1. Me yọ mai hobọte uruemru ọwan?

 SẸ ỌWAN i ghwai bromarhame obọ yanghene o jiri ne omamọ, a guọlọ vwo aruẹ uruemru ri Jehova o vwo ẹguọlọ kpahen. Na sabu rhiẹ aruẹ ohworho ọrana, o fori ne sun iroro ọwan. Mesoriẹ? Fọkime iroro ọwan yọ mai hobọte uruemru ọwan. Orhianẹ e roro kpahen ojemẹ ugboma ọke ephian, ana ta ji ru oborẹ obiomurun. (Eph. 4:17-19) Ọrẹn, erhe roro kpahen ekwakwa irhorhomu ọke ephian, na ta ji ruẹ oborẹ ọnọ merhen i Jehova oma.—Gal. 5:16.

2. Enọ ego ye ne yono kpahen uvuẹn urhomu-ẹmro ọnana?

² Jerẹ oborẹ a hunute uvuẹn urhomu-ẹmro rọ vrẹnren, a sabu dobọ ọsoso iroro esọsọ jẹ, nẹ aye i ja ruẹ ọmudu ọwa-an. Ọrẹn, ana sabu brorhiẹn sẹ ene ru lele aye. Bọmọke ene ki bromarhame, o fori na kẹnoma rẹn ẹmro ọrhẹ ekwakwa ri Jehova o vwo utuoma kpahen. Ọrana yẹ udjoghwẹ ọrukaro rọ ji ghanren re ne ku uruemru ahwanren na nu. Ọrẹn, na dabu lẹrhẹ oma merhen i Jehova, ene vi huvwele akama ọnana: “Are i ku uruemru ọkpokpọ na rhọ.” (Col. 3:10) Uvuẹn urhomu-ẹmro ọnana, ana kpahenrhọ enọ enana: Me yẹ “uruemru ọkpokpọ na”? Marhẹ ene ru kuie rhọ ọke ephian?

3. Sekpahen Galatians 5:22, 23, me yẹ “uruemru ọkpokpọ na,” marhẹ ohworho o ru kuie rhọ?

³ Ohworho ro vwo “uruemru ọkpokpọ na,” ọ hẹrokele uruemru ọrhẹ irueruo i Jehova. O ku uruemru ọkpokpọ na rhọ, nyoma ro dje omamọ ẹhẹn ọfuanfon na phia, ji ha uphẹn riẹn no sun iroro ọrhẹ irueruo yi. (Se Galatians 5:22, 23.) Jerẹ udje, o vwo ẹguọlọ kpahen Jehova ọrhẹ  ihworho Enẹyen. (Matt. 22:36-39) Aruẹ ohworho ọrana, ọ sẹrorẹ aghọghọ ye udabọ ebẹnbẹn ro rhiẹromẹrẹn. (Jas. 1:2-4) Ọye ohworho ufuoma. (Matt. 5:9) O dje erhionrin ọrhẹ uruemru esiri phia ọke ro lele awọrọ ruẹ kugbe. (Col. 3:13) O vwo ẹguọlọ kpahen oborẹ orhomurun, no ji ruie. (Luke 6:35) O djephia nyoma irueruo yi taghene o vwo esegburhomẹmro ọgbogbanhon kpahen Jehova. (Jas. 2:18) Ọ sẹrorẹ uruemru bọrọbọrọ ọke erhe ruẹ oborẹ o biomirien evwan, ji dje omerhesun phia ọke ọrhọ dẹrughwaroghwu ọdamuni.—1 Cor. 9:25, 27; Titus 3:2.

4. Mesoriẹ o fo ne dje ọsoso iruemru ra hunute uvuẹn Galatians 5:22, 23 ọrhẹ eghwẹmro i Baibol na erọrọ phia, na ki sabu ku uruemru ọkpokpọ na rhọ?

⁴ Na sabu ku uruemru ọkpokpọ na rhọ, o fori ne vwo ọsoso iruemru ra hunute uvuẹn Galatians 5:22, 23 ọrhẹ uvuẹn eghwẹmro i Baibol na erọrọ. * Iruemru enana rhẹ ewun ọseba gbẹ aliku re rhuon owuowu-u. Itiọrurhomẹmro, ana sabu mẹrẹn eghọn iruemru enana uvuẹn iruemru erọrọ. Jerẹ udje, wu rhe ghini vwo ẹguọlọ kpahen ọreva, wu ne dje uruemru esiri ọrhẹ erhionrin phia riẹn. Ne wu sabu dje obọdẹn orhorhomu phia, wu ne vwo uruemru dẹndẹn ọrhẹ ome-rhesun.

