1. Antoy manunan makakaapekto ed personalidad o inkatoo tayo?

 ANGGANO abaybayag tayo lan abautismoan o agano ni labat, labay tayon say personalidad o inkatoo tayo et amay labalabay nen Jehova. Pian nagawaan tayo itan, kaukolan tayon kontrolen so panagnonot tayo. Akin ey? On ta baleg so epekto na iisipen tayo ed personalidad tayo. No puro makalaman so iisipen tayo, aliwliwa so ompaway ed sangi tayo tan matmainomay tayon natukso ya manggawa na mauges. (Efe. 4:17-19) Pero no kamaongan so walad isip tayo, maong met so ibaga tan gawaen tayo kanian napaliket tayoy Aman Jehova.—Gal. 5:16.

2. Anto ran tepet so ebatan tayo ed sayan artikulo?

² Singa inaral ed imbeneg ya artikulo, walan-walay mauges ya ompasok ed isip tayo ta agtayo perpekto. Pero agto labay ya ibaga ya no antoy naisip tayo et aman met lay gawaen tayo. Antis tayon abautismoan, intunda tayo la ray kagagawa, panagsalita, tan ugali ya kabusol nen Jehova. Ginawa tayo itan pian nalakseb tayoy daan ya personalidad tayo. Pero pian tuloytuloy tayon napaliket si Jehova, kaukolan tayo met ya “isulong [so] balon personalidad.” (Col. 3:10) Diad sayan artikulo, ebatan tayo irayan tepet: Anto ta’y “balon personalidad”? Panon tayon naisulong so balon personalidad? Tan antoy gawaen tayo pian tuloytuloy ya akasulong itan ed sikatayo?

3. Panon tayon nibaga ya akasulong ed sakey ya too so “balon personalidad,” tan panon mon naisulong itan? (Galacia 5:22, 23)

³ Say toon akasulong ed sikato so “balon personalidad” et aaligen to ray ugali tan paraan na panagnonot nen Jehova. Naisulong mo so balon personalidad no manpaigiya ka ed masanton espiritu, tan pansagpotan mon ipanengneng so bunga na espiritu na Dios diad amin ya iisipen mo, naliliknam, tan gagawaen  mo. (Basaen so Galacia 5:22, 23.) Singa bilang, say toon akasulong ed sikato so balon personalidad et inaro toy Jehova tan saray lingkor To. (Mat. 22:36-39) Anggano amayamay so dadalanen ton subok, maliket nin siansia. (Sant. 1:2-4) Mareen ya too tan aliwan makolkol; tan gagawaen to met so anggaay nayarian to pian mansiansia so deen. (Mat. 5:9) Maanos tan maabig met so panagtrato tod arum. (Col. 3:13) Say labalabay ton gawaen et no antoy duga tan maong. (Luc. 6:35) Nanengneng ed saray desisyon to ya mabiskeg so pananisia to ed si Aman Jehova. (Sant. 2:18) Tan anggano makapasyodot so situasyon, maulimek nin siansia tan sarag ton kontrolen so sarili to anggano walay tukso.—1 Cor. 9:25, 27; Tito 3:2.

4. Pian naisulong tayoy balon personalidad, kasin sansakey tayon ipanengneng iramay kualidad ya abitla ed Galacia 5:22, 23? Ipaliwawa.

⁴ Pian naisulong tayo so balon personalidad, kailangan tayon ipanengneng so amin ya kualidad ya abitla ed Galacia 5:22, 23 tan ed arum ni ran teksto ed Biblia. * Sarayan kualidad et aliwan singa nanduruman piraso na kawes ya sansakey tayon isulong. Diad tua, mankokonektaan lanlamang iraya. Singa bilang, no inaro tayoy kapara tayon too, maabig tan maanos so pantrato tayod sikara. Pian naipanengneng tayoy tuan kamaongan, dapat maulimek tayo tan kontrolen tayoy sarili tayo.

