1. Ngocapi ciro cokutanga cinopsasa maningi undhu hwedu?

 AZVINENYI dangani takabhabhatijwa wari kana taanomakore akawanda, tese hedu tinoda kuva no undhu hunodiwa ndi Jehovha. Kuti tive no undhu hwakadaro tinodikana kungwarira murangariro wedu. Ngenyi? Ngokuti undhu hwedu unopsaswa maningi ngo zviya zvatinorangarira. Kudari tikapeja mukuvo wakareba maningi tecirangarira zviro zvokunyama, zvatinoita no zvatinonanga zvinozova zvakashata. (Vaefeso 4:17-19) Ngo divi rimweni, kudari tikazaja murangariro wedu ngo zviro zvaushoni, tinozokwanisa kuvereketa no kuita zviro mu njira inodakajisa Baba wedu, Jehovha.—Vagaratiya 5:16.

2. Muvhunjo japi jatinozodavira pa musoro uwu?

² Inga zvatakavona pa musoro wakaperaya, itusu atingakwanisi kuita kuti titame kuva no murangariro jakashata. Asi tingasana kutama kuita mukuzwirana no murangariro jondhojo. Ticito tikabhabhatijwa, takadikana kuima kuvereketa no kuita zviro mu njira inonyangajisa Jehovha. Ici iciro cokutanga no cinosisira maningi catinodikana kuita kuti tivhise undhu hwokare. Kuti tidakajise Jehovha mukuperera, tinodikana kuzwira mupango wokuti: “Simiranyi undhu hupsa.” (Vakorose 3:10) Pa musoro uwu, tinozodavira muvhunjo iji: Icinyi “undhu hupsa”? Tingaitisa kudini kuti tienderere mberi tecisimira undhu hupsa no kuramba tinawo?

3. Takacijikira pana Vagaratiya 5:22, 23, icinyi “undhu hupsa”? Mundhu angakhombijisa kudini kuti anahwo?

³ Mundhu ano “undhu hupsa” anotevejera undhu hwa Jehovha. Iyena anousimira ngo kuvonesa mucero yo mujimu wa Mwari, wotendera kuti mujimu mucena upsase murangariro,  mazwiro no zviito zvake. (Verenganyi Vagaratiya 5:22, 23.) Inga muezaniso, iyena anoda Jehovha no vandhu vake. (Mateu 22:36-39) Mundhu wakadaro anodakara pikija ecisongana no zvineso. (Jakobo 1:2-4) Iyena mundhu anoita runyararo. (Mateu 5:9) Anosengerera no kunaka mwoyo no vamweni. (Vakorose 3:13) Anodakarira zvaushoni no kuzviita. (Ruka 6:35) Anokhombija ngo zviito zvake kuti iyena ano rutendo hwakavanga kuna Baba wake vo kudenga. (Jakobo 2:18) Anoenderera mberi wakapfava pikija akaambihwa no kukhombija kujibata paanoeja.—1 Vakorinte 9:25, 27; Tito 3:2.

4. Ngenyi tinodikana kukhombija mugariro jese jinonangwa pana Vagaratiya 5:22, 23, no mugariro jimweni jinonangwa mu mativi amweni o Bhaibheri kuti tikwanise kusimira undhu hupsa? Sananguranyi.

⁴ Kuti tisimire undhu hupsa, tinodikana kukhombija mugariro jese jinonangwa pana Vagaratiya 5:22, 23 no mugariro jimweni jinonangwa mu mativi amweni o Bhaibheri. * Mugariro iji ajizivi kuezana no nguvo jatinosimira imwe nga imwe pa yega. Zvokadi kamare, mativi o mugariro iji anowanika pa mugariro jimweni. Inga muezaniso, kudari tinonasa kuda vadoni vedu, tinozokwanisa kuva vandhu vanosengerera no kuvaitira unyasha. Kudari muri mundhu waushoni, munova mundhu wakapfava no anojibata.

5. Zvinoda kurevenyi ‘kurangarira inga ndi Kristu’? Ngenyi tinodikana kujija ngo pamusoro po upenyu hwa Jesu? (1 Vakorinte 2:16)

⁵ Verenganyi 1 Vakorinte 2:16. Kuti tisimire undhu hupsa, tinodikana ‘kurangarira inga ndi Kristu.’ Ngo magama amweni, tinodikana kujijira kurangarira inga ndi Jesu no kumutevejera. Jesu wakakhombija mucero yo mujimu wa Mwari mu njira yakaperera. Mukuezana no supeya, iyena wakakhombija mugariro ja Jehovha kamare. (Vahebheru 1:3) Kudari tikarangarira inga ndi Jesu, tinozoita zviro inga ndiyena kamare no kubudirira pa kukhombija undhu hwake.—Vafiripi 2:5.

