1. ¿Ndáaña kúú ña̱ náʼa̱ ndáa ki̱ʼva íyoyó?

 NI XA̱A̱ ku̱a̱ʼá ku̱i̱ya̱ á loʼo ku̱i̱ya̱ nda̱kuchiyó ndiʼiyó kúni̱yó chika̱a̱yó ndee̱ ña̱ kooyó nda̱a̱ táki̱ʼva kúni̱ mií Jehová. Ta ña̱ va̱ʼa keʼéyó ña̱yóʼo xíniñúʼu kiʼinyó kuenta xíʼin ña̱ ndákanixi̱níyó. ¿Nda̱chun? Saáchi ña̱ ndákanixi̱níyó kúú ña̱ náʼa̱ ndáa ki̱ʼva íyoyó. Tá ndiʼi tiempo ná ndakanixi̱níyó xa̱ʼa̱ ña̱ kútóo ku̱ñuyó nina ña̱ va̱ása va̱ʼa ka̱ʼa̱nyó xa̱ʼa̱ ta xa̱a̱yó keʼéyóña (Efes. 4:17-19). Soo tá nina ña̱ va̱ʼa ná ndakanixi̱níyó xa̱ʼa̱, va̱ása ixayo̱ʼvi̱ña xíʼinyó natúʼunyó xa̱ʼa̱ nina ña̱ va̱ʼa ta keʼéyó ña̱ kútóo yiváyó Jehová (Gál. 5:16).

2. ¿Ndáaña sakúaʼayó nu̱ú artículo yóʼo?

² Nda̱a̱ táki̱ʼva sa̱kúaʼayó nu̱ú artículo ña̱ ni̱ya̱ʼa, íxayo̱ʼvi̱nívaña xíʼinyó ña̱ va̱ása ndakanixi̱níyó xa̱ʼa̱ ña̱ va̱ása va̱ʼa. Soo kiviva chika̱a̱yó ndee̱ ña̱ va̱ása xa̱a̱yó keʼéyó ña̱ va̱ása va̱ʼa yóʼo. Tá kúma̱ní ndakuchiyó xíniñúʼu sandákooyó ka̱ʼa̱nyó á keʼéyó ña̱ kúndasí Jehová xínira. Ta ña̱yóʼo kúu ña̱ siʼna xíniñúʼu keʼéyó ña̱ va̱ʼa sandákooyó ki̱ʼva ña̱ ni̱xi̱yoyó tá ya̱chi̱. Soo tá kúni̱yó sakúsi̱íyó-ini Jehová saátu xíniñúʼu kundiku̱nyó consejo yóʼo: “Ndasaxa̱ándó ki̱ʼva ña̱ kéʼéndó” (Col. 3:10). Nu̱ú artículo yóʼo sakúaʼayó xa̱ʼa̱ u̱vi̱ ña̱yóʼo: ¿ndáaña kúni̱ kachi ña̱ ndasaxa̱áyó ki̱ʼva ña̱ kéʼéyó? ¿Ndáa ki̱ʼva ndasaxa̱áyó ki̱ʼva ña̱ kéʼéyó ta ndáa ki̱ʼva ndakundeéyó keʼéyóña?

3. ¿Ndáaña kúni̱ kachi ña̱ ndasaxa̱áyó ki̱ʼva ña̱ kéʼéyó, ta ndáa ki̱ʼva ndásaxa̱áyóña? (Gálatas 5:22, 23).

