1. Kuyini okwenza sibe lobuntu obuthile?

 SONKE siyafisa ukuba lobuntu obuthandwa nguJehova kungelani lokuthi silesikhathi esinganani sibhabhathiziwe. Okuzasinceda ukuthi sibe lobuntu obunjalo yikunanzelela izinto esizicabangayo. Kungani sisitsho njalo? Ngoba ubuntu bethu buya ngalokho esikucabangayo. Nxa sihlala sicabanga ngokusuthisa izifiso zethu zenyama sizakhuluma futhi senze izinto ezimbi. (Efe. 4:17-19) Kodwa nxa singahlala sicabanga okuhle, sizakhuluma futhi senze izinto ezithokozisa uJehova uBaba wethu.—Gal. 5:16.

2. Yiphi imibuzo esizayiphendula esihlokweni lesi?

² Esihlokweni esidlulileyo sibonile ukuthi asingeke siyivimbe yonke imicabango emibi. Kodwa siyenelisa ukukhetha ukungenzi lokho esikucabangayo. Singakabhabhathizwa kumele sihle siyekele ukukhuluma lokwenza izinto uJehova azizondayo. Lokhu yikho okokuqala futhi okuqakatheke kakhulu okumele sikwenze ukuze sihlubule ubuntu obudala. Kodwa ukuze sithokozise uJehova ngokupheleleyo kumele silalele umlayo othi: “Ligqoke ubuntu obutsha.” (Kol. 3:10) Esihlokweni lesi sizaphendula imibuzo elandelayo: Kuyini “ubuntu obutsha”? Singabugqoka njani njalo singabuhlubuli?

3. Kuyini “ubuntu obutsha” njalo sibugqoka njani? (UGalathiya 5:22, 23)

³ “Ubuntu obutsha” yikucabanga lokwenza izinto ngendlela kaJehova. Umuntu ugqoka ubuntu obutsha ngokutshengisa izithelo zomoya ongcwele kaNkulunkulu.  Uvumela umoya ongcwele ukuthi uqondise indlela acabanga lazizwa ngayo lenza ngayo izinto. (Bala uGalathiya 5:22, 23.) Ngokwesibonelo, uyamthanda uJehova kanye labantu bakhe. (Mat. 22:36-39) Uhlala ethokoza lanxa esehlelwa zinhlupho. (Jak. 1:2-4) Uhlala esenza ukuthi kube lokuthula. (Mat. 5:9) Uyabekezela njalo ulomusa. (Kol. 3:12, 13) Uyakuthanda ukwenza okuhle. (Luk 6:35) Lokho akwenzayo kutshengisa ukuthi ulokholo oluqinileyo kuYise osezulwini. (Jak. 2:18) Kavuki ngolaka nxa ecatshulwa njalo uyazibamba nxa elingwa.—1 Khor. 9:25, 27; Tit 3:2.

4. Kungani kumele sibe lezithelo zonke eziqanjwe kuGalathiya 5:22, 23 lakwamanye amavesi nxa sifuna ukugqoka ubuntu obutsha?

⁴ Nxa sifuna ukugqoka ubuntu obutsha kumele sibe lezithelo zomoya zonke eziqanjwe kuGalathiya 5:22, 23 lakwamanye amavesi. * Izithelo lezi azifanani lempahla ongazigqoka utshiye ezinye kodwa zigqokwa zonke ngasikhathi sinye njengesudu. Phela ezinye izithelo lezi zihamba ndawonye. Ngokwesibonelo, nxa simthanda sibili umakhelwane sizambekezelela njalo sibe lomusa kuye. Kanti njalo nxa sifuna ukuba ngabantu abahle kumele sibe mnene futhi sizibambe.

5. Kutshoni ‘ukuba lengqondo kaKhristu’ njalo kungani kumele sifunde ngoJesu? (U-1 Khorinte 2:16)

⁵ Bala u-1 Khorinte 2:16. Kumele ‘sibe lengqondo kaKhristu’ ukuze sigqoke ubuntu obutsha. Lokhu kutsho ukuthi kumele sifunde indlela uJesu acabanga ngayo besesimlingisela. UJesu utshengisa izithelo zomoya ongcwele kaNkulunkulu ngokupheleleyo futhi utshengisa ubuntu bukaJehova bunjengoba bunjalo. (Heb. 1:3) Nxa singacabanga njengoJesu sizamlingisela kuhle njalo sizaphumelela ukuba lobuntu obunjengobakhe.—Flp. 2:5.

