1. Itshi tudi naye gukalagala ha gukhala nu makalegelo adi musuanguluisa Yehowa?

 MUKUT’ETU agasue tudi naye gukhala nu makalegelo ana suanguluisa Yehowa ikhale tuabatijiwa masugu awa, nga tuabatijiwe gale mualeha. Ha gukhala nu makalegelo ene, tudi naye gusombegesa matangi etu. Mukunda n’atshi? Handaga matangua avula, ndaga tuana tangiza yene tuana kalagala. Gila tangua diagasue tudi mutangiza luholo lua gusuanguluisa muila wetu, mbayitutuma ha guzuela nu gukalagala ndaga jiabola. (Ef. 4:17-19) Uvi, gula tudi mutangiza ndaga jiabonga, mbayitutuma ha guzuela nu ha gukalagala ndaga jiana suanguluisa Yehowa Tata wetu.—Gal. 5:16.

2. Mihu itshi tuza muzuelela mu longo edi?

² Gifua luholo tuayimonele mu longo diabalega, ishigo ndaga yaleba ha gubemba gutangiza ndaga jiagasue jiabola. Uvi tuajiya gutuna gukalagala ndaga jiene jiabola. Gutuama egi tubatijiwe, tudi naye gutuna guzuela nu gukalagala ndaga jianago gusuanguluisa Yehowa. Yene ndaga ya thomo nu ya ndando tudi naye gutshita ha gukatula umuthu ukulu. Ha gusuanguluisa Yehowa, tudi naye nji gutumagela mukhuala udi muzuela egi: “Sudigenu umuthu uhe-uhe.” (Kol. 3:10) Longo edi diza gutukuatesa ha guheta mvutu gu mihu eyi: “Umuthu uhe-uhe” udi itshi? Luholo lutshi tuajiya gusudiga umuthu wene nu gutuna guwukatula?

3. Ha gutadila Galatiya 5:22, 23, “umuthu uhe-uhe,” udi itshi? Luholo lutshi muthu wajiya guwusudiga?

³ “Umuthu uhe-uhe” udi mukotelesa gutangiza nu gutshita ndaga gifua luholo Yehowa wana kalagala. Muthu wana sudiga  umuthu uhe-uhe gula udi mumonesa mabundu a nyuma ya Nzambi, nu gula udi mubemba egi nyuma yene ituameze matangi nu makalegelo enji. (Tanga Galatiya 5:22, 23.) Ha gufezegesa, muthu muene wana zumba Yehowa nu akombeledi enji. (Mat. 22:36-39) Wana bamba gusuanguluga guenji ikhale udi mutagana nu malamba. (Yak. 1:2-4) Wana kamba guhuima. (Mat. 5:9) Wana khala nu guhuiminyina nu khadilo dia gisemo gudi athu ako. (Kol. 3:13) Wana zumba ndaga jiabonga nu wana gujikalagala. (Luka 6:35) Makalegelo enji ana monesa egi wana khala nu gutshigina guakola gudi Yehowa. (Yak. 2:18) Ganago guvua khabu muphushi, wana gudikanda nji gula walolewa.—1 Kol. 9:25, 27; Tito 3:2.

4. Ha gusudisa umuthu uhe-uhe, mukunda n’atshi tudi naye gukudisa makalegelo agasue adi mu Galatiya 5:22, 23 nu mu verse jiko?

⁴ Ha gusudiga umuthu uhe-uhe, tudi naye gukudisa makalegelo agasue adi mu Galatiya 5:22, 23 nu mu verse jiko. * Makalegelo ene ashigo gifua milele tuana sudiga umoshi-umoshi. Makalegelo ene ana gudifuana nu makalegelo ako. Ha gufezegesa, gula udi diago muzumba muthu n’a muku’enu, mbawumumonesela khadilo dia guiminyina nu dia gisemo. Gula udi nu mutshima wabonga, mbawukhala muthu watuluga nu khadilo dia gudikanda.

5. Gukhala nu “matangi a Klisto” gudi mukotelesa itshi? Mukunda n’atshi tudi naye gulonguga umuthu wa Yesu? (1 Kolinto 2:16)

⁵ Tanga 1 Kolinto 2:16. Ha gusudiga umuthu uhe-uhe, tudi naye gukhala nu “matangi a Klisto.” Yakotelesa egi tudi naye gujiya matangi a Yesu nu gulandula gifezegeselo gienji. Yesu wamonesele mabundu a nyuma ya Nzambi mu luholo luatagana. Udi diago mumoneshi watagana wa umuthu wa Yehowa. (Heb. 1:3) Gula tudi mutshita ngolo ha gutangigiza gifua Yesu mbayitukuatesa ha gukalagala ndaga gifua muene nu mbatulandula makalegelo enji.—Fili. 2:5.