³ Ña̱ ndasaxa̱áyó ki̱ʼva ña̱ kéʼéyó kúni̱ kachiña ndakanixi̱níyó ta keʼéyó nda̱a̱ táki̱ʼva kúni̱ mií Jehová ta na̱ʼa̱yó ña̱ va̱ʼa ña̱ kúúmiíra. ¿Ndáa ki̱ʼva ndásaxa̱áyó ki̱ʼva ña̱ kéʼéyó? Ndásaxa̱áyóña tá  táxiyó ña̱ ná nasama espíritu santo Ndióxi̱ ña̱ ndákanixi̱níyó xíʼin ña̱ kéʼéyó (kaʼvi Gálatas 5:22, 23). Tá kúú na̱ yiví na̱ ndásaxa̱á ki̱ʼva ña̱ kéʼéna kúʼvi̱-inina xínina Jehová ta saátu na̱ ñuura (Mat. 22:36-39). Ni yáʼana nu̱ú tu̱ndóʼo kúsi̱íva-inina (Sant. 1:2-4). Chíka̱a̱na ndee̱ ña̱ va̱ása tavána ku̱a̱chi xíʼin inkana (Mat. 5:9). Kúee-inina xíʼin inkana ta to̱ʼó-inina xíʼinna (Col. 3:13). Kúʼvi̱-inina xínina ña̱ va̱ʼa ta kéʼénaña (Luc. 6:35). Xíʼin ña̱ kéʼéna náʼa̱na ña̱ kándíxana Ndióxi̱ (Sant. 2:18). Va̱ása kama sáa̱na tá kéʼé inkanana (Tito 3:2). Ta saátu xáʼnu̱-inina ña̱ keʼéna ña̱ va̱ása va̱ʼa (1 Cor. 9:25, 27).

4. ¿Á kivi na̱ʼa̱yó iin tá iin ña̱ va̱xi nu̱ú Gálatas 5:22, 23?

⁴ Ña̱ va̱ʼa ndasaxa̱áyó ki̱ʼva ña̱ kéʼéyó xíniñúʼu kuumiíyó táʼan ña̱ va̱ʼa ña̱ va̱xi nu̱ú Gálatas 5:22, 23, ta saátu ña̱ va̱ʼa ña̱ va̱xi nu̱ú inkaka texto. * Ña̱ va̱ʼa yóʼo su̱ví nda̱a̱ táki̱ʼva íyo xa̱a̱ síín síín ti̱ko̱to̱ ña̱ ndáku̱ndixiyó saá íyoña, saáchi inkáchi xíniñúʼu na̱ʼa̱yó ndiʼiña. Tá kúú, tá ndixa kúʼvi̱-iniyó xíniyó inkana, kúee koo iniyó xíʼinna ta saátu to̱ʼó koo iniyó xíʼinna. Ta tá kúni̱yó kooyó na̱ yiví va̱ʼa xíniñúʼu vitá koo iniyó ta ka̱ʼnu̱-iniyó.

5. ¿Ndáaña kúni̱ kachi ña̱ “inkáchi ndakanixi̱níyó xíʼin ta̱ Cristo”, ta nda̱chun xíniñúʼu sakúaʼayó xa̱ʼa̱ra? (1 Corintios 2:16).

⁵ (Kaʼvi 1 Corintios 2:16). Ña̱ va̱ʼa ndasaxa̱áyó ki̱ʼva ña̱ kéʼéyó xíniñúʼu “inkáchi ndakanixi̱níyó xíʼin ta̱ Cristo”, ña̱yóʼo kúni̱ kachiña ña̱ xíniñúʼu sakúaʼayó xa̱ʼa̱ ki̱ʼva ña̱ ndákanixi̱níra tasaá kundiku̱nyó yichi̱ra. Ta̱ Jesús va̱ʼaní náʼa̱ra ndiʼi ña̱ va̱ʼa ña̱ táxi espíritu santo Ndióxi̱. Nda̱a̱ táki̱ʼva íyo iin espejo saá íyora, saáchi va̱ʼaní náʼa̱ra ña̱ va̱ʼa ña̱ kúúmií Jehová (Heb. 1:3). Tá ná chika̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní ta̱ Jesús, saá kúú ña̱ keʼéyó táʼan ña̱ kéʼéra ta xa̱a̱yó kooyó nda̱a̱ táki̱ʼva íyora (Filip. 2:5).