6. Kuyini okumele sikukhumbule nxa sizama ukugqoka ubuntu obutsha?

⁶ Singenelisa yini ukumlingisela uJesu? Ungacabanga ukuthi ngeke wenelise ukumlingisela ngoba yena kalasono. Nxa kunjalo nanku okungamelanga ukukhohlwe.  Okokuqala, wadalwa usenelisa ukuba njengoJehova loJesu. Yikho ungenelisa ukubalingisela lanxa ungeke ukwenze ngokupheleleyo lokho. (Gen. 1:26) Okwesibili, umoya ongcwele kaNkulunkulu ulamandla ukwedlula loba yini esemhlabeni njalo uzakuncedisa ukuthi wenze izinto obungeke uzenze ngawakho amandla. Okwesithathu, uJehova kalindelanga ukuthi uzitshengise ngokupheleleyo izithelo zomoya ongcwele khathesi. Phela kuzathatha iminyaka engu-1 000 ukuthi uBaba wethu osithandayo ancedise labo abazaphila emhlabeni ukuthi babe ngabantu abapheleleyo. (Isam. 20:1-3) Akufunayo khathesi yikuthi sizame ukwenza okusemandleni ethu njalo sithembele kuye ukuthi asincedise.

7. Sizaxoxa ngani esihlokweni lesi?

⁷ Singamlingisela njani uJesu? Sizakhuluma ngezithelo zomoya ezine. Sizabona ukuthi sifundani endleleni uJesu atshengisa ngayo ukuthi ulezithelo zomoya lezo. Kanti njalo sizabona imibuzo ezasinceda sizihlole ukuthi senza njani endabeni yokugqoka ubuntu obutsha.

8. UJesu watshengisa njani ukuthi uyamthanda uNkulunkulu labantu?

⁸ UJesu uyamthanda kakhulu uJehova yikho wazinikela ukuthi enze intando kaYise kanye lalokho okwakuzanceda thina. (Joh. 14:31; 15:13) Lokho akwenza ngesikhathi esemhlabeni kwatshengisa ukuthi uyabathanda sibili abantu. Nsuku zonke wayetshengisa ukuthi uyabathanda lokuthi uyabazwela ngitsho lalapho abanye bemphikisa. Indlela eqakathekileyo atshengisa ngayo ukuthi uyabathanda yikubafundisa ngoMbuso kaNkulunkulu. (Luk. 4:43, 44) Waphinda watshengisa ukuthi umthanda kakhulu uNkulunkulu labantu ngokuvuma ukubulawa kabuhlungu yizoni. Lokhu kwenza sonke saba lethemba lokuthola ukuphila okungapheliyo.

9. Singatshengisa njani ukuthi siyabathanda abanye njengoJesu?

⁹ Sazinikela kuJehova njalo sabhabhathizwa ngenxa yokuthi siyamthanda uBaba wethu osezulwini. Yikho lathi njengoJesu kumele sitshengise ukuthi siyamthanda uJehova ngendlela esiphatha ngayo abanye. Umphostoli uJohane wabhala wathi: “Lowo ongamthandiyo umfowabo ambonileyo ngeke amthande uNkulunkulu angakaze ambone.” (1 Joh. 4:20) Nansi imibuzo esingazibuza yona: ‘Sengibathanda kakhulu yini abantu? Ngiyabazwela yini abantu lanxa bengelamusa kimi? Ngiyasisebenzisa yini isikhathi sami lezinto engilazo ukuthi ngincede abanye bafunde ngoJehova? Ngizimisele yini ukukwenza lokhu lanxa abanengi bengelandaba lengikwenzayo njalo bengiphikisa? Ngingazama yini ukwengeza isikhathi engisiqeda emsebenzini wokwenza abafundi?’—Efe. 5:15, 16.