5. Me yo mevirhọ re ne “vwo iroro Kristi,” mesoriẹ o fo ne yono kpahen akpenyerẹn Jesu? (1 Corinthians 2:16)

⁵ Se 1 Corinthians 2:16. Na sabu ku uruemru ọkpokpọ na rhọ, o fori ne “vwo iroro i Kristi.” Nọyẹ, ene vi yono kpahen oborẹ i Jesu o roro, ji hẹrokelie. Jesu o dje omamọ ẹhẹn ọfuanfon i Jehova phia gbagba. Jerẹ ujegbe rọ dabu fiotọre, Jesu ọ hẹrokele iruemru i Jehova gbagba. (Heb. 1:3) Ọke erhe roro jerẹ i Jesu, ne vwo ẹhẹn ra na hẹrokele uruemru enẹyen, ọke ọrana na na sabu vwo efikparobọ ọke ra hẹrokele udje yi.—Phil. 2:5.

6. Me yo fori ne vwo rhẹ ẹhẹn ọke ra damoma ku uruemru ọkpokpọ na rhọ?

⁶ Ọwan ina ghini sabu hẹrokele udje i Jesu? Ana sabu roro: ‘Jesu ohworho rọ gbare. Mi sabu ghini họhiẹ hiẹ-ẹn!’ We rhe roro omaran, karorhọ irhomẹmro  enana. Ọrukaro, a maren ọwan na họhọ i Jehova ọrhẹ Jesu. Omarana wu na sabu djẹ odjẹ wu na hẹrokele aye, wu na sabu vwo efikparobọ te erhirhiẹ ezẹko. (Gen. 1:26) Ọreva, ẹhẹn ọfuanfon i Jehova yẹ oborẹ ọ mai gbanhon uvuẹn ọsoso akpọ na. Nyoma userhumu ẹhẹn ọfuanfon na, wu na sabu ruẹ ekwakwa wu na ja sabu ru rhẹ omẹgbanhon ọnọ. Ọresa, Jehova o vwo fiẹrorhọ taghene ene dje omamọ ẹhẹn ọfuanfon na phia gbagba vwana-a. Itiọrurhomẹmro, Jehova o fiẹ ẹgbukpe 1,000 rhotọre harẹn eri ne rhirhiẹ otọrakpọ nẹ aye i rhiẹ ihworho ri gbare. (Rev. 20:1-3) Oborẹ i Jehova ọ guọlọ mie ọwan vwana, yẹ ọrẹ ene ruẹ ekete omẹgbanhon ọwan o teri, ji hẹroso userhumu ọnẹyen.

7. Me ye ne yono kpahen?

⁷ Marhẹ ene ru hẹrokele i Jesu? Ene yono kpahen eghọn ẹne uvuẹn omamọ ẹhẹn ọfuanfon i Jehova. Uvuẹn erhirhiẹ owuowu, ana mẹrẹn oborẹ ana sabu yono nẹ izede ri Jesu o dje iruemru erana phia. Habaye, ene ji yono kpahen enọ ezẹko ri na ha userhumu rẹn ọwan rhe oborẹ e ru rhomu te ne, ọke re ku uruemru ọkpokpọ na rhọ.

8. Marhẹ i Jesu o ru dje ẹguọlọ phia?

⁸ Ẹguọlọ okokodo ri Jesu o vwo kpahen Jehova, o mwurien homakpahontọre rẹn Jehova ọrhẹ ọwan. (John 14:31; 15:13) Jesu o djephia taghene o vwo ẹguọlọ okokodo kpahen ituakpọ nyoma oborẹ o nyerẹn lele ọke rọ ha otọrakpọ na. Kẹdẹkẹdẹ, o dje ẹguọlọ ọrhẹ aruẹdọn phia, ọke ihworho ezẹko a kparehasuiẹ dede. Izede kirighwo o ru dje ẹguọlọ phia, yẹ ọro yono aye kpahen Uvie Osolobrugwẹ. (Luke 4:43, 44) Jesu o ji dje obọdẹn ẹguọlọ phia rẹn Jehova ọrhẹ ituakpọ, nyoma ro mwuegbe rọ nọ rioja omiamiamo uhwu uvuẹn abọ iruedandan. Omarana, no rhie izede firhọ rẹn ituakpọ ephian na sabu vwo arhọ i bẹmẹdẹ.

