1. Ngimba findu fiki ifi fibaghile ukupalamasya utuyilo twitu?

 KALI tosiwe mwalululu pamo ifyinja fya kunyuma, twesa tukulondiwa ukuya nutuyilo utu Yehova ikuhoboka nato. Ukuti tufwanisye ukubomba isi, tukulondiwa ukuchenja aminong’ono ghitu. Nongwa yafiki? Panongwa yakuti aminong’ono ghikupalamasya fiyo utuyilo twitu. Linga utubalilo tosa tukwinong’onela fiyo muno tubaghile ukwihobosyela twibene, tukuya pakuyoba nukubomba ifindu ifibibi. (Ef. 4:17-19) Loli linga tukwinong’onela ifindu ifinunu, tukuya pakuyoba nu kubomba ifindu ifi fikunhobosya Tata witu, Yehova.​—Gal. 5:16.

2. Ngimba malalusyo ghaliku agha tukuya pakuyobesania mu nkhani iyi?

² Bo muno twamanyilile mu nkhani iyi yakindagha, tukabaghila ukukanisya aminong’ono amabibi ukwingila mundumbula yitu. Loli tubaghile ukusala ukuleka ukuya naminong’ono amabibi. Bo tukali ukosiwa, tukulondiwa ukuleka ukuyoba nukubomba ifindu ifi Yehova atikuhoboka nafyo. Iyi yo njila iyakulondiwa fiyo iya kumfula umundu unkulu. Loli ukuti tunhobosyeghe Yehova, tukulondiwa ukupilikila ululaghilo ulwakuti: “Mumfwale umundu umpya.” (Kolos. 3:10) Mu nkhani iyi, tukuya pakwamula amalalusyo aghakukongapo agha: Ngimba “umundu umpya” findu fiki? Ngimba tubaghile ukukindilila bulebule ukumfwala umundu umpya?

3. Ukufwana na Bagalatia 5:22, 23, ngimba “umundu umpya” findu fiki, kangi ngimba umundu ikumfwala bulebule?

³ “Ukuya “mundu umpya” ko kwinong’ona nu kubomba ifindu ifi fikunangisya utuyilo utununu utwa Yehova. Uyu ikumfwala umundu umpya ikunangisya iseke sya mbepo wa  Kyala, ukwitikisya aminong’ono nifyakubomba fyake ukulongosiwa na mbepo mwikemo. (Belenga Bagalatia 5:22, 23.) Mwakifwanikisyo, umwene ikungana fiyo Yehova na babombi bake. (Mat. 22:36-39) Umundu uyu ikukindilila ukuya walusekelo nalinga ikwaghana ni ndamyo. (Yak. 1:2-4) Ikuya walutengano. (Mat. 5:9) Ikuya mololo kangi ikubanangisya abangi ikisa. (Kolos. 3:13) Umwene ikubomba isi nunu. (Luka 6:35) Ikunangisya mfyakubomba ukuti ali nulwitiko lwamaka kwa Tata wake wakumwanya. (Yak. 2:18) Ikukindilila ukuya ntengamoyo linga abangi bankalalisye.​—1 Kor. 9:25, 27; Titi 3:2.

4. Nongwa yafiki tukulondiwa ukunangisya utuyilo utu tuli pa Bagalatia 5:22, 23 ni fundo isingi isya mu Baibolo ukuti tufwale umundu umpya?

⁴ Ukuti tufwale umundu umpya, tukulondiwa ukunangisya utuyilo tosa utu tuli pa Bagalatia 5:22, 23 ni fundo isingi isya mu Baibolo. * Utuyilo utu tukafwana ni myenda iyakukindanakindana iyi umundu ikufwala akabalilo kosa. Loli utuyilo utu tufwene itolo. Mwakifwanikisyo, linga unganile umpalamani wako, kuya mololo kumyake kangi kunnangisya ikisa. Kangi ukuti uye mundu nnunu, kulondiwa ukuya ntengamoyo kangi wakwikola.

5. Ngimba ukuya “ninyinong’ono sya Kristu” kukusanusya isyafiki kangi nongwa yafiki tukulondiwa ukumanyila isyakufwana nu bumi bwa Yesu? (1 Bakorinti 2:16)

⁵ Belenga 1 Bakorinti 2:16. Ukuti tumfwale umundu umpya, tukulondiwa ukuya “ninyinong’ono sya Kristu.” M’masyu aghangi, tukulondiwa ukumanyila muno Yesu ikwinong’onela nu kunkonga. Yesu anangisyagha iseke sya mbepo isya Kyala. Mwakufwana itolo ni galasi, umwene anangisyagha utuyilo utununu twa Yehova. (Hib. 1:3) Linga tukukindilila ukwinong’ona bo Yesu, tukuya pakubomba bo muno umwene abombelagha nu kukonga utuyilo twake utununu.—Filip. 2:5.