6. Itshi tushigo naye gujimbila tangua tudi mukalagala ngolo ha gusudiga umuthu uhe-uhe?

⁶ Tuajiya diago gulandula gifezegeselo gia Yesu ba? Matangua ako tuajiya gutangiza egi: ‘Yesu udi muthu watagana. Ngajiyilego gulandula gifezegeselo gienji mu luholo luatagana nga hazonda.’ Gula udi mutangiza ngenyi, ujimbilago ndaga eji: Ya thomo, wafugiwe mu  gifuanesa gia Yehowa nu Yesu. Hene, wajiya guzula desizio dia gulandula gifezegeselo giayo. Wajiya nji gukhala nu makalegelo ako gifua ene. (Gis. 1:26) Ya mbadi, nyuma ya Nzambi idi nu ngolo jia gugukuatesa ha gutshita ndaga wajiyilego gutshita mu ngolo jiaye hakhaye. Ya thathu, Yehowa ganago gututoga ha gumonesa mabundu a nyuma yenji mu luholo luatagana mangino. Tata wetu wa guzumba walondele gale ndaga hagula athu adi nu felela dia guheta monyo ha mavu, mbaabue athu atagana mu uhinyinyi wa ivo 1000 wa Yesu. (Gum 20:1-3) Uvi mangino Yehowa wana gututoga ha gukalagala ngolo nu ha gumushila mutshima hagula atukuatese.

7. Itshi tuza muzuelela mu longo edi?

⁷ Mu ndaga jitshi tuajiya gulandula diago gifezegeselo gia Yesu? Tuza muzuelela itshinyi nguana ya mabundu a nyuma ya Nzambi. Mu gitshinyi giagasue, tuza mumona luholo Yesu wamonesele makalegelo ene nu malongo tuajiya guheta. Tuza nji muzuelela mihu yajiya gutukuatesa ha gujiya luholo tuajiya gusudiga umuthu uhe-uhe.

8. Luholo lutshi Yesu wamonesele egi wakhalele muzumba athu ako?

⁸ Yesu wana zumba Yehowa muavula, gishina giene wakalegele ndaga jiamutogele muene nu wahanele monyo wenji mukunda nu esue. (Yone 14:31; 15:13) Yesu wamonesele egi wana zumba athu muavula tangua diakhalele muene ha mavu. Lusugu nu lusugu, wakhalele muzumba athu, wakhalele gudihaga ha fundo diawo, ikhale athu ako akhalele gumutuna. Ha gumonesa egi wana zumba athu, wakhalele gualongesa lukuma luatadila Ufumu wa Nzambi. (Luka 4:43, 44) Wamonesele nji egi wana zumba Nzambi nu athu luholo luafile muene gufua gua lamba ha mago dia athu abola. Gufua guenji guatuhanele luendu lua guheta monyo wa ivo nu ivo.

9. Luholo lutshi tuajiya gumonesa egi tuana zumba athu ako gifua Yesu?

⁹ Tuana gudihana gudi Yehowa Sh’etu wa mu dilu nu tuana batijiwa handaga tuana gumuzumba. Gifua Yesu, tudi naye gukalegela athu ako ndaga jiabonga ha gumonesa egi tuana zumba Yehowa. Mupostolo Yone wasonegele egi: “Gula muthu gashigo muzumba phangi’enji yonu wana mona muene, gajiyilego guzumba Nzambi khenji gamonele ndo.” (1 Yone 4:20) Tuajiya gudihula egi: ‘Ngana zumba athu ako muavula ba? Ngana vila athu ako khenda ngatshima angukalegela gubola ba? Guzumba guana gungutuma ha gukalegela tangua nu ima yami ha gukuatesa athu ako ha gujiya Yehowa ba? Ngana khala hehi ha gukuatesa athu ako ha gujiya Yehowa ikhale athu avula anago gusuanguluga nga ana tuna gungutegelela ba? Ngana balegesa tangua diavula mu mudimo wa gubuisa athu alandudi ba?’—Ef. 5:15, 16.

