejhehero yokala elabo ela yavati ekale oologomana. (Apo. 20:1-3) Yehova anafuniye sowihina kadda muthu eeregena ele anandiye ni amuroromelege oliye.

7. Dhithu baani nnaahudherihu ovanene?

⁷ Mwebaribarene enohoweleya ntajhihege ddi mwigumini mwa Yesu? Nnafuna noone dhikalelo nayi dhowima dha muzimu wotxena ni makalelo oonihiliye kadda ekalelo. Ohiya eyo, nnere woona dhithu nnafunihu ohudhera ni Yesu ni akala nnowanda omutajhiha Yesu wodhela owara emuthu exa.

8. Odhivela wa Yesu woneyile avi?

⁸ Yesu oomudhivela pamadhene Yehova, bumwahaya adhe amukuthelege mukutho vamodha ni iyowa. (João 14:31; 15:13) Makalelo Yesu eddihiliye egumaye agaari elabo ela yavati, ahoniha wihina odhivela anniyena naathu waari winlubale. Malabo amatene oliye aari oodhivela ni owaweddela thagaraga naaleya yamuharahara. Yesu ohawooniha odhivela athu mwaha wowahudhiha omwene wa Mulugu. (Lucas 4: 43, 44) Ohiya eyo, odhivela Yesu anniyena ni Yehova vamodha naathu, waari winlubale ofiyera opeleka egumaye, okwa vantxikwani nagoyi mmadani mwamwiddani. Mwaha ya ele eriliyena, iyo aatene nihikanna ofuru wowakela egumi yohimala.

9. Nnonihe addi odhivela wula nimutajhihaga Yesu?

⁹ Iyo nnomudhivela pamadhene babi ehu Yehova bumwahaya ndhe nipelekege mmadani mwaaye ofiyera obaddiziwa. Nnofwanelela omutajhiha Yesu nonihaga wihina nnomudhivela Yehova wodhela waweddiha pama athu amodha. Murumiwi Juwawu ohuleba egihina: ‘Eneriha muthu ahinamudhivela ddibile anandiye omoona, kanaamodhivele Mulugu, ahinandiye omoona.’ (1 João 4:20) Bumwahaya iyo podi wikoha: Mwebaribarene miyo ginomudhivela mwanddamanaga? Ginowaweddiha athu amodha nuupama naarive egeddihaga nuubure? Ginoparihedha pama mudhidhaaga ni dhokanna dhaaga wihina gakaviherena athu amodha omunona Yehova? Ginowilibihera werana ndo naarive athu amodha ehavahaga thima mabasa ginaaparimi obe enogiharahara? Ginokanna mudhidhi wowinjhivene wihina gakavihere mabasa oolaleya ni oohudhiha?—Efé. 5:15, 16.

10. Yesu aanda addi okanna murenddele naathu amodha?

¹⁰ Yesu aari muthu amurenddele. Yesu onihiwaga goyi, oliye kaawelihedha kunyakunya. Mwebaribarene oliye akala murajhi odhanavo murenddele ni owakongomedha athu amodha otxokotxela yakanna muladdu naathu amodha. Motajhiha, oliye ohudhiha wi akala muthu anofuna omuhagalasa Yehova, anohowela okanna murenddele naathu amodha. (Mat. 5:9, 23, 24) Yesu uhakavihera anamaharaye dila yanabili okanna murenddele ni anamahara amodha, kadda labo aliwa yakanganiwa emusayelaga baani ari munlubaleya.—Lucas 9:46-48; 22:24-27.

11. Nnande addi okanna murenddele naathu amodha?

¹¹ Wihina nikanne murenddele naathu amodha, ethu enahoweleya kahi ohukannave muladdu naathu amodha. Nnofwanelela okala oobajha okanna murenddele naathu amodha, ni wakongomedha addibila ni arogola werana emodhave. (Fil. 4:2, 3; Tia. 3:17, 18) Iyo  podi wikoha: Ginowerana dhatedhene wihina gande okanna murenddele naathu amodha? Akala ddibila obe naari murogola ohugukuula, ginomukoyela ntxiga? Ginowajhehera wihina athu amodha ekale oobajha okosa murenddele ni miyo, obe di miyo anakala oobajha, naarive nganonne wihina duliye agithegele? Dhenyeya, ginowakongomedha addibila amodha okanna murenddele naathu amodha?

12. Yesu oonihile addi opama?

¹² Yesu aari apama. (Mat. 11:28-30) Oliye owerana ndo wodhela waweddiha pama athu amodha, ni okala ookweya naarive afwanyiwaga makathamiho. Motajhiha, nlabo nimodha muhiyana oOfinisiya numuloba Yesu wihina anvulumuse mwanaye mwa muhiyana, Yesu ahimwakula ni makalelo apama muhiyana ole. Omambelelowene, oliye kerilena ethu aamulombiye, mbwenye nuwoona nroromelo nooliba anna muhiyana ole, oliye onvulumusa mwanaye. (Mat. 15:22-28) Yesu aari apama, mbwenye oliye kaahiya ovaha yolaga. Malabo mamodha, opamaye wowoneya wodhela walaga ale adhiveliye ahakaleli manyazo. Motajhiha, Peduru nuwoga wi Yesu kafwanelela okwa, Yesu omusumulula Peduru akwaye emusugwaga. (Marcos 8:32, 33) Oliye kenrena ndo wihina amutote manyazo Peduru, mbwenye afuna amuxagihe ni awonihe anamahara amodha wihina ehithabwege wiroromela. Podi wera Peduru ahathukula manyazo, mbwenye yohoweleya wihina asumululiwe.