10. UJesu wenzani ukuze enze ukuthi kube lokuthula?

¹⁰ UJesu wayethanda ukuthi kube lokuthula. Kazange aphindisele lapho abantu bemphatha kubi. Kodwa wenza okudlula lapho. Wenza ukuthi kube lokuthula njalo wakhuthaza abanye ukuthi balungise ingxabano zabo. Ngokwesibonelo, wabafundisa ukuthi nxa befuna uJehova amukele imihlatshelo yabo kumele benze ukuthi kube lokuthula phakathi kwabo labafowabo. (Mat. 5:9, 23, 24) Kanti njalo wayehlala enceda abaphostoli ukuthi bekele ukuphikisana ngokuthi ngubani owayemkhulu phakathi kwabo.—Luk. 9:46-48; 22:24-27.

11. Singenzani ukuze kube lokuthula?

¹¹ Nxa sifuna ukwenza ukuthi kube lokuthula, akumelanga sixwaye ukubangela ingxabano kuphela kodwa kumele kube  yithi esiqalayo ukwenza ukuthi kube lokuthula njalo sikhuthaze abafowethu labodadewethu ukuthi balungise ingxabano zabo. (Flp. 4:2, 3; Jak. 3:17, 18) Singazibuza imibuzo elandelayo: ‘Ngizimisele yini ukulahlekelwa ngokuthile ukuze ngenze ukuthi kube lokuthula? Ngiyambambela isikhwili yini umzalwane ongizwise ubuhlungu? Ngiyaqala yini ukwenza ukuthi kube lokuthula lanxa kuyimi engonelweyo? Nxa kusenza ngiyabakhuthaza yini abangazwananiyo ukuthi benze kube lokuthula?’

12. UJesu watshengisa njani ukuthi ulomusa?

¹² UJesu wayelomusa. (Mat. 11:28-30) Watshengisa ukuthi ulomusa ngokubaphatha kuhle abanye langokuba ngumuntu ozwisisayo lanxa kwakunzima ngezinye izikhathi. Ngokwesibonelo, owesifazana waseFenikhiya wamncenga ukuthi asilise indodakazi yakhe. Ekuqaliseni wala kodwa kwathi owesifazana lo esetshengise ukholo oluqinileyo, wamtshengisa umusa ngokwelapha indodakazi yakhe. (Mat. 15:22-28) Lanxa uJesu wayelomusa wayengayekeli ukunika abanye iseluleko. Ngezinye izikhathi wayetshengisa umusa ngokuqinisa isandla kulabo ayebathanda. Ngokwesibonelo, ngesikhathi uPhetro ezama ukumvimba ukuthi enze intando kaJehova, uJesu wamkhuza phambi kwabanye abafundi. (Mak. 8:32, 33) Lokhu kakwenzanga ukuze ayangise uPhetro kodwa wayefuna ukumfundisa njalo axwayise abanye abafundi ukuthi bangenzi izinto abangelalungelo lokuzenza. Akuthandabuzwa ukuthi uPhetro wayangeka kodwa ukukhuzwa lokhu kwamnceda.

13. Singatshengisa njani ukuthi silomusa?

¹³ Ngezinye izikhathi ungabatshengisa umusa labo obathandayo ngokubatshela iqiniso ungababhodi. Nxa usenza lokho lingisela uJesu ngokusebenzisa iseluleko esivela eLizwini likaNkulunkulu. Khuluma kuhle labo, ungabacabangeli okubi kodwa themba ukuthi nxa bemthanda uJehova njalo bekuthanda lawe bazasilalela iseluleko sakho. Zibuze imibuzo le: ‘Ngilaso yini isibindi sokukhuluma nxa ngibona umuntu engimthandayo esenza into embi? Nxa nginika omunye iseluleko ngikhuluma ngendlela elomusa yini kumbe ngikhuluma ngolaka? Kuyini okwenza nginike abanye iseluleko? Ngibeluleka ngoba bayangicaphula yini kumbe ngifuna ukubanceda?’

