1. Ekindu kikulu ekikabindula kutse erilendya emibere yetu niki?

 NOMO hangabya ihamabilaba biro bike kutse emyaka mingyi itwabiribatisibwa, itwe bosi twanzire eribya n’omuhanda w’emibere y’abandu abo Yehova anzire. Eritoka erikola tutya tutolere itwateya amalengekania wetu. Busanaki? Kundi ekindu kikulu ekikalendaya emibere yetu yo kutsibu w’amalengekania wetu. Twamabibeghera eribya tukalengekania ngoko twangayitsemesya itw’ibene-bene, itukendibya tukabugha n’erikola ebituwene. (Efe. 4:17-19) Oko lundi luhande, twamabya tukalengekania oko bindu ebyuwene, itwanganabya n’emibughire n’emikolere eyikatsemesaya Tata wetu, Yehova.​—Gal. 5:16.

2. Ni mabulyo wahi awo tukendisubiryako omo mwatsi ono?

² Ngoko twalangira omo mwatsi owalaba, sitwangatoka erikakirya emyatsi yosi eyituwene eringira omo malengekania wetu. Aliwe twanganasombola eritendikola erikwamana n’amalengekania awali ng’ayo. Embere sy’eribatisibwa, tutolere itwaleka emibughire n’emikolere eyo Yehova aponire. Oyo w’omwatsi w’erimbere kandi ow’omughaso munene ow’erikola tutoke erilusya emibere y’omundu wa kera. Aliwe eritsemesya Yehova yo ndeke, tutolere itwasikya n’ekyalaghiro kino: “Mwambale omundu muhya-muhya.” (Kol. 3:10) Omo mwatsi ono, tukendisubirya oko mabulyo awakwamire ano: Emibere y’“omundu muhya-muhya” niki? Twangambala emibere y’omundu muhya-muhya yo tuti n’eribya nayo mughulu wosi?

3. Erikwamana na Abanya Galatia 5:22, 23, emibere y’“omundu muhya-muhya” niki, n’omundu akambala yo ati?

³ Omundu oyumbite “omundu muhya-muhya” akigha emibere ya Yehova. Omundu akambala emibere y’omundu muhya-muhya  omw’ikangania ekighúma ky’ekirimu ky’oMungu, n’erileka akaghala kabuyirire kasondole amalengekania wiwe, eriyowa liwe, n’emikolere yiwe. (Soma Abanya Galatia 5:22, 23.) Eky’erileberyako, anzire Yehova n’abandu biwe. (Mat. 22:36-39) Omundu oyuli atya akabya iniane n’obutseme nibya n’omughulu akayiyinaya omo maligho. (Yak. 1:2-4) Ni mundu oyukahira h’obuholo. (Mat. 5:9) Akakanganaya abandi b’omutima w’erilindirira n’obwenge. (Kol. 3:13) Anzire ebibuya n’erikolabyo. (Luka 6:35) Akakanganaya omo mategheko wiwe ngoko ikirirye Tata wiwe w’elubula yo kutsibu. (Yak. 2:18) Omughulu abandi bakasonda erilwa naye kutse erimuhitania syaliheraya erihehera liwe, n’omughulu akalengawako akayikakiraya.​—1 Kor. 9:25, 27; Tito 3:2.

4. Eryambala emibere y’omumdu muhya-muhya, twanganakulya emibere eyikanibweko omo Abanya Galatia 5:22, 23 obuli mubere oko ndambi yagho? Kanaya.

⁴ Eryambala emibere y’omundu muhya-muhya, litolere itwakulya emibere yosi eyikanibweko omo Abanya Galatia 5:22, 23 n’omo yindi milondo y’eBiblia. * Emibere eyo siyiri ng’esyongyimba esyo tukambala obuli lukimba oko ndambi yalo. Nibya, emibere mingyi ya kuyo yisosene n’eyindi. Eky’erileberyako, wamabya iwanzire kwenene omuhimbani waghu, iwukendibya ukamukangania omutima w’erilindirira n’obwenge. Kandi eribya mundu mubuya kwenene-kwenene, litolere iwabya mundu oyuhehere kandi oyukayikakiraya.

5. Eribya “n’obulengekania bwa Kristo” ni bughambuki, kandi busanaki litolere itw’igha engebe ya Yesu? (1 Abanya Korinto 2:16)

⁵ Soma 1 Abanya Korinto 2:16. Eryambala emibere y’omundu muhya-muhya, litolere itwabya “n’obulengekania bwa Kristo.” Omo bindi binywa, ni bughambu litolere itwasonda eriminya Yesu ng’akalengekanaya ati n’erikwama emibere yiwe. Yesu akakanganaya ebighúma by’ekirimu ky’oMungu omo nzira eyihika-hikene. Akakanganaya emibere y’oMungu ngoko yine, ng’ekiyo ekyuwene. (Ebr. 1:3) Twamayikasa kutsibu eribya tukalengekania nga Yesu, itukenditoka kutsibu eribya tukakola ng’aye n’eryambala emibere y’omundu muhya-muhya.​—Flp. 2:5.