5. Antoy labay ya ibaga na “walad sikatayoy kanonotan nen Kristo,” tan akin et kaukolan tayon aralen so bilay nen Jesus? (1 Corinto 2:16)

⁵ Basaen so 1 Corinto 2:16. Pian naisulong tayo so balon personalidad, dapat “walad sikatayoy kanonotan nen Kristo.” Labay ton ibaga, aralen tayoy paraan na panag-isip nen Jesus, insan tayo aligen. Perpekton impanengneng nen Jesus so bunga na masanton espiritu na Dios. Nanengneng ed sikato so amin ya kualidad nen Aman Jehova. (Heb. 1:3) No say panagnonot tayo et pareho ed panagnonot nen Jesus, naalig tayoy ugali tan personalidad to.—Fil. 2:5.

6. Anto ray nepeg tayon tandaan legan tayon isusulong so balon personalidad?

⁶ Posible kasi ya naalig tayoy Jesus? Ompan isipen mo: ‘Agkon balot naalig si Jesus ta perpekto.’ No ontay naliliknam, walay taloran nepeg mon tandaan. Unona, say too et ginawa “unong ed indengan” o personalidad nen Jehova tan Jesus. (Gen. 1:26) No ontan sirin so inkadesinyom, sarag mo ran aligen. Komadua,  tulongan ka na masanton espiritu na Dios. Atan so sankabiskegan ya puersa ed interon uniberso, kanian anggan saramay singa agmo sarag et nagawaan mo. Komatlo, amta nen Jehova ya agmo ni perpekton naipanengneng natan so bunga na espiritu. Diad tua, angigana si Jehova na 1,000 taon pian magmaliw ya perpekto iray totoo. (Apo. 20:1-3) Maar-aroy Aman Jehova. Say kekerewen to labat ed sikatayo natan et gawaen tayoy anggaay nayarian tayon isulong so balon personalidad tan mantiwala tayo ed tulong to.

7. Anto ray pantongtongan tayo diad ontumbok iran parapo?

⁷ Anto ray nanduruman paraan pian naalig tayoy Jesus? Aralen tayo natan so apatiran kualidad ya kaiba ed bunga na masanton espiritu. Pantongtongan tayo no panon iratan ya impanengneng nen Jesus tan no panon tayon naalig so alimbawa to. Wala ray tepet ya ikonsidera tayo pian nausisa tayo no anto ni ray kaukolan tayon paaligwasen.

8. Panon ya impanengneng nen Jesus so aro?

⁸ Inar-aro nen Jesus si Jehova kanian mabulbulos ya mansakripisyo parad si Ama to tan parad sikatayo. (Juan 14:31; 15:13) Nen wadiad dalin si Jesus, nanengneng ed amin ya ginawa to ya inar-aro to ray totoo. Anggano wala ray mamabalaw tan onkokontra ed sikato, impanengneng to nin siansia so malasakit tan tuan panangaro. Say sakey ya paraan ya impanengneng toy panangaro tod totoo et imbangat to ra tungkol ed Panarian na Dios. (Luc. 4:43, 44) Tan say sankabiskegan ya prueba ya inar-aro nen Jesus so Dios tan saray totoo et sikatoy akaparaan ya ompatey diad lima na saray makasalanan pian walay ilalo tayon manbilay ya andi-anggaan.

9. Panon tayon naipanengneng so aro ya singa ginawa nen Jesus?

⁹ Inar-aro tayoy Aman Jehova kanian nandesisyon tayon idedika so sarili tayod sikato tan nampabautismo tayo. Singa si Jesus, ipapanengneng tayo ya inar-aro tayoy Jehova no inaro tayoy kapara tayon too. Oniay imbaga nen apostol Juan: “Say agmangaaro ed agi to a nanenengneng to et agto nayarian ya aroen so Dios ya agto nanenengneng.” (1 Juan 4:20) Tepetan moy sarilim: ‘Talaga kasin inarok so kaparak a too? Kasin ipapanengneng ko nin siansia so malasakit ed arum anggano balbalawen da ak? Kasin mabulbulos kon uusaren so oras ko tan antokaman ya walad siak pian natulongan koy arum ya nakabat day Jehova? Kasin agak onsasawan manpulong anggano dakel so onkokontra tan ag-interesado? Sarag ko ni kasin aruman so panaon kon manpulong tan mangiyaral na Biblia?’—Efe. 5:15, 16.

