1. ¿Toni techolinia maj tikchiuakan teisa?

 MASKI xa yankuixtok timoauijkej oso uejkaujya, tinochin tiknekij tikchiuaskej tein kiyolpaktia Jiova. Uelis tikchiuaskej nejin komo timochikauaj amo tiknemiliskej tein amo kuali, ¿keyej? Porin tein tiknemiliaj yejua tein tikchiuaj. Komo nochipa itech titanemilijtokej timoyolpaktiskej ika tein tiknejnekij, tikijtoskej uan tikchiuaskej tein amo kuali (Efes. 4:17-19). Sayoj ke komo tiknemiliaj tein kuali, xa okachi techpaleuis maj tikijtokan uan maj tikchiuakan tein toTajtsin Jiova kiyolpaktia (Gál. 5:16).

2. ¿Katiyejua netajtanilmej tiknankiliskej itech nejin tamachtilis?

² Kemej tikitakej itech okse tamachtilis, amo uelis senkis amo tiknemiliskejok tein amo kuali. Sayoj ke uelis tikixtaliskej amo tikchiuaskej. Achto ke timoauiskej moneki amo tikijtoskejok nion tikchiuaskejok tein Jiova kitauelita. Nejin se taman tein yekinika moneki tikchiuaskej uan tein semi moneki komo tiknekij timokixtiliskej soltik talnamikilis. Sayoj ke komo senkis tiknekij tikyolpaktiskej Jiova no moneki tiktakamatiskej nejin tanauatil: ‘Ximoyankuikatakentikan ika ne chipauak talnamikilis’ (Col. 3:10). Itech nejin tamachtilis tiknankiliskej nejin netajtanilmej: ¿toni “chipauak talnamikilis”? ¿Keniuj uelis timotaliliskej uan nochipa tikpiaskej?

3. Ijkon kemej kijtoua Gálatas 5:22, 23, ¿toni “chipauak talnamikilis”, uan keniuj timotaliliaj?

³ Se motalilis “chipauak talnamikilis” kijtosneki se tanemilis uan se kichiuas kemej Jiova. ¿Uan keniuj se motalilia? Keman tiknextiaj kualneskayomej tein iespíritu Dios techpaleuia maj tikpiakan. Tikchiuaj nejin keman tikauaj maj nejin espíritu techpaleui maj tikpatakan kemej titanemiliaj, tein tikmachiliaj uan  tein tikchiuaj (xikonixtajtolti Gálatas 5:22, 23). Kemej neskayot, akin motalilia “chipauak talnamikilis” kitasojta Jiova uan no itekitikauan (Mat. 22:36-39). Kisentoka yolpaki maski kipia ouijkayomej (Sant. 1:2-4). Tapaleuia maj nochin kuali mouikakan (Mat. 5:9). Amo yolijsiui uan kualtakat iniuan oksekin (Col. 3:12, 13). Kitasojta tein kuali uan kichiua (Luc. 6:35). Ika tein kichiua kinextia ke semi takuaujtamati iuan iTajtsin, Jiova (Sant. 2:18). Amo kualani keman oksekin kitemouaj kikualantiskej (Tito 3:2). Uan kimati motsakuilis keman ueliskia kichiuas se taman tein amo kuali (1 Cor. 9:25, 27).

4. ¿Keyej kualneskayomej tein ika motajtoua itech Gálatas 5:22, 23 amo ueli se kinextia sejse?

⁴ Komo tiknekij timotaliliskej “chipauak talnamikilis”, moneki tikpiaskej kualneskayomej kemej tein ika motajtoua itech Gálatas 5:22, 23 uan tein nesi itech okseki tajkuilolmej itech Biblia. * Nejin kualneskayomej amo kemej taken tein mojmostaj sejse timotaliliaj, porin se kualneskayot mouika iuan okse. Yejua ika, keman tiknextiaj se kualneskayot no uelis tiknextiskej okseki. Kemej neskayot, komo yekmelauj tikintasojtaj oksekin amo tiyolijsiuiskej uan yeski tikualtakamej iniuan. Uan komo tiknekij tiyeskij yekmelauj tiyolkualmej, moneki yeski tiyolnejmachmej uan tikmatiskej timotsakuiliskej.

5. ¿Toni kijtosneki se kipias “itanemilil Cristo”, uan keyej moneki timomachtiskej tein kichiuak? (1 Corintios 2:16, TNM).