6. ¿Ndáaña xíniñúʼu ndakaʼányó tá chíka̱a̱yó ndee̱ ña̱ ndasaxa̱áyó ki̱ʼva ña̱ kéʼéyó?

⁶ ¿Á ndixa kuchiñuyó kundiku̱nyó yichi̱ ta̱ Jesús? Sana kivi ndakanixi̱níún ña̱yóʼo: “Kǒoví ku̱a̱chi níxi̱kuumií ta̱ Jesús ña̱kán va̱ása kuchiñuvíi̱ xa̱i̱ koi̱ nda̱a̱ táki̱ʼva ni̱xi̱yora”. Tá saá ndákanixi̱níún, ndakaʼán xa̱ʼa̱ ña̱yóʼo: Ña̱ nu̱ú, Jehová i̱xava̱ʼara yóʼó ña̱ va̱ʼa koún táki̱ʼva íyo miíra ta saátu ta̱ Jesús. Ña̱kán tá ná chika̱a̱-iniún kundiku̱ún yichi̱na kuchiñuvaún, ni su̱ví nda̱a̱ táki̱ʼva kéʼévína saá keʼún (Gén. 1:26). Ña̱ u̱vi̱, ndakúní espíritu santo Ndióxi̱ ña̱kán tá ná chindeétáʼanña xíʼún kuchiñuvaún keʼún ña̱ʼa  ña̱ va̱ása kuchiñu iinlá miíún keʼún. Ña̱ u̱ni̱, Jehová kúnda̱a̱-inira ña̱ íxayo̱ʼvi̱níña xíʼún ña̱ vií na̱ʼún ña̱ va̱ʼa ña̱ táxi espíritu santora saáchi kúún na̱ yiví ku̱a̱chi. Soo ndakanixi̱ní xa̱ʼa̱ ña̱yóʼo, Jehová káʼa̱nra taxira 1,000 ku̱i̱ya̱ ndaʼa̱yó ña̱ va̱ʼa nasamayó ña̱ kéʼéyó tasaá va̱ása kookayó na̱ yiví ku̱a̱chi (Apoc. 20:1-3). Soo Jehová kúni̱ra ña̱ ná chika̱a̱níyó ndee̱ ña̱ ndasaxa̱áyó ki̱ʼva ña̱ kéʼéyó tiempo vitin ta kandíxayó ña̱ chindeétáʼanra xíʼinyó.

7. ¿Ndáaña ka̱ʼa̱nyó xa̱ʼa̱ vitin?

⁷ ¿Ndáa ki̱ʼva kundiku̱nyó yichi̱ ta̱ Jesús? Ná ka̱ʼa̱nyó xa̱ʼa̱ ku̱mí ña̱ va̱ʼa ña̱ táxi espíritu santo Ndióxi̱ ta ná kotoyó ndáa ki̱ʼva ni̱na̱ʼa̱ ta̱ Jesús iin tá iin ña̱ va̱ʼa yóʼo, ta saátu ndáaña kivi sakúaʼayó xíʼin ña̱ ke̱ʼéra. Ta ka̱ʼa̱nyó xa̱ʼa̱ sava pregunta ña̱ chindeétáʼan xíʼinyó kunda̱a̱-iniyó á xíniñúʼu chika̱a̱kayó ndee̱ ña̱ ndasaxa̱áyó ki̱ʼva ña̱ kéʼéyó.

8. ¿Ndáa ki̱ʼva ni̱na̱ʼa̱ ta̱ Jesús ña̱ kúʼvi̱-inira xínira Jehová ta saátu na̱ yiví?