6. Ngozvapi zvatinodikana kueja kurangarira patinonga tecisimira undhu hupsa?

⁶ Zvinokwanisa kamare kutevera muezaniso wa Jesu? Kangaije mungarangarira kudari: ‘Jesu wainga wakakwana. Inini andizokwanisi kuita inga ndiyena kamare.’ Kudari muno mazwiro aya, ceukijanyi zviro izvi. Cokutanga, itusu takasikwa ngo muezaniso wa Jehovha na Jesu. Ngo kudaro, tingakwanisa  kuvatevejera, totobudirira mbhera pakati kuti. (Genesi 1:26) Cocipiri, mujimu mucena wa Mwari isimba rakakura maningi nyezuru no pasi. Ngo besero rawo, munozokwanisa kuita zviro zvomucikakwanisi kuita mwega. Cocitatu, Jehovha aaveteri kuti tikhombije mucero wo mujimu mu njira yakaperera kamare wari uno. Zvokadi, Baba wedu vano rudo vakagaja ciuru co makore, kuno vese vano vetero yo kuzopona pasi pano kuti vave vandhu vakakwana. (Apokaripsi 20:1-3) Jehovha anoda kuti tieje kuita zvese zvatinokwanisa wari uno no kuthemba besero rake.

7. Ngozvapi zvatiri kuda kuvona wari?

⁷ Tingatevejeresa kudini Jesu? Tiri kuda kuvona mativi marongomuna o mucero wo mujimu wa Mwari. Pa mativi aya tiri kuda kuvona kuti ngozvapi zvatinojija, ngo manera Jesu wakakhombija mugariro iji. Patinonanga teciita kudaro, tinozovona muvhunjo munganani jinozotibesera kuvona manera atingasimira undhu hupsa.

8. Jesu wakakhombijisa kudini rudo?

⁸ Zvecivoneka kuti Jesu waida maningi Jehovha iyena wakajipira kuna Baba wake no kwatiri. (Johani 14:31; 15:13) Iyena wakakhombija kuti waida maningi vandhu ngo manera aaipona pasi pano. Njiku imwe nga imwe, iyena waikhombija rudo no usizi, pikija vandhu vamweni vainga vacikamudakariri. Njira inosisira maningi yaakakhombija rudo hwake kuno vandhu, ngo yo kuvajijisa ngo pamusoro po Umambo hwa Mwari. (Ruka 4:43, 44) Jesu wakakhombijazve rudo hwake hwo kujipira kuna Mwari no kuno vandhu ngo kutendera kutambujika no kuurawa ngo vashaishi. Izvi zvakaita kuti tese tiwane upenyu ucingaperi.

9. Tingatevejeresa kudini Jesu pa kukhombija rudo?

⁹ Itusu takajipira kuna Jehovha no kubhabhatijwa ngokuti tinoda Baba wedu vo kudenga. Ngo kudaro, inga ndi Jesu tinodikana kukhombija rudo kuna Jehovha ngo manera atinotaja vandhu. Mupostori Johani wakatara kuti: “Ngokuti wiya acingadi hama yake, yaanovona, aakwanisi kuda Mwari waacikavoni.” (1 Johani 4:20) Tingajivhunjisa kudari: ‘Ndiri mundhu ano rudo hwakavanga no vandhu? Ndinoitira usizi vandhu vamweni, pikija ivona vacikanditaji ushoni? Rudo hwondhowo, unondiita kuti ndishandise nguva yangu no zviro zvangu kuti ndivabesere kujija ngo pamusoro pa Jehovha? Ndinokwanisa kuita izvi pikija vandhu vamweni avabongeseri kuvangisira kwangu kana pavanonga vecindishora? Ndinowana njira jo kupeja mukuvo wakawanda ndeciita basa ro kuita vajiji?’—Vaefeso 5:15, 16.