10. Antoy ginawa nen Jesus pian mansiansia so deen?

¹⁰ Lapud mareen ya too si Jesus, sikatoy agan balot binmawi anggano aliwliway impantrato ed sikato na arum. Tan ginawa to met so anggaay nayarian to pian mansiansia so deen. Diad tua, pinaseseg to ray papatumbok to ya ontan met so gawaen da no walay nagawan agpantatalosan. Singa bilang, imbangat tod sikara ya ag-awaten nen Jehova so panagdayew da no ag-ira mikareenan ed agi ra. (Mat. 5:9, 23, 24) Tan nen aminpigan nan-debatian na saray apostol no siopay manunaan ed sikara, maan-anos to ran binilin ya manaaroan ira tan kaukolan day manpaabeba.—Luc. 9:46-48; 22:24-27.

11. Antoy gawaen tayo pian mansiansia so deen?

¹¹ Agto labay ya ibaga ya no anggapoy kakolkol tayo tan mareen tayon too et ayos la. Dapat gawaen tayo met so anggaay nayarian tayon pansiansiaen so deen tan pasesegen tayo ray agagi ya ontan met so gawaen da, lalo la no walay agda pantatalosan. (Fil. 4:2, 3; Sant. 3:17, 18) Tepetan moy sarilim: ‘Kasin siak may too ya labay kon pansiansiaen so deen tan akaparaan ak ya miaregloan? No asakitan ak na sakey  ya agi, kasin sintien kon tampol? Anggano singa anggapo met so kasalanan ko, kasin siak lay manggagawa na paraan pian naayos ya tampol so problema mi may agi o alagaren ko ni ya sikatoy onasingger ed siak? Kasin papasesegen koy arum ya ayosen day problema ra no walay nagawan agpantatalosan?’

12. Panon ya impanengneng nen Jesus so kaabigan?

¹² Maabig so impantrato nen Jesus ed saray totoo. (Mat. 11:28-30) Lanang ya mauyamo, tan tatalosan toy situasyon na arum. Singa bilang, nen walay biin taga Fenicia ya akis lan akis tan mikakasi kalamor ya paabigen to may anak to, aga nairita si Jesus. Agto lawari pagbigyan so kerew to may bii, pero nen anengneng ton mabisbiskeg so pananisia to, pinaabig to lanlamang may anak to. (Mat. 15:22-28) Impanengneng met nen Jesus so kaabigan diad impangiter toy simbawa. No walay nanengneng to ya aliwan gagawaen na kakaaro to, agto ra kokonsintien noagta babagaan to ra. Singa bilang, nen imbaga nen Pedro ya kasian nen Jesus so sarili to, sinimbawan tampol nen Jesus si Pedro diad arapan na saray disipulo ta kontra ed panlabayan nen Jehova so iisipen to. (Mar. 8:32, 33) Ag-iman ginawa nen Jesus pian pabaingan si Pedro. Ginawa to iman pian panonotan si Pedro tan arum ni ran disipulo ya kaukolan dan nonoten ya lanang so panlabayan nen Jehova. Ompan abaingan met si Pedro, pero seguradon akaaral ed saman.

13. Panon tayon naipanengneng so tuan kaabigan?

¹³ Pian naipanengneng moy tuan kaabigan ed kaaro o kapamilyam, ompan no maminsan et kaukolan mon simbawaen. No mangiter kay simbawa, alig moy Jesus. Ibasem ya lanang so simbawam ed saray prinsipyo na Biblia. Seguroen ya mauyamo so pitongtong mo, tan agmo huhusgaan. Mantiwala ka ya dengelen toy simbawam ta inaro toy Jehova tan inaro to ka. Tepetan moy sarilim: ‘Kasin papakpelan koy liknaan ko ya katongtongen so kaarok o kapamilyak no nanenengneng kon aliwa lay gagawaen to? No walay sisimbawaen ko, kasin mauyamo so pitotongtong ko o ansakit so panagsalitak? Antoy motibok no mangiiter ak na simbawa? Kasin gagawaen ko itan lapud nasyosyodotan ak ed samay too odino lapud labay ko ya maong so pansumpalan to?’

