1. Wanem nao iumi need for duim mekem iumi garem gudfala wei?

 NOMATA iumi baptaes for staka year finis or for samfala day nomoa, iumi evriwan laek for garem olketa gudfala wei wea mekem Jehovah hapi. For iumi garem olketa gudfala wei, iumi mas kontrolem tingting blo iumi. Why nao olsem? Bikos sapos iumi tingim olketa nogud samting, gogo bae iumi talem or duim olketa nogud samting. (Eph. 4:17-19) Bat sapos iumi tingting abaotem olketa gud samting, datwan bae helpem iumi for talem and duim samting wea Jehovah hapi lo hem.​—Gal. 5:16.

2. Olketa wanem kwestin nao bae iumi storyim lo disfala article?

² Lo article bifor diswan iumi storyim hao nomata bihaen iumi baptaes, samfala taem iumi savve tingim olketa nogud samting, bat iumi savve disaed for no followim datwan. Bifor samwan fit for baptaes, bae hem need for stop for talem and duim samting wea Jehovah heitim. Datwan nao bae helpem hem for lusim old wei blo hem. Bat hem mas duim nara samting for mekem Jehovah hapi. Hem nao for “garem niufala wei.” (Col. 3:10) Lo disfala article bae iumi ansarem olketa kwestin hia: Wanem nao disfala toktok “niufala wei” hem minim? Hao nao iumi savve garem niufala wei, and hao nao for keepim datwan?

3. Wanem nao datfala toktok “niufala wei” hem minim, and man wea garem bae hao? (Galatia 5:22, 23)

³ Samwan wea garem “niufala wei” bae followim hao Jehovah tingim and duim samting. And tu, holy spirit  bae helpem hem for garem olketa gudfala wei. (Readim Galatia 5:22, 23.) Olsem example, man wea garem “niufala wei” bae lovem Jehovah and pipol blo hem. (Matt. 22:36-39) Hem bae gohed hapi nomata hem deal witim hard samting. (Jas. 1:2-4) Hem waka hard for stap gud witim olketa narawan. (Matt. 5:9) Hem patient and kaen. (Col. 3:13) Hem duim gud samting lo narawan. (Luke 6:35) Hem showimaot hem garem strongfala faith lo Jehovah. (Jas. 2:18) And nomata narawan laek raoa witim hem, bae hem kontrolem hemseleva.​—1 Cor. 9:25, 27; Titus 3:2.

4. Hao nao for iumi garem niufala wei?

⁴ For iumi garem niufala wei, iumi need for showimaot olketa gudfala wei wea Galatia 5:22, 23 and olketa nara scripture storyim. * Olketa wei hia hem join witim olketa nara gudfala wei tu. Olsem example, sapos iumi lovem narawan bae iumi patient and kaen lo hem tu. And iumi mas hambol and kontrolem iumiseleva sapos iumi laek for showimaot gudfala wei.

5. Wanem nao hem minim for “garem tingting bilong Christ,” and why nao iumi shud lane abaotem Jesus? (1 Corinth 2:16)

⁵ Readim 1 Corinth 2:16. Iumi need for “garem tingting bilong Christ” mekem iumi garem niufala wei. Diswan minim, iumi mas savve lo hao Jesus ting abaotem olketa samting mekem iumi savve followim example blo hem. Jesus showimaot olketa gudfala wei and hem barava followim olketa wei blo Jehovah. (Heb. 1:3) So iumi need for garem tingting blo Jesus, mekem iumi savve followim example blo hem and garem datfala niu wei.​—Phil. 2:5.

6. Wanem nao iumi shud tingim taem iumi trae for garem niufala wei?

⁶ Maet iumi tingse iumi no fit for followim example blo Jesus from hem perfect. Sapos olsem, tingim olketa samting hia. First samting, Jehovah wakem iumi for garem olketa wei blo hem and Jesus. So iumi fit for followim wei blo tufala nomata iumi no duim lo perfect wei. (Jenesis 1:26) Mek-tu samting, holy spirit blo God hem garem bigfala paoa. God bae iusim holy spirit for helpem iumi for duim olketa samting wea iumi tingse maet iumi  no fit for duim. Mek-thri samting, Jehovah no expectim iumi for duim diswan lo perfect wei, and hem markem 1,000 year for olketa wea bae stap lo earth for kamap perfect. (Rev. 20:1-3) Distaem Jehovah laekem iumi for traem best for garem niufala wei and for depend lo hem for helpem iumi.

