1. Waut deit daut mieeschte aun onse Natua?

 ENDOONT aus wie ons noch mol een poa Doag ooda aul väle Joaren haben deepen loten, wie aula wellen soone Natua haben, waut Jehova jefelt. Daut wie daut kjennen, mott wie doano oppaussen, waut wie denkjen. Wuarom? Wiels doano, woo onse Jedanken sent, doano woat uk onse Natua sennen. Wan wie en eentwajch doaräwa nodenkjen, woo wie ons Fleesch jefaulen kjennen, dan woa wie uk schlajchte Räd haben un schlajchtet doonen (Efs. 4:17-19). Oba wan wie äwa goodet nodenkjen, woat ons daut leichta sennen, soone Räd un soone Woakjen to haben, waut onsen himlischen Voda jefaulen (Gal. 5:16).

2. Waut vonne Froagen woa wie en disen Artikjel derchgonen?

² Soo aus wie en dän väajen Artikjel jeseenen haben, kjenn wie nuscht doajäajen doonen, daut wie nich noch mol schlajchte Jedanken haben. Oba wie kjennen doafäa oppkomen, daut wie daut nich doonen, waut wie denkjen. Ea wie ons kjennen deepen loten, mott wie opphieren soo to räden un soont to doonen, waut Jehova haust. Daut es daut ieeschte un daut wichtichste, waut wie doonen motten toom de oole Natua uttrakjen. Oba daut wie Jehova gaunz un goa jefaulen kjennen, mott wie uk daut Jeboot nokomen: “Kjleet junt met de niee Natua” (Kol. 3:10, NW). En disen Artikjel woa wie de Froagen beauntwuaten: Waut es “de niee Natua”? Woo kjenn wie ons met de niee Natua kjleeden un dee uk aunhoolen?

3. Waut es “de niee Natua” no Galata 5:22-23 no, un woo kaun eena sikj met dee kjleeden?

³ Soona, waut sikj met “de niee Natua” jekjleet haft, denkjt un haundelt soo aus Jehova. Eena kaun sikj met de niee Natua kjleeden, wan eena de Frucht von Gott sienen  Jeist verendach brinjt un eenem siene Jedanken un Jefeelen un Woakjen von disen Jeist leiden lat (läs Galata 5:22-23). Soona leeft biejlikj Jehova un siene Deena (Mat. 22:36-39). Dee velist uk nich siene Freid, wan hee uk schwoaret derchjeit (Jak. 1:2-4). Hee sträft no Fräd (Mat. 5:9). Hee jeit jeduldich un leeftolich met aundre om (Kol. 3:13). Hee leeft daut goode un kjemt daut uk no (Luk. 6:35). Hee wiest derch siene Woakjen, waut fa eenen stoakjen Gloowen hee aun sienen himlischen Voda haft (Jak. 2:18). Hee blift ruich, wan aundre met am strieden wellen un beharscht sikj, wan hee en Vesieekjunk kjemt (1. Kor. 9:25, 27; Tit. 3:2).

4. Wuarom kjenn wie de Ieejenschoften von Galata 5:22-23 nich eenselwies verendach brinjen, wan wie ons met de niee Natua kjleeden?

⁴ Daut wie ons kjennen met de niee Natua kjleeden, mott wie aul de Ieejenschoften verendach brinjen, wua Galata 5:22-23 von räd un uk aundre Ieejenschoften, wua de Schreft von rät. * Dise Ieejenschoften sent nich soo aus Poats von onse Kjleedie, waut eena sikj eent opp eemol auntrakjen kaun. Väle von dise Ieejenschoften likjnen sikj met aundre. Biejlikj, wan wie onsen Näakjsten sea leewen, dan woa wie uk leeftolich un jeduldich met dän sennen. Un daut wie kjennen een gooda Mensch sennen, mott wie uk ruich bliewen un ons beharschen kjennen.

5. Waut meent daut, Christus siene Jesennunk to haben, un wuarom sell wie ons doamet aufjäwen, waut Jesus deed? (1. Korinta 2:16).