6. Ni myatsi yahi yo litolere itwibuka omughulu tukayikasa eryambala emibere y’omundu muhya-muhya?

⁶ Kwenene kinatokekene okw’itwe erikwama eky’erileberyako kya Yesu? Twanganalengekania tuti: ‘Yesu ahika-hikene. Sinendisyatoka n’ahake erimusosa olosi!’ Wamabya iko  ukayowa utya, wibuke emyatsi eyikwamire. Ow’erimbere, mowabumbwa omo kisosekanio kya Yehova na Yesu. Nibughambu wanganasombola erigha eky’erileberyako kyabo, kandi wanganatoka eribya ng’abo omo lulengo lulebe. (Enz. 1:26) Ow’akabiri, akaghala akakakola k’oMungu k’akaghala akalengirye ehyosi omo kihugho n’ekyanya kyosi. Omo buwatikya bwako, wanganatoka erikola emyatsi eyo utewangatoka omo butoki bwaghu iwuwene-wene. Ow’akasatu, Yehova syakusabire lino erikangania ebighúma by’akaghala kabuyirire omo nzira eyihika-hikene. Kwenene,Tata wetu w’olwanzo abiriteghekania emyaka 1 000 oko abali n’eriyiketera ly’erisyikala oko kihugho batoke eribya abahika-hikene. (Erib. 20:1-3) Ekyo Yehova akatusaba lino ly’eriyikasa ngoko twangatoka n’eriyiketera obuwatikya bwiwe.

7. Tukasonda erikania okuki?

⁷ Twangan’igha eky’erileberyako kya Yesu kutsibu-tsibu omo myatsi yahi? Tukendikania omo kikuhi oko mibere ini eyo ekirimu kibuyirire ky’oMungu kikatuwatikaya erikulya. Oko buli mwatsi wa kuyo, tukendibya tukalangira enzira eyo Yesu akanganayamo emibere eyo nga twang’igha muyo moki. Kandi tukendikania oko mabulyo malebe awangatuwatikya eriyilebya ngoko twabiriyikasa eryuwania emibere yetu y’omundu muhya-muhya.

8. Yesu mwakangania olwanzo omo nzira syahi?

⁸ Kundi Yesu anzire Yehova yo kutsibu mwakola emyatsi mingyi y’eriyiherera busana na Tata wiwe na busana netu. (Yoa. 14:31; 15:13) Yesu mwakangania kw’anzire abandu bo kutsibu omo nzira ey’akolesayamo amaisa wiwe oko kihugho. Obuli kiro, iniakakanganaya abandu b’olwanzo n’eribakwira obulighe nibya n’omughulu abandi babya bakaghana erimowa. Enzira y’omughaso eyakanganayamo kw’anzire abandu bo kutsibu ly’eribakangirirya omwatsi w’oBwami bw’oMungu. (Luka 4:43, 44) Kandi Yesu mwakangania olwanzo luwe olw’eriyiherera oko Mungu n’oko bandu omughulu aligha eryaghalwa n’erihola omo byala by’abakola-nabi. Omw’ikola atya mwaleka ikyatokekana okw’itwe bosi eribana engebe y’erikota.

9. Oko mwatsi w’erikangania olwanzo, twangakwama eky’erileberyako kya Yesu kyo tuti?

⁹ Motwayiha oko Yehova n’eribatisibwa kundi twanzire Tata wetu w’elubula. Neryo, nga Yesu, litolere itwakangania ko twanzire Yehova erilabira enzira eyo tukakoleramo abandi. Omukwenda Yoane mwahandika ati: “Oyutanzire mulikyabo oyo abirilolako, siangatoka erianza oMungu oyo ate atalolako.” (1 Yoa. 4:20) Twanganayibulya tuti: ‘Nanabirikulya olwanzo oluwatire haghuma n’abandi bandu? Nganakwira abandi b’obulighe, nibya n’omughulu bakanyikolera butsira erisikya? Olwanzo lukananyikuna erikolesya endambi n’ebindu byaghe eriwatikya abandi erigha eriminya Yehova? Nganatsemera erikola nyitya n’omughulu abandu bangyi bakabula erisima ebyo ngakola kutse omughulu bakaghana ebyo ngakola? Nanganabana ehyanya hy’erilabya endambi nene y’omo mubírí w’eriyira abigha?’​—Efe. 5:15, 16.