⁸ Xa̱ʼa̱ ña̱ xi̱kuʼvi̱ní-ini ta̱ Jesús xi̱xinira Jehová kúú ña̱ chi̱ka̱a̱-inira ña̱ keʼéra nda̱a̱ ndáaka ña̱ʼa xa̱ʼa̱ra ta saátu xa̱ʼa̱ miíyó (Juan 14:31; 15:13). Ta xíʼin ndiʼi ña̱ ke̱ʼéra tá ni̱xi̱yora nu̱ú ñuʼú yóʼo ni̱na̱ʼa̱ra ña̱ xi̱kuʼvi̱ní-inira xi̱xinira na̱ yiví. Saáchi va̱ʼaní ni̱xi̱yo inira xíʼinna ta xi̱kundáʼvi-inira xi̱xinirana nda̱a̱ na̱ xi̱sa̱a̱-ini xi̱xiniñaʼá. Saátu ni̱na̱ʼa̱ra ña̱ xi̱kuʼvi̱ní-inira xi̱xinirana saáchi xi̱natúʼunra xíʼinna xa̱ʼa̱ Reino Ndióxi̱ (Luc. 4:43, 44). Ta ni̱na̱ʼa̱ra ña̱ xi̱kuʼvi̱ní-inira xi̱xinira Ndióxi̱ ta saátu na̱ yiví chi ta̱xira ña̱ ná saxóʼvi̱nara ta kaʼnínara. Ta tíxa̱ʼvi ña̱ ke̱ʼéra kivi kutakuyó ndiʼi tiempo.

9. ¿Ndáa ki̱ʼva na̱ʼa̱yó ña̱ kúʼvi̱-iniyó xíniyó inkana nda̱a̱ táki̱ʼva ke̱ʼé ta̱ Jesús?

⁹ Xa̱ʼa̱ ña̱ kúʼvi̱ní-iniyó xíniyó Jehová kúú ña̱ nda̱taxiyó miíyó ndaʼa̱ra ta nda̱kuchiyó. Ña̱kán xíniñúʼu viíní keʼéyó xíʼin na̱ yiví ña̱ va̱ʼa na̱ʼa̱yó ña̱ kúʼvi̱-iniyó xíniyó Jehová nda̱a̱ táki̱ʼva xi̱keʼé ta̱ Jesús. Ta̱ apóstol Juan ka̱ʼyíra ña̱yóʼo: “Na̱ va̱ása kúʼvi̱-ini xíni na̱ ñanina na̱ va̱ʼa xínina, va̱ása kívi kuʼvi̱-inina kunina Ndióxi̱ ta̱ va̱ása kívi kunina” (1 Juan 4:20). Ná ndakanixi̱níyó xa̱ʼa̱ ña̱yóʼo: “¿Á kúʼvi̱-inii̱ xínii̱ inkana? ¿Á kúndáʼvi-inii̱ xínii̱ inkana ni tá va̱ása vií kéʼéna xíʼi̱n? ¿Á xíniñúʼi̱ tiempoi̱ xíʼin xu̱ʼíi̱n ña̱ va̱ʼa natúʼi̱n xíʼin na̱ yiví xa̱ʼa̱ Jehová? ¿Á nátúʼi̱n xa̱ʼa̱ra ni tá va̱ása chíndayáʼvinaña á ni tá sásina nu̱úi̱ ña̱ keʼíi̱ chiñu yóʼo? ¿Á kivi tavái̱ ku̱a̱ʼáka tiempo ña̱ va̱ʼa natúʼi̱n xíʼin na̱ yiví xa̱ʼa̱ Jehová?” (Efes. 5:15, 16).

10. ¿Ndáaña xi̱keʼé ta̱ Jesús ña̱ va̱ása sakákura ku̱a̱chi xíʼin inkana?