6. Ngimba fundo siliku isi tukulondiwa ukukumbuka linga tukulonda ukumfwala umundu umpya?

⁶ Ngimba tubaghile ukufwanisya naloli ukukonga ikifwanikisyo kya Yesu? Tubaghile ukwinong’ona ukuti: ‘Yesu ngolofu. Ngabaghila ukufwanisya ukunkonga.’ Linga mukwinong’ona bo ulu, kumbuka ifundo isi. Iyakwanda, mwapeliwe nkifwani kya Yehova na Yesu. Yonongwa yake mubaghile ukusala ukubakonga abene kangi mubaghile ukufwana nabo  mfyakubombiwa fimo. (Bwa. 1:26) Iyabubili, mbepo mwikemo wa Kyala ghuli namaka fiyo nkipeliwa kyosa. Nubutuli bwake, mubaghile ukufwanisya ukubomba ifindu ifi pamwibene mukabaghila ukufwanisya. Iyabutatu, Yehova atikughulila ukuti mukuya pakunangisya iseke sya mwambepo munjila yabugholofu. M’malo mwake, Tata witu wakumwanya abikile akabalilo ka fyinja 1,000 aka bosa aba bali nulwitiko ulwa kwisakwikala pa kisu kyapasi bisakuya bagholofu. (Ubuset. 20:1-3) Yehova ikulonda ukuti lino tughelegheleghe ukunsubila ukuti atutule.

7. Ngimba tukuya pakuyobesania isyafiki?

⁷ Ngimba tubaghile ukufwanisya bulebule ukunkonga Yesu? Tukuya pakuyobesania iseke 4 isya mbepo mwikemo wa Kyala. Tukuya pakuketa isi tubaghile ukumanyilako kwa Yesu muno anangisyilagha utuyilo utu. Kangi tukuya pakuyobesania amalalusyo ghamo agha ghabaghile ukututula muno tubaghile ukubombela ukuti tumfwale umundu umpya.

8. Ngimba Yesu anangisye bulebule ulughano?

⁸ Panongwa yakuti Yesu anganile fiyo Yehova, umwene aliyipile kwa Tata wake na kumyitu. (Yoh. 14:31; 15:13) Yesu anangisyagha ulughano ku bandu ukufwana na muno ikalilagha nabo pa kisu. Umwene anangisyagha ulughano isiku lililyosa kangi ali ni kisa nalinga ukuti abandu bamo bansusyagha. Injila yimo inywamu iyi anangisyile ulughano ku bandu kwali ko kubamanyisya isyakufwana nu Bunyafyale bwa Kyala. (Luka 4:43, 44) Yesu anangisye kangi ulughano lwake kwa Kyala na ku bandu mwakwiyipa ukutamiwa nu kughoghiwa nabatulanongwa. Umwene aliwile injila ukuti abandu bosa basabwaghe ubumi bwa bwila na bwila.

9. Ngimba tubaghile ukunkonga bulebule Yesu pa nkhani yakunangisya ulughano?

⁹ Twaliyipile kwa Yehova nukosiwa panongwa yakuti tunganile fiyo Tata witu wakumwanya. Yonongwa yake mwakufwana itolo na Yesu, tukulondiwa ukunangisya ulughano lwitu kwa Yehova muno tukubombela na bandu. Untumiwa Yohani alembile ukuti: “Buno uyu linga akangana uwamyabo uyu ikumbona mmaso, yo akabaghila ukungana Kyala uyu atikumbona.” (1 Yoh. 4:20) Tubaghile ukwilalusya ukuti: ‘Ngimba ngukindilila ukukusya ulughano ku bandu? Ngimba ngunangisya ikisa ku bangi nalinga ukuti batikumbombela kanunu ifindu? Ngimba ulughano lukumbangisya ukuya nakabalilo akakubatula abangi ukumanya isya Yehova? Ngimba ngwiyipa ukubomba isi nalinga ukuti abandu bingi batikundaghisya ukwiyipa kwangu kangi bikunsusya? Ngimba mbaghile ukusyagha injila isyakuti sindule ukuti niye nakabalilo pambombo iyakupela abamanyili?’​—Ef. 5:15, 16.