10. Jesu wakaitisa kudini kuti ave mundhu anoita runyararo?

¹⁰ Jesu wainga mundhu waiita runyararo. Vandhu pavaimutaja ngo njira yakashata, iyena aacaihwirijira ushaishi ngo ushaishi. Asi waiita zvizinji kupinda izvi. Iyena waitema civaringo co kuita runyararo no kuvangisa vamweni kuti vatonge zvineso zvavo. Inga muezaniso, iyena wakajijisa vandhu kuti vanodikana kuita runyararo no hama yavo, kudari vecida kuti kunamata kwavo kutendehwe ndi Jehovha. (Mateu 5:9, 23, 24) Iyena wakabesera vapostori vake ko vhaza jakawanda kuti vatonge zvineso zvavo ngo pamusoro po kuti ndiyani wavo wainga mukuru.—Ruka 9:46-48; 22:24-27.

11. Ngozvapi zvatingaita kuti tive vandhu vanoita runyararo?

¹¹ Kuti tive mundhu anoita runyararo tinodikana kuita zvizinji kusiyapo kunyenya kunesana. Tinodikana kutanga kuita runyararo no vamweni. No kuvangisa hama no hambzaji jedu kuti vatonge zvineso zvavo. (Vafiripi 4:2, 3; Jakobo 3:17, 18) Tingajivhunjisa kudari:  ‘Ngozvapi zvandinodikana kusiya kuti ndiite runyararo no vamweni? Kudari hama kana hambzaji ikananga zviro zvandinyangajisa, kureva kuti ndinozogara ndakanyangajwa naiyona? Ndinovetera kuti mundhu umweni atange kuita runyararo kana ndini ndinodikana kutanga kuita runyararo pikija ndecivona kuti mundhuwo ndiyena waitisa zvinesozvo? Kudari zvecidikana weya, ndinovangisa vaya vano zvineso kuti vaite runyararo ngocavo?’

12. Jesu wakakhombijisa kudini kunaka mwoyo?

¹² Jesu wainga mundhu wakanaka mwoyo. (Mateu 11:28-30) Iyena wakakhombija kunaka mwoyo ngo kuva mundhu anokhwederereka no wakaezanana pikija wainga ecisongana no mugariro jinonesa. Inga muezaniso, mwanakaji wo Finisiya paakamudeketerera kuti aende korapa mwana wake, pakutanga iyena wakaramba zvaikumbihwari ngo mwanakaji uwu. Asi paakavona kuti mwanakaji uwu wainga ecikhombija rutendo hwakakura, Jesu wakatendera kurapa mwana wake. (Mateu 15:22-28) Pikija kuti Jesu wainga wakanaka mwoyo, iyena waipekejavo mbhangiro. Nguva jimweni, waikhombija kunaka kwake mwoyo ngo kupangira vaya vaaida. Inga muezaniso, Pedhru paakaeja kurembesa Jesu kuita zvainga zvecida Jehovha, Jesu wakamupangira pamberi po vajiji vamweni. (Marko 8:32, 33) Iyena aazivi kuita izvi kuti anyoweje Pedhru, asi wainga ecimujijisa no kungwaja vajiji vamweni kuti vatame kuva vandhu vanojikuja. Atikani-kani kuti Pedhru wakanyowejeka padoko, asi wakabesereka maningi ngo mbhangiro iyi.

13. Tingaitisa kudini kuti tive vandhu vakanaka mwoyo?

¹³ Kuti tive vakanaka mwoyo kuno vese vayani vatinoda, nguva jimweni tinodikana kuvapa mbhangiro. Patinoita kudaro, tinodikana kutevejera Jesu, ngo kucijikira mbhangiro yedu mu ndhungamiriro jinovha mu Soko ra Mwari. Ivanyi mundhu wakaezana. Tenderanyi kuti ivona vanoda kuita zvaushoni no kuthemba kuti vese vaya vanoda Jehovha no kuda imwimwi vanozotendera mbhangiro yo rudo yamunozovapa. Jivhunjisenyi kudari: ‘Ndino cicunge co kubhuya ciri cese pandinovona kuti mundhu wandinoda ari kuita cakashata? Kudari ndecidikana kupekeja mbhangiro, ndinobhuya ngo njira yo kunaka mwoyo kana ndinobhuya ngo njira yo hasha? Ngozvapi zvinondiita kuti ndipe mbhangiro? Ndinopa mbhangiro ngokuti ndinonga ndakanyangajwa no mundhuwo kana ndinonga ndecimubesera kuti aite zvakanaka?’