¹⁰ Ta̱ Jesús va̱ása nísakákura ku̱a̱chi xíʼin inkana, ta tá xi̱keʼéna iin ña̱ va̱ása va̱ʼa xíʼinra su̱ví nda̱a̱ táki̱ʼva xi̱keʼéna xíʼinra saá níxi̱keʼéra xíʼinna, soo íyo inka ña̱ ndáyáʼviní xi̱keʼéra. Siʼna miíra xi̱ndasavií ku̱a̱chi xíʼin inkana, ta xi̱ka̱ʼa̱nra xíʼinna ña̱ ndasaviína ku̱a̱chi ña̱ xi̱kuumiína xíʼin inkana. Tá kúú sa̱náʼa̱rana ña̱ xíniñúʼu ndasaviína ku̱a̱chi ña̱ kúúmiína xíʼin táʼanna tá kúni̱na ña̱ ná kusi̱í-ini Jehová xíʼinna (Mat. 5:9, 23, 24). Ta ku̱a̱ʼá yichi̱ ni̱ka̱ʼa̱nra xíʼin na̱ apóstolra ña̱ ná va̱ása ka̱ʼa̱n kúáchinína xa̱ʼa̱ ndáana kúú na̱ káʼnuka nu̱ú táʼanna (Luc. 9:46-48; 22:24-27).

11. ¿Ndáaña kivi keʼéyó ña̱ va̱ása sakákuyó ku̱a̱chi xíʼin inkana?

¹¹ Tá va̱ása kúni̱yó koo ku̱a̱chi xíʼin inkana xíniñúʼu chika̱a̱yó ndee̱ ña̱ va̱ása sákakuyóña. Soo tá kúúmiíyó ku̱a̱chi xíʼin inkana siʼnaka miíyó ná ndasaviíña xíʼinna, ta saátu ná ka̱ʼa̱nyó xíʼin na̱ hermanoyó ña̱ ná chika̱a̱na ndee̱ ña̱ ndasaviína ku̱a̱chi ña̱ kúúmiína xíʼin inkana (Filip. 4:2, 3; Sant. 3:17, 18). Kivi ndakanixi̱níyó xa̱ʼa̱ ña̱yóʼo: “¿Á chíka̱i̱ ndee̱ ña̱ keʼíi̱ nda̱a̱ ndáaka ña̱ʼa ña̱ va̱ʼa ndasaviíi̱ ku̱a̱chi xíʼin inkana? ¿Á íxayo̱ʼvi̱ña xíʼi̱n nandósó-inii̱ xa̱ʼa̱ ña̱ va̱ása va̱ʼa kéʼéna xíʼi̱n? Tá kéʼéna iin ña̱ va̱ása va̱ʼa xíʼi̱n, ¿á ndátui̱ ña̱ siʼnaka miína ná ndukú ña̱ káʼnu-ini nu̱úi̱? ¿Á siʼnaka miívai̱ ndúkú ña̱  káʼnu-ini nu̱úna ni túvii̱ ña̱ miína kúú na̱ kúúmií ku̱a̱chi? Tá xítoi̱ ña̱ kúúmií iinna ku̱a̱chi xíʼin inkana, ¿á káʼi̱n xíʼinna ña̱ ná chika̱a̱na ndee̱ ña̱ ndasaviína ña̱yóʼo?”.

12. ¿Ndáa ki̱ʼva ni̱na̱ʼa̱ ta̱ Jesús ña̱ vií ni̱xi̱yo inira xíʼin inkana?