⁵ Läs 1. Korinta 2:16. Daut wie ons kjennen de niee Natua auntrakjen, mott wie Christus siene Jesennunk haben. Wie motten daut aulsoo lieren, soo to denkjen aus Jesus un am dan nodoonen. Aun Jesus wieren Gott siene Ieejenschoften soo krakjt to seenen, aus wan eena en eenen reinen Spieejel kjikjt un sitt, woo eenem krakjt lat (Heb. 1:3). Je mea wie soo denkjen aus Jesus, je dolla woa wie soo haundlen aus hee. Dan woa wie emma mea soone Natua haben aus Jesus (Filip. 2:5).

6. Aun waut sell wie denkjen, wan wie ons de niee Natua auntrakjen wellen?

⁶ Es daut werkjlich mäajlich, daut wie Jesus nodoonen kjennen? Veleicht denkj wie: “Jesus es je volkomen. Ekj woa nienich  krakjt soo sennen kjennen aus hee.” Wan du die soo feelst, dan denkj mol äwa dree Sachen no. Ieeschtens: Wie sent doatoo jemoakt, daut wie Jehova un Jesus nodoonen kjennen. Wan du west, kaust du am nodoonen, wan uk nich krakjt (1. Mo. 1:26). Tweedens: Met de Help von Gott sienen heiljen Jeist, waut de gaunz stoakjste Krauft es, kaust du Sachen doonen, waut du met diene ieejne Krauft nienich wurscht doonen kjennen. Dreddens: Jehova velangt nich, daut du de Frucht von dän heiljen Jeist hundat Prozent verendach brinjst. Ons leeftolja Voda haft mau rajcht dusent Joa bestemt fa deejanje, waut hia oppe Ieed läwen woaren, bat dee kjennen volkomen sennen (Opb. 20:1-3). Waut Jehova nu haben well, es, daut wie ons bastet doonen un ons opp siene Krauft veloten.

7. Äwa waut woa wie nu räden?

⁷ Woo kjenn wie Jesus dan nodoonen? Wie woaren mol äwa vea Ieejenschoften von dän Jeist siene Frucht räden. Bie jieda Ieejenschoft woa wie von Jesus lieren, woo hee dee wees. Wie woaren uk äwa eenje Froagen räden, waut ons halpen to vestonen, woo goot wie ons aul met de niee Natua kjleeden doonen.

8. Woo wees Jesus siene Leew?

⁸ Jesus haud eene groote Leew fa Jehova, un doawäajen deed hee väl fa am un uk fa ons (Joh. 14:31; 15:13). Hee wees derch sien Läwen hia oppe Ieed uk, woo sea hee de Menschen leewd. Hee wia jieda Dach leeftolich un metliedent met Menschen, mau rajcht, wan eenje uk jäajen am wieren. Un eene besondre Wajch, woo hee de Menschen Leew wees, wia doaderch, daut hee an von Gott sien Kjennichrikj lieed (Luk. 4:43-44). Hee wees siene groote Leew to Gott un to de Menschen uk doaderch, daut hee reed wia, sikj von Sinda dootmoaken to loten. Doaderch muak hee dän Wajch op, daut wie noch mol kjennen daut eewje Läwen kjrieen.

9. Woo kaun ekj miene Leew uk soo wiesen, aus Jesus deed?

⁹ Wie jeewen ons Jehova han un leeten ons deepen, wäajen wie am sea leewden. Un soo aus Jesus well wie Jehova doaderch onse Leew wiesen, daut wie de Menschen fein behaundlen. De Apostel Johanes schreef: “Wäa sienen Brooda nich goot es, dän hee sitt, dee kaun Gott nich goot sennen, dän hee nich sitt” (1. Joh. 4:20). Wie wudden selfst mol doaräwa nodenkjen kjennen: “Hab ekj eene groote Leew fa de Menschen? Hab ekj Metjefeel, wan ekj met aundre omgo, mau rajcht, wan dee uk goanich leeftolich to mie sent? Brinjt de Leew mie bat doa miene Tiet, Krauft un daut tietelje to brucken, om aundre von Jehova to lieren? Sie ekj reed dit to doonen, wan de mieeschte doa uk nich no horchen wellen ooda mau rajcht jäajen mie sent? Hab ekj de Mäajlichkjeit noch mea Tiet doafäa to brucken, om dit Prädichtwoakj to unjastetten?” (Efs. 5:15-16).