⁵ (Xikonixtajtolti 1 Corintios 2:16, TNM). Komo tiknekij timotaliliskej “chipauak talnamikilis”, moneki tikpiaskej “itanemilil Cristo”, nejin kijtosneki ke moneki timomachtiskej keniuj tanemilia Jesús uan tikchiuaskej kemej yejua. Jesús senkis kinextia kualneskayomej tein iespíritu Dios techpaleuia maj tikpiakan. Ijkon kemej se kuali espejo, Jesús senkis kuali kinextia ikualneskayouan Jiova (Heb. 1:3). Keman okachi titanemiliskej kemej Jesús, okachi kuali tikchiuaskej kemej yejua uan okachi kuali tiknextiskej ikualneskayouan (Filip. 2:5).

6. ¿Toni moneki tikelnamikiskej keman timochikaujtoskej timotaliliskej “chipauak talnamikilis”?

⁶ ¿Yekmelauj uelis tikchiuaskej kemej Jesús? Tejuatsin xa tikonnemilis: “Jesús amo tajtakolej. ¡Amo keman uelis senkis nikchiuas kemej yejua!”. Komo ijkon tikonnemilia, xikonelnamiki nejin eyi taman. Yekinika, tejuatsin mitsonchijchiujkej kemej uelis tikonchiuas  kemej Jiova uan Jesús. Yejua ika, uelis tikonixtalis tikonchiuas kemej yejuan uan uelis tikonchiuas hasta kampa tionuelis (Gén. 1:26). Ojpatika, amo onkak okse taman tein kipia okachi chikaualis ke iespíritu Dios, ika inepaleuil uelis tikonchiuas miak taman tein moselti amo tionueliskia. Expatika, Jiova amo kichia senkis xikonnexti axkan kualneskayomej tein iespíritu Dios techpaleuia maj tikpiakan. Xikonelnamiki ke toTajtsin Jiova kinmakas akin kichiaj nemiskej nikan taltikpak 1,000 xiujmej hasta maj senkis amo kipiakanok tajtakol (Apoc. 20:1-3). Jiova kineki maj axkan timochikauakan tiknextiskej kualneskayomej hasta kampa tiueliskej uan maj titakuaujtamatikan ke yejuatsin techpaleuis.

7. ¿Toni timomachtiskej axkan?

⁷ ¿Itech toni taman uelis tikchiuaskej kemej Jesús? Ika titajtoskej naui kualneskayomej tein iespíritu Dios techpaleuia maj tikpiakan. Tikitaskej keniuj Jesús kinextij sejse kualneskayot uan toni techmachtia tejuan. No tikitaskej seki netajtanilmej tein techpaleuiskej maj tikitakan ox moneki okachi kuali tiknextiskej seki kualneskayomej.

8. ¿Keniuj kinextij Jesús netasojtalis?

⁸ Kemej Jesús semi kitasojta Jiova motemakak kichiuas seki taman maski ouij katka, porin kinekia kiyolpaktis uan kinekia techpaleuis (Juan 14:31; 15:13). Uan kinextij ke semi kintasojtaya taltikpakneminij ika tein kichiuak keman yetoya nikan taltikpak. Nochipa kintasojtak uan kiniknelij taltikpakneminij, hasta akin kiixnamikiaj. Okachi kinextij ke kintasojtaya keman kinnojnotsak ika iTekiuajyo Dios (Luc. 4:43, 44). No senkis kinextij ke semi kitasojtaya Dios uan taltikpakneminij, keman motemakak maj kitajyouiltianij uan maj kimiktianij taltikpakneminij tajtakolejkej. Ijkon techpaleuij maj ueli tikchiakan tinemiskej nochipaya.

9. ¿Keniuj uelis titetasojtaskej ijkon kemej Jesús?

⁹ Kemej tiktasojtaj Jiova, iuan timotemaktijkej uan timoauijkej. Yejua ika, ijkon kemej Jesús, monekiskia tikintasojtaskej oksekin uan ijkon tiknextiskej ke tiktasojtaj Jiova. Tatitanil Juan kijkuiloj: “Komo tejuan amo tikinyektasojtaj in tokniuan taneltokani ten tikinyekitstokke ya, [...] amo no uelis tiktasojtaske Totajtsin Dios porin Yejuatsin amo [...] tikitstinemij” (1 Juan 4:20). Maj timotajtanikan: “¿Semi nikintasojta oksekin? ¿Niknextia ke nikiniknelia oksekin maski kichiuaj teisa tein nechkualantia? ¿Nikui notiempo uan tein nikpia para nikinpaleuis oksekin maj kiixmatikan Jiova porin nikintasojta? ¿Nikchiua maski semi miakej amo kitasojkamatij oso hasta keman oksekin nechixnamikij? ¿Ueliskia okachi nitanojnotsas?” (Efes. 5:15, 16).

10. ¿Keniuj kitemoj Jesús maj nochin kuali mouikakan?