7. Wanem nao bae iumi storyim distaem?

⁷ Wanem nao samfala wei blo Jesus wea iumi savve followim? Distaem bae iumi storyim samfala wei wea holy spirit savve helpem iumi for garem. Iumi bae lanem hao Jesus showimaot olketa wei hia. And tu, bae iumi storyim samfala kwestin wea bae helpem iumi for luksavve sapos iumi need for kamap gud lo olketa wei hia.

8. Hao nao Jesus showimaot hem lovem Jehovah and iumi?

⁸ From Jesus lovem Jehovah hem willing for duim wanem Jehovah laekem mekem hem sevem iumi olketa man. (John 14:31; 15:13) Taem Jesus stap lo earth hem showimaot hem barava lovem pipol. Hem kaen and sorre lo pipol, nomata samfala againstim hem. And tu, hem teachim pipol abaotem Kingdom blo God, wea hem nao main wei wea hem showimaot hem lovem pipol. (Luke 4:43, 44) Jesus pruvim hem lovem God tu from hem willing for safa and dae for iumi mekem iumi savve kasem laef olowe.

9. Hao nao iumi savve followim example blo Jesus for showim love lo pipol?

⁹ Iumi dedicate and baptaes bikos iumi lovem Jehovah. So iumi laek followim example blo Jesus for showimaot iumi lovem Jehovah lo hao iumi treatim pipol. Aposol John sei: “Sapos man no lovem brata bilong hem wea hem savve lukim, hard tumas for hem lovem God wea hem no savve lukim.” (1 John 4:20) Hem gud for tingim: ‘Waswe, mi tingim pipol lo territory? Waswe, mi kaen lo olketa nomata taem olketa treatim mi nogud? Waswe, mi willing for iusim taem and selen blo mi for helpem pipol for lane abaotem Jehovah? Waswe, mi gohed for duim diswan nomata staka no tinghae lo preaching waka or againstim mi? Waswe, mi savve spendem moa taem lo ministry?’​—Eph. 5:15, 16.

10. Wanem nao Jesus duim for stap gud witim olketa narawan?

¹⁰ Jesus hem stap gud witim pipol. Taem pipol treatim hem nogud hem no changem bak datwan. And tu, hem trae for stretem eni problem and hem encouragem olketa narawan for duim sem samting tu. Olsem example, hem sei sapos olketa laekem Jehovah for acceptim worship blo olketa, olketa mas stretem eni problem witim brata blo olketa. (Matt. 5:9, 23, 24) And tu-thri taem hem helpem olketa aposol for stretem raoa blo olketa abaotem hu lo olketa nao hem important.​—Luke 9:46-48; 22:24-27.

11. Wanem nao iumi savve duim for stap gud witim narawan?

¹¹ Sapos iumi laek for stap gud witim narawan, iumi mas willing for stretem eni problem wea kamap, and encouragem olketa brata and sista for duim sem samting tu. (Phil. 4:2, 3; Jas. 3:17, 18) Hem gud for tingim: ‘Wanem nao mi willing for duim for stretem problem witim narawan? Taem brata or sista mekem mi feel nogud, waswe, mi gohed kros lo hem? Waswe, mi weitim hem nao for stretem problem, or mi willing for go stretem problem witim hem nomata mi tingse hem nao kosim problem? Waswe, mi encouragem olketa nara brata and sista  wea garem problem witim samwan for go stretem datwan?’

12. Wanem nao Jesus duim wea showimaot hem kaen?

¹² Jesus kaen lo pipol. (Matt. 11:28-30) Hem savve tok kaen and tingim need blo pipol. Olsem example, taem wanfala woman from Phoenicia begim Jesus for healim gele blo hem, nomata firstaem Jesus no duim wanem woman hia askem, hem story kaen lo hem. Bat taem hem lukim woman hia showimaot faith, hem healim gele blo hem. (Matt. 15:22-28) From Jesus hem kaen, hem givim kaonsel lo olketa wea hem lovem tu. Olsem example, taem Peter trae for discouragem Jesus for duim wanem Jehovah laekem, Jesus kaonselem Peter front lo olketa nara disaepol. (Mark 8:32, 33) Hem no duim diswan for mek shame lo Peter, bat hem trainim hem and olketa nara disaepol for no duim samting wea olketa no garem raet for duim. Masbi Peter shame taem Jesus kaonselem hem, bat kaonsel hia helpem hem tu.