¹² Ta̱ Jesús viíní ni̱xi̱yo inira xíʼin inkana (Mat. 11:28-30). Va̱ʼaní xi̱keʼéra xíʼin inkana ta xi̱chindeétáʼanra xíʼin na̱ va̱ása níxiniñúʼu chindeétáʼanra xíʼin. Tá kúú, tá xa̱kundáʼvi iin ñaʼá ñá ñuu Fenicia nu̱úra ña̱ ná sandáʼara ñá loʼo se̱ʼeñá, viíva nda̱kuiinra yuʼúñá. Tá xa̱ʼa̱ va̱ása níkeʼéra ña̱ ni̱ka̱ʼa̱nñá xíʼinra, soo tá xi̱nira ña̱ kándíxaníñá Ndióxi̱ sa̱ndáʼavara se̱ʼeñá (Mat. 15:22-28). Soo ni va̱ʼava ni̱xi̱yo ini ta̱ Jesús va̱ása nítaxira kasi ña̱yóʼo nu̱úra ña̱ taxira consejo ndaʼa̱ inkana. Sava yichi̱ xi̱niñúʼu káxiní ka̱ʼa̱nra xíʼin na̱ xi̱kuʼvi̱-inira xi̱xinira. Tá kúú, tá ni̱ka̱ʼa̱n ta̱ Pedro xíʼinra ña̱ va̱ása xíniñúʼu kuvivíra, ta̱ Jesús nu̱ú ndiʼi na̱ discípulora ni̱nda̱ʼyi̱ra nu̱úra (Mar. 8:32, 33). Va̱ása níxikuni̱ra sakúkaʼanra nu̱ú ta̱ Pedro saáchi ña̱ xi̱kuni̱ra kúú ña̱ sanáʼa̱rara ña̱ va̱ása xíniñúʼu ni̱nu kunira, ta saátu xi̱kuni̱ra ná kunda̱a̱-ini na̱ inka discípulora ña̱ va̱ása xíniñúʼu kasina nu̱úra ña̱ saxínura ña̱ kúni̱ yivára. Sana ku̱kaʼanníva nu̱ú ta̱ Pedro tá ni̱nda̱ʼyi̱ ta̱ Jesús nu̱úra soo ña̱ va̱ʼa miívara xi̱kuuña.

13. ¿Ndáaña xíniñúʼu keʼéyó sava yichi̱ ña̱ vií koo iniyó xíʼin inkana?

¹³ Tá kúni̱yó vií koo iniyó xíʼin na̱ kúʼvi̱ní-iniyó xíniyó, sava yichi̱ xíniñúʼu káxiní ka̱ʼa̱nyó xíʼinna. Tá ná keʼéyó ña̱yóʼo ná kundiku̱nyó yichi̱ ta̱ Jesús ta nu̱ú tu̱ʼun Ndióxi̱ ná taváyó consejo ña̱ taxiyó ndaʼa̱na. Vií ná keʼéyó xíʼinna ta ná kandíxayó ña̱ tá kúʼvi̱-inina xínina Jehová ta saátu tá kúʼvi̱-inina xínina miíyó kundiku̱nvana consejo ña̱ taxiyó ndaʼa̱na. Ná ndakanixi̱níyó xa̱ʼa̱ ña̱yóʼo: “¿Á taxii̱ consejo ndaʼa̱ iin na̱ kúʼvi̱ní-inii̱ xínii̱ tá xítoi̱ ña̱ kéʼéna ña̱ va̱ása va̱ʼa? ¿Ndáa ki̱ʼva taxii̱ consejo ndaʼa̱na? ¿Á vií taxii̱ña ndaʼa̱na á nda̱ʼyi̱vai̱ nu̱úna? ¿Nda̱chun taxii̱ña ndaʼa̱na? ¿Á xa̱ʼa̱ ña̱ sái̱ xíʼinna kúúña á xa̱ʼa̱ ña̱ kúni̱i̱ chindeétáʼi̱n xíʼinvana kúúña?”.

14. ¿Ndáa ki̱ʼva ni̱na̱ʼa̱ ta̱ Jesús ña̱ va̱ʼa ni̱xi̱yo inira xíʼin inkana?