14. UJesu ukwenza njani okuhle?

¹⁴ UJesu uyakwazi okuhle futhi uyakwenza. Uyamthanda uYise yikho uhlala esenza okuqondileyo elenhloso eyiyo. Ubuhle bukhanya nxa sihlala sidinga indlela zokuncedisa abanye futhi sibenzela okuhle. Akwenelanga ukuphongukwazi okuqondileyo okumele sikwenze, kumele sikwenze njalo sikwenze silenhloso eyiyo. Omunye angazibuza ukuthi kungenzakala yini ukuthi umuntu enze into eqondileyo kodwa elenhloso ezingayisizo. Ye, kungenzakala. Ngokwesibonelo, uJesu wakhuluma ngabanye ababenika abayanga izipho kodwa besenzela ukubukwa. Ababekwenza kwakukuhle kodwa kwakungatsho lutho kuJehova.—Mat. 6:1-4.

15. Kuyini okutshengisa ukuthi singabantu abahle?

¹⁵ Singaba ngabantu abahle kuphela nxa sisenza izinto eziqondileyo silenhloso ezinhle. Zibuze: ‘Ngiyakwazi yini okuqondileyo okumele ngikwenze futhi ngiyakwenza yini? Kuyini okwenza ngenze izinto ezinhle?’

16. Kuyini okumele sikwenze nsuku zonke njalo kungani?

¹⁶ Akumelanga sicabange ukuthi ukugqoka ubuntu obutsha kuyaphela nxa singabhabhathizwa. Ubuntu obutsha bufanana lesigqoko esitsha okumele sisigcine sisesimeni esihle. Lokhu singakwenza ngokudinga indlela zokutshengisa izithelo zomoya ongcwele kaNkulunkulu nsuku zonke. Kungani kumele senze njalo? Ngoba uJehova uNkulunkulu uhlala esebenza njalo umoya wakhe ungamandla asebenzayo. (Gen. 1:2) Yikho kumele isithelo somoya ngasinye sisifuqe ukuthi senze okuthile. Ngokwesibonelo, umfundi uJakhobe wabhala wathi: ‘Ukholo olungelamisebenzi lufile.’ (Jak. 2:26) Singatsho okufananayo langezinye izithelo zomoya kaNkulunkulu. Sonke isikhathi nxa sitshengisa izithelo zomoya kuyabe kukhanya ukuthi umoya kaNkulunkulu uyasebenza kithi.

17. Kuyini okumele sikwenze nxa singehluleka ukutshengisa izithelo zomoya?

¹⁷ AmaKhristu aseleminyaka eminengi ebhabhathiziwe lawo ayake ehluleke ukutshengisa izithelo zomoya. Kodwa okuqakathekileyo yikuthi angakhalali. Cabanga ngomzekeliso olandelayo. Nxa isigqoko osithandayo singadabuka uyahle usilahle yini? Hatshi. Uyazama ukusithunga nxa kusenza. Ngemva kwalokho uyabe usunanzelela ukuze singadabuki futhi. Ngendlela efananayo ungapheli amandla nxa ungehluleka ukuba lomusa lokubekezela lokutshengisa uthando komunye umuntu. Nxa ungaxolisa ngenhliziyo yonke ungalungisa umonakalo njalo uphinde ube lobudlelwano obuhle lalowo omphambanisileyo. Zimisele ukungakuphindi okwenzileyo.

18. Kuyini esingaqiniseka ngakho?

¹⁸ Siyasibonga sibili isibonelo esasitshiyelwa nguJesu. Nxa singaqhubeka silingisela indlela ayecabanga ngayo kuzabalula ukuthi senze njengaye. Nxa singaqhubeka sisenza njengoJesu kuzabalula ukuthi sigqoke ubuntu obutsha. Esihlokweni lesi sixoxe ngezithelo zomoya kaNkulunkulu ezine kuphela. Uzancedakala nxa ungazinika isikhathi sokufunda ngezinye ubusuzihlola ukuthi uzitshengisa kangakanani. Uzathola izihloko ezikhuluma ngendaba le e-Bhukwini Lokuchwayisisa LaboFakazi BakaJehova ngaphansi kwesihloko esithi “Ukuphila KwamaKhristu” engxenyeni ethi “Izithelo Zomoya.” Ungaqiniseka ukuthi nxa ungazama ukugqoka ubuntu obutsha njalo uhlale ubugqokile uJehova uzakuncedisa..