10. Itshi idi mumonesa egi Yesu wakhalele mukamba guhuima?

¹⁰ Yesu wakhalele mukamba guhuima. Tangua athu akhalele gumukalegela ndaga jiabola, gakhalelego muvutula gubola mu gubola. Wakhalele nji hehi ha gukamba guhuima nu wakolesele athu ako ha gutshita ngenyi. Ha gufezegesa, wazuelele egi gula muthu udi nu mulonga nu phangi’enji, udi naye gukamba guhuima hagula Yehowa atshigine ndaga jidi mutshita muene ha gumukombelela. (Mat. 5:9, 23, 24) Wakuatesele apostolo enji iphungu yavula ha gubemba gumana tangua akhalele mukamba gujiya gula nanyi udi wabalega gukoma mukatshi diawo.—Luka 9:46-48; 22:24-27.

11. Luholo lutshi tuajiya gumonesa egi tuana kamba guhuima?

¹¹ Ha gumonesa egi tuana kamba guhuima, tushigo naye phamba gutuna ndaga jiajiya guzola nguma. Uvi, tudi naye nji gutshita ngolo  ha gukamba guhuima nu gukolesa aphangi’etu ha gukamba guhuima guene gula adi nu mulonga nu athu ako. (Fili. 4:2, 3; Yak. 3:17, 18) Tuajiya gudihula mihu eyi: ‘Itshi ngajiya gutshita ha gukamba guhuima nu athu ako? Gula phangi mumoshi wangukalegela gubola, ngana landula gumuvila khabu ba? Gula muthu wangukalegela gubola, ngana khala muthu wa thomo ha gukamba guhuima, inyi ngana nengena egi muene udi naye guza hagula tukambe guhuima? Ngana kuatesa athu ako ha gukamba guhuima gula adi nu mulonga ba?’

12. Luholo lutshi Yesu wakhalele mumonesela athu ako gisemo?

¹² Yesu wakhalele mukalegele athu ndaga nu gisemo jiagasue. (Mat. 11:28-30) Gakhalelego muenya ndaga jiakola, ikhale tangua diakhalele muene mutagana nu malamba. Ha gufezegesa, tangua mukhetu mumoshi wa gu Fenisia wamububidile ha gusaga mun’enji, thomo Yesu gatshitshilego ndaga mukhetu muene wamutogele, uvi hamonesele muene gutshigina guakola, Yesu wasagele mun’enji. (Mat. 15:22-28) Ngatshima Yesu wakhalele muenya gisemo, uvi wakhalele muhana nji malongo gudi athu akhalele muene muzumba gula akalagala gubola. Ha gufezegesa, tangua Phetelo wawambelele Yesu ha gubemba gutshita gutshigina gua Yehowa, Yesu wamubalele ha meso a alandudi ako. (Mako 8:32, 33) Gamubalelego ha gumuhana musonyi, uvi yakhalele mukunda nu gumuhana formasio nu ha gukuatesa alandudi ako ha gujiya egi ashigo naye gumukanga njila ha gutshita gutshigina gua Nzambi. Idi yadiago egi ndaga yene yasagesele Phetelo, uvi longo diamuhanele Yesu diamukuatesele.

13. Luholo lutshi tuajiya gumonesela athu ako gisemo?

¹³ Matangua ako, ha gumonesela athu wana zumba gisemo, yajiya gutoga egi waahane longo gula akalagala gubola. Tangua udi guahana longo, udi naye gukalegela Mbimbi ya Nzambi ha gulandula gifezegeselo gia Yesu. Sha mutshima egi aphangi ene ana tshigina gutshita ndaga jiabonga nu mbaakalegela malongo udi guahana, handaga ana zumba Yehowa nu ana guguzumba nji. Wajiya gudihula egi: ‘Gula muthu ngana zumba wakalagala gubola, ngana khala nu gikhesa gia gumuhana longo ba? Gula idi mutoga egi nguhane longo diene, ngana zuela nu gisemo giagasue ba? Itshi idi gungutuma ha guhana longo diene? Ngudi muhana muthu muene longo handaga wanguhanyi khabu nga idi mukunda nu gumukuatesa?’