10. Ngimba Yesu anangisye bulebule ulutengano?

¹⁰ Yesu ali walutengano. Pakabalilo aka abandu bambombelagha imbibi umwene akabaghomolelagha imbibi. Loli abombile nyingi isyakukinda apa. Iyipagha fiyo ukuya palutengano nukubakasya abangi ukuti bakolelaneghe. Mwakifwanikisyo, abamanyisye ukuti bikulondiwa ukuya palutengano na bamyabo linga bikulonda ukuti Yehova ahobokeghe nukwiputa kwabo. (Mat. 5:9, 23, 24) Kangi mwakwandisania abatulile abatumiwa ukuti bakolelaneghe bo bikulimbana pa nkhani ya uyu ali nkulumba pamyabo.​—Luka 9:46-48; 22:24-27.

11. Ngimba tubaghile ukuya bulebule balutengano?

¹¹ Ukuti tuye balutengano, tukulondiwa ukubomba nyingi ukukinda itolo ukuleka ukwandisya imiywegho. Tukulondiwa ukughelaghela ukuya palutengano na bangi nu  kubakasya abakamu na balumbu bitu ukuti bakolelaneghe. (Filip. 4:2, 3; Yak. 3:17, 18) Tukulondiwa ukwilalusya amalalusyo agha: ‘Ngimba ngulondiwa ukwiyipa ukubomba isyafiki ukuti niye palutengano na bangi? Linga unkamu pamo umulumbu angalalisye, ngimba ngukindilila ukunkalalila? Ngimba ngughulila ukuti umwene yo aghomokesyepo ulutengano pamo yone ngutala nalinga ukuti yo andisye indamyo? Linga kwakulondiwa, ngimba ngubakasya aba bikutoliwa ukuya palutengano na bangi?’

12. Ngimba Yesu anangisyagha bulebule ikisa?

¹² Yesu ali wakisa. (Mat. 11:28-30) Umwene anangisyagha ikisa mwakuya mololo kangi mwakwinong’ona kanunu, nalinga po pakabalilo kandamyo. Mwakifwanikisyo, bo unkikulu wa ku Fonike ansumile ukuti ambumbulusye umwanake. Pakwanda akabombile isi unkikulu uyu alinsumile loli bo anangisye ulwitiko lwamaka, Yesu alimbumbulwisye umwana wa nkikulu uyu. (Mat. 15:22-28) Nalinga ukuti ali wakisa, Yesu akalekile ukubapa abangi ubulongosi. Utubalilo tumo anangisyagha ikisa mwakubafunda aba abaghanile. Mwakifwanikisyo, bo Peteri ikughela ukunkanisya Yesu ukubomba ubwighane bwa Yehova, Yesu alinkemile pamaso pa bafundiwa abangi. (Mar. 8:32, 33) Umwene abombile isi komma ukuti ankosye isoni Peteri loli ukuti ammanyisye nukubasoka abafundiwa abangi ukuti bangisubilagha bene. Kisita kukayika Peteri abaghile ukuti akosiwe isoni loli asayiwe fiyo panongwa ya lufundo ulu.

13. Ngimba tubaghile ukunangisya bulebule ikisa?

¹³ Ukuti mubanangisye ikisa aba mubaghanile, utubalilo tumo mukulondiwa ukubapa ubulongosi. Linga mukubomba isi, munkongeghe Yesu mwakubapa abangi ubulongosi ubu bukwaghiwa M’masyu gha Kyala. Muyeghe bololo. Muyeghe nulusubilo ukuti abene bikulonda ukubomba inunu kangi musubileghe ukuti aba banganile Yehova bikuya pakukonga ubulongosi ubu mubapele mwalughano. Amwilalusye amalalusyo agha: ‘Ngimba ngunangisya ubukifu mwakuyoba simo linga ngetile ukuti uyu nunganile ikubomba ifindu ifibibi? Linga ngulonda ukumpa umundu yumo ubulongosi, ngimba nguyoba mwakisa pamo nguyoba mwabukali? Ngimba ubwighane bwangu ubwakumpa ubulongosi bo buliku? Ngimba ngumpa ubulongosi panongwa yakuti numbengile pamo panongwa yakuti ngulonda ukuntula?’