10. Woo wees Jesus, daut hee no Fräd sträwd?

¹⁰ Jesus sträwd no Fräd. Wan de Menschen am uk nich goot behaundelden, deed hee sikj oba nich aufrajchnen. Un nich bloos daut. Hee strenjt sikj uk sea aun Fräd to moaken un rod aundre too, sikj nich mea to strieden. Biejlikj lieed hee siene Nofolja, daut dee aus Breeda sullen Fräd haben unjarenaunda, daut Jehova äare Aunbädunk aunnämen kunn (Mat. 5:9, 23-24). Jesus holp siene Apostel emma wada doamet opptohieren, sikj doaräwa to strieden, wäa mank an de jratsta wia (Luk. 9:46-48; 22:24-27).

11. Woo kjenn wie no Fräd sträwen?

¹¹ Biem Fräd moaken es mea met en, aus  bloos nich met dän aundren to strieden. Wie motten ons aunstrenjen, wan wie wellen met aundre Fräd moaken un onse Breeda un Sestren tooroden, sikj unjarenaunda wada eenich to sennen (Filip. 4:2-3; Jak. 3:17-18). Wie wudden selfst doaräwa nodenkjen kjennen: “Waut sie ekj reed aules to doonen, om met aundre Fräd to moaken? Wan een Brooda ooda eene Sesta mie waut jedonen haft, bliew ekj dan doll? Wacht ekj bat dee no mie kjemt, om Fräd to moaken ooda go ekj no dän, mau rajcht, wan daut soo lat, daut et dän siene Schult wia? Wan daut paussent es, rod ekj eenen aundren too, waut sikj met wäm nich eenich es, dän Trubbel wada to fiksen?”

12. Woo wees Jesus, daut hee leeftolich wia?

¹² Jesus wia leeftolich (Mat. 11:28-30). Hee haud fa aundre Vestentnis, wan siene Omstend uk nich leicht wieren un wees doaderch, woo leeftolich hee wia. Aus biejlikj eemol eene kanaanitische Fru no am kjeem un am prachad, daut hee äa Kjint heelen sull, wull hee daut ieeschtlich nich. Oba aus hee dan äaren stoakjen Gloowen sach, deed hee daut leeftolich (Mat. 15:22-28). Wan Jesus uk leeftolich wia, hilt hee sikj oba nich trigj aundre Rot to jäwen. Eenjemol wia hee een bät strenj met aundre un wees doaderch, daut hee leeftolich wia. Biejlikj wull Petrus am opp eene Sauz doavon aufroden, Gott sienen Wellen to doonen, un Jesus wees am ver de aundre Jinja strenj trajcht (Mar. 8:32-33). Hee deed daut nich, daut Petrus sikj sull schlajcht feelen, oba toom am lieren un de aundre Jinja wiesen, daut see nich sullen stolt woaren. Secha schämd Petrus sikj een bät, oba am kjeem disen Rot sea togood.

13. Woo kjenn wie opp iernst leeftolich sennen?

¹³ To wäm leeftolich sennen bediet eenjemol, daut eena dän eenen Rot jäwen mott. Wan du daut deist, dan doo Jesus no un stett dienen Rot emma opp de Gruntsauzen ut Gott sien Wuat. Sie frintlich un denkj emma soo, daut de aundre daut rajchte doonen wellen. Vetru uk doaropp, daut dee, waut Jehova un die leewen, dienen leeftoljen Rot nokomen woaren. Du wurscht doaräwa nodenkjen kjennen: “Hab ekj dän Moot, wäm waut to sajen, dän ekj leew, wan ekj see, daut dee waut orrajchtet deit? Wan daut needich es Rot to jäwen, räd ekj dan leeftolich? Wuarom jäw ekj wäm eenen Rot? Doo ekj daut, wäajen ekj mie äwa dän oajren mott ooda es daut, wäajen ekj dän werkjlich halpen well?”