14. Jesu wakakhombijisa kudini kuva mundhu wakanaka?

¹⁴ Jesu aacaiziva basi zviro zvakanaka, asi waiita zviro zvakanaka. Iyena waida Baba wake. Ngo kudaro, nguva jese waiita zviro zvaushoni no thangwe rakanaka. Mundhu wakanaka nguva jese anopsaka njira jo kubesera vamweni no kuvaitira zviro zvaushoni. Azvikwani kuziva kuti izvi izviro zvakanaka zvo kuita asi tinodikana kuita zvakanaka no thangwe rakanaka. Mundhu angajivhunjisa kudari: ‘Zvingakwanisika kuita zviro zvakanaka no thangwe rakashata?’ Hina zvingakwanisika. Inga muezaniso, Jesu wakabhuya ngo pamusoro pa vaya vanopa zvipo varombo. Asi ivona vanozviita kuti vavoniwe ngo vamweni kuti vakwanise kusimbwa ndivona. Pikija kuti mabasa aya akanaka, Jehovha aadakajihwi ndiwona.—Mateu 6:1-4.

15. Tingaitisa kudini kuti tive mundhu wakanaka?

¹⁵ Tingava vandhu vakanaka, kudari tikaita zviro zvaushoni ngo thangwe rakanaka. Ngo kudaro mungajivhunjisa kuti: ‘Kureva kuti ndinoziva ciro cakanaka asi ndotama kucitevera no kuciita? Ngorapi Thangwe rinondiita kuti ndiite zviro zvakanaka?’

16. Ngozvapi zvatinodikana kuita njiku imwe nga imwe? Ngenyi?

¹⁶ Atidikani kurangarira kuti patinopera kubhabhatijwa, tinonga tapera kusimira undhu hupsa zvokuti atidikanizve kuita ciri cese ngo pamusoro pazvo. Undhu hupsa wakadari inga “nguvo imbza” yatinodikana kwenderera mberi tecingwarira. Njira imwe yatingaita ndiyona izvi, ngo yo kupsaka njira jo kukhombija mucero yo mujimu wa Mwari njiku imwe nga imwe. Ngenyi? Ngokuti Jehovha ndi Mwari wo zviito, nokutizve mujimu wake isimba rinoshanda. (Genesi 1:2) Ngo kudaro, divi rimwe nga rimwe ro mucero wo mujimu rinodikana kutiita kuti tiite ciri cese. Inga muezaniso, mujiji Jakobo wakatara kudari: “Rutendo hucinavo mabasa, hwakafavo.” (Jakobo 2:26) Tinganangavo zvakafanana no mugariro jese jo mucero wo mujimu wa Mwari. Pa vhaza imwe nga imwe yatinoukhombija, tinovonesa kuti mujimu wa Mwari uri kushanda mwatiri.

17. Ngozvapi zvatinodikana kuita paya patinokonehwa kukhombija mucero yo mujimu?

¹⁷ Pikija Mukristu wakabhabhatijwa ko makore akawanda, nguva jimweni iyena angakonehwa kokhombija mucero iyi yo mujimu. Asi cinosisira maningi i kutama kuremba. Vonanyi muezaniso uwu basi. Kudari imwimwi mukasimira nguvo yamunodakarira maningi, asi moipsipisa kureva kuti maizoisveja? Haiwa. Maizoita zvese zvamunokwanisa kuti muipaje, kudari zvecikwanisika weya. Pa vhaza jinotevera munozongwarira kuti mutame kuipsipisazve. Mukuezanavo, Kudari mukakhonehwa kuva mundhu wakanaka mwoyo, anosengerera kana ano rudo no mundhu ari wese, mucadoremba. Kumbiranyi kuregerehwa. Mukadaro, munozova no ushamwari hwakavanga no mundhu wondhowo. Motema civaringo co kutama kuitazve zvondhozvo.

18. Mungava no cokwadi cenyi?

¹⁸ Itusu tinobonga maningi ngo muezaniso watakagajihwa ndi Jesu. Patinotevejera manera okurangarira a Jesu, zvinozotirerukira kuti tiitevo inga ndiyena. Patinoita kudaro, atizonesehwi kuti tisimire undhu hupsa. Pa jijo iyi, tavona mativi marongomuna o mucero yo mujimu wa Mwari. Ngenyi amupsaki nguva kuti mujije ngo mativi amweni o mucero yo mujimu no kurangarira manera amunganasa kuikhombija? Mungawana munda-nda-nda yo musoro unobhuya ngo shwiro iyi mu Bhuku ro Kupsakisisa ro Zvapupu zva Jehovha pa divi rinoti, “Upenyu hwo CiKristu” moenda pamweni panoti, “Mucero jo Umwari.” Mungava no cokwadi co kuti kudari mukaita divi renyu, Jehovha anozomubesera kuti musimire undhu hupsa no kuramba munahwo.