14. Ngimba Yesu anangisyagha bulebule ubununu?

¹⁴ Yesu akasimenye itolo inunu loli abombagha. Yesu anganile fiyo Tata wake, yonongwa yake utubalilo tosa abombagha inunu. Umundu unnunu utubalilo tosa ikusyagha injila isyakubatula abangi kangi ikubabombela ifindu ifinunu. Kukaya kwakufwana ukumanya itolo ukubomba inunu; tukulondiwa ukubomba ifindu ifinunu mwakuya naminong’ono amanunu. Yumo abaghile ukulalusya ukuti, ‘Ngimba sibaghile ukubombiwa ukubomba ifindu ifinunu mwakuya naminong’ono amabibi?’ Ena sibaghile ukubombiwa. Mwakifwanikisyo, Yesu abayobile abandu aba babapagha ifyabupe abalondo loli balondagha ukuti abangi baketeghe isi bikubomba ukuti babapaleghe. Nalinga ukuti isi babombagha syali nunu loli Yehova akahobokagha nabo.​—Mat. 6:1-4.

15. Ngimba tubaghile bulebule ukuya banunu?

¹⁵ Tubaghile ukuya banunu pene linga tukubomba ifindu ifinunu pafifukwa ifinunu. Tukulondiwa ukwilalusya ukuti: ‘Ngimba mfimenye ifindu ifinunu kangi ngufibomba? Ngimba ubwighane bwangu ubwakubomba inunu bo buliku?’

16. Ngimba tukulondiwa ukubomba isyafiki isiku lililyosya kangi nongwa yafiki?

¹⁶ Tutikulondiwa ukwinong’ona ukuti linga tosiwe ko kuti tumfwele umundu umpya nukuketa ukuti tutikulondiwa ukubombapo simo. Tukulondiwa ukukindilila ukufighilila “umwenda umpya” ukuti ghubonekeghe kanunu. Injila yimo iyi tubaghile ukubomba isi ko kusyagha injila isyakuti tunangisyeghe iseke sya mbepo wa Kyala. Nongwa yafiki? Panongwa yakuti Yehova yo Kyala wa pamwanya kangi mbepo wake ghukubomba ifindu ifyamaka. (Bwa. 1:2) Yonongwa yake uluseke lulilosa ulwa mwambepo lukutukasya ukubombapo simo. Mwakifwanikisyo, untumiwa Yakobu alembile ukuti: “Ulwitiko lukuya lufwe itolo apa linga lukaya ni mbombo.” (Yak. 2:26) Isi sifwene itolo ni seke syosa sya mbepo wa Kyala. Linga akabalilo kosa tukunangisya iseke isi tukunangisya ukuti mbepo wa Kyala ghukututula.

17. Ngimba tukulondiwa ukubomba bulebule linga tukutoliwa ukunangisya iseke sya mbepo?

¹⁷ Nalinga bo Bakristu aba bosiwe kwa fyinja fingi ifi fikindilepo utubalilo tumo babaghile ukutoliwa ukunangisya iseke sya mbepo. Loli kwakulondiwa fiyo ukukindilila ukunangisya utuyilo utu. Inong’onela ikifwanikisyo iki. Linga umwenda ughu mughughanile ghulepwike, ngimba mubaghile ukughutagha mwanakalinga? Hayi. Loli mubaghile ukughusona apa ghulepwike. Kangi mubaghile ukughupwelelela kanunu. Mwakufwana itolo, linga tutoliwe ukunangisya ikisa, ubololo nulughano ku mundu yumo tutikulondiwa ukuwa amaka. Tukulondiwa ukupepesya ukuti tukindilile ukuya pabumanyani ubununu nu mundu uyu. Kangi tukulondiwa ukukindilila ukubomba inunu nkyeni.

18. Ngimba tubaghile ukuya nulusubilo luliku?

¹⁸ Tukundaghisya fiyo ukukonga ikifwanikisyo kya Yesu. Linga tukukonga aminong’ono nutuyilo twake, kukuya pakuya kupepe ukunkonga. Linga tukughelaghela ukunkonga Yesu, tukuya pakufwanisya ukumfwala umundu umpya. Mu nkhani iyi, tumanyile isya seke 4 itolo isya mbepo wa Kyala. Mukulondiwa ukuya nakabalilo akakumanyila isya seke isingi isya mbepo nu kuketa muno mukunangisyila utuyilo utu. Mukuya pakusyagha ifundo nyingi isi sikulingania isya nkhani iyi mu Buku Lakupenjera Nkhani la Ŵakaboni ŵa Yehova pa kamutu akakuti “Umoyo Wachikhristu” ukufuma apo “Vipambi vya Mzimu.” Tubaghile ukuya nulusubilo losa ukuti linga tukughelaghela ukubomba ulubafu lwitu, Yehova ikuya pakututula ukukindilila ukumfwala umundu umpya.