9. Marhẹ ene ru hẹrokele i Jesu dje ẹguọlọ phia?

⁹ Ọwan i homakpahontọre rẹn Jehova ji bromarhame fọkime e vwo ẹguọlọ kpahiẹn. Omarana, jerẹ i Jesu, o fori ne dje ẹguọlọ ọwan phia rẹn Jehova nyoma oborẹ e ruẹ awọrọ lele. Ọnyikọ John ọrhọ ya: “Ohworho ro vwo vwo ẹguọlọ kpahen omizu ọnẹyen rọ mẹrẹn, ọ sabu vwo ẹguọlọ kpahen Osolobrugwẹ rọ vwọ je mẹrẹ-ẹn.” (1 John 4:20) Ana sabu nọ oma ọwan: ‘Mi vwo ẹguọlọ okokodo kpahen ihworho? Mie dje aruẹdọn phia ọke mie lele awọrọ ruẹ kugbe, orhianẹ aye i tobọ hinmaro kpahen mẹ? Ẹguọlọ o mwu mẹ ha ọke mẹ ọrhẹ oborẹ mi vwori ha userhumu rẹn awọrọ yono kpahen Jehova? Mi vwo omwemẹ mi ne ruẹ omaran orhianẹ buebun ihworho e vwo ọdaremẹro kpahen omẹdamu mẹ-ẹ, yanghene aye a kparahaso mẹ? Mi na sabu guọlọ izede mi na ghwọghọ ọke buebun rhẹ owian re ruẹ idibo?’—Eph. 5:15, 16.

10. Marhẹ i Jesu o ru rhiẹ ohworho ufuoma?

¹⁰ Jesu ohworho ufuoma. Ọke awọrọ e ruie gbalogbalo, ọ ha ọdandan kwosa ọdanda-an. Ọrẹn, o ru vrẹn ọrana. Nọ kpare idjaghwẹ rọ nọ kwaphiẹrhọ, ji jirie rẹn awọrọ nẹ aye i kwaphiẹ ẹghwọ aye rhọ. Jerẹ udje, o yonirin aye taghene aye ine vi kwaphiẹrhọ rhẹ omizu aye, orhianẹ aye i guọlọre taghene Jehova o rhiabọ dede ogame aye. (Matt. 5:9, 23, 24) Ọgbọ buebun, ọ ji ha userhumu rẹn inyikọ ye kwaphiẹ itietio kpahen ọrọ maido uvwre aye rhọ.—Luke 9:46-48; 22:24-27.

11. Marhẹ ene ru rhiẹ ihworho ufuoma?

¹¹ Na sabu rhiẹ ohworho ufuoma, o fori  ne ru vrẹn ọrẹ ana kẹnoma rẹn ẹghwọ. Ene vi kpare idjaghwẹ ra na kwaphiẹrhọ rhẹ awọrọ, ji jirie rẹn imizu ukoko na nẹ aye i kwaphiẹrhọ rhẹ owuowọnwan. (Phil. 4:2, 3; Jas. 3:17, 18) Ana sabu nọ oma ọwan enọ enana: ‘Mi mwuegbe mi na kpariroro vrẹn ne mi sabu kwaphiẹrhọ rhẹ awọrọ? Ọke omizu uvuẹn ukoko na orho ru oborẹ ọdare mẹ, mia sẹrorẹ eghrẹn rhẹ ẹhẹn? Mia hẹrhẹ ọro ruru mẹ sọ no mo leli mẹ kwaphiẹrhọ vwẹre, gbinẹ mẹmẹ ya kpare udjoghwẹ ọrukaro, orhianẹ ohworho ọreva na yọ suẹ obẹnbẹn na? Orho serhọ, mie jirie rẹn awọrọ ri vwo ẹghwọ nẹ aye i kwaphiẹrhọ rhẹ owuowọnwan?’