13. Wanem nao wanfala wei iumi savve kaen lo narawan?

¹³ Wanfala wei for kaen lo narawan wea iumi lovem, hem for tok stret lo hem. Taem iumi stretem hem, iumi savve followim example blo Jesus for iusim olketa Bible principle for helpem hem. Tok kaen lo hem. Hem gud for tingim, from hem lovem Jehovah and iumi tu, hem bae laek duim samting followim kaonsel. Hem gud for tingim tu olketa kwestin hia: ‘Taem mi lukim samwan duim samting wea no stret, waswe, mi willing for stretem hem? Sapos mi need for kaonselem samwan, waswe, mi tok kaen or mi tok kros lo hem? Wanem nao reason blo mi for kaonselem hem? Waswe, mi kaonselem hem from mi kros lo hem, or mi laek for helpem hem?’

14. Wanem nao mekem Jesus for duim gud samting for narawan?

¹⁴ Jesus duim gud samting for narawan. Jesus lovem Dadi blo hem, so taem hem duim gud samting for narawan hem evritaem garem gudfala reason for duim datwan. Hao nao samwan savve duim gud samting for narawan, bat hem no garem gudfala reason? Tingim disfala example. Jesus storyim samfala wea duim gud samting for pipol wea poor, bat olketa duim datwan bikos olketa laekem pipol for tingse olketa holy tumas. So nomata olketa duim gud samting, Jehovah no tinghae lo wanem olketa duim.​—Matt. 6:1-4.

15. Wanem nao mekem iumi for duim gud samting for narawan?

¹⁵ Iumi laek for olsem Jesus and duim gud samting for narawan for stretfala reason. Tingim olketa kwestin hia: ‘Waswe, mi savve lo gud samting for duim, and then mi duim datwan? Wanem nao reason blo mi for duim olketa gud samting?’

16. Wanem nao iumi shud duim evriday, and why nao olsem?

¹⁶ Nomata iumi garem finis niufala wei taem iumi baptaes, no tingse iumi no need for duim eni samting moa. Iumi need for duim samting for keepim “niufala wei” blo iumi. Wanfala samting wea iumi savve duim hem for traem best evriday for showimaot olketa gudfala wei. Jehovah hem gohed for duim samting, and hem iusim holy spirit, wea hem paoa blo hem, for duim datwan. (Jenesis 1:2) So iumi shud askem Jehovah for givim holy spirit lo iumi for helpem iumi for  showimaot olketa gudfala wei. Olsem example, disaepol James sei: “Faith bilong man wea no duim gudfala samting hem dae.” (Jas. 2:26) So evritaem iumi showimaot olketa gudfala wei, datwan pruvim holy spirit blo God hem helpem iumi.

17. Wanem nao iumi shud duim sapos iumi no kaen, patient, or iumi tok kros lo narawan?

¹⁷ Nomata iumi baptaes for staka year finis maet samfala taem iumi no showimaot olketa gudfala wei. Bat hem important for no givap for showimaot olketa gudfala wei. Tingim disfala tokpiksa. Sapos wanfala fevaret kaleko blo iu hem brek from hem pas lo wanfala chair, hao, bae iu torowem nao? Nomoa, bae iu trae for fixim, and next taem bae iu barava careful. Olsem tu, sapos iu no kaen, patient, or tok kros lo narawan, no discourage. Taem iu talem hem iu sorre, datwan bae helpem iutufala for stap gud moa, then iu bae traem best for no duim datwan moa.

18. Wanem nao iumi need for duim, and wanem nao iumi savve sure lo hem?

¹⁸ Iumi tinghae lo example wea Jesus showimaot for iumi! Iumi laek for traem best for followim example blo hem and keepim niufala wei blo iumi. Lo disfala study iumi storyim fofala wei wea holy spirit savve helpem iumi for garem. Maet hem gud for duim study abaotem olketa narafala wei wea Galatia 5:22, 23 storyim, and ting raonem hao iumi savve showimaot olketa wei hia. Iumi savve lukim olketa article abaotem diswan lo Research Index for Olketa Jehovah’s Witness anda lo subject “Christian Laef” and then go lo “Olketa Wei Wea Spirit Mekem Man for Garem.” Iumi sure Jehovah bae helpem iumi sapos iumi gohed for waka hard for garem niufala wei and for keepim datwan.