¹⁴ Va̱ása kúnda̱a̱ kuití ini ta̱ Jesús ndáaña kúú ña̱ va̱ʼa chi saátu kéʼéraña. Xa̱ʼa̱ ña̱ kúʼvi̱-inira xínira yivára kúú ña̱ chíndeétáʼanra xíʼin inkana, ta su̱ví xa̱ʼa̱ ña̱ kúni̱ra ndukáʼnura kúúña. Na̱ yiví na̱ va̱ʼa-ini xíʼin inkana ndúkúna ki̱ʼva ña̱ chindeétáʼanna xíʼinna. Ña̱kán, va̱ása xíniñúʼu kunda̱a̱ kuití iniyó ndáa ki̱ʼva chindeétáʼanyó xíʼin inkana chi xíniñúʼu chindeétáʼanvayó xíʼinna, ta ná va̱ása keʼéyóña xa̱ʼa̱ ña̱ kúni̱yó ka̱ʼa̱n va̱ʼana xa̱ʼa̱yó. Sana kivi ndakanixi̱níyó ña̱yóʼo: “¿Á íyo na̱ kéʼé ña̱ va̱ʼa xa̱ʼa̱ inkana xa̱ʼa̱ ña̱ kúni̱ kuitína ná ka̱ʼa̱n va̱ʼana xa̱ʼa̱na?”. Íyovana. Tá kúú, ta̱ Jesús ni̱ka̱ʼa̱nra xa̱ʼa̱ na̱ xi̱taxi xu̱ʼún ndaʼa̱ na̱ nda̱ʼví ta xi̱kuni̱na ná kunda̱a̱-ini inkana xa̱ʼa̱ ña̱yóʼo. Soo va̱ása níxikusi̱í-ini Jehová xíʼin ña̱ xi̱keʼéna (Mat. 6:1-4).

15. ¿Ndáaña xíniñúʼu keʼéyó tá kúni̱yó va̱ʼa koo iniyó xíʼin inkana?

¹⁵ Tá kúni̱yó va̱ʼa koo iniyó xíʼin inkana xíniñúʼu chindeétáʼanyó xíʼinna xa̱ʼa̱ ña̱ ndixa ndíʼi̱-iniyó xa̱ʼa̱na ta su̱ví xa̱ʼa̱ ña̱ kúni̱yó ná ka̱ʼa̱n va̱ʼana xa̱ʼa̱yó. Ná ndakanixi̱níyó xa̱ʼa̱ ña̱yóʼo: “Tá ndixa va̱ʼa-inii̱, ¿á chíndeétáʼi̱n xíʼin inkana? ¿Nda̱chun kéʼíi̱ ña̱ va̱ʼa xa̱ʼa̱na?”.

16. ¿Ndáaña xíniñúʼu keʼéyó ndiʼi ki̱vi̱, ta nda̱chun?

¹⁶ Sana túviyó ña̱ xa̱a̱ nda̱saxa̱áyó ki̱ʼva ña̱ kéʼéyó saáchi xa̱a̱ nda̱kuchiyó, ta kǒo inkaka ña̱ xíniñúʼu keʼéyó. Soo tá ndásaxa̱áyó ki̱ʼva ña̱ kéʼéyó nda̱a̱ táki̱ʼva íyo na̱ ndáku̱ndixi iin ti̱ko̱to̱ xa̱á saá íyoyó ta xíniñúʼu kundaaníyóña. Ña̱kán, ndiʼi ki̱vi̱ xíniñúʼu ndukúyó ki̱ʼva ña̱  na̱ʼa̱yó ña̱ va̱ʼa ña̱ táxi espíritu santo Ndióxi̱. ¿Nda̱chun? Saáchi nda̱a̱ táki̱ʼva kéʼé Jehová ña̱ íyo tu̱ʼvara ña̱ chindeétáʼanra xíʼinyó saátu kéʼé espíritu santora (Gén. 1:2). Ña̱yóʼo kúni̱ kachiña ña̱ iin tá iin ña̱ va̱ʼa ña̱ táxi espíritu santo Ndióxi̱ ndaʼa̱yó kivi chindaʼáña miíyó ña̱ ndasaxa̱áyó ki̱ʼva ña̱ kéʼéyó. Tá kúú ta̱ discípulo Santiago ka̱ʼyíra ña̱yóʼo: “Saátu íyo ña̱ kándíxayó Ndióxi̱, tá kǒo ni iin ña̱ʼa ña̱ va̱ʼa kéʼéyó ni loʼoví va̱ása ndáyáʼvi ña̱ kándíxayóra” (Sant. 2:26). Ta ki̱ʼva saátu kúu xíʼin inkaka ña̱ va̱ʼa ña̱ táxi espíritu santo Ndióxi̱ ndaʼa̱yó. Ña̱kán, tá ndiʼi ki̱vi̱ náʼa̱yó ña̱yóʼo saá kúú ña̱ náʼa̱yó ña̱ táxiyó ná chindeétáʼan espíritu santo Ndióxi̱ xíʼinyó.