12. Marhẹ i Jesu o ru dje uruemru esiri phia?

¹² Jesu o dje uruemru esiri phia. (Matt. 11:28-30) O dje uruemru esiri phia nyoma ro vwo uruemru dẹndẹn ọrhẹ uruemru re roro rẹn awan, udabọ erhirhiẹ egbogbanhon dede. Jerẹ udje, ọke ọmase onyẹ Phoenicia ọ rẹ ye no simi ọmọyen, ọke ukaro, o kwerhọ orẹ ọmase na-a, ọrẹn ọke ro dje esegburhomẹmro ọgbo-gbanhon phia, no simi ọmọyen. (Matt. 15:22-28) Dedevwo o dje uruemru esiri phia, Jesu ọ ji ha ọkpọvi phia. Ọkezẹko, o dje uruemru esiri phia nyoma rọ ha ọkpọvi ro serhọ rẹn ihworho ro vwo ẹguọlọ kpahen. Jerẹ udje, ọke i Peter ọ damoma rọ nọ dobọ i Jesu ji, no jo ruẹ ọhọre i Jehova, Jesu nọ ghwọghwie udaro idibo ereva na. (Mark 8:32, 33) Jesu o ruẹ ọnana, orhiẹ ọrọ nọ phọphọ i Pete-er, ọrẹn no yonie ji ha orhetio rẹn idibo ereva na nẹ aye i je ru vrẹn oborẹ a guọlọ mie aye. O vwo ẹfro-o, ofa ọ ruẹ Peter ibiesuọn, ọrẹn ọ mẹrẹn erere nẹ ọghwọghwu na.

13. Marhẹ ene ru dje obọdẹn uruemru esiri phia?

¹³ Na sabu dje obọdẹn uruemru esiri phia rẹn ere vwo ẹguọlọ kpahen, o fori na kpọ aye vi ọkezẹko. Erhe ruẹ omaran, o fori na hẹrokele i Jesu nyoma ra na bọn ọkpọvi ọwan kpahen iruemru-urhi ri ha i Baibol na. Ru dẹndẹn. Vwo imwẹro taghene aye i guọlọ ru oborẹ ọgbare, ji rhe taghene eri vwo ẹguọlọ kpahen Jehova ọrhẹ owẹwẹ ina dabu kpahenrhọ ọkpọvi ọnọ. Nọ oma enọ enana: ‘Mie fiudugbere tẹmro ọke mi rha mẹrẹn ohworho mi vwo ẹguọlọ kpahen ro ruẹ oborẹ ọsọre? Orhianẹ o fori ne mi ha ọkpọvi phia, mia tẹmro dẹndẹn, gbinẹ mia tẹmro hwainhwain? Mesoriẹ mia guọlọ ha ọkpọvi na phia? Mia haye phia fọkime mia tuekwẹre kpahen ohworho na, gbinẹ fọkime mi guọlọ ha userhumu riẹn?’

14. Marhẹ i Jesu o ru dje orhorhomu phia?

¹⁴ Jesu o rhe oborẹ orhomurun, no ji ruie. Jesu o vwo ẹguọlọ kpahen Jehova, omarana o ruẹ oborẹ ọgbare rhẹ iroro ro serhọ. Ọwan e rhe ọghanronmẹ orhorhomu ọke arha mẹrẹn oborẹ ọ hobọte awọrọ lele. Ohworho ro dje orhorhomu phia, ọ guọlọ izede ro no ruẹ ekwakwa irhorhomu rẹn awọrọ. O te re ne rhe oborẹ ọgbare re ne ruo-o; ene vi ruie rhẹ iroro ro serhọ. Ohworho ọnọ sabu nọ, ‘Ana sabu ru oborẹ ọgbare rhẹ iroro rọ sọre?’ Ee. Jerẹ udje, Jesu ọ ta kpahen ere ruẹ ẹghẹlẹ rẹn ivwiegbere ọrẹ afiede, neneyo awọrọ i sabu jiri aye fọkiẹ orhorhomu aye. Aruẹ irueruo erana i vwa merhen i Jehova oma-a.—Matt. 6:1-4.