13. Nnande addi okala athu apama?

¹³ Akala nnafuna nikale apama naathu amodha, malabo mamodha enofwanelela naawogegena nihakalelaga manyazo. Eyo yereya, omutajhihe Yesu wahowelaga ovaha yolaga okumihege mBibliyani. Makalelwawo oowoga ekalege apama. Kuwawogege madhu ookwerebeyiha, okanne ebaribari wihina ale enamudhivela Yehova, teto onaadhiveliwe enofuna werana yapama ni enere ovuruwana yolaga yawo. Wikohe: Ginoliba murima wihina gimulage muthu ginamudhivelimi ahanle neena nuuthega? Akala ginohowela ovaha yolaga, ginovaha yolagaya nuupama, obe ginavaha ni makalelo abure? Ethu baani enagithukulela ovaha yolaga? Ginerana ndo mwaha gere otakaleliwa niile eriliyena, obe ginafuna wihina dhaye dhimweddelege pama?

14. Yamuthukulela Yesu waweddiha athu amodha yaari ddi?

¹⁴ Yesu keera wagongomedhave baahi athu werana opama, nuliyeya owerana. Mwaha odhivela anniyena ni Yehova, malabo amatene Yesu aari apama ni efunelo yokavihera. Muthu apama, anomutajhiha Yesu ni onowilibihera okala murajhi wihina aweddihe akwaye nuupama. Wihina okale muthu apama, enahoweleya kahi waweddihave athu nuupama baahi, mbwenye naweddihege nuupama ni efunelo yowakavihera. Amodhaya podi wambela wikoha: Muthu podi weragana opama ni efunelo yabure? Ehe, podi. Motajhiha, Yesu ohasoriha athu yaakavihera aliba ohawa yawoona athu amodha yaasugwaga wihina etamaliwe. Mbwenye vamentoni va Yehova, werana dhithu dhapama ni efunelo yabure, kawinatxova.—Mat. 6:1-4.

15. Muthu anaande addi wawerela opama athu amodha?

¹⁵ Muthu podi wawerela opama athu amodha, eragana ndo ahijheheragawo ethu. Karajhiha wikoha: Ginokanna efunelo yowerana opama, vano miyo kuherana? Efunelo yaga siivi gawerelaga opama athu amodha?

16. Malabo amatene nnohowela nerege ddi, ki mwahaya bwaddi?

¹⁶ Iyo kanubuwelege wihina nnofwanelela wilibihera wihina niware emuthu exa,  nafunaga obaddiziwa. Naarive nigamanle obaddiziwa, nnofwanelela oobarela ‘emuthu exa’ niwarilihu. Iyo podi werana ndo, nisayelaga ofuru wowoniha dhowima dha muzimu wotxena kadda labo. Mwahaya? Mwahaya Yehova, Mulugu ahinagoma ni analabihera muzimu waye wihina erena ethu-siithu. (Gén. 1:2) Bumwahaya, kadda ekalelo ya yowima ya muzimu wotxena, enithukulelege ni iyowa werana ethu-siithu. Motajhiha, Tiyagu enre ‘nroromelo nahikanna mabasa nihikwa.’ (Tia. 2:26) Bumwahaya, iyo nahonihaga dhikalelo ndha, dha dhowima dha muzimu wotxena mwigumini mwehu, dhikalelo ndha dhinere okwa. Kadda labo, nnonihihu wihina nihikanna muzimu wotxena, nnokanna ebaribari wihina Yehova anna onikavihera.

17. Akala nlabo nimodha kanandile otajhiha dhowima dha muzimu wotxena, enahoweleya nere ddi?

¹⁷ Naarive akala nibaddiziwe kale kannalogomane, malabo mamodha nnerege oviriganiha wooniha dhowima dha muzimu wotxena. Mbwenye yathimaya fuuhuselela. Kubuwela yahupadduwele ethu ninga ela. Yowara yawo enathabwa wudhivela yahakanne mburo vidugudane, were orahila yatene? Newene. Podi wera, were othikithavo mburo ole odugudane ni wilibihere wi ehupadduwele dila yanabili. Ni makalelo mamodhave, akala labo nimodha wenre ohuwoga ni makalelo oovilela, oodhivela ni apama ni mukwawo, kuselele. Waaje makalelo ookanna murenddele nuliye ni omulobe nikurumuwelo, eyo podi wukaviherani wihina wandana weenyu widhowege vasogolo. Windo, wilibihere wihina osogolo ehereye dila yanabili.

18. Ethu baani ninnihuna ebaribari?

¹⁸ Mwebaribarene, sapama okanna yotajhiha ya Yesu wihina niharege! Kadda labo natajhihaga makalelo owubuwela aye, enerege okweya weragana dhithu ninga oliye. Neragana dhithudha nimutajhihaga Yesu, nnerege othabwa owarave emuthu exa. Musolo ola, nihudhera dhikalelo nayi dha muzimu wotxena. Onoonamo avi waaja mudhidhi wihina nihudhere dhikalelo dhimodha dha muzimu wotxena ni opendda akala nnowanda otajhiha kadda ekalelo? We onere ofwanya musolo dhowinjhiva dhinasoriha muselu yola wavolowa mu guia de pesquisa ya Anamona a Yehova, osayele muselu “egumi yekiristawu” windo “dhowima dha muzimu wotxena.” Podi okanna ebaribari wi, werana epaddawo, Yehova anere wukavihera owara emuthu exa obajha peeno odhowaga osogolo.