¹⁰ Jesús kitemouaya kuali mouikas iniuan nochin, amo momakepaya keman kichiuiliayaj tein amo kuali. Sayoj ke no kichiuak okse taman. Nochipa kitemoj kuali mouikas iniuan nochin, uan kinyolchikauaya maj kiyektalianij kuejmolmej tein kipiayaj iniuan oksekin. Kemej neskayot, kinmachtij ke monekia kiyektaliskej kuejmolmej tein kipiayaj iuan aksa komo kinekiaj maj Jiova kiyolpaktiani inintaueyichiualis (Mat. 5:9, 23, 24). Uan kemej itatitaniluan kinekiaj kimatiskej akoni okachi ueyichiujkej katka, Jesús miakpa kinyolchikauak maj amo ika motajtolteuianijok nejon (Luc. 9:46-48; 22:24-27).

11. ¿Keniuj uelis titapaleuiskej maj nochin kuali mouikakan?

¹¹ Komo tiknekij titapaleuiskej maj nochin kuali mouikakan, amo sayoj moneki amo timokualantiskej iniuan oksekin, ta no moneki maj tejuan achto tiktemokan tikyektaliskej se kuejmol tein tikpiaskej iuan aksa, uan maj tikinyolchikauakan oksekin maj no kiyektalikan  ininkuejmoluan (Filip. 4:2, 3; Sant. 3:17, 18). Ueliskia timotajtaniskej: “¿Toni nimotemaka nikchiuas para nikyektalis se kuejmol tein nikpia iuan aksa? ¿Niksentoka nikualantok iuan se tokniuj komo kichiuak teisa tein nechyolkokoj? ¿Niktemoua achto nejua nikyektalis kuejmol tein nikpia iuan aksa oso nikchia maj yejua kichiua? ¿Niktemoua achto nejua nikyektalis kuejmol maski niknemilia ke yejua kipia tajtakol? Komo moneki, ¿nikinyolchikaua tokniuan maj kiyektalikan kuejmolmej tein kipiaj iniuan oksekin?”.

12. ¿Keniuj kinextij Jesús ke katka kualtakat?

¹² Jesús katka kualtakat (Mat. 11:28-30). Yejua tetasojtaya uan teajsikamatia. Kemej neskayot, keman se siuat kayot Fenicia kitajtanij maj kipajtiani isiuapil, yekinika amo kichiuak tein kitajtanij. Sayoj ke kualtsin kinankilij uan keman kiitak ke semi takuaujtamatia kipajtij isiuapil (Mat. 15:22-28). Jesús nochipa tayolmajxitiaya uan kemej katka kualtakat kemansa monekia kinyolmajxitis akin kintasojtaya. Kemej neskayot, keman Pedro kiluij se taman tein ika ueliskia kitsakuilis maj kichiua itanejnekilis Jiova, Jesús kimelauak ininixpan okseki itatitaniluan (Mar. 8:32, 33). Amo kichiuak porin kinekia kipinaujtis Pedro, ta porin kinekia kimachtis. Uan no, kinekia kinnejmachtis okseki itatitaniluan ke monekia kipaleuiskej maj kichiua itanejnekilis Dios uan amo kitemoskej kitsakuiliskej. Pedro mopinaujmatik sayoj ke nejon kipaleuij.

13. ¿Toni moneki tikchiuaskej kemansa komo tiknekij tiyeskij tikualtakamej?

¹³ Komo tiknekij tiyeskij tikualtakamej iniuan akin tikintasojtaj, kemansa monekis tikinyolmajxitiskej. Komo ijkon, maj tikchiuakan kemej Jesús uan tein tikijtoskej maj kisa itech iTajtol Dios. Maj tiknextikan netasojtalis. Maj tiknemilikan ke kuali technankiliskej. Maj tiknemilikan ke akin kitasojtaj Jiova uan techtasojtaj, kikakiskej tein tikinyolmajxitiskej ika netasojtalis. Maj timotajtanikan: “¿Nimoyolchikaua niknojnotsas aksa akin niktasojta keman nikita ke kichiujtok tein amo kuali? ¿Keniuj nikchiua? ¿Kualtsin niknojnotsa oso nikajua? ¿Uan keyej nikyolmajxitia, porin nikualantok iuan oso porin nikneki maj amo kipano tein amo kuali?”.

14. ¿Keniuj kinextij Jesús ke yolkuali?