15. Marhẹ ene ru dje obọdẹn orhorhomu phia?

¹⁵ Ana sabu dje obọdẹn orhorhomu phia, ọke erhe ruẹ oborẹ orhomurun rhẹ iroro ro serhọ. Omarana nọ oma: ‘Mi rhe rhe oborẹ orhomurun ro fori mi ru, mie ruie? Mesoriẹ mie ruẹ ekwakwa irhorhomu rẹn awọrọ?’

16. Me yo fori ne ru kẹdẹkẹdẹ, mesoriẹ?

¹⁶ E vwe roro taghene arha wian ne ku uruemru ọkpokpọ na rhọ, ọke erhe bromarhame hi-in. O fori na damoma hẹrote uruemru ọkpokpọ na ọke ephian. Ana sabu ru ọnana nyoma ra na guọlọ izede re ne dje omamọ ẹhẹn ọfuanfon i Jehova phia kẹdẹkẹdẹ. Mesoriẹ? Fọkime Jehova, Osolobrugwẹ rọ wian, ẹhẹn ọfuanfon ọnẹyen o ji vwo omẹgbanhon rọ wian. (Gen. 1:2) Omarana, o fori nẹ eghọn omamọ ẹhẹn ọfuanfon na i mwu ọwan kpare idjaghwẹ. Jerẹ udje, odibo James ọrhọ ya: ‘Esegburhomẹmro rọ vwọ wian, orinmi.’ (Jas. 2:26) Omaran ọ ji havwọ sekpahen ọsoso eghọn omamọ ẹhẹn ọfuanfon na. Kọke kọke erhe dje omamọ ẹhẹn ọfuanfon na phia, ne djephia taghene ẹhẹn ọfuanfon na ọ wian uvuẹn oma ọwan.

17. Marhẹ ene ru lele orhianẹ a sabu dje omamọ ẹhẹn ọfuanfon na phia-a?

¹⁷ Orhiẹ ọke ephian yẹ Ilele Kristi ri bromarhame ẹgbukpe buebun ne, ine dje omamọ ẹhẹn ọfuanfon na phia-a. Ọrẹn, oborẹ ọ mai ghanren yẹ, e vwe fiobọrhotọre-e. Roro kpahen udje ọnana. Orhianẹ ewun rọ mai jo, ọ bẹrẹre, wu ne donrien fughwẹ ogege? Ẹjo. Wu na dabu kwaphiẹ ye rhọ orho serhọ. Orho ru, wu na dabu hẹrote yi rhọ. Omaran ọ ji havwọ, orhianẹ wa sabu dje uruemru esiri, erhionrin ọrhẹ ẹguọlọ phia rẹn eri kẹreruọ ọkezẹko-o, wu vwe je ẹhọn seriotọre-e. Wu rha dabu rhomu unu, wu na sabu kwaphiẹ erhirhiẹ na rhọ, ji rharhumu vwo omamọ onyerẹnkugbe rhẹ ohworho wu ru sọ na. Orho ru, brorhiẹn wu ne ru rhomurhọ obaro na.

18. Imwẹro ọgo ya na sabu vwo?

¹⁸ Oma ọ merhen ọwan taghene Jesu o dje udje rhotọre rẹn ọwan! Ọke arha hẹrokelie nyoma oborẹ eroro ọrhẹ uruemru ọwan, nọ phẹrẹ ra na nyalele udje yi. Arha hẹrokele i Jesu, ana sabu ru rhomurhọ ọke re dje uruemru ọkpokpọ na phia. Uvuẹn urhomu-ẹmro uyono ọnana, e yono kpahen eghọn ẹne ọvo uvuẹn omamọ ẹhẹn ọfuanfon na. Ono rhomu wu rhe fi ọke rhotọre yono kpahen eghọn re hẹrhẹre na, ji roro kpahen oborẹ we dje aye phia lele? Wu na sabu mẹrẹn irhomu-ẹmro sansan ri ta kpahiẹn uvuẹn Research Guide for Jehovah’s Witnesses, uvuẹn urhomu-ẹmro na “Christian Life” ọrhẹ “Fruitage of the Spirit.” Wu na sabu vwo imwẹro taghene wu rhe ruẹ ẹkẹ ro te ruo, Jehova ọnọ ha userhumu wẹn ku uruemru ọkpokpọ na rhọ ọke ephian.