14. Luholo lutshi Yesu wamonesele egi wakhalele nu mutshima wabonga?

¹⁴ Yesu gakhalelego phamba mujiya ndaga jiabonga, uvi wakhalele nji gujitshita. Wakhalele mutshita ndaga nu matangi abonga handaga wakhalele muzumba Sh’enji. Muenya mutshima wabonga wana kuatesa athu ako nu wana guakalegela ndaga jiabonga. Hene, tushigo naye phamba gujiya ndaga jiabonga, uvi tudi naye nji gujikalagala nu matangi abonga. Uvi tuajiya gudihula egi: ‘Muthu wajiya gutshita ndaga yabonga nu matangi abola ba?’ Ayi. Ha gufezegesa, Yesu wazuelele egi athu ako akhalele muhana phutu ima, uvi akhalele mutshigina egi athu ajiye ndaga yene hagula a atumbuise. Ngatshima akhalele mutshita ndaga jiabonga, uvi Yehowa gakhalelego musuanguluga nawo.—Mat. 6:1-4.

15. Luholo lutshi tuajiya gumonesa egi tudi nu mutshima wabonga?

¹⁵ Ha gumonesa egi tudi nu mutshima wabonga, tudi naye gutshitshila athu ako ndaga nu matangi abonga. Wajiya gudihula egi: ‘Ngana jiya ndaga jiabonga nu ngana gujikalagala ba? Itshi yana gungutuma ha gukalagala ndaga jiabonga?’

16. Itshi tudi naye gutshita lusugu nu lusugu? Mukunda natshi?

¹⁶ Tushigo naye gutangiza egi gungima dia gubajiwa, tuajiyilego gulandula gukalagala ngolo ha gusudiga umuthu uhe-uhe. Umuthu uhe-uhe udi gifua “mulele uhe-uhe” wago tudi naye gubamba muabonga. Ha gubamba umuthu wene, tudi naye gumonesa mabundu a nyuma ya Nzambi lusugu nu lusugu. Mukunda natshi? Handaga nyuma ya Nzambi, yakotelesa ngolo jienji, yana gutukuatesa ha gutshita ndaga. (Gis. 1:2) Hene, tudi naye gumonesa mabundu a nyuma ya Nzambi mu makalegelo etu. Ha gufezegesa, Yakoba wasonegele egi: “Gutshigina gushigo nu midimo gudi […] gua gufua.” (Yak. 2:26) Ndaga yene idi luholo lumoshi nu mabundu agasue a nyuma ya Nzambi.

17. Itshi tushigo naye gutshita gula mu tangua dimoshi ngenyi tuamoneselego mabundu a nyuma ya Nzambi?

¹⁷ Matangua ako, ikhale Aklisto anyi abatijiwe gale ivo yavula yabalega, ana monesa ndo mabundu a nyuma ya Nzambi. Ndaga ya ndando idi egi tushigo naye guleba muila. Tutadilenu gifezegeselo egi. Gula mulele waye wana tshigina muavula wakaluga, wajiya guwubishila mu tangua diene ba? Ndo sha. Gula luholo ludi guene, wajiya guwulonda luko. Gungima wajiya gutshita yagasue ha guwubamba muabonga. Luholo lumoshi nji, ushigo naye guleba muila gula mu tangua dimoshi ngenyi wamoneselego athu ako khadilo dia gisemo, guhuiminyina nga guzumba. Gula wakalegela phangi gubola, udi naye gumutoga ha gugutotesela ha gubamba ufuta wenu. Gungima udi naye guzula desizio dia gutuna guvutugila gubola guene.

18. Mu ndaga itshi tudi naye gusha mutshima?

¹⁸ Tuana suanguluga muavula nu gifezegeselo giatubembele Yesu. Ha gulandula gifezegeselo gia Yesu, tudi naye gutangiza nu gutshita ndaga gifua muene. Gula tudi mutshita ndaga gifua Yesu, mbayikhala ndaga yaleba ha gusudiga umuthu uhe-uhe. Mu longo edi, tuazuelela phamba itshinyi nguana ya mabundu a nyuma ya Nzambi. Idi ndaga yabonga gula tuazula tangua dia gulonguga itshinyi iko ya mabundu a nyuma ya Nzambi nu tuatangigiza luholo tuajiya guyimonesa mu monyo wetu. Ha guheta malongo adi muzuelela ndaga yene, nda mu Guide de recherche pour les Témoins de Jéhovah ha muto wa lumene: “Mode de vie chrétien” gungima waya ha “Fruit de l’esprit.” Sha mutshima egi gula wakalagala ngolo, Yehowa mbawugukuatesa ha gusudiga umuthu uhe-uhe nu ha guwubamba.