10. Yesu abya omundu oyukahira h’obuholo ati?

¹⁰ Yesu abya mundu oyukahira h’obuholo. Omughulu abandu babya bakamuwata nabi, mwatabya akaliha ekibi ky’abakamukolera ekibi. Aliwe mwakola bingyi okw’aho. Mwabya akatangirira erihira h’obuholo n’erihira omo bandi mo muhwa w’eribugha eritendihulikirirana lyabo. Eky’erileberyako, mwabakangirirya ati litolere ibakola obuholo haghuma n’abaghala babo bamanza bati Yehova alighe eriramya lyabo. (Mat. 5:9, 23, 24) Kandi mwawatikya abigha biwe bo kangyi-kangyi eribugha obuhaka bw’erisonda eriminya nga nindi yo mukulu omo katikati kabo.​—Luka 9:46-48; 22:24-27.

11. Twangabya abandu abakahira h’obuholo tuti?

¹¹ Eribya mundu oyukahira h’obuholo, siry’eriyihighula  okw’ibya mwendi w’omwagha lisa. Litolere itwayikasa erikola obuholo haghuma n’abandi n’erihira omo baghala n’abali betu m’omuhwa w’eribugha erineghena lyabo. (Flp. 4:2, 3; Yak. 3:17, 18) Twanganayibulya amabulyo ano: ‘Ni bihi byo nyilighire eriherya nitoke erihira h’obuholo haghuma n’abandi? Omughala kutse mwali wetu akabya anyihitania, nganabika ekinigha? Nganalindirira nyiti oghundi atsukisaye ekika ky’erisubya h’obuholo, kutse nganabya ow’erimbere erisubya h’obuholo, nibya n’omughulu ngalengekanaya oghundi nga yulyaleta omwagha? Omughulu kitolere, nganahira omo abatahulikirirene m’omuhwa w’erikola obuholo omo kati-kati kabo?’

12. Yesu mwakangania olukogho lo ati?

¹² Yesu abya n’olukogho. (Mat. 11:28-30) Mwakangania olukogho omw’ibya molo n’oyuwite amalengekania awatolere, nibya n’omo mibere eyikalire. Eky’erileberyako, omughulu omukali Mufoenike amusaba ati alamaye mwali wiwe, oko nzuko, mwatakola ekyamusaba, aliwe abere akangania obwikirirya obuwatire, omo lukogho Yesu mwalamya mwali wiwe. (Mat. 15:22-28) Nomo anabya mundu w’olukogho, Yesu isyaliyikakiraya eriha abandi b’amahano. Oko sindi ndambi iniakakanganaya olukogho omw’ibwira abo abya anzire b’ebiri oko mutima butsira eritika-tika. Eky’erileberyako, omughulu omukwenda Petero asonda erimubuna mutima erikola erisonda ly’oMungu, Yesu mwamuhabula omo meso w’abandi bigha. (Mar. 8:32, 33) Syakola atya busana n’erihemula Petero, aliwe busana n’erimubegherya n’erihana abandi bigha eritendibya bakayilabirirya. Kwenene Petero mwanakwa esisoni syo hake, aliwe mwabana endundi omw’ikunga eryo.

13. Twangakangania olukogho lw’ekwenene tuti?

¹³ Erikangania abo wanzire b’olukogho lw’ekwenene, esindi ndambi kyanganatolera iwababwira ebiri oko mutima butsira eritika-tika. Omughulu ukakola utya, ukwame emibere ya Yesu omw’ibaha amahano awahulikirirene n’eKinywa ky’oMungu. Ubye molo. Wikiriraye ngoko bananzire erikola ebyuwene, kandi ngoko abandu abanzire Yehova kandi naghu bakwanzire bakendiligha amahano awo ukendibaha omo lwanzo. Uyibulaye amabulyo ano: ‘Nganabya n’omuhwa w’eribugha omughulu ngalangira omundu mulebe oyo nyanzire akakola omwatsi mulebe owatuwene? Lyamabya iritolere inateka erihano, nganabugha n’olukogho, kutse ngabugha n’obukali? Niki kyo kikanyikuna eriteka erihano? Nganaha omundu y’erihano kundi nyimuhiteneko, kutse kundi nianzire erimuwatikya?’