14. Woo deed Jesus goodet fa aundre?

¹⁴ Jesus weet nich bloos, waut goot es, oba hee kjemt daut uk no. Hee leeft je sienen Voda, un doawäajen deit hee emma daut rajchte un utem rajchten Senn. Een gooda Mensch sieekjt emma no Jeläajenheiten, woo hee aundre halpen un goodet doonen kaun. Daut es nich jenuach bloos to weeten, waut daut goode es, oba wie motten daut uk doonen un utem rajchten Senn. Veleicht wunda wie: “Es daut mäajlich, daut eena goodet utem orrajchten Senn doonen kaun?” Daut es. Jesus räd biejlikj von deejanje, waut de Oame holpen, oba daut soo deeden, daut aundre daut seenen kunnen un an doafäa lowden. Wan daut uk goode Sachen wieren, waut dee deeden, wia Jehova oba nich tofräd met dee (Mat. 6:1-4).

15. Woo kjenn wie goode Menschen sennen?

¹⁵ Wie kjennen bloos goode Menschen sennen, wan wie daut rajchte doonen, onen daut wie selfst waut trigjvelangen. Wie wudden kjennen doaräwa nodenkjen: “Weet ekj daut bloos, waut ekj doonen sull, ooda doo ekj daut uk? Ut waut fa eenen Senn doo ekj goodet?”

16. Waut sell wie jieda Dach doonen, un wuarom?

¹⁶ Wie wellen nienich denkjen, daut wie ons nich mea met de niee Natua kjleeden motten, wan wie ieescht jedeept sent. De niee Natua es soo aus niee Kjleedie, wua wie no oppaussen motten. Eent, woo wie daut doonen kjennen, es, wan wie jieda Dach doano kjikjen, woo wie dän Jeist siene Frucht verendach brinjen kjennen. Daut es needich, wiels Jehova een Gott es, dee doa waut deit un sien Jeist es siene Krauft (1. Mo. 1:2). Doawäajen mott jieda Ieejenschoft von dän Jeist siene Frucht ons bat doa brinjen, waut to doonen. De Jinja Jakobus schreef biejlikj: “Gloowen onen Woakjen [es] doot” (Jak. 2:26). Un krakjt soo es daut uk met de aundre Ieejenschoften von dän Jeist siene Frucht. Wan wie dee verendach brinjen, dan es to seenen, daut Gott sien Jeist ons halpen deit.

17. Waut sell wie nich doonen, wan ons daut nich emma jlekjt, dän Jeist siene Frucht verendach to brinjen?

¹⁷ Mau rajcht soone, waut sikj aul Joaren trigj haben deepen loten, jlekjt daut nich emma dän Jeist siene Frucht verendach to brinjen. Oba daut wichtichste es, daut wie daut wieda proowen un nich oppjäwen. Denkj wie mol aun dit Jlikjnis. Wan du eent von diene baste Kjleeda nich met Fliet tweijeräten hast, wurscht du dee fuaz wajchschmieten? Secha wurscht du proowen dee soo goot aus mäajlich wada foadich to moaken, un du wurscht dan noch dolla no dee oppaussen. Die jlekjt daut veleicht nich emma, frintlich, jeduldich ooda leeftolich to sennen, oba woa doawäajen nich mootloos. Wan du opprechtich om togoodhoolen frajchst, kaust du dän Schoden soo to sajen wada repäaren un du woascht wada kjennen Frind sennen met de aundre. Sie die gaunz eenich, de Sach daut näakjste Mol bäta to doonen.

18. Äwa waut kjenn wie ons gaunz secha sennen?

¹⁸ Woo dankboa sent wie nich, daut wie Jesus sien Biespel haben. Je mea wie soo jesonnen sent aus hee, je bäta woa wie soo sennen kjennen aus hee. Un je mea wie soo sennen aus hee, je bäta woa wie ons met de niee Natua kjleeden kjennen. En disen Artikjel hab wie bloos von vea Ieejenschoften von dän Jeist siene Frucht jerät. Wie wudden ons kjennen de Tiet nämen un noch de aundre Ieejenschoften von dän Jeist siene Frucht studieren un doaräwa nodenkjen, woo goot wie dee aul nokomen. Doatoo woascht du mea Artikjels finjen en dän Studienleitfaden für Jehovas Zeugen bie de Äwaschreft “Leben als Christ” un dan “Frucht des Geistes”. Du kaust die secha sennen, wan du dien Poat deist, woat Jehova die halpen, daut du die met de niee Natua kjleeden kaust un dee uk aunhoolen.