14. Panon ya impanengneng nen Jesus so tuan kamaongan?

¹⁴ Maomaong si Jesus. Lanang ya manaanap tan manggagawa na paraan pian natulongan toy arum. No manggagaway kamaongan si Jesus, lanang ya dugay motibo to ta amta ton atan so mamaliket ed Ama to. Say tuan kamaongan sirin et amay ontulong kad arum lapud antam ya atan so dugan gawaen. Tan kaukolan mo met ya seguroen ya duga so motibom. Posible kasi ya anggano dugay gagawaen na sakey ya too et aliway motibo to? On, posible. Singa bilang, imbaga nen Jesus ya wala ray ontutulong ed saray mairap-bilay, pero ipapangta ray gagawaen da pian irayew ira na arum. Tua, maong so gagawaen da, pero agnaliliketan si Jehova ta aliway motibo ra.—Mat. 6:1-4.

15. Panon tayon naipanengneng so tuan kamaongan?

¹⁵ Naipanengneng tayoy tuan kamaongan no aliwan makasarili so motibo tayo diad itutulong tayod arum. Kanian tepetan moy sarilim: ‘No walay mankaukolay tulong, kasin agko labat nakakasian noagta manggagawa ak met na paraan pian natulongan ko? Antoy motibok no manggagawa ak na kamaongan ed arum?’

16. Antoy dapat tayon gawaen kada agew, tan akin?

¹⁶ Anggano abautismoan tayo la, kaukolan tayoy mansagpot pian tuloytuloy ya akasulong ed sikatayo so balon personalidad. Di ba, no walay balon kawes tayo, alwaran tayon maong  pian mansiansian marakep? Ontan met ed balon personalidad ya akasulong ed sikatayo. Mansiansia itan ya marakep no ipanengneng tayo so bunga na masanton espiritu kada agew. Tandaan tayo ya uusaren nen Aman Jehova so masanton espiritu ed amin ya gagawaen to. (Gen. 1:2) Kanian dapat nanengneng met ed amin ya gagawaen tayo so bunga na masanton espiritu. Singa bilang, no talagan walay pananisia tayo, dapat walay katekep ton gawa, ta ibabaga na Biblia ya “say pananisia . . . ya andian na saray gawa et inatey.” (Sant. 2:26) Onaplika met itan ed arum nin ugali o kualidad ya kaiba ed bunga na masanton espiritu. No pansasagpotan tayon ipanengneng iratan, mabulbulos met ya usaren nen Jehova so masanton espiritu to pian tulongan to itayo.

17. Akin et agtayo dapat onsusuko no wala ray pagkakataon ya agtayo nipanengneng so bunga na masanton espiritu?

¹⁷ Anggano abaybayag tayo lan abautismoan, walan-wala ray pagkakataon ya agtayo naipanengneng so bunga na masanton espiritu. Pero no ontan so nagawa, agtayo dapat onsusuko. Imanoen iyan ilustrasyon. No apilat so paboritom ya kawes, kasin ibantak mo lan tampol? Siempre, andi. Seguradon daiten mo pian nagamit mo ni, tan manalwar ka la pian agla napilat. Ontan met ed balon personalidad. No bilang ta agmo naipanengneng so kaabigan, anos, o panangaro, tan lapud satan et asakitan mo so sakey a too, agka nadidismaya. Sarag mon ipetek so lingom. Singa bilang, kerew kay perdona ed samay toon asakitan mo pian ompawil may datin ulopan yo. Tan maabig no apipigeren mo lay panagsalitam tan ugalim pian agmo la naulit may ginawam.

18. Antoy seguradon gawaen nen Jehova no nanenengneng to ya mansasagpot ka pian naisulong moy balon personalidad?

¹⁸ Maong labat ta walay alimbawan aligen tayo—si Jesus! No aligen tayoy panagnonot tan ugali to, seguradon naisulong tayo so balon personalidad. Diad sayan artikulo, apatira labat ya kualidad so inaral tayo. Anto kasi no i-personal study’m so arum nin kualidad ya kaiba ed bunga na masanton espiritu? No gawaen mo itan, mas nausisam so sarilim tan nanengneng mo no anto ni ray papaaligwasen mo. Wala ray artikulo tungkol ed saya ya makatulong ed pam-personal study’m. Akalista iratan diad Giya ed Pan-research na Saray Tasi nen Jehova diad subject ya “Bilay na Kristiano,” insan onlad “Bunga na Espiritu.” No nanenengneng nen Jehova ya mansasagpot ka pian naisulong moy balon personalidad, seguradon tulongan to ka pian naisulong mo tan napansiansiam itan.