¹⁴ Jesús amo sayoj kimati toni tein kuali, ta no kichiua. Yejua kitasojta iTajtsin, yejua ika nochipa kichiua tein kuali uan amo porin kitemoua kiselis teisa. Akin yolkuali nochipa kitemoua kinpaleuis oksekin. Amo sayoj moneki tikmatiskej tein kuali, ta no moneki tikchiuaskej uan amo porin tiktemouaj tikseliskej teisa. Aksa ueliskia motajtanis: “¿Ueliskia aksa kichiuas tein kuali, sayoj ke amo porin yekmelauj kineki tepaleuis?”. Kemaj. Kemej neskayot, Jesús ika tajtoj akin kinpaleuiayaj akin tajtantinemiaj tomin porin kipanouayaj tatasojtilis, sayoj ke kitemouayaj maj oksekin kimatikan tein kichiuayaj. Maski tein kichiuayaj kuali yetoya Jiova amo kiyolpaktij (Mat. 6:1-4).

15. ¿Keniuj uelis yeski yekmelauj tiyolkualmej?

¹⁵ Sayoj uelis yeski yekmelauj tiyolkualmej komo keman tikinpaleuiaj oksekin inintech titanemiliaj yejuan uan amo tejuan. Monekiskia timotajtaniskej: “¿Ueliskia nikijtos ke amo sayoj nikmati toni tein kuali, ta no nikchiua? ¿Keyej nikchiua tein kuali?”.

16. ¿Toni moneki tikchiuaskej mojmostaj, uan keyej?

¹⁶ Maj amo tiknemilikan ke komo timoauijkejya senkis tikpiajya “chipauak talnamikilis”, uan ke amo monekiok tikchiuaskej nion se taman. “Chipauak talnamikilis” kemej yeskia se taken tein moneki tikitaskej maj kuali  yeto. Yejua ika, mojmostaj moneki tiktemoskej keniuj okachi tiknextiskej kualneskayomej tein iespíritu Dios techpaleuia maj tikpiakan. ¿Keyej? Porin Jiova se Dios akin nochipa tekititok uan iespíritu no ijkon (Gén. 1:2). Nejin kijtosneki ke nochi kualneskayomej tein iespíritu Dios techpaleuia maj tikpiakan, uelis kichiuas uan moneki techolinis maj tikchiuakan teisa. Kemej neskayot, tatitanil Santiago kijkuiloj: “Se itakuautamatilis amo teyi ipatiu komo amo [se] kinextijtinemi […] ika ne kuali tatakamatilis” (Sant. 2:26). Uan no ijkon uelis tikijtoskej ika okseki kualneskayomej tein iespíritu Dios techpaleuia maj tikpiakan. Nochipa keman tiknextiaj se kualneskayot, tiknextiaj ke iespíritu Dios techpaleuijtok.

17. ¿Toni uelis tikchiuaskej keman amo tiknextiskej kualneskayomej kemej monekiskia?

¹⁷ Hasta sekin akin miak xiujmejya moauijkej, kemansa amo kinextiaj kualneskayomej kemej monekiskia. Sayoj ke tinochin moneki tiksentokaskej timochikauaskej tiknextiskej nejon kualneskayomej. Maj tiktalikan se neskayot. Komo se totaken tein okachi tikuelitaj tepitsin tsayani melauj ke amo niman tiktamotaj, ta xa tiktemouaj keniuj tikyektaliskej komo ueli. Uan xa okachi tikitaskiaj maj amo oksepa tsayaniok. No ijkon komo kemansa amo semi tikualtakamej iuan aksa, tiyolijsiuij uan amo tiknextiaj ke tiktasojtaj kemej monekiskia, maj amo timosenkauakan. Komo tikiluiaj maj techtapojpolui, xa tapaleuis maj tikyektalikan tein tikchiujkej uan maj oksepa kuali timouikakan iuan. Uan no, maj timochikauakan okachi kuali tiknextiskej nejon kualneskayomej.

18. ¿Toni uelis senkis tikneltokaskej?

¹⁸ ¡Semi tiktasojkamatij maj Jesús techkauiliani se kuali neskayot! Keman okachi titanemiliskej kemej Jesús, okachi amo ouij techkisas tikchiuaskej kemej yejua. Uan ijkon okachi tiknextiskej “chipauak talnamikilis”. Itech nejin tamachtilis sayoj ika titajtojkej naui kualneskayomej tein iespíritu Dios techpaleuia maj tikpiakan. Sayoj ke kuali yeskia maj timomachtikan okseki kualneskayomej, uan ijkon tikitaskej ox uelis okachi kuali tiknextiskej. Tikajsiskej seki tamachtilismej tein semi tepaleuiaj itech amaix Nepaleuil tein ika momachtiaj itaixpantijkauan Jiova, kampa kijtoua “Nemilis tein Dios kipaktia”, itech taxelol “Itakilo espíritu”. Uelis senkis tikneltokaskej ke komo timochikauaj timotaliliskej “chipauak talnamikilis” uan nochipa tikpiaj, Jiova techpaleuis.