14. Yesu mwakangania omubere w’obubuya wo ati?

¹⁴ Yesu asi ebyuwene kandi akakolabyo. Yesu anzire Tata wiwe, neryo obuli kiro akakola ebyuwene inianawite ekileka ekyuwene ekikamukuna erikola atya. Kusangwa obubuya ni mubere owakaminyikala omo mategheko kutse omo mikolere, omundu mubuya akasondekanaya ehyanya hy’eriwatikya abandi kandi akabakolera ebyuwene. Eriminya ekyuwene eky’erikola siritosire, litolere itwakolakyo itunawite ekileka ekyuwene. Omundu anganayibulya ati: ‘Kinatokekene omundu iniakola ekyuwene inianawite ekikamukuna ekituwene?’ Inga, kinatokekene. Eky’erileberyako, Yesu mwakania oko bandu ababya bakahitya ebihembo by’eriwatikya abera aliwe ibakayikasa abandu balangire ekyo bakakola batoke eribapipa. Nomo amategheko ayo anaby’uwene, mwatatsemesya Yehova.​—Mat. 6:1-4.

15. Twangabya n’obubuya bw’ekwenene tuti?

¹⁵ Twanganabya n’obubuya bw’ekwenene-kwenene twamabya tukakola ebyuwene butsira erirondya endundi yetu itw’ibene-bene. Neryo litolere iwayibulya uti: ‘Sinyiritsemera eriminya omwatsi owo nyitolere erikola lisa, aliwe kwenene nganayikasa n’erikolagho? Niki kyo kikanyikuna erikola ebyuwene?’

16. Litolere itwakolaki obuli kiro, kandi busanaki?

¹⁶ Siritolere itwalengekania tuti tukabya twabibatisibwa, itwamabibugha eryambala emibere y’omundu muhya-muhya neryo situkilaghire okw’iyitsinga erikulya emibere eyo. Emibere y’omundu muhya-muhya yiri ng’olukimba luhya-luhya olo tukanza ilwasighala omo mibere eyuwene. Enzira nguma eyangatuwatikya erikola tutya ly’erisondekania obuli kiro ehyanya hy’erikangania ekighúma ekyo ekirimu ky’oMungu kikatuwatikaya erikulya. Busanaki? Kusangwa Yehova ni Mungu oyukakola, n’ekirimu kiwe ni kaghala akakakola. (Enz. 1:2) Neryo obuli mubere owo ekirimu ky’oMungu kikatuwatikaya erikulya anganatukuna erikola kandi atolere eritukuna erikola. Eky’erileberyako, omwigha Yakobo mwahandika ati: “Erikirirya butsira mibiri liholire.” (Yak. 2:26) Twanganabugha tutya n’oko bindi bitswe by’ekighúma ky’ekirimu ky’oMungu. Obuli ndambi eyo tukakanganaya emibere eyo, tukakanganaya ngoko ekirimu ky’oMungu kinemukola omw’itwe.

17. Litolere itwakolaki twabitaluka erikangania ekighúma ky’ekirimu ky’oMungu?

¹⁷ Nibya n’aBakristo ababatisibawa habirilaba mughulu muli kyanganabahikira ibataluka erikangania ekighúma ky’ekirimu ky’oMungu. Aliwe, eky’omughaso ly’erilola embere omw’iyikasa erikangania emibere eyo. Tulebaye eky’erileberyako kino. Olukimba lwaghu olo wanzire lwamabitulika, iwunemwendilu walughusa kwehi? Iyehe. Siwangabula erilanda ahalyatulika kyamabitokekana. N’enyuma syaho iwukenditeyalo ndeke. Kutya, hamabibya akatambi iwataluka erikangania omundu mulebe y’olukogho, omutima w’erilindirira kutse olwanzo, isiwabunika mutima. Erisaba obughanyiri erilua oko mutima lyanganakokotya emyatsi neryo iwatoka erilola embere eribya n’obwira obuwene n’omundu oyo. Uyisoghe kundu erikola ebyuwene omo biro ebikasa.

18. Twangan’ikirirya mwatsi wahi?

¹⁸ Tutsemire kutsibu kundi Yesu ni ky’erileberyako kyetu! Omughulu tukayikasa kutsibu eribya n’amalengekania awali ng’awiwe, kikatwolobera erikola ng’aye. Omughulu tukayikasa erikola nga Yesu, tukatoka eryambala ndeke emibere y’omundu muhya-muhya. Omo mwatsi ono, twamakania oko bitswe bini bisa eby’ekighúma ky’ekirimu ky’oMungu. Kyanganuwana okw’iwe eriyihirira h’akatambi k’erigha ebindi bitswe by’ekighúma ky’ekirimu ky’oMungu erilengekania ng’unemuwania enzira yaghu y’erikangania emibere eyo. Ukendibana emyatsi eyitondekene eyilebirye omwatsi oyo omo kitabu Musaada wa kutafuta habari kwa ajili ya Mashahidi wa Yehova, ahikwa oko mwatsi “Maisha ya Wakristo” neryo iwaya oko “Tunda la roho.” Wangan’ikirirya ngoko wamabiyikasa eryambala emibere y’omundu muhya-muhya n’eribya nayo mughulu wosi, Yehova iniakendikuwatikya.