17. ¿Ndáaña kivi keʼéyó tá íxayo̱ʼvi̱ña xíʼinyó na̱ʼa̱yó ña̱ va̱ʼa ña̱ táxi espíritu santo Ndióxi̱?

¹⁷ Nda̱a̱ na̱ hermano na̱ xa̱a̱ ku̱a̱ʼání ku̱i̱ya̱ nda̱kuchi íxayo̱ʼvi̱ña xíʼinna na̱ʼa̱na sava ña̱ va̱ʼa ña̱ táxi espíritu santo Ndióxi̱. Soo tá ndóʼoyó ña̱yóʼo ná va̱ása ndakava-iniyó, va̱ʼaka ná ndakundeéyó na̱ʼa̱yóña. Ná ka̱ʼa̱nyó xa̱ʼa̱ iin ejemplo, tá ni̱nda̱ta̱ iin ti̱ko̱to̱yó ña̱ kútóoníyó va̱ása ndi̱ku̱n sákanavíyóña, saáchi sana sandáʼavayóña. Ta kixáʼayó kiʼinkayó kuenta xíʼinña ña̱ va̱ása nda̱tá tukuña. Ta ki̱ʼva saá ndóʼoyó sava yichi̱, íxayo̱ʼvi̱ña xíʼinyó va̱ʼa koo iniyó xíʼin inkana, kúee koo iniyó xíʼinna á kuʼvi̱-iniyó kuniyóna soo ná va̱ása ndakava-iniyó tá ndóʼoyó ña̱yóʼo. Va̱ʼaka ná ndukúyó ña̱ káʼnu-ini nu̱úna chi ña̱yóʼo kúú ña̱ chindeétáʼan xíʼinyó ña̱ ndakutáʼan vií tukuyó xíʼinna. Ta ná chika̱a̱yó ndee̱ ña̱ viíka keʼéyó xíʼinna inka yichi̱.

18. ¿Ndáaña kivi kandíxayó?

¹⁸ Kúsi̱íní-iniyó xa̱ʼa̱ ña̱ va̱ʼaní yichi̱ sa̱ndákoo ta̱ Jesús nu̱úyó. Tá ná chika̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱níra, saá kúú ña̱ va̱ása ixayo̱ʼvi̱ña xíʼinyó keʼéyó nda̱a̱ táki̱ʼva kéʼéra. Tasaá va̱ʼaníka ndasaxa̱áyó ki̱ʼva ña̱ kéʼéyó. Nu̱ú artículo yóʼo sa̱kúaʼayó xa̱ʼa̱ ku̱mí kuití ña̱ va̱ʼa ña̱ táxi espíritu santo Ndióxi̱. Soo ná chika̱a̱yó ndee̱ ña̱ kaʼviyó xa̱ʼa̱ inkaka ña̱ va̱ʼa ña̱ táxi espíritu yóʼo, tasaá kotoyó á kivi chika̱a̱kayó ndee̱ ña̱ viíka na̱ʼa̱yóña. Kivi ndani̱ʼún artículo ña̱ káʼa̱n xa̱ʼa̱ ña̱yóʼo nu̱ú Guía de estudio para los testigos de Jehová, ki̱ʼvi nu̱ú káʼa̱nña “El vivir cristiano”, tándi̱ʼi ki̱ʼviún nu̱ú káʼa̱nña “Fruto del espíritu”. Kivi kandíxayó ña̱ chindeétáʼanva Jehová xíʼinyó tá ná chika̱a̱yó ndee̱ ña̱ ndasaxa̱áyó ki̱ʼva ña̱ kéʼéyó.